D tall raood la d maan sɩd wa a Benaya

A Benaya ra yaa zabr gãndaoogo. A teela rĩm a Davɩɩd la rĩm a Salomo. A ra yaa maan-kʋʋd biiga. Maan-kʋʋdbã ne Levi buudã neb ra pa wae n kẽnd zabr ye. La a Benaya sõng n zaba a Zeova zaba. A wilgame t’a tara raood wʋsgo. Wala makre, daar a ye a kẽe bok pʋgẽ n kʋ gɩgemde. A leb n kʋʋ zabr gãndaoog sẽn da yaa nin-wobgo. A Davɩɩd ra kɩsa a Benaya sɩda, hal n yãk-a t’a lebg a gũudbã naaba.—2 Sãm. 23:20-23.

A Absalom sẽn wa n tõdg a Davɩɩdã, n paas a Adoniza sẽn wa n dat n deeg naamã, a Benaya kell n maana sɩd ne a Davɩɩde. (2 Sãm. 8:18; 15:18; 1 Rĩm. 1:8) A Davɩɩd sẽn wa n kʋʋlã me, a Benaya kell n maana sɩd ne-a, n sõng a Salomo t’a lebg rĩma. (1 Rĩm. 1:32-40) Hakɩɩka, a Benaya kell n maana sɩd ne a Zeova la neb nins a sẽn yãkã, baa neb a taab sẽn wa n lebg tõatbã.

Sẽn na yɩl n tõog n zab ne d bɛ a Sʋɩtãan sẽn yaa wẽng wʋsgã ne a poorẽ dãmbã, tõnd me segd n talla raoodo. Sẽn paase, d segd n yãka yam n na n kell n tũ a Zeova noyã ne d sũur fãa. (Efɛɛ. 6:11; 1 Pɩy. 5:8, 9) Baa neb kẽer sã n wa bas a Zeova d na n kell n maana sɩd ne-a, n kɩs sɩd t’a na n keo-d lame.—2 Sãm. 22:26.