VẼNEGRE

A Zeova ratame tɩ neb nins sẽn kẽ kãadmã pids b kãadmã daar pʋlengã. A sẽn wa n lagemd pipi raoã ne pipi pagã kãadem pʋgẽ wã, a yeela woto: “Rao na n basa a ba ne a ma n zĩnd ne a paga; la bãmb na n yɩɩ yĩng a yembre.” Kaoosg zugẽ, a Zezi lebs n dɩka gom-kãensã, la a paas woto: “Dẽ yĩnga, bɩ ned da welg bũmb nins Wẽnnaam sẽn lagem ne taabã ye.” (Sɩngre 2:24; Matɩe 19:3-6) Dẽnd sã n yaa ne a Zeova ne a Zezi, kãadem segd n kaoosame n tãag raoã bɩ pagã sẽn na n maan kaalem. (1 Korẽnt dãmba 7:39) Sẽn mik tɩ kãadmã yaa Wẽnnaam n luglã, pag ne a sɩd pa segd n kao b kãadem yaar ye. A Zeova pʋd n kisa b sẽn basd taab tɩ pa zems ne Biiblã noyã.—Malaki 2:15, 16.

Sã n yaa ne Biiblã, bõe n kõt ned sor t’a kao a kãadem? A Zeova kisa yoob buud fãa. (Sɩngre 39:9; 2 Sãmwɛll 11:26, 27; Yɩɩl Sõamyã 51:6) A getame tɩ yoobã sɩd yaa wẽng hal tɩ ned tõe n kao a kãadem rẽ yĩnga. (B gomda yoobã yell sak a 9, sull a 7 wã pʋgẽ.) Yoob sã n wa zĩnd kãadem pʋgẽ, a Zeova sakame tɩ ned ning sẽn pa yo wã tõe n kao kãadmã, la a sã n data a tõe n kell n zĩnda ne sẽn yo-a wã. (Matɩe 19:9) Dẽnd sẽn pa yo-a wã sã n kao kãadmã, a pa kɩɩs a Zeova noor ye. La kiris-neb hakɩkã pa sagend ned t’a kao a kãadem ye. Sẽn pa yo-a wã tõe n yãka yam n na n kell n zĩnd ne sẽn yo-a wã yɛl kẽer yĩnga, sẽn yɩɩd fãa nin-kãng sã n sɩd tek yam n kos sugri. Sẽn yaa a soab fãa, ned ning sẽn tar sor n tõe n kao a kãadem tõe n maana rẽ, la a segd n saka a yam-yãkrã sẽn na n wa ne yɛl ninsã.—Galat dãmba 6:5.

Zu-loe-kãsems yĩng kɩtame tɩ kiris-neb kẽer welg ne b pagb bɩ b sɩdba, bɩ n tolg n kao b kãadem meng tɩ pa tũ ne yoob ye. Sã n yaa ne Biiblã, ned sã n maan woto, yaa tɩlae t’a “kell n zĩnd a yembr walla a maneg a yellã.” (1 Korẽnt dãmba 7:11) Kiris-ned sẽn welg bɩ sẽn kao a kãadem tɩ pa tũ ne yoob ka tar sor n na n kẽ kãadem ne ned a to ye. (Matɩe 5:32) D ges yɛl kẽer sẽn kɩt tɩ neb kẽer welg taaba.

Rao sã n zãgs t’a kõn ges a zak yelle. Zags kẽer pʋsẽ, zakã soab zãgsame t’a kõn ges a zakã rãmb yelle, tɩ kɩt tɩ b ka tar baa fʋɩ, tɩ kom dat n kʋ-ba. Rẽ wɛɛngẽ Biiblã yeela woto: “Ned sã n ka ges . . . a meng zak rãmb [yelle], yẽ soab yii tẽeb pʋgẽ, la a yaa wẽng n yɩɩd ned ninga sẽn ka be tẽeb pʋgẽ wã.” (1 Tɩmote 5:8) Ra-kãngã sã n ka toeem zʋgo, pagã tõe n kẽnga kadengẽ n tɩ kos n welg ne-a, tɩ kɩt t’a paam sõngr n ges a meng la a kambã yelle. Kãsem dãmbã sã n wʋm tɩ kiris-ned n zãgs a zak yell gesgo, b segd n bao n bãnga sã n yaa sɩda. Ned sã n zãgs a zak yell gesgo, b tõe n yiisa a soab tigingã pʋgẽ.

Pãbr sẽn loog nugu. Rao ning tõe n tara a pag n pãbda, hal tɩ rat n tũ ne a yõor menga. Nin-kãng sã n yaa kiris-neda, kãsem dãmbã sã n wʋme, b segd n bao n bãnga sã n yaa sɩda. Ned sũur sã n yikd wakat fãa t’a pãbd a taabã, b tõe n yiisa a soabã tigingã pʋgẽ.—Efɛɛz rãmba 4:31.

A sã n gɩdgd-a t’a pa tõe n tũ Wẽnnaam baa bilfu. Rao ning tõe n gɩdgda a pag t’a pa tõe n tũ a Zeova, bɩ n dat n modg-a t’a kɩɩs a Zeova noore. Yel-kãngã pʋgẽ, pagã na n gesa a sã n segd n kẽnga kadengẽ n tɩ kos n welg ne-a sẽn na yɩl n kell n “sak Wẽnnaam n yɩɩd nebã.”—Tʋʋma 5:29.

Pag sã n be yel-kãensã buud pʋgẽ, ned baa a ye pa segd n yeel-a t’a welg ne a sɩdã bɩ t’a kell n zĩnd ne-a ye. A zo-rãmb sẽn yaa kiris-neba, bɩ kãsem dãmbã tõe n kõ-a-la sagls sẽn yit Biiblã pʋgẽ, la b sõng-a. La b pa tõe n bãng yɛl nins fãa sẽn be pag ne a sɩd sʋk ye. Yaa a Zeova bal n tõe n bãnge. Vẽenega, pag bɩ rao sã n zẽn yɛlã sẽn na yɩl n paam n welg ne a to wã, a pa waoog Wẽnnaam la kãadmã ye. A Zeova nee sɩlem ning fãa ned sẽn maand sẽn na yɩl n welg ne a to. Biiblã yetame tɩ “bũmb fãa yaa bɛɛl la vẽenes ne tõnd sẽn na n togs a soab tõnd yɛlã fãa wã.” (Hebre dãmba 4:13) Kiris-ned sã n be yel-kãensã buud pʋgẽ, n ges tɩ yellã looga nug t’a na n welg ne a to wã, a tẽed-n-taasã pa segd n ning-a taal ye. Baasgo, “ned kam fãa na n togsa a meng yell Wẽnnaam taoore.”—Rom dãmb 14:10-12.