“यहोवाकडून एक अद्भुत देणगी”
मे १, १९९६ च्या टेहळणी बुरूज अंकात, ख्रिस्ती तटस्थता व यहोवा आणि “कैसर” या दोघांबद्दलच्या आपल्या जबाबदाऱ्यांमध्ये संतुलन कसे बाळगावे याबद्दलची सखोल चर्चा करण्यात आली होती. (मत्तय २२:२१) पुरवलेल्या नवीन माहितीबद्दल गुणग्राहकतेच्या अनेक अभिव्यक्ती ऐकण्यात आल्या आहेत. त्यापैकी, खालील पत्र ग्रीस येथील एका साक्षीदाराकडून आहे व त्याने ते यहोवाच्या साक्षीदारांच्या नियमन मंडळाला उद्देशून लिहिले आहे:
“आम्हा सर्वांची आध्यात्मिकरीत्या इतकी चांगली काळजी घेतल्याबद्दल मला तुम्हा सर्व प्रिय बंधूंची मनापासून कृतज्ञता व्यक्त करावीशी वाटते. माझ्या ख्रिस्ती विश्वासामुळे सुमारे नऊ वर्षांपर्यंत तुरुंगवास भोगल्यानंतर, मे १, १९९६ च्या टेहळणी बुरूज अंकातील सुंदर विचारांची मी खरोखरच गुणग्राहकता बाळगतो. (यशया २:४) ती यहोवाकडील अद्भुत देणगी होती.—याकोब १:१७.
“हे लेख वाचताना मला पूर्वीच्या एका टेहळणी बुरूज नियतकालिकातील (ऑगस्ट १, १९९४, पृष्ठ १४) एक विधान आठवले: ‘समंजसपणा हा खरोखर मौल्यवान गुण असल्याचे उघड आहे. हा असा गुण आहे जो यहोवावर अधिक प्रीती करण्यास आम्हाला चालना देतो.’ होय बांधवांनो, मी यहोवाची बुद्धी स्पष्टपणे प्रतिबिंबित करणाऱ्या त्याच्या दयाळू व प्रेमळ संघटनेचा एक भाग असल्यामुळे त्याचे आभार मानतो.—याकोब ३:१७.
“मे १ च्या टेहळणी बुरूज नियतकालिकातील वाढता प्रकाश, येथे ग्रीसमध्ये, विशेषकरून आपल्या विश्वासामुळे अनेक वर्षांपर्यंत तुरुंगवास भोगलेल्यांनी किंवा अद्यापही भोगत असलेल्यांनी चांगल्याप्रकारे स्वीकारला आहे. पुन्हा एकदा आपले आभार मानतो. या संकटमय काळात आम्हाला मौल्यवान आध्यात्मिक अन्न सतत देत राहण्यास यहोवा तुम्हाला त्याच्या आत्म्याने शक्ती देवो.”