D bɩɩs wẽn-zoeer wa a Abdiyaase

A Abdiyaas n da get rĩm-wẽng a Akaab na-yirã yelle. A Akaab ra basame tɩ Israyɛll neb wʋsg pʋʋsd a Baale, tɩ kɩt tɩ soolmã pid ne tʋʋm-wẽnse. La a Abdiyaas ra sɩng n zoeta a Zeova “hal a yãadmẽ.” (1 Rĩm. 18:1-13) Rẽ n so tɩ na-pag a Zezabɛll sẽn wa n kõ noor tɩ b kʋ a Zeova no-rɛɛsdbã fãa wã, a Abdiyaas bãngame t’a segd n talla raoodo, n kogl-ba. No-rɛɛs-yɛng solgr meng ra tõe n waa ne yelle. La a Abdiyaas solga bãmb koabga, n da kõt-b rɩɩb kom-toaag sasa. Mams-y n ges-y sẽn yɩ toog to-to t’a tõog n maan dẽ tɩ ziri no-rɛɛsdb kobsã sẽn da be ne rĩmã la na-pagã pa bãng ye.—1 Rĩm. 18:19.

Yam-bʋg la d tõe n dɩk a Abdiyaas sẽn yɩ wẽn-zoɛtã kibar pʋgẽ? Baa ne a Abdiyaas sẽn da zoet a Akaabã, a wẽn-zoeerã pãng n da yɩɩda. Rẽ kõ-a-la raood t’a gẽneg a yõor n kogl a saam-biisã. Tõnd me segd n bɩɩsa wẽn-zoeere, sẽn yɩɩd fãa b sã n gɩdga tõnd tũudmã zĩig ning d sẽn be wã. Wẽn-zoeer a woto na n kõ-d-la raood tɩ d teel d tẽed-n-taas nins sẽn maood ne zu-loeesã.