2026, BÕN-BƖƲƲNG RASEM A 7-13
YƖƖLL 88 Zeova, wilg maam fo noyã
D rɩk yam Gabawõ nebã mak-sõngã pʋgẽ
“Gabawõ nebã maana kaool ne Israyɛll nebã n be b sʋka.”—ZOZ. 10:1.
D SẼN NA N BÃNGE
D na n yãa yam ning d sẽn tõe n dɩk Gabawõ nebã kibarã pʋgẽ, la a Zeova manesem sẽn yɩ to-to ne-bã pʋgẽ.
1-2. Bõe yĩng tɩ yaa sõma tɩ d bao n bãng Gabawõ nebã kibarã?
YƲƲM pis-naas Israyɛll nebã sẽn yi Ezɩptã poore, b kẽe kãabg tẽngã pʋgẽ. B zab n tõoga Zeriko la Ayi. Rẽ poore, bũmb n maan tɩ ling-ba. Neb sull n wa b nengẽ n yeel tɩ b yita tẽn-zãrgẽ, la tɩ b rat n maana kaool ne Wẽnnaam nin-buiidã.
2 Neb nins sẽn wa Israyɛll nebã nengẽ wã yaa Gabawõ neba. Rẽ n yɩ pipi b sẽn gom Gabawõ nebã yell Biiblã pʋgẽ. La b le wa n goma b yell yɛsa. Biiblã wilgame tɩ Gabawõ nebã kell n zĩnda ne Israyɛll nebã yʋʋm wʋsgo. D tõe n dɩka yam wʋsg b kibarã pʋgẽ. Leb n tõe n sõng-d lame tɩ d bãng bũmb wʋsg Wẽnnaam a Zeova zugu.
GABAWÕ NEBÃ TALLA TẼEB LA SIK-M-MENGA
3. a) Gabawõ nebã ra yaa ãnd dãmba? b) Bõe n kɩt tɩ b bao n maan kaool ne Israyɛll nebã?
3 Israyɛll nebã sẽn wa n na n zab n deeg Kanaã soolmã, tɩ Gabawõ nebã bee Gabawõ sẽn yaa tẽng sẽn gũbg ne lalsã pʋgẽ. B ra yaa Hevi buudã neba. Hevi buudã ra naaga buud a yopoe nins sẽn da be Kanaã soolmẽ wã, tɩ b “sõorã la b pãngã yɩɩd” Israyɛll nebã. (Tõo. 7:1) Rẽnd Gabawõ nebã ra tara sodaas wʋsg sẽn yaa gãndaado. (Zoz. 10:2) La b pa maan wa Kanaã neb a taabã sẽn da rat n zab ne Israyɛll nebã ye. Bala b ra miime tɩ b pa na n tõog Israyɛll nebã ye. B ra miime t’a Zeova zabd n sõngda a nin-buiidã, la t’a na n sãama Kanaã nebã wa a sẽn pʋlmã. (Yik. 34:11; Zoz. 9:24) Rẽ n so tɩ Israyɛll nebã sẽn tõog Zeriko ne Ayi wã poore, Gabawõ nebã tʋm rap a Zozuwe nengẽ Gilgalle, sẽn na yɩl tɩ b maan kaool ne Israyɛll nebã tɩ b ra zab ne-b ye.a
4. a) Bõe la Gabawõ nebã maan n belg Israyɛll nebã tɩ b sak n maan kaool ne-ba? (Zozuwe 9:8-13) (Ges-y fotã me.) b) Gabawõ nebã sɩlmã sẽn wa n pukã, bõe la Israyɛll nebã maan-yã?
4 Karm-y Zozuwe 9:8-13. Gabawõ nebã yeelame tɩ b yita tẽn-zãrgẽ. B yeelame me tɩ b miime tɩ yaa a Zeova n sãam Ezɩpt sodaasã, la tɩ yaa yẽ n sõng Israyɛll nebã tɩ b tõog rĩm a Siyon ne rĩm a Ooge. La b talla yam n pa gom Israyɛll nebã sẽn tõog Zeriko la Ayi tɩ ra nan pa kaoosã yell ye. B sã n da gom rẽ yelle, Israyɛll nebã ra na n bãngame tɩ b pa yit tẽn-zãrgẽ ye. Bala rẽ sẽn maanã ra nan pa kaoos n sek kibarã na ta neb sẽn be zĩ-zãrsẽ ye. Israyɛll kãsem-dãmbã tẽe Gabawõ nebã goam n sak n maan kaool ne-ba, n pa reng n bao n bãng a Zeova tagsg meng ye. (Zoz. 9:14, 15) Rasem a wãn poore, Israyɛll nebã bãngame tɩ Gabawõ nebã belg-b lame. La Israyɛll nebã kell n maana wa b sẽn pʋlmã, n pa zab ne Gabawõ nebã ye. Bala b ra “wẽena ne Israyɛll Wẽnnaam a Zeova yʋʋre.” (Zoz. 9:16-19) Israyɛll nebã yeela Gabawõ nebã tɩ b tõe n kell n vɩɩmda bãmb sʋka, la tɩ b segd n lebga yembse. B kɩtame tɩ b “wɩɩsd raad la b yõngd koom nin-buiidã yĩnga, la a Zeova tẽn-kugrã yĩnga.”—Zoz. 9:27.
Gabawõ nebã maana sɩlem t’a Zozuwe maan kaool ne-ba (Ges-y sull a 4)
5. Bõe n kɩt tɩ d tõe n yeel tɩ Gabawõ nebã wilgame tɩ b tẽeda a Zeova?
5 Amoor rĩm-dãmb a nu n wʋm tɩ Gabawõ nebã maana kaool ne Israyɛll nebã, n naag taab n na n tɩ zab ne Gabawõ. Rẽ n so tɩ Gabawõ nebã kos a Zozuwe t’a wa sõng-ba. (Zoz. 10:3-7) A Zozuwe lʋɩɩ Israyɛll nebã taoor tɩ b kẽng n na n tɩ zab n fãag Gabawõ nebã. A Zeova sõng-b lame n zabe. A kɩtame meng tɩ sapɩlem yi yĩngr n lʋɩ bɛɛbã zutu. A leb n maana yel-solemd tɩ wĩndgã pa kẽ hal tɩ b wa tõog bɛɛbã fãa. (Zoz. 10:9-14) Gabawõ nebã sẽn bao n maan kaool ne Israyɛll nebã, la b sẽn kos a Zozuwe t’a fãag-bã, b wilgame tɩ b tẽeda a Zeova. B wilgame tɩ b kɩsa sɩd t’a Zeova pidsda a pʋlemsã, la t’a tõe n kogl-b lame.
6. A Zeova manesem sẽn yɩ to-to ne Gabawõ nebã wilgda tõnd bõe?
6 A Zeova manesem sẽn yɩ to-to ne Gabawõ nebã wilgda tõnd bõe? Wilgdame t’a Zeova yaa sik-m-meng soab la nimbãan-zoɛta. A ra yeela Israyɛll nebã tɩ b segd n kʋʋ Kanaã soolmã nebã fãa. (Sõd. 33:51, 52) La Gabawõ nebã sẽn maan kaool ne Israyɛll nebã yĩnga, a Zeova zoee b nimbãaneg n bas-b tɩ b kell n vɩɩmde. A maana woto baa Israyɛll nebã sẽn pa reng n sok-a la b yaool n maan kaoolã. Sẽn paase, a Zeova tũnuga ne a pãngã n sõng Israyɛll nebã tɩ b fãag Gabawõ nebã, n pids b pʋlengã.—Zoz. 9:26; 11:19.
7. Wãn to la d tõe n dɩk Gabawõ nebã togs-n-taare? (Ges-y fotã me.)
7 Wãn to la d tõe n dɩk Gabawõ nebã togs-n-taare? Yaa d sẽn na n bɩɩs tẽeb sẽn tar pãnga. Rũndã-rũndã, d tõe n bãnga a Zeova sõma n yɩɩd Gabawõ nebã tɩ kɩt tɩ d tõe n kɩs-a sɩd zãng-zãnga. (Yɩɩn. 40:4, 5) D leb n tõe n dɩka Gabawõ nebã togs-n-taare, d sẽn na n sakd n sikd d meng n tʋmd a Zeova tʋʋmã, baa tʋʋm nins neb kẽer sẽn pa nandã. (Zoz. 9:23, 27) Saam-biig a ye sẽn yaa bi-bɩɩg t’a yʋʋr boondẽ t’a Luk ket n tẽra bũmb sẽn maan daar a ye, t’a pa na n tol n yĩm a yell ye. Yaa saam-biig sẽn tʋmd Betɛllẽ wã n maan bõn-kãnga. Baa saam-bi-kãng sẽn yaa taoor lʋɩt Betɛllẽ wã, a sakame n na n tɩ gãand Rĩung roog meeb zĩigẽ n gũ teedã. A Luk yeelame: “Mam bãngame tɩ d pa segd n tagsdẽ bal tɩ d yaa sik-m-meng soab ye. D sã n sɩd yaa sik-m-meng soaba, d na n wilga rẽ ne d tʋʋm-tʋmdɩ wã.” Bɩ d teeg a Zeova daar fãa t’a sõng-d tɩ d mao ne d zu-loeesã, la d sakd n tʋmd tʋʋm ning fãa b sẽn kõ-do, n wilg tɩ d tara tẽeb wa Gabawõ nebã.
D rɩkd Gabawõ nebã togs-n-taar n sikd d meng n tʋmd a Zeova tʋʋmã (Ges-y sull a 7)
GABAWÕ NEBÃ GŨU A ZEOVA T’A WA REMS YƐLÃ
8. Bõe la rĩm a Sayull maan Gabawõ nebã tɩ yaa wẽng wʋsgo?
8 Biiblã le wa n goma Gabawõ nebã yell rĩm a Sayull wakatẽ wã. Rĩm a Sayull yika zabr ne Gabawõ nebã sẽn da be Israyɛll tẽngã pʋgẽ wã. A Sayull makame n na n menes Gabawõ nebã, a “sẽn da pa rat tɩ nin-kãensã naag Israyɛll nebã ne Zida nebã yĩngã.” Rẽ kɩtame tɩ b kʋ b sʋkã neb wʋsgo. (2 Sãm. 21:2, 5, 6) Sɩd yɩɩ wẽnem tɛkẽ! A Sayull sãama kaool ning Israyɛll nebã sẽn da maan ne Gabawõ nebã yʋʋm wʋsgã.
9. Wakat-bʋg la a Zeova wilg t’a sũur pa noom ne bũmb ning b sẽn maan Gabawõ nebã?
9 A Zeova pa sɩbg neb nins sẽn maan Gabawõ nebã wẽngã zĩig pʋgẽ ye. La a Davɩɩd naamã sasa, a Zeova wa n kɩtame tɩ saagã maan yʋʋm a tã n pa ni soolmã pʋgẽ ye. Woto kɩtame tɩ kom kẽ tẽngã. A Davɩɩd soka a Zeova komã sẽn kẽ tẽngã võore, t’a Zeova yeel tɩ yaa a Sayull ne a roogã rãmb sẽn tar zɩɩm samdã yĩnga, bala b kʋʋ Gabawõ neb yʋʋm a wãn sẽn looge.—2 Sãm. 21:1.
10. Bõe la Gabawõ nebã yeel a Davɩɩd tɩ wilgdẽ tɩ b tũuda Wẽnnaam Tõogã? (2 Sãmwɛll 21:3-6)
10 Karm-y 2 Sãmwɛll 21:3-6. A Davɩɩd boola Gabawõ nebã n sok-b bũmb ning a sẽn tõe n yao n dol a Sayull beegrã. Gabawõ nebã pa kos a Davɩɩd t’a kõ-b ligd ye. B ra mii Tõogã sõma. Tõogã ra yeelame tɩ ned sã n kʋ a to, b pa segd n deeg yaood n bas-a taal ye. (Sõd. 35:30, 31) B ra miime me tɩ sã n pa rĩmã n kõ-b sore, b pa segd n kʋ ned ye. Rẽ n so t’a Davɩɩd yeel Gabawõ nebã tɩ b tõe n kʋʋ a Sayull kamb la a yagens a yopoe, tɩ tõe tɩ bãmb dãmbã sõnga a Sayull tɩ b kʋ Gabawõ neba. Rẽ poore, saagã le sɩnga niib tɩ komã sa, tɩ wilgdẽ tɩ b sẽn dok b sũurã taa a Zeova yam.—2 Sãm. 21:9, 10, 14.
11. A Zeova manesem sẽn yɩ to-to ne Gabawõ nebã wilgda tõnd bõe?
11 A Zeova manesem sẽn yɩ to-to ne Gabawõ nebã wilgda tõnd bõe? Wilgda vẽeneg t’a Zeova yaa Wẽnnaam sẽn yaa tɩrga. (Yɩɩn. 37:28) A pa rat tɩ b maan ned baa a ye kɛgr ye. Wala makre, neb kẽer sẽn mi n kis sãambã la buud nins neb sõor sẽn pa waoogã pa noom-a ye. Sẽn paase, b namsda neb wʋsg sẽn tũud a Zeova. La wakat ning a Zeova sẽn yãkã sã n ta, a na n remsa yɛlã. A Zeova manesem sẽn yɩ to-to wã wilgdame me t’a ratame tɩ d sã n pʋlem bũmb bɩ d modg n pidsi, wa a sẽn da rat tɩ Israyɛll nebã pids kaool ning b sẽn da maan ne Gabawõ nebã.—Ges-y Amos 1:9.
12. B sã n wa maan-d bũmb sẽn yaa kɛgre, wãn to la d tõe n dɩk Gabawõ nebã togs-n-taare?
12 Wãn to la d tõe n dɩk Gabawõ nebã togs-n-taare? Baa d tẽed-n-taag sã n maan-d bũmb sẽn yaa kɛgre, d tõe n talla sũ-mar n gũ t’a Zeova wa rems yɛlã. D sã n maan woto, d wilgdame tɩ d kɩsa sɩd t’a Zeova na n wa remsa yɛlã a wakate. D gom saam-bi-poak yʋʋr sẽn boond t’a Laura French yelle. A sɩnga tʋʋm Kanada Betɛllẽ wã yʋʋmd 1926. Yʋʋm piig poore, b maan-a-la bũmb sẽn yaa kɛgre. B rõd-a lame t’a naaga sɩdã kɩɩsdb sull n dig-a n yiis Betɛllẽ wã. A manesem yɩɩ wãna? Yaa sɩd t’a sũurã sãama wʋsgo, la a pa yẽgem ye. Yʋʋm a naasã sẽn pʋglã pʋgẽ, a kell n yɩɩ wakat fãa so-pakd n moon koɛɛgã ne yẽesem. Yʋʋmd 1940, b bool-a lame t’a le wa tʋm Betɛllẽ wã t’a sũur yɩ noog wʋsgo. A kell n tʋma Betɛllẽ wã yʋʋm pis-nu rẽ poor ne a sũur fãa n tãag a kũum. B sã n wa maan-d bũmb sẽn yaa kɛgre, bɩ d rɩk saam-bi-poak a French togs-n-taare. D kell n maan sẽn yaa tɩrg la d gũ wakat ning a Zeova sẽn na n wa rems yɛlã.—Eza. 26:3, 4.
GABAWÕ NEBÃ TEELA TŨUDUM HAKƖƖKÃ NE B SŨUR FÃA
13. “Netinim-dãmbã” ra yaa ãnd dãmba, la bõe la b maan yembdã poore?
13 Na maan yʋʋm kobs-nu rĩm a Davɩɩd wakatã poore, b le goma Gabawõ nebã yell Biiblã pʋgẽ. Zʋɩf-rãmbã zĩnda yembd yʋʋm pis-yopoe Babilonne. La yʋʋmd 537 sẽn deng a Zeezi rogmã, Zʋɩf-rãmb sull n leb Zerizalɛm ne guvɛrneer a Zorobabɛlle. (Ɛsd. 2:1, 2, 58) Seb-gʋlsd a Ɛsdras wakatẽ wã me, Zʋɩf-rãmb sull n tũ-a n leb Zerizalɛm. (Ɛsd. 7:1-7) Neb nins sẽn yi Babilon n leb Zerizalɛm ne guvɛrneer a Zorobabɛll wall ne a Ɛsdrasã sõor da pa waoog ye. La “Netinim-dãmb” n da be sul a yiibã fãa sʋka. (Ges-y Ɛsdras 2:58 la 7:7 not-rãmbã.) Netinim-dãmbã ra yaa ãnd dãmba? Ra yaa “neb sẽn da tʋmd wẽnd-doogẽ wã bɩ sẽn da sõngd ne wẽnd-doogã tʋʋma. B ra pa Israyɛll neb ye.” Tõe tɩ b wʋsg ra yaa Gabawõ nebã yagense.—Ges-y Biiblã gom-biis võor bilgrã zĩigẽ, “Netinim-dãmbã.”
14. Bõe la Gabawõ nebã maan tɩ wilg tɩ b maanda sɩd ne a Zeova? (1 Kibayã 9:2 ne notã)
14 Karm-y 1 Kibay 9:2 ne notã. “Wẽnd-doogã tʋm-tʋmdb” sẽn naag Zʋɩf-rãmbã pipi sull ning sẽn lebg n wa Israyɛllã seka pẽgre. Bala pa Zʋɩf-rãmbã fãa n leb b tẽngẽ wã ye. Zʋɩf-rãmb wʋsg ra tara ro-neeba, la tʋʋm sẽn kẽesd-b ligd wʋsg Babilonne. Kɩtame tɩ b ra pa rat n bas b naar vɩɩmã n leb Zerizalɛm n tɩ sõng n me b tẽngã sẽn da lebg raboogã ye. La Gabawõ nebã yagens kẽer ne Zʋɩf-rãmb nins sẽn da maand sɩdã ra rat n leba Zerizalɛm n tɩ me a Zeova roogã, n lebs n lugl tũudum hakɩɩkã. Rẽ n so tɩ b leb Israyɛlle, baa rẽ maaneg sẽn da pa nana wã. Gabawõ nebã yagensã ra pa tar rogem-pʋɩɩr Israyɛll tẽngẽ wã wa Zʋɩf-rãmbã ye. Baasgo, b ra rat n leba Israyɛll n tɩ tʋm wẽnd-doogẽ wã, la b sõng n maneg Zerizalɛm lalsã.—Nee. 3:26.
15. A Zeova manesem sẽn yɩ to-to ne Gabawõ nebã wilgda tõnd bõe?
15 A Zeova manesem sẽn yɩ to-to ne Gabawõ nebã wilgda tõnd bõe? Wilgdame t’a Zeova nonga neb nins sẽn maand sɩd ne-a wã, n get b yell wakat fãa. A sẽn fãag Gabawõ nebã a Zozuwe wakatẽ wã poore, a kell n ning-b-la barka. Babilon nebã sẽn wa n na n sãam Zerizalɛmmã, a Zeova kogla Gabawõ nebã yagense. B sẽn leb Israyɛll yembdã poorã, b ra ket n tʋmda wẽnd-doogẽ wã. Yaa wa kẽer zags ra pa zãr ne wẽnd-doogã ye. (Ɛsd. 2:70; Nee. 11:21) B sẽn da tʋmd wẽnd-doogẽ wã yĩnga, b ra pa yaood lampo, fadg la sor yaood ye.—Ɛsd. 7:24.
16. Wãn to la d tõe n dɩk Gabawõ nebã togs-n-taare?
16 Wãn to la d tõe n dɩk Gabawõ nebã togs-n-taare? Tõnd me rat n maana d sẽn tõe fãa n teel tũudum hakɩɩkã. D sakd n mongda d mens bũmb kẽere, d sẽn nong a Zeova la d rat n noog a sũurã yĩnga. Yaa woto la a Alwin sẽn yaa saam-biig sẽn be Filipinnã maan-yã. A ra tara tʋʋmd kiuug yaood sẽn yaa wʋsgo, la a ra rat n tʋma a Zeova tʋʋmdã n paase. Tigims sull yel-gɛtã sã n da wa n na n kaag b tigingã fãa, a kota sor a tʋʋmã zĩigẽ sẽn na yɩl n paam sẽk n moon koɛɛgã n paase, tɩ rẽ kõt-a sũ-noogo. A Alwin pʋʋsa a Zeova n kos t’a sõng-a t’a paam tʋʋmd a to sẽn na n kɩt t’a tõog n yɩ wakat fãa so-pakda. A Alwin ra miime t’a sã n toeem tʋʋmde, a pa na n le paamd ligd wʋsg ye. Baa ne rẽ, a basame n bao tʋʋmd a to n sɩng wakat fãa so-pakrã t’a sũur noomẽ. A paga me lebga wakat fãa so-pakda. B sõnga neb pisi la a yembr tɩ b bãng sɩdã. Yaa vẽeneg t’a Zeova ninga b modgrã barka. Tõnd me tõe n basa d yam t’a Zeova sũur nooma ne modgr nins fãa d sẽn maand a tʋʋmdã pʋgẽ wã, la t’a na n kell n gesame tɩ d paamd bũmb nins sẽn yaa tɩlɛ ne-dã.—Mat. 6:33.
17. D sẽn gom Gabawõ nebã yellã sõng-d lame tɩ d bãng bõe?
17 A Zeova manesem sẽn yɩ to-to ne Gabawõ nebã sõng-d lame tɩ d bãng a sẽn yaa Wẽnnaam ning buudã n paase. A yaa sik-m-meng soaba, nimbãan-zoɛta, tɩrlem soab la maan-sɩd soaba. A keooda neb nins sẽn maand sɩd ne-a wã wakat fãa. D leb n tõe n dɩka yam Gabawõ nebã mak-sõngã pʋgẽ. D ratame tɩ d tẽebã tall pãng wa Gabawõ nebã, n kɩs sɩd tɩ d sã n wa tar zu-loe-kɛgemse, a Zeova na n sõng-d lame. Tẽeb a woto na n sõng-d lame tɩ d tʋm tʋʋmd ning fãa b sẽn kõ-d a Zeova tʋʋmdã pʋgẽ ne sik-m-menga. B sã n wa maan-d pãnga, d na n talla sũ-mar n kɩs sɩd tɩ wakat ning a Zeova sẽn yãkã sã n ta, a na n remsa yɛlã la a keo-do. Sẽn paase, d na n maana d sẽn tõe fãa n kell n tʋm a Zeova tʋʋmdã ne yẽesem. D sã n maand woto, d wilgdame tɩ d rɩka yam Gabawõ nebã mak-sõngã pʋgẽ.
YƖƖLL 148 A Zeova yaa tõnd fãagda