യഹോ​വ​യു​ടെ സാക്ഷികൾ—വാർഷി​ക​പു​സ്‌തക റിപ്പോർട്ട്‌ 1998

പ്രവാ​ച​ക​നായ യോവേൽ വലിയ അടിയ​ന്തി​ര​ത​യോ​ടെ യഹോ​വ​യു​ടെ ദിവസ​ത്തി​ന്റെ വരവി​നെ​ക്കു​റി​ച്ചു മുൻകൂ​ട്ടി​പ്പ​റഞ്ഞു. “യഹോ​വ​യു​ടെ നാമം വിളി​ച്ച​പേ​ക്ഷി​ക്കു​ന്നവൻ ഏവനും രക്ഷിക്ക​പ്പെ​ടും” എന്നെഴു​തി​യ​പ്പോൾ അതിജീ​വ​ന​ത്തി​നുള്ള മുഖ്യ സംഗതി​യാണ്‌ അവൻ തിരി​ച്ച​റി​യി​ച്ചത്‌.—യോവേ. 1:15; 2:1, 28-32.

പൊ.യു.മു. 607-ൽ യഹോ​വ​യു​ടെ അത്തര​മൊ​രു ദിവസം യെരൂ​ശ​ലേ​മി​ന്റെ​മേൽ വന്നു. യഹോവ ന്യായ​വി​ധി നടത്തിയ സമയമാ​യി​രു​ന്നു അത്‌. തന്നോട്‌ അനാദ​ര​വോ​ടെ പെരു​മാ​റി​യ​തി​നു കാര്യ​മായ കണക്കു ബോധി​പ്പി​ക്കേ​ണ്ടി​വ​രു​മെന്ന്‌ യഹൂദ​യി​ലെ​യും യെരൂ​ശ​ലേ​മി​ലെ​യും നിവാ​സി​കൾക്ക്‌ അവൻ വർഷങ്ങൾക്കു മുമ്പേ മുന്നറി​യി​പ്പു കൊടു​ത്തി​രു​ന്നു. അവർക്ക്‌ അവന്റെ നാമം അറിയാ​മാ​യി​രു​ന്നു, അത്‌ ഉപയോ​ഗി​ക്കു​ക​യും ചെയ്‌തി​രു​ന്നു. എങ്കിലും അവർ ആത്മാർഥ​മാ​യി യഹോ​വ​യു​ടെ മാർഗ​നിർദേശം തേടി​യില്ല. തങ്ങളുടെ പ്രവൃ​ത്തി​കൾ സംബന്ധിച്ച്‌ യഹോവ കണക്കു ചോദി​ക്കു​മെന്ന്‌ അവർ വാസ്‌ത​വ​ത്തിൽ വിചാ​രി​ച്ചു​മില്ല. (നെഹെ. 9:26; സെഫ. 1:4-6, 12) അവർ അരിഷ്ട​ത​യു​ടെ നാളിൽ യഹോ​വയെ വിളി​ക്കു​ന്നെ​ങ്കിൽ അത്‌ അപഹാ​സ്യ​മാ​യി​രു​ന്നു. താൻ ശ്രദ്ധി​ക്കു​ക​യി​ല്ലെന്ന്‌ യഹോവ പറഞ്ഞു. (യിരെ. 11:10, 11) യെരൂ​ശ​ലേം നശിപ്പി​ക്ക​പ്പെ​ട്ട​പ്പോൾ യിരെ​മ്യാവ്‌, ബാരൂക്ക്‌, ഏബെദ്‌-മേലെക്‌, യോനാ​ദാ​ബി​ന്റെ പുത്ര​ന്മാർ തുടങ്ങിയ നീതി​സ്‌നേ​ഹി​കൾ രക്ഷപ്പെട്ടു. കാരണം, നേരു​ള്ള​തും ദൈവ​ത്തി​നു പ്രസാ​ദ​ക​ര​വു​മായ കാര്യങ്ങൾ ചെയ്യാൻ അവർ ആത്മാർഥ​മാ​യി ശ്രമി​ച്ചി​രു​ന്നു.

യോ​വേ​ലി​ന്റെ പ്രവച​ന​ത്തിന്‌ ഒന്നാം നൂറ്റാ​ണ്ടി​ലും നിവൃ​ത്തി​യു​ണ്ടാ​യെന്ന്‌ അപ്പോ​സ്‌ത​ല​നായ പത്രൊസ്‌ വിശദീ​ക​രി​ച്ചു. യഹോ​വ​യു​ടെ ദിവസം വരുന്ന​തി​നു മുമ്പ്‌ ദൈവാ​ത്മാ​വു പകര​പ്പെ​ടു​ന്ന​തി​നെ​ക്കു​റിച്ച്‌ യോവേൽ എഴുതി​യ​തി​ന്റെ നിവൃ​ത്തി​യാണ്‌ പൊ.യു. 33-ലെ പെന്ത​ക്കോ​സ്‌തിൽ സംഭവി​ച്ച​തെന്നു പരിശു​ദ്ധാ​ത്മാ​വി​നാൽ വഴിന​യി​ക്ക​പ്പെട്ട പത്രൊസ്‌ വ്യക്തമാ​ക്കി. പൊ.യു. 70-ൽ യഹോ​വ​യു​ടെ ആ ദിവസം നാശക​ര​മായ ക്രോ​ധ​ത്തോ​ടെ യെരൂ​ശ​ലേ​മി​ന്റെ​മേൽ വന്നു. (പ്രവൃ. 2:16-21) എന്നിരു​ന്നാ​ലും, അതിന്‌ ഏതാണ്ട്‌ 14 വർഷം മുമ്പ്‌ റോമി​ലെ ക്രിസ്‌ത്യാ​നി​കൾക്കെ​ഴു​തിയ അപ്പോ​സ്‌ത​ല​നായ പൗലൊസ്‌ യോവേൽ 2:32 ഉദ്ധരി​ക്കു​ക​യു​ണ്ടാ​യി. (റോമ. 10:13) എന്തു​കൊണ്ട്‌? യഹൂദ​ന്മാ​രോ​ടും ഗ്രീക്കു​കാ​രോ​ടു​മുള്ള ദൈവ​ത്തി​ന്റെ മുഖപ​ക്ഷ​മി​ല്ലായ്‌മ ഊന്നി​പ്പ​റ​യാൻ. പ്രവാ​ചകൻ എഴുതി​യ​തു​പോ​ലെ, ‘യഹോ​വ​യു​ടെ നാമം വിളി​ച്ച​പേ​ക്ഷി​ക്കുന്ന ഏവനും’ രക്ഷ ലഭ്യമാ​യി​രു​ന്നു. എന്നാൽ വിദൂ​ര​സ്ഥി​ത​മായ യെരൂ​ശ​ലേ​മി​ന്റെ​മേൽ വരാനി​രുന്ന നാശ​ത്തെ​ക്കു​റിച്ച്‌ റോമി​ലെ ക്രിസ്‌ത്യാ​നി​കൾക്കു മുന്നറി​യിപ്പ്‌ നൽകേ​ണ്ടത്‌ അനിവാ​ര്യ​മാ​യി​രു​ന്ന​തെ​ന്തു​കൊണ്ട്‌? അവർക്ക്‌ അപകട​മേ​ഖ​ല​യിൽനിന്ന്‌ അകന്നു​നിൽക്കാൻ കഴി​യേ​ണ്ട​തിന്‌. പൊ.യു. 70-ൽ യെരൂ​ശ​ലേ​മിൽ നടന്ന യഹൂദ​രു​ടെ പെസഹാ ഉത്സവത്തി​നു പോയ​വ​രൊ​ക്കെ ആ നഗരത്തി​ന്റെ​മേൽ വിപത്തു വന്നപ്പോൾ കെണി​യി​ല​ക​പ്പെട്ടു. എന്നാൽ ഏകദേശം നാലു വർഷം മുമ്പ്‌, തന്റെ പുത്രൻ മുഖാ​ന്തരം ദൈവം നൽകിയ വചനം ചെവി​ക്കൊ​ണ്ടവർ നാശത്തി​നു വിധി​ക്ക​പ്പെട്ട ആ നഗരത്തിൽനി​ന്നു രക്ഷിക്ക​പ്പെട്ടു.—ലൂക്കൊ. 21:20-22.

അതി​നെ​ക്കാൾ ദൂരവ്യാ​പക ഫലമു​ള​വാ​ക്കുന്ന യഹോ​വ​യു​ടെ ഒരു ദിവസം നമുക്ക്‌ തൊട്ടു​മു​ന്നി​ലുണ്ട്‌. യഹോ​വ​യു​ടെ ന്യായ​വി​ധി​നിർവ​ഹണം ഗോള​ത്തി​ന്റെ എല്ലാ ഭാഗത്തു​മെ​ത്തും. എന്നാൽ പൂർണ വിശ്വാ​സ​ത്തോ​ടെ യഹോ​വ​യു​ടെ നാമത്തെ വിളി​ച്ച​പേ​ക്ഷി​ക്കു​ക​യും അവന്റെ പുത്ര​നായ യേശു​ക്രി​സ്‌തു​വി​ന്റെ പാപപ​രി​ഹാര ബലിയിൽ വിശ്വാ​സം പ്രകട​മാ​ക്കു​ക​യും ചെയ്യു​ന്നവൻ ഏതു ദേശത്തി​ലോ വർഗത്തി​ലോ ഭാഷയി​ലോ പെട്ടവ​നാ​യി​രു​ന്നാ​ലും അവനു രക്ഷ സാധ്യ​മാ​യി​രി​ക്കും. (വെളി. 7:9, 10) എങ്കിലും, റോമർ 10:14 ചോദി​ക്കു​ന്നു: “അവർ വിശ്വ​സി​ക്കാ​ത്ത​വനെ എങ്ങനെ വിളി​ച്ച​പേ​ക്ഷി​ക്കും? അവർ കേട്ടി​ട്ടി​ല്ലാ​ത്ത​വ​നിൽ എങ്ങനെ വിശ്വ​സി​ക്കും?” സകലർക്കും ആ അവസരം നൽകേ​ണ്ട​തി​ന്റെ അടിയ​ന്തി​രത യഹോ​വ​യു​ടെ സാക്ഷികൾ തിരി​ച്ച​റി​യു​ന്നു.

കഴിഞ്ഞ സേവന​വർഷ​ത്തിൽ, അതായത്‌ 1996 സെപ്‌റ്റം​ബർ മുതൽ 1997 ആഗസ്റ്റ്‌ വരെയുള്ള കാലയ​ള​വിൽ, യഹോ​വ​യെ​യും അവന്റെ പുത്ര​നെ​യും മിശി​ഹൈക രാജ്യ​ത്തെ​യും കുറിച്ച്‌ യഹോ​വ​യു​ടെ സാക്ഷികൾ വമ്പിച്ച സാക്ഷ്യം നൽകി. 232 ദേശങ്ങ​ളി​ലും ദ്വീപ​സ​മൂ​ഹ​ങ്ങ​ളി​ലും പ്രദേ​ശ​ങ്ങ​ളി​ലും അവർ പരസ്യ​സാ​ക്ഷീ​ക​ര​ണ​ത്തിൽ ഏർപ്പെ​ട്ട​താ​യി റിപ്പോർട്ടു ചെയ്യ​പ്പെട്ടു. ഈ പ്രവർത്ത​ന​ത്തി​നാ​യി 100 കോടി​യി​ല​ധി​കം, കൃത്യ​മാ​യി പറഞ്ഞാൽ 117,97,35,841 മണിക്കൂർ ചെലവ​ഴി​ച്ച​താ​യി റിപ്പോർട്ട്‌ പ്രകട​മാ​ക്കു​ന്നു! ശരാശരി 45,52,589 ഭവന ബൈബി​ള​ധ്യ​യ​നങ്ങൾ നടത്ത​പ്പെട്ടു. യഹോ​വ​യ്‌ക്കുള്ള സമർപ്പ​ണ​ത്തി​ന്റെ പ്രതീ​ക​മാ​യി 3,75,923 പേർ സ്‌നാ​പ​ന​മേറ്റു. അതൊരു പുതിയ അത്യു​ച്ച​മാ​യി​രു​ന്നു.

ഈ ആഗോള സാക്ഷ്യ​വേ​ല​യിൽ പങ്കെടു​ക്കു​ന്നത്‌ ആരാ​ണെന്നു നാം തിരി​ച്ച​റി​യു​മ്പോൾ അതു വിശേ​ഷാൽ മതിപ്പാർന്ന​താ​ണെന്നു മനസ്സി​ലാ​കും. സകല ജനതക​ളി​ലും വർഗങ്ങ​ളി​ലും​പെട്ട, നൂറു​ക​ണ​ക്കി​നു ഭാഷകൾ സംസാ​രി​ക്കുന്ന ആളുക​ളാ​ണവർ. തങ്ങൾക്കു ചുറ്റു​മുള്ള ലോക​ത്തി​ലെ ആളുക​ളെ​പ്പോ​ലെ​തന്നെ വലിയ സാമ്പത്തിക പ്രശ്‌നങ്ങൾ നിമിത്തം അവരിൽ പലരും കഷ്ടപ്പെ​ടു​ന്നു. യുദ്ധത്താൽ പിച്ചി​ച്ചീ​ന്ത​പ്പെട്ട നാടു​ക​ളി​ലാണ്‌ അവരിൽ ആയിരങ്ങൾ വസിക്കു​ന്നത്‌. വിശ്വ​സ്‌ത​ത​യോ​ടെ സാക്ഷീ​ക​ര​ണ​വേ​ല​യിൽ ഏർപ്പെ​ടുന്ന പലരും ഗുരു​ത​ര​മായ രോഗ​ങ്ങ​ളു​ള്ള​വ​രാണ്‌. ഘോര​മായ സംഭവങ്ങൾ റുവാ​ണ്ട​യിൽ നടന്നി​ട്ടും പയനി​യർമാ​രെ​ക്കൂ​ടാ​തെ അവി​ടെ​യുള്ള സാക്ഷികൾ ഓരോ മാസവും ശരാശരി 20-ലധികം മണിക്കൂർ വയൽസേ​വ​ന​ത്തിൽ ചെലവ​ഴി​ക്കു​ന്നു. അൽബേ​നി​യ​യി​ലെ പ്രക്ഷു​ബ്ധ​കാ​ലത്ത്‌ താരത​മ്യേന ശാന്തത​യുള്ള പ്രഭാ​ത​സ​മ​യത്ത്‌, അതായത്‌ വെടി​വെപ്പ്‌ തുടങ്ങു​ന്ന​തിന്‌ മുമ്പ്‌, സാക്ഷീ​ക​ര​ണ​ത്തി​ലേർപ്പെ​ടു​ന്ന​തിന്‌ അവി​ടെ​യുള്ള പ്രസാ​ധകർ ക്രമീ​ക​രണം ചെയ്‌തു.

ഓരോ മാസവും ലോക​വ്യാ​പ​ക​മാ​യി രാജ്യ​ഘോ​ഷ​ണ​ത്തിൽ ശരാശരി 53,53,078 പേർ പങ്കെടു​ത്തു. പോയ വർഷത്തിൽ ഒരു സമയത്ത്‌ വയൽശു​ശ്രൂ​ഷ​യിൽ പങ്കെടു​ത്ത​വ​രു​ടെ പുതിയ അത്യുച്ചം 55,99,931 ആയിരു​ന്നു. ഇതിൽ പയനി​യർമാ​രു​ടെ ഒരു വലിയ കൂട്ടം ഉൾപ്പെ​ടു​ന്നു—ഓരോ മാസവും ശരാശരി 7,06,270 പേർ. അത്‌ മുമ്പെ​ന്ന​ത്തെ​ക്കാ​ളും കൂടു​ത​ലാണ്‌. അതിനു കാരണം എന്താണ്‌?

ഒരു പ്രത്യേക ക്ഷണത്തോ​ടുള്ള ഉത്സാഹ​പൂർവ​ക​മായ പ്രതി​ക​ര​ണം

“ആവശ്യ​മുണ്ട്‌ . . . സഹായ പയനി​യർമാ​രെ” എന്ന ആഹ്വാനം 1997-ന്റെ ആരംഭ​ത്തിൽ പുറ​പ്പെ​ടു​വി​ക്കു​ക​യു​ണ്ടാ​യി. അതിന്‌ ഒരാൾക്ക്‌ എങ്ങനെ സമയം ക്രമീ​ക​രി​ക്കാ​മെ​ന്നുള്ള പ്രാ​യോ​ഗിക നിർദേ​ശങ്ങൾ നമ്മുടെ രാജ്യ ശുശ്രൂ​ഷ​യി​ലൂ​ടെ നൽകി​യി​രു​ന്നു. മാർച്ച്‌ മുതൽ മേയ്‌ വരെയു​ള്ള​തിൽ ഏതെങ്കി​ലും ഒരു മാസം അല്ലെങ്കിൽ ഒന്നില​ധി​കം മാസങ്ങ​ളിൽ സഹായ പയനി​യ​റിങ്‌ ചെയ്യാൻ പ്രോ​ത്സാ​ഹനം നൽകി. ഓരോ ബ്രാഞ്ചും ഒരു ലക്ഷ്യം വെച്ചു. ഉദാഹ​ര​ണ​ത്തിന്‌, ഐക്യ​നാ​ടു​കൾ 1,00,000; ഫിലി​പ്പീൻസ്‌ 20,000; ദക്ഷിണ കൊറിയ 10,000; ന്യൂസി​ലൻഡ്‌ 2,000; ലൈബീ​രിയ 350.

പ്രതി​ക​ര​ണം എങ്ങനെ​യു​ള്ള​താ​യി​രു​ന്നു? സങ്കീർത്തനം 110:3-ൽ മുൻകൂ​ട്ടി​പ്പ​റ​ഞ്ഞി​രി​ക്കു​ന്ന​തു​പോ​ലെ, യഹോ​വ​യു​ടെ ദാസന്മാർ വാസ്‌ത​വ​ത്തിൽ ‘സ്വമേ​ധാ​ദാ​ന​മാ​യി’ തങ്ങളെ​ത്തന്നെ അർപ്പി​ക്കു​ന്നു​വെ​ന്ന​തി​ന്റെ അത്ഭുത​ക​ര​മായ തെളിവ്‌ ലഭിച്ചു. മാർച്ചിൽ ഗ്വാഡ​ലൂപ്പ്‌ വെച്ച സഹായ പയനി​യർമാ​രു​ടെ ലക്ഷ്യം 43 ശതമാനം കവിഞ്ഞു; ഇക്വ​ഡോർ 73 ശതമാനം കവിഞ്ഞു. പോർട്ടോ​റി​ക്കോ​യിൽ 4,173 പേർ ഉണ്ടായി​രു​ന്നു, പ്രതീ​ക്ഷി​ച്ച​തി​ന്റെ ഇരട്ടി. മോശ​മായ സാമ്പത്തി​കാ​വ​സ്ഥ​ക​ളാ​യി​രു​ന്നി​ട്ടും 5,000 സഹായ പയനി​യർമാർക്കുള്ള ആഹ്വാനം നൽകി​യ​പ്പോൾ യൂ​ക്രെ​യി​നിൽ 10,365 പേരാണ്‌ പങ്കെടു​ത്തത്‌. ഐക്യ​നാ​ടു​ക​ളിൽ ആ ത്രിമാസ പരിപാ​ടി​യിൽ പങ്കെടുത്ത സഹായ പയനി​യർമാ​രു​ടെ മൊത്തം എണ്ണം 2,51,880 ആയിരു​ന്നു. തലേ വർഷം അതേ കാലയ​ള​വിൽ ഉണ്ടായി​രു​ന്ന​വ​രെ​ക്കാൾ 130 ശതമാനം കൂടു​ത​ലാ​യി​രു​ന്നു അത്‌.

ഈ പ്രത്യേക പരിപാ​ടി​യിൽ പങ്കെടു​ക്കു​ന്ന​തി​നു കൂടു​ത​ലായ ശ്രമങ്ങൾ നടത്ത​പ്പെട്ടു. ഫലമോ? ലൈബീ​രി​യ​യി​ലെ ബ്രാഞ്ച്‌ റിപ്പോർട്ടു ചെയ്‌തു: “മാർച്ചി​ലെ പ്രത്യേക പരിപാ​ടി​യ​നു​സ​രിച്ച്‌ പ്രസം​ഗ​പ്ര​വർത്തനം ശരിക്കും മുന്നേ​റാൻ തുടങ്ങി. യുദ്ധപ​ങ്കി​ല​മായ ഈ രാജ്യത്ത്‌ സഹായ പയനി​യ​റാ​യി സേവി​ക്കു​ക​യെ​ന്നതു വലി​യൊ​രു ത്യാഗ​മാണ്‌. ഇവിടെ ചില സഹോ​ദ​രീ​സ​ഹോ​ദ​ര​ന്മാർക്കു തങ്ങളുടെ വസ്‌തു​വ​ക​ക​ളെ​ല്ലാം നഷ്ടപ്പെ​ട്ടി​ട്ടുണ്ട്‌, അതും മൂന്നു തവണ​പോ​ലും. ബഹുഭൂ​രി​പക്ഷം ആളുകളെ സംബന്ധി​ച്ചി​ട​ത്തോ​ളം, കുടും​ബ​ത്തിന്‌ ദിവസ​വും ഒരു നേരത്തെ അടിസ്ഥാന ആഹാരം—‘പാമോ​യി​ലും ചോറ്‌’ അല്ലെങ്കിൽ ‘ഉണക്ക’ ഗോത​മ്പും അടങ്ങിയ ഒരു കോപ്പ ആഹാരം—കൊടു​ക്കാൻതന്നെ മുഴു​സ​മയം പ്രവർത്തി​ക്കേ​ണ്ടി​യി​രി​ക്കു​ന്നു. 350 സഹായ പയനി​യർമാർ എന്ന ലക്ഷ്യത്തിൽ എത്തി​ച്ചേ​രാൻ സാധ്യ​ത​യി​ല്ലെന്നു തോന്നി. കഴിഞ്ഞ വർഷത്തെ പ്രസാ​ധ​ക​രു​ടെ എണ്ണത്തിന്റെ 25 ശതമാ​ന​മാ​യി​രു​ന്നു അത്‌. എന്നാൽ യഹോ​വ​യിൽ ആശ്രയി​ച്ചു​കൊണ്ട്‌ നമ്മുടെ സഹോ​ദ​രങ്ങൾ നന്നായി പ്രതി​ക​രി​ച്ചു. സർവകാല അത്യു​ച്ച​മായ 496 പേർ മാർച്ചിൽ സഹായ പയനി​യ​റി​ങ്ങിൽ പങ്കെടു​ത്തു! 150 നിരന്ത​ര​പ​യ​നി​യർമാ​രും 29 പ്രത്യേക പയനി​യർമാ​രും ഉൾപ്പെടെ പ്രസാ​ധ​ക​രു​ടെ 42 ശതമാനം മാർച്ചിൽ ഏതെങ്കി​ലും തരം പയനി​യർസേ​വ​ന​ത്തിൽ പങ്കെടു​ത്തു!”

വാരത്തി​ലൊ​ന്നോ അതിൽ കൂടു​ത​ലോ പ്രാവ​ശ്യം പ്രവർത്തി​ച്ചു​തീർന്നി​ട്ടുള്ള പ്രദേ​ശ​ങ്ങ​ളു​ടെ കാര്യ​മോ? കൊളം​ബി​യ​യി​ലെ ബ്രാഞ്ചി​ന​ടു​ത്തു താമസി​ക്കുന്ന ഒരാൾ ഒരു പയനി​യ​റോ​ടു പറഞ്ഞു: “എനിക്കിത്‌ വിശ്വ​സി​ക്കാ​നാ​കു​ന്നില്ല. ഫാക്കാ​യിൽവെച്ച്‌ ഞാൻ ബസ്സിൽ കയറാൻ തുടങ്ങി​യ​പ്പോൾ അവർ എന്നെ സമീപി​ച്ചു. ദിവസം മുഴുവൻ അവരെന്നെ കണ്ടെത്തി—ബസ്സിൽ മാത്രമല്ല എല്ലായി​ട​ത്തും. ഇപ്പോൾ രാത്രി 8:00 മണിയാ​യി​രി​ക്കു​ന്നു, ഇപ്പോ​ഴും നിങ്ങൾ പ്രസം​ഗി​ച്ചു​കൊ​ണ്ടി​രി​ക്കു​ന്നു.” കാരണം? ജീവനി​ലേ​ക്കുള്ള പാതയി​ലേക്കു കടക്കാൻ ആളുകളെ സഹായി​ക്കാ​നാണ്‌ യഹോ​വ​യു​ടെ സാക്ഷികൾ ആഗ്രഹി​ക്കു​ന്നത്‌. ആ അവസരം തള്ളിക്ക​ള​യാ​നാ​ഗ്ര​ഹി​ക്കു​ന്ന​വ​രു​ടെ രക്തത്തിൽനിന്ന്‌ ഒഴിവു​ള്ള​വ​രാ​യി​രി​ക്കാ​നും അവരാ​ഗ്ര​ഹി​ക്കു​ന്നു.—യെഹെ. 3:19; പ്രവൃ. 20:26, 27.

മാർച്ച്‌ തീർച്ച​യാ​യും ക്രിസ്‌തു​വി​ന്റെ മരണത്തി​ന്റെ സ്‌മാ​രകം ആഘോ​ഷിച്ച മാസമാ​യി​രു​ന്നു. ദൈവ​പു​ത്രൻ തന്റെ അനുഗാ​മി​കളെ ഭരമേൽപ്പിച്ച വേലയിൽ വർധിച്ച പങ്കുണ്ടാ​യി​രി​ക്കു​ന്ന​തി​നെ​ക്കാ​ള​ധി​ക​മാ​യി വേറേ ഏതു വിധത്തി​ലാണ്‌ നമുക്ക്‌ അവന്റെ മരണത്തി​ന്റെ അർഥ​ത്തോട്‌ വിലമ​തി​പ്പു പ്രകട​മാ​ക്കാൻ കഴിയുക!—മത്താ. 28:19, 20; പ്രവൃ. 1:8.

“ഇത്‌ ചെയ്‌തു​കൊ​ണ്ടി​രി​പ്പിൻ”

യേശു​വി​ന്റെ മരണത്തി​നും പുനരു​ത്ഥാ​ന​ത്തി​നും ഓരോ സത്യ​ക്രി​സ്‌ത്യാ​നി​യു​ടെ ജീവി​ത​ത്തി​ലും ശക്തമായ പ്രഭാ​വ​മുണ്ട്‌. അപ്പോ​സ്‌ത​ല​നായ പൗലൊസ്‌ എഴുതി: “ക്രിസ്‌തു​വി​ന്റെ സ്‌നേഹം ഞങ്ങളെ നിർബ്ബ​ന്ധി​ക്കു​ന്നു; . . . ജീവി​ക്കു​ന്നവർ ഇനി തങ്ങൾക്കാ​യി​ട്ടല്ല തങ്ങൾക്കു വേണ്ടി മരിച്ചു ഉയിർത്ത​വ​ന്നാ​യി​ട്ടു തന്നേ ജീവി​ക്കേ​ണ്ട​തി​ന്നു അവൻ എല്ലാവർക്കും വേണ്ടി മരിച്ചു.” (2 കൊരി. 5:14, 15) ഒരു മനുഷ്യ​നാ​യുള്ള തന്റെ ജീവി​ത​ത്തി​ന്റെ അവസാന ദിവസം യേശു തന്റെ മരണത്തി​ന്റെ സ്‌മാ​രകം ഏർപ്പെ​ടു​ത്തി. ഓരോ വർഷവും അവന്റെ ആത്മാഭി​ഷിക്ത അനുഗാ​മി​കൾ അവന്റെ ബലിമ​രണം ആഘോ​ഷി​ക്ക​ണ​മാ​യി​രു​ന്നു. 1997 മാർച്ച്‌ 23-ന്‌ യേശു​വി​ന്റെ കൽപ്പന​യോ​ടുള്ള അനുസ​ര​ണ​ത്തിൽ അവർ അതു ചെയ്‌തു. (1 കൊരി. 11:25) മറ്റു ദശലക്ഷ​ക്ക​ണ​ക്കി​നാ​ളു​കൾ നിരീ​ക്ഷ​ക​രാ​യി അവരോ​ടൊ​പ്പം കൂടി​വന്നു. ലോക​വ്യാ​പ​ക​മാ​യുള്ള മൊത്തം ഹാജർ 1,43,22,226 ആയിരു​ന്നു. 1996-ലേതി​നെ​ക്കാൾ പത്തു ലക്ഷത്തി​ല​ധി​കം പേർ കൂടുതൽ. യഹോ​വ​യു​ടെ കൃപയു​ടെ​യും അനു​ഗ്ര​ഹ​ത്തി​ന്റെ​യും എന്തൊരു അത്ഭുത​ക​ര​മായ തെളിവ്‌!

തങ്ങളോ​ടൊത്ത്‌ സ്‌മാ​ര​ക​ത്തി​നു ഹാജരാ​കാൻ മറ്റുള്ള​വരെ ക്ഷണിക്കുന്ന കാര്യ​ത്തിൽ പല സ്ഥലങ്ങളി​ലു​മുള്ള യഹോ​വ​യു​ടെ സാക്ഷികൾ വളരെ തീക്ഷ്‌ണ​ത​യു​ള്ള​വ​രാ​യി​രു​ന്നു. ടോ​ഗോ​യി​ലെ ഗാമെ സെവാ എന്ന ഗ്രാമ​ത്തി​ലെ 19 പ്രസാ​ധകർ 820 പേർ സ്‌മാ​ര​ക​ത്തി​നു ഹാജരാ​കു​ന്നത്‌ കണ്ടതിൽ സന്തോ​ഷി​ച്ചു. കസാഖ്‌സ്ഥാ​നി​ലെ 209 പ്രസാ​ധ​ക​രുള്ള ആക്‌സൂ സഭ ഈ പ്രത്യേക പരിപാ​ടിക്ക്‌ 1,080 പേരെ സ്വാഗതം ചെയ്‌തു. ബെനി​നി​ലെ എക്‌പെ​യി​ലുള്ള 56 പ്രസാ​ധകർ, ആ പരിപാ​ടി​ക്കാ​യി 1,351 പേർ വന്നപ്പോൾ ആശ്ചര്യ​ഭ​രി​ത​രും ആനന്ദപു​ള​കി​ത​രു​മാ​യി. സ്‌മാ​ര​ക​ത്തി​ന്റെ പ്രാധാ​ന്യ​ത്തെ​ക്കു​റിച്ച്‌ ആളുകളെ ഓർമി​പ്പി​ക്കു​ന്ന​തി​നു ലൈബീ​രി​യ​യി​ലെ ബാപാ എന്ന സ്ഥലത്തെ നാലു പ്രസാ​ധകർ മാർച്ചിൽ ആവർത്തി​ച്ചാ​വർത്തി​ച്ചു സന്ദർശ​നങ്ങൾ നടത്തി. തത്‌ഫ​ല​മാ​യി 193 പേർ ആ ഗ്രാമ​ത്തിൽ സമ്മേളി​ച്ചു.

നിത്യ​ജീ​വ​നി​ലേക്കു നയിക്കുന്ന പരിജ്ഞാ​ന​ത്തി​നൊത്ത്‌ പ്രവർത്തി​ക്കൽ

ക്രിസ്‌തീയ ശുശ്രൂ​ഷ​യു​ടെ ഒരു സുപ്ര​ധാന ഘടകം ശിഷ്യ​രാ​ക്ക​ലാണ്‌. സ്വർഗ​ത്തി​ലേക്കു മടങ്ങു​ന്ന​തി​നു മുമ്പ്‌, ‘സ്‌നാനം കഴിപ്പി​ച്ചും ഉപദേ​ശി​ച്ചും​കൊണ്ട്‌ സകലജാ​തി​ക​ളെ​യും ശിഷ്യ​രാ​ക്കാൻ’ യേശു തന്റെ അനുഗാ​മി​കൾക്കു കൽപ്പന കൊടു​ത്തു. (മത്താ. 28:19, 20) അതി​നോ​ടുള്ള ചേർച്ച​യിൽ, വ്യക്തി​പ​ര​മായ ബൈബിൾ പ്രബോ​ധ​ന​മെന്ന ഒരു സൗജന്യ​പ​രി​പാ​ടിക്ക്‌ സമയം കണ്ടെത്താൻ യഹോ​വ​യു​ടെ സാക്ഷികൾ ലോക​മെ​ങ്ങു​മുള്ള ആളുകളെ ക്ഷണിക്കു​ന്നു. കഴിഞ്ഞ വർഷം ഓരോ മാസവും ശരാശരി 45,52,589 അധ്യയ​നങ്ങൾ നടത്ത​പ്പെട്ടു.

ഇത്തരം ചില അധ്യയ​നങ്ങൾ നടത്തി​യത്‌ സത്യാ​ന്വേ​ഷി​കൾക്കാ​യി​രു​ന്നു. ലബനോ​നി​ലെ ഒരു മനുഷ്യൻ വീക്ഷാ​ഗോ​പു​ര​ത്തി​ന്റെ​യും ഉണരുക!യുടെ​യും പ്രതികൾ കുപ്പ​ത്തൊ​ട്ടി​യിൽ കണ്ടെത്തി. അവ വായിച്ച അയാൾ സൗജന്യ ഭവന ബൈബി​ള​ധ്യ​യ​ന​ത്തി​നുള്ള ക്ഷണം ശ്രദ്ധിച്ചു. തുടർന്ന്‌ അദ്ദേഹം സാക്ഷി​കളെ തേടി​പ്പു​റ​പ്പെട്ടു.

ചിലർക്ക്‌ ആദ്യ​മൊ​ന്നും അത്ര താത്‌പ​ര്യ​മു​ണ്ടാ​യി​രു​ന്നില്ല. പസഫി​ക്കി​ന്റെ തെക്കു​പ​ടി​ഞ്ഞാറ്‌ കിടക്കുന്ന വനുവാ​ട്ടു​വിൽ ഒരു ഗ്രാമ​ത്ത​ല​വ​നും ഭാര്യ​യും സത്യം പഠിക്കു​ക​യും പ്രസ്‌ബി​റ്റേ​റി​യൻ സഭ വിട്ട്‌ യഹോ​വ​യു​ടെ സാക്ഷി​ക​ളോ​ടൊത്ത്‌ സഹവസി​ക്കു​ക​യും ചെയ്‌തു. അദ്ദേഹ​ത്തി​ന്റെ മകൻ അതിൽ കോപാ​കു​ല​നാ​യി. എന്നാൽ, ഒരു പയനി​യർക്ക്‌ ആ മകനോ​ടു സംസാ​രി​ക്കാൻ കഴിഞ്ഞു. ബൈബി​ള​ധ്യ​യനം നടത്തു​ന്ന​തെ​ങ്ങ​നെ​യെന്ന്‌ ‘പരീക്ഷ​ണാർഥം’ പ്രകടി​പ്പി​ച്ചു​കാ​ട്ടാ​മെന്ന്‌ ആ പയനിയർ അവനോ​ടു പറഞ്ഞു. ദൈവം നമ്മിൽനിന്ന്‌ എന്ത്‌ ആവശ്യ​പ്പെ​ടു​ന്നു? എന്ന ലഘുപ​ത്രി​ക​യാണ്‌ ഉപയോ​ഗി​ച്ചത്‌. അവർ ഒരു വിഷയം പഠിച്ചു​ക​ഴി​ഞ്ഞ​പ്പോൾ ആ ചെറു​പ്പ​ക്കാ​രൻ രണ്ടാമ​ത്തെ​യും മൂന്നാ​മ​ത്തെ​യും വിഷയങ്ങൾ പഠിക്കാ​നാ​ഗ്ര​ഹി​ച്ചു. താമസി​യാ​തെ, ആഴ്‌ച​യിൽ രണ്ടു പ്രാവ​ശ്യം അധ്യയ​ന​ത്തി​ലേർപ്പെട്ട അവൻ യോഗ​ങ്ങൾക്കു വന്നുതു​ടങ്ങി.

രസം പിടി​ച്ചു​ക​ഴി​ഞ്ഞാൽ, പലരും ആഴ്‌ച​യിൽ പല പ്രാവ​ശ്യം പഠിക്കാ​നാ​ഗ്ര​ഹി​ക്കു​ന്നു. താനൊ​രു നിരീ​ശ്വ​ര​വാ​ദി​യാ​ണെന്ന്‌ അവകാ​ശ​പ്പെ​ട്ടി​രുന്ന ഡെൻമാർക്കി​ലെ ലാസ്‌ എന്നയാ​ളു​ടെ കാര്യ​ത്തിൽ അത്‌ സത്യമാ​യി​രു​ന്നു. ജീവൻ—അത്‌ ഇവിടെ എങ്ങനെ വന്നു? പരിണാ​മ​ത്താ​ലോ സൃഷ്ടി​യാ​ലോ? (ഇംഗ്ലീഷ്‌) എന്ന പുസ്‌തകം വായി​ച്ച​പ്പോൾ ദൈവ​മു​ണ്ടെന്ന്‌ പെട്ടെ​ന്നു​തന്നെ അദ്ദേഹ​ത്തി​നു ബോധ്യ​മാ​യി. അങ്ങനെ കൂടുതൽ കാര്യങ്ങൾ പഠിക്കാൻ അദ്ദേഹ​ത്തിന്‌ ആകാം​ക്ഷ​യാ​യി. വളരെ​യ​ധി​കം ആകാം​ക്ഷ​യു​ണ്ടാ​യി​രു​ന്ന​തി​നാൽ നിത്യ​ജീ​വ​നി​ലേക്കു നയിക്കുന്ന പരിജ്ഞാ​നം എന്ന പുസ്‌തകം ഉപയോ​ഗിച്ച്‌ അദ്ദേഹം താമസി​യാ​തെ ആഴ്‌ച​യിൽ മൂന്നു പ്രാവ​ശ്യം പഠിക്കാൻ തുടങ്ങി. മൂന്നു സഹോ​ദ​ര​ന്മാർ മാറി​മാ​റി​യാണ്‌ അധ്യയ​ന​മെ​ടു​ത്തത്‌.

തീർച്ച​യാ​യും, കേവലം അറിവു​ണ്ടാ​യി​രി​ക്കു​ന്നതു മാത്രം മതിയാ​കു​ന്നില്ല. ഒരു വ്യക്തി ദൈവ​ഹി​തം ചെയ്യേ​ണ്ട​തുണ്ട്‌. ചില​പ്പോൾ വലിയ മാറ്റങ്ങൾ വരു​ത്തേ​ണ്ടി​വ​രും. ഇന്തോ​നേ​ഷ്യ​യി​ലെ ഒരു ചെറു​പ്പ​ക്കാ​രന്റെ നടത്ത ഞെട്ടി​ക്കു​ന്ന​താ​യി​രു​ന്നു. അതു​കൊണ്ട്‌ അവന്റെ കൺഫ്യൂ​ഷ്യസ്‌ മാതാ​പി​താ​ക്കൾ അവനെ തിരു​ത്താ​നാ​കാ​ത്ത​വ​നെന്ന നിലയിൽ അധികാ​രി​കളെ ഏൽപ്പിച്ചു. എന്നാൽ ഒടുവിൽ അവൻ യഹോ​വ​യു​ടെ സാക്ഷി​ക​ളു​ടെ യോഗ​ങ്ങൾക്കു പോയ​പ്പോൾ തന്നോടു കാണിച്ച ആത്മാർഥ​ത​യും സ്‌നേ​ഹ​വും യഹോ​വ​യെ​ക്കു​റിച്ച്‌ അറിയാൻ അവനെ പ്രേരി​പ്പി​ച്ചു. രണ്ടു മാസത്തെ പഠനത്തി​നു​ശേഷം അവൻ ജീവി​ത​ത്തിൽ വലിയ മാറ്റങ്ങൾ വരുത്തി. പുകവ​ലി​യും മയക്കു​മ​രു​ന്നു​പ​യോ​ഗ​വും നിർത്തി. താമസി​യാ​തെ അവൻ പ്രസാ​ധ​ക​നാ​യി, സ്‌നാ​പ​ന​മേറ്റു, സഹായ പയനി​യ​റാ​യി, പിന്നീട്‌ ഒരു നിരന്ത​ര​പ​യ​നി​യ​റാ​യി—ഇതെല്ലാം 15 മാസത്തി​നു​ള്ളിൽ!

വെളി​പ്പാ​ടു 7:9, 10-ൽ മുൻകൂ​ട്ടി​പ്പ​റ​ഞ്ഞി​രി​ക്കു​ന്ന​തു​പോ​ലെ, സകല ജനതക​ളിൽനി​ന്നും ഗോ​ത്ര​ങ്ങ​ളിൽനി​ന്നും ആളുക​ളിൽനി​ന്നും ഭാഷക​ളിൽനി​ന്നു​മുള്ള “ഒരു മഹാപു​രു​ഷാ​രം” വാസ്‌ത​വ​ത്തിൽ യഹോ​വയെ സേവി​ക്കാൻ വന്നു​കൊ​ണ്ടി​രി​ക്കു​ന്നു.

ആളുക​ളു​ടെ അടുക്കൽ എത്തി​ച്ചേ​രു​ന്ന​തി​ലുള്ള കഴിവ്‌

യേശു​ക്രി​സ്‌തു തന്റെ ശുശ്രൂഷ നിർവ​ഹി​ച്ച​പ്പോൾ അവൻ ആളുക​ളു​ണ്ടാ​യി​രു​ന്നി​ട​ത്തേക്കു പോയി. അങ്ങനെ അവൻ സ്വകാര്യ ഭവനങ്ങ​ളി​ലെത്തി. മീൻപി​ടി​ത്ത​ക്കാർ വല നന്നാക്കി​ക്കൊ​ണ്ടി​രുന്ന സ്ഥലത്തും ഒരു ഗ്രാമ​ത്തി​ലെ കിണറ്റിൻക​ര​യി​ലും യെരൂ​ശ​ലേ​മി​ലെ ആലയത്തി​ലു​മൊ​ക്കെ അവൻ സാക്ഷീ​ക​രണം നടത്തി. (മത്താ. 13:1, 2; 26:55; ലൂക്കൊ. 5:1-3; യോഹ. 4:5-26) അപ്പോ​സ്‌ത​ല​നായ പൗലൊ​സും പരസ്യ​മാ​യും “വീടു​തോ​റും” പ്രസം​ഗി​ച്ചു. കാരണം, ആരും ഒഴിവാ​ക്ക​പ്പെ​ടു​ന്നി​ല്ലെന്ന്‌ ഉറപ്പു വരുത്തു​ന്ന​തി​നുള്ള ഉത്തമ മാർഗം അതായി​രു​ന്നു. (പ്രവൃ. 20:20) ഇത്‌ അനുക​രി​ച്ചു​കൊണ്ട്‌ ഇന്ന്‌ യഹോ​വ​യു​ടെ സാക്ഷികൾ ആളുക​ളു​ള്ളി​ട​ത്തേക്കു പോകു​ന്നു.

മുമ്പെ​ന്ന​ത്തെ​ക്കാ​ളു​മ​ധി​കം സാക്ഷീ​ക​രണം ഇന്ന്‌ ടെല​ഫോൺവഴി നടത്ത​പ്പെ​ടു​ന്നു. ഉയർന്ന സുരക്ഷാ​സം​വി​ധാ​ന​ങ്ങ​ളുള്ള അപ്പാർട്ടു​മെൻറു​ക​ളി​ലും കവാടം അടച്ചി​ട്ടി​രി​ക്കുന്ന കെട്ടി​ട​ങ്ങ​ളി​ലും പ്രവേ​ശനം നിരോ​ധി​ച്ചി​രി​ക്കുന്ന സ്ഥലങ്ങളി​ലു​മുള്ള ആളുക​ളു​മാ​യി പതിവാ​യി ബന്ധപ്പെ​ടു​ന്ന​തിന്‌ ഇതുമൂ​ലം കഴിയു​ന്നു. ഒറ്റപ്പെട്ട അനേകം ചെറു​ദ്വീ​പു​കൾ ചേർന്ന​താണ്‌ ബഹാമസ്‌. അവിടത്തെ ഇത്തരം നൂറു​ക​ണ​ക്കി​നു ദ്വീപു​ക​ളി​ലെ ആളുക​ളു​മാ​യി ബന്ധപ്പെ​ടു​ന്ന​തി​നും ടെല​ഫോൺ ഉപയോ​ഗി​ച്ചു​വ​രു​ന്നു. ദൂരവും ആളുക​ളു​ടെ പക്കൽ എത്തി​ച്ചേ​രു​ന്ന​തി​ന്റെ ചെലവും എപ്പോ​ഴും വലിയ വെല്ലു​വി​ളി​യാണ്‌. ഇപ്പോൾ ടെല​ഫോൺവഴി ക്രമമായ “സന്ദർശ​നങ്ങൾ” നടത്തു​ന്നുണ്ട്‌.

ഡൊമി​നി​ക്കൻ റിപ്പബ്ലി​ക്കി​ലെ ഒരു പ്രസാ​ധകൻ വിമാ​ന​ത്താ​വ​ള​ത്തിൽ സാക്ഷീ​ക​രണം ആസ്വദി​ക്കു​ന്നു. ആ പ്രസാ​ധകൻ ഇങ്ങനെ റിപ്പോർട്ടു ചെയ്യുന്നു: “വിമാ​ന​ത്താ​വള പ്രദേശം പ്രത്യേ​ക​ത​യു​ള്ള​താണ്‌. പാസ്‌പോർട്ട്‌ പോലു​മി​ല്ലാ​തെ എനിക്ക്‌ അനേകം ദേശങ്ങ​ളി​ലു​ള്ള​വ​രോ​ടു സംസാ​രി​ക്കാൻ കഴിയു​ന്നു. യാത്രി​കർക്കു കൂടെ കൊണ്ടു​പോ​കാൻ കഴിയുന്ന രസകര​മായ ലേഖന​ങ്ങ​ള​ട​ങ്ങിയ മാസി​കകൾ ഞാൻ നൽകുന്നു. വിമാ​ന​ത്താ​വ​ള​ത്തി​ലേക്കു യാത്ര​ക്കാ​രെ കൊണ്ടു​വ​രു​ന്ന​വ​രെ​യും വരുന്ന യാത്ര​ക്കാർക്കാ​യി കാത്തു​നിൽക്കു​ന്ന​വ​രെ​യും ഞാൻ സമീപി​ക്കാ​റുണ്ട്‌. ഓരോ മണിക്കൂ​റി​ലെ​യും എന്റെ മാസി​കാ​സ​മർപ്പണം 30 ആണ്‌. ഇപ്പോൾ വിമാ​ന​ത്താ​വ​ള​ത്തി​ലെ ജോലി​ക്കാർ ഏറ്റവും പുതിയ മാസി​ക​കൾക്കാ​യി ഞാൻ വരുന്ന​തും കാത്തി​രി​ക്കു​ന്നു. ജോലി​ക്കാ​രിൽ ഒരാളു​മാ​യി ഞാൻ ബൈബി​ള​ധ്യ​യനം തുടങ്ങി​ക്ക​ഴി​ഞ്ഞു.” ഡൊമി​നി​ക്കൻ റിപ്പബ്ലി​ക്കി​ലെ ഒരു പ്രധാന പരിപാ​ടി​യായ ദേശീയ പുസ്‌ത​കച്ചന്ത നടന്ന അവസര​ത്തിൽ കഴിഞ്ഞ വർഷം പുസ്‌ത​ക​പ്ര​ദർശ​ന​ത്തി​നാ​യി സാക്ഷി​ക​ളും ഒരു ബൂത്ത്‌ തുറന്നു. അവി​ടെ​വെച്ച്‌ നടന്ന അനവധി സംഭാ​ഷ​ണങ്ങൾ ധാരാളം ബൈബി​ള​ധ്യ​യ​ന​ങ്ങൾക്കു വഴി​തെ​ളി​ച്ചു.

തായ്‌വാ​നി​ലെ ഒരു സഭയിലെ മൂപ്പന്മാർ തങ്ങളുടെ പ്രദേ​ശത്തെ വലിയ ആശുപ​ത്രി​ക​ളിൽ യോഗ്യ​ത​യുള്ള സഹോ​ദ​രീ​സ​ഹോ​ദ​ര​ന്മാർ സന്ദർശനം നടത്തു​ന്ന​തി​നുള്ള ക്രമീ​ക​ര​ണങ്ങൾ ചെയ്‌തു. രണ്ടു സഹോ​ദ​രി​മാർ ഡയാലി​സിസ്‌ ഡിപ്പാർട്ട്‌മെൻറ്‌ സന്ദർശി​ച്ചു. മണിക്കൂ​റു​ക​ളോ​ളം അവി​ടെ​യാ​യി​രി​ക്കേ​ണ്ടി​വ​രുന്ന രോഗി​ക​ളു​മാ​യി സൗഹൃദം സ്ഥാപി​ക്കു​ക​യെ​ന്ന​താ​യി​രു​ന്നു അവരുടെ ലക്ഷ്യം. നല്ല ഫലങ്ങളു​ണ്ടാ​യി​ട്ടു​ണ്ടോ? ഒരു ഉദാഹ​രണം പരിചി​ന്തി​ക്കുക. ഒരാൾ കുറച്ചു താത്‌പ​ര്യം കാട്ടി​യ​പ്പോൾ ഒരു സഹോ​ദരി തന്റെ ഭർത്താ​വി​നെ കൂട്ടി​ക്കൊ​ണ്ടു​വന്ന്‌ അയാൾക്കു പരിച​യ​പ്പെ​ടു​ത്തി. അങ്ങനെ ഒരു അധ്യയനം തുടങ്ങി. അത്‌ ഓരോ വാരത്തി​ലും ആ ആശുപ​ത്രി​യിൽവെച്ചു നടത്തുന്നു. താമസി​യാ​തെ, ആ മനുഷ്യൻ ക്രമമാ​യി യോഗ​ങ്ങ​ളിൽ സംബന്ധി​ച്ചു​തു​ടങ്ങി.

ശവസം​സ്‌കാ​രം നടത്തു​ന്ന​വർക്കു നൽകാ​നാ​യി ഓസ്‌​ട്രേ​ലി​യ​യി​ലെ ചില സാക്ഷികൾ ഒരു പായ്‌ക്ക​റ്റു​ണ്ടാ​ക്കി. നിങ്ങൾ സ്‌നേ​ഹി​ക്കുന്ന ആരെങ്കി​ലും മരിക്കു​മ്പോൾ, ദൈവം യഥാർത്ഥ​ത്തിൽ നമ്മെ സംബന്ധി​ച്ചു കരുതു​ന്നു​വോ? എന്നീ ലഘുപ​ത്രി​ക​ക​ളും ദുഃഖി​ക്കു​ന്ന​വർക്കു പറ്റിയ ഏതാനും ലഘു​ലേ​ഖ​ക​ളും അതിൽ അടങ്ങി​യി​രു​ന്നു. അവ സന്തോ​ഷ​പൂർവം സ്വീക​രി​ക്ക​പ്പെട്ടു. പുതിയ ലഘുപ​ത്രി​ക​ക​ളും ലഘു​ലേ​ഖ​ക​ളും കൊടു​ക്കു​ന്ന​തിന്‌ സഹോ​ദ​രങ്ങൾ ഇടയ്‌ക്കി​ടെ അവരെ സന്ദർശി​ക്കാ​റുണ്ട്‌.

അനേകം ദേശങ്ങ​ളി​ലും ജയിൽപ്പു​ള്ളി​ക​ളു​ടെ എണ്ണം കുതി​ച്ചു​യർന്നി​രി​ക്കു​ന്നു. സാധ്യ​മാ​കു​ന്നി​ടത്ത്‌ യഹോ​വ​യു​ടെ സാക്ഷികൾ ജയിലി​ലും പ്രസം​ഗി​ക്കു​ന്നു. 6,000 അന്തേവാ​സി​ക​ളുള്ള ഒരു കാരാ​ഗൃ​ഹം ഉൾപ്പെ​ടെ​യുള്ള ജയിൽസ​മു​ച്ചയം 15 വർഷങ്ങൾക്കു മുമ്പ്‌ ബ്രസീ​ലി​ലെ സാവൊ പൗലോ​യി​ലുള്ള സാക്ഷികൾ സന്ദർശി​ക്കാൻ തുടങ്ങി. അവിടെ 45 ബൈബി​ള​ധ്യ​യ​നങ്ങൾ ക്രമമാ​യി നടത്തുന്നു. ആ അന്തേവാ​സി​ക​ളിൽ ഒമ്പതു പേർ ഇപ്പോൾ രാജ്യ​ഘോ​ഷ​ക​രാണ്‌. അവരെ​ല്ലാ​വ​രും സത്യം പഠിച്ചത്‌ ജയിലിൽവെ​ച്ചാണ്‌. സ്‌നാ​പ​ന​മേൽക്കു​മ്പോൾ അവർ സഹായ പയനി​യർമാ​രാ​യി പേർ ചാർത്തു​ന്നു. അന്തേവാ​സി​ക​ളിൽ ചിലർ തങ്ങളുടെ കുടും​ബാം​ഗ​ങ്ങ​ളു​മാ​യി പ്രതി​വാര ബൈബി​ള​ധ്യ​യ​നങ്ങൾ നടത്തുന്നു. ഒരാൾ മറ്റ്‌ 30 അന്തേവാ​സി​കളെ എഴുത്തും വായന​യും പഠിപ്പി​ക്കു​ന്നു. തത്‌ഫ​ല​മാ​യി, ജയിൽപ്പു​ള്ളി​കൾക്കി​ട​യിൽ നടത്തുന്ന ഈ വേലയെ ജയില​ധി​കാ​രി​കൾ പുകഴ്‌ത്തു​ന്നു.

ദക്ഷിണാ​ഫ്രി​ക്ക​യി​ലെ രണ്ടു സാക്ഷികൾ കോട​തി​ക്കെ​ട്ടി​ട​ങ്ങ​ളി​ലെ മജിസ്‌​ട്രേ​ട്ടു​മാ​രെ​യും അഭിഭാ​ഷ​ക​രെ​യും ക്ലർക്കു​മാ​രെ​യും സന്ദർശി​ച്ചു. ഇവി​ടെ​വെച്ച്‌ അവർ ഒരു വിവാഹ രജിസ്‌ട്രാ​റെ കണ്ടുമു​ട്ടി. “നിങ്ങൾ നേരത്തേ എന്തു​കൊണ്ട്‌ വന്നില്ല?” എന്നായി​രു​ന്നു അവരുടെ ചോദ്യം. അന്ന്‌ രാവിലെ 20-ലധികം വ്യക്തി​കളെ താൻ വിവാഹം കഴിപ്പി​ച്ച​തേ​യു​ള്ളു​വെന്ന്‌ അവർ വിശദീ​ക​രി​ച്ചു. കുടും​ബ​സ​ന്തു​ഷ്ടി​യു​ടെ രഹസ്യം എന്ന പുസ്‌തകം അവർ സ്വീക​രി​ച്ചു. അവരുടെ ഓഫീ​സി​ലു​ണ്ടാ​യി​രുന്ന മൂന്ന്‌ ദമ്പതി​ക​ളും ആ പുസ്‌തകം വാങ്ങി. ഇപ്പോൾ സഹോ​ദ​രങ്ങൾ വാരത്തിൽ മൂന്നു പ്രാവ​ശ്യം അവിടെ പോകാ​റുണ്ട്‌, 60-ഓ 100-ഓ പേർ വരുന്ന ഒരു സദസ്സിന്റെ മുമ്പാകെ അവർ അഞ്ചു മിനിറ്റു നേരത്തെ ഒരു പ്രസംഗം നടത്തുന്നു. വിവാഹം സംബന്ധിച്ച യഹോ​വ​യു​ടെ വീക്ഷണം അവർ വിശദീ​ക​രി​ക്കു​ക​യും അതേ കോട​തി​യിൽ എല്ലാ വെള്ളി​യാ​ഴ്‌ച​യും 100-ലധികം വിവാ​ഹ​ബ​ന്ധങ്ങൾ വിവാ​ഹ​മോ​ച​ന​ത്തിൽ കലാശി​ക്കു​ന്നു​വെന്നു പരാമർശി​ക്കു​ക​യും ചെയ്യുന്നു. എന്നിട്ട്‌ വിവാ​ഹ​ജീ​വി​തം വിജയ​പ്ര​ദ​മാ​ക്കാൻ ദമ്പതി​കളെ സഹായി​ക്കു​ന്ന​തിന്‌ അവർ കുടും​ബ​സ​ന്തു​ഷ്ടി പുസ്‌തകം സമർപ്പി​ക്കു​ന്നു.

ഒരു പ്രത്യേക സമ്മേള​ന​ദി​ന​ത്തി​നു പോകവേ ഫിലി​പ്പീൻസി​ലെ ബെഥേൽ ഭവനത്തി​ലുള്ള ഒരംഗം ഒരു ദീർഘ​ദൂര ബസ്സിൽ യാത്ര ചെയ്യു​ക​യാ​യി​രു​ന്നു. യാത്ര​ക്കാ​രു​ടെ നേരം​പോ​ക്കി​നു വേണ്ടി ബസ്‌ ജീവന​ക്കാർ അതിൽ വീഡി​യോ കാസെറ്റ്‌ പ്ലെയർ ഉപയോ​ഗിച്ച്‌ സിനി​മകൾ പ്രദർശി​പ്പി​ക്കു​മാ​യി​രു​ന്നു. എന്നാൽ, ഈ യാത്ര​യിൽ താൻ കൂടെ കൊണ്ടു​വന്ന വീഡി​യോ​ടേപ്പ്‌ ഇട്ടു​കൊ​ള്ള​ട്ടേ​യെന്ന്‌ സഹോ​ദരൻ ചോദി​ച്ചു. ബസ്‌ കണ്ടക്ടർ സമ്മതിച്ചു. തത്‌ഫ​ല​മാ​യി യഹോ​വ​യു​ടെ സാക്ഷികൾ—ആ പേരിനു പിമ്പിലെ സ്ഥാപനം എന്ന വീഡി​യോ 70 യാത്ര​ക്കാർ കണ്ടു. തീർച്ച​യാ​യും, ആളുകളെ സുവാർത്ത കേൾപ്പി​ക്കാൻ അനവധി മാർഗ​ങ്ങ​ളുണ്ട്‌.

‘പ്രവർത്തി​ക്കാത്ത പ്രദേ​ശത്ത്‌’ പ്രസം​ഗി​ക്കു​ന്ന​തി​ന്റെ സന്തോഷം

മുമ്പ്‌ സാക്ഷ്യം നൽക​പ്പെ​ടാ​തി​രുന്ന പ്രദേ​ശ​ങ്ങ​ളിൽ പ്രവർത്തി​ക്കു​ന്ന​തിൽ പൗലൊസ്‌ അപ്പോ​സ്‌തലൻ സന്തോഷം കണ്ടെത്തി. അതു​പോ​ലെ, “പ്രവർത്തി​ക്കാത്ത പ്രദേശ”ങ്ങളിലും ക്രമമായ സാക്ഷീ​ക​രണം നടത്താത്ത ഇടങ്ങളി​ലും പ്രവർത്തി​ക്കാൻ ആധുനി​ക​കാല യഹോ​വ​യു​ടെ സാക്ഷി​ക​ളിൽ ചിലർ തങ്ങളെ​ത്തന്നെ ലഭ്യരാ​ക്കി​യി​രി​ക്കു​ന്നു.—റോമ. 15:23.

പൂർവ​യൂ​റോ​പ്പി​ലെ മൊൾഡോ​വ​യി​ലുള്ള വലിയ ഗ്രാമ​പ്ര​ദേ​ശങ്ങൾ സുവാർത്താ​പ്ര​സം​ഗ​ത്തി​ന്റെ കാര്യ​ത്തിൽ പ്രവർത്തി​ക്കാത്ത പ്രദേ​ശ​ങ്ങ​ളാണ്‌. എങ്കിലും ശ്രദ്ധ കൊടു​ത്ത​പ്പോൾ ചില ഗ്രാമ​ങ്ങ​ളിൽ നല്ല ഫലമു​ള്ള​താ​യി തെളിഞ്ഞു. അത്തര​മൊ​രു പ്രദേ​ശത്തെ രണ്ടു ഗ്രാമ​ങ്ങ​ളിൽ റ്റിഗി​ന​യി​ലെ ഒരു സഭ 1997 ജനുവ​രി​യിൽ പ്രവർത്തി​ച്ചു. പെട്ടെ​ന്നു​തന്നെ അധ്യയ​നങ്ങൾ ആരംഭി​ച്ചു. ഗ്രീഷ്‌മ​കാല ഡിസ്‌ട്രി​ക്‌റ്റ്‌ കൺ​വെൻ​ഷ​നിൽ ആ ഗ്രാമ​ങ്ങ​ളിൽനി​ന്നുള്ള 13 പേർ സ്‌നാ​പ​ന​മേറ്റു. സന്തോ​ഷി​ക്കാൻ എന്തൊരു കാരണം!

ഒറ്റപ്പെട്ട പ്രദേ​ശ​ങ്ങ​ളിൽ സാക്ഷീ​ക​രണം നടത്തു​ക​വഴി തന്റെ സേവനം വികസി​പ്പി​ക്കാൻ പെറു​വി​ലെ ലിമയി​ലുള്ള ഒരു പയനിയർ സഹോ​ദരി ആഗ്രഹി​ച്ചു. ആൻഡാ​മാർക്കാ ജില്ലയി​ലുള്ള സ്വന്തപ​ട്ട​ണ​ത്തി​ലേക്ക്‌ അവൾ 15 മണിക്കൂർ ബസ്‌ യാത്ര നടത്തി. അവിടെ പാർക്കുന്ന 7,000 ആളുക​ളിൽ ഒരാൾപോ​ലും സാക്ഷി​യാ​യി​രു​ന്നില്ല. അതിശ​യ​ക​ര​മെന്നു പറയട്ടെ അവൾക്കു പെട്ടെ​ന്നു​തന്നെ ഒരു ജോലി തരപ്പെട്ടു. അവളുടെ പയനിയർ പങ്കാളി​യും അവി​ടേക്കു വന്നു. അവിടെ ഡോക്ടർമാർ, എഞ്ചിനി​യർമാർ, വാസ്‌തു​ശിൽപ്പി​കൾ എന്നിവ​രോ​ടും ജോലി​ക്കാ​രായ മറ്റാളു​ക​ളോ​ടും സാക്ഷീ​ക​രി​ക്കു​ന്നത്‌ അതിശ​യ​ക​ര​മാം​വി​ധം എളുപ്പ​മാ​ണെന്ന്‌ അവർ കണ്ടെത്തി. ചിലർക്ക്‌ യഥാർഥ​മായ ആത്മീയ വിശപ്പു​ണ്ടാ​യി​രു​ന്നു. വെറും രണ്ടു മാസത്തി​നു​ള്ളിൽ സഭാ​യോ​ഗ​ങ്ങ​ളിൽ മൂന്നെണ്ണം സ്ഥിരമാ​യി​ത്തന്നെ നടത്താൻ കഴിഞ്ഞു. 15 പേർ യോഗ​ങ്ങൾക്കു കൂടി​വന്നു. സസ്‌മാ​ര​ക​ത്തിന്‌ 66 പേർ ഹാജരാ​യി.

ഗയാന​യിൽ ആവശ്യം കൂടു​ത​ലുള്ള ഒരിടത്ത്‌ പ്രവർത്തി​ക്കുന്ന ഒരു പയനിയർ ദമ്പതി​കൾക്കു തങ്ങളുടെ പ്രദേ​ശത്ത്‌ എത്തുന്ന​തി​നു മുമ്പു​തന്നെ നല്ല ഫലങ്ങൾ ലഭിച്ചു. അവർ രാത്രി തങ്ങിയ സ്ഥലത്ത്‌ പ്രാ​ദേ​ശിക ഗ്രാമ​വാ​സി​ക​ളിൽ ചില​രോ​ടു സംസാ​രി​ച്ചു. പിറ്റേന്ന്‌ രാവിലെ അവർ യാത്ര തുടങ്ങു​ന്ന​തി​നു മുമ്പ്‌, ഒരു കൊച്ചു പെൺകു​ട്ടി അവരുടെ കൂടാ​ര​ത്തിൽ വന്ന്‌ തന്റെ അമ്മ അവരോ​ടു സംസാ​രി​ക്കാൻ ആഗ്രഹി​ക്കു​ന്ന​താ​യി പറഞ്ഞു. 14 വർഷമാ​യി സൊ​സൈ​റ്റി​യു​ടെ സാഹി​ത്യ​ങ്ങൾ വായി​ക്കുന്ന ഒരു സ്‌ത്രീ​യെ കണ്ടത്‌ അവരെ എത്രമാ​ത്രം അതിശ​യി​പ്പി​ച്ചെ​ന്നോ! അവരുടെ സഹോ​ദരി അവർക്കത്‌ ഐക്യ​നാ​ടു​ക​ളിൽനിന്ന്‌ അയച്ചു​കൊ​ടു​ത്ത​താ​യി​രു​ന്നു. ആ കുടും​ബ​ത്തിൽ അവയ്‌ക്കു ശക്തമായ സ്വാധീ​ന​മു​ണ്ടാ​യി​രു​ന്ന​തി​നാൽ അവർ കത്തോ​ലി​ക്കാ​സ​ഭ​യിൽനിന്ന്‌ വിട്ടു​പോ​ന്നു, തന്മൂലം സമൂഹം അവർക്കു ഭ്രഷ്ട്‌ കൽപ്പി​ക്കു​ക​പോ​ലും ചെയ്‌തു! അവർ അതെല്ലാം സഹിച്ചു. പിറ്റേ ഞായറാഴ്‌ച ഒരു യോഗ​ത്തി​നുള്ള ക്രമീ​ക​രണം ചെയ്യ​പ്പെട്ടു. ആ സ്‌ത്രീ​യു​ടെ കുടും​ബ​ത്തി​ലെ 23 പേരുൾപ്പെടെ 47 പേർ ഹാജരാ​യി​രു​ന്നു. പിന്നീട്‌ അവിടെ സ്‌മാ​രകം നടത്തു​ന്ന​തി​നുള്ള ക്രമീ​ക​ര​ണങ്ങൾ ചെയ്യ​പ്പെട്ടു. അതിന്‌ 66 പേർ ഹാജരാ​യി. ‘മക്കെ​ദോ​ന്യ​യി​ലേക്കു കടന്നു​വന്ന്‌ സഹായി​ക്കാ​നുള്ള’ വിളി​യോ​ടു പ്രതി​ക​രി​ക്കു​ന്ന​വ​രു​ടേത്‌ എത്ര സമൃദ്ധ​മായ അനു​ഗ്ര​ഹ​ങ്ങ​ളാണ്‌!—പ്രവൃ. 16:9.

കുട്ടികൾ ‘യഹോ​വ​യു​ടെ നാമത്തെ സ്‌തു​തി​ക്കു​ന്നു’

യഹോ​വയെ തീക്ഷ്‌ണ​ത​യോ​ടെ സേവി​ക്കു​ന്ന​തിൽ അനേകം കുട്ടി​ക​ളു​മു​ള്ളത്‌ തികച്ചും പ്രോ​ത്സാ​ഹ​ജ​ന​ക​മാണ്‌. സങ്കീർത്തനം 148:7-13 ഇങ്ങനെ ക്ഷണിക്കു​ന്നു: “ഭൂമി​യിൽനി​ന്നു യഹോ​വയെ സ്‌തു​തി​പ്പിൻ. . . . യുവാ​ക്ക​ളും യുവതി​ക​ളും, വൃദ്ധന്മാ​രും ബാലന്മാ​രും ഇവരൊ​ക്കെ​യും യഹോ​വ​യു​ടെ നാമത്തെ സ്‌തു​തി​ക്കട്ടെ; അവന്റെ നാമം മാത്രം ഉയർന്നി​രി​ക്കു​ന്നു. അവന്റെ മഹത്വം ഭൂമി​ക്കും ആകാശ​ത്തി​ന്നും മേലാ​യി​രി​ക്കു​ന്നു.” ആ ഹൃദ്യ​മായ ക്ഷണം അനേകാ​യി​രങ്ങൾ സ്വീക​രി​ക്കു​ന്നു. അവർ വാക്കാ​ലും ക്രിസ്‌തീയ നടത്തയാ​ലും നല്ല സാക്ഷ്യം കൊടു​ക്കാ​നുള്ള അവസരങ്ങൾ തേടുന്നു.

ഘാനയി​ലെ പ്രസാ​ധ​ക​രു​ടെ ഇടയിൽ നടത്തിയ ഒരു സർവേ, അവി​ടെ​യുള്ള 50,000-ത്തിലധി​കം വരുന്ന പ്രസാ​ധ​ക​രിൽ 12 ശതമാ​ന​വും 6-നും 20-നും ഇടയ്‌ക്കു പ്രായ​മു​ള്ള​വ​രാ​ണെന്നു പ്രകട​മാ​ക്കു​ന്നു. അടുത്ത കാലത്തെ കൺ​വെൻ​ഷൻ പരമ്പര​ക​ളിൽ സ്‌നാ​പ​ന​മേറ്റ 3,441 പേരിൽ പകുതി​യും 12 വയസ്സു​മു​തൽ മേലോട്ട്‌ പ്രായ​മുള്ള യുവജ​ന​ങ്ങ​ളാ​ണെന്ന്‌ അർജൻറീ​ന​യി​ലെ ബ്രാഞ്ച്‌ റിപ്പോർട്ടു ചെയ്യുന്നു. ഇവരിൽ മിക്കവ​രും ഇപ്പോ​ഴും സ്‌കൂ​ളിൽ പോകു​ന്ന​വ​രാണ്‌. മറ്റുള്ള​വർക്കു സത്വരം കടന്നു​ചെ​ല്ലാ​നാ​കാത്ത സവി​ശേ​ഷ​മായ ഒരു പ്രദേ​ശ​മാണ്‌ അവരു​ടേത്‌. അതു മിക്ക​പ്പോ​ഴും ഫലപ്ര​ദ​മായ പ്രദേ​ശ​മാ​ണു​താ​നും.

ഘാനയി​ലെ സ്‌നാ​പ​ന​മേൽക്കാത്ത ആറുവ​യ​സ്സു​കാ​ര​നാണ്‌ ഡാനി​യേൽ. അവൻ പത്തു ബൈബി​ള​ധ്യ​യ​നങ്ങൾ നടത്തുന്നു. മിക്കതും സ്‌കൂ​ളി​ലെ സ്‌നേ​ഹി​ത​രു​മാ​യി. അവരിൽ ഒരുവ​നായ ഒരു 19-വയസ്സു​കാ​രൻ കഴിഞ്ഞ മാർച്ചിൽ സ്‌മാ​ര​ക​ത്തി​നു ഹാജരാ​യി. അധ്യാ​പകൻ മൃഗജീ​വന്റെ ഉത്ഭവം സംബന്ധിച്ച്‌ തെറ്റായ ഒരു പ്രസ്‌താ​വന ക്ലാസ്സിൽ നടത്തി​യ​പ്പോൾ ഡാനി​യേൽ അതൊരു അവസര​മാ​യി​ക്കണ്ടു. ഇടവേള സമയത്ത്‌ അവൻ അധ്യാ​പ​കന്റെ അടുത്തു ചെന്ന്‌, തങ്ങൾ ചർച്ച ചെയ്‌ത വിഷയ​ത്തെ​ക്കു​റിച്ച്‌ കൂടുതൽ കാര്യങ്ങൾ മനസ്സി​ലാ​ക്കാൻ സഹായി​ക്കുന്ന ഒരു പ്രസി​ദ്ധീ​ക​രണം തന്റെ പക്കലു​ണ്ടെന്ന്‌ പറഞ്ഞു. അധ്യാ​പകൻ ഒരു ലഘുപ​ത്രിക വായി​ച്ച​ശേഷം ഡാനി​യേ​ലി​ന്റെ പിതാ​വി​നൊ​രു കുറി​പ്പെ​ഴു​തി. ആ അധ്യാ​പ​ക​നി​പ്പോൾ നിത്യ​ജീ​വ​നി​ലേക്കു നയിക്കുന്ന അറിവു നേടു​ന്ന​തിൽ പുരോ​ഗ​മി​ച്ചു​കൊ​ണ്ടി​രി​ക്കു​ന്നു.

ദൈവ​ഭ​യ​മു​ള്ള മാതാ​പി​താ​ക്ക​ളിൽനിന്ന്‌ അഭ്യസനം ലഭിച്ചി​ട്ടുള്ള സ്‌കൂൾപ്രാ​യ​മെ​ത്താത്ത കുട്ടി​കൾക്കു​പോ​ലും സാക്ഷ്യം നൽകു​ന്ന​തിൽ ഫലപ്ര​ദ​മായ പങ്കുണ്ടാ​യി​രി​ക്കാൻ കഴിയും. റഷ്യയിൽ ഒരു മാതാ​വും അഞ്ചുവ​യ​സ്സുള്ള മകളും ഭൂഗർഭ​തീ​വ​ണ്ടി​യിൽ സഞ്ചരി​ക്കു​മ്പോൾ മിക്ക​പ്പോ​ഴും സംഭാ​ഷ​ണ​ങ്ങൾക്കു തുടക്ക​മി​ടു​ന്നത്‌ ആ കൊച്ചു കുട്ടി​യാ​യി​രി​ക്കും. അവർക്ക​ടു​ത്താ​യി ആരെങ്കി​ലും ഇരിപ്പു​ണ്ടെ​ങ്കിൽ ആ കുട്ടി ഉടനെ ചോദി​ക്കും, “ആൻറീ, ദൈവ​ത്തി​ന്റെ പേര്‌ യഹോ​വ​യാ​ണെന്ന്‌ ആൻറി​ക്ക​റി​യാ​മോ?” മിക്ക​പ്പോ​ഴും ലഭിക്കുന്ന ഉത്തരം “ഇല്ല” എന്നായി​രി​ക്കും. അപ്പോൾ കുട്ടി മമ്മിയു​ടെ നേർക്കു തിരി​ഞ്ഞിട്ട്‌ പറയും: “മമ്മീ, അതേക്കു​റിച്ച്‌ ആൻറി​ക്കൊ​ന്നു പറഞ്ഞു​കൊ​ടു​ക്കാ​വോ?”

നമ്മുടെ കുട്ടി​ക​ളു​ടെ​യി​ട​യിൽ നല്ല ധൈര്യ​വും തീക്ഷ്‌ണ​ത​യു​മുള്ള സാക്ഷി​ക​ളുണ്ട്‌. ഇപ്പോൾ പത്തു വയസ്സുള്ള ബ്യാഡ്‌കി ഐസ്‌ലൻഡി​ലെ തന്റെ സഹപാ​ഠി​ക​ളോ​ടു മിക്ക​പ്പോ​ഴും പ്രസം​ഗി​ച്ചി​ട്ടുണ്ട്‌. ദൈവ​ത്തി​ലല്ല, മറിച്ച്‌ യഹോ​വ​യിൽ വിശ്വ​സി​ക്കു​ന്ന​തു​കൊണ്ട്‌ അവൻ ക്രിസ്‌ത്യാ​നി​യ​ല്ലെന്ന്‌ അടുത്ത കാലത്ത്‌ അവർ വാദിച്ചു. അവൻ കാര്യങ്ങൾ വിശദീ​ക​രി​ക്കാൻ ശ്രമി​ച്ചെ​ങ്കി​ലും അവരതു വിശ്വ​സി​ക്കാൻ കൂട്ടാ​ക്കി​യില്ല. വീട്ടി​ലേക്കു പോകവേ തന്നോ​ടൊ​പ്പം വീട്ടി​ലേക്കു വരാൻ തന്റെ ക്ലാസ്സിൽ പഠിക്കുന്ന ഒരു കുട്ടിയെ ബ്യാഡ്‌കി ക്ഷണിച്ചു. ഒരു സംഗതി കാണി​ച്ചു​കൊ​ടു​ക്കു​ന്ന​തി​നു വേണ്ടി​യാ​യി​രു​ന്നു അത്‌. വീട്ടി​ലെ​ത്തി​യ​പ്പോൾ ഐസ്‌ലാൻഡിക്‌ ബൈബി​ളിൽ ഉല്‌പത്തി 2:5-ന്റെ അടിക്കു​റിപ്പ്‌ ബ്യാഡ്‌കി തുറന്നു കാട്ടി​ക്കൊ​ടു​ത്തു. അവിടെ ദൈവ​നാ​മം കൊടു​ത്തി​രു​ന്നു. ദൈവ​നാ​മം യഹോ​വ​യാ​ണെന്നു തന്റെ സുഹൃ​ത്തി​നെ ബോധ്യ​പ്പെ​ടു​ത്താൻ അവൻ ഇംഗ്ലീ​ഷി​ലുള്ള പുതി​യ​ലോക ഭാഷാ​ന്ത​ര​വും ഉപയോ​ഗി​ച്ചു. എന്നിട്ട്‌ ബ്യാഡ്‌കി പറഞ്ഞു: “ബൈബിൾ പറയു​ന്ന​ത​നു​സ​രിച്ച്‌ ദൈവ​നാ​മം യഹോ​വ​യാ​ണെന്നു നീയി​പ്പോൾ നേരിട്ട്‌ കണ്ടിരി​ക്കു​ന്നു. അതു​കൊണ്ട്‌, സ്‌കൂ​ളി​ലെ കുട്ടികൾ ദൈവ​നാ​മം യഹോവ എന്നല്ലെന്നു പറയു​മ്പോൾ, അവർ പറയു​ന്നതു ശരിയ​ല്ലെ​ന്നും ബൈബി​ളിൽ ആ നാമം നീ നേരിട്ട്‌ കണ്ടു​വെ​ന്നും നിനക്ക്‌ അവരോ​ടു പറയാൻ കഴിയും.” ബ്യാഡ്‌കി തന്റെ സുഹൃ​ത്തി​നെ സത്യം പഠിപ്പി​ക്കുക മാത്രമല്ല ചെയ്‌തത്‌, എങ്ങനെ പ്രസം​ഗി​ക്ക​ണ​മെ​ന്നുള്ള നിർദേ​ശ​ങ്ങ​ളും കൊടു​ത്തു.

ചില​പ്പോൾ ക്ലാസ്സ്‌ മുറി​യിൽപോ​ലും നയപൂർവം സാക്ഷ്യം നൽകുക സാധ്യ​മാ​യി​രു​ന്നി​ട്ടുണ്ട്‌. ലബനോ​നി​ലെ ഒരു യുവസ​ഹോ​ദരൻ യഹോ​വ​യു​ടെ സാക്ഷി​ക​ളെ​ക്കു​റി​ച്ചു തന്റെ സഹപാ​ഠി​കൾക്ക്‌ ഒരു റിപ്പോർട്ടു നൽകി. അതിൽ അവൻ യഹോ​വ​യു​ടെ സാക്ഷികൾ—ആ പേരിനു പിമ്പിലെ സ്ഥാപനം എന്ന വീഡി​യോ​യു​ടെ പ്രദർശ​ന​വും ഉൾപ്പെ​ടു​ത്തി. സ്‌കൂ​ളി​ന്റെ “ഈസ്റ്റർ” അവധി​ക്കാ​ലത്ത്‌ ചെയ്‌ത കാര്യ​ങ്ങ​ളെ​ക്കു​റിച്ച്‌ ഒരു ഉപന്യാ​സ​മെ​ഴു​താൻ ആവശ്യ​പ്പെ​ട്ട​പ്പോൾ, പോർട്ടു​ഗ​ലി​ലെ ഒരു പ്രസാ​ധിക താൻ സ്‌മാ​ര​ക​ത്തിൽ സംബന്ധി​ച്ചു​വെന്ന വസ്‌തു​ത​യും അതിൽ ഉൾപ്പെ​ടു​ത്തി. തത്‌ഫ​ല​മാ​യു​ണ്ടായ താത്‌പ​ര്യം നിമിത്തം അവളുടെ അധ്യാ​പിക ഒരു ബൈബി​ള​ധ്യ​യ​ന​ത്തി​നു സമ്മതിച്ചു. അവരി​പ്പോൾ സ്‌നാ​പ​ന​മേൽക്കാത്ത ഒരു പ്രസാ​ധി​ക​യാണ്‌.

സഹായ പയനി​യർമാ​രാ​യി—ചിലരു​ടെ കാര്യ​ത്തിൽ, നിരന്ത​ര​പ​യ​നി​യർമാ​രാ​യി—പ്രവർത്തി​ക്കാൻ തീക്ഷ്‌ണത നിരവധി യുവജ​ന​ങ്ങളെ പ്രേരി​പ്പി​ച്ചി​രി​ക്കു​ന്നു. റുവാ​ണ്ട​യി​ലെ മാരി റോസ്‌ അവരി​ലൊ​രാ​ളാണ്‌. ഹൈസ്‌കൂ​ളിൽ പഠിക്കുന്ന അവൾ തന്റെ വൃദ്ധമാ​താ​വി​നെ സഹായി​ക്കാൻ കഠിനാ​ധ്വാ​നം ചെയ്യു​ന്നുണ്ട്‌. എങ്കിലും, നിരന്ത​ര​പ​യ​നി​യ​റായ അവൾ 15 ബൈബി​ള​ധ്യ​യ​നങ്ങൾ നടത്തുന്നു. അടുത്ത കുടും​ബാം​ഗ​ങ്ങ​ളാ​രും സാക്ഷി​ക​ള​ല്ലാ​യി​രു​ന്നെ​ങ്കി​ലും കാമറൂ​ണി​ലെ ഗ്ലോറി സ്‌കൂ​ളിൽ പഠിച്ചു​കൊ​ണ്ടി​രി​ക്കെ സഹായ പയനി​യ​റാ​യി സേവിച്ചു. ഇപ്പോൾ അവളൊ​രു നിരന്ത​ര​പ​യ​നി​യ​റാണ്‌. അവളുടെ കുടും​ബ​ത്തി​ലെ മറ്റ്‌ മൂന്നു പേർ സാക്ഷി​ക​ളാ​യി സ്‌നാ​പ​ന​മേൽക്കു​ക​യും ചെയ്‌തി​രി​ക്കു​ന്നു. ഗ്ലോറി പറയുന്നു: “സ്‌കൂ​ളി​ലാ​യി​രി​ക്കെ പയനി​യ​റിങ്‌ ചെയ്‌തത്‌ ഇക്കാലത്ത്‌ പല സ്‌കൂ​ളു​ക​ളെ​യും ബാധി​ച്ചി​രി​ക്കുന്ന മയക്കു​മ​രു​ന്നു​പ​യോ​ഗം, അധാർമി​കത, അക്രമം തുടങ്ങി​യ​വ​യിൽനി​ന്നുള്ള ഉത്തമ സംരക്ഷ​ണ​മാർഗ​മാ​യി എനിക്ക്‌ ഉതകി.”

പയനി​യ​റിങ്‌ ചെയ്യു​ന്ന​വർക്ക്‌ ഒരു സ്‌കൂൾ

ചുരു​ങ്ങി​യത്‌ ഒരു വർഷ​മെ​ങ്കി​ലും നിരന്ത​ര​പ​യ​നി​യ​റാ​യി​ട്ടു​ള്ള​വർക്ക്‌ ഒരു പ്രത്യേക പരിശീ​ലന പരിപാ​ടി​യുണ്ട്‌. 1977 നവംബ​റിൽ പയനിയർ സേവന​സ്‌കൂ​ളിൽ സംബന്ധി​ക്കു​ന്ന​തി​നുള്ള ആദ്യ ക്ഷണം ഐക്യ​നാ​ടു​ക​ളിൽ പുറ​പ്പെ​ടു​വി​ച്ചു. കഴിഞ്ഞ 20 വർഷത്തി​നു​ള്ളിൽ ഐക്യ​നാ​ടു​ക​ളി​ലെ 1,95,000 പയനി​യർമാർ ഈ സ്‌കൂ​ളിൽനി​ന്നു പ്രയോ​ജനം നേടി​യി​ട്ടുണ്ട്‌. കഴിഞ്ഞ സേവന​വർഷം ഈ സ്‌കൂ​ളിൽ സംബന്ധിച്ച 10,345 പേരും അതിലുൾപ്പെ​ടും. ലോക​മെ​മ്പാ​ടു​മുള്ള ലക്ഷക്കണ​ക്കി​നാ​ളു​കൾക്ക്‌ ഈ പരിശീ​ലനം ലഭിച്ചി​രി​ക്കു​ന്നു.

ഈ സ്‌കൂ​ളി​ന്റെ ലക്ഷ്യ​മെ​ന്താണ്‌? (1) യേശു​ക്രി​സ്‌തു​വി​നെ അനുക​രി​ച്ചു​കൊണ്ട്‌ യഹോ​വ​യോ​ടൊ​ത്തു നടക്കാ​നും (2) മുഴു​സ​ഹോ​ദ​ര​വർഗ​ത്തോ​ടു​മുള്ള സ്‌നേ​ഹ​ത്തിൽ കൂടുതൽ തികവു​ള്ള​വ​രാ​കാ​നും (3) “ലോക​ത്തിൽ ജ്യോ​തി​സ്സു​ക​ളെ​പ്പോ​ലെ” കൂടുതൽ ഫലപ്ര​ദ​മാ​യി പ്രകാ​ശി​ക്കാൻത​ക്ക​വണ്ണം പ്രസംഗ-പഠിപ്പി​ക്കൽ പ്രാപ്‌തി​കൾ മെച്ച​പ്പെ​ടു​ത്താ​നും പയനി​യർമാ​രെ സഹായി​ക്കാൻ ഉദ്ദേശി​ച്ചു​ള്ള​താണ്‌ ഈ കോഴ്‌സ്‌.—ഫിലി. 2:15.

വയൽശു​ശ്രൂ​ഷ​യ്‌ക്കുള്ള പ്രാ​യോ​ഗിക പരിശീ​ല​ന​ത്തി​നു​പു​റമേ, “പയനി​യർവേ​ല​യിൽ സമനി​ല​യു​ള്ള​വ​രാ​യി​രി​ക്കാ​നും ശരിയായ വീക്ഷണം നഷ്ടപ്പെ​ടു​ത്താൻ ഈ വ്യവസ്ഥി​തി​യി​ലെ സംഗതി​കളെ അനുവ​ദി​ക്കാ​തി​രി​ക്കാ​നും” ഈ കോഴ്‌സ്‌ വിദ്യാർഥി​കളെ സഹായി​ച്ചു​വെന്നു രണ്ട്‌ അധ്യാ​പകർ പറഞ്ഞു. തത്‌ഫ​ല​മാ​യി, സംതൃ​പ്‌തി​ദാ​യ​ക​മായ ഒരു വേല​യെ​ന്ന​നി​ല​യിൽ മുഴു​സമയ ശുശ്രൂഷ തുടരാൻ അനേകർക്കു സഹായം ലഭിച്ചി​ട്ടുണ്ട്‌.

കഴിഞ്ഞ എട്ടു വർഷത്തി​നു​ള്ളിൽ പൂർവ​യൂ​റോ​പ്പി​ലെ​യും ആഫ്രി​ക്ക​യി​ലെ​യും യഹോ​വ​യു​ടെ സാക്ഷി​ക​ളു​ടെ മേലുള്ള നിരോ​ധനം നീക്കം ചെയ്‌ത​പ്പോൾ, ആ പ്രദേ​ശ​ങ്ങ​ളി​ലുള്ള പയനി​യർമാർക്ക്‌ പയനിയർ സേവന​സ്‌കൂ​ളിൽനി​ന്നു പ്രയോ​ജനം നേടു​ന്ന​തി​നു പെട്ടെ​ന്നു​തന്നെ ക്രമീ​ക​ര​ണങ്ങൾ ചെയ്യ​പ്പെട്ടു. സ്ലോ​വേ​നിയ റിപ്പോർട്ട്‌ ചെയ്യുന്നു: “വ്യക്തിഗത പയനി​യർമാ​രു​ടെ കഴിവും ഫലപ്ര​ദ​ത്വ​വും അഭിവൃ​ദ്ധി​പ്പെ​ടു​ന്നത്‌ ഈ സ്‌കൂ​ളി​ന്റെ ക്രിയാ​ത്മക ഫലങ്ങളു​ടെ തെളി​വാണ്‌.” ഈ സ്‌കൂ​ളിൽ സംബന്ധി​ച്ചവർ പ്രകട​മാ​ക്കുന്ന ഉത്സാഹം പയനി​യ​റിങ്‌ ചെയ്യാൻ മറ്റുള്ള​വ​രെ​യും പ്രോ​ത്സാ​ഹി​പ്പി​ക്കു​ന്നു. ഹംഗറി​യിൽ അതാണു സംഭവി​ച്ചത്‌. അവിടെ ഒരു സഭയിലെ ചിലർ പയനിയർ സേവന​സ്‌കൂ​ളിൽ സംബന്ധി​ച്ച​തി​നു​ശേഷം പയനി​യർമാ​രു​ടെ എണ്ണം 5-ൽനിന്ന്‌ 21 ആയി വർധിച്ചു.

തീർച്ച​യാ​യും കൊയ്‌ത്തു വലുതാണ്‌. വയലിൽ മനസ്സൊ​രു​ക്ക​മുള്ള, സുശി​ക്ഷി​ത​രായ ശുശ്രൂ​ഷ​ക​രു​ടെ ആവശ്യ​മുണ്ട്‌. ഈ ആവശ്യം നിവർത്തി​ക്കാൻ പയനിയർ സേവന​സ്‌കൂൾ തുടർന്നും ഉപകരി​ക്കു​മെ​ന്ന​തിൽ യാതൊ​രു സംശയ​വു​മില്ല.

ശുശ്രൂ​ഷാ പരിശീ​ലന സ്‌കൂ​ളി​ന്റെ പത്തു വർഷങ്ങൾ

പയനിയർ സേവന​സ്‌കൂൾ തുടങ്ങി ഏതാണ്ട്‌ പത്തു വർഷം കഴിഞ്ഞ​പ്പോൾ, 1987 ഒക്ടോബർ 1-ന്‌ യു.എസ്‌.എ.-യിലെ പെൻസിൽവേ​നി​യ​യി​ലുള്ള പിറ്റ്‌സ്‌ബർഗിൽ ശുശ്രൂ​ഷാ പരിശീ​ലന സ്‌കൂൾ ഉത്‌ഘാ​ടനം ചെയ്യ​പ്പെട്ടു. ഈ സ്‌കൂ​ളിൽ പരിശീ​ലനം ലഭിക്കുന്ന ഏകാകി​ക​ളായ മൂപ്പന്മാ​രെ​യും ശുശ്രൂ​ഷാ​ദാ​സ​ന്മാ​രെ​യും ലോക​വ്യാ​പക വയലിൽ ആവശ്യ​മു​ള്ളി​ടത്ത്‌ സേവി​ക്കാൻ ക്ഷണി​ച്ചേ​ക്കാം. പത്തു വർഷം മുമ്പ്‌ ലോക​വ്യാ​പ​ക​മാ​യി 54,911 സഭകളാ​ണു​ണ്ടാ​യി​രു​ന്നത്‌; ഇന്ന്‌ 85,256 സഭകളുണ്ട്‌. ഇടയവേല നടത്താ​നും പഠിപ്പി​ക്കാ​നും ബൃഹത്തായ സുവി​ശേ​ഷ​വേ​ല​യിൽ നേതൃ​ത്വ​മെ​ടു​ക്കാ​നും യോഗ്യ​ത​യുള്ള പുരു​ഷ​ന്മാ​രു​ടെ വലിയ ആവശ്യ​മുണ്ട്‌. ആ ആവശ്യങ്ങൾ നിവർത്തി​ക്കാൻ ശുശ്രൂ​ഷാ പരിശീ​ലന സ്‌കൂൾ സമർപ്പിത പുരു​ഷ​ന്മാ​രെ സജ്ജരാ​ക്കു​ന്നു.—2 തിമൊ. 2:2.

അതു തുടങ്ങി​യ​ശേഷം അമേരി​ക്ക​ക​ളിൽ 3,698 പേരും ആഫ്രി​ക്ക​യിൽ 1,208 പേരും ഏഷ്യയി​ലും പസഫിക്‌ ദ്വീപു​ക​ളി​ലും 1,804 പേരും യൂറോ​പ്പിൽ 2,295 പേരും ഈ സ്‌കൂ​ളിൽ സംബന്ധി​ച്ചു. ഈ സ്‌കൂ​ളിൽനി​ന്നുള്ള ബിരു​ദ​ധാ​രി​കൾ 126 വ്യത്യസ്‌ത ദേശങ്ങ​ളിൽ ഇപ്പോൾ സേവി​ക്കു​ന്നു.

ബിരു​ദ​ധാ​രി​ക​ളിൽ പലർക്കും പല ഭാഷക​ള​റി​യാം. അത്തരം കഴിവു​ള്ള​വരെ അനേകം ഭാഷാ​ക്കൂ​ട്ട​ങ്ങ​ളുള്ള അവരുടെ സ്വന്ത​ദേ​ശ​ത്തോ വിദേ​ശ​വ​യ​ലി​ലോ ഉടൻതന്നെ നിയമി​ക്കു​ന്നു. മറ്റു ചിലരാ​ണെ​ങ്കിൽ തങ്ങളെ നിയമി​ച്ചി​രി​ക്കുന്ന രാജ്യ​ങ്ങ​ളി​ലെ ഭാഷകൾ പഠിച്ചി​രി​ക്കു​ന്നു.

നൂറു​ക​ണ​ക്കി​നു ബിരു​ദ​ധാ​രി​കൾ പ്രത്യേക പയനി​യർസേ​വനം ചെയ്യുന്നു. ഒറ്റപ്പെട്ട പ്രദേ​ശ​ങ്ങ​ളിൽ അവർ പ്രവർത്തനം തുടങ്ങി​വെ​ക്കു​ന്നു. മൂപ്പന്മാ​രു​ടെ​യും ശുശ്രൂ​ഷാ​ദാ​സ​ന്മാ​രു​ടെ​യും ആവശ്യ​മുള്ള സഭകൾ അവരുടെ സേവന​ങ്ങ​ളിൽനി​ന്നു പ്രയോ​ജനം നേടി​യി​ട്ടുണ്ട്‌. ചിലരെ സർക്കിട്ട്‌ വേലയിൽ നിയമി​ച്ചി​ട്ടുണ്ട്‌. ഉദാഹ​ര​ണ​ത്തിന്‌, നൈജീ​രി​യ​യി​ലെ 50 ബിരു​ദ​ധാ​രി​കൾ സഞ്ചാര​വേ​ല​യി​ലാ​ണെന്ന്‌ അവി​ടെ​നി​ന്നു റിപ്പോർട്ടു ചെയ്‌തി​രി​ക്കു​ന്നു. ഏതാണ്ട്‌ അത്രയും പേർതന്നെ മെക്‌സി​ക്കോ​യിൽ ആ സേവനം അനുഷ്‌ഠി​ക്കു​ന്നുണ്ട്‌. അവിടെ പല പുതിയ സഭകളും രൂപീ​ക​രി​ച്ചി​ട്ടുണ്ട്‌. ഫിലി​പ്പീൻസി​ലെ 37 ബിരു​ദ​ധാ​രി​കൾ സർക്കിട്ട്‌ വേലയി​ലാണ്‌. 111 പേർ പകരം സർക്കിട്ട്‌ മേൽവി​ചാ​ര​ക​ന്മാ​രാ​യി സേവി​ക്കു​ന്നു. സാങ്കേ​തിക വൈദ​ഗ്‌ധ്യ​ങ്ങ​ളുള്ള ചില ബിരു​ദ​ധാ​രി​കളെ ബ്രാഞ്ച്‌ പ്രവർത്ത​ന​ങ്ങ​ളു​ടെ ആവശ്യം നിവർത്തി​ക്കു​ന്ന​തി​നു നിയമി​ച്ചി​ട്ടുണ്ട്‌.

രാജ്യ​താ​ത്‌പ​ര്യ​ങ്ങൾക്കാ​യി സേവി​ക്കാൻ സ്വമേ​ധയാ തങ്ങളെ​ത്തന്നെ അർപ്പി​ക്കുന്ന സഹോ​ദ​ര​ന്മാർക്കു വിലപ്പെട്ട സഹായം നൽകു​ന്ന​തി​നുള്ള ഒരു നല്ല ഉപാധി​യാണ്‌ ഈ സ്‌കൂൾ. (സങ്കീ. 110:3) കൂടുതൽ ഉത്തരവാ​ദി​ത്വ​ങ്ങൾ ഭരമേൽപ്പി​ക്ക​പ്പെ​ട്ടി​രി​ക്കു​ന്ന​തി​നാൽ, അവരോ​ടു കൂടുതൽ ആവശ്യ​പ്പെ​ടു​ക​യും ചെയ്യുന്നു. എങ്കിലും അവരുടെ അനു​ഗ്ര​ഹങ്ങൾ അനവധി​യാണ്‌.—ലൂക്കൊ. 12:48ബി.

‘നിങ്ങൾ യഹോ​വ​യു​ടെ സന്നിധി​യിൽ സന്തോ​ഷി​ക്കണം’

പുരാതന ഇസ്രാ​യേ​ലിൽ യഹോ​വ​യു​ടെ ആരാധകർ കാലി​കോ​ത്സ​വ​ങ്ങൾക്കാ​യി കൂടി​വ​രുന്ന പതിവു​ണ്ടാ​യി​രു​ന്നു. “നിങ്ങളു​ടെ ദൈവ​മായ യഹോ​വ​യു​ടെ സന്നിധി​യിൽ ഏഴു ദിവസം സന്തോ​ഷി​ക്കേണം” എന്ന്‌ കൂടാ​ര​പ്പെ​രു​ന്നാ​ളി​നു പോയ​വ​രോ​ടു കൽപ്പി​ച്ചി​രു​ന്നു. (ലേവ്യ. 23:40) സമാന​മാ​യി, യഹോ​വ​യു​ടെ ജനത്തെ സംബന്ധി​ച്ചി​ട​ത്തോ​ളം വാർഷിക ഡിസ്‌ട്രി​ക്‌റ്റ്‌ കൺ​വെൻ​ഷ​നു​കൾ പ്രത്യേക സന്തോ​ഷ​ത്തി​ന്റെ സമയമാണ്‌. കഴിഞ്ഞ സേവന​വർഷ​ത്തി​ന്റെ ആദ്യപാ​ദ​ത്തിൽ “ദൈവ​സ​മാ​ധാന സന്ദേശ​വാ​ഹകർ” ഡിസ്‌ട്രി​ക്‌റ്റ്‌ കൺ​വെൻ​ഷ​നു​കൾ ചില ദേശങ്ങ​ളിൽ നടക്കു​ന്നു​ണ്ടാ​യി​രു​ന്നു.

യുദ്ധപ​ങ്കി​ല​മായ ലൈബീ​രി​യ​യിൽ അത്‌ കൺ​വെൻ​ഷ​നുള്ള എത്രയോ ഉചിത​മായ വിഷയ​മാ​യി​രു​ന്നു! ആഴ്‌ച​കൾക്കു മുമ്പേ​തന്നെ “ദൈവ​സ​മാ​ധാന സന്ദേശ​വാ​ഹകർ” എന്നെഴു​തിയ ബാഡ്‌ജു​കൾ അഭിമാ​ന​പൂർവം വഹിച്ചി​രുന്ന സഹോ​ദ​ര​ങ്ങളെ പട്ടണങ്ങ​ളി​ലും നഗരങ്ങ​ളി​ലും കാണാ​മാ​യി​രു​ന്നു. അത്തര​മൊ​രു തിരി​ച്ച​റി​യി​ക്കൽ ലേബൽ ധരിക്കു​ന്ന​തി​നുള്ള സകല അവകാ​ശ​വും യഹോ​വ​യു​ടെ സാക്ഷി​കൾക്കു​ണ്ടാ​യി​രു​ന്നു. യുദ്ധവർഷ​ങ്ങ​ളിൽ ദൈവ​സ​മാ​ധാ​ന​ത്തി​ന്റെ യഥാർഥ സന്ദേശ​വാ​ഹ​ക​രാ​ണെന്നു തെളി​ഞ്ഞത്‌ യഹോ​വ​യു​ടെ സാക്ഷികൾ മാത്ര​മാ​ണെന്നു ലൈബീ​രി​യ​യി​ലെ ജനങ്ങൾക്ക​റി​യാം. മറ്റു മതവി​ഭാ​ഗ​ങ്ങ​ളി​ലെ ആയിര​ക്ക​ണ​ക്കി​നാ​ളു​കൾ സായു​ധ​വി​ഭാ​ഗ​ത്തോ​ടു ചേർന്ന്‌ യുദ്ധാ​യു​ധ​ങ്ങ​ളേ​ന്തി​യ​പ്പോൾ, യുദ്ധത്താൽ വലഞ്ഞ ലൈബീ​രി​യ​ക്കാർക്കു ബൈബിൾ കയ്യി​ലേന്തി ദൈവ​സ​മാ​ധാന സന്ദേശം പകർന്നു​കൊ​ടു​ക്കുന്ന യഹോ​വ​യു​ടെ ജനത്തെ എവി​ടെ​യും കാണാ​മാ​യി​രു​ന്നു.

1997-ന്റെ പകുതി​യാ​യ​പ്പോ​ഴേ​ക്കും “ദൈവ​വചന വിശ്വാസ” കൺ​വെൻ​ഷൻ പരമ്പര തുടങ്ങി​ക്ക​ഴി​ഞ്ഞി​രു​ന്നു. “നിങ്ങളു​ടെ കണ്ണു ലഘുവാ​യി സൂക്ഷി​ക്കുക” എന്ന നാടക​ത്തോ​ടു പലരും ആഴമായ നന്ദി പ്രകടി​പ്പി​ച്ചു. “നിങ്ങളു​ടെ വിശ്വാ​സ​ത്തി​ന്റെ ഗുണനി​ല​വാ​രം—ഇപ്പോൾ പരി​ശോ​ധി​ക്ക​പ്പെ​ടു​ന്നു” എന്ന കാലോ​ചിത പ്രസം​ഗ​ത്തി​ലാ​ണു പലരും ശ്രദ്ധ കേന്ദ്രീ​ക​രി​ച്ചത്‌. പ്രകാ​ശനം ചെയ്‌ത സകലർക്കും വേണ്ടി​യുള്ള ഒരു ഗ്രന്ഥം എന്ന ലഘുപ​ത്രിക ഇപ്പോൾത്തന്നെ 58 ഭാഷക​ളിൽ ലഭ്യമാണ്‌. പോള​ണ്ടി​ലെ കൺ​വെൻ​ഷന്റെ ഏറ്റവും ശ്രദ്ധേ​യ​മായ സംഗതി പോളിഷ്‌ ഭാഷയി​ലുള്ള സമ്പൂർണ പുതി​യ​ലോക ഭാഷാ​ന്തരം വാഴ്‌സോ​യി​ലും വ്രോ​റ്റ്‌സ്ലാ​ഫി​ലും ഒരേ സമയം പ്രകാ​ശനം ചെയ്‌തു​വെ​ന്ന​താണ്‌. ഗ്രീസിൽ വിശുദ്ധ തിരു​വെ​ഴു​ത്തു​ക​ളു​ടെ പുതി​യ​ലോക ഭാഷാ​ന്ത​ര​ത്തി​ന്റെ സമ്പൂർണ ഗ്രീക്കു പതിപ്പ്‌ അച്ചടിച്ച്‌ പ്രകാ​ശനം ചെയ്യു​ന്നു​ണ്ടെ​ന്ന​റി​ഞ്ഞ​പ്പോൾ, അതിന്റെ അറിയിപ്പ്‌ തീരു​ന്ന​തി​നു മുമ്പു​തന്നെ, ദീർഘ​നേരം കരഘോ​ഷം മുഴങ്ങി. ചിലർ സന്തോ​ഷ​വും വിലമ​തി​പ്പും നിമിത്തം കരഞ്ഞു​പോ​യി.

ഡിസ്‌ട്രി​ക്‌റ്റ്‌ കൺ​വെൻ​ഷ​നു​കൾക്കു പുറമേ, പല സ്ഥലങ്ങളി​ലും വിശേ​ഷാ​ലുള്ള മറ്റു സമ്മേള​നങ്ങൾ നടന്നു. അതി​ലൊന്ന്‌, ഡൊമി​നി​ക്കൻ റിപ്പബ്ലി​ക്കിൽ 3,000 പേർക്കി​രി​ക്കാ​വുന്ന ഒരു സമ്മേള​ന​ഹാ​ളും രാജ്യ​ഹാ​ളും ഉൾപ്പെട്ട പുതിയ ബ്രാഞ്ചി​ന്റെ സമർപ്പ​ണ​ത്തോ​ടു ബന്ധപ്പെ​ട്ട​താ​യി​രു​ന്നു. 1996 നവംബ​റി​ലാ​യി​രു​ന്നു അത്‌. ഏകാധി​പ​തി​യായ ട്രൂഹി​യോ​യു​ടെ പത്തുവർഷ​ക്കാ​ലത്തെ കൊടിയ പീഡനത്തെ അതിജീ​വിച്ച പലരും അപ്പോൾ സന്നിഹി​ത​രാ​യി​രു​ന്നു. മിഷന​റി​മാർ രാജ്യ​ത്തു​തന്നെ തങ്ങി എന്തെങ്കി​ലും ലൗകിക ജോലി ചെയ്‌തു​കൊണ്ട്‌ വിവേ​ക​പൂർവം സാക്ഷീ​ക​രണം നടത്തി​യെ​ന്നും തടവി​ലാ​ക്ക​പ്പെ​ടു​ക​യും പീഡി​പ്പി​ക്ക​പ്പെ​ടു​ക​യും ചെയ്‌ത പലരു​മുൾപ്പെടെ പ്രാ​ദേ​ശിക സാക്ഷി​കളെ പ്രോ​ത്സാ​ഹി​പ്പി​ച്ചെ​ന്നും മുൻമി​ഷ​ന​റി​യായ വാനിറ്റ ബ്രാൻറ്‌ വിശദീ​ക​രി​ച്ചു. ഏകാധി​പ​തി​യായ ട്രൂഹി​യോ​യു​ടെ ഒരു ബന്ധുവായ ലൂയിസ്‌ മോൺടാസ്‌ രാഷ്‌ട്രീയ പാർട്ടി​യു​ടെ ഖജാൻജി​യാ​യി​രി​ക്കു​മ്പോ​ഴാ​ണു സത്യം പഠിച്ചത്‌. അദ്ദേഹത്തെ വേട്ടയാ​ടി​പ്പി​ടിച്ച്‌ തടവി​ലാ​ക്കി. പലതവണ അദ്ദേഹം മരണത്തെ മുഖാ​മു​ഖം കണ്ടു. 91 വയസ്സുള്ള അദ്ദേഹം ബ്രാഞ്ചി​ന്റെ സമർപ്പ​ണ​ത്തി​നു സന്നിഹി​ത​നാ​യി​രു​ന്നു. തുടർന്നു നടന്ന ദേശീയ സമ്മേള​ന​ത്തിൽ സംബന്ധിച്ച 35,678 പേരിൽ ഒരാളാ​യി​രി​ക്കു​ക​യെന്ന സന്തോ​ഷ​വും അദ്ദേഹ​ത്തി​നു​ണ്ടാ​യി.

ബ്രസീ​ലി​ലെ വികസി​പ്പിച്ച ബ്രാഞ്ച്‌ സൗകര്യ​ങ്ങ​ളോ​ടു ബന്ധപ്പെട്ട്‌ 1997 മാർച്ചിൽ ശ്രദ്ധേ​യ​മായ മറ്റൊരു യോഗം നടന്നു. അതിന്റെ സമർപ്പ​ണ​സ​മ​യത്ത്‌ ബ്രസീ​ലി​ലെ 26 സംസ്ഥാ​ന​ങ്ങ​ളിൽനി​ന്നുള്ള സാക്ഷികൾ സന്നിഹി​ത​രാ​യി​രു​ന്നു. കൂടാതെ മറ്റ്‌ 24 ദേശങ്ങ​ളിൽനി​ന്നുള്ള പ്രതി​നി​ധി​ക​ളും ബ്രസീ​ലിൽ സേവിച്ച 43-ാമത്തെ ഗിലെ​യാദ്‌ സ്‌കൂ​ളി​നെ പ്രതി​നി​ധാ​നം ചെയ്യുന്ന മിഷന​റി​മാ​രു​മു​ണ്ടാ​യി​രു​ന്നു. എത്ര ആവേശം തുടി​ക്കുന്ന സമയമാ​യി​രു​ന്നു അത്‌! പിറ്റേന്ന്‌ റിയോ ഡി ജനി​റോ​യി​ലെ മാരാ​കാ​നാൻ സ്റ്റേഡി​യ​ത്തിൽ നടന്ന ഒരു പ്രത്യേക യോഗ​ത്തിൽ ഭരണസം​ഘാം​ഗ​മായ മിൽട്ടൺ ഹെൻഷൽ പ്രസം​ഗി​ച്ചു. മറ്റു നാല്‌ നഗരങ്ങ​ളി​ലെ ജനക്കൂ​ട്ട​ങ്ങ​ളും ആ പരിപാ​ടി ശ്രവിച്ചു. മൊത്തം ഹാജർ 2,00,000-ത്തിലധി​ക​മാ​യി​രു​ന്നു. സഭാ​പ്ര​സം​ഗി 12-ാം അധ്യാ​യ​ത്തിൽനിന്ന്‌ അദ്ദേഹം വികസി​പ്പി​ച്ചെ​ടുത്ത ഹൃദ​യോ​ഷ്‌മ​ള​മായ വിഷയം “യഹോവ യുവജ​ന​ങ്ങളെ സ്‌നേ​ഹി​ക്കു​ന്നു” എന്നതാ​യി​രു​ന്നു. ‘വിപത്‌കര നാളുകൾ വരുന്ന​തി​നു മുമ്പ്‌ പയനി​യർസേ​വ​ന​ത്തിൽ പങ്കെടു​ത്തു​കൊണ്ട്‌ യഹോ​വയെ പൂർണ​മാ​യി സേവി​ക്കാൻ’ അദ്ദേഹം യുവജ​ന​ങ്ങളെ പ്രോ​ത്സാ​ഹി​പ്പി​ച്ചു.

പിന്നീട്‌ അതേ മാസം അർജൻറീ​ന​യിൽ നടന്ന ഒരു സമ്മേള​ന​ത്തിൽ, 9,400 പേർക്കി​രി​ക്കാ​വുന്ന ഒരു പുതിയ കൺ​വെൻ​ഷൻ ഹാളിന്റെ സമർപ്പ​ണ​വും ഉൾപ്പെ​ട്ടി​രു​ന്നു. കാന്യ​വേ​ല​സി​ലെ ആ ഹാൾ സാക്ഷി​ക​ളു​ടെ സ്വന്തമാണ്‌. അർജൻറീ​ന​യു​ടെ തലസ്ഥാ​ന​ന​ഗ​രി​യി​ലും പ്രാന്ത​പ്ര​ദേ​ശ​ങ്ങ​ളി​ലും താമസി​ക്കു​ന്ന​വർക്ക്‌ ഡിസ്‌ട്രി​ക്‌റ്റ്‌ കൺ​വെൻ​ഷ​നു​ക​ളും സർക്കിട്ട്‌ സമ്മേള​ന​ങ്ങ​ളും നടത്തു​ന്ന​തി​നുള്ള ഇടമായി ഉതകും അത്‌. സമർപ്പ​ണ​പ​രി​പാ​ടി​യിൽ അർജൻറീ​ന​യി​ലെ യഹോ​വ​യു​ടെ സാക്ഷി​ക​ളു​ടെ പ്രവർത്ത​ന​ത്തി​ന്റെ പുളക​പ്ര​ദ​മായ വിവര​ണ​വും ഉൾപ്പെ​ട്ടി​രു​ന്നു. 33 വർഷക്കാ​ലം അവിടെ നിരോ​ധ​ന​വും വിലക്കു​ക​ളും ഉണ്ടായി​രു​ന്നി​ട്ടും ദിവ്യാ​ധി​പത്യ വളർച്ച തുടർന്നു​പോ​ന്നു. സമർപ്പ​ണ​പ​രി​പാ​ടി​യു​ടെ പിറ്റേന്ന്‌ ബ്യൂണസ്‌ അയേഴ്‌സ്‌ നഗരത്തി​ലെ കൂറ്റൻ റിവർ പ്ലേറ്റ്‌ സ്റ്റേഡി​യ​ത്തിൽ ഒരു യോഗം സംഘടി​പ്പി​ച്ചു. ആ സ്റ്റേഡിയം തിങ്ങി​നി​റ​ഞ്ഞ​പ്പോൾ സഹോ​ദ​രങ്ങൾ മൈതാ​ന​ത്തേക്ക്‌ ഇറങ്ങി​യി​രു​ന്നു. മൊത്തം 71,800 പേർ ഹാജരാ​യി​രു​ന്നു. ചിലർ ദീർഘ​ദൂ​രം യാത്ര​ചെ​യ്‌താണ്‌ അവി​ടെ​യെ​ത്തി​യത്‌. ആളുകൾ നിറഞ്ഞ ഒരു ബസ്സ്‌ 3,100 കിലോ​മീ​റ്റർ അകലെ​യുള്ള പാൻറ​ഗോ​ണി​യ​യിൽനി​ന്നാ​ണു വന്നത്‌. രാജ്യ​ത്തി​ന്റെ നാനാ ഭാഗങ്ങ​ളിൽനിന്ന്‌ റിവർ പ്ലേറ്റ്‌ സ്റ്റേഡി​യ​ത്തിൽ എത്തിയത്‌ 1,200 ബസ്സുക​ളാണ്‌.

91 വയസ്സു​ണ്ടാ​യി​രുന്ന ഭരണസം​ഘാം​ഗ​മായ ക്യാരി ബാർബർ ആ അവസര​ങ്ങ​ളിൽ പ്രസം​ഗി​ച്ചു. സമർപ്പ​ണ​സ​മ​യത്ത്‌ ബൈബി​ളി​ന്റെ വായന ശക്തമായി പ്രോ​ത്സാ​ഹി​പ്പി​ച്ചു​കൊണ്ട്‌ അദ്ദേഹം പറഞ്ഞു: “സഹോ​ദ​രീ​സ​ഹോ​ദ​ര​ന്മാ​രേ, നാമെ​ല്ലാം ബൈബിൾ ദിവസ​വും വായി​ക്കാ​റു​ണ്ടോ? ദിവസ​വും ബൈബിൾ വായി​ക്കാൻ കഴിയാ​ത്ത​വി​ധം തിരക്കാ​ണെന്നു പറയുന്ന പലരും കണ്ടേക്കാം; എന്നാൽ അവർക്കു ദിവസ​വും മൂന്നു നേരം സുഭി​ക്ഷ​മാ​യി ഭക്ഷിക്കാൻ വേണ്ടത്ര സമയമു​ള്ള​താ​യി കാണുന്നു. അതു വ്യക്തമാ​ണു​താ​നും, അല്ലേ? അവർ ദിവസ​വും ബൈബിൾ വായി​ക്കു​ക​യാ​ണെ​ങ്കിൽ, അതും വ്യക്തമാ​യി​രി​ക്കി​ല്ലേ?” പിറ്റേന്ന്‌ അതേ സ്റ്റേഡി​യ​ത്തിൽവെച്ച്‌ നടത്തിയ “ലോക​ത്തി​ന്റെ ആത്മാവി​നെ ചെറു​ത്തു​നിൽക്കേണ്ട വിധം” എന്ന പ്രസംഗം ഉത്സാഹി​ക​ളും ദത്തശ്ര​ദ്ധ​രു​മായ സദസ്യ​രു​ടെ കരഘോ​ഷ​ത്താൽ പലപ്പോ​ഴും ഇടമു​റി​ഞ്ഞു. സദ്‌ഗു​ണ​പൂർണ​വും നീതി​നി​ഷ്‌ഠ​വു​മായ നടത്തയിൽ പുരോ​ഗ​മി​ക്കാൻ എല്ലാവ​രെ​യും പ്രോ​ത്സാ​ഹി​പ്പി​ച്ച​പ്പോൾ, വിജയി​ക്കാൻ നമുക്ക്‌ യഹോ​വ​യു​ടെ സഹായ​വും ആത്മാവും ആവശ്യ​മാ​ണെ​ന്നും അദ്ദേഹം വ്യക്തമാ​ക്കി. “ലോക​ത്തി​ന്റെ അസഭ്യ​സം​സാ​ര​ത്തി​നും അധാർമിക നടത്തയ്‌ക്കും പുറം​തി​രി​ക്കേണ്ട”തിന്റെ പ്രാധാ​ന്യം ബാർബർ സഹോ​ദരൻ ഊന്നി​പ്പ​റഞ്ഞു. എന്നിട്ട്‌ അദ്ദേഹം ഈ ആഹ്വാനം നൽകി: “യഹോ​വയെ സേവി​ക്കു​ന്ന​തി​ലും ആരാധി​ക്കു​ന്ന​തി​ലും പ്രസാ​ദി​പ്പി​ക്കു​ന്ന​തി​ലും സന്തോഷം കണ്ടെത്തു​വിൻ.” ആ പ്രത്യേക പരിപാ​ടി സന്നിഹി​ത​രിൽ ശരിക്കും മതിപ്പാർന്ന ഫലമു​ള​വാ​ക്കി.

‘കൂടാ​ര​ത്തി​ന്റെ കയറുകൾ നീട്ടുക’

യഹോ​വ​യു​ടെ വഴിക​ളെ​ക്കു​റി​ച്ചു പഠിച്ച്‌ അവയിൽ നടക്കു​ന്ന​തി​നാ​യി അവന്റെ വലിയ ആത്മീയ ഭവനത്തി​ലേക്കു കയറി​പ്പോ​കുന്ന ലോക​വ്യാ​പക ജനത്തിന്റെ സംഖ്യ സമീപ വർഷങ്ങ​ളിൽ അതിശ​യ​ക​ര​മാം​വി​ധം വർധി​ച്ചു​കൊ​ണ്ടി​രി​ക്കു​ന്നു. (യെശ. 2:2-4) കഴിഞ്ഞ അഞ്ചു വർഷത്തി​നു​ള്ളിൽ യഹോ​വ​യ്‌ക്കുള്ള സമർപ്പ​ണ​ത്തി​ന്റെ പ്രതീ​ക​മാ​യി 15,93,995 പേർ ജലസ്‌നാ​പ​ന​ത്തി​നു വിധേ​യ​രാ​യി. പ്രബോ​ധ​ന​ത്തി​നും ആരാധ​ന​യ്‌ക്കു​മാ​യി കൂടി​വ​രാൻ അവർക്കു രാജ്യ​ഹാ​ളു​കൾ ആവശ്യ​മാണ്‌. പ്രത്യേക സമ്മേള​ന​ദി​ന​ങ്ങൾക്കും സർക്കിട്ട്‌ സമ്മേള​ന​ങ്ങൾക്കും ഡിസ്‌ട്രി​ക്‌റ്റ്‌ കൺ​വെൻ​ഷ​നു​കൾക്കും സമ്മേള​ന​ഹാ​ളു​കൾ ആവശ്യ​മാണ്‌. പ്രാ​ദേ​ശിക ഭാഷക​ളി​ലേക്കു ബൈബിൾ സാഹി​ത്യ​ങ്ങൾ പരിഭാ​ഷ​പ്പെ​ടു​ത്തു​ന്ന​തി​നുള്ള സംവി​ധാ​ന​ങ്ങ​ളും അവ അച്ചടി​ക്കു​ന്ന​തി​നുള്ള അച്ചടി​ശാ​ല​ക​ളും കഴിയു​ന്നി​ട​ത്തോ​ളം ഏതൊ​രാൾക്കും രാജ്യ​സ​ന്ദേശം ശ്രവി​ക്കാൻ അവസരം ലഭിക്കു​ന്ന​തിന്‌ യഹോ​വ​യു​ടെ സാക്ഷി​ക​ളു​ടെ പ്രവർത്തനം ഏകോ​പി​പ്പി​ക്കു​ന്ന​തി​നുള്ള ബ്രാഞ്ച്‌ ഓഫീ​സു​ക​ളും ആവശ്യ​മാണ്‌. “നിന്റെ കൂടാ​ര​ത്തി​ന്റെ സ്ഥലത്തെ വിശാ​ല​മാ​ക്കുക; . . . തടുത്തു​ക​ള​യ​രു​തു; നിന്റെ കയറു​കളെ നീട്ടുക; നിന്റെ കുറ്റി​കളെ ഉറപ്പിക്ക” എന്ന പ്രാവ​ച​നിക പ്രഖ്യാ​പനം എത്രയോ ഉചിത​മാണ്‌.—യെശ. 54:2.

ഇവയൊ​ക്കെ എങ്ങനെ​യാ​ണു സാധ്യ​മാ​യി​രി​ക്കു​ന്നത്‌? തന്റെ സാക്ഷി​ക​ളു​ടെ ഏകീകൃത ശ്രമങ്ങ​ളു​ടെ മേലുള്ള യഹോ​വ​യു​ടെ അനു​ഗ്രഹം മൂലം. സാധ്യ​മാ​യി​രി​ക്കു​ന്നി​ടത്ത്‌, പ്രാ​ദേ​ശിക സാക്ഷികൾ നിർമാ​ണ​പ്ര​വർത്ത​നങ്ങൾ നടത്തു​ക​യും സ്വമേ​ധയാ സംഭാ​വ​ന​ക​ളി​ലൂ​ടെ അതിന്റെ ചെലവു വഹിക്കു​ക​യും ചെയ്യുന്നു. മിക്ക​പ്പോ​ഴും സത്യമാ​യി​രി​ക്കു​ന്ന​തു​പോ​ലെ, ആവശ്യ​മാ​യി​രി​ക്കു​ന്നി​ടത്ത്‌ രാജ്യ​ത്തി​ന്റെ ഇതര ഭാഗങ്ങ​ളി​ലുള്ള സാക്ഷി​ക​ളോ സാർവ​ദേ​ശീയ സഹോ​ദ​ര​വർഗ​മോ സഹായം നൽകുന്നു. ചില​പ്പോൾ അഞ്ചോ പത്തോ അതിൽക്കൂ​ടു​ത​ലോ രാജ്യ​ങ്ങ​ളിൽനി​ന്നുള്ള സ്വമേ​ധ​യാ​സേ​വകർ പ്രമുഖ ബ്രാഞ്ച്‌ നിർമാ​ണ​പ്ര​വർത്ത​ന​ങ്ങ​ളിൽ സഹായി​ക്കു​ന്നു.

കഴിഞ്ഞ സേവന​വർഷ​ത്തിൽ പൂർത്തി​യാ​ക്കി സമർപ്പിച്ച പദ്ധതി​ക​ളിൽ നിരവധി രാജ്യ​ഹാ​ളു​ക​ളും ഏതാനും സമ്മേള​ന​ഹാ​ളു​ക​ളും അനവധി ബ്രാഞ്ച്‌ സൗകര്യ​ങ്ങ​ളും ഉൾപ്പെ​ടു​ന്നു. ജമെയ്‌ക്ക, ഡൊമി​നി​ക്കൻ റിപ്പബ്ലിക്ക്‌, ഫ്രഞ്ച്‌ ഗയാന, മഡഗാ​സ്‌കർ, മൗറീ​ഷ്യസ്‌, സിയെറാ ലിയോൺ, റഷ്യ എന്നിവി​ട​ങ്ങ​ളിൽ തികച്ചും പുതിയ ബ്രാഞ്ച്‌ സൗകര്യ​ങ്ങൾ നിർമി​ക്കു​ന്ന​തും അർജൻറീന, ഓസ്‌​ട്രേ​ലിയ, ബ്രസീൽ എന്നിവി​ട​ങ്ങ​ളിൽ ബ്രാഞ്ച്‌ സൗകര്യ​ങ്ങൾ വിപു​ല​മാ​ക്കു​ന്ന​തും അവയി​ലുൾപ്പെ​ട്ടി​രു​ന്നു. ഈ സൗകര്യ​ങ്ങൾ ആവശ്യ​മാ​യി​വ​ര​ത്ത​ക്ക​വണ്ണം ഇവിട​ങ്ങ​ളിൽ എന്താണ്‌ സംഭവി​ച്ചി​രി​ക്കു​ന്നത്‌?

അർജൻറീ​ന: അർജൻറീ​ന​യി​ലെ യഹോ​വ​യു​ടെ സാക്ഷി​ക​ളു​ടെ പ്രവർത്ത​ന​ത്തി​ന്മേ​ലുള്ള ഗവൺമെൻറ്‌ നിരോ​ധനം 1980-ൽ നീക്കം ചെയ്യ​പ്പെ​ട്ട​ശേഷം ആ രാജ്യത്തെ രാജ്യ​പ്ര​സാ​ധ​ക​രു​ടെ എണ്ണത്തിൽ ഒരു “സ്‌ഫോ​ടനം” സംഭവി​ച്ചി​രി​ക്കു​ന്നു. 1981-ൽ അവിടെ 38,869 സജീവ സാക്ഷി​ക​ളാ​ണു​ണ്ടാ​യി​രു​ന്നത്‌. 717 നിവാ​സി​കൾക്ക്‌ ഒരു സാക്ഷി എന്ന അനുപാ​ത​മാ​യി​രു​ന്നു അത്‌. ഇപ്പോൾ അവിടെ 1,16,151 പ്രസാ​ധ​ക​രുണ്ട്‌. 281 നിവാ​സി​കൾക്ക്‌ ഒരു സാക്ഷി വീതം. ഫാക്‌ടറി സൗകര്യ​ങ്ങൾ പലതവണ വികസി​പ്പി​ക്കേ​ണ്ടി​വ​ന്നി​ട്ടുണ്ട്‌. അടുത്ത​യി​ടെ രണ്ടു കെട്ടി​ടങ്ങൾ കൂടി വാങ്ങി ആധുനീ​ക​രി​ച്ചെ​ടു​ത്തു. പാർപ്പി​ട​സൗ​ക​ര്യ​ങ്ങ​ളും വിപു​ല​മാ​ക്കി. നിലവി​ലുള്ള വിശാ​ല​മായ ബ്രാഞ്ച്‌ സൗകര്യ​ങ്ങൾക്കു പുറ​മേ​യാണ്‌ ഇതെല്ലാം.

ഓസ്‌​ട്രേ​ലി​യ: സിഡ്‌നി​യു​ടെ പ്രാന്ത​പ്ര​ദേ​ശ​ത്തുള്ള ഇപ്പോ​ഴത്തെ സ്ഥാന​ത്തേക്ക്‌ ബ്രാഞ്ച്‌ മാറ്റി​യ​തി​നു​ശേഷം രാജ്യത്തെ സാക്ഷി​ക​ളു​ടെ എണ്ണം ഏതാണ്ട്‌ ഇരട്ടി​യാ​യി​രി​ക്കു​ന്നു, അതായത്‌ 60,946. പുതിയ ഡിപ്പാർട്ടു​മെൻറു​കൾ കൂട്ടി​ച്ചേർത്തു. മേഖലാ എഞ്ചിനി​യ​റിങ്‌ ഓഫീസ്‌, ഹോസ്‌പി​റ്റൽ ഇൻഫർമേഷൻ സർവീ​സസ്‌, നിയമ വിഭാഗം തുടങ്ങി​യ​വ​യും മറ്റ്‌ ഡിപ്പാർട്ടു​മെൻറു​ക​ളും ഇവയി​ലുൾപ്പെ​ടു​ന്നു. പസഫിക്‌ പ്രദേ​ശ​ത്തി​നാ​യുള്ള ഒരു സാഹിത്യ പണ്ടകശാ​ല​യാണ്‌ ഇവിടത്തെ ഷിപ്പിങ്‌ ഡിപ്പാർട്ടു​മെൻറ്‌. ഈ ആവശ്യങ്ങൾ നിവർത്തി​ക്കു​ന്ന​തിന്‌ ഓഫീസ്‌, സർവീ​സസ്‌, പാർപ്പി​ടം എന്നിവ​യ്‌ക്കുള്ള മൂന്നു കെട്ടി​ടങ്ങൾ ഓസ്‌​ട്രേ​ലിയ ബ്രാഞ്ച്‌ സമുച്ച​യ​ത്തോ​ടു കൂട്ടി​ച്ചേർക്കു​ക​യു​ണ്ടാ​യി.

ബ്രസീൽ: സെസാ​രി​യൂ ലാൻഷി​യി​ലെ ബ്രാഞ്ച്‌ കെട്ടി​ടങ്ങൾ 1981-ൽ സമർപ്പി​ച്ച​തി​നു​ശേഷം അവ മൂന്നി​ര​ട്ടി​യാ​യി വർധി​പ്പി​ക്കേ​ണ്ടി​വന്നു. എന്തു​കൊണ്ട്‌? യഹോ​വ​യു​ടെ സാക്ഷി​ക​ളു​ടെ നിര​യോട്‌ ബ്രസീ​ലി​ലെ 3,38,600-ലധികം പേർ കൂട്ടി​ച്ചേർക്ക​പ്പെ​ട്ടി​രി​ക്കു​ന്നു. അവർ കഴിഞ്ഞ വർഷം സുവാർത്താ​പ്ര​സം​ഗ​ത്തി​നാ​യി 8,03,00,000-ത്തിലധി​കം മണിക്കൂർ ചെലവ​ഴി​ക്കു​ക​യും ദശലക്ഷ​ക്ക​ണ​ക്കി​നു ബൈബിൾ സാഹി​ത്യ​ങ്ങൾ വിതരണം ചെയ്യു​ക​യും ശരാശരി 4,43,028 ഭവന ബൈബി​ള​ധ്യ​യ​നങ്ങൾ നടത്തു​ക​യും ചെയ്‌തു. 6,960 സഭകളു​ടെ​യും 340 സഞ്ചാര​മേൽവി​ചാ​ര​ക​ന്മാ​രു​ടെ​യും പ്രവർത്ത​ന​ങ്ങ​ളു​ടെ മേൽനോ​ട്ടം ഈ ബ്രാഞ്ച്‌ വഹിക്കു​ന്നു.

ഡൊമി​നി​ക്കൻ റിപ്പബ്ലിക്ക്‌: ഇത്‌ ഫലപ്ര​ദ​മായ ഒരു വയലാണ്‌. ഡൊമി​നി​ക്കൻ റിപ്പബ്ലി​ക്കി​ലെ 21,007 രാജ്യ​പ്ര​സാ​ധകർ 35,362 ഭവന ബൈബി​ള​ധ്യ​യ​നങ്ങൾ നടത്തുന്നു. അവിടത്തെ വേലയ്‌ക്കു പുതിയ ബ്രാഞ്ച്‌ സൗകര്യ​ങ്ങൾ അടിയ​ന്തി​ര​മാ​യി ആവശ്യ​മാ​യി​രു​ന്നു.

ഫ്രഞ്ച്‌ ഗയാന: ഗ്വാഡ​ലൂ​പ്പിൽനി​ന്നും മാർട്ടി​നി​ക്കിൽനി​ന്നു​മുള്ള സാക്ഷികൾ മുഖ്യ​മാ​യും ഇവിടെ സാക്ഷീ​ക​രണം നടത്തി​യി​രുന്ന ഒരു കാലമു​ണ്ടാ​യി​രു​ന്നു. 1990-ൽ 660 പ്രസാ​ധകർ റിപ്പോർട്ടു ചെയ്യു​ന്നു​ണ്ടാ​യി​രു​ന്നു. ഒരു ബ്രാഞ്ച്‌ ഓഫീസ്‌ അവിടെ പ്രവർത്തനം തുടങ്ങി. ഫലമെ​ന്താ​യി​രു​ന്നു? അഞ്ചു വർഷം​കൊണ്ട്‌ പ്രസാ​ധ​ക​രു​ടെ എണ്ണം ഇരട്ടിച്ചു. പ്രധാ​ന​മാ​യും ആമസോൺ മഴക്കാ​ടു​കൾ തിങ്ങി​നി​റ​ഞ്ഞി​രി​ക്കുന്ന ഈ ദേശത്ത്‌ സുവാർത്താ​പ്ര​സം​ഗം തഴച്ചു​വ​ള​രു​ന്നു. ഇപ്പോ​ഴി​വി​ടെ 100 പേരിൽ ഒരാൾ എന്ന അനുപാ​ത​ത്തിൽ സാക്ഷി​ക​ളുണ്ട്‌. 1,468 പ്രസാ​ധകർ 2,167 ബൈബി​ള​ധ്യ​യ​നങ്ങൾ നടത്തു​ന്നു​വെന്ന വസ്‌തു​ത​യും 1997-ലെ സസ്‌മാ​ര​ക​ത്തിന്‌ 5,506 പേർ ഹാജരാ​യി എന്ന സംഗതി​യും വിരൽ ചൂണ്ടു​ന്നത്‌ കൂടു​ത​ലായ വളർച്ച​യി​ലേ​ക്കാണ്‌.

ജമെയ്‌ക്ക: ഇവിടെ സുവാർത്ത ആദ്യം പ്രസം​ഗി​ക്ക​പ്പെ​ട്ടത്‌ 1897-ലാണ്‌. അതു​കൊണ്ട്‌ 1997-ൽ നടന്ന മനോ​ഹ​ര​മായ പുതിയ ബ്രാഞ്ച്‌ കെട്ടി​ട​ത്തി​ന്റെ സമർപ്പ​ണ​വും ഈ രാജ്യത്ത്‌ സാക്ഷീ​ക​രണം തുടങ്ങി​യ​തി​ന്റെ നൂറാം വാർഷി​ക​വും യാദൃ​ച്ഛി​ക​മാ​യി ഒന്നിച്ചു​വന്നു. പുതിയ ബ്രാഞ്ച്‌ ഓഫീസ്‌/സർവീ​സസ്‌ കെട്ടിടം, ബെഥേൽ ഭവനം, സമ്മേള​ന​ഹാൾ, രാജ്യ​ഹാൾ എന്നിവ പുതിയ കെട്ടി​ട​സ​മു​ച്ച​യ​ത്തിൽ ഉൾപ്പെ​ടു​ന്നു. രാജ്യത്തെ കൂടു​ത​ലായ ദിവ്യാ​ധി​പത്യ വികസ​ന​ത്തിൽ ഈ സൗകര്യ​ങ്ങൾ നിസ്സം​ശ​യ​മാ​യും വലി​യൊ​രു പങ്കു വഹിക്കും.

മഡഗാ​സ്‌കർ: യഹോ​വ​യു​ടെ ദാസന്മാർ ആദ്യമാ​യി 1925-ൽ മഡഗാ​സ്‌കർ സന്ദർശി​ച്ച​തി​നെ​ത്തു​ടർന്ന്‌ വളരെ​യ​ധി​കം കാര്യങ്ങൾ ചെയ്യ​പ്പെ​ട്ടി​ട്ടുണ്ട്‌. സമീപ വർഷങ്ങ​ളിൽ പ്രവർത്ത​ന​ത്തി​ന്റെ ആക്കം വളരെ വർധി​ച്ചി​രി​ക്കു​ന്നു. 1997 മാർച്ചിൽ 8,404 പ്രസാ​ധകർ വയൽസേ​വ​ന​ത്തിൽ പങ്കെടു​ക്കു​ക​യും 22,321 ബൈബി​ള​ധ്യ​യ​നങ്ങൾ നടത്തു​ക​യും ചെയ്യു​ന്നു​ണ്ടാ​യി​രു​ന്നു. എന്നാൽ 45,300 പേർ സ്‌മാ​ര​ക​ത്തി​നു ഹാജരാ​യി. യഹോ​വ​യു​ടെ സത്യാ​രാ​ധ​ക​രു​ടെ വർധി​ച്ചു​വ​രുന്ന ഈ കൂട്ടത്തി​ന്റെ ആവശ്യ​ങ്ങൾക്കാ​യി കരുതാൻ പുതിയ ബ്രാഞ്ച്‌ സമുച്ചയം തീർച്ച​യാ​യും സഹായി​ക്കും.

മൗറീ​ഷ്യസ്‌: ഇന്ത്യൻ മഹാസ​മു​ദ്ര​ത്തി​ലെ ഈ ദ്വീപിൽ മനോ​ഹ​ര​മായ ഒരു പുതിയ ബ്രാഞ്ച്‌ ഓഫീ​സും വശങ്ങൾ തുറന്ന ഒരു സമ്മേള​ന​ഹാ​ളും നിർമി​ക്കു​ക​യു​ണ്ടാ​യി. എന്തു​കൊണ്ട്‌? എന്തെന്നാൽ, ഈ ദ്വീപു​ക​ളിൽ യഹോ​വ​യു​ടെ സ്‌തു​തി​ഘോ​ഷ​ത്തിൽ ചേരാ​നുള്ള ബൈബി​ളി​ന്റെ ഹൃദ്യ​മായ ക്ഷണത്തോട്‌ ആളുകൾ പ്രതി​ക​രി​ക്കു​ന്നു. (യെശ. 42:10) കഴിഞ്ഞ എട്ടു വർഷം​കൊണ്ട്‌ ഈ പ്രദേ​ശത്തെ സാക്ഷി​ക​ളു​ടെ എണ്ണം ഏതാണ്ട്‌ ഇരട്ടി​ച്ചി​രി​ക്കു​ന്നു.

സിയെറാ ലിയോൺ: ഈ ദേശത്ത്‌ ദീർഘ​കാ​ലം നീണ്ടു​നിന്ന ആഭ്യന്ത​ര​യു​ദ്ധ​വും രാഷ്‌ട്രീയ കോളി​ള​ക്ക​വും ദൈവ​രാ​ജ്യ​ത്തി​നു മാത്രം കൈവ​രു​ത്താൻ കഴിയുന്ന സുരക്ഷി​ത​ത്വ​ത്തി​നാ​യി കാംക്ഷി​ക്കാൻ ആളുകളെ പ്രേരി​പ്പി​ച്ചി​രി​ക്കു​ന്നു. ഈ അവസ്ഥകൾക്കു മധ്യേ നടന്ന പുതിയ ബ്രാഞ്ചി​ന്റെ നിർമാ​ണം ഒരു നല്ല സാക്ഷ്യ​മാ​യി​രു​ന്നു. നാനാ ദേശങ്ങ​ളിൽനി​ന്നുള്ള നിർമാ​ണ​വി​ദ​ഗ്‌ധർ സ്വമേ​ധയാ സേവന​മ​നു​ഷ്‌ഠി​ച്ചു. അത്‌ ആദ്യ​മൊ​ക്കെ ആളുകൾക്കു വിശ്വ​സി​ക്കാൻ പ്രയാ​സ​മാ​യി​രു​ന്നു. വെള്ളക്കാ​രായ വിദേ​ശി​കൾ സിയെറാ ലിയോ​ണി​ലെ സാക്ഷി​ക​ളോ​ടൊ​പ്പം കായി​ക​വേ​ല​യിൽ പങ്കെടു​ത്തത്‌ ആളുക​ളു​ടെ “സംസാ​ര​വി​ഷ​യ​മാ​യി.” സമാധാ​ന​ത്തി​ലും യഥാർഥ സാഹോ​ദ​ര്യ​ത്തി​ലും ജീവി​ക്കാൻ യഹോ​വ​യു​ടെ സാക്ഷികൾ പഠിച്ചി​രി​ക്കു​ന്നു​വെ​ന്ന​തി​ന്റെ തെളി​വാ​യി​രു​ന്നു അത്‌.

റഷ്യ: റഷ്യയി​ലെ പുതിയ ബ്രാഞ്ച്‌ കെട്ടി​ട​ങ്ങ​ളു​ടെ സമർപ്പണം പ്രത്യേ​ക​മായ സാർവ​ദേ​ശീയ ശ്രദ്ധ പിടി​ച്ചു​പറ്റി. ലോക​ത്തി​ന്റെ ഈ ഭാഗത്ത്‌ ശ്രദ്ധേ​യ​മായ ദിവ്യാ​ധി​പത്യ പുരോ​ഗതി ഉണ്ടായി​രു​ന്നു. 1997 ജൂൺ 21-ലെ ആ പരിപാ​ടിക്ക്‌ 42 ദേശങ്ങ​ളിൽനി​ന്നുള്ള ആളുകൾ എത്തിയി​രു​ന്നു.

1972-ൽ മുഴു സോവി​യറ്റ്‌ യൂണി​യ​നി​ലു​മാ​യി 10,000 സാക്ഷി​ക​ളാ​ണു​ണ്ടാ​യി​രു​ന്നത്‌. 1991-ൽ അവിടെ യഹോ​വ​യു​ടെ സാക്ഷി​ക​ളു​ടെ പ്രവർത്ത​ന​ത്തി​നു നിയമാം​ഗീ​കാ​രം ലഭിച്ച​പ്പോൾ യൂണി​യ​നി​ലെ 15 റിപ്പബ്ലി​ക്കു​ക​ളി​ലാ​യി 49,171 സാക്ഷികൾ റിപ്പോർട്ടു ചെയ്യു​ന്നു​ണ്ടാ​യി​രു​ന്നു. 1997 മേയിൽ ആ പ്രദേ​ശത്ത്‌ 2,15,000 സാക്ഷികൾ പ്രവർത്ത​നി​ര​ത​രാ​യി​രു​ന്നു. 6,00,000-ത്തോളം പേർ മാർച്ചിൽ സ്‌മാ​ര​ക​ത്തി​നു ഹാജരാ​യി.

റഷ്യയും ഒമ്പത്‌ മുൻ റിപ്പബ്ലി​ക്കു​ക​ളും റഷ്യ ബ്രാഞ്ചി​ന്റെ മേൽനോ​ട്ട​ത്തിൻ കീഴിൽ വരുന്നു. അവിടത്തെ പ്രവർത്തനം ഏകോ​പി​പ്പി​ക്കു​ന്ന​തി​നും അവി​ടേക്കു വേണ്ട സാഹി​ത്യ​ങ്ങൾ പരിഭാ​ഷ​പ്പെ​ടു​ത്തു​ന്ന​തി​നും സെൻറ്‌ പീറ്റേ​ഴ്‌സ്‌ബർഗിന്‌ 40 കിലോ​മീ​റ്റർ വടക്കു​പ​ടി​ഞ്ഞാ​റാ​യി സോൾന്യെ​ച്ച്‌നോ​യെ എന്ന സ്ഥലത്തി​ന​ടുത്ത്‌ പുതിയ ബ്രാഞ്ച്‌ സൗകര്യ​ങ്ങൾ പണിയു​ക​യു​ണ്ടാ​യി. റഷ്യൻ ഫെഡ​റേ​ഷ​നിൽ യഹോ​വ​യു​ടെ സാക്ഷി​ക​ളു​ടെ മേഖലാ മതസ്ഥാ​പ​ന​ത്തിന്‌ ഭരണ​കേ​ന്ദ്ര​ത്തി​ലുള്ള നിയമ​പ​ര​മായ രജിസ്‌​ട്രേ​ഷനു ചേർച്ച​യി​ലാ​യി​രു​ന്നു ഇത്‌. മനോ​ഹ​ര​മായ ഈ സമുച്ച​യ​ത്തിൽ ഉൾപ്പെ​ടു​ന്നത്‌ 250 പേർക്കു​ത​കുന്ന ഏഴ്‌ പാർപ്പി​ട​ങ്ങ​ളും 500-ലധികം പേർക്കി​രി​ക്കാ​വുന്ന ഒരു രാജ്യ​ഹാ​ളും തീൻമു​റി​യും കൂടാതെ വിശാ​ല​മായ ഒരു ഓഫീസ്‌-സംഭരണ സമുച്ച​യ​വു​മാണ്‌.

സമർപ്പ​ണ​പ​രി​പാ​ടി​യിൽ ഭരണസം​ഘാം​ഗ​മായ തിയോ​ഡർ ജാരറ്റ്‌സ്‌ “ഭാവി​യി​ലേ​ക്കുള്ള നിർമാ​ണം” എന്ന മുഖ്യ പ്രസംഗം നടത്തി. രസകര​മായ ചരി​ത്ര​സം​ഭ​വ​വി​കാ​സങ്ങൾ മറ്റുള്ളവർ വിവരി​ച്ചു. റഷ്യയിൽ യഹോ​വ​യു​ടെ സാക്ഷി​ക​ളു​ടെ 100-ലധികം വർഷത്തെ പ്രവർത്ത​ന​ത്തി​ന്റെ തെളിവു നൽകുന്ന ഫോ​ട്ടോ​ക​ളും അനുഭ​വ​ങ്ങ​ളും സ്വീക​ര​ണ​മു​റി​യി​ലെ വലിയ ബോർഡു​ക​ളിൽ പ്രദർശി​പ്പി​ച്ചി​രു​ന്നു. ബൈബിൾ വിദ്യാർഥി​ക​ളിൽനിന്ന്‌ (യഹോ​വ​യു​ടെ സാക്ഷികൾ അന്ന്‌ അങ്ങനെ​യാണ്‌ അറിയ​പ്പെ​ട്ടി​രു​ന്നത്‌) പഠിച്ച കാര്യങ്ങൾ മറ്റുള്ള​വ​രോ​ടു പറഞ്ഞതി​ന്റെ പേരിൽ 1892-ൽ മോസ്‌കോ​യി​ലെ ഓർത്ത​ഡോ​ക്‌സ്‌ മെത്രാ​പ്പോ​ലീ​ത്ത​യു​ടെ നിർദേ​ശ​പ്ര​കാ​രം ഒരാളെ ഇന്ന്‌ കസാഖ്‌സ്ഥാൻ എന്നറി​യ​പ്പെ​ടുന്ന സ്ഥലത്തേക്കു നാടു​ക​ട​ത്തി​യ​താ​യി സന്ദർശകർ മനസ്സി​ലാ​ക്കി. രണ്ടാം ലോക​മ​ഹാ​യു​ദ്ധ​കാ​ലത്ത്‌ നാസീ തടങ്കൽപ്പാ​ള​യ​ത്തി​ലാ​യി​രു​ന്ന​പ്പോൾ യഹോ​വ​യു​ടെ സാക്ഷി​ക​ളിൽനി​ന്നു ബൈബിൾസ​ത്യം പഠിച്ച നൂറു​ക​ണ​ക്കി​നു റഷ്യക്കാ​രെ​ക്കു​റിച്ച്‌ അവർ വായി​ച്ച​റി​ഞ്ഞു. സ്റ്റാലിന്റെ ഏകാധി​പത്യ ഭരണകാ​ലത്ത്‌, 1951-ൽ സൈബീ​രി​യ​യി​ലേ​ക്കും റഷ്യൻ വിദൂ​ര​പൂർവ ദേശ​ത്തേ​ക്കും നാടു​ക​ട​ത്ത​പ്പെട്ട ആയിര​ക്ക​ണ​ക്കിന്‌ യഹോ​വ​യു​ടെ സാക്ഷി​ക​ളു​ടെ അനുഭ​വങ്ങൾ അവർ വായിച്ചു മനസ്സി​ലാ​ക്കി.

വിശ്വാ​സ​ത്തെ​പ്രതി ജയിലി​ലും സൈബീ​രി​യ​യി​ലെ ലേബർ ക്യാമ്പു​ക​ളി​ലും വർഷങ്ങ​ളോ​ളം കഷ്ടമനു​ഭ​വിച്ച പലരും സമർപ്പ​ണ​പ​രി​പാ​ടിക്ക്‌ എത്തിയ​വ​രു​ടെ ഇടയി​ലു​ണ്ടാ​യി​രു​ന്നു. ഉദ്യാ​ന​തു​ല്യ​മായ 17 ഏക്കർ സ്ഥലത്ത്‌ സ്ഥിതി​ചെ​യ്യുന്ന മനോ​ഹ​ര​മായ ഈ കെട്ടി​ടങ്ങൾ സന്ദർശിച്ച ഈ പഴമക്കാ​രു​ടെ വിസ്‌മയം നിങ്ങൾക്കു സങ്കൽപ്പി​ക്കാ​നാ​കു​മോ? പല സഹോ​ദ​ര​ങ്ങ​ളു​ടെ​യും കണ്ണുകൾ ഈറന​ണി​ഞ്ഞു, പ്രത്യേ​കി​ച്ചും തടവു​കാ​ല​ത്തി​നു​ശേഷം തമ്മിൽ കാണാ​തി​രു​ന്ന​വരെ തിരി​ച്ച​റി​ഞ്ഞ​പ്പോൾ. സഹോ​ദ​രങ്ങൾ വലിയ മുറ്റത്തു നിന്നു​കൊണ്ട്‌, ദശകങ്ങൾക്കു മുമ്പ്‌ സൈബീ​രി​യ​യിൽ പ്രവാ​സ​ത്തി​ലാ​യി​രു​ന്ന​പ്പോൾ തങ്ങൾ പാടിയ ചതുർഭാ​ഗ​താ​ള​പ്പൊ​രു​ത്ത​മുള്ള രാജ്യ​ഗീ​തങ്ങൾ സ്വത​വേ​തന്നെ ആലപി​ക്കവേ അവി​ടെ​യാ​യി​രി​ക്കു​ന്നത്‌ എത്ര സന്തോ​ഷ​പ്ര​ദ​മാ​യി​രു​ന്നു!

ഈ കെട്ടി​ടങ്ങൾ പണിയാൻ 20-ഓളം രാജ്യ​ങ്ങ​ളിൽനി​ന്നുള്ള അനവധി നിർമാ​ണ​പ്ര​വർത്തകർ നാലു വർഷത്തി​ല​ധി​കം കൂട്ടായി യത്‌നി​ച്ചു. റഷ്യയി​ലെ സഹോ​ദ​ര​ങ്ങളെ സഹായി​ക്കാൻ ചിലർ തങ്ങളുടെ ഭവനം വിട്ടു​പോ​രു​ക​യും ജീവി​ത​ത്തിൽ വലിയ മാറ്റങ്ങൾ വരുത്തു​ക​യും ചെയ്‌തു. മറ്റു ദിവ്യാ​ധി​പത്യ നിയമ​ന​ങ്ങ​ളി​ലേക്കു കടക്കാൻ ഒരുങ്ങി​നിൽക്കുന്ന അവർക്ക്‌ എത്രമാ​ത്രം സന്തോ​ഷ​മു​ള​വാ​ക്കിയ ഒരു അനുഭ​വ​മാ​യി​രു​ന്നു അത്‌!

സൊ​സൈ​റ്റി​യു​ടെ ഹെഡ്‌ക്വാർട്ടേ​ഴ്‌സി​ലും ലോക​മെ​ങ്ങു​മുള്ള ബ്രാഞ്ചു​ക​ളി​ലു​മാ​യി മൊത്തം 16,982 സ്വമേ​ധ​യാ​സേ​വകർ നിരന്തരം പ്രവർത്തി​ക്കു​ന്നുണ്ട്‌. ഈ ബെഥേൽ കുടും​ബാം​ഗങ്ങൾ സേവി​ക്കുന്ന സാഹച​ര്യ​ങ്ങൾ നിമിത്തം അവരെ​യെ​ല്ലാം പ്രത്യേക മുഴു​സമയ സേവക​രു​ടെ വിഭാ​ഗ​ത്തിൽ ഉൾപ്പെ​ടു​ത്തി​യി​രി​ക്കു​ന്നു.

‘നിലങ്ങൾ കൊയ്‌ത്തിന്‌ വിളഞ്ഞി​രി​ക്കു​ന്നു’

“നിങ്ങൾ തല പൊക്കി നോക്കി​യാൽ നിലങ്ങൾ ഇപ്പോൾ തന്നേ കൊയ്‌ത്തി​ന്നു വെളു​ത്തി​രി​ക്കു​ന്നതു കാണും” എന്ന്‌ യേശു പറഞ്ഞു. (യോഹ. 4:35) മുമ്പെ​ന്ന​ത്തെ​ക്കാ​ളും അത്‌ ഇന്ന്‌ സത്യമാണ്‌. ആഗോള സാക്ഷ്യ​വേ​ല​യ്‌ക്കു തുടക്ക​മിട്ട 1919 മുതൽ ലോക​വ​യ​ലിൽ വലിയ അളവിൽ “വിത്ത്‌” വിതച്ചി​ട്ടുണ്ട്‌. ശതകോ​ടി​ക്ക​ണ​ക്കി​നു ബൈബിൾ സാഹി​ത്യ​ങ്ങൾ വിതരണം ചെയ്യ​പ്പെ​ട്ടി​ട്ടുണ്ട്‌. യഹോ​വ​യു​ടെ ഉദ്ദേശ്യ​ത്തെ​പ്പറ്റി ആളുക​ളു​മാ​യി സഹസ്ര​കോ​ടി​ക്ക​ണ​ക്കി​നു സംഭാ​ഷ​ണങ്ങൾ നടത്ത​പ്പെ​ട്ടി​ട്ടുണ്ട്‌. മനുഷ്യ​വർഗ​ത്തി​ന്റെ ഏക പ്രത്യാ​ശ​യെന്ന നിലയിൽ ദൈവ​രാ​ജ്യ​ത്തെ​ക്കു​റി​ച്ചുള്ള മർമ​പ്ര​ധാ​ന​മായ സന്ദേശം ആളുക​ളു​ടെ മുമ്പാകെ അവതരി​പ്പി​ക്കു​ന്ന​തി​നു സാധ്യ​മായ എല്ലാ പ്രചാ​ര​മാർഗ​ങ്ങ​ളും ഉപയോ​ഗ​പ്പെ​ടു​ത്തി​യി​ട്ടുണ്ട്‌. ഇപ്പോൾ വിള​വെ​ടു​പ്പി​ന്റെ സമയമാണ്‌.

മെക്‌സി​ക്കോ​യി​ലും മധ്യ, ദക്ഷിണ അമേരി​ക്ക​യി​ലും കരീബി​യൻ ദ്വീപു​ക​ളി​ലു​മാ​യി കഴിഞ്ഞ അഞ്ചു വർഷം​കൊണ്ട്‌ 5,90,760 പേർ സ്‌നാ​പ​ന​മേറ്റു. യഹോ​വയെ അറിയാ​നും സേവി​ക്കാ​നും താത്‌പ​ര്യം പ്രകട​മാ​ക്കിയ മറ്റുള്ള​വ​രു​മാ​യി കഴിഞ്ഞ വർഷം ശരാശരി 18,58,462 ബൈബി​ള​ധ്യ​യ​നങ്ങൾ ഈ പ്രദേ​ശത്തു നടത്തു​ക​യു​ണ്ടാ​യി.

1993-നുശേഷം, ആഫ്രി​ക്ക​യി​ലും അയൽദ്വീ​പു​ക​ളി​ലും സമർപ്പണ-സ്‌നാപന പടിയി​ലൂ​ടെ യഹോ​വ​യു​ടെ ദാസന്മാ​രാ​യി​ത്തീർന്ന​വ​രു​ടെ എണ്ണം 2,74,724 ആണ്‌. ആ ദേശങ്ങ​ളിൽ സസ്‌മാ​ര​ക​ത്തിന്‌ 28,63,594 പേർ കൂടി​വന്നു. മലാവി​യിൽ 1,25,000 പേരും അംഗോ​ള​യിൽ 1,60,414 പേരും അതിനു കൂടി​വന്നു. യുദ്ധപ​ങ്കി​ല​മായ കോം​ഗോ ജനാധി​പത്യ റിപ്പബ്ലി​ക്കിൽ (മുമ്പ്‌ സയർ) 5,74,736 പേരാണു സ്‌മാ​ര​ക​ത്തി​നു വന്നത്‌. ഇവരിൽ പലരും സത്യാ​രാ​ധന സ്വീക​രി​ക്കു​മെ​ന്നത്‌ തീർച്ച​യാണ്‌.

1989-ൽ ബെർലിൻ മതിൽ പൊളി​ച്ചു​മാ​റ്റാൻ തുടങ്ങി​യ​തു​മു​തൽ മുൻ സോവി​യറ്റ്‌ ചേരി​യിൽപ്പെട്ട രാജ്യ​ങ്ങ​ളിൽ 3,09,589 പേരാണ്‌ സത്യം പഠിച്ച്‌ സ്‌നാ​പ​ന​മേ​റ്റത്‌. അവരെ​ല്ലാ​വ​രും യഹോ​വ​യാൽ പഠിപ്പി​ക്ക​പ്പെ​ടാൻ മാത്രമല്ല അവന്റെ ഹിതം ചെയ്യാ​നും മനസ്സൊ​രു​ക്കം കാണി​ക്കു​ന്നു.

യഹോ​വ​യു​ടെ സാക്ഷികൾ ഒരു നൂറ്റാ​ണ്ടി​ലേ​റെ​ക്കാ​ല​മാ​യി പ്രസം​ഗി​ച്ചു​കൊ​ണ്ടി​രി​ക്കുന്ന വടക്കേ അമേരി​ക്ക​യി​ലും യൂറോ​പ്പി​ലും കുടി​യേ​റ്റ​ക്കാ​രായ വൻ ജനസമൂ​ഹങ്ങൾ ശിഷ്യ​രാ​ക്കൽവേ​ല​യ്‌ക്കു പാകമായ ഒരു വയലാണ്‌.

തീർച്ച​യാ​യും യഹോ​വ​യു​ടെ ദിവസം വന്നെത്തു​മ്പോൾ അവന്റെ “നാമം വിളി​ച്ച​പേ​ക്ഷി​ക്കു​ന്നവൻ ഏവനും രക്ഷിക്ക​പ്പെ​ടും.” (യോവേ. 2:32) യഹോ​വ​യെ​ക്കു​റിച്ച്‌ അറിയാ​നും അവനെ ആശ്രയി​ക്കാ​നും ജീവിതം അവന്റെ നീതി​യുള്ള നിലവാ​ര​ങ്ങൾക്കു ചേർച്ച​യിൽ കൊണ്ടു​വ​രാ​നും ആളുകളെ നാം ഇപ്പോൾ സഹായി​ക്കേ​ണ്ടത്‌ എത്ര മർമ​പ്ര​ധാ​ന​മാണ്‌! അത്തരം പടികൾ സ്വീക​രി​ക്കു​ന്നെ​ങ്കിൽ, യഹോ​വ​യു​ടെ വലുതും ഭയങ്കര​വു​മായ ദിവസം വരു​മ്പോൾ അവൻ പ്രീതി​യോ​ടെ വീക്ഷി​ക്കു​ന്ന​വ​രു​ടെ ഇടയിൽ അവരും കണ്ടെന്നു​വ​രാം.—സെഫ. 2:3.

[4, 5 പേജു​ക​ളി​ലെ ചിത്രങ്ങൾ]

യോവേൽ പ്രവചനം ഉദ്ധരി​ച്ചു​കൊണ്ട്‌ പൗലൊസ്‌ അപ്പോ​സ്‌തലൻ, പ്രസം​ഗി​ക്കു​ന്ന​തി​ന്റെ അടിയ​ന്തി​രത ഊന്നി​പ്പ​റ​ഞ്ഞു

[20-ാം പേജിലെ ചിത്രം]

ലൂയിസ്‌ മോൺടാസ്‌, ഒരു ദീർഘ​കാല സാക്ഷി

[21-ാം പേജിലെ ചിത്രങ്ങൾ]

റിവർ പ്ലേറ്റ്‌ സ്റ്റേഡി​യ​ത്തിൽ കൂടിയ 71,800 പേർക്ക്‌ ലോക​ത്തി​ന്റെ ആത്മാവി​നെ ചെറു​ത്തു​നിൽക്കാൻ ക്യാരി ബാർബർ ആഹ്വാനം നൽകി

[22-ാം പേജിലെ ചിത്രം]

അർജൻറീനയിലെ കാന്യ​വേ​ല​സിൽ 9,400 പേർക്കി​രി​ക്കാ​വുന്ന പുതിയ കൺ​വെൻ​ഷൻ ഹാൾ

[27-ാം പേജിലെ ചിത്രങ്ങൾ]

(1) റഷ്യ

(2) അർജൻറീ​ന

(3) സിയെറാ ലിയോൺ

(4) ഓസ്‌​ട്രേ​ലി​യ

[28-ാം പേജിലെ ചിത്രങ്ങൾ]

(5) ഫ്രഞ്ച്‌ ഗയാന

(6) ബ്രസീൽ

(7) മഡഗാ​സ്‌കർ

(8) ഡൊമി​നി​ക്കൻ റിപ്പബ്ലിക്ക്‌

[29-ാം പേജിലെ ചിത്രങ്ങൾ]

(9) മൗറീ​ഷ്യസ്‌

(10) ജമെയ്‌ക്ക