निर्गम
१७ इस्राएलचे सर्व लोक यहोवाच्या आज्ञेप्रमाणे सीनच्या ओसाड रानातून टप्प्याटप्प्याने बाहेर पडले+ आणि रफीदीम इथे येऊन त्यांनी तळ दिला.+ पण तिथे लोकांना पिण्यासाठी पाणी नव्हतं.
२ त्यामुळे लोक मोशेबरोबर भांडू लागले+ आणि म्हणाले: “आम्हाला प्यायला पाणी दे!” पण मोशे त्यांना म्हणाला: “माझ्याशी का भांडताय? तुम्ही सारखी यहोवाची परीक्षा का पाहता?”+ ३ पण लोकांना खूप तहान लागली होती. म्हणून ते मोशेविरुद्ध कुरकुर करत म्हणाले:+ “तू आम्हाला, आमच्या मुलाबाळांना आणि आमच्या गुराढोरांना तहानेने मारून टाकण्यासाठी इजिप्तमधून बाहेर का आणलंस?” ४ शेवटी, मोशेने यहोवाकडे याचना केली: “मी या लोकांचं काय करू? आणखी काही वेळाने तर ते मला दगडमार करतील!”
५ मग यहोवा मोशेला म्हणाला: “लोकांच्या पुढे जा आणि इस्राएलच्या काही वडीलजनांनाही आपल्यासोबत ने. जी काठी तू नाईल नदीवर मारली होतीस,+ तीही सोबत घेऊन जा. ती काठी हातात घे आणि पुढे चाल. ६ पाहा! मी होरेब इथे एका खडकावर तुझ्यासमोर उभा असेन. तू त्या खडकाला मार, म्हणजे त्यातून पाणी निघेल आणि लोक ते पाणी पितील.+ मोशेने इस्राएलच्या वडीलजनांसमोर तसंच केलं.” ७ म्हणून त्याने त्या जागेचं नाव मस्सा*+ आणि मरीबा*+ असं ठेवलं, कारण तिथे इस्राएली लोकांनी भांडण केलं आणि “यहोवा खरोखरच आपल्यामध्ये आहे का?” असं म्हणून त्यांनी यहोवाची परीक्षा घेतली.+
८ नंतर, अमालेकी+ लोकांनी येऊन रफीदीम इथे इस्राएली लोकांशी लढाई केली.+ ९ तेव्हा मोशे यहोशवाला+ म्हणाला: “आपल्यातली काही माणसं निवड आणि अमालेकी लोकांशी जाऊन लढ. उद्या मी खऱ्या देवाची काठी हातात घेऊन टेकडीच्या माथ्यावर उभा राहीन.” १० मग मोशेने सांगितल्याप्रमाणे यहोशवाने केलं+ आणि तो अमालेकी लोकांशी लढला. मोशे, अहरोन आणि हूर+ हे टेकडीच्या माथ्यावर गेले.
११ जोपर्यंत मोशे आपले हात वर ठेवायचा तोपर्यंत इस्राएली लोक लढाईत शक्तिशाली ठरायचे, पण त्याने हात खाली करताच अमालेकी लोक शक्तिशाली ठरायचे. १२ मोशेचे हात दुखायला लागले तेव्हा त्यांनी एक दगड घेऊन मोशेला त्यावर बसवलं. मग अहरोन आणि हूर यांनी त्याच्या दोन्ही बाजूला उभं राहून त्याच्या हातांना आधार दिला. त्यामुळे, त्याचे हात सूर्य मावळेपर्यंत स्थिर राहिले. १३ अशा रितीने, यहोशवाने अमालेक आणि त्याच्या लोकांना तलवारीने हरवलं.+
१४ मग यहोवा मोशेला म्हणाला: “‘मी या पृथ्वीवरून अमालेकी लोकांचं नामोनिशाण मिटवून टाकीन आणि कोणालाही त्यांचं स्मरण राहणार नाही.’+ ही गोष्ट आठवणीत राहावी* म्हणून ती एका पुस्तकात लिहून ठेव आणि ती यहोशवालाही सांग.” १५ तेव्हा मोशेने एक वेदी बांधून तिचं नाव यहोवा-निस्सी* असं ठेवलं. १६ कारण तो म्हणाला: “त्याने याहच्या+ राजासनाविरुद्ध हात उगारला, म्हणून यहोवा पिढ्या न् पिढ्या अमालेकशी युद्ध करेल.”+