Dũniyã gill zugu, a Zeova Kaset rãmbã sõor yaa a wãna?

Y maanda wãn n bãng a Zeova Kaset rãmbã sõore?

Yaa neb nins fãa sẽn moond Wẽnnaam Rĩungã koe-noogã la d sõta. (Matiye 24:14) Rat n yeel tɩ neb nins sẽn deeg lisgã, la neb nins b sẽn yeel tɩ b tõe n moona koɛɛgã n nan pa reeg lisgã.

Ned segd n kõo a Zeova Kaset rãmbã ligd n paam n naag-b bɩ?

Ayo. Pa ned sẽn na n kõ ligd n kɩtd t’a lebg a Zeova Kaset soaba, bɩ n paam tʋʋmd d tũudmã pʋgẽ ye. (Tʋʋma 8:18-20) Sɩd me, nebã kõta kũun ne yamleoogo, n pa maand tɩ b taabã bãng tɩ b kõo kũun ye. A Zeova Kaset soab fãa kẽesda a sẽkã, a pãngã la a tarmã koɛɛgã mooneg pʋgẽ ne yamleoogo, tɩ zems ne a yɛlã sẽn yaa to-to.​—2 Korẽnt rãmbã 9:7.

Y maanda wãn n bãng neb nins sẽn moond koɛɛgã sõore?

Kiuug fãa, koe-moondbã kõta b rapoor-dãmbã b tigingã pʋgẽ. B maanda rẽ ne yamleoogo.

Rẽ poore, b toonda koe-moondbã rapoor-dãmb Betɛllẽ wã, tɩ bãmb tool-b d biru-kãsengẽ wã.

D tʋʋmdã yʋʋmd fãa baasgẽ,a d wilgda a Zeova Kaset rãmbã sõor tẽng fãa pʋgẽ. Rẽ poore, d naagda rapoor-dãmbã taab tɩ rẽ sõngd tõnd tɩ d bãngd a Zeova Kaset rãmbã sõor dũniyã gill zugu. Y sã n kẽ tõnd sɩtã pʋgẽ, n ges zĩig ning b sẽn gʋls tɩ “Dũniyã gill zugu,” y na n yãnda tẽng fãa rapoore. D sẽn ne tʋʋmd ning d sẽn tʋmd yʋʋmd fãa wã kengda d raoodo, wa sẽn yɩ to-to ne pipi kiris-nebã.​—Tʋʋma 2:41; 4:4; 15:3.

Yãmb sõta neb nins sẽn wat yãmb tigissã n yaool n pa moond koɛɛgã n naag a Zeova Kaset rãmbã bɩ?

Yaa sɩd tɩ d pa sõt nin-kãensã naagd a Zeova Kaset rãmbã ye. La d reegd-b-la sõma d tigimsã pʋsẽ. B wʋsg wata a Zeezi kũumã Tẽegr d sẽn maand yʋʋmd fãa wã. Dẽnd d rɩkda neb nins fãa sẽn wa Tẽegrã sõor n yãk a Zeova Kaset rãmbã sõore, sẽn na yɩl n bãng nin-kãens sõore. Wala makr yʋʋmd 2025, neb nins sẽn wa a Zeezi kũumã Tẽegrã yɩɩ neb 20 635 015.

Neb wʋsg n pa wat tõnd tigissã. Baa ne rẽ, b paamdame tɩ d zãmsd-b Biiblã zaalem. Yʋʋmd 2025 pʋgẽ, kiuug fãa d sẽn zãms neb nins Biiblã sõor zemsa neb 7 603 182. Bãmb kẽer yaa neb wʋsg sẽn naag taab n zãmsd Biiblã.

Goosneema wã sẽn kõt a Zeova Kaset rãmbã sõorã yɩɩda sõor ning sẽn be yãmb rapoor-dãmbã pʋ̃sẽ. Bõe yĩng tɩ yaa woto?

Goosneema wã biru ning sẽn get nebã sõdb yellã sokda nebã n na n bãng tũudum ning pʋgẽ b sẽn be wã. B maanda woto sẽn na yɩl n bãng tũudum fãa neb sõore. Etazĩni biru ning sẽn get nebã sõdb yellã wilgame tɩ b gũus n gesame tɩ b sẽn maand woto wã, pa sõngd-b tɩ b bãng tũudum fãa neb sõor takɩ ye. La pa woto la d maand ye. Yaa neb nins sẽn moond koɛɛgã la b kõt b rapoor-dãmbã bal la d sõta.