Zeremi 29:11: “Mam mii magb ning mam sẽn magd yãmb wɛɛngẽ wã”

“‘Bala mam mii magb ning mam sẽn magd yãmb wɛɛngẽ wã sõma.’ Yaa a Zeovaa n yeele. ‘Mam dat n kɩtame tɩ y zĩnd bãane. Pa yel-beed la m dat tɩ y paam ye. Yaa sẽn na yɩl tɩ y tõog n bas y yam tɩ beoog na n yɩɩ neere.’”—Zeremi 29:11, Dũni-paalgã lebgre.

“Bala, maam a Sẽn-Ka-Saab yetame: ‘Mam mii saagr ning m sẽn saagd yãmb yĩnga. Ka saagr sẽn na n wa ne toog yãmb zug ye, yaa vɩ-bãan saagre, sẽn na n yɩlẽ tɩ y beoog vɩɩmã yɩ neere, la tɩ y paam tẽeb pidsgu.’”—Zeremi 29:11, Wẽnnaam Sebre, 2014.

Zeremi 29:11 goamã võore

Wẽnnaam a Zeova pʋlmame tɩ neb nins sẽn tũud-a wã na n wa paama laafɩ la bãan beoog-daare. Yaa sɩd tɩ yaa neb sẽn zĩnd pĩnd wẽndẽ wã la Wẽnnaam togs gom-kãensã, la a tagsg ket n yaa woto ne a nin-buiidã rũndã-rũndã. A yaa “Wẽnnaam sẽn sõngd tõnd tɩ d saagd manegre.” (Rom dãmbã 15:13) A kɩtame tɩ b gʋls pʋlem-kãensã Biiblã pʋgẽ sẽn na yɩl tɩ “d tõe n saag tɩ manegr n wate.”—Rom dãmbã 15:4.

B sẽn yeel bũmb ning n yaool n na n togs Zeremi 29:11 goamã

Yaa lɛtr a ye b sẽn da tool Israyɛll nebã b sẽn tall n kẽng yembd Babilonnã pʋgẽ, la b togs gom-kãensã.b (Zeremi 29:1) Wẽnnaam yeel-b lame tɩ b na n paa yembd Babilon n kaoose, n me rot n zĩnd b pʋsẽ, n sel tɩɩs n dɩ b biisã la b fɩɩg tɩ b sõorã ra boog ye. (Zeremi 29:4-9) A paasame yaa: “Yãmb sã n zĩnd Babilon tɩ yʋʋm pis-yopoe wã wa pidi, mam na n gesa y yelle. Mam na n pidsa m pʋlengã, n tall yãmb n lebg n wa [Zerizalɛm].” (Zeremi 29:10) Wẽnnaam pʋlm-b lame t’a pa na n yĩm b yelle, la tɩ b tõe n basa b yam t’a na n kɩtame tɩ b lebg n wa b tẽngẽ wã.—Zeremi 31:16, 17.

Wẽnnaam pidsa bũmb ning a sẽn da pʋlem Israyɛll nebã. A Sirus sẽn yaa Pɛrs rĩmã reega Babilon tẽngã wa Wẽnnaam sẽn da pĩnd n togsã. (Ezayi 45:1, 2; Zeremi 51:30-32) Rẽ poore, a basa Zʋɩf-rãmbã tɩ b leb Zerizalɛm. Yɩɩ yʋʋm pis-yopoe b sẽn kẽng yembdã poore.—2 Kibayã 36:20-23; Ɛsdras 3:1.

Wẽnnaam sẽn pids bũmb ning a sẽn yeel Zeremi 29:11 wã, sõngda tõnd tɩ d bas d yam t’a na n wa pidsa bũmb nins fãa a sẽn pʋlem beoog-daarã wɛɛngẽ wã. Wala makre, a sẽn pʋlem t’a na n tũnuga ne a Rĩungã n wa ne laafɩ la bãan dũniyã gill zugã.—Yɩɩn-sõamyã 37:10, 11, 29; Ezayi 55:11; Matiye 6:10.

Tags-kɛgr Zeremi 29:11 wɛɛngẽ