D sak Biiblã sẽn yet bũmb ning kʋyã wɛɛngẽ wã—Pipi babgo BĨNG-YÃ
1. Wãn to la kũumã namsd nebã fãa, la a Zeova Kaset soab ned sã n maan kaalem zu-loe-bʋg la a tõe n sege?
1 Hal d yaab a Ãdem wakatã n tãag masã, kũumã sẽn wat ne toog ningã namsda nebã wʋsgo. Wẽnnaam nebã me pa põsd yel-kãngã ye. Wala sẽn yɩ to-to ne a Zezi wã, kiris-neb hakɩkã me sũy sãamda wʋsgo, b zoa bɩ b ned sã n maan kaalem. (Zã 11:33, 35) F ned sã n ki sɩd zabdame, la sũ-sãangã soab sɩd ratame tɩ d bels-a la d sõng-a. Sẽn yɩɩd fãa zĩis nins nebã sẽn tar tẽeb ziri la rabeem sẽn ki-bã wɛɛngẽ wã. Zĩ-kãensã, a Zeova Kaset soab sã n wa be sũ-sãams pʋgẽ, a roagdb nins sẽn pa be sɩdã pʋgẽ wã tõe n dat n modg-a lame t’a naag-b n maan yɛl kẽer sẽn kɩɩsd Wẽnnaam noyã. D ned sã n maan kaalem, wãn to la d tõe n mao ne sũ-sãangã n pa naag n maan kʋy la rog-n-migs yɛl Wẽnnaam sẽn kisi?
2. Bõe la Biiblã yet sẽn ki-ba wɛɛngẽ, la a sẽn yet tɩ kũum pa mi bũmbã rat n yeelame tɩ bõe takɩ?
2 D sak n deeg bũmb ning Biiblã sẽn yet sẽn ki-bã wɛɛngẽ wã: Biiblã yeta vẽeneg woto: “Nin-vɩɩs miime tɩ b na n kiime. La kũum ka mi bũmb ye. . . . Bãmb nonglmã ne b kisgrã la b sũ-kiirã me fãa sɛɛme. . . . Tʋʋmd ne tagsg la yam ne bãngr ka be [Sheol sẽn yaa yaoogã] fo sẽn dabd zĩig ningã ye.” (Koɛ. 9:5, 6, 10; Yɩɩl 146:4) Ned sã n ki, a ye pa mi baa fʋɩ ye. A pa mi sũ-noog bɩ sũ-sãangã, a pa tõe n gom bɩ n wʋm goama, a pa mi neb a taabã sẽn yet bɩ b sẽn maand bũmb ning me ye. Tõnd sẽn yaa kiris-neb hakɩkã, woto yaa Biiblã zãms-yẽgr tõnd sẽn tikd n bãngd d sẽn na n talld manesem ning ned kũum sasa.
3. a) Ãnd n kɩt tɩ nebã tẽed tɩ sẽn ki-bã sɩɩs tõe n maana sẽn vɩ-bã bũmbã? b) Wãn to la Rom dãmb 12:9 wã tõe n sõng a Zeova Kaset rãmbã fãa tɩ b bãng b sẽn sedg n tall manesem ning ne tẽeb ziri kãngã?
3 D gũus ne zãmsg nins sẽn sãamd Wẽnnaam yʋʋrã: Edɛn zẽedã pʋgẽ, a Zeova yeela a Ãdem ne a Hawa vẽeneg tɩ b sã n kɩɩs yẽ noorã b “sɩd na n kiime.” (Sɩng. 2:17) La a Sʋɩtãan yeel-b lame tɩ b “ka na n ki ye.” (Sɩng. 3:4) Kaoosg zugẽ a Sʋɩtãan yaga ziri yasa: A yeelame tɩ sẽn ki-bã pa ki ye. Tɩ b tara sɩɩs sẽn tʋgd n vɩ zĩig a to. A sẽn yeel woto wã, a rõda a Zeova la a sãam a yʋʋre. Ned sẽn tũud a Zeova pa segd n tẽ tɩ sẽn ki-bã mii bũmbu, la tɩ b tõe n maana sẽn vɩ-bã bũmb ye. Bala woto yaa ziri fasɩ. Yaa ziri kãngã la a Sʋɩtãan tũnugd ne n tudgd nebã la a lut sɩdã sẽn be Biiblã pʋgẽ wã n yɩɩda. Neb nins fãa sẽn nong Wẽnnaamã segd n kisga zãms-kãngã! (Rom 12:9) Yãmb kisa zãms-kãngã bɩ?
4. a) Wãn to la Tõod 18:9-13 sõngd tõnd tɩ d bãng a Zeova sẽn get rog-n-migs sẽn pa sõma wã to-to? b) Sã n yaa ne 2 Korẽnt rãmb 6:15-17, kiris-ned hakɩk fãa segd n talla manesem bʋg ne rog-n-migs nins fãa sẽn naag ne tẽeb ziri sẽn yet tɩ sẽn ki-bã mii bũmbu, la tɩ b tõe n maana sẽn vɩ-bã bũmbã?
4 A Zeova ra yeela Israɛll nebã tɩ b lak b mens fasɩ ne rog-n-mik buud fãa sẽn naag ne tẽeb ziri wã. (Tõo. 18:9-13) Pipi kiris-nebã me ra laka b mens fasɩ ne rog-n-mik buud fãa sẽn naag ne tẽeb ziri. (2 Kor. 6:15-17; Wil. 21:8) Rũndã-rũndã, a Zeova Kaset rãmbã me maanda woto. B sẽn beẽ tẽng ning fãa, la b sẽn yaa buud ning fãa neba, b lakda b mens zãng fasɩ ne rog-n-migs nins fãa sẽn naag ne tẽeb ziri sẽn yet tɩ sẽn ki-bã mii bũmbu, la tɩ b tõe n maana sẽn vɩ-bã bũmbã.
5. a) Bõe la Biiblã yet rog-n-migs yɛl nins b sẽn maand kʋyã sasa wã wɛɛngẽ? (Ges-y Zã 19:40; Maankʋʋr 21:5 la Tõod 14:1, 2.) b) Wa b sẽn wilg Hebre dãmb 5:14 pʋgẽ wã, bõe la tõnd fãa segd n maan sẽn na yɩl n gil kʋya sasa rog-n-migs nins sẽn pa sõma wã?
5 D tags rog-n-migs kẽer zugu: Biiblã pa yet tɩ yɛl nins b sẽn maand kũum sasa wã fãa naaga ne tẽeb ziri kãngã ye. Wala makre, a Zezi sẽn ki wã, b rɩk-a lame “n vil ne pɛɛla, ne tɩdar zom sẽn zems Zʋɩf rãmbã mumb minungu.” (Zã 19:40) La Wẽnnaam nebã laka b mens fasɩ ne yɛl a taab nebã sẽn da maand n tẽed tɩ sẽn ki-bã mii bũmbã. (Maan. 21:5; 19:27, 28; Tõo. 14:1, 2) Dũniyã gill zugu, rog-m-migs yɛl wʋsg la b maand kũum sasa, tɩ yaa vẽeneg tɩ yaa tẽeb ziri kãngã n kɩt tɩ b maandẽ. A taab me la b maand n pa mi tɩ yaa tẽeb ziri kãngã yĩnga, tɩ yaool n yaa rẽ. Yaa woto Burkĩna Faso ka me. Rẽnd d segd n modgame n bɩ tẽebã wɛɛngẽ tɩ d yamã yok sõma, tɩ d tõog n ‘bãng sõma ne wẽng n bake.’ (Heb. 5:14) Rẽ na n kɩtame tɩ d tõog n bãng rog-n-migs nins sẽn kɩɩsd Biiblã sẽn yetã, la sẽn pa kɩɩsdã n bake. Biiblã no-bʋs n tõe n sõng tõnd rẽ wɛɛngẽ?
6. a) Sã n yaa ne 2 Korẽnt dãmb 6:14, 17, d segd n maana bõe ne d sũur fãa, la sok-bʋg la d segd n sok d mengã? b) Sã n yaa ne Bʋkaoodb 2:12, d sã n naag n maan kʋʋr yɛl sẽn kɩɩsd Biiblã d maana bõe?
6 D tũ Wẽnnaam noyã: Neb nins sẽn dat n ta Wẽnnaam yamã pa segd n tall lagem-n-taar ne neb nins sẽn pa be sɩdã pʋgẽ wã ye. Biiblã pʋgẽ a Zeova yeta tõnd woto: ‘Yi-y bãmb sʋka, la y welg ne bãmba. Da sak-y n sɩɩs bõn-dẽgd ye.’ (2 Kor. 6:14, 17) D segd n ninga sagl-kãngã d yamẽ, la d sok d meng woto: ‘Rẽ yĩnga b sẽn maand bõn-kãngã kʋʋrẽ wã yaa b sẽn tẽed tɩ sẽn ki-bã sɩɩs tõe n maana sẽn vɩ-bã bũmbã bɩ?’ Sã n yaa woto, rẽnd pa sũ-sãang wilgr bal ye. La lebga ziri tũudmã yɛl la b maanda. F sã n naag n maan dẽ, f beega Wẽnnaam a Zeova sẽn yaa Wẽnnaam sẽn nong sɩdã.—Ges-y Bʋkaoodb 2:12.
7. a) Bõe la 1 Korẽnt dãmb 10:32 yeta, tɩ tõe n sõng tõnd kʋyã wɛɛngẽ? b) Sã n yaa ne Matɩe 18:6 la Luk 11:52, wãn to la a Zeova get ned sẽn tudgd a taaba?
7 Saglg a yiib-n-soabã bee 1 Korẽnt dãmb 10:32: “Bɩ y ra maan bũmb sẽn beegd Gɛrk rãmbã walla Zʋɩf rãmbã walla Wẽnnaam tẽedbã ye.” Wãn to la d segd n tũ sagl-kãngã? Neb wʋsg miime t’a Zeova Kaset rãmbã zãmsda nebã tɩ sẽn ki-bã pa mi baa fʋɩ, la tɩ b pa tõe n maan sẽn vɩ-bã wẽng bɩ n sõng-b ye. La tigingã ned sã n naag n maan kʋʋr yɛl sẽn wilgd t’a yɛɛsdame tɩ kiidã na n wa maan-a bũmbu, nebã na n tagsame tɩ bõe? A manesmã na n tudga neb nins sẽn mi a Zeova Kaset rãmbã sẽn tẽed la b zãmsd nebã bũmb ning sẽn ki-bã wɛɛngẽ wã. F sã n tudg neb a taabã, f sãamda a Zeova sũuri, la f tõe n gɩdga nebã me tɩ b pa sak Rĩungã koɛɛg ye.—Mat. 18:6; Luk 11:52.
8. a) Zĩ-bʋg wɛɛngẽ la tõnd yaa toor ne dũniyã neba? (Karm-y Filip rãmb 2:15, la y wilg a võore.) b) Tõnd sã n sɩd nong a Zeova, yam-yãkr bʋs la d segd n maan ned kũum sasa?
8 D kisg sẽn yaa wẽnga: Neb nins sẽn pa be sɩdã pʋgẽ wã maanda kʋyã yɛla, n pa mi tɩ yaa ziri tũudum yɛl ye. La naoor wʋsgo b pa wʋmd tõnd sẽn zãgsd n pa naagd n maand yɛl kẽerã võor ye. Yɩl n kell n sak Wẽnnaam yel-kãngã buud pʋgẽ pa nana ye. Rẽ na n wilga sã n yaa a Zeova la tõnd nong n yɩɩda, bɩ sã n yaa nebã la d nong n yɩɩda. La tõnd segd n yɩɩ ‘neb sẽn ka tar yelle, la sẽn tar pʋ-peelem.’ (Fil. 2:15) Tõnd sẽn nong a Zeova wã yĩng kɩtame tɩ d ‘kis sẽn yaa wẽnga, la d gãd sẽn yaa sõma kãn-kae.’ (Rom 12:9) Tõnd mii vẽeneg tɩ yaa wẽnga, la pʋd n wilgdame tɩ d yaa pʋ-lik soaba, d sã n naag n maan kʋʋr yɛl sẽn wilgd tɩ d tẽedame tɩ sẽn ki-bã mii bũmbu, la tɩ b tõe n maana sẽn vɩ-bã bũmbu. D ning Biiblã no-kãensã fãa d yamẽ, la d ges yɛl kẽer b sẽn nong n maand kʋyã sasa tõnd tẽngã pʋgẽ la tẽns a taaba.
Sẽn deng kũumã mumbã
9. a) B sã n segl kũumã n sa n dat n tɩ mum, bõe ne bõe la b mi n maandẽ? b) Bõe yĩng tɩ buud kẽer maand bõn-kãensã?
9 Bũmb nins b sẽn maand kũumã n yaool n tɩ mum-a wã: B mi n sooda kũumã sẽn na yɩl n yiis rẽgdã bala. (Tʋʋ. 9:37) La rẽ pa segd n naag ne yel-maandɩ sẽn yaa b segl kiidã t’a tɩ vɩɩmd ‘zĩig a to’ ye. Neb nins sẽn zoet kɩɩmsã sã n na n segl kũum n yaool n tɩ mum, b mi n kɩrsda rãam bɩ zom koom tẽng yaab rãmbã yĩnga, la b wõrs kũumã nug-yẽesã ne a zoobdã n bĩngi, sẽn na yɩl n wa rɩk n ye maan a kʋʋr bɩ rog-n-mik yɛl a taaba. B tallda ko-sõng bɩ koom sẽn pa yaare, la b bao mood buud n so kũumã. B rɩkda tɩ-gãn bɩ tɩ-yoada, n ning kũumã fuugẽ, pa rẽ bɩ b sagl koglgã pʋgẽ n naag n mum. Kẽer tẽedame tɩ woto fãa yaa tɩlae sẽn na yɩl tɩ kiidã tõog n ta a yaab rãmbẽ.
10. a) Kiidã sã n yaa a Zeova Kaset soaba, bõe yĩng tɩ d pa segd n bas t’a neb nins sẽn pa d tẽed-n-taasã segl kũumã mumbu? b) Bõe la d segd n maane, kiidã neb sã n modg n deeg kũumã n na n maan b rog-n-mik yɛla?
10 Zĩis kẽere, mi n yaa buudã ned n wat n segl kũumã tɩ b yaool n tɩ mum. Kiidã sã n yaa a Zeova Kaset soaba, d segd modgame n da bas t’a neb nins sẽn pa a Zeova Kaset rãmbã lʋɩ yɛlã taoore, n wa solg n maan yɛl sẽn kɩɩsd Wẽnnaam noyã ye. Yaa vẽeneg tɩ tõnd saam-biig bɩ d saam-bi-poak ning sẽn maan kaalmã ra pa rat tɩ b maan woto a yĩng ye. D sã n maan d sẽn tõe fãa tɩ b baas n modg n deeg kũumã, d pa segd n naag-b n maan bũmb ba a yen sẽn kɩɩsd Wẽnnaam noyã ye. La d tõe basa d yam, d sẽn mi tɩ bũmb kae b sẽn tõe n maan tɩ kɩt tɩ Wẽnnaam pa vʋʋg d saam-biigã bɩ d saam-bi-poakã. A sẽn kell n sak a Zeova n tãag kũumã, a Zeova tẽra a yelle.
11. a) Kiris-neb sã n yãk yam tɩ b pa na n gãneg b ned tɩ nebã wa gese, bõe yĩng tɩ d pa segd n ning-b taale? b) Y sã n na n dɩgla y ned kũum tɩ nebã wa gese, wãn to la y segd n maan dẽ?
11 Gãneg kũumã tɩ nebã wat n getẽ wã: Yaa ned fãa n yãkd a sã n na n gãnega a ned tɩ nebã wa ges bɩ a sã n pa na n maan dẽ. Kiris-neb sã n yãk yam n pa na n maan dẽ, d pa segd n ning-b taal ye. Y sã n na n dɩgla kũumã tɩ nebã wa gese, y segd n maana yɛlã ne zemsgo, la y gũus sõma tɩ yɛl sẽn kɩɩsd Wẽnnaam noyã ra naag ye.
12. a) Neb nins sẽn pa mi Biiblã sẽn yet bũmb ninsã maanda bõe ne bõe ned kũum sasa? b) Bõe yĩng tɩ kiris-ned hakɩk pa segd n kẽes a meng yel-kãensã pʋsẽ?
12 Zĩis kẽere, b nong n gãnegda kũumã gãag sẽn maneg n nags sõma zugu. Kiidã sã n yaa paga, b yeelgd-a-la maryaas fu-pɛɛlga, la b ning-a nag-teed wʋsgo. B nong n dɩkda kiidã foto, n ningd futu, kafigdu, gobele rãmb la bũmb a taab zut n pʋɩ nebã, sẽn na yɩl tɩ b yeelg bɩ n zã n wa kʋʋrã zĩigẽ. B maanda kiidã foto kɩds n kõ sẽn wa-b kʋʋrẽ wã fãa tɩ b sog b futẽ. Rẽ yĩnga tõnd sã n tũ dũniyã neb manesem kãngã yaa yam tʋʋmd bɩ? Ayo! F sã n pʋd n maan woto menga, yaa kiidã n lebg f wẽnde.
13. a) Biiblã no-bʋg me n wilgd tɩ tõnd segd n laka d mens fasɩ ne dũniyã rog-n-migsi? (Karm-y 1 Zã 2:15, 16, la y wilg a võorã.) b) Bõe yĩng tɩ rog-n-mik woto buud maaneg pa sõma? (Karm-y Efɛɛz rãmb 5:10, 11, 15, 16, la y wilg a võorã.)
13 Baa ne Biiblã sẽn pa gom rog-n-migsã fãa yell ball-ballã, neb nins sẽn bɩ tẽebã wɛɛngẽ wã miime tɩ nebã sẽn maand woto sẽn na yɩl tɩ b ges-bã, ‘pa yit Wẽnnaam nengẽ ye. La yaa dũniyã rẽnda.’ (1 Zã 2:15, 16) Rog-n-mik kãensã kɩtame tɩ dũniyã nebã maand sẽn pa zemse. Wala makre, b wiisda wʋsgo, b lobda ligd ne bõn-yood a taab kũumã zugu, n mobgd-a la b gomd ne-a wala a vɩɩme. Woto buud sã n maan kiris-ned kũum sasa, na n sãama a Zeova yʋʋre, la sãam a nin-buiidã me yʋʋre. Vẽenega, d sã n lak d mens zãng fasɩ ne rog-n-migs yɛl nins neb nins sẽn be tẽeb lik pʋgẽ wã sẽn maandã, na n kɩtame tɩ d tõog n maan yɛlã tɩ tall waoogre, la wilg tɩ d yaa kiris-neb hakɩka.—Ef. 5:15-17.
14. a) Kʋ-sõsg yaa bõe? b) Wakat bʋg la b nong n talld kũumã n wat yiri? d) Bõe la nebã nong n maand kʋ-sõsgã sasa, la bõe yĩng tɩ b tẽed tɩ yaa tɩlae? e) Bõe yĩng tɩ kiris-neb hakɩkã segd n lak b mens fasɩ ne kʋ-sõsga?
14 Kʋ-sõsgã: Kʋ-sõsg yaa nebã sẽn tigimd taab kũumã yir n zĩnd beenẽ yʋng tõr n gũ kũumã hal tɩ beoog vẽegã. Kʋ-sõsgã pa yembr ne f sẽn na n kẽng kiidã zakẽ sasa sẽn zems n tɩ pʋʋs kiidã neb ne b toog la f bels-bã ye. Naoor wʋsgo, yaa mumbã ket tɩ beoog la b maand kʋ-sõsgã. B tallda kũumã n wa yiri, tɩ nebã tigim taab be yʋngã tõre, n yɩɩndẽ la b pʋʋsdẽ, n pẽgd kũumã la b kilsd-a. B tẽedame tɩ woto kogenda kiidã ne a nebã, tɩ kinkirs bɩ zĩn-wẽns ra maan-b bũmb ye. Sẽn mik tɩ rog-n-mik kãngã maaneg yaa b sẽn tẽed tɩ kiidã tara sɩɩg sẽn ket n vɩyã yĩnga, kiris-neb hakɩkã lakda b mens fasɩ ne manesem kãensã sẽn kɩɩsd Wẽnnaam noyã. D sã n maan kʋ-sõsga, baa yaa wakat bilf pʋgẽ, d kɩɩsa Wẽnnaam noor ning sẽn yet tɩ d “kisg sẽn yaa wẽngã.”—Rom 12:9.
15. a) Kaset rãmb sãnda tẽed-n-taag sã n maan kaalem, bõe la b maanda? b) Tõnd sã n maan woto tõe n kɩtame tɩ nebã tags tɩ bõe? d) Wãn to la d tõe n tũ sagls nins sẽn be 2 Korẽnt dãmb 6:17 la Malaki 3:18 pʋgẽ wã?
15 Tigingã ned sã n maan kaalem, d segd n gũusame n da maan bũmb sẽn na n kɩt tɩ nebã tẽ tɩ tõnd me tara d kʋ-sõsg buud n maandẽ ye. A Zeova Kaset rãmb sã n tigim taab kiidã zakẽ yʋng ning sẽn deng mumbã, n dɩgl kũumã n yɩɩndẽ la b pʋʋsdẽ, nebã na n tẽeme tɩ bõe? Kaset rãmbã yẽ tõeeme n pa tags wẽngã, la b segd n tagsame n ges rẽ sẽn na n kɩt tɩ neb a taabã tall tagsg ningã. (1 Kor. 10:23) D sã n tigim taab yʋngã n maan woto, na n tudga d saam-biis la saam-bi-pogs nins sẽn mi bũmb nins sẽn kɩt tɩ nebã maand kʋ-sõsgã bɩ? Na n kɩtame tɩ nebã tẽ t’a Zeova Kaset rãmbã me yaa wa tũudum a taabã neb sẽn tar b toorẽ kʋ-sõsg buud n maandẽ wã bɩ? Vẽenega, d mii d sẽn tõe n maan to-to n paam n kõ kasetã la d bels kiidã neba, tɩ pa tũ ne kʋ-sõsg buud maaneg ye. D sã n tags woto fãa yelle, na n kɩtame tɩ d ra maan baa fʋɩ sẽn na n wõneg kʋ-sõsg ye. D sã n maand woto, d wilgdame tɩ d yaa toor ne dũniyã neba, la tɩ d laka d mens fasɩ ne bõn-dẽgdã.—2 Kor. 6:17; Mal. 3:18.
16. a) D sã n wa segend kũum mumbu, verse bʋs zug la d segd n tagse? b) B sã n tall kũumã n kẽng a zakẽ wã bɩ a roagdb yir mumbã ket tɩ beoogo, mi n wata ne yel-bʋse? d) Sẽn na n ges-b kũumã mumb yellã sã n zems taab n sigl yɛlã sõma, na n kɩtame tɩ b tõog n maan bõe?
16 Sagl-kãngã tõe n sõnga tõnd tɩ d rɩk yam: “Nin-yẽeseng [bɩ yam soab] yãta toog n gil n looge. La sẽn ka mi a sẽn dabdẽ kẽngda taoor n paamd sɩbgre.” (Yel. 22:3) Biiblã sagl-kãngã zemsa kɛpɩ kʋ-sõsgã wɛɛngẽ. B gũus n gesame tɩ b sã n tall kũumã n wa yir tɩ mumbã ket beoogo, wata ne yɛla. Sẽn yaa yell n yɩɩda, yaa b sã n tall kũumã n kẽng a roagdb sẽn pa a Zeova Kaset rãmb zakẽ. Bala a nebã la a yagsã sã n yã b sẽn wa ne kũumã, b na n tẽeme tɩ lebga tɩlae ne-b tɩ b tigim taab n zĩnd n gũ kũumã, n yɩɩl la b pʋʋs yʋngã tõre. B nong n maanda woto hal tɩ b wa rɩk kũumã n tɩ mum. Sã n yaa kiris-ned n maan kaalem, a neb nins sẽn yaa a Zeova Kaset rãmbã segd n tagsa sõma n ges sasa ning b sẽn tõe n dɩk kũumã n kẽng a zakẽ wã bɩ zĩig a to tɩ yell pa zĩndã. Sã n yaa tɩlae tɩ y tall kũumã n keng a zakẽ, yaa yam tʋʋmd tɩ y maan rẽ mumbã daare, la ra yɩ yʋng ning sẽn deng mumb daarã ye. Yaa sɩd tɩ woto maaneg tõe n yɩɩ toog sasa ninga. La y sã n zems taab n sigl yɛlã sõma, y na n tõogame. D sã n maan woto, d pa na n tudg ned ye.—Yel. 22:3.
17. Kiis nins sẽn watã, bõe yell la d na n gom Rĩungã Tʋʋmd pʋgẽ?
17 D na n goma yɛl a taab b sẽn maand kʋyã sasa yell Rĩungã Tʋʋmd pʋgẽ kiis nins sẽn watã. Rẽ na n sõnga tõnd fãa sẽn yaa kiris-neb hakɩkã tɩ d bãng d sẽn segd n maan to-to n kell n tall sũur-kaset sẽn pa ningd-d taale, la d ra maan bũmb sẽn na n tudg neda, la d kell n sak bũmb ning Biiblã sẽn yet kʋyã wɛɛngẽ wã.—1 Kor. 10:32.