“Sɩdã Wẽnnaam” pidsda a pʋlemsã fãa

1. Sã n yaa ne Yɩɩn-sõamyã 31:2-5, bõe yĩng tɩ d tõe n kɩs a Zeova sɩda?

RŨNDÃ-RŨNDÃ, dũniyã bee a Sʋɩtãan nugẽ. Ziri-n-beedã la zãmbã yaa wʋsgo. Mi n yaa toog tɩ d bãng ned ning d sẽn tõe n kɩs sɩda. Wala makre lɛɛbdb wʋsg zãmbda taaba. B wae n yagda ziri teed nins b sẽn koosdã wɛɛngẽ sẽn na yɩl tɩ nebã ra. Neb kẽer getame meng tɩ b pa tõe n kɩs b zo-rãmbã sɩd ye. La d tõe n kɩsa a Zeova sẽn yaa d Wẽnnaamã sɩda. A yaa “sɩdã Wẽnnaam.” (Karm-y Yɩɩn-sõamyã 31:2-5.) A Zeova zɩ n yag ziri ye. A sẽn yeel fãa yaa sɩda. D tõe n kɩsa sɩd t’a na n pidsa a pʋlemsã fãa.

2. Bõe yell la d na n gom sõs-kãngã pʋgẽ?

² Sõs-kãngã pʋgẽ, d na n deng n goma bũmb kẽer sẽn kɩt tɩ d tõe n kɩs a Zeova sɩd ne d sũur fãa wã yelle. Rẽ poore, d na n yãa sɩdã Wẽnnaamã sẽn na n kɩt t’a Sʋɩtãan dũniyã sa to-to, la a sẽn maand bũmb nins rũndã-rũndã sẽn na yɩl t’a raabã pidsi. Sõs-kãngã na n sõng-d lame tɩ d tall raoodo, n gom a Zeova yell ne yẽesem.

D SẼN TÕE N KƖS SƖDÃ WẼNNAAMÃ SƖDÃ VÕORE

3. Bõe yĩng tɩ d tõe n kɩs a Zeova sɩd ne d sũur fãa?

³ D tõe n kɩs a Zeova sɩda, bala yẽ n yaa Naandã. Yẽ n naan saasã la tẽngã ne bõn-naandsã fãa. (Sɩng. 1:1; Yɩɩn. 36:9; Vẽn. 4:11) Leb n yaa yẽ n naan bũmb nins fãa sẽn yaa tɩlɛ ne vɩɩmã. Wala makre, pemsmã d sẽn vʋʋsdã, la koomã d sẽn yũudã. A tõe n kɩtame tɩ ãndũniyã bũmb fãa sak a raabã. A Zeova sẽn naan tõndo, n mi bũmb fãa t’a pãngã me ka tar koakã yĩngã, d tõe n basa d yam n tũ sor ning a sẽn wilgd tõndã, n kɩs sɩd t’a na n kɩtame tɩ d beoog yɩ neere.

4. Bõe n kɩt tɩ d miẽ t’a Zeova nonga tõndo?

⁴ D tõe n kɩsa a Zeova sɩda, bala a nonga tõndo. A naana ninsaalbã, a sẽn dat tɩ bãmb me vɩɩmd ne sũ-noog wa yẽ wã yĩnga. A Zeova sẽn wa n na n naan ninsaalã, a wilgame t’a raabã yaa woto n yeel yaa: “Bɩ d maan ninsaal n wõneg d mense, t’a yɩ wa tõndo.” (Sɩng. 1:26) A kõo tõnd sor tɩ d tõe n yãk d toorẽ yam. A naana tẽngã t’a yaa neere, n dɩk-a n kõ ninsaalbã. (Yɩɩn. 115:16) Sẽn paase, a kõo d yaab a Ãdem ne a Awa tʋʋmd sẽn be yamleoogo, n yeel tɩ b kɩt tɩ tẽngã tõr lebg arzãnã. (Sɩng. 1:28; 2:15) A kõ-b-la bõn-sõma nins fãa sẽn be tẽngã zugã tɩ b sooge. Woto fãa wilgdame t’a “Zeova maan-neerã yaa wakat fãa yĩnga.”—Yɩɩn. 103:17.

5. a) A Ãdem ne a Awa sẽn kɩɩs a Zeova wã poore, bõe la a maan-yã? b) A Zeova pʋlem-bʋs n zoe n pidsi? (Ges-y zĩ-gũbrã: “Wẽnnaam pidsda a pʋlemsã fãa.”)

⁵ D tõe n kɩsa a Zeova sɩda, bala a pidsda a pʋlemsã fãa. A Zeova pa naan tẽngã “zaalem yĩng” ye. ‘A maan-a-la sẽn na yɩl tɩ neb zĩnd a zugu.’ (Eza. 45:18, 19) A Ãdem ne a Awa sẽn wa n kɩɩs Wẽnnaamã, b ra segda ne kũum. Rẽnd ra wõnda Wẽnnaam daabã pa na n pids ye. La baa fʋɩ pa tõe t’a Zeova pʋleng pa pids ye. (Eza. 46:10, 11) A sẽn dat tɩ tẽngã pid ne nin-tɩrsã pa toeem ye. Rẽ n so t’a bas a Ãdem ne a Awa tɩ b rog kamba. Sẽn paase, a tʋma a Bi-ribl-yendã t’a wa ki tɩ yɩ maoongo, n pak sor tɩ d tõe n wa paam n vɩɩmd wakat sẽn kõn sa.—Zã 3:16.

SƖDÃ WẼNNAAM SẼN MAAND BŨMB NINS SẼN NA YƖL T’A RAABÃ PIDSI

6. A Ãdem ne a Awa kɩɩsgã poore, bõe la a Zeova yeel-yã?

⁶ “Yaa wag-kʋdrã b sẽn boond tɩ Munaafɩɩk la Sʋɩtãanã” n kɩt t’a Ãdem ne a Awa kɩɩs a Zeova.a (Vẽn. 12:9; Sɩng. 3:4, 5; Zã 8:44) A Sʋɩtãan sẽn maan bũmb ningã kɩtame t’a Zeova yeel t’a na n wa sãam-a lame. (Sɩng. 3:15) La nand t’a Sʋɩtãan sãoongã wakat ta, neb wʋsg n na n pʋg-a n tʋm tʋʋm-beed wa yẽ. La neb kẽer n na n kell n maan sɩd ne a Zeova.

7. Ãnd dãmb n pʋg a Sʋɩtãanã, la b baasgã na n yɩɩ wãna?

⁷ Sẽn pʋg-b a Sʋɩtãanã yaa malɛgs sẽn kɩɩs a Zeova, la ninsaalb sẽn pa rat n sak a Zeova raabã. B sẽn kɩɩsd a Zeova raabã kɩtame tɩ b lebg a Sʋɩtãan poorẽ dãmba. La wakat ning a Zeova sẽn yãkã sã n ta, a na n sãama a Sʋɩtãan ne a poorẽ dãmbã fãa.—Dãn. 2:44; Rom. 16:20.

8. Bõe la a Zeezi maan yʋʋmd 1914? (Ges-y fot-rãmbã me.)

⁸ Bõe n kɩt tɩ d kɩs sɩd tɩ Wẽnnaam sẽn pʋlem t’a na n sãama a Sʋɩtãan ne a poorẽ dãmbã na n pidsame? Yʋʋmd 1914 tɛka, a Zeezi sɩnga naam dɩɩb saasẽ. Rẽ poore, a yika zabr ne a Sʋɩtãan la a zĩn-dãmbã, n dig-b tɩ b sig tẽngã zugu. (Vẽn. 12:7-9) Yaa sɩd tɩ zabrã yɩɩ saasẽ, la neb nins sẽn be tẽngã zugã yãa bũmb ning zab-kãng sẽn wa ne wã. Biiblã yeelame yaa: “Toog bee tẽngã la mogrã zugu, bala Sʋɩtãanã sig n waa yãmb nengẽ, t’a sũ-puugrã yaa kãsenga, a sẽn mi t’a wakatã keta bilfã yĩnga.” (Vẽn. 12:12) Yʋʋmd 1914 tɛka, a Sʋɩtãan maanda a sẽn tõe fãa sẽn na yɩl n belg nebã tɩ b maan a raabã. Rẽ kɩtame tɩ dũniyã yɛl tar zẽnebo. La ka la bilfu, a Zeezi “na n baasa a tõogrã.” A na n balga a Sʋɩtãan yʋʋm tusr yĩnga, la a sãam neb nins fãa sẽn be a poorẽ wã. (Vẽn. 6:2) A Zeezi na n kɩtame tɩ nebã fãa bãng t’a Sʋɩtãan yaa pʋ-yagda, t’a Zeova yʋʋrã paam waoogre. (Yɩɩn. 45:4-6) Nebã fãa na n bãngame t’a Zeova la sɩdã Wẽnnaam.—Eze. 38:23.

Dũni gill pipi zabrã: U.S. National Archives photo; bom: USAF photo; neb sẽn ning no-lima: blvdone/stock.adobe.com; tẽn-dãmbgo: inhauscreative/E+ via Getty Images

SƖDÃ WẼNNAAM TIGIMDA NEB NINS FÃA SẼN NONG SƖDÃ

9. Ãnda rãmb la a Zeova tigimd rũndã-rũndã?

⁹ A Zeova tigimda “bũmb nins fãa sẽn be saasẽ, la bũmb nins fãa sẽn be tẽngã zugã Kiristã pʋgẽ.” (Efɛɛ. 1:10) ‘Bũmb nins sẽn be saasẽ’ wã makda kiris-neb nins sẽn paam vʋʋsem sõng zaeebã, a Zeova sẽn yãk b rãmb tɩ b na n tɩ rɩ naam ne Kiristã saasẽ wã. ‘Bũmb nins sẽn be tẽngã zugã’ makda neb nins sẽn na n wa vɩɩmd tẽngã zug wakat fãa yĩngã. B fãa moonda koɛɛgã ne yẽesem n pukd a Sʋɩtãan bãongo, la b sõngd pʋ-peelem dãmbã tɩ b bãngd sɩdã.

10. Bõe la a Zeova maand n sõngd nebã tɩ b bãngd sɩdã? (Vẽnegre 14:6, 7)

¹⁰ Sẽn na yɩl n tigim neb nins sẽn nong sɩdã, a Zeova kɩtame t’a nin-buiidã moond koɛɛgã dũniyã gill zugu, n gomd a yelle. Koɛɛgã mooneg zɩ n tall pãng wa a sẽn yaa to-to rũndã-rũndã wã ye. (Karm-y Vẽnegr 14:6, 7.) Yaa sɩd t’a Zeova kɩtame tɩ ninsaalb moond koe-noogã, la malɛgsã sõngd-b lame tɩ b yãt pʋ-peelem dãmbã. Koɛɛgã mooneg sõngda nebã tɩ b bãngdẽ t’a Sʋɩtãan tũnugda ne ziri tũudum toor-toorã n yelgd ziri Wẽnnaam zugu. (Vẽn. 18:2, 4) Ka la bilfu, a Zeova na n sãama ziri tũudum toor-toorã fãa. Woto, neb nins fãa sẽn nong sɩdã Wẽnnaamã na n kõ-a-la ziir ning a sẽn segd ne wã.—Vẽn. 17:16.

11. D maanda wãn n bãng wẽn-tũudb hakɩɩkã n bake?

¹¹ Dũniyã gill zugu, a Zeova takda neb buud toor-toor tɩ b wat a nin-buiidã sʋka. (Vẽn. 7:9, 10) B sã n wʋm “koe-noogã” b bãngdame tɩ yaa sɩda, n yãk yam n wa naag a Zeova nin-buiidã. (Mark 13:10) Rũndã-rũndã, lebga nana tɩ d bãng neb nins sẽn tũud a Zeova tɩ tat a yamã n bake. No-rɛɛs a Malaki pĩnd n togsame yaa: “Yãmb na n le yãa welgr ning sẽn be nin-tɩrg ne nin-wẽng sʋka, welgr ning sẽn be ned sẽn tũud Wẽnnaam, ne ned sẽn pa tũud-a sʋka.” (Mal. 3:18) A Zeova Kaset rãmbã manesem-sõngã la b sẽn moond koɛɛgã wilgdame tɩ bãmb n yaa wẽn-tũudb hakɩɩkã.

12. Wãn to la koɛɛgã mooneg sõngd n pidsd a Zeova raabã?

¹² D sã n moond ‘Rĩungã koe-noogã,’ d sakda noor a Zeezi sẽn kõ, la d sõngd n pidsd bãngr-gomde. (Mat. 24:14; 28:18-20) Ne koe-moonegã maasem, neb n lebgd Kiristã karen-biis dũniyã ween-vɩɩs a naasã fãa, n saagd n na n tũ sɩdã Wẽnnaam wakat sẽn kõn sa yĩnga. D sẽn paam n sõngdẽ t’a Zeova raabã pidsdẽ wã pa zu-zẽkr sɩda?

D BAS D YAM TƖ BEOOG NA N YƖƖ NEERE

13. Ãnda rãmb la a Sʋɩtãan zabd ne n tɩ yɩɩda, la bõe yĩnga?

¹³ A Sʋɩtãan sũurã puuda wʋsgo, bala a miime tɩ wakat ning b sẽn na n sãam a dũniyã ta n saame. (Vẽn. 12:12, 13) Yaa neb nins a Zeova sẽn yãk tɩ b na n tɩ rɩ naam a Rĩungã pʋgẽ wã la a zabd ne n tɩ yɩɩda. Bãmb n “yaa neb nins sẽn sakd Wẽnnaam noyã, la sẽn tar tʋʋmd sẽn yaa kõ kaset a Zeezi wɛɛngẽ wã.” (Vẽn. 12:17; 14:12) Sẽn paase a zabda ne neb nins fãa sẽn teend-bã.

14. A Sʋɩtãan sã n wa yik n dat n menes a Zeova nin-buiidã, bõe n na n maane? (Ges-y fotã me.)

¹⁴ Babilon-kãsengã sãoong poore, a Sʋɩtãan poorẽ dãmbã na n yik n dat n menesa a Zeova nin-buiidã. Rẽ n na n yɩ sabab tɩ Armagedõ zabrã sɩnge. (Vẽn. 16:13, 14, 16) A Zeezi ne saasẽ tãb-biisã na n fãaga a Zeova nin-buiidã, la b sãam a Sʋɩtãan dũniyã babs nins sẽn ketã fãa. (Vẽn. 19:19-21) Zirẽ-be-nebã, nin-wẽnsã la zãmb dãmbã pa na n le beẽ ye. (Vẽn. 21:8) Nebã fãa na n bãngame t’a Zeova maanda sẽn yaa tɩrga, la t’a togsda sɩd wakat fãa.

15. Bõe yĩng tɩ d tõe n bas d yam tɩ beoog na n yɩɩ neere? (Ezayi 65:16, 17) (Ges-y fotã me.)

¹⁵ Rũndã-rũndã, nebã zabda taab la b nong n yagd ziri n yɩɩd pĩndã. La ne a Zeova sõngre, a nin-buiidã zemsda taaba. A ket n takda neb nins fãa sẽn nong sɩdã tɩ b wat a nin-buiidã sʋka. Baa fʋɩ pa tõe n gɩdg a Zeova t’a pa ning a nin-buiidã bark wall n kɩt tɩ b bas tʋʋmd ning b sẽn tʋmdã ye. (Karm-y Ezayi 65:16, 17.) D tõe n basa d yam tɩ beoog na n yɩɩ neere. Tẽn-tʋmd a Poll sẽn yeel bũmb ning Rom dãmb 8:38, 39 pʋgẽ wã n kɩt tɩ d yet woto. Be, a yeelame yaa: “Kũum, vɩɩm, malɛgse, pãn-soaadba, bũmb sẽn be, bũmb sẽn wate, pãens rãmba, zãntlem, zulum, bɩ bõn-naandg a to pa na n tõog n welg tõnd ne Wẽnnaam nonglmã sẽn be tõnd Zu-soab a Kirist Zeezi pʋgẽ wã ye.”

16. Bõe yĩng tɩ y kɩs a Zeova sɩd ne y sũur fãa?

¹⁶ Bũmb wʋsg n kɩt tɩ d tõe n kɩs a Zeova sẽn yaa sɩdã Wẽnnaamã sɩda. Yẽ n yaa d Naandã. A nonga tõnd wʋsgo. Sẽn paase, a takda buud toɛy-toɛy neb tɩ b wat n naagd a nin-buiidã, tɩ kʋʋn-kãsengã neb tar paasgo. (Eza. 60:22; Zaka. 8:23) D miime t’a pidsda a pʋlemsã fãa, la tɩ ka la bilfu a na n sãama a Sʋɩtãanã, tɩ nebã paam b mens ne a ziri wã. Tõnd me rat n dɩka a Davɩɩd togs-n-taar n pʋʋs a Zeova n yeel yaa: “Bɩ Wẽnnaam a Zeova . . . paam pẽgre. Yaa yẽ a ye bal n maand bõn-kãsemse. Bɩ a yʋʋrã sẽn tar ziirã paam pẽgr wakat fãa yĩnga. Bɩ a ziirã pid dũniyã gilli.”—Yɩɩn. 72:18, 19.