यहेज्केल
४४ नंतर तो माणूस मला परत पूर्वेकडे तोंड असलेल्या मंदिराच्या प्रवेश-इमारतीकडे घेऊन आला.+ तिचं दार बंद होतं.+ २ मग यहोवा मला म्हणाला: “या इमारतीचं दार बंदच राहील. ते उघडलं जाऊ नये आणि कोणत्याही माणसाने त्यातून प्रवेश करू नये. कारण इस्राएलचा देव यहोवा याने त्यातून प्रवेश केलाय.+ म्हणून ते दार नेहमी बंद राहील. ३ पण प्रधान मात्र या इमारतीत बसेल आणि यहोवासमोर भाकर खाईल;+ कारण तो प्रधान आहे. तोच या इमारतीच्या द्वारमंडपातून आत येईल आणि बाहेर जाईल.”+
४ नंतर त्याने मला उत्तरेकडच्या प्रवेश-इमारतीतून मंदिराच्या समोर आणलं. तेव्हा मी पाहिलं, की यहोवाचं संपूर्ण मंदिर यहोवाच्या वैभवाच्या तेजाने भरून गेलं आहे.+ ते पाहून मी जमिनीवर पालथा पडलो.+ ५ मग यहोवा मला म्हणाला: “मनुष्याच्या मुला! लक्ष दे, मी तुला दाखवीन ते सगळं नीट बघ. आणि यहोवाच्या मंदिराचे कायदे आणि नियम यांच्याबद्दल मी तुला जे काही सांगीन ते सगळं कान देऊन ऐक. मंदिराच्या प्रवेशाकडे आणि त्याच्या बाहेर जाण्याच्या सगळ्या मार्गांकडे बारकाईने लक्ष दे.+ ६ तू इस्राएलच्या बंडखोर घराण्याला जाऊन सांग, ‘सर्वोच्च प्रभू यहोवा असं म्हणतो: “हे इस्राएलच्या घराण्यातल्या लोकांनो! तुमची घृणास्पद कामं खूप झाली. ७ हृदयाची आणि शरीराची सुंता* न झालेल्या विदेशी लोकांना तुम्ही माझ्या मंदिरात आणता, आणि ते माझं मंदिर अपवित्र करतात. एकीकडे तुम्ही मला भाकर, चरबी आणि रक्त अर्पण करता, आणि दुसरीकडे तुमच्या घृणास्पद कृत्यांनी माझा करार मोडता. ८ तुम्ही माझ्या पवित्र गोष्टींची देखभाल केली नाही.+ उलट, माझ्या मंदिरातल्या कामांच्या जबाबदाऱ्या तुम्ही दुसऱ्यांवर टाकल्या.”’
९ ‘सर्वोच्च प्रभू यहोवा म्हणतो: “ज्याच्या हृदयाची आणि शरीराची सुंता झालेली नाही, अशा इस्राएलमध्ये राहणाऱ्या एकाही विदेश्याने माझ्या मंदिरात येऊ नये.”’
१० ‘इस्राएली लोक मला सोडून त्यांच्या घृणास्पद मूर्तींच्या* मागे लागले, तेव्हा जे लेवी माझ्यापासून दूर गेले,+ त्यांना त्यांच्या अपराधांचे परिणाम भोगावेच लागतील. ११ ते माझ्या मंदिरातले सेवक होऊन मंदिराच्या दरवाजांची राखण करतील+ आणि मंदिरात सेवा करतील. ते लोकांसाठी होमार्पणांचे आणि बलिदानांचे प्राणी कापतील आणि लोकांची सेवा करायला त्यांच्यासमोर उभे राहतील.’ १२ सर्वोच्च प्रभू यहोवा म्हणतो, ‘लोक जेव्हा आपल्या घृणास्पद मूर्तींची पूजा करायचे तेव्हा हे लेवी, लोकांची सेवा करायला त्यांच्यासमोर उभे राहायचे. ते इस्राएलच्या घराण्यासाठी अडखळण ठरले आणि त्यांनी लोकांना पाप करायला लावलं.+ म्हणून मी त्यांच्यावर माझा हात उगारला आहे आणि अशी शपथ घेतली आहे, की त्यांना त्यांच्या अपराधांचे परिणाम भोगावेच लागतील. १३ ते माझे याजक म्हणून सेवा करायला माझ्यासमोर येणार नाहीत. तसंच, ते माझ्या कोणत्याही पवित्र आणि परमपवित्र गोष्टींजवळ येणार नाहीत. त्यांनी ज्या घृणास्पद गोष्टी केल्या त्याबद्दल त्यांना अपमानित व्हावंच लागेल. १४ पण मंदिरात सेवेची जी काही कामं केली जातात, ती सांभाळायची जबाबदारी मी त्यांच्यावर टाकीन.’+
१५ ‘पण जेव्हा इस्राएली लोक माझ्यापासून भरकटले, तेव्हा सादोकच्या+ वंशजांतल्या लेवीय याजकांनी माझ्या मंदिरातल्या जबाबदाऱ्या सांभाळल्या.+ म्हणून माझी सेवा करायला आता ते माझ्यासमोर येतील आणि माझ्यासाठी चरबी+ आणि रक्त अर्पण करायला ते माझ्यासमोर उभे राहतील,’+ असं सर्वोच्च प्रभू यहोवा म्हणतो. १६ ‘तेच माझ्या मंदिरात प्रवेश करतील आणि माझी सेवा करायला माझ्या मेजाजवळ येतील.+ आणि माझ्याप्रती असलेल्या त्यांच्या सगळ्या जबाबदाऱ्या ते पार पाडतील.+
१७ ते जेव्हा आतल्या अंगणात असलेल्या प्रवेश-इमारतींत येतील, तेव्हा त्यांनी मलमलीची वस्त्रं घालावीत.+ आतल्या अंगणात किंवा तिथल्या प्रवेश-इमारतींत सेवा करताना त्यांनी लोकरीची वस्त्रं घालू नयेत. १८ त्यांनी मलमलीची अंतर्वस्त्रं* घालावीत आणि डोक्यावर मलमलीच्या पगड्या घालाव्यात.+ त्यांनी घाम येईल असं कोणतंही वस्त्र घालू नये. १९ बाहेरच्या अंगणात लोकांकडे जाण्याआधी, त्यांनी आपली सेवेची वस्त्रं काढून ती जेवणाच्या पवित्र खोल्यांमध्ये ठेवावीत+ आणि दुसरी वस्त्रं घालावीत;+ म्हणजे त्यांच्या सेवेच्या वस्त्रांनी लोक पवित्र होणार नाहीत. २० त्यांनी आपल्या डोक्याचं मुंडण करू नये+ किंवा केस लांब वाढवू नयेत; तर आपल्या डोक्याचे केस व्यवस्थित कापावेत. २१ आतल्या अंगणात जाण्याआधी याजकांनी द्राक्षारस पिऊ नये.+ २२ त्यांनी विधवेशी किंवा घटस्फोट झालेल्या स्त्रीशी लग्न करू नये;+ पण इस्राएली लोकांमधल्या एखाद्या कुमारीशी किंवा याजकाच्या विधवेशी ते लग्न करू शकतात.’+
२३ ‘त्यांनी पवित्र गोष्टी आणि सामान्य गोष्टी, तसंच, शुद्ध गोष्टी आणि अशुद्ध गोष्टी यांत काय फरक आहे, हे माझ्या लोकांना शिकवावं.+ २४ त्यांनी न्यायाधीश म्हणून खटल्यांचा न्यायनिवाडा करावा;+ त्यांनी माझे न्याय-निर्णय लक्षात ठेवून न्याय करावा.+ माझ्या सगळ्या सणांच्या बाबतीत असलेले नियम आणि कायदे त्यांनी पाळावेत+ आणि माझे शब्बाथ पवित्र मानावेत. २५ कोणत्याही याजकाने मेलेल्या माणसाजवळ जाऊ नये, नाहीतर तो अशुद्ध होईल. पण आपले वडील, आई, मुलगा, मुलगी, भाऊ किंवा लग्न न झालेली बहीण यांच्यासाठी तो अशुद्ध झाला तर चालेल.+ २६ शुद्धीकरणाचे दिवस संपल्यावर त्याने सात दिवस थांबावं, आणि मग आपली सेवा सुरू करावी. २७ मग ज्या दिवशी तो सेवा करण्यासाठी आतल्या अंगणात, पवित्र ठिकाणी जाईल, त्या दिवशी त्याने स्वतःसाठी पापार्पण द्यावं,’+ असं सर्वोच्च प्रभू यहोवा म्हणतो.
२८ ‘आणि याजकांच्या वारशाबद्दल म्हणायचं, तर मीच त्यांचा वारसा आहे.+ तुम्ही त्यांना इस्राएलमध्ये जमिनीचा वाटा देऊ नये, कारण मीच त्यांचा वाटा आहे. २९ ते अन्नार्पणं,+ पापार्पणं आणि दोषार्पणं खातील+ आणि इस्राएलमध्ये देवाला समर्पित केलेल्या सगळ्या गोष्टी त्यांच्याच असतील.+ ३० तुमच्या जमिनीच्या पहिल्या पिकातला सगळ्यात चांगला भाग आणि तुम्ही दिलेलं सर्व प्रकारचं दान याजकांचं असेल.+ पहिल्या पिकातलं भरडलेलं धान्य तुम्ही याजकांना द्यावं,+ म्हणजे तुमच्या घराण्यावर आशीर्वाद राहील.+ ३१ मेलेल्या अवस्थेत सापडलेल्या किंवा जंगली प्राण्याने फाडलेल्या कोणत्याही पक्ष्याचं किंवा जनावराचं मांस याजकांनी खाऊ नये.’+