Нэгдүгээр Коринт

8 Шүтээнд өргөсөн идээний талаарх та нарын асуултад хариу⁠лъя. Уг нь энэ асуудлын талаар бид бүгдээрээ мэддэг шүү дээ. Мэдлэг ихэрхэг болгодог, харин хайр Бурхантай дотно болгодог. 2 Хэрэв хүн ямар нэг зүйлийг мэддэг гэж боддог бол үнэндээ бүгдийг нь сайн мэддэг гэсэн үг биш. 3 Харин хүн Бурхныг хайрладаг бол Бурхан тэр хүнийг мэддэг.

4 Шүтээнд өргөсөн идээнээс идэх талаар ярилцъя. Шүтээн бол юу ч биш, харин Бурхан цорын ганц гэдгийг бид мэддэг. 5 Тэнгэр болон газарт олон бурхан байдаг гэж хүмүүс боддог. Тиймээс «бурхан», «эзэн» гэгддэг юм олон байдаг. 6 Харин бид жинхэнэ Бурхан Эцэг ганц байдгийг мэддэг. Тэрээр бүх юмыг бүтээсэн бөгөөд биднийг өөрийнхөө төлөө бүтээсэн билээ. Бас Эзэн Есүс Христ ганц бөгөөд Бурхан түүний оролцоотойгоор бүх юмыг, биднийг ч бүтээсэн.

7 Гэвч бүх хүн үүнийг мэддэггүй. Харин шүтээн шүтдэг байсан зарим хүн ялгаж салгаж сураагүйгээсээ* болоод хоол идэхдээ шүтээнд өргөсөн юм гэж бодоод шаналдаг*. 8 Үнэндээ хоол унд биднийг Бурхантай илүү дотно болгодоггүй. Идээгүй ч дордохгүй, идсэн ч дээрдэхгүй. 9 Гэхдээ та нар сонгох эрх чөлөөтэй гэдгээрээ далимдуулан, ялгаж салгаж сураагүй нэгэндээ ямар нэг байдлаар саад болохоос болгоомжил. 10 Ялгаж сураагүй нэгэн нь та нар шиг мэдлэгтэй хүнийг шүтээний сүмд юм идэж байхыг харвал шүтээнд өргөсөн юмнаас идье гэж зориглохгүй гэж үү? 11 Ингэвэл мэдлэгтэй та нар ялгаж салгаж сураагүй хүнийг хөнөөж байна гэсэн үг. Уг нь тэр хүний төлөө Христ үхсэн шүү дээ. 12 Ийнхүү ах дүүгийнхээ эсрэг нүгэл үйлдэн сэтгэлийг нь шаналгавал* Христийн эсрэг нүгэл үйлдэж байна гэсэн үг. 13 Тиймд хоолноос болж ах дүү минь бүдрэхээр бол би ах дүүгээ бүдрүүлэхгүйн тулд дахиж хэзээ ч мах идэхгүй.