बायबल काय म्हणतं?

उदाहरणार्थ, बायबलच्या काही भविष्यवाण्यांकडे लक्ष द्या:

• “एका राष्ट्रावर दुसरं राष्ट्र आणि एका राज्यावर दुसरं राज्य हल्ला करेल, आणि ठिकठिकाणी दुष्काळ पडतील व भूकंप होतील.”—मत्तय २४:७.

• “शेवटच्या दिवसांत अतिशय कठीण काळ येईल हे लक्षात ठेव. कारण, लोक केवळ स्वतःवर प्रेम करणारे, पैशावर प्रेम करणारे, बढाई मारणारे, गर्विष्ठ, निंदा करणारे, आईवडिलांचे न ऐकणारे, उपकारांची जाण न ठेवणारे, बेइमान, माया-ममता नसलेले, कोणत्याही गोष्टीशी सहमत न होणारे, इतरांची बदनामी करणारे, संयम नसलेले, क्रूर, चांगल्याबद्दल प्रेम नसलेले, विश्‍वासघात करणारे, अडेल वृत्तीचे, गर्वाने फुगलेले, देवापेक्षा चैनीची आवड असलेले,” असे असतील.—२ तीमथ्य ३:१-४.

या भविष्यवाण्यांमध्ये जगाच्या परिस्थितीचं जे वर्णन केलं आहे, त्याबद्दल काही लोक म्हणतील की या जगाची परिस्थिती इतक्या झपाट्याने खराब होत चालली आहे, की त्यावर नियंत्रण मिळवणं शक्य नाही. आणि खरंतर हीच आजची वस्तुस्थिती आहे. कारण जग खरंच मानवांच्या नियंत्रणाबाहेर आहे. बायबलमध्ये सांगितल्याप्रमाणे एक कायमचा तोडगा काढण्यासाठी लागणारी बुद्धी आणि शक्‍ती मानवांमध्ये नाही. ही गोष्ट पुढच्या वचनांमधून दिसून येते:

• “मनुष्याला एक सरळ मार्ग दिसतो, पण त्याच्या शेवटास मृत्युपथ फुटतात.”—नीतिसूत्रे १४:१२.

• “एक मनुष्य दुसऱ्‍यावर सत्ता चालवून त्याचे नुकसान करतो.”—उपदेशक ८:९.

• “पावले नीट टाकणे हे चालणाऱ्‍या मनुष्याच्या हाती नाही.”—यिर्मया १०:२३.

मानव वाटेल ते करत राहिले, तर एक जागतिक विनाश येईल असं वाटू शकतं. पण, असं कधीच होणार नाही. असं का म्हणता येईल? कारण बायबल असं म्हणतं:

• देवा “तू पृथ्वी तिच्या पायावर अशी स्थापली आहेस की ती कधीही ढळणार नाही.”—स्तोत्र १०४:५.

• “एक पिढी जाते व दुसरी येते; पृथ्वीच काय ती सदा कायम राहते.”—उपदेशक १:४.

• “नीतिमान पृथ्वीचे वतन पावतील, तिच्यात ते सर्वदा वास करतील.”—स्तोत्र ३७:२९.

• “भूमीत भरपूर पीक येवो, पर्वतांच्या शिखरांवर ते डोलो.”—स्तोत्र ७२:१६.

बायबलच्या या वचनांतून आपल्याला स्पष्ट समज मिळते, की प्रदूषणामुळे, अन्‍नधान्याच्या किंवा पाण्याच्या टंचाईमुळे किंवा मग एखाद्या जागतिक महामारीमुळे मानवजातीचा अंत होणार नाही. तसंच, आण्विक शस्त्रांमुळे या पृथ्वीचाही विनाश होणार नाही. असं आपण का म्हणू शकतो? कारण जगाच्या भविष्यावर देवाचं पूर्णपणे नियंत्रण आहे. हे खरं आहे, की देवाने मानवांना आपल्या इच्छा स्वातंत्र्याचा वापर करण्याची परवानगी दिली आहे. पण त्यांना त्यांच्या निर्णयांचे परिणाम भोगावे लागतील. (गलतीकर ६:७) हे जग सुसाट वेगाने विनाशाकडे जाणाऱ्‍या एखाद्या अनियंत्रित ट्रेनसारखं नाही. कारण, मानव कितपत हानी करू शकतात याची एक सीमा किंवा मर्यादा देवाने ठरवली आहे.—स्तोत्र ८३:१८; इब्री लोकांना ४:१३.

पण, यासोबतच देव आणखी चांगल्या गोष्टी करणार आहे. तो या पृथ्वीवर मोठ्या प्रमाणावर शांती आणणार आहे. (स्तोत्र ३७:११) या लेखामध्ये ज्या सकारात्मक गोष्टींबद्दल सांगितलं आहे, त्या गोष्टी चांगल्या भविष्याची फक्‍त एक झलक आहे. लाखो यहोवाच्या साक्षीदारांनी बायबलचा अभ्यास करून याबद्दल शिकून घेतलं आहे.

यहोवाच्या साक्षीदारांचा एक जागतिक समाज आहे. तो सर्व वयोगटांतल्या, राष्ट्रांतल्या आणि पार्श्‍वभूमीतल्या स्त्री-पुरुषांनी मिळून बनलेला आहे. बायबलमध्ये ज्याचं नाव यहोवा असं दिलं आहे, त्या खऱ्‍या देवाची ते उपासना करतात. यहोवाच्या साक्षीदारांना भविष्याची भीती वाटत नाही. कारण, बायबल असं म्हणतं: “आकाशाचा उत्पन्‍नकर्ता तोच देव, पृथ्वीचा घडणारा व कर्ता तोच; त्याने तिची स्थापना केली; त्याने ती निर्जन राहावी म्हणून उत्पन्‍न केली नाही, तर तिच्यावर लोकवस्ती व्हावी म्हणून घडवली; हा परमेश्‍वर म्हणतो, मीच परमेश्‍वर आहे; अन्य कोणी नव्हे.”—यशया ४५:१८. ◼