PAĊI DINJIJA—X’SE TFISSER VERAMENT?

Il-​paċi dinjija li Alla għandu f’moħħu se tinvolvi ferm iktar minn waqfien globali taʼ ġlied jew stat fejn gwerra nukleari tkun bluha. Dan hu evidenti mill-​mod kif il-​Bibbja tuża l-​kelma “paċi.”

Per eżempju, fl-​Iskrittura Ebrajka (it-“Testment il-​Qadim”) il-​kelma għal paċi hija sha·lohmʹ. Forma taʼ din il-​kelma hija wżata f’Ġenesi 37:14, fejn il-​patrijarka Ġakobb igħid lil ibnu Ġużeppi: “Ara jekk ħutek humiex qawwijin u sħaħ u jekk il-​merħla hix qawwija u sħiħa, u ejja lura għidli.”a Sha·lohmʹ hija wżata wkoll f’Ġenesi 41:16, fejn hi mogħtija “prosperità.”

F’sens Bibliku, mela, il-​paċi vera ma tinvolvix sempliċement waqfien taʼ ostilitajiet imma wkoll saħħa, sigurtà, u kuntentizza. Il-​ħarġa taʼ qabel tagħna wriet li l-​bnedmin m’humiex kapaċi jsolvu t-​taħbila taʼ kif iġibu l-​paċi. Ġesù Kristu biss, il-​“Prinċep tal-​Paċi,” se jgħaqqad il-​biċċiet flimkien u jġib il-​vera paċi għall-​art. (Isaija 9:6, 7) Ikkunsidra, per eżempju, il-​profeziji tal-​Bibbja f’Salm 72:7, 8 dwar il-​ħakma taʼ dak il-​wieħed: “Fi żmienu t-​twajjeb se jinbet, u l-​kotra taʼ paċi sakemm il-​qamar ma jibqax iżjed. U se jkollu sudditi minn baħar sa baħar u mix-​Xmara sa truf l-​art.” Immaġina—saħħa, sigurtà, u kuntentizza fuq skala mondjali! L-​ebda ftehim politiku ma qatt jistaʼ jwettaq dan. Is-​Saltna t’Alla biss tistaʼ, u se takkwista bil-​wisq iktar. Il-​Bibbja tagħtina numru taʼ titwiliet profetiċi bil-​quddiem għal ġo din il-​paċi dinjija futura. Ejjew nikkunsidraw xi ftit minnhom.

Id-​Diżarm Globali—Bil-​Mod t’Alla!

Salm 46:8, 9 jgħid: “Ejjew, ilmħu l-​attivitjiet taʼ Jehovah, kif wettaq ġrajjiet tal-​iskantament fuq l-​art. Qiegħed iġiegħel il-​gwerer jieqfu sa tarf l-​art. Il-​qaws hu jaqsam fi tnejn u l-​lanza jkissirha f’biċċiet; il-​vaguni jaħraqhom fin-​nar.” Il-​kelmiet “qaws,” “lanza,” u ‘vagun,’ huma simboli taʼ kwalunkwe xorta taʼ arma jew makkinarju taʼ gwerra. Jehovah b’hekk jasal iktar ’il bogħod mil-​limitazzjoni tal-​armamenti jew saħansitra diżarm totali. Hu bir-​reqqa jelimina l-​armi nukleari, il-​kanuni, it-​tankijiet, dawk li jvaraw il-​missili, bombi tal-​idejn, esplussivi, ‘rifles,’ xkubetti,—kwalunkwe ħaġa li tistaʼ thedhed il-​paċi globali!

Madankollu, l-​armi waħedhom ma jikkaġunawx gwerra. Ġeneralment, il-​gwerra għandha l-​egħruq tagħha fin-​natura taʼ mibgħeda, regħba, jew vjolenza taʼ bnedmin imperfetti. (Qabbel Ġakbu 4:1-3.) Is-​Saltna t’Alla għalhekk se tattakka dan il-​għerq tal-​kaġun tal-​gwerra billi telimina traċċi vili bħal dawn mill-​personalità tan-​nies. Kif? Permezz taʼ programm edukattiv mad-​dinja kollha. “L-​art żgur se tkun mimlija bil-​għarfien taʼ Jehovah bħalma l-​ilmijiet qed jiksu lill-​istess baħar.”−Isaija 11:9.

Billi jkunu ġew “imgħallmin minn Jehovah” il-​bnedmin mhux se jaraw iktar differenzi razzjali bħala bażi għal konflitt, nuqqas taʼ qbil, jew superjorità. (Ġwann 6:45) “Alla mhux parzjali,” u l-​abitanti tal-​art se jirriflettu l-​imparzjalità tiegħu. (Atti 10:34) Is-​Saltna se telimina wkoll kwalunkwe potenzjal għal konflitt nazzjonali billi telimina l-​limiti nazzjonali. ‘Minn baħar sa baħar u sa truf l-​art,’ kollha se jaħilfu l-​allejanza minn rajhom u grata lejn il-​ħakma taʼ Kristu.—Salm 72:8.

Sabiex paċi bħal din tibqaʼ, is-​Saltna se telimina wkoll l-​iktar forza li tifred fl-​istorja tal-​bnedmin: ir-​reliġjon falza. (Sofonija 2:11) L-​umanità se tkun magħquda fil-​qima tagħha tal-​uniku veru Alla. (Isaija 2:2, 3) Se jkun kulħadd bħall-​aħwa!

Paċi Mill-​Bieb ’il Ġewwa

Kemm tkun tiswa, madankollu, il-​paċi dinjija jekk fid-​djar privati jkun hemm gwerer sħaħ fejn l-​insulti, kliem li jweġġaʼ, u theddid ikunu qed isiru l-​ħin kollu. Dan hu l-​każ maʼ ħafna mill-​familji llum. Xi familji oħra jaħbu l-​odju li għandhom billi ma jitkellmux.

Il-vera paċi trid għalhekk tinkludi trankwillità domestika. Permezz tal-​programm edukattiv tas-​Saltna, l-​irġiel u n-​nisa jiġu mgħallmin kif jittrattaw maʼ xulxin bl-​imħabba u bir-​rispett. (Kolossin 3:18, l9) It-​tfal jiġu mgħallmin biex ‘ikunu ubbidjenti lejn il-​ġenituri tagħhom f’kollox.’ (Kolossin 3:20) Mhux se jkun hemm żgħażagħ li jfixklu u jinkwetaw lill-​ġenituri tagħhom. L-​ubbidjenza se tkun il-​ħaġa normali, il-​koperazzjoni r-​regola. It-​tfal se jkunu għaxqa tħares lejhom u taʼ ferħ li jkunu miegħek.

Illum, pressjonijiet ekonomiċi jaggravaw ħafna t-​tensjonijiet familjari, hekk kif iż-​żewġ ġenituri jkollhom taʼ spiss iġorru t-​tagħbijiet tqal taʼ mpjieg sekulari. Imma taħt il-​ħakma taʼ Kristu, il-​familji se jistrieħu mit-​tagħbijiet finanzjarji kbar—kera għolja, pagamenti li dejjem igħolew, taxxi li dejjem jiżdiedu, u nuqqas taʼ xogħol. Xogħol li jissodisfa se jkun hemm bil-​kotra. U ħadd ma se jkun bla dar. Innota kif il-​profezija taʼ Isaija 65:21-23 turi dawn il-​fatti: “U ċertament li se jibnu djar u jgħammru fihom . . . Mhux se jibnu huma u jgħammar xi ħadd ieħor; mhux se jħawlu huma u jiekol xi ħadd ieħor.... U x-​xogħol taʼ jdejhom il-​magħżulin tiegħi se jużawh għalkollox. Mhux se jitħabtu għalxejn, lanqas ma se jwelldu għall-​inkwiet; għaliex huma n-​nisel magħmul mill-​imberkin taʼ Jehovah, u d-​dixxendenti tagħhom magħhom.”

Immaġina li qed tgħix f’ambjent fejn la tara, la tismaʼ, u lanqas ixxomm taħsir fl-​ibliet! Immaġina li qed tgħix f’art tħaddar—l-​art tiegħek—li ġiet ikkultivata b’mod perfett, iddisinjata, u rfinuta. Immaġina li qed tieħu ġewwa fik arja li hija tant nadifa u pura; u ma tismax il-​ħoss irrabjat taċ-​ċivilizzazzjoni moderna, imma ħsejjes li jserrħu, u naturali. Veru li xi individwi ffortunati diġà qed igawdu xi ftit minn dawn l-​affarijiet. Imma taħt is-​Saltna t’Alla, kundizzjonijiet taʼ għixien fil-​paċi se jitgawdew minn kulħadd. Mhux se jkun hemm nies fqar, imġewħin, inqas ixxurtjati.—Salm 72:13, 14, 16.

Il-Bibbja twiegħed ukoll li “inkwantu għall-​ħżiena, huma se jinqatgħu.” (Proverbji 2:22) Dan ifisser it-​tneħħija tad-​delitti. Jekk it-​tifel żgħir tiegħek joħroġ jilgħab barra, m’għandekx għalfejn tinkwieta dwar li se jkun hemm mistoħbijin dawk li jimmolestaw lit-​tfal jew li jisirquhom, karozzi misjuqin minn sewwieqa fis-​sakra li jitilfu l-​kontroll, jew xi klikek taʼ żgħażagħ iddrogati jiġru mas-​saqajn. It-​tfal tiegħek se jilagħbu fi trankwillità u sigurtà assoluti.

Il-​Paċi u Li Tħossok Personalment Tajjeb

Fl-​aħħarnett, hemm l-​aspett taʼ li tħossok personalment tajjeb. Saħansitra kundizzjonijiet taʼ Ġenna ma jnaqqsux l-​uġigħ tal-​kanċer jew il-​weġgħat tal-​artrite. Il-​vera paċi trid għalhekk tinkludi t-​tneħħija tal-​mard, nuqqas taʼ saħħa, u l-​mewt. Hija ħaġa bħal din possibbli? Waqt li kien fuq l-​art, Ġesù Kristu ripetutament wera s-​setgħa tiegħu fuq il-​mard tal-​bniedem. (Mattew 8:14-17) Mill-​post vantaġġuż tiegħu fis-​sema, Kristu se jkun jistaʼ jagħmel mirakli mad-​dinja kollha! “F’dak iż-​żmien,” twiegħed il-​Bibbja, “għajnejn il-​għomja se jinfetħu, u l-​istess widnejn it-​torox se jinfetħu. F’dak iż-​żmien iz-​zopp se jixxabbat sewwa sew bħalma jagħmel iċ-​ċerv, u lsien il-​mutu se jgħajjat bil-​ferħ.”−Isaija 33:24; 35:5, 6.

Il-kampanja taʼ Kristu kontra l-​miżerja umana mhix se tieqaf hemm, madankollu. L-​appostlu Pawlu jispjega rigward l-​istat taʼ Kristu bħala sultan: “Għax hu jrid jaħkem bħala sultan sakemm Alla jkun qiegħed l-​egħdewwa kollha taħt saqajh. Bħala l-​aħħar għadu, il-​mewt għandha tinġieb fix-​xejn.” (1 Korintin 15:25, 26) Dan ifisser li hu jħoll it-​taħbil li l-​mewt tefgħet fuq l-​umanità mill-​bidunett. Bħalma Ġesù Kristu nnifsu spjega: “Ġejja s-​siegħa li dawk kollha fl-​oqbra tal-​mafkar se jisimgħu leħnu [taʼ Kristu] u joħorġu.” (Ġwann 5:28, 29) Miljuni bla għadd li għexu u mietu fil-​miżerja b’hekk se jkollhom l-​opportunità li jaqsmu fil-​paċi dinjija li ġejja.

Trid ikollok sehem fiha? Ix-​Xhieda taʼ Jehovah iħeġġuk biex titgħallem iktar dwar dak li tgħallem il-​Bibbja f’dan ir-​rigward.b Il-​prospett taʼ paċi dinjija huwa bil-​wisq eċċitanti, bil-​wisq rejali, biex jiġi njorat. Kun ċert li jekk tistinka biex titgħallem u tapplika l-​Kelma t’Alla, “dak Alla taʼ paċi se jkun magħkom”−għall-eternita!—Filippin 4:9.

[Noti taʼ taħt]