2026, SẼOOG RASEM A 6-12
YƖƖLL 98 Gʋlsg Sõamyã yita Wẽnnaam nengẽ
Wãn to la Biiblã tõe n sõng tõnd tɩ d bãng a Zeova sẽn get yɛlã to-to wã?
“Kõ[-y] y yĩnsã, . . . [n] tʋm Wẽnnaam tʋʋmdã ne y yamã.”—ROM. 12:1.
D SẼN NA N BÃNGE
D na n yãa Biiblã sẽn tõe n sõng-d to-to tɩ d bãng a Zeova sẽn get yɛlã to-to wã sõma.
1-2. a) Bõe yĩng tɩ d tõe n yeel tɩ Biiblã yaa seb-kʋdre? b) Bõe yĩng tɩ Biiblã ket n tar yõod rũndã-rũndã?
BIIBLÃ yaa seb-kʋdre. Yaa na maan yʋʋm tus a tã la kobs-nu la b sẽn sɩng a gʋlsgã. B gʋls-a lame n sa na maan yʋʋm tus a yiib rũndã. Baasgo, Biiblã sẽn yaa Wẽnnaam Gomdã ket n tara yõod rũndã-rũndã. (Ebre. 4:12; 2 Tɩm. 3:16, 17) Neb milyõ-rãmb n tũud Biiblã sagls rũndã-rũndã, tɩ sõngd-b tɩ b bãngd n yãkd yam, la kõt-b sũ-noogo.
2 La bõe n kɩt tɩ seb-kʋdr a woto ket n tar yõod rũndã-rũndã? Yaa bũmb a yiib yĩnga. Pipi, yaa ‘Wẽnnaam ning sẽn vɩ wã,’ soab ning sẽn naan tõnd la sẽn yaa yam-kãseng soabã n kɩt tɩ b gʋls-a. (1 Tɩm. 4:10; Rom. 16:26, 27) Yiibu, bũmb wʋsg la Biiblã yet Wẽnnaam zug tɩ pa toeemdẽ ye. Rẽ n so t’a saglsã ket n tõe n sõng nebã rũndã-rũndã, wa b sẽn sõng pĩnd wẽndẽ neb tɩ b welg b zu-loeesã.
3. Sogs-bʋs la d na n leok sõs-kãngã pʋgẽ?
3 Sõs-kãngã pʋgẽ, d na n paama sogsg nins sẽn pʋgdã leoore: A Zeova noyã tika bõe zugu? Bõe yĩng tɩ tar yõod tɩ d bao n bãng noy nins a Zeova sẽn kõ tõndã sẽn tik bũmb nins zutã? D sã n wa karemd Biiblã, bõe la d tõe n maan n bãng a Zeova tagsg sẽn yaa a soab bũmb ning wɛɛngẽ? D leb n na n yãa a Zeezi sẽn sõng nebã to-to tɩ b bãng a Zeova tagsg sẽn yaa a soab bũmb toor-toor wɛɛngẽ.
BIIBLÃ NOYÃ TIKA BÕE ZUGU?
4. Biiblã noyã tika bõe zugu?
4 Biiblã wilgda tõnd bũmb toor-toor sẽn tõe n sõng-d tɩ d bãng a Zeova sẽn get yɛlã to-to wã. Wakat ninga bõn-kãens yaa noy a sẽn kõ tɩ b gʋlse. (Mat. 22:37) Biiblã noy kẽer yaa wakat takɩ wall yɛl takɩ yĩnga. La bũmb nins sẽn kɩt t’a Zeova kõ noyã tõe n sõng-d lame tɩ d bãng a sẽn get yɛlã to-to wã, la bũmb nins sẽn tar yõod a nifẽ wã. Bũmb nins sẽn tar yõod a nifẽ wã pa toeemd ye. (Yɩɩn. 119:111) Rẽ n so tɩ baa noor sã n wa toeeme, wall a sã n pa kõ noor bũmb ning wɛɛngẽ, d tõe n bãnga a tagsg sẽn yaa a soab bõn-kãng wɛɛngẽ.—Eza. 40:8.
5. Rɩk-y makr n wilg tɩ bãng noor yaa toor ne bãng bũmb ning sẽn kɩt tɩ b kõ noorã. (Ges-y fot-rãmbã me.)
5 D rɩk makr n wilg tɩ bãng noor yaa toor ne bãng bũmb ning sẽn kɩt tɩ b kõ noorã. Pag sã n wa segendẽ, a tõe n yeela a bi-bilf yaa: ‘Ra sɩɩs rʋkã ye.’ Woto yaa noore. La bũmb ning sẽn kɩt t’a kõ noorã yaa vẽenega. Yaa t’a miime t’a sã n sɩɩs bũmb sẽn tʋʋle, na n yõog-a lame. Rẽnd yaa bũmb nins fãa sẽn tʋʋl yell la a sẽn gomdã, pa rʋkã bal ye. Ra sɩɩs bũmb sẽn tʋʋlã pa zakẽ bal ye. La biigã sã n wa lebg kãsma, tõe t’a na n tara rʋk n segendẽ, la a na n ket n maanda gũusg sẽn na yɩl tɩ rʋkã ra yõog-a ye. Rẽnd baa sẽn pa le yaa tɩlɛ t’a tũ a ma wã noorã, a ket n tẽra bũmb ning sẽn kɩt t’a kõ-a noorã.
Noor tõe n toeemame, la bũmb ning sẽn kɩt tɩ b kõ noorã pa toeemd ye (Ges-y sull a 5)
D SẼN SEGD N BAO N BÃNG A ZEOVA NOYÃ SẼN TƖK BŨMB NINS ZUTÃ VÕORE
6. a) Bõe la a Zeova kõ tõnd a Gomdã pʋgẽ? b) Bõe n wilgd t’a Zeova nanda tõndo?
6 A Zeova sẽn nong tõndã yĩnga, a kõo tõnd noy d sẽn tõe n tũ n gil zu-loeese. (Zak 2:11) Sẽn paase a sõnga tõnd tɩ d tõe n bãng a sẽn get yɛlã to-to wã, la bũmb ning sẽn kɩt t’a kõ-d no-kãensã. A Zeova pa kõ noy bũmb fãa yĩng ye. La Biiblã pʋgẽ, a kõ-d-la sagls sẽn tõe n sõng-d tɩ d bãng n yãk yam, la sẽn tõe n sõng-d tɩ d maan sẽn yaa tɩrga, baa bũmb nins wɛɛngẽ a sẽn pa kõ noorã. A Zeova sẽn pa kõ noy bũmb fãa yĩngã wilgdame t’a nanda tõndo. A kõo tõnd sor tɩ d tõe n yãk d toorẽ yam, n wilg tɩ d nong-a lame, la tɩ d rat n tũ a noyã.—Gal. 5:13.
7. Rɩk-y makr n wilg tɩ d sã n bãng bũmb ning sẽn kɩt t’a Zeova kõ noore, tõe n sõng-d lame (Ges-y fotã me.)
7 D sã n bãng bũmb ning sẽn kɩt t’a Zeova kõ noore, tõe n sõng-d lame. D rɩk makre: Soay kẽer zutu, b ningda bãna. Bãn kẽer wilgda bũmb sẽn kẽnd-bã sẽn segd n maan wall b sẽn pa segd n maane, tɩ b sã n kɩɩs rẽ bɩ tẽngã taoor dãmb tõe n kɩt tɩ b yao ligdi. Tõe n wilgda zoeesã tʋʋlem b sẽn pa segd n yõsge, wall zĩig ning b sẽn segd n yaase. La bãn kẽer wilgdame tɩ b segd n maana gũusgu. Tõe n yaa sẽn na n wilg tɩ sorã yaa salse, pa rẽ bɩ rũms n wae n pasgd sorã zĩ-kãnga. Ned sẽn mi mobill wẽneb sõma sã n yã bãnd a woto, a bãngda a sẽn segd n maanega. Wala makre, saagã sã n niid wall sobgã sã n fugd ne pãnga, sẽn wẽnd-a mobillã na n booga a zoeesã tʋʋlem wall a yaase. Woto me, kiris-nebã gũusda wʋsg sẽn na yɩl n da wa maan bũmb Biiblã sẽn wilg vẽeneg tɩ yaa wẽng ye. Sẽn paase, b gũusda b mens ne manesem wall tagsa buud fãa sẽn tõe n wa kɩt tɩ b maan bũmb sẽn pa noom a Zeova. Rẽ n so tɩ b segd n bao n bãng a Zeova sẽn get yɛlã to-to wã.
Bãn wʋsg sẽn be sorã noorã wilgdame tɩ sẽn kẽnd-b sorã zugã segd n maana gũusgu. Bũmb nins d sẽn bãngd Biiblã pʋgẽ wã me tõe n sõng-d-la woto (Ges-y sull a 7)
8. D sã n wa karemd Biiblã bõe la d segd n bao n bãnge, la wãn to la rẽ na n sõng-do? (Rom dãmbã 12:1, 2)
8 Bõe yĩng t’a Zeova pa kõ noy bũmb fãa wɛɛngẽ? Yaa tõnd sõngr yĩnga. Kɩtame tɩ d tõe n bao n bãng a Zeova sẽn get yɛlã to-to wã. Kɩtame me tɩ d sã n wa karemd Biiblã bɩ d tõe n bao n bãng yam ning d sẽn tõe n dɩk a pʋgẽ. D tõe n soka d meng yaa: “Bõe yĩng t’a Zeova kɩt tɩ b gʋls rẽ a Gomdã pʋgẽ? Wãn to la rẽ tõe n naf tõndo?” Woto, d tõogd n ‘tʋma Wẽnnaam tʋʋmdã ne d yamã.’ D tõogd n kɩsa sɩd “tɩ Wẽnnaam daabã yaa sõma, tɩ sakda ne-a, la tɩ zemsa zãnga.”—Karm-y Rom dãmb 12:1, 2.a
9. D sã n baood n bãngd a Zeova sẽn get yɛlã to-to wã, wãn to me la nafd tõndo? (Ebre-rãmbã 5:13, 14)
9 D sã n baood n bãngd a Zeova sẽn get yɛlã to-to wã, d bãngd n dɩka a Zeova togs-n-taare. D sã n tũud bũmb nins d sẽn bãngdã, tõnd ne a Zeova zoodã pãng paasdame. (Karm-y Ebre-rãmb 5:13, 14.) Roagdbã wae n kõta b kambã noy wʋsg sẽn na yɩl n sõng-b tɩ b maan sẽn yaa sõma, la b ra maan sẽn yaa wẽng ye. B tõe n sakda no-kãense, b sẽn zoet sɩbgrã yĩnga. La a Zeova pa maand ne tõnd wa roagdbã sẽn maand ne b kambã ye. A kɩsa sɩd tɩ d na n tũu a saglsã n bãng n yãk yam. D sã n maand woto, d noogda a sũuri.—Yɩɩn. 147:11; Yel. 23:15, 26; 27:11.
BÕE LA D TÕE N MAAN N BÃNG A ZEOVA SẼN GET YƐLÃ TO-TO?
10. Bõe la d tõe n maan n bãng a Zeova sẽn get yɛlã to-to?
10 D sã n wa karemd Biiblã, yɩta sõma tɩ d gũusd n get bũmb sã n bee d sẽn karemd zĩig ningã n tõe n sõng-d tɩ d bãng a Zeova sẽn get yɛlã to-to wã n paase. D leb n tõe n tagsa bũmb ning sẽn kɩt t’a Zeova kõ noy kẽerã zugu. D sã n wʋmd rẽ võor n paasdẽ, d bãngda a Zeova n paasdẽ. D sã n wa zãmsd Biiblã, yɩta sõma tɩ d pʋʋs a Zeova n kos t’a sõng-d tɩ d wʋm a sẽn get yɛlã to-to wã võore. Sẽn paase, d segd n bʋgsda bũmb ning d sẽn karemdã zug neere. (Yel. 2:10-12) D tõe n soka d meng yaa: ‘Bõe yĩng t’a Zeova kõ no-kãnga? A Zeova sã n kisa manesem-kãngã, wilgdame tɩ bõe me la a kis-yã? Biiblã kiba-kãngã wilgda maam bõe, la wãn to la m tõe n tũ rẽ?’ D sã n wʋm bũmb ning sẽn kɩt t’a Zeova kõ noor ning võore, la d bãng yam ning d sẽn tõe n dɩk Biiblã kibar ning pʋgẽ, d bãngd n yãka yam sẽn noogd a Zeova sũuri.
11. A Zeezi sẽn wa n sõsd ne nebã tãngã zugã, wãn to la a wilg d sẽn tõe n maan to-to n bãng a Zeova sẽn get yɛlã to-to wã? (Ges-y fotã me.)
11 A Zeezi sẽn wa n sõsd ne nebã tãngã zugã, a wilga d sẽn tõe n maan to-to n bãng a Zeova sẽn get yɛlã to-to wã. D na n goma makr a tãab sẽn wilgd rẽ yelle. D na n yãame t’a Zeezi rengd n wilga noorã sẽn yaa a soaba, tɩ rẽ poor t’a wilg bũmb ning sẽn kɩt t’a Zeova kõ no-kãngã. D sã n bʋgs a Zeezi sẽn yeel bũmb ningã zugu, d na n bãnga rẽ sẽn tõe n sõng-d to-to tɩ d bãng n yãk yam rũndã-rũndã.
A Zeezi sẽn wa n sõsd ne nebã tãngã zugã, a wilga Wẽnnaam noyã sẽn tõe n sõng tõnd to-to tɩ d bãng a Zeova sẽn get yɛlã to-to (Ges-y sull 11)
12. Matiye 5:21, 22 goamã sõngda tõnd tɩ d bãng bõe, a Zeova sẽn get yɛlã to-to wã wɛɛngẽ? (Ges-y fotã me.)
12 Karm-y Matiye 5:21, 22. “Fo pa segd n kʋ ye.” No-kãngã sõngda tõnd tɩ d bãng bõe, a Zeova sẽn get yɛlã to-to wã wɛɛngẽ? Wilgdame t’a Zeova pa rat tɩ d kisg d to ye. A pa rat tɩ d yeel gomd wall d maan bũmb sẽn na n sãam d to sũur ye. A pa rat tɩ d tags bũmb a woto yell meng ye. A Zeezi wilgame tɩ baa ned sã n pa kʋ a to, a sũur sã n yik ne-a n pa sigda, wall a sã n gom-a wẽnga, a kɩɩsa no-kãngã tɩ pa noom a Zeova ye. Bõe yĩnga? Bala yaa tagsa la manesem a woto n mi n kɩt tɩ ned kʋ a to.—1 Zã 3:15.
13. Wãn to la d tõe n tũ Matiye 5:21, 22 goamã rũndã-rũndã? (Ges-y fotã me.)
13 Wãn to la d tõe n tũ Matiye 5:21, 22 goamã rũndã-rũndã? D segd n modgame tɩ d sũur da wa yik ne ned n pa sigda, wall d tug beem ne a soabã ye. (Maan. 19:18; Zoob 36:13) Bõe yĩnga? Bala tõe n wa kɩtame tɩ d kisg a soabã, tɩ kɩt tɩ d gom goam wall d maan bũmb sẽn sãamd sũuri. (Yel. 10:12) Wala makre, d sũur sã n yik ne ned n pa sigda d tõe n wa wɩta a soabã, wall d kãn-a n sãam a yʋʋre. (Yel. 20:19; 25:23) A Zeezi sẽn wa n na n yeel tɩ d pa segd n kisg d to wã, rẽ tɩ ẽntɛrnete, portaabl la ordinatɛɛr kae ye. La a goamã wilgdame tɩ d pa segd n tũnug ne bõn-kãens n sãam d to yʋʋr ye. D pa rat n maan bũmb sẽn na n wa kɩt tɩ neb a taabã pa le waoogd neda, wa d sẽn pa na n sak n kʋ-a wã.
(Ges-y sull 12-13)
14. Matiye 5:27, 28 goamã sõngda tõnd tɩ d bãng bõe, a Zeova sẽn get yɛlã to-to wã wɛɛngẽ? (Ges-y fotã me.)
14 Karm-y Matiye 5:27, 28. “Fo pa segd n yo ye.” No-kãngã sõngda tõnd tɩ d bãng bõe, a Zeova sẽn get yɛlã to-to wã wɛɛngẽ? Wilgdame t’a Zeova pa kis yoob bal ye. Ned sã n tar tagsa sẽn tõe n wa kɩt t’a yo me, pa noom-a ye. A Zeezi wilgame tɩ rao sẽn kẽ kãadem sã n ges pag a to hal t’a yam wa kẽ-a, a maana yel-wẽnde. Rẽnd ned sã n tar tagsa sẽn tõe n wa kɩt t’a yo, a segd n yɩɩ tao-tao n yiis tags-kãens a yamẽ wã, baa sã n yaa toog ne-a. (Mat. 5:29, 30) Kiris-neb nins sẽn nan pa kẽ kãadmã me segd n maana woto.
15. Wãn to la d tõe n tũ Matiye 5:27, 28 goamã rũndã-rũndã? (Ges-y fotã me.)
15 Wãn to la d tõe n tũ Matiye 5:27, 28 goamã rũndã-rũndã? D pa segd n bas tɩ yoob tʋlsem paam pãng d sũurẽ wã ye. (2 Sãm. 11:2-4; Zoob 31:1-3) Rẽnd kiris-ned tẽeb sẽn bɩ pa na n sak n ges yoob yɛl ye. A pa na n tagsdẽ tɩ baa a sã n get yoob yɛla, a sã n tõog n pa yo yaa sõma ye. Dũniyã neb kẽer tagsdame tɩ yoob yɛl kẽer gesg pa wẽng ye. La tõnd pa woto ye. A Zeezi wakatẽ wã tɩ portaable, tablɛte, ordinatɛɛre, filim la fot kae ye. Baa ne rẽ, a sẽn zãms nebã bũmb ninsã tõe n sõng-d lame tɩ d bãng a Zeova tagsg sẽn yaa a soab ne fot-rãmba, video-rãmb la filim-dãmb nins b sẽn ningd bõn-kãens pʋsẽ wã. Sõngda tõnd tɩ d bãng tɩ d sã n tool ned fot-rãmba, video-rãmb wall mesaaz-rãmb sẽn naag ne yoob yɛla, pa rẽ bɩ d bool ned ne telefõn n gom gom-dẽgdo, pa noom a Zeova ye. Ned sẽn kẽ kãadem sã n tũ a Zeezi sẽn zãms nebã bũmb ningã, na n sõng-a lame t’a kell n maan sɩd ne a pagã wall a sɩdã. (Mal. 2:15) A Zeezi goamã leb n tõe n sõnga sẽn kẽ-b kãadmã ne sẽn pa kẽ-b kãadmã fãa tɩ b ra wa maan bũmb sẽn tõe n wa kɩt tɩ b yo ye.—Yel. 5:3-14.
(Ges-y sull 14-15)
16. Matiye 5:43, 44 goamã sõngda tõnd tɩ d bãng bõe, a Zeova sẽn get yɛlã to-to wã wɛɛngẽ? (Ges-y fotã me.)
16 Karm-y Matiye 5:43, 44. “Fo segd n nonga f to.” No-kãngã sõngda tõnd tɩ d bãng bõe, a Zeova sẽn get yɛlã to-to wã wɛɛngẽ? Wilgdame t’a Zeova ratame tɩ d nong nebã fãa. Bʋko, a Zeezi wakatẽ wã tɩ Zʋɩf-rãmbã ra tudgame, n tẽed tɩ no-kãng wilgdame tɩ b segd n nonga b Zʋɩf-taasã, la tɩ b tõe n kisga b bɛɛbã. La a Zeezi ra miime tɩ pa woto la a Zeova get yɛlã ye. A ra miime tɩ d Ba sẽn be saasẽ wã sẽn yaa nonglmã ratame tɩ d nong nebã fãa, n pa get b yĩngã kõbg wall b sẽn yaa buud ning neb ye.—Mat. 5:45-48.
17. Wãn to la d tõe n tũ Matiye 5:43, 44 goamã rũndã-rũndã? (Ges-y fotã me.)
17 Wãn to la d tõe n tũ Matiye 5:43, 44 goamã rũndã-rũndã? D nonga nebã fãa. Rẽ n so tɩ d pa na n kẽes d toog dũniyã zabã wall a no-koɛɛmã pʋsẽ ye. (Eza. 2:4; Mis. 4:3) D leb n maanda nebã fãa neer n pa get b sẽn yit tẽng ninga, b yĩngã kõbg wall b sẽn yaa tũudum ning neb ye. (Tʋʋ. 10:34, 35) Sẽn paase, d kõta neb nins sẽn beeg tõnd wall sẽn beeg neb nins d sẽn nongã sugri.—Mat. 18:21, 22; Mark 11:25; Luk 17:3, 4.
(Ges-y sull 16-17)
KET-Y N TŨUD-Y BŨMB NINS Y SẼN BÃNGD BIIBLÃ PƲGẼ WÃ
18. a) Bõe la d rat n maan ne d sũur fãa? b) Bõe yell la d na n gom sõsg ning sẽn pʋgdã pʋgẽ?
18 A Zeova sẽn pa kõ tõnd noy bũmb fãa wɛɛngẽ wã pa noom-d sɩda? A ratame tɩ d sã n wa na n yãk yam fãa bɩ d tik bũmb ning d sẽn bãng Biiblã pʋgẽ wã. (1 Kor. 14:20) Rẽ n so tɩ d sã n wa na n yãk yam fãa bɩ d na n deng n “bao n bãng a Zeova raabã sẽn yaa a soaba.” (Efɛɛ. 5:17) D ratame tɩ d yam-yãkr fãa zems ne a Zeova raabã d sẽn nong-a wã yĩnga, pa d sẽn yɛɛsd t’a na wa n sɩbg-d yĩng ye. Bũmb a to me la a Zeova kõ tõnd tɩ tõe n sõng-d tɩ d bãng n yãk yam. Yaa d sũur-kasetã. Yaa rẽ yell la d na n gom sõsg ning sẽn pʋgdã pʋgẽ.
YƖƖLL 95 Vẽenemã paasdame
a Bũmb wʋsg wɛɛngẽ, a Zeova pa kõ tõnd noy takɩ ye. Sã n wa yaa woto, d segd n tagsa Biiblã vɛrse-rãmb toor-toor zugu, n tik yam ning d sẽn dɩk b pʋsẽ wã n yãk yam. A Zeova kõo tõnd tõog tɩ d tõe n tags n bãng n yãk yam sẽn noom-a, sẽn na n kɩt t’a ning-d barka. Pipi kiris-nebã wakatẽ, yaa woto la Zʋɩf-rãmb wʋsg ra segd n maan masã. Nand tɩ b lebg kiris-nebã, b ra tũuda noy wʋsg b tũudmã taoor dãmb sẽn lugli.