L-Istonku Tiegħu Jsalvah!

MA TANTX jiġri. Għal ħafna nies xejn ma jidher sabiħ. Imma xi stonku għandu! Fuqiex qed nitkellmu? Fuq il-ħmar jintefaħ, li jissejjaħ ukoll pala tal-baħar jew inkella bagħal. Meta din il-ħlejqa tiġi mhedda “tagħmel trasformazzjoni rimarkevoli,” tgħid ir-rivista Natural History. Ġisimha, li jikber sa madwar 50 ċentimetru fit-tul, jintefaħ “sakemm din il-ħuta tkun tliet darbiet iktar mid-daqs normali tagħha u ssir globu iebes kważi perfett miksi b’armatura kollha xewk—forma li żgur mhix addattata għall-għawm, imma żgur li tgerrex lil kulmin jipprova jattakkaha.”

Din il-ħuta tintefaħ billi tippompja l-ilma ġo l-istonku li jikber kważi mitt darba iktar mill-volum normali tiegħu! Il-ħmar jintefaħ jagħmel din il-bravura taʼ l-għaġeb grazzi għal xi ħaġa verament sempliċi u eleganti—il-piegi.

Fil-fatt, l-istonku taʼ din il-ħuta huwa magħmul minn piegi ġo piegi, tispjega Natural History. L-akbar piegi huma wesgħin kważi 3 millimetri “b’saħansitra iktar piegi żgħar ġo kull wieħed, u jibqgħu sejrin hekk, sa piegi li huma tant żgħar li tistaʼ tarahom biss b’mikroskopju,” jgħid l-artiklu.

Ovvjament, il-ġilda tal-ħmar jintefaħ trid tiġġebbed maʼ l-istonku. Biex tagħmel dan, il-ġilda, li hija magħmula minn żewġ saffi, tuża żewġ prinċipji differenti. L-istess bħall-istonku, is-saff taʼ ġewwa għandu l-piegi, imma s-saff taʼ barra huwa elastiku. Din il-kisja elastika żżomm il-ġilda milli titkemmex meta l-ħuta tneħħi l-ilma li tkun belgħet, għax inkella dan it-tikmix ifixkel il-ħeffa u l-aġilità tagħha.

Imma biex tbeżżaʼ lil dawk li jistgħu jkunu predaturi, din il-ħuta tagħmel ħafna iktar milli sempliċement tintefaħ. Hekk kif il-ġilda tiġġebbed, l-armatura taʼ xewk li għandha tieqaf u tiddritta. Għalhekk, meta tara xi ħmar jintefaħ meta tkun qed togħdos, tmissux! U oqgħod attent minn ħalqu wkoll; b’gidma jistaʼ jinfdek sa l-għadam!

Meta Alla staqsa lil Ġob dwar il-ħolqien Tiegħu, Ġob wieġeb: “Jien naf li kollox tistaʼ, u l-ebda ħsieb għalik mhu tqil.” (Ġob 42:2, Saydon) Iva, anki l-ħmar jintefaħ ċkejken u boċċu, li m’għandux ċans jirbaħ xi tellieqa jew xi konkors tas-sbuħija, tant jistaʼ jagħti xiehda fuq l-għerf u s-setgħa li għandu Alla biex joħloq.—Rumani 1:20.

[Sorsi taʼ l-Istampa f’paġna 25]