Jistgħu x-​Xbihat Iressquk Eqreb Lejn Alla?

GĦADD taʼ xbihat Eġizzjani, Babilonjani, u Griegi jimlew il-​mużewijiet illum. Statwi li darba kienu oġġetti taʼ venerazzjoni ferventi huma issa għall-​wiri sempliċement bħala xogħlijiet tal-​arti antika. Il-​qawwa tagħhom kienet biss fl-​immaġinazzjoni taʼ dawk li qimuhom. Billi maż-​żmien spiċċaw il-​popli li kienu jivvenerawhom, il-​qawwa li suppost li kellhom dawn ix-​xbihat ukoll sparixxiet. Ix-​xbihat ġew esposti bħala oġġetti impotenti—li ngħiduha kif inhi minn dejjem hekk kienu—u oġġetti bla ħajja tal-​injam, tal-​ġebel, jew tal-​metall.

Xi ngħidu dwar ix-​xbihat li qed jiġu vvenerati u meqjuma min-​nies illum? Huma dawn ix-​xbihat iktar potenti mix-​xbihat antiki Eġizzjani, Babilonjani, u Griegi? Veru li kienu strumentali f’li jgħinu lill-​bniedem jersaq eqreb lejn Alla?

Mal-mogħdija taʼ kull ġenerazzjoni, l-​umanità tidher li bil-​mod il-​mod qed titbiegħed iktar u iktar minn Alla. U x’jistgħu jagħmlu x-​xbihat kollha tad-​dinja dwar dan? Jekk ma jiħdux ħsiebhom, jimtlew kollha trab u eventwalment jitmermru u jispiċċaw fix-​xejn. Ma jistgħux jieħdu ħsieb tagħhom infushom, aħseb u ara kemm jagħmlu xi ħaġa għall-​bnedmin. Iktar importanti, madankollu, il-​Bibbja x’għandha xi tgħid fuq din il-​kwistjoni?

Jiswew il-​Flus, Elaborati, imma Bla Ebda Użu

Mhix xi sorpriża li l-​Bibbja tikxef ix-​xbihat bħala bla użu u kompletament mhux kapaċi li jgħinu lil dawk devoti lejhom biex jersqu eqreb lejn Alla. Għalkemm ix-​xbihat reliġjużi ġeneralment jiswew il-​flus u huma elaborati, il-​Bibbja turi x’verament jiswew meta tgħid: “L-​idoli tagħhom huma fidda u deheb, ix-​xogħol taʼ jdejn il-​bniedem tal-​art. Ħalq għandhom, imma ma jistgħux jitkellmu; għajnejn għandhom, imma ma jistgħux jaraw; widnejn għandhom, imma ma jistgħux jisimgħu. Imnieħer għandhom, imma ma jistgħux ixommu. Idejn huma tagħhom, imma ma jistgħux iħossu. Saqajn huma tagħhom, imma ma jistgħux jimxu; ma jlissnu ebda ħoss bil-​gerżuma tagħhom. Dawk li qegħdin jagħmluhom se jsiru sewwa sew bħalhom, dawk kollha li qegħdin jafdaw fihom.”−Salm 115:4-8.

Il-Bibbja mhux biss tikxef l-​idoli bħala taʼ bla valur imma titkellem b’mod taʼ kundanna rigward ix-​xbihat u dawk li jqimuhom: “Huma bħal naffâr taʼ għalqa bil-​ħjar, u ma jistgħux jitkellmu. Bla ma jfalli jinġarru huma, għax ma justgħu jagħmlu ebda pass. Tkunx beżgħan minħabba fihom, għax ma jistgħu jagħmlu xejn taʼ gwaj u, iktar minn hekk, il-​għemil taʼ xi ħaġa tajba m’ħuwiex magħhom. Kull raġel ġab ruħu tant bla raġuni li ma kienx jaf. Kull ħaddiem tal-​metall ċertament li se jistħi minħabba x-​xbiha mnaqqxa; għax ix-​xbiha mdewba tieġħu hija qerq, u m’hemm ebda spirtu fihom. Huma frugħa, xogħol taʼ twaqqigħ għaċ-​ċajt.”−Ġeremija 10:5, 14, 15.

Il-​Ħarsa tal-​Kattoliċi

Veru li ħafna minn dawk li jmilu, jitolbu u jixegħlu x-​xemgħat quddiem, u jbusu x-​xbihat reliġjużi ma jqisux lilhom infushom bħala idolaturi jew uħud li jqimu x-​xbihat. Per eżempju, il-​Kattoliċi jsostnu li huma jivveneraw lix-​xbihat taʼ Kristu u taʼ Marija, mhux għaliex ix-​xbihat infushom għandhom xi divinità, imma minħabba dawk li lilhom qed jirrappreżentaw. The World Book Encyclopedia tistqarr li “fil-​Knisja Kattolika Rumana, ix-​xbihat jiġu vvenerati bħala simboli tan-​nies li lilhom jirrappreżentaw.” Il-​kleru Kattoliku ppridkaw li huwa xieraq li tivvenera xbiha sakemm il-​venerazzjoni hija inferjuri fil-​kwalità għal dik li tixraq lil Alla nnifsu.

Ir-realtà hi li dawn ix-​xbihat qed jiġu vvenerati. Saħansitra in-​New Catholic Encyclopedia tammetti li venerazzjoni bħal din hija “att taʼ qima.” Madankollu, Ġesù Kristu qatagħha kontra l-​użu tax-​xbihat bħala għajnuniet f’li wieħed jersaq lejn Alla meta qal: “Ħadd ma jiġi għand il-​Missier ħlief permezz tieġħi.” (Ġwann 14:6) M’huwiex sorprendenti mela li l-​Kristjani tal-​ewwel seklu stmerrew l-​użu tax-​xbihat fil-​qima.

Xorta waħda, illum ir-​reliġjonijiet tal-​Kristjaneżmu jgħadduhom lill-​oħrajn kollha fin-​numru taʼ xbihat. Iva, minkejja l-​evidenza storika u Skritturali kollha li tikxef il-​bluha taʼ li wieħed jivvenera xbiha, l-​hekk imsejħin Kristjani mad-​dinja kollha jkomplu jmilu u jitolbu quddiem xbihat fit-​tfittxija sinċiera tagħhom għal Alla. Għala?

Imħajrin minn Għadu

Il-​profeta Isaija stqarr li dawk li qiemu x-​xbihat fi żmienu naqsu li jaraw il-​bluha tal-​azzjonijiet tagħhom minħabba li għajnejhom kienu ġew “imċajprin sabiex ma jarawx, qalbhom sabiex ma jkollhom ebda dehen.” (Isaija 44:18) Min jistaʼ jkollu influwenza tant kbira fuq l-​umanità? Il-​konċilju ikonoklastiku tas-​sena 754 E.K. iddikjara li l-​venerazzjoni tax-​xbihat ġiet introdotta minn Satana bl-​iskop li jiġbed lill-​bniedem ’il bogħod mill-​veru Alla. Kienet korretta din il-​konklużjoni?

Iva, għax taqbel mal-​Bibbja mnebbħa, li stqarret minn sekli qabel li l-​għadu ewlieni t’Alla, Satana x-​Xitan, “għama l-​imħuħ” tan-​nies sabiex il-​verità ‘ma tiddix.’ (2 Korintin 4:4) Mela meta wieħed jivvenera xi xbiha, minflok ma jersaq eqreb lejn Alla, ikun attwalment qed jaqdi l-​interessi tad-​demonji.—1 Korintin 10:19, 20.

Ersaq Qrib lejn Alla

Ix-​xbihat ma jistgħux igħinuna nersqu eqreb lejn Alla. Il-​Ħallieq Grandjuż, Alla Jehovah, jistmerr il-​venerazzjoni tax-​xbihat. (Dewteronomju 7:25) “Jehovah huwa Alla li jesiġi devozzjoni esklussiva.” (Naħum 1:2) Hu jgħid: “Jiena Jehovah. Dak hu ismi; u lil ħadd ieħor ma se nagħti l-​glorja tieġħi stess, lanqas it-​tifħir tieġħi lil immaġnijiet skolpiti.” (Isaija 42:8) Fi qbil maʼ dan, il-​Bibbja twissi li dawk li qed jagħtu venerazzjoni lix-​xbihat “mhux se jirtu s-​saltna t’Alla.”−Galatin 5:19-21.

Iżda, Jehovah huwa wkoll Alla mimli ħniena u maħfra. Il-​Bibbja titkellem dwar dawk li daru lejn Alla mill-​idoli tagħhom u ġew iddikjarati twajbin wara li ma komplewx bil-​prattiċi idolatrużi tagħhom. (1 Korintin 6:9-11; 1 Tessalonkin 1:9)Huma taw kas tal-​kliem taʼ Ġesù: “Alla huwa Spirtu, u dawk li qed iqimuh iridu jqimu bl-​ispirtu u l-​verità.”−Ġwann 4:24.

Studju ħerqan tal-​Bibbja se jirrivela li m’huwiex diffiċli biex tersaq eqreb lejn Alla. (Atti 17:26-28) Hu għandu personalità dħulija, kollha mħabba, u li tistaʼ tersaq lejh, u hu jistedinna u jistenna li aħna niżżviluppaw relazzjoni intima miegħu.—Isaija 1:18.

Ix-Xhieda taʼ Jehovah jistednuk biex issir taf lill-​Missier tagħna tas-​sema bħala Persuna, biex titgħallem dwar ismu, Jehovah, u dwar il-​kwalitajiet tiegħu u kif jittratta mal-​bnedmin. Permezz tal-​paġni tal-​Kelma tiegħu, il-​Bibbja, int se ssir tifhem kif tassew m’għandekx bżonn xi għajnuniet viżibbli, bħalma huma l-​istatwi u s-​santi, biex tersaq lejn Alla. Iva,‘ersaq qrib lejn Alla, u hu se jersaq qrib lejk.’—Ġakbu 4:8.

[Kaxxa f’paġna 5]

Il-​Kittieba tal-​Istorja Josservaw li . . .

◻ “Huwa fatt magħruf tajjeb li l-​Buddiżmu, msejjes fis-​sitt seklu QEK, ma rax l-​ewwel xbiha tal-​fundatur tieġħu sa madwar l-​ewwei seklu EK.”

“Għal sekli, it-​tradiżzjoni tal-​Ħindu kienet essenzjalment anikonika [mingħajr idoli jew xbihat].”

“II-Ħinduiżmu u l-​Buddiżmu, it-​tnejn li huma bdew anikonikament u biss bil-​ftit il-​ftit aċċettaw xbihat fil-​qima tagħhom. Il-​Kristjanità għamlet l-​istess.”—The Encyclopedia of Religion, minn Mircea Eliade.

◻ “Minn diversi rakkonti Bibliċi huwa evidenti li l-​qima vera t’Alla kienet ħielsa mix-​xbihat.... Fit-​TĠ [Testment il-​Ġdid], ukoll, il-​qima taʼ allat borranin u idoli huma pprojbiti.”—New Catholic Encyclopedia.

◻ “ll-Kristiani primittivi ma kinux jafu bi xbihat fil-​qima.”—Cyclopedia of Biblical, Theological,and Ecclesiastical Literature, minn McClintock u Strong.

◻ “La fit-​Testment il-​Ġdid, u lanqas fl-​ebda kitbiet ġenwini tal-​ewwel era tal-​Kristianità, ma tistaʼ tinstab xi traċċa tal-​użu tal-​istatwi jew santi fil-​qima tal-​Kristjani, kemm pubblika jew privata.”—A Concise Cyclopedia of Religious Knowledge, minn Elias Benjamin Sanford.

◻ “II-Kristjani bikrin kienu jħarsu bi twerwir lejn is-​sempliċi suġġeriment taʼ li jpoġġu x-​xbihat fil-​knejjes, u kienu jqisuha bħala idolatrija u xejn inqas li jmilu jew jitolbu quddiemhom.”—History of the Christian Church, minn John Fletcher Hurst.

◻ “Fil-​knisja tal-​bidu, kienu jiġu opponuti b’mod konsistenti xi inkwatri taʼ Kristu jew tal-​qaddisin li kienu jsiru jew jiġu vvenerati.”—The New Encyclopaedia Britannica.

◻ “Għalkemm il-​Knisja primittiva ma kinetx kontra l-​arti, iżda ma kellha l-​ebda xbiha taʼ Kristu.”—Schaff-Herzog Encyclopedia of Reliġious Knowledge.