ख्रिस्ती जीवन
वैयक्तिक बायबल अभ्यास करण्यात मेहनत घ्या
दानीएलवर परीक्षा आल्या तेव्हा तो यहोवाला विश्वासू राहिला. तुम्हालादेखील त्याच्यासारखं विश्वासू राहायचं आहे का? दानीएल देवाच्या वचनांचा आणि त्यातल्या कठीण भविष्यवाण्यांचा अभ्यास करण्यासाठी खूप मेहनत घ्यायचा. (दान ९:२) बायबलचा अभ्यास करण्यात मेहनत घेतल्यामुळे तुम्हालाही विश्वासू राहायला मदत होईल. कारण असं केल्यामुळे देवाने दिलेली अभिवचनं नक्की पूर्ण होणार यावर तुमचा विश्वास वाढेल. (यहो २३:१४) यासोबतच देवावर असलेलं तुमचं प्रेम आणखीन वाढेल. आणि तुम्हाला योग्य ते करण्याची प्रेरणा मिळेल. (स्तो ९७:१०) पण मग प्रश्न येतो, की सुरुवात कशी करावी? पुढे काही सल्ले दिले आहेत. त्यांवर विचार करा.
अभ्यासासाठी कोणते विषय निवडावेत? एका चांगल्या अभ्यासाच्या नित्यक्रमात मंडळीतल्या सभांची तयारी करणं सामील आहे. आठवड्यादरम्यान होणाऱ्या बायबल वाचनातून जास्त फायदा मिळवण्यासाठी तुम्ही काय करू शकता? त्यातले काही मुद्दे तुम्हाला समजले नसतील, तर ते समजून घेण्यासाठी तुम्ही वेळ काढून संशोधन करू शकता. त्यासोबतच, तुम्ही आणखीन काही विषयांवरसुद्धा अभ्यास करू शकता. काही जणांनी अभ्यासासाठी बायबलमधल्या भविष्यवाण्या, पवित्र आत्म्याच्या फळाचे वेगवेगळे पैलू, प्रेषित पौलने केलेले मिशनरी दौरे किंवा यहोवाने बनवलेली सृष्टी हे विषय निवडले आहेत. समजा तुम्हाला दिवसभरात बायबल संबंधित एखादा प्रश्न पडला, तर तो तुम्ही लिहून ठेवू शकता. आणि मग पुढच्या अभ्यासाच्या वेळी त्या प्रश्नाचं उत्तर शोधू शकता.
मला माहिती कुठून मिळेल? आध्यात्मिक खजिना शोधण्यासाठी संशोधनाची साधनं या व्हिडिओमध्ये तुम्हाला काही पर्याय मिळतील. एक उदाहरण घेऊ या: दानीएल अध्याय ७ मध्ये दिलेले पशू कोणकोणत्या जागतिक महासत्तांना दर्शवतात त्यावर संशोधन करून पाहा.
अभ्यासासाठी मी किती वेळ दिला पाहिजे? आध्यात्मिक रीत्या सुदृढ राहण्यासाठी नियमितपणे अभ्यास करणं गरजेचं आहे. गरज असल्यास, सुरुवातीला तुम्ही अभ्यासाची वेळ कमी ठेवू शकता आणि मग हळूहळू वेळ वाढवू शकता. देवाच्या वचनांचा अभ्यास करणं, हे लपवलेलं धन शोधण्यासाठी केलेल्या खोदकामासारखं आहे. जितकं जास्त तुम्हाला धन सापडेल, तितकं जास्त तुम्हाला आणखीन खोदकाम करावंसं वाटेल! (नीत २:३-६) असं केल्यामुळे देवाच्या वचनाबद्दल तुमचं प्रेम वाढेल आणि नियमितपणे बायबल वाचन करणं हा तुमच्या नित्यक्रमाचा भाग बनेल.—१पेत्र २:२.
दानीएल अध्याय ७ मध्ये दिलेले पशू कशाला सूचित करतात?
अतिरिक्त प्रश्न:
दानीएल ७:८, २४ या वचनांची पूर्णता कशी झाली?
पुढच्या अभ्यासाचा विषय:
प्रकटीकरण अध्याय १३ मध्ये दिलेले पशू कशाला सूचित करतात?