Y sẽn na n tõog n bas raoolmã bɩ poglmã salengã to-to

Raoolmã la poglmã salengã yaa bũmb Wẽnnaam sẽn kisi. Ned sẽn maand woto tagsda a yĩngã ratem yell bala, la a tara tags-yoodo. Sẽn paase, a wat n geta neb a taabã wa bũmb a sẽn tõe n tall n pids a yĩngã ratem bala. A wat n getame tɩ pag ne rao lagengã yaa bũmb nebã sẽn maand n noogd b yõor bɩ sẽn na yɩl n yols b mens bala, la pa bũmb sẽn wilgd tɩ pag ne rao nonga taab ye. Ned sẽn maand woto pa kɩɩsd a yĩngã ratem, sã n yaa ne “yoob la rẽgd la wẽng ratmã” ye. A pʋd n yãngda rẽ n paasdẽ.—Kolos rãmb 3:5.

Tʋm-tʋmd a Poll yeela woto: “M zo-nongdse, . . . bɩ d lak ne bũmb [nins] fãa sẽn yaa rẽgdo, yĩngã rẽnd la sũur dẽnda. La bɩ tõnd bɩ sõmblem pʋgẽ n paase, tõnd sẽn zoet Wẽnnaamã yĩnga.” (2 Korẽnt dãmba 7:1) Yãmb sã n modgdame n dat n tũ sagl-kãngã tɩ ket n yaa toog ne-yã, bɩ y ra koms raood ye. A Zeova “kõta sugr” wʋsgo, la a ratame n sõng yãmb wakat fãa. (Yɩɩl Sõamyã 86:5; Luk 11:9-13) Y sũur-kasetã sẽn ningd-y taalã, la y sẽn modgd n dat n bas manesem kãngã baa y sẽn mi n pa tõogã, wilgdame tɩ y tara yam-sõngo. Tẽeg-y me tɩ “Wẽnnaam yɩɩda tõnd sũyã, la [a] mii bũmb fãa.” (1 Zã 3:20) Pa tõnd yel-wẽnã bal la Wẽnnaam get ye. A mii tõnd sẽn yaa a soabã sõma. A sẽn mi tõnd woto wã yĩnga, a kelgda tõnd pʋʋsg la a zoet tõnd nimbãanega. Wala biig sẽn be yell pʋgẽ sẽn na n kos a ba sõngrã, bɩ yãmb me kell n sik y meng n kos Wẽnnaam sõngr wakat fãa. A Zeova na n sõnga yãmb tɩ y paam sũur-kaset sẽn pa ningd-y taale. (Yɩɩl Sõamyã 51:3-14, 19; Ezai 1:18) La yaa vẽeneg tɩ yãmb mengã segd n modg n basa yɛl kẽere. Wala makre, y segd n modgame n bas yoobã yɛl buud fãa gesgo, la tũud-n-ta-wẽnsã.

Yãmb sã n modgdame n dat n bas y raoolmã bɩ y poglmã saleng n ket n pa tõeyã, bɩ y togs yellã y roagd sẽn yaa kiris-neda, wall y zoa sẽn tar minim tẽebã pʋgẽ.a—Yelbũna 1:8, 9; 1 Tesalonik rãmba 5:14; Tɩt 2:3-5.