Y sẽn tõe n maan to-to t’a Zeova paam waoogr y yi-kãadmã daare

1-2. A Zeova ratame tɩ y yi-kãadmã daar yɩ wãn-wãna?

Y PAAMA ned y sẽn nonge, tɩ y segend n na n kẽ kãadem bɩ? Sã n yaa woto, yaa vẽeneg tɩ y sũur noomame! Tõe tɩ y sɩnga y yi-kãadmã kibs seglg hal tɩ sẽk kae ye. Y yi-kãadmã sẽn na n yɩ to-to wã tara yõod a Zeova nifẽ. A ratame tɩ y paam sũ-noog y yi-kãadmã daare,a la tɩ y zĩnd-n-taarã me yɩ noogo.—Yel. 5:18; Sal. yɩɩl. 3:11.

² Zemsame tɩ y ges t’a Zeova paam waoogr y yi-kãadmã daare. Bõe yĩng tɩ d yet woto, la bõe la y tõe n maan t’a Zeova paam waoogr y yi-kãadmã daare? Yaa sɩd tɩ sẽn yɩɩd fãa, yaa neb nins sẽn segend b yi-kãadmã yĩng la b gʋls sõs-kãngã. La sagls nins sẽn be a pʋgẽ wã tõe n sõnga d fãa tɩ d kɩt t’a Zeova paam waoogr b sã n wa bool-d yi-kãadmã kibsa, wall neb sẽn segend b yi-kãadem kibs sã n kos-d saglga.

BÕE YĨNG TƖ Y SEGD N MODG T’A ZEOVA PAAM WAOOGR Y YI-KÃADMÃ DAARE?

3. Kiris-neb sẽn segend b mens n na n kẽ kãadem segd n tagsda bõe yelle, la bõe yĩnga?

³ Kiris-neb sẽn segend b mens n na n kẽ kãadem segd n modgame tɩ yam ning fãa b sẽn na n yãk b yi-kãadmã daarã yĩngã zems ne sagls nins a Zeova sẽn kõ tõnd a Gomdã pʋgẽ wã. Bõe yĩnga? Bala yaa a Zeova la kãadmã lugunda. Yẽ n lugl pipi kãadmã, n tall a Awa n wa kõ a Ãdem t’a lebg a paga. (Sɩng. 1:28; 2:24) Rẽ n so tɩ neb sẽn segend n na n kẽ kãadem segd n tagsd b sẽn na n maan to-to t’a Zeova paam waoogr b yi-kãadmã daarã yelle.

4. Bõe me n kɩt tɩ neb sẽn segend n na n kẽ kãadem segd n modg t’a Zeova paam waoogr b yi-kãadmã daare?

⁴ Bũmb a to n kɩt tɩ y segd n bao n bãng a Zeova tagsgo, y sã n wa segend y yi-kãadem kibsa. Yaa t’a yaa y Ba sẽn be saasẽ la y Zoa hakɩɩka. (Ebre. 12:9) Sãmbg kae tɩ y ratame tɩ kell n yɩ woto ye. Y pa tol n dat tɩ bũmb sẽn na n sãam y Zoa wã sũur maan y kãadmã daare, wall daar a to meng ye. (Yɩɩn. 25:14) Y sã n tags bũmb nins fãa a Zeova sẽn maan n kõ-yã la a sẽn nan na n maan n kõ-yã yelle, y pa ne tɩ zemsame tɩ y modg t’a paam waoogr y yi-kãadmã daar sɩda?—Yɩɩn. 116:12.

Y SẼN TÕE N KƖT T’A ZEOVA PAAM WAOOGR TO-TO

5. Wãn to la Biiblã tõe n sõng neb sẽn segend n na n kẽ kãadem tɩ b bãng n yãk yam b yi-kãadmã kibs wɛɛngẽ?

⁵ Biiblã pʋgẽ, noy takɩ pa be n wilgd kiris-neb yi-kãadmã sẽn segd n yɩ to-to, la b sẽn segd n maan b yi-kãadem kibsã to-to me ye. Rẽnd neb sẽn segend n na n kẽ kãadem tõe n maaname tɩ zems ne b yɛlã sẽn yaa to-to wã, b babgẽ wã neb minundã la bũmb nins sẽn noom-bã. Kiris-neb hakɩɩkã segd n tũ noy nins tẽngã taoor dãmb sẽn gãneg yi-kãadmã wɛɛngẽ wã me. (Mat. 22:21) La neb sẽn dat n kẽ kãadem sã n tũ Biiblã noyã n segl b yi-kãadmã, na n waooga a Zeova la noog a sũuri. Woto wã, Biiblã sagl-bʋs la y segd n tũ?

6. Bõe yĩng tɩ yaa tɩlɛ tɩ neb sẽn dat n kẽ kãadem baoo n bãng noy nins tẽngã taoor dãmb sẽn ganeg kãadem kõom wɛɛngẽ wã?

⁶ Tũ-y noy nins tẽngã taoor dãmb sẽn ganegã. (Rom. 13:1, 2) Tẽnsã fãa la bal pʋsẽ, tẽngã taoor dãmb yiisa noy tɩ neb sẽn dat n kẽ kãadem segd n tũ. Kiris-neb sẽn dat n kẽ kãadem segd n bao n bãnga noy nins b sẽn gãneg tẽng ning pʋgẽ b sẽn be wã. Y sã n dat sõngr sẽn na yɩl n bãng no-kãense, y tõe n kosa kãsem-dãmbã.b

7. Y yi-kãadmã daar segd n yɩɩ wãn to, la bõe la y segd n maane?

⁷ Modg-y tɩ bũmb fãa maan ne waoogre. (1 Kor. 10:31, 32) Yaa vẽeneg tɩ y ratame tɩ bũmb nins sẽn na n maan y yi-kãadmã daarã wilg tɩ y bɩɩsa zug-sõma nins vʋʋsem sõngã sẽn sõngd ned t’a bɩɩsã, la tɩ y pa rɩkd dũniyã neb togs-n-taar ye. (Gal. 5:19-26) Saam-biig ning sẽn na n kẽ kãadmã sẽn na n lebg zakã soabã yĩnga, yẽ n segd n ges tɩ yi-kãadmã yɩ sũ-noog daare, la tall waoogre. Bõe n tõe n sõng tɩ y yi-kãadmã daar yɩ woto? B sã n wɛgs yi-kãadem sõsg sẽn tik Biiblã zug ne waoogr la nonglem, na n sõnga neb nins sẽn na n wa wã tɩ b bãng tɩ kãadmã yaa kũun sẽn yit a Zeova nengẽ. Leb n na n sõnga sẽn na n wa-bã tɩ b bãng tɩ kãadmã pa reem bũmb ye. Rẽ n so tɩ sã n tõe fãa bɩ kiris-nebã fãa la bal na n yãk yam n maan b yi-kãadmã Rĩungã roogẽ. Y sã n dat tɩ b wɛgs y yi-kãadmã sõsg Rĩungã roogẽ, y segd n gʋlsa kãsem-dãmbã lɛtr pĩnd-pĩnd n kose.

8. Y sã n na n maana yi-kãadem kibsa, bõe la y tõe n maan t’a Zeova paam waoogre? (Rom dãmbã 13:13)

⁸ Karm-y Rom dãmb 13:13. Y sã n yãka yam n na n maan yi-kãadem kibsa, bɩ y gũus tɩ ra wa yɩ wa dũniyã rãmb sẽn maandã ye. Gɛrkã gom-bil ning b sẽn lebg tɩ “reem sẽn naag ne tʋʋm-yoodã” bilgda tigr sẽn naag ne rãam yũ tɩ looge, la yʋʋm-teed sẽn wẽed hal tɩ zĩig zʋʋge. Y sã n yãka yam n na n kõ nebã rãam, y segd n gũusame tɩ ned ra wa yũ tɩ loog ye.c Y sã n na n ninga mizik bɩ y ra maan tɩ wẽed wʋsgo, hal tɩ neb nins sẽn na n wa wã pa le tõe n sõs ne taab n wʋm taab goam sõma ye. Maag-y y yĩng n tũus mizik nins b sẽn na n ningã, la y bao n bãng b goamã sã n pa na n sãam nina sũuri.

9. Y sã n na n kõo neb sor tɩ b gom y yi-kãadmã kibs sasa wall y maan reem toor-toore, bõe la y segd n ning y yamẽ?

⁹ Y yi-kãadmã kibs sasa, y na n kõo neb weer tɩ b gome, y na n wilga fot-rãmb la video-rãmba, pa rẽ bɩ reem a taab n na n zĩnd bɩ? Bũmb a woto tõe n paasa tigrã noosem. La y segd n gũusame tɩ bũmb nins y sẽn na n maanã keng nebã raoodo. (Fili. 4:8) Sok-y y meng yaa: ‘Bõn-kãens pa na n paoog ned sɩda? Na n wilgame tɩ d nanda kãadmã sẽn yaa Wẽnnaam kũunã bɩ?’ La sẽn yɩɩd fãa y segd n soka y meng yaa: ‘Na n waooga a Zeova bɩ?’ Yaa sɩd tɩ ned sã n togs goam sẽn maand laado pa wẽng ye. La pa segd n yɩ gom-dẽgd ye. (Efɛɛ. 5:3) Y sã n na n kõo y zakã neb wall y zo-rãmb sor tɩ b gom y yi-kãadmã kibs sasa bɩ y reng n sõs ne-b n wilg goam nins buud y sẽn pa rat tɩ b gomã.

10. Bõe yĩng tɩ neb sẽn dat n kẽ kãadem pa segd n bao bõn-bɛda? (1 Zã 2:15-17)

¹⁰ Ra bao-y bõn-bɛd ye. (Karm-y 1 Zã 2:15-17.) A Zeova sã n neẽ tɩ neb nins sẽn tũud-a wã modgdame sẽn na yɩl tɩ yẽ paam pẽgr n pa baood ziir b mens yĩnga, noom-a lame. Rẽ n so tɩ kiris-neb nins sẽn yaa sik-m-mens rãmbã pa na n kẽes ligd wʋsg b yi-kãadem kibs pʋgẽ, n ‘wilg b paoong ne wuk-m-meng’ ye. Y sã n maan yi-kãadem kibs sẽn zemse, wãn to la na n naf-yã? Norvɛɛz saam-biig a ye yʋʋr sẽn boond t’a Mayik maana woto tɩ naf-a. A yeelame: “D pa kẽ sama, tɩ sõng tɩ d tõog n kell n yɩ so-pakdba. D maana yi-kãadem kibs sẽn zemse, la yɩɩ noog hal tɩ d ket n tẽegdẽ tɩ noom-do.” A Tabita sẽn yaa Ẽnd saam-bi-poakã yeelame: “Kɩtame tɩ d ra pa maand yɩɩr wʋsg ye. D sẽn yãk yam n na n maan yi-kãadem kibs sẽn zemsã kɩtame tɩ d ra pa tar bũmb wʋsg n na n sigli, tɩ no-koɛɛmã me pa yɩ wʋsg ye.”

11. Wãn to la neb sẽn dat n kẽ kãadem tõe n wilg tɩ b yaa sik-m-mens rãmb futã la mengã manegr wɛɛngẽ? (Ges-y fot-rãmbã me.)

¹¹ Yãmb zoe n yãka fuug ning y sẽn na n yeelga bɩ? Yaa vẽeneg tɩ y ratame tɩ yɩ fuug sẽn yaa neere. Biiblã wilgame tɩ baa pĩnd wẽndẽ wã, pʋg-paal ne a sɩd ra manegda b mens sõma. (Eza. 61:10) Yaa sɩd tɩ fut nins y sẽn na n yeelg y yi-kãadmã daarã na n yɩɩ toor ne fut nins y sẽn yer raasenkamã, la y segd n maneg y meng ne sik-m-meng la gũusgu. (1 Tɩm. 2:9) Ra n kɩt-y tɩ wa yɩ fut nins y sẽn yeelgã, wall y sẽn maneg y meng to-to wã n na n pa nebã yamẽ y yi-kãadmã poor ye.—1 Pɩy. 3:3, 4.

12. Bõe yĩng tɩ y segd n zãag y meng ne minund nins b sẽn maand yi-kãadmã wɛɛngẽ yãmb babgẽ wã tɩ pa zems ne Biiblã sẽn yetã?

¹² Zãag-y y meng ne minund nins sẽn pa zems ne Biiblã sẽn yetã. (Vẽn. 18:4) Rũndã-rũndã, yɛl kẽer b sẽn maand yi-kãadem sasa tika ziri tũudmã yel-maandɩ, zĩn-dãmb yɛla, la tẽeb ziri. A Zeova yeela tõnd vẽeneg tɩ d lak d meng ne yɛl a woto sẽn yaa bõn-dẽgdã. (2 Kor. 6:14-17) Nebã sã n tara yel-maandɩ n maand yi-kãadem sasa yãmb babgẽ wã tɩ y pa kɩs sɩd tɩ rẽ tata a Zeova yam, bɩ y maan vaeesg n bãng bõn-kãens sẽn sɩng to-to wã, la y bao Biiblã sagls sẽn tõe n sõng-y tɩ y bãng n yãk yam rẽ wɛɛngẽ.

13. Kũunã wɛɛngẽ, wãn to la y tõe n wilg tɩ y rɩkda a Zeova togs-n-taare?

¹³ Yãmb babgẽ wã, nebã minim n kõta sẽn nan kẽ-b kãadem kũun bɩ? Kũun ning ned sẽn na n kõ wã mi n zemsa ne a tarem. Yaa sɩd tɩ b sagenda kiris-nebã tɩ b yɩ kõatba, tɩ b sã n maand woto bɩ kõt-b sũ-noog me. (Yel. 11:25; Tʋʋ. 20:35) La d pa segd n maan tɩ yaa wa yaa tɩlɛ tɩ sẽn na n wa-b yi-kãadem kibsã fãa kõ kũun ye. D leb n pa segd n maan tɩ b tagsdẽ tɩ b sã n kõ kũun ligd sẽn pa waooge, d sũur pa na n yɩ noog ye. D rɩkda a Zeova togs-n-taar n wilgdẽ tɩ d sũur yaa noog ne kũun buud fãa ned sẽn kõ-do, n dat tɩ b kõ ne yamleoogo, la b ra tagsdẽ tɩ yaa tɩlɛ tɩ b kõ ye.—2 Kor. 9:7.

Y SẼN TÕE N GIL ZU-LOEES TO-TO

14. Zu-loe-bʋs la neb kẽer sẽn dat n kẽ kãadem paamda?

¹⁴ Y sã n wa segend y meng sẽn na yɩl t’a Zeova paam waoogr y yi-kãadmã daare, y tõe n paama zu-loeese. Wala makre, y sã n dat n maan yi-kãadem kibs sẽn zemse, tõe n yɩɩ toogo. A Sarli sẽn be Ill Salomo wã yeelame: “Yɩl n yãk neb nins d sẽn na n bool tõnd yi-kãadem kibsẽ wã yɩɩ toogo. D tara zo-rãmb wʋsgo. Sẽn paase tõnd babgẽ wã, f sã n na n maan f yi-kãadem kibsa, nebã fãa tagsdame tɩ f na n bool-b lame.” A Tabita sẽn yaa saam-bi-poak ning yell d sẽn zoe n gomã yeelame: “Tõnd tẽngẽ wã, nebã wae n boonda neb wʋsg b yi-kãadem kibsẽ. D yãka yam n na n bool na maan neb koabg bala, la yɩɩ toog wʋsg ne d roagdbã tɩ b sak d yam-yãkrã.” A Saara sẽn be Ẽndã yeelame: “Neb kẽer getame tɩ arzɛk la ziir tara yõod wʋsgo. M baaba ba-biisã kamb sẽn wa n na n kẽ kãadmã, b ned kam fãa maana tig-kãsenga. Rẽ n so tɩ m da mi n tagsdẽ tɩ m segd n maaname tɩ yɩɩg rẽ menga.” Bõe n tõe n sõng-y tɩ y gil zu-loees a woto buudu?

15. Y sã n wa segend y yi-kãadem kibsa bõe yĩng tɩ pʋʋsgã tar yõod wʋsgo?

¹⁵ Pʋʋsd-y bũmb nins y sẽn magd n na n maanã yĩnga. Y tõe n pʋʋsa a Zeova n togs-a zu-loɛɛg ning buud fãa y sẽn tare, wall bũmb ning fãa sẽn kɩt tɩ y maand yɩɩr y yi-kãadmã seglg wɛɛngẽ. (Fili. 4:6, 7) Y tõe n kos-a lame t’a sõng-y tɩ y bãng n yãk yam, t’a sõng-y tɩ y yam gãand bãane, la t’a sõng-y tɩ y tall raood y yam-yãkrã sã n wa yaa toor ne neb a taabã sẽn datã. (1 Pɩy. 5:7) Y sã n ne a Zeova sẽn leokd y pʋʋsgã, na n kɩtame tɩ y maneg n kɩs-a sɩd n paase. A Tabita sẽn yaa saam-bi-poak ning yell d sẽn zoe n gomã yeelame: “Tõnd da yɛɛsda d na wa n pa wʋm taab bũmb ning wɛɛngẽ, wall d zakã rãmb pa wʋm d yam-yãkrã võore. Rẽ n so tɩ d sã n da na n zĩnd n gom bũmb nins d sẽn na n maan d yi-kãadmã daarã yell fãa, d ra sɩngda ne pʋʋsgo. D ra neeme t’a Zeova sɩd ra sõngd-d lame tɩ d sõsd ne taab la ne d zakã rãmb ne bãane.”

16-17. Y sã n wa segend y yi-kãadem kibsã, bõe yĩng tɩ yaa sõma tɩ y bãngd n sõsd ne taaba?

¹⁶ Pelgd-y y pʋg n sõsd ne taab la y gomd ne bʋgsem. (Yel. 15:22) Na n yɩ tɩlɛ tɩ yãmb a neb nins sẽn dat n kẽ kãadmã naag taab n yãk yam bũmb kẽer wɛɛngẽ. Wala makre, sẽn na n yɩ daar ningã, ligd ning y sẽn na n kẽesã, neb nins y sẽn na n boolã la bũmb a taab wɛɛngẽ. Nand tɩ y yãk yam bũmb ning wɛɛngẽ, bɩ y naag taab n sõs yam nins y sẽn tõe n yãk bõn-kãng wɛɛngẽ wã zugu, Biiblã sagls la sagls y sẽn paam kiris-neb tẽeb sẽn bɩ nengẽ zugu. Y sã n wa sõsd ne taab wall ne y zakã rãmbã, bɩ y gomd ne bʋgsem n wilgdẽ tɩ y yaa wʋmdba, la y ra yɩ dem-dem ye. Wala makre, y roagdbã sã n dat tɩ y maan bũmb y yi-kãadmã kibs sasa, bɩ y ges tɩ sã n tõe bɩ y sake. Y yi-kãadmã daar yaa daar sẽn yaa zall ne bãmb me. Sã n mik tɩ y pa tõe n maan b sẽn datã, bɩ y maag y yĩng n wilg-b y sẽn pa na n maan rẽ wã võore. (Kolo. 4:6) Wilg-y y zakã rãmb tɩ y ratame tɩ y yi-kãadmã daar yɩ sũ-noog daare, la sẽn yɩɩd fãa y ratame t’a Zeova paam waoogr daar-n-kãnga.

¹⁷ Y roagdbã sã n pa a Zeova Kaset rãmba, tõe n yɩɩ toog tɩ y wilg-b yam nins y sẽn yãkã tɩ b wʋme. La yaa bũmb sẽn tõe. A Sãntos sẽn yaa Ẽnd saam-biigã yeelame: “Tõnd roagdbã ra ratame tɩ d maan Ẽnduyiismã yel-maandɩ d kãadmã sasa. Kaoosa wʋsg tɩ d zakã rãmb yaool n wa sak n deeg d yam-yãkrã. D sak n maana bũmb nins b sẽn da rat tɩ pa kɩɩsd a Zeova noyã. Wala makre, d toeema rɩbd nins d sẽn da rat n seglã, n segl rɩbd sẽn noom-ba. D yãka yam me n pa na n kɩt tɩ neb yɩɩll wall b sao yi-kãadmã kibs sasa, bala b pa minim dẽ ye.”

18. Bõe la y tõe n maan n kɩs sɩd tɩ bũmb nins y sẽn magd n na n maan y yi-kãadmã daarã na n zemsame? (1 Korẽnt rãmbã 14:40) (Ges-y fotã me.)

¹⁸ Sigl-y bũmb fãa sõma. Y sã n sigl bũmb fãa sõma, tõe n booga y yɩɩrã yi-kãadmã daare. (Karm-y 1 Korẽnt rãmb 14:40.) A Weyin sẽn yaa Tayiwan saam-biigã yeelame: “Rasem a wãn sẽn deng d yi-kãadmã daare, d maana tigsg ne neb nins fãa sẽn na n sõng n tʋmã. D lebg n gesa bũmb nins d sẽn magd n na n maanã la d maan bũmb kẽer mak-n-wilg n ges sã n na n zemsame.” Sẽn na yɩl n wilg tɩ y nanda sẽn na n wa-bã bɩ y modg tɩ bũmb fãa maan a wakate.

19. Bõe la y tõe n maan tɩ sõng tɩ y yi-kãadmã kibs tall waoogre?

¹⁹ Y sã n tags sõma, y tõe n bãnga zu-loees kẽer sẽn tõe n zĩnd y yi-kãadmã sasa n bãng n gil-ba. (Yel. 22:3) Wala makre, yãmb babgẽ wã nebã sã n wae n wata yi-kãadem kibs baa b sã n pa bool-ba, bɩ y bao n bãng y sẽn tõe n maan to-to n gɩdg rẽ. Togs-y y roagdb nins sẽn pa a Zeova Kaset rãmbã yɛlã sẽn na n yɩ to-to, la y wilg-b y tagsg sẽn yaa a soab ne yɛl kẽer nebã sẽn maand yi-kãadem kibs sasa wã. Y tõe n wilg-b-la sõsg ning sẽn be jw.org t’a gom-zugã yaa: “Wãn to la b maand a Zeova Kaset rãmbã yi-kãadem?” Y tõe n yãka saam-biig tẽeb sẽn bɩ t’a yɩ “kibsã yel-gɛta,” sẽn na yɩl t’a ges tɩ bũmb fãa yɩ wa yãmb sẽn datã. (Zã 2:8) Y sã n pelg y pʋg n togs-a bũmb nins y sẽn magd n na n maanã, tõe n sõng-a lame t’a ges tɩ y yi-kãadmã kibs tall waoogre, la tɩ bũmb fãa yɩ wa y sẽn da magã.

20. Bõe la neb sẽn magd n na n kẽ kãadem pa segd n yĩmi?

²⁰ Y sã n tagsd bũmb nins fãa y sẽn magd n na n maan y yi-kãadmã daarã yelle, tõe n kẽes-y-la rabeem. La tẽeg-y tɩ y yi-kãadmã daar yaa daar-n-yɛng bala. Y na n naagda taab n tũud a Zeova hal tɩ be yamleoogo, tɩ y yi-kãadmã daar yaa sɩngr bala. Maan-y y sẽn tõe fãa tɩ y yi-kãadmã kibs ra yɩ hobragi, la tall waoogre. Teeg-y-yã a Zeova. Ne a Zeova sõngre, y na n tõog n sigla y yi-kãadmã daar sõma, t’a loogr poor bɩ y mi n tẽegdẽ tɩ noom-y-yã, n pa maand y bãngẽ ye.—Yɩɩn. 37:3, 4.