D sẽn tõe n kell n maan sɩd ne a Zeova to-to baa zu-loees sasa

1-2. A Zeezi sẽn wa n zãmsd nebã Kapɛrnawummã, bõe n maane?

DAAR a ye, a Zeezi wa n zãmsda nebã bũmb wʋsg Kapɛrnawum t’a karen-biis wʋsg wa yeel yaa: “Gom-kãngã sakr yaa toogo. Ãnda n tõe n kelg-a?” (Zã 6:60) Bõe yĩng tɩ b yeel woto? Bala a Zeezi yeelame yaa: “Yãmb sã n pa wãb Ninsaal biigã yĩn-nemsã la y yũ a zɩɩmã, y pa tar vɩɩm ye.” A paasame: “Ned ning fãa sẽn wãbd mam yĩn-nemsã la a yũud mam zɩɩmã tara vɩɩm sẽn ka sɛta, la mam na n vʋʋg-a-la yaoolem daarã.”—Zã 6:53, 54.

² A Zeezi gom-kãensã sẽn sãam neb nins sũyã basa a pʋgbo. Woto rat n yeelame tɩ b ra pa tẽed-a baa bilf bɩ? Ayo. Bala bilf sẽn deng rẽ, a Zeezi goamã la a sẽn maan bũmb ninsã yɩ-b-la noogo, hal tɩ b yeel yaa: “Ra-kãngã n sɩd yaa No-rɛɛs ning sẽn tog n wa dũniyã pʋgẽ wã.” (Zã 6:14) Rẽnd yaa vẽeneg tɩ b ra tẽeda a Zeezi. La a sẽn wa n togs gomd tɩ b pa wʋmd a võorã, b pa kell n maan sɩd ne-a ye.

3. Tẽn-tʋmdbã manesem yɩɩ wãna, la bõe yĩnga? (Ges-y fotã me.)

³ Tẽn-tʋmdbã manesmã yɩɩ toore. A Zeezi sok-b-la bãmb me sã n dat n loogame, t’a Pɩyɛɛr leok yaa: “Zu-soaba, tõnd na n loogame n kẽng ãnda nengẽ? Yãmb gomda vɩɩm sẽn ka sɛt goama. Tõnd tẽeme, la d bãngame tɩ yãmb yaa Wẽnnaam Sõng soabã.” (Zã 6:68, 69) Tõe t’a Pɩyɛɛr ne tẽn-tʋmdb a taabã pa wʋm a Zeezi sẽn yeel tɩ b segd n wãba a yĩn-nemsã la b yũ a zɩɩmã võor ye. La baa ne rẽ, b yãka yam n na n kell n pa ne-a. Bõe yĩnga? Bala b ra kɩsa sɩd t’a Zeezi n yaa “Kiristã, Wẽnnaam sẽn tʋm a soabã.”—Luk 9:20, 35.

4. Bõe n tõe n kɩt tɩ yɩ toog tɩ d kell n maan sɩd ne a Zeova?

⁴ Bũmb wʋsg n tõe n kɩt tɩ yɩ toog tɩ d kell n maan sɩd ne a Zeova. Bũmb a ye yaa a Zeova siglgã sã n wa toeem d sẽn wʋmd Biiblã vɛrse ning võor to-to wã, wall d sẽn moond koɛɛgã to-to wã. Bũmb a to yaa yel-beed sã n paam-do, tɩ d sokd d meng bõe yĩng t’a Zeova bas tɩ yell a woto paam-do. Bũmb a to me yaa d zoa sã n maan bũmb n sãam d sũuri, wall ned d sẽn nand sã n maan bũmb tɩ d getẽ tɩ yaa kɛgre.

5. Bõe yĩng tɩ d segd n paasd d tẽebã pãnga? Rɩk-y makre. (Kolos rãmbã 1:23)

⁵ D sã n dat n kell n maan sɩd ne a Zeova baa zu-loees sasa, d segd n modgame tɩ d tẽebã tall pãnga. Wala makre, sẽn na yɩl tɩ tẽn-digimdg ra tõog n lub roogo, roogã yẽbgrã segd n talla pãnga. Woto me, d sã n dat n kell n maan sɩd ne a Zeova baa zu-loees sasa, d tẽebã segd n talla pãnga. Rẽnd d segd n paasda d tẽebã pãnga, n tõog n kell n tũ a Zeova baa sẽn wa n yaa a soaba.—1 Kor. 15:58; karm-y Kolos rãmb 1:23.

6. Bõe n sõng tẽn-tʋmdbã tɩ b kell n maan sɩd ne a Zeezi?

⁶ A Zeezi karen-biis wʋsg sẽn wa n loog n bas-a wã, bõe n sõng tẽn-tʋmdbã tɩ b kell n maan sɩd ne-a? Tẽn-tʋmdbã ra kɩsa sɩd t’a Zeova n segd ne waoogre, bala yẽ n naan bũmb fãa. B ra kɩsa sɩd t’a Zeezi yaa Wẽnnaam Biiga, la tɩ b sã n tũ a Zeezi goamã b na n wa paama vɩɩm sẽn ka sɛtã. B ra miime t’a Zeova sũur nooma ne bũmb nins fãa a Zeezi sẽn maandã. Bũmb kẽer la tõnd me bãng a Zeova zugu, tɩ tõe n sõng-d tɩ d kell n maan sɩd ne-a toog wakate. D na n goma bãmb b tãab yelle. 1) A Zeova n yaa bũmb fãa Naandã. 2) A Zeova n vẽneg tɩ b gʋls Biiblã. La 3) a Zeova wilgda a siglgã sor rũndã-rũndã. D sã n kɩs sɩd ne bõn-kãensã, baa sẽn wa n yaa a soaba, d na n tõog n kell n maana sɩd ne a Zeova.

A ZEOVA N YAA BŨMB FÃA NAANDÃ

7. Bõe la Vẽnegr 4:11 yet a Zeova zugu, la wãn to la rẽ tõe n sõng-d zu-loees sasa?

⁷ Karm-y Vẽnegr 4:11. Vɛrse-kãngã tẽegda tõnd tɩ yaa a Zeova n naan bũmb fãa. Rẽ bal kɩtame t’a segd ne waoogre. Sẽn paase, d sã n bʋgs a pãngã sẽn yaa kãseng to-to wã zugu, d na n kɩsa sɩd t’a tõe n fãag-d-la zu-loɛɛg buud fãa pʋgẽ. La a Sʋɩtãan yelgda ziri toor-toor dũni-kãngã pʋgẽ, sẽn na yɩl tɩ nebã sãmbd ne Wẽnnaam sã n beeme. Siãnsã bãngdb kẽer yetame meng tɩ Naand kae, la tɩ bũmb fãa wa n bee woto bala. Rẽnd d segd n kɩsa sɩd ne d sũur fãa t’a Zeova n yaa Naandã, la t’a nonga tõndo. Woto, d sã n wa tar zu-loeese, d pa na n sãmbd ne a sã n sɩd beeme, la t’a na n sõng-d lame ye.—Ebre. 11:6.

8-9. Y sã n wa sãmbd ne a Zeova n yaa Naandã, bõe la y segd n maane? (Ges-y fotã me.)

⁸ Y sã n wa sãmbd ne a Zeova n yaa Naandã, y segd n maana bũmb tao-tao. Maan-y vaeesg tõnd sɛbã pʋsẽ n bao kaset toor-toor sẽn wilgd t’a Zeova n naan bũmb fãa. La vie a-t-elle été créée? ne Cinq questions à se poser sur l’origine de la vie borsiir-dãmbã pʋsẽ, y tõe n paama kibay wʋsg sẽn na n keng y tẽebã. Y leb n tõe n kẽe jw.org n ges video nins gom-zug sẽn yaa: “Wa n bee woto bal sɩda?” tɩ na n paasa y tẽebã pãnga. A Zesika sẽn yaa pʋg-sad sẽn be Etazĩni wã yeelame: “Mam sẽn karem Origine de la vie borsiirã poore, m kɩsa sɩd tɩ Naand sẽn yaa yam-kãseng soab n be. M da sɩng n mii rẽ. La m sẽn karem b sẽn bilg yɛlã to-to borsiirã pʋgẽ wã kɩtame tɩ m maneg n kɩs sɩd ne rẽ.” Neb a taab me karma Y a-t-il un Créateur qui se soucie de vous? sebrã tɩ sõng-b wʋsgo. Tõe tɩ yãmb zoe n karma seb-kãense, la yɩta sõma tɩ y le karem-ba.

⁹ Wala makre, y meng Biibl zãmsgã sasa, y tõe n baoo sõss sẽn wilgd tɩ Wẽnnaam beeme n zãmse. Rẽ na n sõng-y lame tɩ y kɩs sɩd t’a Zeova sɩd beeme, la sõng-y tɩ y bãng a sẽn yaa Wẽnnaam ning buudã n paase. (Rom. 1:20) Sẽn paase, y na n tõog n sõnga neb a taab sẽn maand sãmbs ne Wẽnnaam sã n sɩd beeme. Sɩd-sɩda, a Zeova sẽn naan bũmb ninsã wilgda vẽeneg t’a sɩd beeme.

Ãdsã: IAC/RGO/David Malin Images; zĩnfã ne mobillã: Mercedes-Benz USA; sɩlgã: Kristen Bartlett/University of Florida

A ZEOVA N VẼNEG TƖ B GƲLS BIIBLÃ

10. Bõe yĩng tɩ Biiblã tar yõod wʋsg ne tõndo? (2 Tɩmote 3:16, 17)

¹⁰ Karm-y 2 Tɩmote 3:16, 17. Biiblã goamã yaa koees a Zeova sẽn taas ninsaalbã. Biiblã tõe n sõng-d lame tɩ d paam sogsg nins sẽn tar yõodã leoore. A wilgda tõnd a Zeova raabã sẽn yaa a soab ne tẽngã, la a sẽn dat tɩ d maan bũmb ninsã. D kɩsa sɩd tɩ Biiblã goamã yita Wẽnnaam nengẽ, tɩ kɩt tɩ Biiblã yaa sebr ning sẽn tar yõod ne tõnd n yɩɩdã. D raabã yaa wʋm a goamã võore, la d modg n tũ a saglsã d vɩɩmã nens fãa pʋsẽ.

11. Bõe n kɩt tɩ y kɩs sɩd tɩ yaa Wẽnnaam n vẽneg tɩ b gʋls Biiblã?

¹¹ Bũmb wʋsg n kɩt tɩ d kɩs sɩd tɩ Biiblã yaa a Zeova n vẽneg tɩ b gʋlse. Wala makre, Biiblã sẽn togs kʋdemd yɛl ninsã yaa sɩda. (Luk 3:1, 2) Biiblã sã n wa gomd siãnsã yɛl yell me, a sẽn yetã yaa kɛpɩ. (Zoob 26:7) Baa ne a Sʋɩtãan sẽn mao n na n menes Biiblã, rũndã-rũndã Biiblã n yaa sebr ning b sẽn yiis t’a sõorã yɩɩd sɛb a taabã fãa. Yaa sẽn zems neb pis-naas n gʋls Biiblã na maan yʋʋm tusr la kobs-yoob pʋgẽ. Baa ne rẽ, a goamã pa kɩɩsd taab ye. Baa b sẽn gʋls-a n sa yʋʋm wʋsg rũndã wã, a saglsã ket n nafda neb milyõ-rãmba. (Yel. 13:20; 15:21; Mat. 7:12) Sẽn paase, Biiblã bãngr-goam wʋsg n zoe n pidsi, tɩ wilgdẽ tɩ d tõe n kɩsa a goamã sɩda. (Zoz. 23:14) Sɩd-sɩda, Biiblã yaa Wẽnnaam n vẽneg tɩ b gʋlse!

12. D sã n wa sãmbd ne Biiblã yaa Wẽnnaam n vẽneg tɩ b gʋlse, bõe la d segd n maane?

¹² D sã n wa sãmbd ne Biiblã yaa Wẽnnaam n vẽneg tɩ b gʋlse, bõe la d segd n maane? D segd n pʋʋsa a Zeova n togs-a sẽn be d sũurẽ wã, n kos-a t’a sõng-do, la d maan vaeesg tõnd sɛbã pʋsẽ. Yaa woto la bi-bɩɩg a ye yʋʋr sẽn boond t’a Zordan maanda. A roagdbã yaa a Zeova Kaset rãmbã. A yeelame: “M roagdbã wall neb a taab sã n yeel-m bũmbu, m pa tẽed zond-yaar ye. M rengd n baoo kaset sẽn wilgd tɩ yaa sɩda, n yaool n tẽ. Sɩd-sɩda, m mi n ket n maanda sãmbse. La sã n wa yaa woto, m maanda vaeesg tõnd sɛbã pʋsẽ n paam m sogsgã leoore, tɩ m sãmbsã sa.” D sã n tẽegd bũmb ning sẽn kɩt tɩ d kɩs sɩd tɩ Biiblã yaa a Zeova n vẽneg tɩ b gʋlsã yelle, d tẽebã pãng na n paasdame.—1 Kor. 3:12, 13.

A ZEOVA WILGDA A SIGLGÃ SOR RŨNDÃ-RŨNDÃ

13. D sã n wa sãmbd ne sã n yaa a Zeova Kaset rãmbã n yaa a Zeova nin-buiidã, bõe la d segd n maane?

¹³ D miime t’a Zeova Kaset rãmbã n yaa siglg ning Wẽnnaam sẽn wilgd sor rũndã-rũndã wã. La d sã n wa sãmbd ne rẽ, d segd n maana bũmb tao-tao. Wala makre, d tõe n bʋgsa sogsg nins sẽn pʋgdã zugu: ‘Ãnd dãmb n maand b sẽn tõe fãa n tũud Biiblã noyã? Ãnd dãmb n modgd tɩ b sẽn tẽed bũmb ninsã fãa tik Biiblã zugu? Ãnd dãmb n maand a Zeova raabã rũndã-rũndã?’—Mat. 7:20, 21; 2 Tɩm. 4:3, 4.

14. Bõe yĩng tɩ d tõe n yeel t’a Zeova tũnugda ne a Kaset rãmbã n pidsd Matiye 24:14 goamã rũndã-rũndã?

¹⁴ Wala makre, Wẽnnaam datame tɩ nebã wʋm koe-noogã zĩig fãa nand t’a sãam dũni-kãngã. Rẽ n so tɩ d tõe n sok d meng yaa: ‘Ãnd dãmb n moond koe-noogã rũndã-rũndã?’ (Mat. 24:14) Yaa vẽeneg t’a Zeova tũnugda ne a Kaset rãmbã n tʋmd tʋʋm-kãnga. Yaa tõnd bal n moond koe-noogã tẽns kobs-yi la pis-naas la zak pʋsẽ. D sẽn sɩng tʋʋm-kãngã yɩɩda yʋʋm koabg masã. Sɩd-sɩda, koɛɛgã mooneg n yaa tʋʋmd ning sẽn tar yõod n yɩɩd ne tõndo.—Mat. 28:19, 20.

15. Bõe la a Zeova Kaset rãmbã maand t’a yʋʋrã paamd waoogre? (Matiye 6:9; Ezayi 43:10)

¹⁵ Karm-y Matiye 6:9 ne Ezayi 43:10. D sẽn paam tɩ b boond tõnd t’a Zeova Kaset rãmbã yaa zu-zẽkr ne-do. Rũndã-rũndã, neb wʋsg pa mi Wẽnnaam yʋ-peellã sẽn yaa Zeova wã ye. La d yiisa Biibl tɩ Wẽnnaam yʋ-peellã be zĩig ning fãa a sẽn segd n zĩndã. Yaa Gʋls-sõamyã, Dũni-paalgã lebgre. Wẽnnaam yʋ-peellã be a pʋgẽ naoor tus a yopoe la zaka.

16. Bõe yĩng tɩ d tõe n yeel t’a Zeova Kaset rãmbã tũuda goam nins sẽn be Zã 13:34, 35 pʋgẽ wã? (Ges-y fotã me.)

¹⁶ Karm-y Zã 13:34, 35. Rũndã-rũndã, neb wʋsg pa tõe n zems taab ye. B kisa taaba. La a Zeova nin-buiidã pa woto ye. B sɩd nonga taaba, la b zemsd taaba. D yita dũniyã ween-vɩɩsã fãa, tɩ b sẽn wub-d to-to wã la d yɛlã me yaa toor-toore. Baa ne rẽ, d modgdame tɩ laafɩ la nonglem be d sʋka. Tõe tɩ y zoe n toga sor n kẽng tẽn-zẽnga, n tɩ maan tigsg ne saam-biisã beenẽ. Sã n yaa woto, y yãame tɩ d tẽed-n-taasã sẽn be zĩig ning fãa, b nonga taab la b zemsd taaba. Rẽ wilgda vẽeneg tɩ yaa a Zeova Kaset rãmbã n maand a raabã rũndã-rũndã. D sã n ning d yamẽ t’a Zeova bee ne a nin-buiidã, na n sõng-d lame tɩ d kell n maan sɩd ne-a baa zu-loees wakate.

RA TOL-Y N BAS-Y-YÃ A ZEOVA YE

17-18. Zu-loe-bʋs la d tõe n paame, la d tõe n basa d yam n yeel tɩ bõe?

¹⁷ Rũndã-rũndã sẽn yaa yaoolem wakatã, yɛlã yaa kãn-kãe hal tɩ vɩɩmã lebg toog ne d fãa. (2 Tɩm. 3:1, 13) D toeeme n wa tar zu-loees n pa mi d sẽn maandg ye. A Zeova siglgã tõe n wa yãka yam tɩ d pa wʋmd a võor ye. D tẽed-n-taag me tõe n wa maana bũmb n sãam d sũuri. D toeeme n wa pa mi d sẽn na n welg d zu-loeesã to-to, wall bũmb n maan tɩ namsd tõndo, tɩ d pa wʋmd a võor ye.

¹⁸ Baa d sẽn tõe n paam zu-loees sẽn na n kɩt tɩ d sũur sãam wall tɩ d maand yɩɩrã, d tõe n kell n maana sɩd ne a Zeova. Bõe yĩnga? Bala d miime tɩ yẽ n yaa Naandã, n leb n yaa soab ning sẽn vẽneg tɩ b gʋls Biiblã. D kɩsa sɩd me tɩ yaa a Zeova Kaset rãmbã n maand a raabã rũndã-rũndã. Tõnd me tõe n yeela a Zeova goam nins a Pɩyɛɛr sẽn yeel a Zeezi wã. A yeelame: “Tõnd na n loogame n kẽng ãnda nengẽ? Yãmb gomda vɩɩm sẽn ka sɛt goama.”