Pĩnd wẽndẽ zĩm-gãmba wã sẽn da yaa to-to

Neb nins sẽn karemd Biiblã miime t’a Zeezi karen-biis kẽer da yaa zĩm-yõgdba. (Mark 1:16-20) B ra tara zĩm-gãmba n yõgd zĩm Galile mogrẽ wã.

B ra rɩkda lẽ gĩs wall gĩs a taab n loe ne taab tɩ lebg gãmbre, n tar n yõgd zĩmã. Ned sã n da rat n yõg zĩm-bõonego, a ra baooda zĩm-gãmbr bogd sẽn yaa bõonese. La a sã n da rat n yõg zĩm-bɛda, a ra baooda zĩm-gãmbr bogd sẽn yaa yalemse. B ra wae n maanda zĩm-gãmba-bõonesã gilimsi, n sẽb bũmb toor-toor sẽn zɩs b noyẽ wã, tɩ b sã n lob bɩ bõr tɩ b paam zĩmã n yõge. B ra maanda zĩm-gãmba-bɛdã n ning bũmb toor-toor sẽn zɩs tẽngrã, la b sẽb raad wall bũmb a taab sẽn pa zɩs yĩngrã.

Zĩm-gãmba wã ligd ra yaa toogo. Kugã sẽn be mogrã tẽngrã ra tõe n pãrs-b lame. B sã n da yõg zĩm wʋsg me, zĩm-gãmbrã ra tõe n kẽegame. (Luk 5:6) Biiblã yeelame tɩ daar a ye, a Zeezi yãa a Zak ne a Zã tɩ b “manegd b zĩm-gãmba.” Tõe tɩ b ra tara supĩim la lẽ gĩsg n maand rẽ. (Mat. 4:21) Tõe tɩ zĩm-yõgd sã n da yõg zĩm poor fãa, a segd n manega a zĩm-gãmbrã. A Luk goma zĩm-yõgdb sẽn da “pegd b zĩm-gãmba” yell me. Ra yaa sẽn na n yiis bɛgdã. (Luk 5:2) Rẽ poore, zĩm-yõgdbã yɛdgda zĩm-gãmba wã tɩ b kʋɩ, tɩ tõe tɩ yaa sẽn na yɩl tɩ b ra põog yĩnga.—Eze. 47:10.

A Zeezi boola neb sẽn da mi zĩm-yõgb tɩ b bas la b moond koe-noogã n “yõgd ninsaalba, wa b sẽn yõgd zĩmã.”