ĦARSA LEJN ID-​DINJA

L-​Iżrael

Haaretz.com tirrapporta li tfal li “twieldu b’difett li setaʼ jinqabad f’eżami matul it-​tqala” issa ma jistgħux itellgħu l-​qorti lill-​awtoritajiet mediċi minħabba li ma kinux indunaw bih. Madankollu, il-​ġenituri jistgħu jiftħu kawża l-​qorti sabiex jiġu kumpensati “għall-​ispejjeż żejda involuti biex irabbu wild b’diżabilità u biex ilaħħqu mal-​bżonnijiet [tiegħu] għall-​bqija taʼ ħajtu.”

L-​Awstralja

Fl-​Awstralja, 8 minn kull 10 koppji jgħixu flimkien qabel iż-​żwieġ.

Il-​Greċja

Statistika maħruġa mill-​Ministeru tas-​Saħħa Grieg uriet żieda taʼ 40 fil-​mija fis-​suwiċidji fil-​Greċja matul l-​ewwel ħames xhur tal-​2011, meta mqabbel mal-​istess perijodu tal-​2010. Din iż-​żieda ħabtet mal-​bidu tal-​kriżi finanzjarja taʼ dan l-​aħħar.

L-​Istati Uniti

Skont il-​Kunsill tad-​Difiża tar-​Riżorsi Naturali, fin-​nazzjon kollu jinħela kważi 40 fil-​mija tal-​ikel. Pereżempju, hu stmat li qatt ma jsir ħsad taʼ 7 fil-​mija tal-​prodotti tal-​għalqa, li 17 fil-​mija tal-​ikliet li jiġu servuti fir-​restoranti u l-​kafetteriji jibqgħu ma jittiklux, u li l-​familji jarmu madwar 25 fil-​mija tal-​ikel li jixtru.

Il-​Madagaskar

Dan l-​aħħar instab l-​iżgħar kamaleont fid-​dinja ġewwa l-​Madagaskar. Ftit minn dan il-​gremxul kannella ċkejken jikber sa 29 millimetru u tant hu żgħir li jistaʼ joqgħod fuq xifer taʼ difer. Minħabba li l-​abitat tiegħu hu mhedded, dan l-​annimal jistaʼ jkun fil-​periklu t’estinzjoni.