Goosneem sẽn vigl kãn-kãe n na n dɩ naam dũniyã gill zug beeme bɩ?: Bõe la Biiblã yeta?

Ninsaalbã pãn-soadbã segda zu-loees wʋsg sẽn kɩtd tɩ bãan ka ye. Baa tẽns nins pʋsẽ sẽn wõnd bãan beeme wã, naamã baoob sẽn wat ne kɩɩs-taabã, n paas politikã la yɛl a taab sẽn wat ne gũdgr ningã kɩtdame tɩ goosneema-rãmbã pa tõe n dɩ b naamã ne bãan ye.

Biiblã wilgdame tɩ goosneem a ye n be sẽn vigl kãn-kãe. Sãmbg kae tɩ y zoe n wʋmame tɩ b gomd goosneema-kãng yell ye. Yaa goosneema ning yell la a Zeezi gom pʋʋsg ning a sẽn zãms a karen-biisã pʋgẽ.

“Woto wã, ad yãmb sẽn tog n pʋʋs to-to: ‘Tõnd Ba sẽn be saasẽ, bɩ yãmb yʋʋr paam waoogre. Bɩ yãmb Rĩungã wa. Bɩ y raabã maan tẽngã zugu, wa sẽn maand saasẽ wã.’”—Mat. 6:9, 10.

Bõe la Biiblã yet Rĩungã wɛɛngẽ?

Wẽnnaam Rĩungã yaa goosneema sẽn vigl kãn-kãe

Rĩungã na n zĩnda saasẽ n dɩ a naamã.

A Zeezi yeelame tɩ goosneema-kãng yaa “saasẽ Rĩungã.” (Matiye 4:17; 5:3, 10, 19, 20) A le yeelame: “Mam Rĩungã pa dũni-kãngã rẽnd ye.”—Zã 18:36.

Wẽnnaam Rĩungã na n ledga ninsaalbã goosneema-rãmbã.

Biiblã yetame yaa: “Rĩungã . . . na n wãa rĩun-kãensã fãa, n kɩt tɩ b meneme, tɩ yẽ a ye pa wakat fãa.”—Dãniyɛll 2:44.

A Zeezi n yaa Rĩungã Rĩma. Rĩungã pa na n tol n sãam a bada.

Biiblã yetame yaa: “A naamã yaa naam sẽn paad wakat fãa n pa na n tol n loog ye. A rĩungã pa na n tol n sãam ye.”—Dãniyɛll 7:13, 14.

Rĩungã na n kɩtame tɩ laafɩ la bãan zĩnd tẽngã zugu.

Biiblã yetame yaa: “B ned kam fãa na n zĩi a viyn tɩɩg tẽngre, la a kankang tẽngre, tɩ ned kae n na n kẽes-b rabeem ye.”—Mise 4:4.

Bao-y n bãng-y Rĩungã n paase

A Zeezi sẽn wa n be tẽngã zugã, a rɩka a sẽkã fãa n da “n moond Rĩungã koe-noogã.” (Matiye 9:35) Sẽn paase, a yeelame:

“Rĩungã koe-no-kãngã na n moona dũniyã tɛk fãa tɩ yɩ kaset buud toɛy-toɛyã fãa yĩnga. Yaa rẽ poor la saabã na n ta.”—Matiye 24:14.

Rũndã-rũndã, b moonda koe-noogã tẽns 240 la zak pʋsẽ. D kot-y lame tɩ y bao n bãng Wẽnnaam Rĩungã, la a naamã sẽn na n naf ninsaalbã to-to wã n paase.

Ges-y video ning gom-zug sẽn yaa Wẽnnaam Rĩungã yaa bõe?