निर्गम
२७ तू बाभळीच्या लाकडापासून एक वेदी बनव;+ ती चौकोनी असावी आणि तिची लांबी पाच हात,* रुंदी पाच हात आणि उंची तीन हात असावी.+ २ तिच्या चारही कोपऱ्यांवर शिंगं बनव;+ शिंगं वेदीचाच भाग असतील आणि वेदी तांब्याने मढव.+ ३ तिची राख* काढण्यासाठी बादल्या, तसंच फावडी, वाट्या, काटे आणि धूप जाळण्याची पात्रं बनव. या सर्व वस्तू तांब्याच्या बनव.+ ४ तू वेदीसाठी तांब्याची एक जाळी बनव आणि त्या जाळीच्या चार टोकांना तांब्याच्या चार कड्या बनव. ५ ती जाळी किनारीच्या खाली, वेदीच्या आत मधोमध बसव. ६ वेदीसाठी तू बाभळीच्या लाकडापासून दांडे बनव आणि त्यांना तांब्याने मढव. ७ हे दांडे कड्यांमध्ये घातले जातील, म्हणजे वेदी उचलून नेताना ते वेदीच्या दोन बाजूंना असतील.+ ८ वेदी फळ्यांपासून बनवलेल्या पोकळ पेटीसारखी असावी. तुला पर्वतावर दाखवण्यात आलेल्या नमुन्यासारखीच ती बनव.+
९ उपासना मंडपाला अंगण बनव.+ दक्षिणेकडे अंगणाला चांगल्या प्रतीच्या मलमलीचे पडदे लाव. या बाजूला त्यांची लांबी १०० हात असावी.+ १० त्यांच्यासाठी २० खांब आणि खाच असलेल्या २० तांब्याच्या बैठका* बनव. खांबांचे आकडे आणि कड्या* चांदीच्या असाव्यात. ११ उत्तरेकडेही १०० हात लांबीचे पडदे, त्यांचे २० खांब आणि खाच असलेल्या २० तांब्याच्या बैठका, तसंच खांबांसाठी चांदीचे आकडे आणि कड्या* असाव्यात. १२ अंगणाच्या रुंदीच्या भागासाठी, म्हणजेच पश्चिमेकडे ५० हात लांबीचे पडदे असावेत. त्यांच्यासाठी दहा खांब आणि खाच असलेल्या दहा बैठका असाव्यात. १३ सूर्य उगवण्याच्या दिशेला, म्हणजेच पूर्वेकडे अंगणाची रुंदी ५० हात असावी. १४ प्रवेशद्वाराच्या उजव्या बाजूला १५ हात लांबीचे पडदे, त्यांचे तीन खांब आणि खाच असलेल्या तीन बैठका असाव्यात.+ १५ तसंच, प्रवेशद्वाराच्या डाव्या बाजूलाही १५ हात लांबीचे पडदे, त्यांचे तीन खांब आणि खाच असलेल्या तीन बैठका असाव्यात.
१६ अंगणाच्या प्रवेशद्वाराला २० हात लांबीचा पडदा असावा. तो निळं सूत, जांभळी लोकर, गडद लाल रंगाचं कापड आणि चांगल्या प्रतीची मलमल यांपासून बनवलेला असावा.+ पडद्यासाठी चार खांब आणि खाच असलेल्या चार बैठका असाव्यात.+ १७ अंगणाच्या चारही बाजूला असलेल्या सर्व खांबांना चांदीचे सांधे आणि आकडे असावेत, पण त्यांच्या बैठका तांब्याच्या असाव्यात.+ १८ अंगणाची लांबी १०० हात,+ रुंदी ५० हात आणि उंची ५ हात असावी. अंगणाचे पडदे चांगल्या प्रतीच्या मलमलीपासून बनवलेले असावेत आणि त्याला खाच असलेल्या तांब्याच्या बैठका असाव्यात. १९ उपासना मंडपात सेवेसाठी वापरली जाणारी सगळी भांडी आणि इतर वस्तू, तसंच मंडपाच्या खुंट्या आणि अंगणाच्या सगळ्या खुंट्या तांब्याच्या असाव्यात.+
२० उपासना मंडपातले दिवे सतत जळत ठेवण्यासाठी तू इस्राएली लोकांना शुद्ध जैतुनाचं तेल आणण्याची आज्ञा दे.+ २१ अहरोन आणि त्याच्या मुलांनी भेटमंडपात,* साक्षपेटीजवळ असलेल्या पडद्याच्या बाहेरच्या बाजूला,+ संध्याकाळपासून सकाळपर्यंत यहोवासमोर दिवे जळत ठेवण्याची व्यवस्था करावी.+ हा कायमचा नियम इस्राएली लोकांनी पिढ्या न् पिढ्या पाळावा.+