Bõe yĩng tɩ y tõe n maan sũ-noogo, b sã n wa namsd-yã?

1. Bõe la a Zeezi yeel-yã, la bõe yĩng tɩ rẽ tõe n ling-du?

A ZEEZI sẽn wa n sõsd ne nebã tãngã zugã, a yeelame yaa: “Sẽn wa n yaa wakat ning fãa la nebã kis yãmba, . . . yãmb yaa sũ-noog rãmba.” (Luk 6:22) Yaa vẽeneg tɩ gom-kãensã linga a kɛlgdbã. Sɩd me, ned kae n dat tɩ b kisg-a ye. La bõe yĩng t’a Zeezi yeel woto? Yɩta sõma tɩ d bao sok-kãngã leoore, bala neb wʋsg kisa a Zeezi karen-biisã rũndã-rũndã. D na n bao n bãnga bũmb nins sẽn kɩt tɩ b kis tõndã, la bũmb nins sẽn kɩt tɩ d tõe n maan sũ-noogã.

BÕE YĨNG TƖ B KIS TÕNDO?

2-3. Bõe n kɩt tɩ b namsd kiris-neb hakɩɩkã, la d sẽn mi rẽ wã tõe n kɩtame tɩ d tagsg yɩ wãn ne neb nins sẽn namsd tõndã? (Zã 16:2, 3)

² B kisa tõndo, d sẽn tũud a Zeova wã yĩnga. A Zeezi goma neb nins sẽn na n nams a karen-biisã hal n kʋ kẽer mengã yelle, n yeel tɩ b na n maana woto “b sẽn pa mi Ba wã, la b pa mi [yẽ wã] yĩnga.” (Karm-y Zã 16:2, 3.) Ãnda n kɩt tɩ neb kẽer kis Wẽnnaam nin-buiidã? Yaa a Sʋɩtãana. Yẽ n yaa “dũni-kãngã wẽnnaamã.” (2 Kor. 4:3, 4) A luta nebã yam sẽn na yɩl tɩ b ra bãng sɩdã a Zeova zug ye. Sẽn paase, a kɩtdame tɩ b namsd neb nins sẽn mi Wẽnnaam la b nong-a wã. (Zã 8:42-44) D sẽn mi rẽ wã tõe n kɩtame tɩ d tagsg yɩ wãn ne neb nins sẽn namsd tõndã? D sẽn mi tɩ yaa a Sʋɩtãan n belgd-bã tõe n kɩtame tɩ d ra kisg-b ye.

³ D na n goma a Pavɛll yelle.a A bee tẽng b sẽn gɩdg d tũudmã pʋgẽ. A sẽn da ket n maand sɩd ne a Zeova wã yĩnga, b yõk-a lame n pãb sõma, la b pag-a roog yẽ a ye n maan kiisi. A yeelame: “M da miime tɩ yaa a Sʋɩtãan ne a zĩn-dãmbã n kɩt tɩ b namsd tõndo, n dat tɩ d bas a Zeova tũubu. M da neeme tɩ neb nins sẽn tʋmd bãensã roogẽ wã fãa la bal ra pa kis tõnd ye. B ra maanda b sẽn yeel-b tɩ b maanã bala.” Saam-biig a to sẽn be Korowasi roagdb sẽn pa a Zeova Kaset rãmb n nams-a wʋsgo. A yeelame: “Wa n lebga vẽeneg tɩ yaa a Sʋɩtãan la m bɛ wã meng-menga, pa m doagdbã ye.”—Efɛɛ. 6:12.

4. Yam-bʋg la d tõe n dɩk a Zeezi ne karen-biig a Etɩɛn mak-sõngã pʋgẽ? (Ges-y fotã me.)

⁴ D pa kis neb nins sẽn namsd tõndã ye. Sɩd me, d mi n pʋʋsda b yĩnga. (Mat. 5:44) Zĩ-kãng wɛɛngẽ, d tõe n dɩka yam a Zeezi ne karen-biig a Etɩɛn nengẽ. Rom sodaasã sẽn wa n ka a Zeezi namsg ra-lukã zugã, a pʋʋsa Wẽnnaam n yeel yaa: “M Ba, kõ-y bãmb sugri.” (Luk 23:34) A Zeezi ra kota a Zeova t’a kõ sodaas nins b sẽn yeel tɩ b kʋ-a wã sugri. Tõe t’a sẽn wa n gomd woto wã, a ra tagsda kʋʋngã yell me. Bala tũudmã taoor dãmb sẽn da kis-a wã pirs-b lame tɩ b zẽk b koees n yeel t’a segda ne kũum. A Zeezi bãngame tɩ nin-kãens ra pa mi b sẽn maand bũmb ningã ye. A Etɩɛn me kosa Wẽnnaam t’a kõ neb nins sẽn kʋ-a wã sugri. (Tʋʋ. 7:58-60) A Zeova leoka a Zeezi ne a Etɩɛn fãa pʋʋsgã bɩ? N-ye. Neb wʋsg sẽn yɩ sabab tɩ b kʋ a Zeezi wa n teka yam n tẽ a Zeezi n deeg lisgu. (Tʋʋ. 2:36-41) Sẽn paase, a Soll sẽn teel neb nins sẽn kʋ a Etɩɛnnã wa n lebga kiris-neda, n maand a bãngẽ bõn-wẽns nins a sẽn maanã yĩnga.—1 Tɩm. 1:13.

5. Yam-bʋg la d tõe n dɩk a Sezaar kibarã pʋgẽ?

⁵ Rũndã-rũndã me, d sã n pʋʋsd neb nins sẽn namsd tõndã yĩnga, a Zeova kelgdame. Saam-biig a Sezaar sẽn be Venezuela wã kibar wilgda rẽ. A ba wã nams-a-la wʋsgo, a sẽn tũud a Zeova wã yĩnga. A yeelame: “M ma ra yaa pʋg-sõngo, n da get a kambã yell sõma me. Baa a sẽn da lʋɩɩsd Rĩungã yɛl taoor wakat fãa wã, a zɩ n maan a toog kae ne m baaba ye. A zãmsa tõnd a kambã tɩ d waoogd d ba wã. A wilga tõnd tɩ d segd n sakda d ba wã wakat fãa, sã n pa a wa n yeelame tɩ d maan bũmb sẽn kɩɩsd Wẽnnaam noore.” Yʋʋm a wãn poore, a ba wã wa n bʋka bilfu. A Sezaar yeelame: “Daar a yembre, m pelga m pʋg n pʋʋs a Zeova, la m kos m baaba a sã n na n sakame tɩ m zãms-a Biiblã. A sakame hal tɩ ling-ma. M sũurã yɩɩ noog wʋsgo, hal tɩ m pa tõe n bãng n bilg ye.” A Sezaar ba wã wa n deega lisgu. Pa kɩɩsdbã fãa n toeemd woto ye. La kẽer sã n yã d sẽn gomd ne-b ne waoogr la d zãad d mens sõma wã, b wat n bʋka bilfu. Sã n wa yaa woto, pa noom-d wʋsg sɩda? A Zeova sẽn yaa “Dũniyã fãa Bʋ-kaood” sẽn yaa nimbãan-zoɛtã tõe n taka neb a woto tɩ b wa a nengẽ. D gũuda rẽ ne d sũur fãa.—Sɩng. 18:25.

6. Sã n yaa ne Mark 13:13, bõe me n kɩt tɩ neb kẽer kis tõndo?

⁶ B kisa tõndo, d sẽn teend a Zeezi wã yĩnga. A Zeezi yeelame tɩ nebã fãa na n kisga kiris-neb hakɩɩkã, yẽ “yʋʋrã yĩnga.” (Karm-y Mark 13:13.) A Zeezi yʋʋrã makda a sẽn yaa ned ning buudã, la a sẽn tar sor n na n yɩ Wẽnnaam Rĩungã Rĩmã. Neb nins sẽn kis tõndã kẽer yaa neb sẽn teeg ninsaalbã nanambse, n pa teend a Zeezi Kirist sẽn yaa ned ning a Zeova sẽn yãk t’a rɩ naamã ye. La pa na n kell n yɩ woto wakat fãa ye. Yʋʋmd 1914 tɛka, a Zeezi lebga Wẽnnaam Rĩungã Rĩma, n dɩt naam saasẽ. Ka la bilfu, a na n sãama goosneema-rãmbã fãa sẽn kɩɩsd a naamã.

7-8. Bõe n kɩt tɩ b yaand a Zeova Kaset rãmb kẽere? (Zã 15:18-20) (Ges-y fot-rãmbã me.)

⁷ B kisa tõndo, d sẽn pa rat n yɩ wa a Sʋɩtãan dũniyã nebã yĩnga. A Zeezi yeelame tɩ b na n kisga a karen-biisã, b sẽn “pa dũniyã rẽndã” yĩnga. (Karm-y Zã 15:18-20.) D zãagda d mens ne manesem-wẽns la gom-yoodo, wa pipi kiris-nebã sẽn da maandã. Rẽ kɩtame tɩ b yaand d tẽed-n-taas wʋsg b tʋʋmã zĩisẽ wall lekollẽ wã. (1 Pɩy. 4:3, 4) La kɩɩsdb kẽer wat n toeemame n pẽgd tõndo, tɩ d sũur noomẽ.

⁸ D gom a Iyãsiyo sẽn be Amerik sãntrallã yelle. A sẽn wa n karemdẽ wã, a karen-saamb a ye n da yaand-a a sẽn tũud Biiblã noyã yĩnga. La nand t’a Iyãsiyo paam a dipolmã n looge, a karen-saambã sok-a lame n na n bãng a sẽn maand to-to n tõogd n tũud Biiblã noyã, baa neb wʋsg sẽn kis-a rẽ yĩngã. A Iyãsiyo wilg-a lame tɩ Biiblã noyã tũub kogenda yẽ mengã. Rẽ poore, a bool-a lame t’a wa tigsga. Karen-saambã waa tigsgã, hal tɩ ling a Iyãsiyo. Karen-saambã sẽn yã tigingã neb sẽn nong taab to-to wã yɩ-a-la noog wʋsgo, t’a kell n kẽnd tigissã. A sɩnga Biiblã zãmsgo, tɩ kɩt tɩ b wa nams yẽ mengã. La a kell n modgame, n wa reeg lisgu.

9-10. a) Bõe me n kɩt tɩ kiris-nebã yaa toor ne a Sʋɩtãan dũniyã nebã? b) Yam-bʋg la d tõe n dɩk tẽn-tʋmd a Poll mak-sõngã pʋgẽ?

⁹ Bũmb a to sẽn kɩt tɩ d yaa toor ne a Sʋɩtãan dũniyã nebã yaa tɩ d pa kẽesd d toog politikã la zabã pʋsẽ ye. (Zã 18:36) D tũuda noor ning sẽn be Rom dãmb 13:1 pʋgẽ wã, n sakd noy nins tẽnsã taoor dãmb sẽn gãnegã. La d sẽn yaa kiris-nebã d pa kẽesd d toog politikã yɛlẽ ye. Rẽ n so tɩ d pa na n dat tɩ neb a taab vot tõndo, n pa na n sak n vot ned me ye. Bõe yĩnga? Yaa tɩ d zoe n pʋlmame tɩ d na n teela a Zeova la Kiristã sẽn yaa a Rĩungã Rĩmã. Woto kɩtame tɩ b yõg a Zeova Kaset rãmb wʋsg n pag bãens roogo. La baa b sẽn yõg-b n pag bãens roogã, b ket n moonda koɛɛgã. B rɩkda tẽn-tʋmd a Poll togs-n-taare. Bala baa b sẽn wa n yõk-a tɩ sodaas gũud-a wã, n paas a sẽn wa n be bãens roogẽ wã, a pa bas koɛɛgã mooneg ye. (Tʋʋ. 24:27; 28:16, 30) A ra moonda neb nins fãa sẽn dat n kelgã koe-noogã. Wala makre, bãens roog gũudba, bʋ-kaoor zĩigẽ tʋm-tʋmdba, guvɛrneer-dãmba, la rĩm-dãmba. Tõe meng t’a moona Rom naab a Neerõ nin-kãsemse.—Tʋʋ. 9:15.

¹⁰ Rũndã-rũndã me, d tẽed-n-taas nins b sẽn pag bãens rotã moonda neb nins fãa sẽn dat n kelgã koe-noogã. Wala makre, bʋ-kaoodba, goosneema wã tʋm-tʋmdba, la bãens roog gũudba. Saam-biig a ye la b yõk n pag bãens roog yʋʋm a yoob la kiuug a wãna, a sẽn pa sak n na n kẽes a toog politikã yɛlẽ wã yĩnga. A yeelame tɩ yẽ pa get wakat ning a sẽn zĩnd bãens roogẽ wã wa sɩbgr ye. A geta rẽ wa tʋʋmd a Zeova sẽn da kõ-a t’a gẽes pʋ-peelem dãmbã. D sã n paam t’a Zeova tũnug ne tõnd tɩ koe-noogã ta neb a woto, pa noom-d sɩda? (Kolo. 4:3) La bõe me n kɩt tɩ d tõe n maan sũ-noogo, baa b sã n kis tõnd d sẽn tũud a Zeova wã yĩnga? D na n goma rẽ yell masã.

BÕE YĨNG TƖ D TÕE N MAAN SŨ-NOOGO, BAA B SÃ N WA NAMSD TÕNDO?

11. Bõe yĩng tɩ b sã n namsd tõnd d tũudmã yĩng bɩ paasd d tẽebã pãnga? Rɩk-y makre.

¹¹ D miime tɩ dũniyã neb sẽn kis tõndã pidsda bãngr-goama. Biiblã pipi bãngr-gomdã pʋgẽ, a Zeova pĩnd n togsame t’a Sʋɩtãan ne a poorẽ dãmbã na n kisga neb nins sẽn nong yẽ la b tũud-a wã. (Sɩng. 3:15) A Zeezi yeela naoor wʋsg tɩ b na n kisga neb nins sẽn tũud a Zeova wã, tɩ b gʋls rẽ Evãnzill-dãmb a naasã fãa pʋsẽ. (Mat. 10:22; Mark 13:9-12; Luk 6:22, 23; Zã 15:20) Biiblã gʋlsdb a taab me wilgame tɩ b na n kisga wẽn-tũudb hakɩɩkã. (2 Tɩm. 3:12; Zak 1:2; 1 Pɩy. 4:12-14; Ziid 3, 17-19) Rẽ n so tɩ b sã n wa namsd-d bɩ pa lingd-d ye. D sũur pʋd n yaa noogo, bala d miime tɩ yaa Biiblã bãngr-goam n pidsdi. Kɩtdame tɩ d miẽ tɩ d tũuda Wẽnnaam sɩd-sɩdã. Saam-bi-poak a ye sẽn be tẽng b sẽn gɩdg tõnd tũudmã pʋgẽ yeelame: “Mam sẽn wa n na n dɩk m meng n kõ a Zeova wã, m da miime tɩ baa kaoosda, b na n nams-m-la m tũudmã yĩnga. Rẽ n so tɩ b sẽn wa n namsd maamã pa ling-ma, leb n pa kẽes-m dabeem me ye.” Neb wʋsg n nams-a, baa a sɩdã menga. A sɩdã maana bũmb toor-toor n ning-a yãnde, la a gom n paoog-a. A pʋd n dɩka a Biiblã la sɛb nins a sẽn tar n zãmsd Biiblã n yõog bugum. La d saam-bi-poakã pa tar n leb poorẽ rabeem yĩng ye. A tẽebã pãng pʋd n paasame. (Ebre. 10:39) A yeelame: “Bãngr-goamã pĩnd n togsame tɩ b na n namsa tõndo. Rẽ n so tɩ m da miẽ tɩ b na n namsa ma-me. B sẽn nams maamã kɩtame tɩ m kɩs sɩd tɩ m bee tũudum hakɩɩkã pʋgẽ.”

12. Bõe n sõng saam-biig a ye t’a tõog toog namsg sasa?

¹² Baa d sẽn mi tɩ b tõe n nams-d-la d tũudmã yĩngã, b sã n wa namsd tõndo yɩl n tõog toog pa nana ye. Saam-biig a ye goma a yɛlã sẽn da yaa to-to bãensã roogẽ wã yell n yeel yaa: “Wakat ninga, m sũurã ra mi n sãama wʋsg wall m maand yɩɩre, tɩ m mi n daag nintãm.” Bõe n sõng-a t’a tõog toogo? A yeelame: “M da pʋʋsda wakat fãa. M sã n da yik yibeoog fãa m pʋʋsdame. Daarã tõre, yɛlã sã n wa yaa kãn-kãe, m pʋʋsdame. Ned sã n da maan-m pãng tɩ m sũurã yiki, m da kẽeda ko-soalsgẽ wã n pag kʋɩlengã n pʋʋse.” Bũmb a to sẽn sõng d saam-biigã yaa t’a ra bʋgsda pĩnd wẽndẽ la rũndã-rũndã neb sẽn kell n maan sɩd ne a Zeova kibay zugu. Rẽ sõng-a lame t’a tõog toogo, la a kell n tall sũur pʋgẽ bãan wa a Zeezi sẽn pʋlem a karen-biisã.—Zã 14:27; 16:33.

13. Bõe n tõe n sõng-d tɩ d tõog toogo?

¹³ D sẽn nong a Zeova la d taabã sõngda tõnd tɩ d tõogd toogo, b sã n wa namsd tõndo. A Zeezi ra nonga a Ba wã ne a sũur fãa hal n tãag a kũum. A ra nonga a karen-biisã sẽn yaa a zo-rãmbã me. (Zã 13:1; 15:13) Tõnd me sã n nong a Zeova la d taabã wa a Zeezi, b sã n wa namsd tõndo na n sõng-d lame tɩ d tõog toogo. Wãn to? Sẽn na yɩl n paam sok-kãngã leoore, d na n goma tẽn-tʋmd a Poll yelle.

14. Bõe n sõng a Poll t’a kell n maan sɩd ne a Zeova, baa a sẽn wa n bãng tɩ b na n kʋ-a lame wã?

¹⁴ Bilf nand tɩ b kʋ a Polle, a gʋlsa lɛtr n tool a zo-nongr a Tɩmote n yeel yaa: ‘Vʋʋsem sõngã Wẽnnaam sẽn kõ tõndã pa kɩt tɩ d yaa rabɛɛmb ye. A kõta tõnd pãng ne nonglem.’ (2 Tɩm. 1:7) A Poll gomdã rat n yeelame tɩ kiris-ned sã n nong a Zeova ne a sũur fãa, tõe n sõng-a lame t’a tõog toog baa zu-loe-kɛgems sasa. (2 Tɩm. 1:8) Yaa vẽeneg t’a Poll sẽn da nong a Zeova wã sõng-a lame t’a kell n maan sɩd ne-a, baa ne a sẽn da mi tɩ b na n kʋ-a lame wã.—Tʋʋ. 20:22-24.

15. Bõe la d tẽed-n-taas maan n wilg tɩ b nonga b taabã ne b sũy fãa? (Ges-y fotã me.)

¹⁵ Yaa vẽeneg tɩ d sũur nooma ne d tẽed-n-taas nins sẽn ket n maand sɩd ne a Zeova baa ne b sẽn namsd-bã. Rũndã-rũndã, saam-biis la saam-bi-pogs wʋsg n maand wa a Akila ne a Priska sẽn gẽneg b yõy a Poll yĩngã. (Rom. 16:3, 4) B sakd n maanda bũmb toor-toor n wilgdẽ tɩ b nonga b tẽed-n-taasã, baa rẽ sẽn tõe n kɩt tɩ b nams bãmb mensã. Wala makre, Risi b sã n mi n yõk d tẽed-n-taag n na n kao a bʋʋdo, wʋsg kẽngda bʋʋdã kaoob zĩigẽ n tɩ keng a raoodo. Saam-bi-poak a ye b sẽn da yõk sẽn yã a tẽed-n-taas wʋsg sẽn wa bʋʋdã kaoob zĩigẽ n na n keng a raoodã, a sũur yɩɩ noog wʋsgo, hal t’a ra pa tõe n gom ye. B sẽn maan woto n wilg tɩ b nong-a lame wã kenga a raoodo, wakat ning a sẽn da rat raood kengr n tɩ yɩɩdã. D sẽn nong a Zeova la d taabã sẽn sõngd tõnd tɩ d tõogd toogã pa noom-d sɩda?

16. Bõe n kɩt tɩ tẽn-tʋmd a Pɩyɛɛr yeel tɩ neb nins b sẽn namsd b sẽn tũud Wẽnnaam yĩngã tõe n maana sũ-noogo? (1 Pɩyɛɛr 4:14)

¹⁶ D miime tɩ d sẽn tõogd toogã kɩtdame tɩ d tat Wẽnnaam yam. (Karm-y 1 Pɩyɛɛr 4:14.) Tẽn-tʋmd a Pɩyɛɛr yeelame tɩ neb nins b sẽn namsd b sẽn tũud Wẽnnaam yĩngã tõe n maana sũ-noogo. Bõe yĩnga? B sã n namsd tõnd woto, wilgdame tɩ “Wẽnnaam vʋʋsem sõngã bee [tõnd] zutu.” Bũmb ning sẽn paam a Pɩyɛɛrã kɩtame t’a ra miẽ tɩ ned sã n tõogd toogo, n kɩs sɩd t’a tata Wẽnnaam yam kõt-a-la sũ-noogo. Yʋʋmd 33 Pãntekotã poor bilfu, b tʋma wẽnd-doogã gũudb tɩ b tɩ yõk a Pɩyɛɛr ne tẽn-tʋmdb a taabã, b sẽn da moond koɛɛgã yĩnga. La a Pɩyɛɛr goma ne raoodo, n teel bũmb nins a sẽn da tẽedã. (Tʋʋ. 5:24-29) Baa b sẽn pãb yẽ ne tẽn-tʋmdb a taabã ne kalwaasã poore, b pa bas koɛɛgã mooneg ye. B pʋd n looga “ne sũ-noogo, bala b paamame tɩ b nams-b a Zeezi yʋʋrã yĩnga.” B sã n wa namsd tõnd me d tũudmã yĩnga, d tõe n maana sũ-noogo.—Tʋʋ. 5:40-42.

17. A Zeezi yõkrã yʋngo, bõe la a yeel a karen-biisã?

¹⁷ A Zeezi yõkrã yʋngo, a yeela a karen-biisã yaa: “Ned ning sẽn nong maam, m Ba wã me na n nong-a lame.” (Zã 14:21) Ka la bilfu, nebã fãa na n nonga tõnd d sẽn tũud a Zeova wã yĩnga, n pa kis-d ye. D yãgdame tɩ wakat kãng ta. (2 Tes. 1:6-8) La nananda, bɩ d ra tol n yĩm bũmb nins sẽn kɩt tɩ d tõe n maan sũ-noogo, b sã n wa namsd tõndã ye.