Mingħand il-​Qarrejja

Pjanti Qattiela Grazzi taʼ l-​artiklu “Periklu—Pjanti Qattiela!” (8 taʼ Mejju, 2004) Ili iktar minn 12-il sena niġbor kollezzjoni tal-​pjanti karnivori u nikkultivahom. Tassew irnexxielkom iżżommu bilanċ meraviljuż bejn l-​eżattezza xjentifika u s-​sempliċità tal-​preżentazzjoni.

T. K., Ġermanja

Għandi 11-il sena, u l-​għalliema tiegħi inkarigatna niktbu dwar il-​Venus flytrap (Dionaea muscipula). F’dik l-​istess ġimgħa, ħareġ dan l-​artiklu​—verament f’waqtu!

R. S., Russja

Jien kont nikkultiva l-​pjanti karnivori u ħadt pjaċir naqra l-​artiklu. Però, ma tantx qbilt mat-​titlu taʼ l-​artiklu. Dawn il-​pjanti għandhom mnejn ikunu perikolużi għal xi insetti, imma huma wkoll pjanti nodfa u fraġli. Xi wħud minnhom saħansitra jinsabu fil-​periklu li ma jibqgħux jeżistu.

H. K., Ġappun

“Stenbaħ!” iwieġeb: Grazzi għal din it-​tfakkira. Għalkemm it-​titlu tagħna sar biex jiġbed l-​attenzjoni tal-​qarrejja, l-​artiklu stess għallem lill-​qarrejja biex jirrispettaw u jieħdu ħsieb dawn il-​pjanti.

Abbuż fl-​Għerusija Inħossni grata għall-​artiklu “Iż-​Żgħażagħ Jistaqsu . . . Għala Jittrattani Daqshekk Ħażin?” (8 taʼ Ġunju, 2004) Kont qed niġi abbużata fir-​relazzjoni tiegħi. Meta kien ikollna xi ngħidu, l-​għarus tiegħi kien dejjem iwaħħal fija. Fit-​trobbija tiegħi rajt ħafna vjolenza u smajt ħafna kliem abbużiv fil-​familja, allura kont naħseb li din l-​imġiba hi normali. Issa nħossni kuntenta li ħriġt minn dik ir-​relazzjoni; hu wrieni li m’huwiex tajjeb għaż-​żwieġ.

Anonima, Beliże

Dan l-​artiklu għenni nesprimi s-​sentimenti tiegħi. Qabel u matul iż-​żwieġ tiegħi, għaddejt mis-​sitwazzjonijiet li spjegajtu fl-​artiklu. Il-​ħsara mentali u emozzjonali li għaddejt minnha qerditli l-​istima persunali tiegħi. Nispera li dan l-​artiklu jqanqal lil ħafna biex jeżaminaw ir-​relazzjonijiet tagħhom waqt l-​għerusija. Kemm hu għaqli li jsiru jafu lil xulxin qabel iż-​żwieġ, biex dawn il-​problemi jiġu evitati.

M. M., Ġermanja

Żerriegħa li Tivvjaġġa Grazzi talli ppubblikajtu l-​artiklu “Żerriegħa li Taqsam l-​Ibħra.” (8 taʼ Ġunju, 2004) Ftit tas-​snin ilu, ġbart waħda minn dawn iż-​żrieragħ ħdejn id-​dar tiegħi, imma ma indunajtx li kienet żerriegħa. Malli qrajt l-​artiklu, bqajt impressjonata għax indunajt li ż-​żerriegħa li ġbart jistaʼ jkun li vvjaġġat miċ-​Ċentru jew il-​Punent taʼ l-​Afrika! Grazzi ħafna talli tippreparaw artikli tassew interessanti bħal dawn.

M. K., Ġappun

Is-​Solitudni L-​artikli tal-​bidu “Kif Tkampa mas-​Solitudni Avolja Waħdek” (8 taʼ Ġunju, 2004) kienu tassew straordinarji. L-​iktar li għoġbuni kienu s-​suġġerimenti fil-​kaxxa f’paġna 7, “X’Tistaʼ Tagħmel Meta Tħossok Waħdek.” Użajt ħafna minn dawn is-​suġġerimenti, u naf li se jkunu sors kbir taʼ inkuraġġiment għal oħrajn.

E. M., Stati Uniti

It-​Torri taʼ Londra L-​artiklu “It-​Torri taʼ Londra—Monument Storiku taʼ l-​Imgħoddi Qalil” kien tassew f’waqtu. (8 taʼ Ġunju, 2004) L-​għalliem tiegħi u xi wħud minn sħabi taʼ l-​iskola kien għadhom kif ġew lura minn żjara f’Londra. Grazzi għal dan l-​artiklu, stajt nimmaġina kif tkun żjara lejn Londra—mingħajr ma nfaqt xejn!

P. L., Ġermanja