L-Ospitalità taʼ Malta Ġġib Barkiet
MALTA kienet l-art li pprovdiet dehra taʼ serħan mill-baħar għall-appostlu Pawlu hekk kif kien innawfragat fl-ewwel seklu E.K. L-abitanti tal-gżira laqgħu lilu u lil sħabu li vvjaġġaw miegħu “b’tant għajnuna.” Fil-fatt, il-Maltin urew lill-vjaġġaturi “qalb tajba umana staordinarja.”—Atti 28:1, 2.
Iktar tard, ir-raġel ewlieni tal-gżira, Publiju, laqaʼ lil Pawlu u lil sħabu b’mod ospitabbli u ‘kompla magħhom minn qalbu għal tlett ijiem.’ Meta ġriet l-aħbar li l-appostlu kien fejjaq lil missier Publiju mid-deni u mid-disenterija, “il-bqija tan-nies fuq il-gżira li kellhom xi mard ukoll bdew jiġu għandu biex jitfejqu.” (Atti 28:7-9) Imma Pawlu għamel iktar minn hekk. Hu żeraʼ ż-żrieragħ tal-verità fi qlub in-nies, u dan irriżulta f’ħafna barkiet għal dawn l-abitanti ospitabbli. Il-lum, l-istess ħaġa qed tiġri f’Malta. Ejja u ara kif.
Viżitaturi Jġibu Aħbar Tajba
Mill-ajru, Malta mimlija xemx tidher tiddi bħala ġawhra f’nofs il-Mediterran kaħlani. Meta jasal fl-ajruport taʼ Ħal-Luqa, viżitatur jara art mimlija xemx bi ftit li xejn veġitazzjoni. Meta jinżel fuq l-art, jiskopri li din il-gżira taʼ tmienja bi sbatax-il mil huwa stmat li jgħixu fiha madwar 347,000 abitant. Il-koppli u l-kampnari taʼ knejjes mingħajr għadd u l-katidrali taʼ Malta jirrivelaw l-isfond reliġjuż tagħha. Imma f’dan is-seklu 20, kif ibbenefika l-poplu Malti minn żjajjar tax-Xhieda taʼ Jehovah?
Wieħed indokratur li jivvjaġġa li jismu David mar id-dar taʼ Jana u sab rispons tajjeb għall-messaġġ tas-Saltna. “Kont sirt imxebbaʼ ħafna bl-indħil tal-knisja fil-politika,” tgħid Jana, “u jien għalhekk ippruvajt insib fil-Bibbja l-verità dwar il-gvern t’Alla. Imma hekk kif qrajtha, kien hemm xi affarijiet li ma tantx stajt nifhimhom. Immaġina kemm kont kurjuża meta dan il-viżitatur fil-bieb tiegħi staqsieni jekk kontx naf x’kienet is-Saltna t’Alla! Immedjatament, staqsejtu biex jurini t-tweġiba mill-Bibbja Kattolika tiegħi. Hekk għamel. F’dak l-istess jum kont naf li sibt il-verità.”
Waħda mix-Xhieda lokali rranġat li tistudja l-Bibbja maʼ Jana. Meta David reġaʼ lura Malta sitt xhur wara, x’sorpriża sabiħa ħa li jsib lil Jana tilqgħu fil-Kingdom Hall! Hi malajr kienet lesta biex tkun pubblikatriċi tal-aħbar tajba tas-Saltna.
Frans, ir-raġel taʼ Jana, ukoll kien ġie mħawwad mit-tagħlim tal-knisja. Waqt li żarha darba minnhom meta hi kienet l-isptar, hu sabha tismaʼ ‘tape recordings’ taʼ taħditiet pubbliċi dwar il-Bibbja mogħtijin fil-Kingdom Hall. Wara li kien samaʼ preżentazzjoni fuq is-suġġett tal-familja, Frans innota kemm kien taʼ min joqgħod fuqu l-parir tal-Bibbja, u bħala riżultat, hu ddeċieda li jibda jattendi l-laqgħat Kristjani. Malajr sar konxju dwar problema li kellu li riedet tiġi solvuta. X’kienet?
Għal madwar 20 sena, Frans kien jaħdem bħala kruppier fil-każinò. Hu issa rrealizza li dak l-impjieg li kien jinvolvi l-logħob tal-azzard ma kienx jaqbel mal-prinċipji Kristjani li jikkundannaw ir-regħba u x-xeħħa. (Rumani 13:9, 10; 1 Korintin 6:9, 10) “Għalkemm għall-ewwel kont nieqes mill-fidi meħtieġa biex inbiddel l-impjieg tiegħi,” jammetti Frans,” jien tlabt għall-għajnuna taʼ Jehovah. Fl-aħħar, sibt xogħol ieħor li jgħinni biex nieħu ħsieb taʼ marti u ibni, Sandro.” Illum Frans qed jaqdi bħala anzjan f’kongregazzjoni lokali tax-Xhieda taʼ Jehovah.
Faraġ Mill-Iskrittura
Rose kienet ilha miżżewġa lil Ġorġ għal sitt snin u kellha żwieġ hieni, meta hu miet traġikament f’inċident. Hi ma sabet l-ebda faraġ f’dak li l-qassis qalilha, jiġifieri li Alla ħa lil Ġorġ għaliex kien għajjur għall-imħabba li hi kellha għal żewġha. Rose saret tant dipressa li hi bdiet taħseb jekk tneħħix il-ħajja tat-tliet uliedha u mbagħad tikkommetti suwiċidju.
Imma x’bidla seħħet fuq Rose meta waħda xhud li jisimha Helen bdiet tikkonduċi studju tal-Bibbja magħha! Rose malajr bdiet tkun imfarrġa mit-tagħlim Skritturali tal-irxoxt. (Ġwann 5:28, 29) Fl-istess ħin, hi kellha inkuraġġiment mingħand Peter, indokratur li jivvjaġġa ieħor. Hi bbenefikat ħafna mit-taħdidiet tiegħu dwar l-irxoxt. Imqanqla minn din it-tama, Rose ingħaqdet maʼ Helen fil-għoti taʼ xiehda pubblika, u t-tnejn li huma issa qed jaqdu bħala pijunieri regulari, jew xandara ‘full-time’ tas-Saltna.
Inkuraġġiment Biex Ikun Żeluż
Joe ġej minn familja kbira, għax huma qegħdin 12 b’kollox, subien u bniet. Inkuraġġit minn indokratur li jivvjaġġa, hu b’mod żeluż ta xiehda lil ħafna minn qrabatu. “Għall-ewwel,” huwa jgħid, “il-familja tiegħi kienu jafu li dak li kont nispjegalhom mill-Bibbja kien jagħmel sens. Imma meta raw li l-interess tiegħi f’li nsir Xhud kiber, bidlu fehmithom, u lkoll kemm huma ħaduha kontrija—speċjalment missieri.” L-attitudni tagħhom tfietu ż-żelu taʼ Joe?
Xejn affattu! Per eżempju, meta t-tarbija taʼ waħda minn ħutu l-bniet kienet marida u waslet biex tmut, Joe ta xiehda lil oħtu, billi kellimha dwar it-tama tal-irxoxt. Issa din l-oħt hija Xhud imgħammda taʼ Jehovah. Wara, wieħed mill-aħwa subien il-kbar taʼ Joe u l-familja tiegħu wrew interess fil-verità. Imbagħad ħuh il-kbir u l-familja tiegħu ħadu l-waqfa tagħhom favur is-Saltna t’Alla. Sadattant, missier Joe beda jsir iktar u iktar irrabjat. Meta l-oħt iż-żgħira taʼ Joe ukoll bdiet tistudja l-Bibbja, missier Joe keċċieh ‘il barra mid-dar tiegħu. Bla biżaʼ Joe uża kull okkażjoni biex iżur lil qrabatu u jitkellem dwar il-messaġġ tal-Bibbja. Xorta, missieru rreaġixxa b’rabja kbira u qallu: “Għala ma tkellimx lill-qassis? Hu jafha l-aħjar il-Bibbja!” Joe wieġeb li hu kien jagħmel dan bil-qalb kollha basta missieru jmur miegħu. Kif marret iż-żjara tagħhom?
“Irranġajna l-jum u l-ħin,” Joe jirrakkonta, “imma l-qassis ried ikun jaf is-suġġett li kellu jipprepara għax, kif spjega hu, billi kien ħareġ mis-seminarju xi sebaʼ snin qabel, kellu bżonn jagħmel xi ftit riċerka. . . . Imma wara ġimgħa, xahar, u saħansitra xahrejn, il-qassis ma żamm l-ebda appuntament. Meta missieri osserva dan, hu bidel l-opinjoni tiegħu dwar il-knisja u bil-mod il-mod irrealizza li dak li jien tgħallimt mill-Bibbja kien veru.” Missier Joe fl-aħħar aċċetta l-verità, u ġab għal 29 in-numru tal-membri tal-familja tiegħu li qed jaqdu fis-servizz taʼ Jehovah.
Parir taʼ Għajnuna Jġib Barkiet
Billi tkellem b’mod entużjast dwar saħansitra indokratur ieħor li jivvjaġġa, pijunier miżżewweġ li jismu Ignazio jispjega: “Paul u l-mara tiegħu ġew joqogħdu magħna. Huma għenuna t-tnejn li aħna fir-relazzjoni tagħna taż-żwieġ kif ukoll fil-ministeru tal-għalqa. Hu dejjem enfasizza l-importanza tal-ippridkar.”
Ignazio jiftakar x’ġara meta Paul iltaqaʼ mal-anzjani tal-kongregazzjoni u l-qaddejja ministerjali matul l-aħħar żjara tiegħu. “Meta jien għidt li ridt nieħu ħin mix-xogħol tal-ippridkar dik il-għodwa biex nipprepara l-parti tiegħi fuq il-programm tal-laqgħa,” igħid Ignazio, “Paul qalli li hu kien se joħroġ xorta fis-servizz tal-għalqa avolja jien ma stajtx immur miegħu. Meta qalli hekk, iddeċidejt li jien immur ukoll. Kemm berikha Jehovah d-deċiżjoni tiegħi! Dik il-għodwa bdejt studju tal-Bibbja, u minnu, hemm issa sitta min-nies fil-verità.”—Qabbel 3 Ġwann 4.
Tibdil taʼ Inkuraġġiment
Kull darba li anzjan li jivvjaġġa jżur lil sħabu Xhieda f’Malta, huma jilqgħuh b’mod ospitabbli u huma ħerqana li jibbenefikaw mill-inkuraġġiment u t-twiddib tiegħu. (Qabbel 3 Ġwann 5-8.) Bħala riżultat, iktar u iktar nies Maltin qed jieħdu waqfa soda għal Alla Jehovah u s-Saltna tiegħu. Sat-tmiem tas-sena taʼ servizz tal-1989, 389 minn dawn l-abitanti ospitabbli taʼ din il-gżira kienu għamlu dan. Organizzati issa f’ħames kongregazzjonijiet li dejjem jikbru (erbaʼ f’Malta u waħda fuq il-gżira qrib taʼ Għawdex), huma jipproklamaw l-aħbar tajba bil-qlubija.
L-indokraturi li jivvjaġġaw kollha li kienu assenjati li jiġu Malta fi snin riċenti ħassew kif ħassu l-appostlu Pawlu, li qal lill-Kristjani Rumani: “Qed nixxennaq biex narakom, biex inkun nistaʼ naqsam xi rigal spiritwali magħkom sabiex intom tistgħu tintgħamlu sodi.” Iż-żjajjar tagħhom tassew irriżultaw f’“tibdil taʼ inkuraġġiment” rinfreskanti. (Rumani 1:11, 12) Barra minn hekk, l-attivitajiet tal-ippridkar tas-Saltna tax-Xhieda taʼ Jehovah qed iġibu barkiet spiritwali għonja lill-poplu ospitabbli taʼ Malta.