Ezayi 41:10: “Ra zoe rabeem ye. Bala mam bee ne foo”

“Ra zoe rabeem ye. Bala mam bee ne foo. Ra maan yɩɩr ye. Bala mam yaa fo Wẽnnaam. Mam na n kõo foo pãnga. N-ye, mam na n sõnga foom, mam na n gãda foo kãn-kãe ne m nug-rɩtgã sẽn wat ne tɩrlmã.”—Ezayi 41:10, Dũni-paalgã lebgre.

“Da zoe rabeem ye, bala, mam bee ne foom. Da maan yɩɩr ye, bala, mam yaa fo Wẽnnaam. Mam kõta foom pãnga, la m na n wa sõnga foom, mam na n tebenda foom ne m nug-rɩtg sẽn tõogdã.”—Ezayi 41:10, Wẽnnaam Sebre, 2014.

Ezayi 41:10 goamã võore

Wẽnnaam a Zeovaa yeela a nin-buiidã tɩ b bas b yam t’a na n sõng-b lame, sẽn wa n yaa zu-loɛɛg ning fãa la b maood ne.

“Mam bee ne foo.” A Zeova wilga neb nins sẽn tũud-a wã tɩ b pa segd n zoe rabeem ye. Bala b pa b yembr ye. A nee zu-loees nins b sẽn maood ne wã, n kelgd b pʋʋsgo, tɩ yaa wa a bee ne-ba.—Yɩɩn-sõamyã 34:15; 1 Pɩyɛɛr 3:12.

“Mam yaa fo Wẽnnaam.” A Zeova sõngda sẽn tũud-b yẽ wã tɩ b yam gãe bãane, n tẽegd-b tɩ sẽn wa n yaa to-to fãa a ket n getame tɩ b yaa a nin-buiidu, n sakd b sẽn tũud-a wã. B tõe n basa b yam tɩ bũmb pa be n tõe n gɩdg Wẽnnaam t’a pa sõng-b ye.—Yɩɩn-sõamyã 118:6; Rom dãmbã 8:32; Ebre-rãmbã 13:6.

“Mam na n kõo foo pãnga. N-ye, mam na n sõnga foom, mam na n gãda foo kãn-kãe ne m nug-rɩtgã sẽn wat ne tɩrlmã.” Vɛrse-kãngã pʋgẽ, a Zeova tũnuga ne gom-biis toor-toor n wilg hal naoor a tãab t’a na n sõnga a nin-buiidã. Woto kɩtame tɩ b ra tõe n bas b yam t’a na n teel-b lame. A tũnuga ne makr n wilg a manesem sẽn yaa to-to, a nin-buiidã sã n wa rat sõngre. Ned sã n lʋɩ, Wẽnnaam tõe n tẽega a nug-rɩtgã n tak-a t’a yiki.—Ezayi 41:13.

Sẽn yɩɩd fãa, Wẽnnaam tũnugda ne a Gomdã sẽn yaa Biiblã n sõngd neb nins sẽn tũud-a wã. (Zozuwe 1:8; Ebre-rãmbã 4:12) A tũnugda ne a Gomdã n sõngd neb nins sẽn maood ne zu-loeesã tɩ b paam yam. Wala makre, naong rãmbã, bãad-rãmbã, la neb nins ned sẽn maan kaalmã. (Yel-bũnã 2:6, 7) Sẽn paase, Wẽnnaam tũnugda ne a vʋʋsem sõngã, bɩ a pãngã, n belsd neb nins sẽn tũud-a wã la a kõt-b pãng tɩ b tõogd n maood ne b zu-loeesã.—Ezayi 40:29; Luk 11:13.

B sẽn yeel bũmb ning n yaool n na n togs Ezayi 41:10 goamã

Vɛrse wã goamã belsa Zʋɩf-rãmb nins sẽn da maand sɩd ne a Zeova wã, b sẽn wa n tall-b n kẽng yembd Babilonnã. A Zeova ra pĩnd n togsame tɩ wakat ning Zʋɩf-rãmbã sẽn na n paam lohormã sã n wa kolgdẽ, na-toaag n na n zab ne buud nins sẽn karg n gũbg Babilonnã, la t’a na n zaba ne Babilon me. (Ezayi 41:2-4; 44:1-4) Koe-kãngã ra na n kɩtame tɩ Babilon nebã la buud nins sẽn karg n gũbg Babilonnã rig rabeem. La Zʋɩf-rãmbã ra pa segd n yɛɛs ye. Bala a Zeova ra na n kogl-b lame. A kenga b raood hal naoor a tãab n yeel yaa: “Ra zoe rabeem ye.”—Ezayi 41:5, 6, 10, 13, 14.

Yaa sɩd tɩ sɩngrẽ wã b gʋlsa gom-kãensã Zʋɩf-rãmb nins sẽn da be yembd Babilonnã yĩnga. La Wẽnnaam a Zeova kogla Ezayi 41:10 goamã, sẽn na yɩl n wa keng neb nins fãa sẽn tũud-a wã raoodo. (Ezayi 40:8; Rom dãmbã 15:4) A sõngd-b-la rũndã-rũndã wa a sẽn da sõng neb nins sẽn da tũud-a pĩnd wẽndẽ wã.