KAREMDBÃ SOGSGO

Galat-rãmb 4:24 pʋgẽ, tẽn-tʋmd a Poll goma kaool a yiib yelle. Bãmb la bʋse?

Tẽn-tʋmd a Poll goma a Abrahaam pagb a Saara ne a Agaar yelle, n yeel yaa: “Bõn-kãens tara võor a to. Bala pʋg-kãensã makda kaool a yiibu.” (Gal. 4:22-24) Pĩndã, d ra yetame tɩ kaool a yiibã yaa Tõogã kaoolã ne kaool-paalgã. La d sẽn maag d yĩng n zãms vɛrse-kãens poore, d yãame tɩ d segd n toeema d sẽn wʋmd b võor to-to wã. D tõe n yeelame t’a Poll ra pa gomd kaool-paalgã yell ye. Yaa kaool ning Wẽnnaam sẽn maan ne a Abrahaamã yell la a ra gomda. Ad bũmb a wãn sẽn kɩt tɩ d yet woto.a

A Poll yeelame t’a Agaar makda Sinayi tãngã. (Gal. 4:25) A Agaar makda Tõogã kaoolã b sẽn maan Sinayi tãngẽ wã yʋʋmd 1513 sẽn deng a Zeezi rogmã. (Yik. 19:5, 6) Zʋɩf-rãmbã fãa ra yaa neb sẽn pa zems zãnga, n da pa tõe n tũ Tõogã kɛpɩ-kɛpɩ ye. Rẽ ra kɩtame tɩ b neẽ tɩ b yaa yel-wẽndã yembse. Kaool-kãng ra tõe n sõnga Israyɛll buudã nebã tɩ b bãng Mesi wã n bake. Bala yaa yẽ bal n tõe n tũ Tõogã tɩ zems kɛpɩ. Mesi wã sẽn wa n ki tɩ yɩ maoongã, a paka sor tɩ ninsaalbã sẽn pa zems zãngã tõe n paam b mens ne yel-wẽndã la kũumã yembdo. (Gal. 3:19, 24, 25) A Zeezi sẽn pids Wẽnnaam daab-kãngã tɛka, pa le yaa tɩlɛ tɩ b tũ Tõogã ye.—Rom. 10:4.

A Poll yeelame t’a Agaar yaa toor ne a Saara “sẽn yaa pag ning sẽn pa yambã,” la sẽn dog biig “pʋleng maasem” yĩngã. (Gal. 4:23) Pʋlen-kãng yaa kaool ning a Zeova sẽn maan ne a Abrahaamã. (Gal. 3:29; 4:28, 30) A Zeova goma kaool-kãng yell Sɩngr 22:18 pʋgẽ, n yeel a Abrahaam yaa: “Fo yagensã maasem yĩnga, dũniyã buud fãa neb na n paama barka, bala fo kelga mam koɛɛgã.”

Kaool-kãng a Zeova sẽn maan ne a Abrahaamã sõngame tɩ d wʋm bũmb ning a sẽn pʋlem Edɛnnã võor n paase. (Sɩng. 3:15) A sõngame tɩ d bãng tɩ ‘yageng’ ning yell a Zeova sẽn gomã na n yii a Abrahaam pendẽ wã. A Poll wilgame tɩ “yagengã” meng-meng yaa a Zeezi Kirist. La neb nins sẽn “yaa Kirist rẽndã,” rat n yeel tɩ neb 144000 sẽn na n naag a Zeezi n dɩ naam a Rĩungã pʋgẽ wã me yaa a Abrahaam yagense. (Gal. 3:16, 29; Vẽn. 14:1-3) Bũmb ning Wẽnnaam sẽn pʋlem a Abrahaamã sã n wa pidsi, neb nins sẽn sak a Zeezi wã na n paama bark wʋsgo.

Bõe yĩng t’a Poll gom pagb a yiibã yelle? Ra yaa sẽn na n wilg tɩ Zʋɩf-rãmbã sã n ket n pẽdgd n dat n tũ Tõogã, b na n kell n yɩɩ yembs wa a Agaare. La b sã n sak a Zeezi Kirist sẽn yaa a Abrahaam yagen-kãsengã, b na n paama lohorem wa a Saara. B na n paama b mens ne yel-wẽndã la kũumã yembdo. (Zã 8:32-34) B sã n pa sak a Zeezi, wilgdame tɩ b pa wʋmd Tõogã kaool bõn-daabã sẽn yaa sõng-b tɩ b bãng Kiristã võor ye.

Galasi kiris-neb nins a Poll sẽn gʋls a lɛtrã n toolã wʋsg ra pa Zʋɩf-rãmb ye. B ra zɩ n tũ Tõogã ye. La kiris-neb nins sẽn da yaa Zʋɩf-rãmbã kẽer da pẽdgdame n dat tɩ bu-zẽmsã neb tũ Tõogã sẽn yetã. Wala makre, b ra yetame tɩ b segd n kẽe bãongo. A Poll yeelame tɩ woto maaneg yaa yalemdo. Bala b zoe n paama “lohorem” b sẽn sak Kiristã yĩnga, n pa segd n bao n lebg Tõogã yembs ye.—Gal. 5:1, 10-14.