Int Theżhiżhom Snienek?

SA MINN żmien l-​imgħoddi n-​nies ilhom jheżhżu snienhom meta jkunu taħt stress. Il-​Bibbja sikwit tuża theżhiż, jew tagħżiż, tas-​snien biex tindika dagħdigħa jew diqa kbira. (Ġob 16:9; Mattew 13:​42, 50) Fid-​dinja tal-​lum mimlija rabja u stress, miljuni taʼ nies litteralment jheżhżu snienhom, u l-​biċċa l-​kbira minnhom lanqas biss ikunu jafu li qed jagħmlu hekk. Huma jistgħu jkunu qegħdin jherru snienhom ftit ftit.

Xi wħud għala jheżhżu snienhom? Il-​kaġuni huma kumplessi u għadhom ma ġewx mifhumin għalkollox. Imma f’xi każi l-​istress emozzjonali l-​iktar li jidher li x’aktarx huwa l-​kaġun. Il-​UC Berkeley Wellness Letter turi: “Nies li jheżhżu snienhom sikwit jirrapportaw li jkunu għaddejjin minn diffikultajiet matrimonjali jew finanzjarji, se jagħtu xi eżamijiet finali, huma mbeżżaʼ li jitilfu l-​impjieg, jew inkella jkunu taħt pressjoni.” Xi kaġuni possibbli oħrajn u fatturi li jikkontribwixxu għal dan jinkludu kuntatt difettuż bejn is-​snien taʼ fuq u dawk taʼ isfel, nuqqas taʼ rqad, jew konsum taʼ alkoħol. Għalhekk, il-​Wellness Letter tissuġġerixxi li dawk li jbatu minn din il-​ħaġa jridu jipprovaw inaqqsu mill-​alkoħol; jieħdu passi sempliċi biex jirrilassaw qabel ma jidħlu fis-​sodda, bħal ngħidu aħna, li jieħdu banju sħun; jew jiftħu qalbhom rigward problemi serji maʼ xi ħabib jew maʼ xi ħadd li jafdaw u li jaf jagħtihom parir.

Matul il-​ġurnata tistaʼ tinnota li int qed theżheż snienek jew tqarmiċhom. Imma kif tistaʼ tkun taf jekk tagħmilx hekk waqt li tkun rieqed? Xi drabi theżhiż kroniku tas-​snien, magħruf bħala bruxism, jipproduċi ħoss qawwi biżżejjed biex iqajjem lil ħaddieħor li jkun rieqed ġo l-​istess kamra. Int tistaʼ tqum b’uġigħ taʼ ras f’ngħasek, jew ix-​xedaq tiegħek jistaʼ jagħmel ħsejjes taʼ ċaqċiq.a Id-​dentist tiegħek jistaʼ saħansitra jinnota li snienek huma xi ftit jew wisq mikulin. Hu jistaʼ jirrikkmanda miżuri li jipprovdu serħan mill-​uġigħ, bħal xi ħaġa biex tpoġġiha fuq snienek għal matul il-​lejl. Għalkemm xi ħaġa bħal din li tipproteġi l-​ħalq m’hijiex iddisinjata biex twaqqfek milli theżheż snienek, din tistaʼ tipproteġihomlok minn iktar ħsara. Hu x’inhu l-​każ, irrilassa! Inqas ma tinkwieta, inqas se theżheż snienek.

[Nota taʼtaħt]