अनुवाद
१० तेव्हा यहोवा मला म्हणाला, ‘तू दगड कोरून आधीसारख्या दोन पाट्या बनव+ आणि पर्वतावर माझ्याकडे ये. तसंच, तू लाकडाची एक पेटीही* बनव, २ म्हणजे तू फोडून टाकलेल्या आधीच्या पाट्यांवर जे शब्द होते, ते मी या पाट्यांवर लिहीन आणि मग तू त्या पेटीत ठेव.’ ३ म्हणून मी बाभळीच्या लाकडाची एक पेटी बनवली आणि दगड कोरून आधीसारख्याच दोन पाट्या बनवल्या. मग मी त्या दोन पाट्या हातात घेऊन पर्वतावर गेलो.+ ४ तेव्हा त्याने आधी लिहिलेले शब्द, म्हणजेच दहा आज्ञा*+ त्या पाट्यांवर पुन्हा लिहिल्या.+ इस्राएली लोकांच्या मंडळीला एकत्र जमवण्यात आलं, त्या दिवशी+ यहोवाने पर्वतावर आगीतून या आज्ञा तुम्हाला सांगितल्या होत्या.+ मग यहोवाने त्या पाट्या मला दिल्या. ५ त्यानंतर मी पर्वतावरून खाली आलो+ आणि यहोवाने आज्ञा दिल्याप्रमाणे, मी तयार केलेल्या पेटीत त्या पाट्या ठेवल्या आणि आजही त्या तिथे आहेत.
६ मग इस्राएली लोक बएरोथ बनेयाकान इथून मोसेरा इथे जायला निघाले. तिथे अहरोनचा मृत्यू झाला आणि त्याला पुरण्यात आलं.+ यानंतर त्याचा मुलगा एलाजार त्याच्या जागी याजक म्हणून सेवा करू लागला.+ ७ मग ते तिथून गुदगोदा इथे जायला निघाले आणि तिथून ते याटबाथा+ इथे गेले. या प्रदेशात पाण्याचे ओढे वाहतात.
८ त्या वेळी यहोवाने लेवीच्या वंशाला निवडलं.+ त्याने त्यांच्यावर यहोवाच्या कराराची पेटी उचलून नेण्याचं,+ यहोवासमोर उभं राहून त्याची सेवा करण्याचं, तसंच, त्याच्या नावाने आशीर्वाद देण्याचं काम सोपवलं+ आणि आजही ते हे करत आहेत. ९ म्हणूनच लेवीच्या वंशजांना त्यांच्या भावांसोबत जमिनीत वाटा किंवा वारसा देण्यात आलेला नाही. तुमचा देव यहोवा याने त्यांना सांगितल्याप्रमाणे, यहोवाच त्यांचा वारसा आहे.+ १० मी आधीसारखाच ४० दिवस आणि ४० रात्री पर्वतावर राहिलो+ आणि त्या वेळीही यहोवाने माझं ऐकलं+ आणि यहोवाने तुमचा नाश न करण्याचं ठरवलं. ११ मग यहोवा मला म्हणाला, ‘लोकांच्या पुढे जा आणि निघण्याची तयारी कर, म्हणजे जो देश त्यांना देण्याचं वचन मी त्यांच्या वाडवडिलांना दिलं आहे,+ त्यात जाऊन ते त्याचा ताबा घेतील.’
१२ तर आता इस्राएली लोकांनो, तुमचा देव यहोवा तुमच्याकडून आणखी काय मागतो?+ फक्त इतकंच, की तुम्ही तुमचा देव यहोवा याचं भय मानावं,+ त्याच्या सर्व मार्गांवर चालावं,+ त्याच्यावर प्रेम करावं आणि तुमचा देव यहोवा याची पूर्ण मनाने आणि पूर्ण जिवाने* सेवा करावी,+ १३ तसंच, आज मी यहोवाचे जे कायदे आणि आज्ञा तुमच्या भल्यासाठी+ तुम्हाला सांगत आहे, त्या तुम्ही पाळाव्यात. १४ पाहा, आकाश आणि आकाशापलीकडचं आकाश* हे तुमचा देव यहोवा याचं आहे. तसंच, पृथ्वी आणि तिच्यातलं सर्वकाही त्याचंच आहे.+ १५ पण तरी, यहोवाने फक्त तुमच्याच वाडवडिलांना जवळ केलं आणि त्यांच्यावर प्रेम केलं; आणि त्याने त्यांच्या संततीला,+ म्हणजे तुम्हाला आपले निवडलेले लोक म्हणून इतर सर्व राष्ट्रांतून वेगळं केलं, जसं की आज तुम्ही आहात. १६ आता तुम्ही आपली मनं शुद्ध करा+ आणि इतकी अडेल वृत्ती दाखवू नका.*+ १७ कारण तुमचा देव यहोवा हा देवांचा देव+ आणि प्रभूंचा प्रभू आहे. तो महान, शक्तिशाली आणि विस्मयकारक देव आहे. तो कधीही पक्षपात करत नाही+ आणि लाच घेत नाही. १८ तो अनाथ मुलाला* आणि विधवेला न्याय मिळवून देतो+ आणि त्याच्या लोकांमध्ये राहणाऱ्या विदेश्यावर प्रेम करतो+ आणि त्याला अन्न आणि कपडे पुरवतो. १९ तुम्हीही तुमच्यामध्ये राहणाऱ्या विदेश्यांवर प्रेम करा, कारण इजिप्त देशात तुम्हीही विदेशी म्हणून राहत होता.+
२० तुम्ही आपला देव यहोवा याची भीती बाळगा, फक्त त्याचीच उपासना करा,+ त्याला धरून राहा आणि त्याच्याच नावाने शपथ घ्या. २१ तुम्ही त्याचीच स्तुती करा,+ कारण तुम्ही आपल्या डोळ्यांनी पाहिलेल्या या सर्व महान आणि विस्मयकारक गोष्टी करणारा तोच तुमचा देव आहे.+ २२ तुमचे वाडवडील ७० लोकांसोबत* इजिप्तला आले होते,+ पण आज तुमचा देव यहोवा याने तुम्हाला आकाशातल्या ताऱ्यांसारखं अगणित केलं आहे.+