2026, SIG-NOY RASEM 18-24
YƖƖLL 35 D bao n bãng sẽn tar yõod n yɩɩdã
Ra bas-y tɩ bũmb tiis-y Wẽnnaam tũudmã pʋgẽ ye
“Bɩ y kell n bao n bãng a Zeova raabã sẽn yaa a soaba.”—EFƐƐ. 5:17.
D SẼN NA N BÃNGE
D na n yãa d sẽn tõe n tʋm d tũudmã tʋʋm to-to n da bas tɩ bũmb tiis-d ye.
1-2. Bũmb sẽn tar yõod tõe n tiis-d lame. Wãn to?
MAMS-Y wa yãmb sẽn na n wẽnd mobilli, tɩ y telefonnã wa kelme. Tõe tɩ y sokda y meng ned ning sẽn boond yãmbã sã n pa rata yãmb sõngre, bɩ a sã n tara bũmb sẽn tar yõod n na n yeel-yã. La y miime me tɩ y segd n gesa sorã sõma. Yell a woto taoore, y segd n yãka bũmb ning sẽn tar yõod n yɩɩdã.
2 D fãa tara bũmb toor-toor n segd n maane. La d miime tɩ bũmb nins sẽn tar yõod n yɩɩdã yaa tũudmã tʋʋmã.a (Mat. 6:33) A Zeova Kaset rãmbã yaa wa ned sẽn wẽnd mobill ne gũusgu. B modgdame tɩ bũmb ra tiis-b a Zeova tʋʋmdã pʋgẽ ye.—Yel. 4:25; Mat. 6:22.
3. D na n goma bũmb nins sẽn tõe n tiis-dã yelle. Bõe yĩng tɩ rẽ na n sõng-do?
3 Tõnd ned baa a ye pa rat tɩ bũmb tiis-a a Zeova tʋʋmdã pʋgẽ ye. La bũmb wʋsg tõe n tiis-d-la nana-nana. (Luk 21:34-36) Sẽn na yɩl n sõng-d zĩ-kãng wɛɛngẽ, d na n baoo sogsg a tãab leoore. 1) Bõe n tõe n tiis-du? 2) Wãn to la a Zeezi maan tɩ bũmb pa tiis-a Wẽnnaam daabã maaneg pʋgẽ? La 3) bõe la d tõe n maan tɩ bũmb ra tiis-d rũndã-rũndã?
BÕE N TÕE N TIIS-DU?
4-6. Bõe n tõe n tiis-d nana-nana?
4 D fãa tara bũmb wʋsg sẽn tar yõod n segd n ges b yelle. Wala makre, tõe tɩ d tara bãag n segd n ges d laafɩ wã yelle. Pa rẽ bɩ zu-loɛɛg n be d zakẽ wã, wall d tara zu-loɛɛg a to n segd n welg-a. Yaa sɩd tɩ bõn-kãens tara yõod tɩ d segd n ges b yelle. La sã n wa lebg rẽ yell bal la d tagsd tɩ rɩt d sẽkã la wat ne yaamse, b tiis-d lame.
5 Sẽn paase tõnd sʋkã neb wʋsg bee tẽns nen-kɛglem tʋʋmã sẽn waooge, paam n kõ noorã sẽn yaa toogo, wall bã-longds sẽn be tɩ namsd-b wʋsgo. (2 Tɩm. 3:1) Yɛl a woto tõe n kɩtame tɩ d maand yɩɩr wʋsgo, hal n tagsd b yell wakat fãa.
6 Tõe tɩ d mii neb vɩɩm sẽn toeem fasɩ yɛl a woto sẽn paam-b yĩnga. Rẽnd b sã n maand yɩɩr wʋsgo, b bee bʋʋm. A Zeova pa naan ninsaalbã tɩ b namse, wall tɩ b maand yɩɩr wakat fãa ye. Rẽnd pa lingr la neb kẽer sẽn get tɩ b vɩɩmã pa le tõe n yɩ wa b sẽn da magã ye. Kɩtame tɩ sãnda kẽes b meng yõ-noogrã pʋgẽ n tagsdẽ tɩ rẽ n na n kɩt tɩ b yɩɩrã booge. Zu-loeesã sã n wa kɩt tɩ d maand yɩɩr wʋsgo, bõe la d tõe n maane? Bũmb kẽer n da tõe n tiis a Zeezi me. Bɩ d ges a sẽn maan to-to tɩ bõn-kãens pa tiis-a Wẽnnaam daabã maaneg pʋgẽ.
A ZEEZI SẼN MAAN TO-TO TƖ BŨMB PA TIIS-A YE
7. Bõe n da tõe n tiis a Zeezi?
7 Bũmb wʋsg n da tõe n tiis a Zeezi. Wala makre politikã yɛl la yɛl a taaba. A wakatẽ wã, neb wʋsg ra yaa naong rãmb la bãad-dãmba. (Mat. 14:14; Mark 14:7) Rom nebã ra wẽgd-b lame, tɩ Zʋɩf-rãmb a taab me ra kɩt tɩ vɩɩmã yaa toog ne-ba. Nin-buiidã sẽn wa n yã t’a Zeezi tara tõog n tõe n maan yel-soalmã, b ra ratame t’a lebg b rĩma. (Zã 6:14, 15) A Sʋɩtãan me maka a Zeezi n pʋlm-a dũniyã naam. (Mat. 4:8, 9) Sẽn paase, a Zeezi sẽn wa n wilg a karen-biisã a sẽn na n nams to-to wã, tẽn-tʋmd a Pɩyɛɛr yeel-a lame yaa: “Zu-soaba, ra yeel-y woto ye.” A goamã ra tõe n kɩtame t’a Zeezi bao n gil namsgo.—Mat. 16:21, 22.
8. Wãn to la a Zeezi maan tɩ bũmb pa tiis-a Wẽnnaam daabã maaneg pʋgẽ?
8 Wãn to la a Zeezi maan tɩ bũmb pa tiis-a Wẽnnaam daabã maaneg pʋgẽ? Bũmb a tãab la a maan tɩ sõng-a. Pipi, a modg n talla a Zeova tagsa wã buudu. (Zã 8:28; 14:9) Yiibu, a ra tʋmda a Zeova tʋʋmdã ne yẽesem. (Mat. 9:35) La tãabo, a ra mii bũmb nins sẽn tar yõod n yɩɩdã n bake. (Zã 4:34) A pa sak n maan a Sʋɩtãan sẽn da rat t’a maanã ye. A ra miime tɩ baa a Pɩyɛɛr sẽn dat a neerã, a saglgã pa zems ne a Zeova raabã ye. (Mat. 4:10; 16:23) A Zeezi pa bas tɩ nebã manesmã la b no-goamã tiis-a t’a pa maan Wẽnnaam daabã ye. Yaa sɩd tɩ bũmb nins sẽn tõe n tiis tõnd rũndã-rũndã wã yaa toor ne bũmb nins sẽn da tõe n tiis a Zeezi wã. La d sã n dɩk a Zeezi togs-n-taare, d pa na n bas tɩ bũmb tiis-d ye.
BÕE LA D TÕE N MAAN TƖ BŨMB RA TIIS-DU?
9. Efɛɛz rãmb 5:17 wã wilgdame tɩ d segd n maana bõe?
9 Bao-y n tall-y-yã a Zeova tagsa wã buudu. Rẽ na n sõng-y lame tɩ y ‘bãngd a Zeova raabã sẽn yaa a soaba.’ (Karm-y Efɛɛz rãmb 5:17.) Y sã n dat n bãng bũmb nins sẽn noom a Zeova wã, y segd n karemda Wẽnnaam Gomdã la y bʋgsdẽ. Baa yell ning wɛɛngẽ, Biiblã sã n pa wilg y sẽn tõe n maan bũmb ningã vẽenega, y tõe n bãnga sẽn noom a Zeova. Wãn to? Yaa y sẽn na n zãmsd Biiblã n bãngd a Zeova tagsa wã sõma la y tũud bũmb nins d sẽn zãmsdã.
10. D maanda wãn n bãng a Zeova tagsa wã?
10 D sã n zãmsd Biiblã la d bʋgsd a Zeova manesem sẽn yɩ to-to ne ninsaalbã zugu, d na n bãnga a sẽn get yɛlã to-to wã. (Zer. 45:5) D sã n wa karemd kibar Biiblã pʋgẽ, d tõe n soka d meng yaa: ‘Mam sẽn karemdã wilgda maam bõe a Zeova zugu? Bõe la m tõe n maan n toeem m tagsa wã tɩ yɩ wa a Zeova rẽndã?’ Yaa vẽeneg tɩ Wẽnnaam tagsa wã yɩɩda tõnd tagsa wã zĩig sẽn zãre. (Eza. 55:9) Rẽ n so tɩ d segd n pʋʋs-a n kos t’a wilgd-d d sẽn tõe n maan a raabã to-to. (Yɩɩn. 143:10) D segdame me n kos-a t’a sõng-d tɩ d wʋm a tagsa wã võore, la a sõng-d tɩ d tagsa wã yɩ wa yẽ rẽndã.—1 Zã 5:14.
11. Bõe la a Zeova pa rat tɩ d maane?
11 A Zeova ratame tɩ dũniyã saab sã n wa ta bɩ mik tɩ d segl n saame. Rẽ n so t’a pa rat tɩ d bas tɩ bũmb tiis-d ye. (Mat. 24:44) A pa rat tɩ d maand yɩɩr wʋsg hal n wa koms raood ye. (Mat. 6:31, 32) Rẽ n so t’a kõt-d sagls sẽn na yɩl tɩ d sã n wa maand yɩɩr d laafɩ wã wɛɛngẽ, d tʋʋmã, d ro-gãaga, d zakã rãmb wall bũmb a taab wɛɛngẽ bɩ d mi d sẽn segd n maanega. A sagenda tõnd tɩ d bao yam la pãng yẽ nengẽ n tõog n mao ne d zu-loeesã.—Yɩɩn. 55:22; Yel. 3:5-7.
12. Bõe la d tõe n maan n kell n tall sũ-noogo, baa yel-beedã sẽn maand dũniyã pʋgẽ wã? (Matiye 5:3)
12 D kell n tʋm a Zeova tʋʋmdã ne yẽesem. D fãa maanda yɩɩr yel-beed nins sẽn maand dũniyã pʋgẽ wã yĩnga, n pa tõe n toeem baa fʋɩ me ye. Yaa rẽ yĩng la d sẽn tʋmd a Zeova tʋʋmdã ne yẽesem, n pa basdẽ tɩ bũmb d sẽn pa tõe n toeem tiis-dã. D sã n maand d sẽn tõe fãa n na n kell n tall zood sõma ne a Zeova, d na n paama sũ-noogo. Bala a Zeova naana tõnd tɩ d miẽ tɩ d segd n bao-a lame. (Karm-y Matiye 5:3.) Rẽ n so tɩ d modgd n zãmsd Biiblã la d tʋmd a Zeova tʋʋmdã wa d sẽn tõe tɛka. D sẽn maand woto wã nooma a Zeova, bala d pa sãamd d sẽkã ye.—Yel. 23:15.
13. Bõe la d tõe n maan n ‘da sãam d sẽkã’?
13 Tõnd a kiris-nebã pa rat n ‘sãam d sẽkã’ baa bilf ye. (Efɛɛ. 5:15, 16) D miime tɩ Biiblã sẽn yeel tɩ d ra sãam d sẽkã, pa d sẽn tõe n sigl d daar fãa tʋʋmã to-to wã yell bal la a gomd ye. A sagend-d lame tɩ d gũus ne bũmb nins d sẽn maandã, bala wakat ning Wẽnnaam sẽn na n sãam dũni-kãnga wã kolgame. Bõe la d tõe n maan n da sãam d sẽkã? D sã n karemd yel-beed nins sẽn maand dũniyã pʋgẽ wã kibay wʋsgo, n get rẽ wall d kelgdẽ, tõe n tiis-d lame, n koms d raood la kɩt tɩ d pa tʋm a Zeova tʋʋmã ne yẽesem ye. Yaa sɩd tɩ pa wẽng tɩ d bao n bãng bũmb nins sẽn maand dũniyã pʋgẽ wã ye. La d pa segd n sãam d sẽkã ne bõn-kãens ye. D pa segd n bas tɩ bõn-kãens koms d raood tɩ d pa tõog n tʋm a Zeova tʋʋmã sõma ye. Yaa sõma me tɩ d tags n ges d sẽn tõe n paas d koe-moonegã to-to, wala makre n maand lebg-n-tɩ-ges-rãmb n yɩɩd pĩndã. D miime tɩ tara yõod wʋsg tɩ d tũnug ne segb buud fãa n sõng nebã sẽn na yɩl tɩ b “paam fãagre, la b paam bãngr hakɩɩk sɩdã zugu.”—1 Tɩm. 2:4.
14. D sã n tʋmd a Zeova tʋʋmdã ne yẽesem, zĩ-bʋg wɛɛngẽ la nafd tõndo? (Ges-y fotã me.)
14 D sã n tʋmd a Zeova tʋʋmdã ne yẽesem, na n sõng-d lame tɩ d ra yĩm bũmb ning sẽn kɩt tɩ yel-beed maand dũniyã zug rũndã-rũndã wã ye. D sã n ne tẽns wʋsg sẽn gudgd politikã wɛɛngẽ wã, bao-n-kõ-noorã sẽn lebg toogã la bã-longdsã sõor sẽn tar paasgã, pa na n koms d raood wʋsg ye. D na n tẽegame tɩ yaa Biiblã bãngr-goam n pidsdi. D pa na n bas tɩ rabeem yõk-d ye. D na n maneg n kɩsa sɩd t’a Zeova na n kɩtame tɩ tẽngã lebg arzãn ka la bilfu. D miime t’a Zeova na n kell n sõng-d lame tɩ d tõog toogo, tɩ kɩt tɩ d pa maand yɩɩr wʋsg ye.—Yɩɩn. 16:8; 112:1, 6-8.
Kell-y n tʋm-y-yã a Zeova tʋʋmã ne yẽesem, baa yel-beed wʋsg sẽn maand dũniyã pʋgẽ wã (Ges-y sull 14)b
15. D sã n yaa “neb yam sẽn vẽenẽ,” tõe n sõng-d lame tɩ d maan bõe? (1 Pɩyɛɛr 4:7)
15 D kell n wilg tɩ d mii bũmb ning sẽn tar yõod n yɩɩdã n bake. Rũndã-rũndã, yaa yõ-noogrã n pak neb wʋsgo. B pa tagsd dũniyã saab sẽn watã yell ye. Yaa sɩd tɩ noog f yõor pa wẽng ye. La d segd n yɩɩ “neb yam sẽn vẽenẽ,” n da yɩ wa dũniyã rãmb ye. (Karm-y 1 Pɩyɛɛr 4:7.) Woto rat n yeelame tɩ d segd n tagsda sõma n bãngd n yãkd yam yõ-noogrã wɛɛngẽ. D sã n maand woto, d wilgdame tɩ d tara a Zeova tagsa wã buudu, la tɩ d sɩd mii bũmb ning sẽn tar yõod n yɩɩdã.—2 Tɩm. 1:7.
16. A Zeezi kũumã sẽn n wa n kolgdẽ wã, bõe n da pak-a n yɩɩda?
16 A Zeezi ra wilgda wakat fãa t’a mii bũmb ning sẽn tar yõod n yɩɩdã n bake. A kũumã sẽn wa n kolgdẽ tɩ ra pa nana wã, a wilgame tɩ kell n maan sɩd ne Wẽnnaam, la Wẽnnaam daabã maaneg n da pak-a n yɩɩda. Rẽ n so t’a pelg a pʋg n pʋʋs naoor wʋsgo. La a karen-biisã pa kell n gũ ye. B basame n pa pʋʋse, n gũsi. ‘B sũyã ra sãama wʋsgo.’—Luk 22:39-46; Zã 19:30.
17. Bõe yĩng tɩ neb wʋsg tʋmd ne rezo sosiyo-rãmbã, la rẽ tõe n waa ne bõe? (Ges-y fotã me.)
17 Yɛlã sẽn yaa to-to wã tõe n mi n kɩtame tɩ d sũy sãam wa a Zeezi karen-biisã. Yɛl nins sẽn maand saabã wakatã tõe n kɩtame tɩ d maand yɩɩr wʋsgo. Sẽn na yɩl n yĩm zu-loeesã, neb wʋsg tʋmda ne rezo sosiyo-rãmbã wʋsgo. B tũnugda ne rẽ n paamd b zakã rãmb la b zo-rãmbã kibaya, la b toond-b fot-rãmb la bũmb a taab sẽn na yɩl tɩ bãmb me bãng b keelem. B leb n tũnugda ne rẽ n get video-rãmba, filim-dãmb la b reemdẽ. La b sẽn yiisd bõn-paal rezo sosiyo-rãmbã pʋsẽ wakat fãa wã kɩtame tɩ f sã n dat n bãng bõn-kãens bɩ rɩt f sẽkã wʋsgo, la wat ne yaamse. Sẽn na yɩl n sõng-d tɩ d bãng d sã n tʋmda ne rezo sosiyo-rãmbã sõma, bɩ d sok d meng yaa: ‘M sẽn tʋmd ne rezo sosiyo-rãmbã to-to wã kengda m raood bɩ, bɩ kɩtdame tɩ m yĩm bũmb ning sẽn tar yõod n yɩɩdã?’
Yam-vẽenem tõe n sõng-d lame tɩ d ra bas tɩ rezo sosiyo-rãmbã la yõ-noogrã tiis-d ye (Ges-y sull 17)
18. Bõe yĩng tɩ d segd n maan gũusg bũmb nins d sẽn getã wɛɛngẽ?
18 D sã n get filim-dãmb la video-rãmb ẽntɛrnetẽ wã, pa rẽ bɩ yaa ze-video-rãmb la d tãooda, d segd n maana gũusgu. Bõn-kãens maaneg tõe n yɩ-d-la noog la boog d yɩɩrã bilfu. La d segd n tagsa neere, n bãng n yãk bũmb ning d sẽn na n gesã la reem ning d sẽn na n deemã. D segd n gũusame me tɩ rẽ ra sãam d sẽkã ye. D sã n ges video ẽntɛrnetẽ wã n sa, a to n pukd tɩ d tõe n kell n gese. La video-rãmb kẽer sẽn naag ne yoob yɛl la nen-kɛglem tʋʋmã yĩnga, d tõe n wa geta rẽ. A buud paama d saam-biig a ye sẽn be Aazi soolmẽ wã. A wa n sɩnga video-rãmb sẽn nekd pag ne rao lageng tʋlsem gesgo. A sẽn da ket n getẽ wã, a wa n geta yoob yɛla. Zu-noogo, a kosa kãsem-dãmbã la a zo-rãmbã sõngre, n maan bũmb a taab me tɩ sõng-a t’a tõog n base. Wala makre, a yẽesa aplikasiyõ-rãmb kẽere, la a pa le tõgd a portaablã wʋsg ye. Kiba-kãngã wilgdame tɩ tara yõod tɩ d yãkd d reemã ne yam.
19. D sã n bas tɩ wa lebg yõ-noogrã n pak tõnd n yɩɩda, bõe n tõe n maane?
19 D sã n wa rat n noog d yõor wall d tog sor n tɩ vʋʋs me, d segd n tagsa neere. Yaa sõma tɩ d mi n bas tʋʋmã n vʋʋs bilfu. Rẽ paasda d yĩngã laafɩ menga. La sã n wa lebg bõn-kãens n pak tõnd n yɩɩda, d pa na n le tar sẽk n maand bũmb nins sẽn tar yõod n yɩɩdã ye. (Fili. 1:10) Bõn-kãens wɛɛngẽ, yaa ned kam fãa n segd n yãk bũmb ning a sẽn na n maanã, la sẽk ning a sẽn na n kẽes rẽ pʋgẽ wã. D sã n wa na n yãk yam yõ-noogrã la tog sor n tɩ vʋʋsã wɛɛngẽ, d tõe n soka d meng yaa: ‘M sẽn kẽesd sẽk ning bõn-kãens pʋgẽ wã wilgdame tɩ m tara tagsg sẽn zems rẽ wɛɛngẽ bɩ? M yam-yãkrã wilgdame tɩ m mii bũmb nins sẽn tar yõod n yɩɩdã bɩ? M segla m meng n sa, “bũmb fãa saab” sẽn kolgã yĩng bɩ?’
20. Bõe yĩng tɩ yaa sõma tɩ d ra bas tɩ bũmb tiis-du?
20 D sã n pa bas tɩ bũmb tiis-d Wẽnnaam tʋʋmã pʋgẽ, nafda tõndo. (Eza. 48:17) Ne a Zeova sõngre, d na n tõog n maoo ne d zu-loeesã. Bũmb nins sẽn maand dũniyã zugã pa na n koms d raood ye. D pa na n bas tɩ yõ-noogrã sãam d sẽkã ye. Bɩ d maan d sẽn tõe fãa n tall a Zeova tagsa wã buudu, n kell n tʋm a tʋʋmã ne yẽesem la d kell n wilg tɩ d mii bũmb nins sẽn tar yõod n yɩɩdã n bake. D sã n maan woto, d pa na n bas tɩ bũmb tiis-d ye. D na n kell n “gãda vɩɩm hakɩɩkã kãn-kãe.”—1 Tɩm. 6:19.
YƖƖLL 129 D na n kell n tõoga toogo
a GOMDÃ VÕORE: Tũudmã tʋʋmã yaa bũmb nins fãa d sẽn maand a Zeova yĩngã. Wala makre Biiblã zãmsgo, tigissã kẽnde, zak pʋgẽ Biibl zãmsgã maanego, la koɛɛgã moonego. Leb n tõe n yɩɩ sõng n me Rĩung roog wall n ges a yelle, sõng d tẽed-n-taas sabab-wẽng sẽn paame, sõng n tʋm tigis-kãseng yĩng wall Betɛllẽ wã.
b FOTÃ BILGRI: Pag ne a sɩd sẽn moond koɛɛgã ne yẽesem, n pa basdẽ tɩ yel-beed nins sẽn maand dũniyã pʋgẽ wã tiis-b ye.