Modg-y tɩ y tẽebã kell n tall pãng y karengã wakate

1-2. a) Y sã n yãk yam n na n karem n zãage, bõe la y segd n ket n maandẽ? b) “Kell n kẽn sõma woto” wã rat n yeelame tɩ bõe? (Filip rãmbã 3:16)

A ZEOVA KASET RÃMB kẽer yãka yam n na n karem n zãag wall b tɩ zãms bũmb ning maanego, bala b tagsdame tɩ rẽ n na n sõng-b tɩ b paam tʋʋmd n ges b meng yelle, la b tũ a Zeova sõma. Yãmb sã n yãka yam n na n maan woto, bõe la y tõe n maan tɩ yãmb ne a Zeova zoodã kell n tall pãnga? (Zak 4:8a) Yaa vẽeneg tɩ y sẽn sɩng karengã tɛka, y paama makr buud toor-toor n kell n maan sɩd ne a Zeova. La masã, y sẽn yãk yam n na n karem n paasã, y segd n “kell n kẽna sõma woto,” rat n yeel tɩ y segd n kell n tũu a Zeova ne y sũur fãa wa y sẽn zoe n maandẽ wã.—Karm-y Filip rãmb 3:16.

² B ra wae n pʋta Gɛrkã gom-biis nins b sẽn lebg tɩ “kell n kẽn sõma woto” wã, n bilgd sodaasã sẽn naagd taab n kẽn to-to wã. Y sã n yãk yam n na n karem n paase, na n yɩɩ tɩlɛ tɩ y yɩ wa sodaaga. Y segd n ket n naagda y tẽed-n-taasã n maand bũmb nins sẽn paasd y tẽebã pãngã. Y raabã yaa yãmb ne a Zeova zoodã pãng paasdẽ, pa a boogdẽ ye. Sõs-kãngã pʋgẽ, d na n goma Biiblã sagls a naas sẽn tõe n sõng-y yelle. Yaa sagls y sẽn zoe n miẽ. Y zoe n tũu sagl-kãens n bãng n yãk yam. Sẽn paase, b na n sõng-y lame tɩ y tẽebã kell n tall pãng y karengã wakate, la baa karengã poore.

KET-Y N MAAND-Y BŨMB NINS SẼN PAASD Y TẼEBÃ PÃNGÃ

3. Y sã n yãk yam n na n karem n paase, bõe n tõe n maane?

³ Sẽn yaa toogã võore. Y sã n yãk yam n na n karem n paase, y na n tara bũmb wʋsg y sẽn segd n maand daar fãa, tɩ kɩt tɩ y pa le tar sẽk ye. Y sẽn dat n tʋm sõma lekollẽ wã tõe n kɩtame tɩ y lebs bũmb nins y sẽn maand a Zeova tũudmã pʋgẽ wã poorẽ. Y tõeeme meng n wa vaand tigissã n pa le moond koɛɛgã sõma, n pa karemd Biiblã daar fãa la y pa le wae n pʋʋsdẽ ye.—Vẽn. 2:4.

4. Bõe yĩng tɩ tar yõod tɩ y tall “tʋʋm wʋsg Zu-soabã tʋʋmdã pʋgẽ”? (1 Korẽnt rãmbã 15:58)

⁴ Karm-y 1 Korẽnt rãmb 15:58. Y sã n zao weef n dat tɩ weefã ket n kẽnda, yaa tɩlɛ tɩ y tabe. Woto me, y sã n dat tɩ yãmb ne a Zeova zoodã kell n tall pãnga, y segd n talla “tʋʋm wʋsg Zu-soabã tʋʋmdã pʋgẽ.” La b sẽn yeel tɩ “tʋʋm wʋsgã,” pa sẽk ning y sẽn kẽesd a Zeova tʋʋmdã pʋgẽ wã yell bal la b gomd ye. Rat n yeelame me tɩ y tʋm tʋʋm-kãense, y sẽn get tɩ b tara yõod n yɩɩdã yĩnga. Tẽeg-y t’a Zeova tũubã yõod yɩɩda karengã. (Mat. 22:37) Saam-bi-poak yʋʋr sẽn boond t’a Samanta yeelame: “M yãka yam tɩ m sã n wa getẽ tɩ karengã kɩtame t’a Zeova raabã maaneg lebg toog ne-ma, m na n basa lekollã.”

5. Bõe la y tõe n maan tɩ sõng-y tɩ y kell n tũ a Zeova sõma?

⁵ Nand tɩ y yãk yam n na n karem n paase, bõe la y tõe n maane? Bao-y n bãng-y y sã n na n kell n lʋɩɩsa a Zeova raabã taoore. Sok-y y meng yaa: ‘Bõe la m na n maan tɩ sõng-m tɩ m ket n kẽnd tigissã n pa vaandẽ, n moond koɛɛgã la m karemd Biiblã?’ (Zoz. 1:8; Mat. 28:19, 20; Ebre. 10:25) Y leb n tõe n soka y meng yaa: ‘M sẽn sɩng karengã tɛk n tãag masã, m maanda wãn n paamd sẽk n maand bõn-kãense?’ Y sã n mik tɩ zĩis kẽer wɛɛngẽ la y pa modgde, bõe la y tõe n maan n dems yɛlã masã menga? Yãk-y yam tɩ baa sẽn wa n yaa a soaba, y na n kell n talla tʋʋm wʋsg a Zeova tʋʋmdã pʋgẽ. Yaa sɩd tɩ tara yõod tɩ y tʋm sõma lekollẽ wã, la y pa segd n karemd wʋsg hal n pa le tar sẽk wall pãng n na n tũ a Zeova sõma ye.a—Mat. 6:24.

6. Sogs-bʋs la y tõe n sok y menga? (Ges-y fotã me.)

⁶ Y sã n yãk yam n na n karem n paase, bɩ y mi n feesd y menga. Y tõe n maanda rẽ kiuug fãa. Sok-y y meng yaa: ‘Bũmb nins sẽn tar yõod n yɩɩdã ket n yaa vẽeneg m yamẽ bɩ?’ Sẽn na yɩl n bãng rẽ, y tõe n soka y meng yaa: ‘Mam mi n vaanda tigissã wall m tat tɩ zoe n sɩngame bɩ? M wae n tagsda karengã yell tigissã sasa bɩ? M wae n maanda tigissã ne videokõnferãns maasem, n pa wat Rĩungã roogẽ bɩ?’ Y leb n tõe n gũus n gesa y sã n ket n pelgda y pʋg n pʋʋsdẽ, la y karemd Biiblã sõma wa pĩndã. Y ket n moonda koɛɛgã sõma bɩ, bɩ lebga rok-m-zugẽ bala? Y sã n fees y meng n mik tɩ bũmb n dat remsg bɩ y rems tao-tao. Ra bas-y tɩ karengã kɩt tɩ y lebs a Zeova raabã maaneg poorẽ ye.

“KET-Y N TAGSD-Y SÕMA”

7. Y sã n yãk yam n na n karem n paase, wãn to la tõe n toeem y sẽn get yɛlã to-to wã?

⁷ Sẽn yaa toogã võore. Y sã n yãk yam n na n tɩ karem lekoll-dãmb kẽer pʋsẽ, b na n zãms-y-la bũmb kẽer Biiblã sẽn yeel tɩ pa sõma, n boond rẽ tɩ “dũniyã bãngr” la “belgr gom-vɩɩdo.” (Kolo. 2:8) Wala makre, karen-saam-dãmb kẽer zãmsda karen-biisã tɩ Wẽnd kae, la tɩ bũmb fãa wa n bee woto tɩ pa tũ ne Naand sabab ye. Karen-saam-dãmb sãnda me wilgda karen-biisã tɩ b sã n dat tɩ b vɩɩmã yɩ sõma, b segd n teega b mense. Saam-biig a ye tẽega b sẽn zãms-a bũmb nins lekollẽ wã yelle, n yeel yaa: “B ra pa sõngd tõnd sẽn na yɩl tɩ d paam bãngr bal ye. B ra wilgda tõnd d sẽn segd n tags to-to, tɩ naoor wʋsgo, pa zemsd ne a Zeova sẽn get yɛlã to-to wã ye. Wala makre, b ra yeta tõnd tɩ yaa d sã n teeg d meng bal la d na n paam sũ-noog hakɩɩka. Rẽ kɩtame tɩ m wa tagsdẽ tɩ pa tɩlɛ tɩ m bao a Zeova sõngr ye. Kɩtame tɩ ra yaa toog tɩ m teeg a Zeova m sẽn maand fãa pʋgẽ.”

8. Bõe yĩng tɩ tar yõod tɩ y modg “n tõog n ket n tagsd sõma”? (Yel-bũnã 5:1, 2)

⁸ Karm-y Yel-bũn 5:1, 2. Biiblã sagenda tõnd tɩ d “ket n tagsd sõma.” Yɩl n tõog n ket n maand bũmb baooda modgre. Rẽ tara yõod wʋsg “tõog n ket n tagsd sõma” wã wɛɛngẽ, bala a Sʋɩtãan ne a dũniyã maooda wakat fãa n dat n toeem tõnd sẽn get yɛlã to-to wã. (1 Pɩy. 5:8) Dũniyã nebã tagsg sẽn yaa a soab sõma la wẽngã wɛɛngẽ wã, ne vɩɩmã sẽn sɩng to-to wã wɛɛngẽ wã pa sõma ye. Sẽn paase, kẽer yetame tɩ Wẽnd kae ye. D sã n wae n be ne neb a woto, tõe n wa kɩtame tɩ d sãmbd ne Biiblã sẽn yetã sã n yaa sɩda. Karen-saam-dãmb la neb a taab tõe n yetame tɩ y sã n get yɛlã wa bãmba, y yaa yam soaba. La sɩd-sɩda, “dũni-kãngã yamã yaa yalemd Wẽnnaam nifẽ.”—1 Kor. 3:18-20.

9. Bõe la y tõe n maan n ket n tagsd sõma?

⁹ Nand tɩ y yãk yam n na n karem n paase, bõe la y tõe n maane? Bao-y n bãng-y y sã n kɩsa sɩd ne Biiblã sẽn yetã nand tɩ y yãk yam n karem n paase. Wala makre, y tõe n soka y meng yaa: ‘Bõe n kɩt tɩ m kɩs sɩd tɩ Wẽnnaam beeme? Bõe n kɩt tɩ m kɩs sɩd tɩ Biiblã yaa Wẽnnaam Gomde? Bõe n kɩt tɩ m kɩs sɩd tɩ Biiblã noyã tũub n nafd neda, n yɩɩd a sẽn na n vɩ wa dũniyã rãmb sẽn datã?’ Y sã n tẽeg yɛlã sẽn yɩ to-to y sẽn sɩng karengã tɛkã yell me, tõe n sõng-y lame. Sok-y y menga: ‘Neb kẽer sẽn tẽed tɩ bũmb fãa wa n bee woto tɩ pa tũ ne Naand sababã kɩtame tɩ m maan sãmbs ne Wẽnnaam sã n beeme, la tɩ yaa yẽ n naan bũmb fãa bɩ? M yam mi n bee tʋʋm-dẽgd nins m karen-bi-taasã sẽn tʋmdã bɩ?’ Y sã n mik tɩ zĩis kẽer wɛɛngẽ la y pa modgde, bõe la y tõe n maan n paas y tẽebã pãng masã menga? Yãk-y yam tɩ baa sẽn wa n yaa a soaba, y na n modgame n ket n tagsd sõma.—2 Tɩm. 2:16-18.b

10. Bõe la y tõe n maan tɩ sõng-y tɩ y ket n tagsd sõma?

¹⁰ Y sã n yãk yam n na n karem n paas bɩ y mi n feesd y menga. Sok-y y meng yaa: ‘M pa get tɩ yɛl kẽer dũniyã nebã sẽn maandã pa maneg n yaa wẽns wʋsgo, baa sẽn pa zems ne a Zeova raabã sɩda? B sã n wa zãmsd-d bũmb sẽn pa sɩda, m nee vẽeneg tɩ yaa dũniyã bãngr sẽn pa tar yõod bɩ? M kɩsa sɩd ne m sũur fãa tɩ yaa Wẽnnaam Rĩungã n tõe n welg ninsaalbã zu-loeesã bɩ?’ Sẽn na yɩl tɩ y karen-bi-taasã la y karen-saam-dãmbã ra toeem y sẽn get yɛlã to-to wã, bɩ y karemd Biiblã sõma la y bʋgsdẽ. Biiblã zãmsgã la bʋgsgã na n sõng-y lame tɩ y kɩs sɩd ne bũmb nins y sẽn tẽedã.—1 Tɩm. 4:15.

SIGIND-Y Y SẼKÃ SÕMA

11. Y sã n yãk yam n na n karem n paase, zu-loe-bʋs la y tõe n paam sẽkã siglg wɛɛngẽ?

¹¹ Sẽn yaa toogã võore. Y sã n yãk yam n na n karem n paase, tõe n dɩta y sẽkã wʋsgo, sẽn yɩɩd fãa, y sã n wa segend y meng ɛgzame-rãmb yĩnga, wall b sã n wa n kõ-y tʋʋmd n yãk wakat y sẽn segd n tʋm n sa. Y sã n pa bãng n sigl y sẽkã sõma, tõe n waa ne yɩɩr la yaams wʋsgo. Rẽ n so tɩ y segd n baood weer n get y mengã yell sõma.

12. Bõe me la y segd n maan n da ‘sãam y sẽkã’? (Efɛɛz rãmbã 5:15, 16)

¹² Karm-y Efɛɛz rãmb 5:15, 16. Yɩl n da ‘sãam y sẽkã’ tõe n yɩɩ toogo, bala y tara bũmb wʋsg n segd n maane. Wala makre, y sẽn segd n karemd sõma wã sẽn yãk a toogo, y segd n baooda weer n mi n be ne y zakã rãmb la y tẽed-n-taasã. (Yɩɩn. 133:1; Yel. 18:1) La sẽn tar yõod n yɩɩda, y segd n maanda bũmb nins sẽn paasd yãmb ne a Zeova zoodã pãngã. (Mat. 6:33) Tõe me tɩ y tara tʋʋm n segd n tʋm zakã pʋgẽ, wall nug-tʋʋmde. Sẽn paase, y segd n baooda sẽk n vʋʋsd sõma la y mi n wɩsgd y yĩngã. (Koɛ. 4:6; 1 Tɩm. 4:8) Sẽn na yɩl n tõog n maand bõn-kãensã fãa, y segd n sigla y sẽkã sõma.

13. Bõe la y tõe n maan tɩ sõng-y tɩ ra sãam y sẽkã?

¹³ Nand tɩ y yãk yam n na n karem n paase, bõe la y tõe n maane? Biiblã yeelame tɩ d sã n deng n mag sõma n yaool n maan bũmbu, yãkda nenga. (Yel. 21:5) Woto wã, nand tɩ y yãk yam n na n karem n paas bɩ y sigl y sẽkã sõma. Y tõe n tagsa yɛlã sẽn yɩ to-to y sẽn sɩng karengã tɛkã yelle, la y sok y meng yaa: ‘M da tõogd n paamda sẽk n maand bũmb nins sẽn tar yõod n yɩɩdã bɩ?’ Y sã n mik tɩ zĩis kẽer wɛɛngẽ la y pa modgde, bõe la y tõe n maan n dems yɛlã masã menga? Kɩs-y sɩd tɩ y sigla y sẽkã sõma, sẽn na yɩl n da wa getẽ tɩ y pa tar sẽk n na n maan bũmb nins fãa y sẽn segd n maanã ye.c

14. Sogs-bʋs n tõe n sõng yãmb tɩ y fees y menga?

¹⁴ Y sã n yãk yam n na n karem n paas bɩ y mi n feesd y menga. Sok-y y meng yaa: ‘M tõogd n paamda weer n vʋʋsdẽ tɩ sekdẽ, la m wɩsgd m yĩng bɩ? M paamda weer n mi n be ne m tẽed-n-taasã bɩ? M tõogd n maanda bũmb nins m sẽn segd n maand yir karengã yĩngã b wakat bɩ? Sã n mik tɩ m pa tõogd n maand woto, yaa m tʋʋmã sẽn yaa wʋsg yĩng bɩ, bɩ yaa maam n sãamd m sẽkã? M zo-rãmbã wall m zakã rãmb tagsdame tɩ m segd n toeema bũmb kẽer bɩ?’ Sã n mik tɩ y segd n maneg n sigla y sẽkã sõma, wall tɩ y segd n wõra y mengã n tõog n tũ y sẽn sigl y sẽkã to-to wã, bɩ y maan dẽ tao-tao. Y tõe n goma rẽ yell ne neb sẽn tõogd n maand bũmb fãa a wakate, n kos-b saglse.—Yel. 11:14.

“SẼN KẼND-A NE YAM DÃMBA”

15. Y sã n yãk yam n na n karem n paase, zu-loe-bʋs la y tõe n paame?

¹⁵ Sẽn yaa toogã võore. Y karen-bi-taasã na n mi n datame tɩ y naag-b n maan bũmb kẽer karengã poore. Y tõe n wa rat n naag-b lame n maan bõn-kãense. Bala y yʋʋmã zema taaba, tɩ y sẽn nong bũmb ninsã me tõe n yaa a ye. Sẽn paase, y wae n bee ne taab karengã sasa. Y tõe n wa n getame meng tɩ yãmb ne bãmb yɛlã wõnda taaba, n yɩɩd y tigingã neb kẽere. La y segd n maana gũusgu. Yaa sɩd tɩ y wõnda taab bũmb kẽer wɛɛngẽ, la y yaa toor-toore. Bala yãmb dat n taa a Zeova yam, tɩ bãmb toog kae ne a Zeova ye. Y sã n wae n be ne-ba, y tõe n wa tagsda wa bãmba. (1 Kor. 15:33) A buud paama saam-biig a ye yʋʋr sẽn boond t’a Mikayɛlle. A zãmsa kʋʋrã wã tʋʋm yʋʋm a naase. A yeelame: “Daar fãa, ra yaa tɩlɛ tɩ m tʋm ne tʋmd-n-taas sẽn yaa neb sẽn nong gom-dẽgdo, sẽn kelgd mizigs kiris-ned sẽn pa segd n kelge, la sẽn paoogd pagbã. M wa n getame tɩ b no-goamã la b yel-manesmã pa maneg n yaa wẽns wʋsg ye.”

16. Yel-bũn 13:20 goamã wilgda tõnd bõe?

¹⁶ Karm-y Yel-bũn 13:20. Biiblã sagenda tõnd tɩ d gũus d meng ne tũud-n-ta-wẽnsã. La a yetame tɩ “sẽn kẽnd-a ne yam dãmb na n lebga yam soaba.” Woto rat n yeelame tɩ d sẽn nong n be ne neb ninsã tõe n nafa tõndo, wall wã-do. Woto wã, bao-y neb nins sẽn nong a Zeova wa yãmbã zoodo, neb nins sẽn sɩd rat yãmb neerã.—Yɩɩn. 101:6, 7; 119:63.

17. Bõe la y tõe n maan tɩ sõng-y tɩ y zãag y meng ne tũud-n-ta-wẽnse?

¹⁷ Nand tɩ y yãk yam n na n karem n paase, bõe la y tõe n maane? Tags-y manesem ning y sẽn segd n tall ne y karen-bi-taasã zugu. Saam-biig a ye yʋʋr sẽn boond t’a Tewodoor yeelame: “M da sõsda ne m karen-bi-taasã noog-noogo, la m da pa wae n be ne-b karengã poor ye. B ra yaa mam karen-bi-taas bala. B pa m zo-rãmb ye.” Bõe la y tõe n maan n kɩs sɩd tɩ y pa wae n be ne y karen-bi-taasã, wall tɩ y pa yõg zood ne-ba? Sẽn na yɩl n leok sokrã, y tõe n soka y meng yaa: ‘Mam sẽn sɩng karengã tɛk n tãag masã, manesem-bʋg la m tar ne m karen-bi-taasã?’ Y sã n mik tɩ zĩis kẽer wɛɛngẽ la y pa modgde, bõe la y tõe n maan n dems yɛlã masã menga? Yãk-y yam tɩ y na n kell n ‘kẽna ne yam dãmba,’ la y ra wae n be ne neb nins sẽn pa nong a Zeova wã ye.d

18. Yɩta sõma tɩ y mi n sokd y meng sogs-bʋse? (Ges-y fotã me.)

¹⁸ Y sã n yãk yam n na n karem n paase, bɩ y mi n feesd y menga. Y tõe n soka y meng yaa: ‘Mam pa wae n be ne m karen-bi-taasã wʋsg sɩda? M no-goamã, m sẽn get yɛlã to-to wã la m manesmã pa wilgd tɩ m dɩkda b togs-n-taar sɩda? A Zeova tagsg yaa wãn ne m manesem sẽn yaa to-to ne m karen-bi-taasã?’ (Yɩɩn. 1:1) Y sã n mik tɩ y segd n demsa bũmb kẽer bɩ y maan dẽ tao-tao. Modg-y tɩ yɩ neb nins sẽn nong a Zeova wa yãmbã sʋk la y baood zo-rãmba. Sẽn paase, maan-y y sẽn tõe fãa, n moond y karen-bi-taasã koe-noogã. B sẽn mi yãmb tɩ y wae n be ne taab lekollẽ wã yĩnga, y tõe n paama segb n gom a Zeova yell ne-b nana-nana.

SEGL-Y Y MENG SÕMA

19. Nand tɩ y yãk yam n na n karem n paase, wãn to la y tõe n segl y menga? Rɩk-y makre.

¹⁹ Ned sẽn tar yam sã n dat n kẽ weoog n gilgi, a rengd n segla a meng sõma n yaool n yi. A na n kɩsa sɩd t’a tara keelem, la a ning fut la neooda sẽn zemse. A na n kɩsa sɩd t’a mii zĩig ning a sẽn dat n kẽngã me. Baa a sẽn pa mi zu-loees nins fãa sẽn tõe n paam-a weoogẽ wã, a sẽn segl a meng sõma wã na n sõngame t’a kẽng la a lebg n wa ne laafɩ. Woto me, nand tɩ y yãk yam n na n karem n paas me, y segd n segla y menga. Y segd n modgame tɩ y tẽebã tall pãnga, n bob “zab-teed nins Wẽnnaam sẽn kõtã fãa,” la y mi bũmb ning sẽn kɩt tɩ y rat n karem n paasã vẽenega. Pa y sẽn dat n paam ligd wʋsgo, wall y sẽn dat n lebg ned sẽn tar ziir dũniyã pʋgẽ yĩng ye. Y rat n maana bũmb fãa a Zeova waoogr yĩnga.—Efɛɛ. 6:11-13; 1 Kor. 9:26, 27; 10:31.

20. Sogs-bʋs n tõe n sõng-y tɩ y “feesd y mens n get y sã n bee tẽebã pʋgẽ”?

²⁰ Biiblã sagenda tõnd yaa: “Bɩ y feesd y mens n get y sã n bee tẽebã pʋgẽ. Makd-y y mens n get y sẽn yaa neb nins buudu.” (2 Kor. 13:5) Y sã n yãk yam n na n karem n paase, y segd n maanda woto. Mi n feesd-y y meng bũmb nins yell d sẽn gom sõs-kãngã pʋgẽ wã wɛɛngẽ. Y tõe n soka y meng yaa: ‘M tõogd n maanda bũmb nins sẽn paasd maam ne a Zeova zoodã pãngã bɩ? M tõogd n tagsda sõma, n pa get yɛlã wa dũniyã nebã bɩ? M siginda m sẽkã sõma bɩ? M nong n bee ne m tẽed-n-taasã, la m zãagd m meng ne tũud-n-ta-wẽns bɩ?’ Sɩd-sɩda, a Zeova Kaset soab fãa segd n mi n sokda a meng sogs-kãensã, a bee lekollẽ, tʋʋm zĩigẽ wall zĩig a to. Yãk-y yam tɩ y yɛlã sẽn wa n yaa a soab fãa, y na n modgame tɩ y tẽebã kell n tall pãnga. Y tõe n kɩsa sɩd t’a Zeova na n ninga y modgrã barka.—Yel. 3:5, 6.