प्रकटीकरण

७ यानंतर, मला चार देवदूत पृथ्वीच्या चार कोपऱ्‍यांत उभे असलेले दिसले; पृथ्वीवर, समुद्रावर किंवा कोणत्याही झाडावर वारा वाहू नये म्हणून त्यांनी पृथ्वीचे चार वारे अडवून धरले होते. २ मग, सूर्य उगवण्याच्या दिशेने* एक देवदूत वर येताना मला दिसला; त्याच्याकडे जिवंत देवाचा शिक्का होता; आणि ज्या चार देवदूतांना पृथ्वीला व समुद्राला नुकसान पोचवण्याचा अधिकार देण्यात आला होता त्यांना तो मोठ्या आवाजात हाक मारून म्हणाला: ३ “आपल्या देवाच्या दासांच्या कपाळांवर आम्ही शिक्का मारेपर्यंत पृथ्वीला, समुद्राला किंवा झाडांना नुकसान पोचवू नका.”

४ मग, ज्यांच्यावर शिक्का मारण्यात आला त्यांची संख्या मी ऐकली; ते इस्राएल पुत्रांच्या प्रत्येक वंशातून घेतलेले १,४४,००० इतके होते:

९ यानंतर पाहा! सर्व राष्ट्रे, वंश, लोक आणि भाषा यांतून आलेला आणि कोणत्याही मनुष्याला मोजता आला नाही असा एक मोठा लोकसमुदाय, शुभ्र झगे घालून आणि हातांत खजुरीच्या फांद्या घेऊन राजासनासमोर व कोकऱ्‍यासमोर उभा असलेला मला दिसला. १० ते मोठ्याने अशी घोषणा करत होते: “तारण हे राजासनावर बसलेल्या आमच्या देवाकडून आणि कोकऱ्‍याकडून मिळते.”

११ सर्व देवदूत राजासनाच्या, वडिलांच्या आणि चार जिवंत प्राण्यांच्या सभोवती उभे होते; आणि त्यांनी राजासनापुढे गुडघे टेकले व असे म्हणून देवाला नमन केले: १२ “आमेन! प्रशंसा, गौरव, बुद्धी, उपकारस्तुती, सन्मान, सामर्थ्य आणि शक्‍ती सदासर्वकाळ आमच्या देवाला मिळो. आमेन.”

१३ तेव्हा, वडिलांपैकी एकाने मला म्हटले: “शुभ्र झगे घातलेले हे कोण आहेत आणि ते कुठून आले आहेत?” १४ त्यावर मी लगेच त्याला म्हणालो: “माझ्या प्रभू, हे तूच सांगू शकतोस.” तेव्हा तो मला म्हणाला: “जे मोठ्या संकटातून बाहेर येतात ते हेच आहेत, आणि त्यांनी आपले झगे कोकऱ्‍याच्या रक्‍तात धुऊन शुभ्र केले आहेत. १५ म्हणूनच ते देवाच्या राजासनासमोर आहेत आणि त्याच्या मंदिरात रात्रंदिवस त्याची पवित्र सेवा करत आहेत; आणि राजासनावर जो बसला आहे तो त्यांच्यावर आपला तंबू घालेल. १६ यापुढे ते कधी भुकेले किंवा तहानलेले असणार नाहीत; तसेच, सूर्याची किंवा उष्णतेची झळ त्यांना लागणार नाही; १७ कारण, राजासनाच्या मधोमध* असलेला कोकरा त्यांना मेंढपाळाप्रमाणे जीवनाच्या पाण्याच्या झऱ्‍यांकडे घेऊन जाईल. आणि देव त्यांच्या डोळ्यांतून प्रत्येक अश्रू पुसून टाकेल.”