Bõe yĩng tɩ ra yaa tɩlɛ t’a Zeezi ki tõnd yĩnga?

1-2. Bõe yĩng tɩ d rat fãagre? (Rom dãmbã 7:22-24) (Ges-y fotã me.)

MAMS-Y wa roog sẽn na n lʋɩɩ, n põd neda. A ket n vɩɩme, la a pa tõe n yi a toor ye. A sẽn tõe bal yaa kelemd n kot sõngre, la a saagdẽ tɩ b na n wa fãag-a lame.

² Tõnd ned kam fãa yaa wa ra-kãnga. Bõe yĩng tɩ d yet woto? A Ãdem sẽn kɩɩs a Naandã poore, a lebga yel-wẽn-maanda. Tõnd sẽn yaa a yagensã yĩnga, tõnd me yaa yel-wẽn-maandba. D pa tõe n yiis d meng yel-wẽndã pʋgẽ, wa rao ning roogã sẽn lʋɩɩ n põdã sẽn pa tõe n yiis a meng a toorã. Lɛtr ning tẽn-tʋmd a Poll sẽn gʋls n tool Rom kiris-nebã pʋgẽ, a yeelame tɩ tõnd fãa yaa yel-wẽndã yembse. (Karm-y Rom dãmb 7:22-24.) A sokame yaa: “Ãnda n na n fãag maam ne yĩn-kãngã sẽn na n wa ne mam kũumã?” A Poll ra pa tõe n yiis a meng yel-wẽndã a sẽn dog ne tɩ na n wa baas ne a kũumã pʋgẽ a toor ye. (Rom. 6:23) Yaa woto ne tõnd me. D fãa rata fãagre.

3. Bõe yĩng tɩ d tõe n yeel t’a Zeezi sẽn ki tɩ yɩ maoongã fãagda tõndo?

³ A Poll sẽn gom yell ning pʋgẽ tõnd sẽn be wã yellã poore, a togsa gomd sẽn wilgd tɩ manegr wate. A Poll sẽn sok tɩ ‘ãnda n na n fãag yẽ ne yĩn-kãngã sẽn na n wa ne a kũumã’ poore, a yeelame yaa: “Bark Wẽnnaam, tõnd Zu-soab a Zeezi Kirist maasem yĩnga!” (Rom. 7:25) Yaa a Zeezi sẽn ki tɩ yɩ maoongã yell la a Poll ra gomda. Maoong-kãng maasem yĩnga, a Zeova tõe n kõo tõnd d yel-wẽnã sugri, d tõe n wa lebga neb sẽn zems zãnga, la d maneg d yell ne a Zeova. D na n goma bõn-kãensã yell sõs-kãngã pʋgẽ. D kɩsa sɩd tɩ rẽ na n kɩtame tɩ d maneg n nong a Zeova sẽn yaa ‘Wẽnnaam ning sẽn sõngd tõnd tɩ d saagd manegrã.’ (Rom. 15:13) Na n kɩtame me tɩ d sũur maneg n yɩ noog ne a Zeezi sẽn yaa soab ning ‘maasem yĩng la tõnd paam tɩ b yao n fãag tõndã.’—Kolo. 1:14.

A ZEEZI MAOONGÃ MAASEM YĨNGA, A ZEOVA KÕTA TÕND D YEL-WẼNÃ SUGRI

4-5. Bõe yĩng t’a Zeezi sẽn ki tɩ yɩ maoongã ra yaa tɩlɛ ne tõnd fãa? (Koɛɛg soaba 7:20)

⁴ D fãa rata maoong sẽn na yɩl n paam d yel-wẽnã sugri. Tõnd fãa maanda yel-wẽn ne d no-goamã la d tʋʋm-tʋmdɩ wã. (Karm-y Koɛɛg soab 7:20.) Yel-wẽn kẽer yaa yel-wẽn-kãsemse. Wala makre, a Moyiiz tõogã pʋgẽ b wilgame tɩ ned sã n yo wall a kʋ neda, b segd n kʋ-a lame. (Maan. 20:10; Sõd. 35:30, 31) La baa yel-wẽn wʋsg sẽn pa maneg n yaa wẽns woto wã, b yaa yel-wẽna. Wala makre, yɩɩn-gʋlsd a Davɩɩd yeelame yaa: “Mam na n gũusa ne m yel-manesmã, n da wa maan yel-wẽnd ne m zɩlemdã ye.” (Yɩɩn. 39:1) Woto wilgdame tɩ d tõe n maana yel-wẽnd ne d no-goamã.—Zak 3:2.

⁵ Tags-y y no-goamã la y tʋʋm-tʋmdɩ wã yelle. Yãmb zoe n togsa ned gomd tɩ y sũur wa sãamd ne y sẽn yeel bũmb ningã bɩ? Y zoe n maana bũmb n wa maand y bãngẽ bɩ? Yaa vẽeneg tɩ y na n leoka sogs-kãensã a yiibã fãa tɩ n-ye. Biiblã yetame: “Tõnd sã n yeel tɩ ‘tõnd pa tar yel-wẽnde,’ d belgda d mense, la sɩdã pa be tõnd pʋsẽ ye.”—1 Zã 1:8.

6-7. Bõe la a Zeova tikd n kõt tõnd d yel-wẽnã sugri? (Ges-y fotã me.)

⁶ A Zeezi sẽn ki tɩ yɩ maoongã maasem yĩnga, a Zeova tõe n kõo tõnd d yel-wẽnã sugri. (Efɛɛ. 1:7) La woto pa rat n yeel t’a Zeova getame tɩ d yel-wẽnã pa maneg n yaa wẽnse, la tɩ d sã n maan yel-wẽnde pa sãamd a sũur ye. A Zeova pa rat tɩ d maan yel-wẽnd ye. (Eza. 59:2) A tɩrlmã yĩnga, yaa tɩlɛ t’a paam bũmb n tik n kõ d yel-wẽnã sugri.

⁷ A Moyiiz tõogã ra wilgame tɩ yaa tɩlɛ tɩ Israyɛll nebã kʋ rũms n maan maand n yaool n paam b yel-wẽnã sugri. (Maan. 4:27-31; 17:11) Maan-kãens ra makda a Zeezi maoongã sẽn yɩɩd rẽ wã, la bark nins maoong-kãng sẽn na n wa ne wã. A kũumã kɩtame t’a Zeova paam bũmb a sẽn tõe n tik n kõ d yel-wẽnã sugri. A Poll ra wʋmda a Zeezi sẽn ki tɩ yɩ maoongã võor sõma. A sẽn yeel Korẽnt kiris-nebã bũmb ningã wilgda rẽ. A reng n sõdga bõn-wẽns nins b sẽn da maan pĩndã, la a yeel-b yaa: “Wẽnnaam peka yãmb tɩ y lebg yɩlma. A kɩtame tɩ y lebg sõamyã, la a yeel tɩ y yaa tɩrs tõnd Zu-soab a Zeezi Kirist yʋʋrã yĩnga, la ne Wẽnnaam vʋʋsem sõngã maasem.”—1 Kor. 6:9-11.

8. A Zeezi kũumã tẽegr sã n wa kolgdẽ, bõe yell la y tõe n tagse?

⁸ A Zeezi kũumã tẽegr sã n wa kolgdẽ bɩ y bao sẽk n bʋgs a Zeova sẽn kõt-y sugrã sẽn nafd-y to-to wã zugu. Wala makre, a Zeezi sẽn ki tɩ yɩ maoongã maasem yĩnga, y pa le ningd y meng taal wʋsg yel-wẽn y sẽn maan n tek yam n kos sugr yĩng ye. Mi n yaa toog tɩ y sak n deeg t’a Zeova sɩd kõ-y-la sugr yel-wẽn y sẽn maan pĩndã yĩng bɩ? Tõe tɩ y tagsa y sũurẽ yaa: ‘Mam miime t’a Zeova tõe n kõ-m-la sugri, la m pa tõe n kõ m meng sugr ye.’ Sã n yaa woto, ad bũmb y sẽn segd n tẽege: A Zeova n yaa soab ning sẽn kõt sugrã. A leb n kõo a Biigã tõog t’a kao bʋʋdo. A Zeova pa kõ yãmb wall ned a to sor t’a yãk neb nins sẽn segd ne a nimbãan-zoeerã ye. Biiblã yeelame: “Tõnd sã n kẽnd vẽenemã pʋgẽ wa [a Zeova] mengã sẽn be vẽenem pʋgẽ wã, . . . a Bi-ribl a Zeezi zɩɩmã pekda tõnd n yiisd yel-wẽnd buud fãa.” (1 Zã 1:6, 7) D tõe n kɩsa sɩd ne gom-kãens wa d sẽn tõe n kɩs sɩd ne Biiblã goam a taabã. A Zeezi sẽn ki tɩ yɩ maoongã kɩtame t’a Zeova tõe n kõ tõnd d yel-wẽnã sugri. Sẽn paase, a Gomdã yeelame t’a ‘kõta sugr wʋsgo.’—Yɩɩn. 86:5.

A ZEEZI MAOONGÃ MAASEM YĨNGA, D TÕE N WA LEBGA NEB SẼN ZEMS ZÃNGÃ

9. Biiblã pʋgẽ b sã n gomd yel-wẽnd yelle, a võorã yaa bõe? (Yɩɩn-sõamyã 51:5 ne notã)

⁹ Biiblã pʋgẽ b sã n gomd “yel-wẽnd” yelle, pa wakat fãa la yaa bõn-wẽng d sẽn maan yell la b gomd ye. Tõe n bilgda yel-wẽndã d sẽn dog ne n yaa neb sẽn pa zems zãngã me. (Karm-y Yɩɩn-sõamyã 51:5 ne notã.) D sẽn dogd n yaa neb sẽn pa zems zãngã pa kɩtd tɩ d yam be wẽng maaneg bal ye. Kɩtame me tɩ d yĩngã pa tʋmd sõma wa a Zeova sẽn da ratã ye. Rẽ n so tɩ d lʋɩt bãase, n kʋʋndẽ la d yaa kiidba. Yaa rẽ yĩng la kom-peels sẽn mi n lʋɩt bãase, tɩ kẽer kiidẽ baa b sẽn pa maan wẽngã. Yaa rẽ yĩng me la nin-wẽnsã ne nin-sõma wã fãa sẽn namsd la b kiidẽ wã. A Ãdem kambã la a yagensã fãa rogda ne yel-wẽndã.

10. A Ãdem ne a Awa sẽn maan yel-wẽndã poore, bõe n maane?

¹⁰ Tẽeg-y yɛlã sẽn yɩɩ to-to a Ãdem ne a Awa sẽn maan yel-wẽndã poorã. Yel-wẽndã kɩtame tɩ b sũyã sãame. A Ãdem ne a Awa sẽn maan yel-wẽndã poor bala, b sũur-kasetã ning-b-la taale, bala b kɩɩsa Wẽnnaam tõogã sẽn da “gʋls b sũyã pʋsẽ” wã. (Rom. 2:15) B yãa zĩig pʋgẽ tɩ b pa le yaa wa pĩndã ye. B tagsame tɩ yaa tɩlɛ tɩ b lud b yĩngã babs kẽere. Sẽn paase, b zoe n solgame sẽn na yɩl tɩ b Naandã ra yã-b ye. (Sɩng. 3:7, 8) Rẽ n yɩ pipi a Ãdem ne a Awa sẽn ning b mens taale, b yam sẽn da pa gãe bãane, yãnd sẽn yõk-b la b sẽn maan yɩɩre. Kell n yɩɩ woto n tãag b kũum.—Sɩng. 3:16-19.

11. Wãn to la d sẽn yaa neb sẽn pa zems zãngã namsd tõndo?

¹¹ D sẽn yaa neb sẽn pa zems zãngã yĩnga, tõnd me mi n ningda d mens taale. Yãnd mi n yõk-d lame, tɩ d mi n maand yɩɩr me. Yaa tõnd sẽn yaa yel-wẽn-maandbã n kɩt tɩ toog la yɩɩr namsd tõndã. Baa d sẽn maood to-to n na welg d zu-loeesã, bũmb wʋsg n be tɩ d pa tõe n toeem ye. Bõe yĩnga? Bala b kẽesa tõnd “faoolem pʋgẽ” wa Biiblã sẽn yeelã. (Rom. 8:20) Yaa woto ne tõnd ned kam fãa yembr-yembre, n leb n yaa woto ne ninsaalbã fãa. Wala makre, neb wʋsg maooda sẽn na yɩl tɩ b ges tẽn-gãongã yell sõma, la sẽn na yɩl tɩ nen-kɛglem tʋʋma, naongã la zabã sa. La baa b sẽn tõog n maan bũmb kẽer rẽ wɛɛngẽ wã, b pa tõog n welg zu-loe-kãens ye. La a Zeezi sẽn ki tɩ yɩ maoongã kɩtame tɩ d saagdẽ tɩ yɛlã na n wa toeemame. Wãn to la na n toeeme?

12. A Zeezi sẽn ki tɩ yɩ maoongã kɩtame tɩ d saagd bõe?

¹² A Zeezi sẽn ki tɩ yɩ maoongã kɩtame tɩ d saagdẽ tɩ “bõn-naandsã na n wa paama b mens ne yel-wẽndã la ne kũumã yembdo.” (Rom. 8:21) Woto rat n yeelame tɩ d sã n wa lebg neb sẽn zems zãng Wẽnnaam dũni-paalgã pʋgẽ a Zeezi sẽn ki tɩ yɩ maoongã maasem yĩnga, d pa na n le lʋɩt bãas bɩ n kẽnd ne sũ-sãams ye. D pa na n le ningd d meng taale, d pa na n tol n le maan yɩɩre, yãnd me pa na n le yõk-d ye. D yam na n gãee bãan wakat fãa. Sẽn paase, d na n tõog n gesa tẽn-gãongã yell sõma la d vɩ ne bãane, bala na n yɩɩ a Zeezi Kirist sẽn yaa “Laafɩ naabã,” la a soab ning sẽn ki n fãag tõndã n dɩt naam.—Eza. 9:6, 7.

13. A Zeezi kũumã tẽegr sã n wa kolgdẽ, bõe me zug la y tõe n bʋgse?

¹³ Tags-y y vɩɩmã sẽn na n yɩ to-to, y sã n wa lebg ned sẽn zems zãngã. Y na n yika yibeoog fãa ne sũ-noogo, n pa yɛɛsd rɩɩb na wa n paoog yãmb wall y ned ye. Y pa na n yɛɛsdẽ me tɩ yãmb wall y ned na lʋɩɩ bãag bɩ n ki ye. La baa masã menga, y sã n “gãd bũmb ning d sẽn saagd n na n wa paamã kãn-kãe . . . wa baar tõnd sɩɩsã yĩnga, sẽn vigl kãn-kãe la sẽn pa vigsdi,” y yam tõe n gãee bãane. (Ebre. 6:18, 19) Y sã n tagsd bũmb nins d sẽn saagd n na n wa paamã yell wakat fãa, tõe n paasa y tẽebã pãnga, la sõng-y tɩ y tõog toog zu-loees sasa. Sɩd me, y tõe n basa y yam t’a Zeova “lebgda neb nins sẽn baood-a ne b sũy fãa wã roanda.” (Ebre. 11:6) Yaa a Zeezi sẽn ki tɩ yɩ maoongã bal n kɩt tɩ y tõe n saag tɩ manegr n wate, tɩ rẽ kõt-y belsg rũndã-rũndã.

A ZEEZI MAOONGÃ MAASEM YĨNGA, D TÕE N MANEGA D YELL NE A ZEOVA

14. A Ãdem ne a Awa kɩɩsgã poore, ninsaalbã yɛl lebga wãn ne b Naandã?

¹⁴ A Ãdem ne a Awa beegrã tɛka, ninsaalbã zãaga b mens ne Wẽnnaam. Biiblã yeelame meng tɩ ninsaalbã lebga b Naandã bɛɛba. (Rom. 8:7, 8; Kolo. 1:21) Bõe yĩnga? Yaa t’a Zeova zemsa zãnga, n pa tõe n maan wa a pa ne yel-wẽndã ye. Biiblã goma a Zeova yell n yeel yaa: “Yãmb ninã yaa yɩlem wʋsg n pa tõe n ges sẽn yaa wẽng ye. Yãmb pa tõe n sĩnd n get wẽng ye.” (Hab. 1:13) Rẽnd yel-wẽndã kɩtame tɩ yaa wa bog-zulung n be ninsaalbã ne Wẽnnaam sʋka. Tõnd ned baa a ye pa tõe n paam a Zeova zoodo, sã n pa b maana põ tõnd ne a Zeova sʋka, tɩ d tõe n pasg bokã n tɩ maneg d yellã ne-a ye. A Zeezi sẽn ki tɩ yɩ maoongã kɩtame tɩ d tõe n maan dẽ.

15. Wãn to la a Zeezi sẽn ki tɩ yɩ maoongã kɩt tɩ ninsaalbã tõe n le paam a Zeova zoodo?

¹⁵ Biiblã yeelame t’a Zeezi “yaa maoong tõnd yel-wẽnã yĩnga, maoong sẽn kɩt tɩ d tõe n maneg d yell ne Wẽnnaam.” (1 Zã 2:2) Gɛrkã gom-biis nins b sẽn lebg tɩ “maoong sẽn kɩt tɩ d tõe n maneg d yell ne Wẽnnaamã” tõe n bilga “bũmb sẽn sigsd sũur” me. Bõe yĩng tɩ d tõe n yeel t’a Zeezi sẽn ki tɩ yɩ maoongã sigsa a Zeova sũuri? Woto pa rat n yeel t’a Zeova sẽn wa n get a Biigã t’a namsdẽ hal n wa ki wã, ra noom-a lame ye. La a Zeezi sẽn ki tɩ yɩ maoongã sigsa a Zeova sũuri, bala zemsa ne noy nins a sẽn gãneg tɩrlmã wɛɛngẽ wã. Rẽ tɛka, a paama bũmb a sẽn tõe n tik n sak tɩ ninsaalbã le yɩ a zo-rãmbã. (Rom. 3:23-26) A pʋd n tõe n yeelame meng tɩ neb nins sẽn tũ-a ne b sũy fãa nand tɩ Kiristã ki wã me yaa tɩrse. (Sɩng. 15:1, 6) Bõe yĩnga? Bala a Zeova ra kɩsa sɩd zãng-zãng t’a Biig a Zeezi na n wa kõo a vɩɩmã tɩ yɩ maoongo. (Eza. 46:10) A Zeezi sẽn ki tɩ yɩ maoongã sɩd paka sor tɩ ninsaalbã tõe n maneg b yell ne Wẽnnaam.

16. A Zeezi kũumã tẽegr sã n wa kolgdẽ, bõe me zug la y tõe n bʋgse? (Ges-y fotã me.)

¹⁶ Tags-y y sẽn paam n lebg Wẽnnaam zoa wã sẽn nafd-y to-to wã yelle. Wala makre, y tõe n boola a Zeova tɩ y “Ba” wa a Zeezi sẽn wilg tõndã. (Mat. 6:9) Y tõe n boola a Zeova tɩ y “Zoa” menga. La d sã n wa boond a Zeova tɩ d “Ba” wall d “Zoa,” d segd n maana rẽ ne waoogr wʋsgo, la ne sik-m-menga. Bõe yĩnga? Yaa tɩ d yaa yel-wẽn-maandba, n pa tõe n kolg a Zeova d toor ye. Yaa a Zeezi sẽn ki tɩ yɩ maoongã maasem yĩng bal la d sẽn tõe n yɩ a Zeova zo-rãmbã. A Zeova tũnuga ne a Zeezi n pak sor tɩ d tõe n “maneg yell ning sẽn da be” tõnd ne yẽ sʋkã, a Zeezi “zɩɩmã a sẽn daag namsg ra-lukã zugã maasem yĩnga.” (Kolo. 1:19, 20) Rẽ n so tɩ d tõe n yɩ a Zeova zo-rãmba, baa ne d sẽn ket n yaa yel-wẽn-maandbã.

A ZEEZI SẼN KI TƖ YƖ MAOONGÃ WILGDAME T’A ZEOVA YAA NIMBÃAN-ZOƐTA

17. Wãn to la a Zeezi sẽn ki tɩ yɩ maoongã wilgd t’a Zeova yaa nimbãan-zoɛta? (Efɛɛz rãmbã 2:4, 5)

¹⁷ A Zeezi sẽn ki tɩ yɩ maoongã wilgdame t’a Zeova ‘nimbãan-zoeerã yaa kãsengã.’ “A kɩtame tɩ tõnd . . . lebg vɩɩse, baa tõnd sẽn da ki d beegrã pʋgẽ wã.” (Karm-y Efɛɛz rãmb 2:4, 5.) Neb nins “sẽn tar yam ning sẽn zems ne vɩɩm sẽn ka sɛtã” zẽkda b koees n kot sõngre, n miẽ tɩ yel-wẽndã b sẽn dog ne wã kɩtame tɩ b yaa wa ned roog sẽn lʋɩ n põde, tɩ yaa tɩlɛ t’a paam tɩ b wa fãag-a. (Tʋʋ. 13:48) A Zeova sõngda nin-kãens tɩ b wʋmd Rĩungã koe-noogã sẽn na yɩl n tõog n bãng yẽ ne a Biig a Zeezi. (Zã 17:3) A Sʋɩtãan sã n da tags t’a Ãdem ne a Awa kɩɩsgã na n kɩtame tɩ Wẽnnaam daabã pa pidsi, a tudgame.

18. D sã n wa bʋgsd a Zeezi sẽn ki tɩ yɩ maoongã zugu, bõe la d pa segd n yĩmi?

¹⁸ D sã n wa bʋgsd a Zeezi sẽn ki tɩ yɩ maoongã sẽn kɩt tɩ d tõe n wa paam bark ninsã zugu, d segd n tẽega bʋʋm-kãseng ning sẽn kɩt t’a Zeova tʋʋm a Zeezi t’a wa ki tɩ yɩ maoongã yelle. D pa segd n tagsdẽ t’a Zeezi sẽn ki tɩ yɩ maoongã yaa sẽn na n fãag tõnd bal ye. D segd n tẽegame me t’a Zeova tũnuga ne rẽ n leok no-koeemd ning a Sʋɩtãan sẽn wa ne Edɛn zẽedã zĩigẽ wã. (Sɩng. 3:1-5, 15) A Zeezi sẽn ki tɩ yɩ maoongã maasem yĩnga, a Zeova wilgame t’a yʋʋrã segda ne waoogre, n wilg tɩ bũmb nins fãa a Sʋɩtãan sẽn yeel yẽ zugã yaa ziri. A leb n na n fãaga tõnd ne yel-wẽndã la kũumã, n wilg t’a yaa Wẽnnaam sẽn yaa nonglem. Sẽn paase, a Zeova barkã yĩnga, a kõo tõnd sor tɩ d tõe n naag n wilg t’a Sʋɩtãan yaa pʋ-yagda baa ne d sẽn yaa neb sẽn pa zems zãngã. (Yel. 27:11) Bõe la y tõe n maan n wilg tɩ y sũur nooma ne a Zeezi sẽn ki tɩ yɩ maoongã? D na n leoka sok-kãngã sõsg ning sẽn pʋgdã pʋgẽ.