Afda fid-Driegħ li Jsalva taʼ Jehovah
“O Jehovah, ... sir id-driegħ tagħna kull fil-għodu, iva, is-salvazzjoni tagħna fiż-żmien taʼ niket.”−ISAIJA 33:2.
1. Jehovah f’liema sens għandu driegħ setgħani?
JEHOVAH għandu driegħ setgħani. M’għandniex xi ngħidu, ladarba “Alla huwa Spirtu,” dan m’huwiex xi driegħ tal-laħam. (Ġwann 4:24) Fil-Bibbja, id-driegħ figurattiv jirrappreżenta abbiltà biex teżerċita qawwa. B’hekk, huwa bi driegħu li Alla jeħles lill-poplu tiegħu. Tabilħaqq, ‘bħal ragħaj, Alla jirgħa l-merħla tiegħu. Bi driegħu jiġbor flimkien il-ħrief, u fi ħdanu jġorrhom.’ (Isaija 40:11; Salm 23:1-4) Kemm iħossuhom fis-sigurtà n-nies taʼ Jehovah fid-driegħ taʼ mħabba tiegħu!—Qabbel Dewteronomju 3:24.
2. Liema mistoqsijiet hawn jixirqilhom il-konsiderazzjoni tagħna?
2 Id-driegħ taʼ Jehovah kif salva lill-poplu tiegħu, fil-passat u fil-preżent? Liema għajnuna jagħtihom Alla bħala kongregazzjoni? U għala jistgħu n-nies tiegħu jafdaw fid-driegħ tiegħu li jsalva matul in-niket kollu tagħhom?
Id-Driegħ li Jsalva t’Alla fl-Azzjoni
3. L-Iskrittura lil liema ħaġa tattribwixxi l-ħelsien taʼ Iżrael mill-Eġittu?
3 Qabel ħeles lill-Iżraeliti mill-jasar tal-Eġittu 3,500 sena ilu, Alla qal lill-profeta tiegħu Mosè: “Għid lil ulied Iżrael, ‘Jiena Jehovah, u jien ċertament li se noħroġkom minn taħt it-tagħbijiet tal-Eġizzjani u neħliskom mill-jasar tagħhom, u jien tabilħaqq se nakkwistakom lura bi driegħ miftuħ u b’ġudizzji kbar.” (Eżodu 6:6) Skond l-appostlu Pawlu, Alla ġab lill-Iżraeliti ’l barra mill-Eġittu “bi driegħ imgħolli ’l fuq.” (Atti 13:17) Ulied Kora attribwew il-konkwista tal-Art Imwiegħda lil Alla, billi qalu: “Ma kienx permezz tas-sejf tagħhom stess li huma ħadu pussess tal-art, u d-driegħ tagħhom stess ma kienx dak li ġabilhom is-salvazzjoni. Għax kienet idek il-leminija u d-driegħ tiegħek u d-dawl taʼ wiċċek, għaliex int ħadt gost bihom.”−Salm 44:3.
4. Il-fiduċja fid-driegħ li jsalva taʼ Jehovah kif ġiet ippremjata fil-jiem taʼ aggressjoni Assirjana?
4 Id-driegħ taʼ Jehovah ġie wkoll għall-għajnuna tal-poplu tiegħu fil-jiem taʼ aggressjoni Assirjana. F’dak iż-żmien il-profeta Isaija talab: “O Jehovah, urina favur. Fik ittamajna. Sir id-driegħ tagħna kull fil-għodu, iva, is-salvazzjoni tagħna fiż-żmien taʼ niket.” (Isaija 33:2) Dik it-talba ġiet imwieġba meta l-anġlu t’Alla qatel 185,000 fil-kamp Assirjan, waqt li bagħat lis-Sultan Sennakerib lil hinn minn Ġerusalemm “b’wiċċu kollu mistħija.” (2 Kronaki 32:21; Isaija 37:33-37) Meta tpoġġi fiduċja fid-driegħ li jsalva taʼ Jehovah dejjem tiġi ppremjat.
5. Id-driegħ setgħani t’Alla x’għamel għall-Kristjani ppersegwitati fit-tmiem tal-Ewwel Gwerra Dinjija?
5 Id-driegħ setgħani t’Alla salva lill-Kristjani midlukin li kienu ppersegwitati fit-tmiem tal-Ewwel Gwerra Dinjija. Fl-1918 il-kwartieri ġenerali tal-Ġemgħa li Tiggverna ġew attakkati mill-egħdewwa tagħhom, u aħwa magħrufin sewwa ġew mitfugħin il-ħabs. Beżgħanin mill-qawwiet dinjin, il-midlukin kważi waqqfu għalkollox ix-xogħol tagħhom taʼ għoti taʼ xiehda. Imma huma talbu biex jerġaʼ jingħata l-ħajja u biex jitnaddfu mid-dnub tan-nuqqas taʼ attività u mit-tniġġis tal-biżaʼ. Alla wieġeb billi ġiegħel li l-aħwa li kienu l-ħabs jinħelsu, waqt li tneħħitilhom kull akkuża ftit wara. Bħala riżultat taʼ veritajiet imlissna fil-konvenzjoni tagħhom fl-1919 u tat-tferrigħ tal-ispirtu li jqawwi t’Alla, il-midlukin ġew mogħtijin il-ħajja mill-ġdid għal servizz bla biżaʼ lil Jehovah bi twettieq finali taʼ Ġojeli 2:28-32.—Rivelazzjoni 11:7-12.
Għajnuna fil-Kongregazzjoni
6. Kif nafu li huwa possibbli li tissaporti sitwazzjoni taʼ prova f’xi kongregazzjoni?
6 Hekk kif Alla jwieżen lill-organizzazzjoni tiegħu inġenerali, driegħu jżomm lil individwi weqfin fiha. M’għandniex xi ngħidu, il-kundizzjonijiet m’huma perfetti fl-ebda waħda mill-kongregazzjonijiet għaliex il-bnedmin kollha huma imperfetti. (Rumani 5:12 ) Għalhekk xi qaddejja taʼ Jehovah jistgħu xi drabi jġarrbu sitwazzjoni taʼ prova f’xi kongregazzjoni. Per eżempju, għalkemm Gajus għamel “xogħol fidil” f’li laqaʼ aħwa li jżuru bl-ospitalità, Diotrefes ma laqagħhomx u saħansitra pprova jitfaʼ ’l barra mill-kongregazzjoni lil uħud ospitabbli. (3 Ġwann 5, 9, 10) Madankollu, Jehovah għen lil Gajus u oħrajn biex jibqgħu juru ospitalità b’appoġġ tax-xogħol taʼ ppridkar tas-Saltna. Serħan bit-talb fuq Alla għandu jgħinna biex nibqgħu nagħmlu xogħlijiet leali waqt li nistennew lilu biex jikkorreġi xi sitwazzjoni li tistaʼ tkun qed iġġarrab il-fidi tagħna.
7. Minkejja liema ċirkostanzi fil-kongregazzjoni taʼ Korintu Kristjani leali hemm wettqu d-dedikazzjoni tagħhom lil Alla?
7 Nassumu li int kont tassoċja mal-kongregazzjoni taʼ Korintu fl-ewwel seklu. Għal xi żmien, qasmiet heddew l-unità tagħha, u tħollija taʼ immoralità pperikolat l-ispirtu tagħha. (1 Korintin 1:10, 11; 5:1-5) Dawk li jemmnu ħadu lil xulxin fil-qrati tad-dinja, u xi wħud argumentaw fuq kwistjonijiet diversi. (1 Korintin 6:1-8; 8:1-13) Ġlied, għira, rabja, u diżordni għamlu l-ħajja diffiċli. Xi wħud saħansitra ddubitaw l-awtorità taʼ Pawlu u ċekknu l-abbiltà tiegħu kif jitkellem. (2 Korintin 10:10) Madankollu, uħud leali assoċjati maʼ dik il-kongregazzjoni wettqu d-dedikazzjoni tagħhom lil Alla matul dak iż-żmien taʼ prova.
8, 9. X’għandna nagħmlu jekk xi sitwazzjoni taʼ prova tikkonfrontana f’xi kongregazzjoni?
8 Jekk tqum sitwazzjoni taʼ prova, aħna rridu nibqgħu mal-poplu t’Alla. (Qabbel Ġwann 6:66-69.) Ejjew inkunu paċenzjużi maʼ xulxin, billi nirrealizzaw li xi wħud jieħdu iktar żmien minn oħrajn biex jilbsu “l-personalità l-ġdida” u jiżżejnu b’mogħdrija, ħniena, umiltà tal-moħħ, ħlewwa, u sabar fit-tul. Ladarba l-qaddejja t’Alla ġejjin ukoll minn sfondi differenti, ilkoll kemm aħna għandna bżonn nuru mħabba u maħfra.—Kolossin 3:10-14.
9 Wara ħafna snin taʼ servizz lil Jehovah wieħed ħu qal: “Jekk xi ħaġa kienet l-iktar importanti għalija, din kienet il-kwistjoni taʼ li nżomm qrib tal-organizzazzjoni viżibbli taʼ Jehovah. L-esperjenza bikrija tiegħi wrietni kemm m’huwiex għaqli li tistrieħ fuq raġunar uman. Ladarba kont reżolut fuq dak il-punt, kont determinat li nibqaʼ mal-organizzazzjoni leali. B’liema mod ieħor jistaʼ wieħed jikseb il-favur u l-barka taʼ Jehovah?” Tgħożż int bl-istess mod il-privileġġ tiegħek li taqdi lil Jehovah mal-poplu ferrieħi tiegħu? (Salm 100:2) Jekk iva, ma tħalli l-ebda ħaġa li tbiegħdek mill-organizzazzjoni t’Alla jew li teqridlek ir-relazzjoni tiegħek maʼ Dak li driegħu jsalva lil dawk kollha li jħobbuh.
Għajnuna Meta t-Tentazzjonijiet Jiġu Fuqna
10. (a) It-talb kif igħin lill-poplu t’Alla biex jiffaċċjaw it-tentazzjoni? (b) Liema ċertezza ta Pawlu fl-1 Korintin 10:13?
10 Bħala individwi leali assoċjati mal-organizzazzjoni t’Alla, aħna għandna l-għajnuna tiegħu matul żmien taʼ prova. Per eżempju, hu jgħinna biex inżommu l-integrità tagħna lejh meta tiġi fuqna t-tentazzjoni. M’għandniex xi ngħidu, għandna nitolbu fi qbil mal-kliem taʼ Ġesù: “[I]ġġibniex fit-tentazzjoni, imma eħlisna mill-wieħed mill-agħar,” Satana x-Xitan. (Mattew 6:9-13) Fil-fatt, aħna b’hekk nitolbu lil Alla biex ma jħalliniex nonqsu meta niġu ttantati biex ma nobduhx. Hu jwieġeb ukoll it-talb tagħna għall-għerf biex negħlbu l-provi. (Ġakbu 1:5-8) U l-qaddejja taʼ Jehovah jistgħu jkunu żguri mill-għajnuna tiegħu, għax Pawlu qal: “Ebda tentazzjoni ma ġiet fuqkom ħlief dik li hi komuni għall-bnedmin. Imma Alla hu leali, u mhux se jħallikom tiġu ttantati iktar milli tifilħu, imma flimkien mat-tentazzjoni se jagħmel ukoll it-triq tal-ħruġ sabiex tkunu tistgħu tissaportuha.” (1 Korintin 10:13) X’inhu s-sors taʼ din it-tentazzjoni, u Alla kif jagħmel it-triq tal-ħruġ?
11, 12. Għal liema tentazzjonijiet ċedew l-Iżraeliti, u kif nibbenefikaw aħna mill-esperjenzi tagħhom?
11 It-tentazzjoni tiġi minn ċirkostanzi li jistgħu jħajruna biex ma nkunux leali lejn Alla. Pawlu qal: “Dawn l-affarijiet saru l-eżempji tagħna, biex aħna ma nkunux persuni li nixtiequ affarijiet li jweġġgħu, saħansitra bħalma xtaquhom [l-Iżraeliti]. Lanqas issiru idolaturi, bħalma għamlu xi wħud minnhom; sewwa sew bħalma hu miktub: ‘In-nies qagħdu bil-qiegħda biex jieklu u jixorbu, u qamu biex jixxalaw.’ Lanqas ma nipprattikaw iż-żina, bħalma xi wħud minnhom ikkommettew iż-żina, biss biex jaqgħu, tlieta u għoxrin elf minnhom f’jum wieħed. Lanqas ma npoġġu lil Jehovah fi prova, bħalma poġġewh xi wħud minnhom fi prova, biss biex igħibu bis-serpenti. Lanqas kunu gemgiema, sewwa sew bħalma xi wħud minnhom gemgmu, biss biex igħibu b’dak li jeqred.”−1 Korintin 10:6-10.
12 L-Iżraeliti xtaqu affarijiet li jweġġgħu meta huma ċedew għat-tentazzjoni li jkunu rgħibin meta ġabru u kielu summien provdut b’mod mirakoluż minn Alla. (Numri 11:19, 20, 31-35) Iktar kmieni, huma saru idolaturi meta l-assenza taʼ Mosè tat wisgħa lit-tentazzjoni biex jieħdu sehem fil-qima tal-għoġol. (Eżodu 32:1-6) Eluf mietu għaliex ċedew għat-tentazzjoni u kkommettew iż-żina maʼ nisa Moabiti. (Numri 26:1-9) Meta l-Iżraeliti ċedew għat-tentazzjoni u gemgmu dwar il-qerda taʼ Kora, Datan, Abiram, u sħabhom li kienu ribellużi, 14,700 nqatlu minn kastig mibgħut b’mod divin. (Numri 16:41-49) Aħna nistgħu nibbenefikaw minn esperjenzi bħal dawn jekk nirrealizzaw li l-ebda waħda minn dawn it-tentazzjonijiet ma kienet tant kbira li l-Iżraeliti ma setgħux irreżistewha. Huma setgħu għamlu dan li kieku eżerċitaw fidi, urew gratitudni għall-ħarsien taʼ mħabba t’Alla, u apprezzaw it-tjieba tal-Liġi tiegħu. Imbagħad id-driegħ taʼ Jehovah setaʼ jsalvahom, saħansitra bħalma jistaʼ jsalva lilna.
13, 14. Jehovah kif jiftaħ it-triq meta l-qaddejja tiegħu jiffaċċjaw it-tentazzjoni?
13 Bħala Kristjani, aħna niffaċċjaw tentazzjonijiet komuni għall-bnedmin. Madankollu, aħna nistgħu nibqgħu leali lejn Alla billi nitolbu għall-għajnuna tiegħu u naħdmu biex nirreżistu t-tentazzjoni. Alla huwa leali, u ma jħalliniex niġu ttantati iżjed milli nifilħu. Jekk aħna leali lejn Jehovah, qatt ma se nsibuha impossibbli li nagħmlu r-rieda tiegħu. Hu jiftħilna t-triq billi jsaħħaħna biex nirreżistu t-tentazzjoni. Per eżempju, meta niġu ppersegwitati, nistgħu niġu ttantati biex nagħmlu kompromess bit-tama li neħilsu mit-torturi jew mill-mewt. Imma jekk qed nittamaw fid-driegħ setgħani taʼ Jehovah, it-tentazzjoni qatt ma tilħaq il-punt fejn hu ma jistax iqawwi l-fidi tagħna u jagħtina biżżejjed saħħa biex inżommu l-integrità. Bħalma qal l-appostlu Pawlu: “Aħna ppressati b’kull mod, imma mhux imrassin li ma niċċaqalqux; aħna mħawdin, imma mhux assolutament mingħajr ebda mod taʼ ħruġ; aħna ppersegwitati, imma mhux imħollijin lampa stampa; aħna mitfugħin ’l isfel, imma mhux meqrudin.”—2 Korintin 4:8, 9.
14 Jehovah iwieżen ukoll lill-poplu tiegħu billi juża l-ispirtu tiegħu bħala wieħed li jfakkar u li jgħallem. Huwa jfakkarna punti Skritturali u jgħinna nifhmu kif napplikawhom sabiex nirreżistu t-tentazzjoni. (Ġwann 14:26) Qaddejja leali taʼ Jehovah jifhmu l-kwistjonijiet involuti f’tentazzjoni u ma jiġux imqarrqin f’li jsegwu korsa żballjata. Alla jiftaħ it-triq billi jgħinhom jissaportu saħansitra sal-mewt mingħajr ma jċedu għat-tentazzjoni. (Rivelazzjoni 2:10) Minbarra li jgħin lill-qaddejja tiegħu permezz tal-ispirtu tiegħu, Jehovah juża l-anġli tiegħu għan-nom tal-organizzazzjoni tiegħu.—Ebrej 1:14.
Għajnuna f’Affarijiet Persunali
15. Liema għajnuna persunali nistgħu nsibu fil-Għanja taʼ Salamun?
15 Dawk assoċjati mal-organizzazzjoni taʼ Jehovah għandhom il-għajnuna tiegħu f’affarijiet persunali. Per eżempju, xi wħud jistgħu qed ifittxu sieħeb Kristjan. (1 Korintin 7:39) Jekk ikun hemm xi diżappunt, jistaʼ jkun taʼ għajnuna li tikkunsidra lil Salamun is-sultan taʼ Iżrael. Hu naqas li jirbaħ id tfajla Xulamita fiż-żwieġ għaliex hi kienet tħobb ragħaj umli. Dak li kiteb is-sultan dwar din il-ħaġa jistaʼ jissejjaħ Il-Għanja taʼ Mħabba Mħarbta taʼ Salamun. Aħna forsi nibku jekk l-isforzi romantiċi tagħna stess jisfaw bla frott f’xi każ, imma Salamun għeleb id-diżappunt tiegħu, u hekk nistgħu nagħmlu aħna. L-ispirtu t’Alla jistaʼ jgħinna biex nuru kontroll fuqna nfusna u kwalitajiet oħra taʼ tjieba. Il-Kelma tiegħu tgħinna naċċettaw il-fatt taʼ spiss taʼ wġigħ li wieħed ma jistax ikollu mħabba romantika għal kwalunkwe persuna. (Għanja taʼ Salamun 2:7; 3:6) Madankollu, Il-Għanja taʼ Salamun turi li jistaʼ jkun possibbli li ssib persuna fit-twemmin bħalna li tħobbna bil-għożża. Iktar importanti, din “il-għanja superlattiva” hija mwettqa fl-imħabba tar-Ragħaj mill-Aħjar, Ġesù Kristu, għall-“għarusa” tiegħu taʼ 144,000 segwaċi midlukin.—Għanja taʼ Salamun 1:1; Rivelazzjoni 14:1-4; 21:2, 9; Ġwann 10:14.
16. It-“tribulazzjoni f’laħamhom” imġarrba minn Kristjani miżżewġin tistaʼ tinkludi liema ħaġa?
16 Saħansitra dawk li jiżżewġu wieħed li jemmen għandhom “tribulazzjoni f’laħamhom.” (1 Korintin 7:28) Se jkun hemm anzjetajiet u tħassib li jinvolvu lil raġel u mara miżżewġin u lit-tfal tagħhom. (1 Korintin 7:32-35) Il-mard jistaʼ jġib tagħbijiet u stress. Persekuzzjoni jew diffikultà ekonomika jistgħu jagħmluha diffiċli għal missier Kristjan biex jipprovdi n-neċessitajiet tal-ħajja għall-familja tiegħu. Ġenituri u tfal jistgħu jiġu separati minħabba priġunerija, u xi wħud jistgħu jiġu ttorturati jew saħansitra mogħtijin il-mewt. Imma f’dawn iċ-ċirkostanzi kollha, aħna nistgħu nirreżistu t-tentazzjoni li niċħdu l-fidi jekk aħna verament nafdaw fid-driegħ li jsalva taʼ Jehovah.—Salm 145:14.
17. Liema problema fil-familja għen Alla lil Iżakk u Rebekka biex jissaportuha?
17 Aħna forsi jkollna nissaportu xi provi għal żmien twil. Per eżempju, iben jistaʼ jikkaġuna niket lill-ġenituri tiegħu taʼ tjieba billi jiżżewweġ lil xi waħda li ma temminx. Dak ġara fil-familja tal-patrijarka Iżakk u martu Rebekka. Binhom Eżaw li kellu 40 sena żżewweġ żewġ nisa Ħittin li kienu “sors taʼ mrar tal-ispirtu għal Iżakk u Rebekka.” Fil-fatt, “Rebekka baqgħet tgħid lil Iżakk: ‘Sirt naborrixxi lil din il-ħajja minn tiegħi minħabba l-ulied nisa taʼ Het. Jekk Ġakobb [l-iben l-ieħor tagħhom] qatt jieħu mara mill-ulied nisa taʼ Ħet bħal dawn mill-ulied nisa tal-art, taʼ liema ġid hi l-ħajja għalija?’” (Ġenesi 26:34, 35; 27:46) Milli jidher, ir-ruħ twajba taʼ Rebekka kienet itturmentata b’din il-problema kontinwa. (Qabbel 2 Pietru 2:7, 8.) Madankollu, id-driegħ taʼ Jehovah wieżen lil Iżakk u Rebekka, billi għenhom jissaportu din il-prova fil-waqt li jżommu relazzjoni qawwija Miegħu.
18. Liema prova persunali ssaporta C. T. Russell bil-għajnuna t’Alla?
18 Huwa taʼ niket meta membru mgħammed tal-familja jnaqqas fis-servizz t’Alla. (Qabbel 2 Timotew 2:15.) Madankollu, xi wħud saħansitra ssaportew it-telfa spiritwali taʼ sieħeb, jew sieħba, bħalma ġralu Charles T. Russell, l-ewwel president tal-Watch Tower Society. Martu qatgħet ir-rabtiet tagħha mas-Soċjetà u abbandunatu fl-1897, wara kważi 18-il sena taʼ żwieġ. Hi applikat għal separazzjoni legali fl-1903, u din ġiet maħruġa fl-1908. Id-dieqa tiegħu kienet ċara meta qalilha f’ittra bikrija: “Jien tlabt bil-ħerqa lill-Mulej għan-nom tiegħek. . . . M’inix se ntaqqlek b’rakkonti tan-niket tiegħi, lanqas ma jien se nipprova naħdem fuq is-simpatiji tiegħek billi niddeskrivilek l-emozzjonijiet tiegħi, hekk kif jien minn żmien għal żmien insib xi lbiesi tiegħek u affarijiet oħra li jġibu b’mod ċar quddiem għajnejja l-persuna li kont qabel—mimlija b’tant imħabba u simpatija u għajnuna—l-ispirtu taʼ Kristu. . . . O, ikkunsidra bit-talb dak li se ngħid. U kun ċerta li x-xifer jaqtaʼ tan-niket tiegħi, in-niggieża tiegħu, mhix is-solitudni tiegħi nnifsi għall-bqija tal-vjaġġ tal-ħajja, imma l-waqgħa tiegħek, għażiża tiegħi, it-telfa tiegħek taʼ dejjem, kif nistaʼ naraha jien.” Minkejja dan l-uġigħ tal-qalb, Russell kellu l-appoġġ t’Alla sat-tmiem taʼ ħajtu fuq l-art. (Salm 116:12-15) Jehovah dejjem iwieżen lill-qaddejja leali tiegħu.
’Il Barra min-Niket Kollu
19. X’għandna niftakru jekk jippersistu problemi taʼ niket?
19 In-nies taʼ Jehovah jafuh bħala “Alla taʼ atti li jsalvaw,” Wieħed “li kuljum iġorr it-tagħbija għalina.” (Salm 68:19, 20) Għalhekk, bħala individwi ddedikati li nassoċjaw mal-organizzazzjoni tiegħu tal-art, ejjew qatt ma nċedu għad-disperazzjoni jekk jippersistu xi problemi taʼ niket. Ftakar li “Alla hu għalina kenn u saħħa, għajnuna li tistaʼ tinstab malajr waqt in-niket.” (Salm 46:1) Il-fiduċja tagħna fih dejjem tiġi ppremjata. “Jien staqsejt lil Jehovah, u hu weġibni,” qal David, “u mill-qatgħiet kollha tiegħi hu ħelisni. . . . Dan il-milqut sejjaħ, u Jehovah innifsu semaʼ. U min-niket kollu tiegħu Hu salvah.”—Salm 34:4-6.
20. Liema mistoqsija jibqaʼ għall-konsiderazzjoni?
20 Iva, Missierna tas-sema jsalva lill-poplu tiegħu min-niket kollu. Hu jappoġġja lill-organizzazzjoni tiegħu tal-art, billi jipprovdi għajnuna f’affarijiet tal-kongregazzjoni u f’affarijiet persunali. Tabilħaqq, “Jehovah mhux se jabbanduna lill-poplu tiegħu.” (Salm 94:14) Imma ejjew issa nikkunsidraw modi oħrajn li fihom Jehovah igħin lill-poplu tiegħu individwalment. Missierna tas-sema kif iwieżen lill-qaddejja tiegħu li huma morda, dipressi mentalment, milqutin mid-dieqa minħabba xi mewt, jew imnikktin minħabba l-iżballji tagħhom? Kif se naraw, f’dawn l-affarijiet ukoll, aħna għandna raġuni biex nistrieħu fuq id-driegħ setgħani taʼ Jehovah.
Inti Kif Twieġeb?
◻ Id-driegħ taʼ Jehovah kif ġab salvazzjoni fiż-żminijiet taʼ qabel?
◻ Jehovah kif igħin lill-poplu tiegħu fil-kongregazzjoni llum?
◻ Liema għajnuna jipprovdi Alla f’affarijiet persunali?
◻ X’għandna nagħmlu jekk problemi taʼ niket jippersistu?