യേശു​വി​ന്റെ അത്ഭുതങ്ങൾ—ചരി​ത്ര​മോ കെട്ടു​ക​ഥ​യോ?

“രാത്രി​യി​ലെ നാലാം യാമത്തിൽ അവൻ കടലിൻമേൽ നടന്നു അവരുടെ അടുക്കൽ വന്നു.”—മത്തായി 14:25.

ലോക​മെ​മ്പാ​ടു​മുള്ള ദശലക്ഷ​ക്ക​ണ​ക്കിന്‌ ആളുകളെ സംബന്ധി​ച്ചി​ട​ത്തോ​ളം യേശു​ക്രി​സ്‌തു അത്ഭുതങ്ങൾ പ്രവർത്തി​ച്ചു എന്ന വിശ്വാ​സം ദൈവ​വി​ശ്വാ​സം പോ​ലെ​തന്നെ പ്രാധാ​ന്യ​മുള്ള ഒന്നാണ്‌. സുവി​ശേഷ എഴുത്തു​കാർ—മത്തായി, മർക്കോസ്‌, ലൂക്കോസ്‌, യോഹ​ന്നാൻ—യേശു​വി​ന്റെ ഏതാണ്ടു 35 അത്ഭുതങ്ങൾ വിവരി​ക്കു​ന്നുണ്ട്‌. എന്നിരു​ന്നാ​ലും, അവൻ അതിലു​മ​ധി​കം അസാധാ​രണ പ്രവൃ​ത്തി​കൾ ചെയ്‌ത​താ​യി അവരുടെ വിവര​ണങ്ങൾ സൂചി​പ്പി​ക്കു​ന്നു.—മത്തായി 9:35; ലൂക്കൊസ്‌ 9:11.

ഈ അത്ഭുതങ്ങൾ വിനോ​ദ​ത്തി​നു​വേണ്ടി പ്രവർത്തി​ച്ച​വ​യാ​യി​രു​ന്നില്ല. താൻ ദൈവ​പു​ത്ര​നാണ്‌, ദീർഘ​കാ​ല​മാ​യി പ്രതീ​ക്ഷി​ച്ചി​രുന്ന മിശി​ഹാ​യാണ്‌ എന്ന യേശു​വി​ന്റെ അവകാ​ശ​വാ​ദ​ത്തിന്‌ അടിസ്ഥാ​ന​മാ​യി​രു​ന്നു അവ. (യോഹ​ന്നാൻ 14:11) അടിമ​ത്ത​ത്തി​ലാ​യി​രുന്ന ഇസ്രാ​യേൽ ജനതയു​ടെ മുമ്പാകെ മോശ അത്ഭുത​ക​ര​മായ അടയാ​ളങ്ങൾ പ്രവർത്തി​ച്ചു. (പുറപ്പാ​ടു 4:1-9) മോശ​യെ​ക്കാൾ വലിയ​വ​നെന്നു പ്രവചി​ക്ക​പ്പെ​ട്ടി​രി​ക്കുന്ന മിശി​ഹാ​യും ദിവ്യ പിന്തു​ണ​യു​ടെ അടയാ​ള​മായ ചില ചിഹ്നങ്ങൾ പ്രകടി​പ്പി​ക്കു​മെന്നു പ്രതീ​ക്ഷി​ക്കു​ന്നതു ന്യായ​യു​ക്ത​മാണ്‌. (ആവർത്ത​ന​പു​സ്‌തകം 18:15) തൻമൂലം, “നിങ്ങളു​ടെ [യഹൂദൻമാ​രു​ടെ] നടുവിൽ ചെയ്യിച്ച ശക്തിക​ളും അത്ഭുത​ങ്ങ​ളും അടയാ​ള​ങ്ങ​ളും കൊണ്ടു ദൈവം നിങ്ങൾക്കു കാണി​ച്ചു​തന്ന പുരു​ഷ​നാ​യി” ബൈബിൾ യേശു​വി​നെ വിളി​ക്കു​ന്നു.—പ്രവൃ​ത്തി​കൾ 2:22.

ഒരു അത്ഭുത പ്രവർത്ത​ക​നെ​ന്ന​നി​ല​യിൽ യേശു​വി​നെ​പ്പ​റ​റി​യുള്ള ബൈബി​ളി​ന്റെ ചിത്രീ​ക​രണം കഴിഞ്ഞ​കാ​ല​ങ്ങ​ളിൽ ജനങ്ങൾ സംശയ​ലേ​ശ​മ​ന്യെ പൊതു​വേ അംഗീ​ക​രി​ച്ചി​രു​ന്നു. എന്നാൽ സമീപ ദശകങ്ങ​ളിൽ, സുവി​ശേഷ വിവരണം വിമർശ​ക​രു​ടെ നിശി​ത​മായ വിമർശ​ന​ത്തി​നു വിധേ​യ​മാ​യി​രി​ക്കു​ന്നു. ബൈബി​ളി​ലെ വഞ്ചനക​ളും കെട്ടു​ക​ഥ​ക​ളും (ഇംഗ്ലീഷ്‌) എന്ന തന്റെ ഗ്രന്ഥത്തിൽ ലോയിഡ്‌ ഗ്രഹാം യേശു വെള്ളത്തി​ലൂ​ടെ നടക്കുന്ന ബൈബിൾ വൃത്താ​ന്തത്തെ പരാമർശി​ച്ചു​കൊണ്ട്‌ ഇങ്ങനെ​പോ​ലും പറയുന്നു: “തീരെ അറിവി​ല്ലെ​ങ്കിൽ മാത്രമേ അത്‌ അക്ഷരാർഥ​ത്തിൽ വിശ്വ​സി​ക്കാ​നാ​വൂ, എങ്കിലും, അത്‌ അക്ഷരാർഥ​ത്തിൽ നടന്നതാ​യി ദശലക്ഷങ്ങൾ വിശ്വ​സി​ക്കു​ന്നു. എന്നിട്ട്‌ നമ്മുടെ ലോക​ത്തിന്‌ എന്തു സംഭവി​ച്ചു​വെന്നു നാം അതിശ​യി​ക്കു​ക​യാണ്‌. അത്തരം അറിവി​ല്ലാ​യ്‌മ​യിൽനിന്ന്‌ ഇതിലും എത്ര മെച്ചമായ ഒരു ലോക​മാ​ണു നിങ്ങൾ പ്രതീ​ക്ഷി​ക്കുക?”

അസാധ്യം?

എന്നിരു​ന്നാ​ലും, അത്തരം വിമർശ​നങ്ങൾ ന്യായ​യു​ക്തമല്ല. ഒരു അത്ഭുതത്തെ, “അറിയ​പ്പെട്ട പ്രകൃ​തി​നി​യ​മ​ങ്ങ​ളി​ലൂ​ടെ വിശദീ​ക​രി​ക്കാ​നാ​വാത്ത ഒരു സംഭവ”മായി ദ വേൾഡ്‌ ബുക്ക്‌ എൻ​സൈ​ക്ലോ​പീ​ഡിയ നിർവ​ചി​ക്കു​ന്നു. ആ നിർവ​ച​ന​പ്ര​കാ​രം ഒരു കളർ ടിവി, ഒരു സെല്ലു​ലാർ ഫോൺ, ഒരു ലാപ്‌ടോപ്പ്‌ കമ്പ്യൂട്ടർ എന്നിവ കേവലം ഒരു ശതകം മുമ്പ്‌ അത്ഭുത​ങ്ങ​ളാ​യി കരുത​പ്പെ​ടു​മാ​യി​രു​ന്നു! ഇപ്പോ​ഴത്തെ ശാസ്‌ത്രീയ അറിവി​ന്റെ അടിസ്ഥാ​ന​ത്തിൽ നമുക്കു വിശദീ​ക​രി​ക്കാ​നാ​വാത്ത എന്തി​നെ​യെ​ങ്കി​ലും കണ്ണുമ​ടച്ച്‌ അസാധ്യം എന്നു വിളി​ക്കു​ന്നതു സുബോ​ധ​മാ​ണോ?

പരിചി​ന്ത​നാർഹ​മായ മറെറാ​രു സംഗതി​യി​താ: “പുതിയ നിയമം” എഴുത​പ്പെട്ട മൂലഭാ​ഷ​യായ ഗ്രീക്കിൽ “അത്ഭുതം” എന്ന പദത്തിന്‌ ഉപയോ​ഗി​ച്ചി​രു​ന്നത്‌ “ഡൈനാ​മിസ്‌” എന്ന പദമാ​യി​രു​ന്നു. ആ പദത്തിന്റെ അടിസ്ഥാന അർഥം “ശക്തി” എന്നാണ്‌. അതിനെ “വീര്യ​പ്ര​വൃ​ത്തി​കൾ” അല്ലെങ്കിൽ “പ്രാപ്‌തി” എന്നും പ്രതി​പാ​ദി​ച്ചി​ട്ടുണ്ട്‌. (ലൂക്കൊസ്‌ 6:19; 1 കൊരി​ന്ത്യർ 12:10; മത്തായി 25:15) യേശു​വി​ന്റെ അത്ഭുതങ്ങൾ “ദൈവ​ത്തി​ന്റെ മഹിമ”യുടെ പ്രകട​ന​മാ​യി ബൈബിൾ അവകാ​ശ​പ്പെ​ടു​ന്നു. (ലൂക്കൊസ്‌ 9:43) അത്തരം വേലകൾ സർവശ​ക്ത​നായ ദൈവത്തെ സംബന്ധി​ച്ചി​ട​ത്തോ​ളം—“ശക്തിയു​ടെ ആധിക്യ”മുള്ള ദൈവത്തെ സംബന്ധി​ച്ചി​ട​ത്തോ​ളം—അസാധ്യ​മാ​യി​രി​ക്കു​മോ?—യെശയ്യാ​വു 40:26.

ആധികാ​രി​ക​ത​യു​ടെ തെളിവ്‌

നാലു സുവി​ശേ​ഷ​ങ്ങ​ളു​ടെ ശ്രദ്ധാ​പൂർവ​മായ പരി​ശോ​ധന അവ വിശ്വ​സി​ക്കാ​വു​ന്ന​തി​നു കൂടുതൽ തെളിവു സമർപ്പി​ക്കു​ന്നു. ഒരു സംഗതി, ഈ വിവര​ണങ്ങൾ യക്ഷിക്ക​ഥ​ക​ളി​ലും ഐതി​ഹ്യ​ങ്ങ​ളി​ലും​നി​ന്നു തികച്ചും വ്യത്യ​സ്‌ത​മാ​ണെ​ന്ന​താണ്‌. ഉദാഹരണത്തിന്‌, യേശു​വി​ന്റെ മരണ​ശേഷം തുടർന്നു​വന്ന നൂററാ​ണ്ടു​ക​ളിൽ അവനെ​പ്പ​ററി പ്രചരിച്ച വ്യാജ​ക​ഥ​ക​ളെ​പ്പ​ററി പരിചി​ന്തി​ക്കുക. “തോമ​സി​ന്റെ സുവി​ശേഷ”ത്തിന്റെ അപ്പോ​ക്രിഫ ഇങ്ങനെ പ്രസ്‌താ​വി​ക്കു​ന്നു: “യേശു​വെന്ന ഈ കുട്ടിക്ക്‌ അഞ്ചു വയസ്സു​ണ്ടാ​യി​രു​ന്ന​പ്പോൾ . . . , അവൻ ഗ്രാമ​ത്തി​ലൂ​ടെ കടന്നു​പോ​യി. ഒരു കുട്ടി ഓടു​ന്ന​തി​നി​ട​യിൽ അവനു​മാ​യി കൂട്ടി​യി​ടി​ച്ചു. യേശു ക്ഷുഭി​ത​നാ​യി അവനോ​ടു പറഞ്ഞു: ‘നീ ഇവിടം​വി​ട്ടു മുന്നോ​ട്ടു പോവു​ക​യില്ല.’ ഉടനടി ആ കുട്ടി താഴെ വീണു മരിച്ചു.” ഈ കഥയുടെ യാഥാർഥ്യ​മെ​ന്തെന്ന്‌—വഞ്ചനാ​പൂർവം കെട്ടി​ച്ചമച്ച ഒന്നാ​ണെന്ന്‌—മനസ്സി​ലാ​ക്കാൻ യാതൊ​രു പ്രയാ​സ​വു​മില്ല. കൂടാതെ, താന്തോ​ന്നി​യും ദുരാത്മ ബാധി​ത​നു​മാ​യി ഇവിടെ ചിത്രീ​ക​രി​ച്ചി​രി​ക്കുന്ന ഈ കുട്ടി ബൈബി​ളിൽ വിവരി​ച്ചി​രി​ക്കുന്ന യേശു​വി​നെ ഒരുവി​ധ​ത്തി​ലും പ്രതി​ഫ​ലി​പ്പി​ക്കു​ന്നില്ല.—വിപരീത താരത​മ്യം ചെയ്യുക: ലൂക്കൊസ്‌ 2:51, 52.

ഇപ്പോൾ ആധികാ​രി​ക​മായ സുവി​ശേഷ വിവരണം പരിചി​ന്തി​ക്കുക. അവ അത്യു​ക്തി​യിൽനി​ന്നും കെട്ടി​ച്ചമച്ച കഥകളിൽനി​ന്നും വ്യത്യ​സ്‌ത​മാണ്‌. യേശു അത്ഭുതങ്ങൾ പ്രവർത്തി​ച്ചത്‌ യഥാർഥ ആവശ്യ​മ​നു​സ​രി​ച്ചാണ്‌ അല്ലാതെ വെറും വ്യാ​മോ​ഹത്തെ തൃപ്‌തി​പ്പെ​ടു​ത്താ​നല്ല. (മർക്കൊസ്‌ 10:46-52) സ്വയം പ്രയോ​ജ​കീ​ഭ​വി​ക്കാൻ യേശു ഒരിക്ക​ലും തന്റെ ശക്തി ഉപയോ​ഗി​ച്ചില്ല. (മത്തായി 4:2-4) പൊങ്ങച്ചം കാണി​ക്കാ​നാ​യി യേശു അവ ഒരിക്ക​ലും ഉപയോ​ഗി​ച്ചില്ല. വാസ്‌ത​വ​ത്തിൽ, ജിജ്ഞാ​സു​വായ ഹെരോ​ദാവ്‌ രാജാവ്‌ യേശു അത്ഭുത​ക​ര​മായ ‘അടയാളം’ പ്രവർത്തി​ക്കു​ന്നതു കാണാൻ ആഗ്രഹി​ച്ച​പ്പോൾ യേശു “അവനോട്‌ ഉത്തരം ഒന്നും പറഞ്ഞില്ല.”—ലൂക്കൊസ്‌ 23:8, 9.

യേശു​വി​ന്റെ അത്ഭുതങ്ങൾ ഇന്ദ്രജാ​ല​ക്കാ​രു​ടെ​യും ജാലവി​ദ്യ​ക്കാ​രു​ടെ​യും വിശ്വാ​സ​രോ​ഗ​ശാ​ന്തി​ക്കാ​രു​ടെ​യും വേലയിൽനി​ന്നു തികച്ചും വിഭി​ന്ന​മാണ്‌. അവന്റെ അത്ഭുത​വേ​ലകൾ എല്ലായ്‌പോ​ഴും ദൈവത്തെ മഹത്ത്വ​പ്പെ​ടു​ത്തി. (യോഹ​ന്നാൻ 9:3; 11:1-4) അവന്റെ അത്ഭുതങ്ങൾ വികാ​രോ​ദ്ദീ​പ​ക​മായ ആചാര​കർമങ്ങൾ, മന്ത്രോ​ച്ചാ​ര​ണങ്ങൾ, പ്രതാ​പ​പ്ര​ക​ട​നങ്ങൾ, തന്ത്രം, ഹിപ്പ്‌നോ​ട്ടി​സം എന്നിവ​യിൽനി​ന്നു മുക്തമാ​യി​രു​ന്നു. ബർത്തി​മാ​യി എന്ന കുരു​ട​നായ ഒരു ഭിക്ഷക്കാ​രനെ യേശു യാദൃ​ശ്ചി​ക​മാ​യി കണ്ടുമു​ട്ടി. അയാൾ “റബ്ബൂനീ, എനിക്കു കാഴ്‌ച പ്രാപി​ക്കേ​ണ​മെന്നു” നിലവി​ളി​ച്ചു പറഞ്ഞ​പ്പോൾ യേശു അവനോട്‌ ഇത്രമാ​ത്രം പറഞ്ഞു: “പോക; നിന്റെ വിശ്വാ​സം നിന്നെ രക്ഷിച്ചി​രി​ക്കു​ന്നു. ഉടനെ അവൻ കാഴ്‌ച പ്രാപി​ച്ചു.”—മർക്കൊസ്‌ 10:46-52.

യേശു വീര്യ​പ്ര​വൃ​ത്തി​കൾ ചെയ്‌തത്‌ എന്തെങ്കി​ലും സ്‌റേ​റ​ജു​പ​ക​ര​ണ​ങ്ങ​ളോ പ്രത്യേ​കം സജ്ജീക​രിച്ച സ്‌റേ​റ​ജു​ക​ളോ ലൈററു സംവി​ധാ​ന​ങ്ങ​ളോ ഒന്നും ഇല്ലാ​തെ​യാ​ണെന്നു സുവി​ശേഷ വൃത്താ​ന്തങ്ങൾ കാണി​ക്കു​ന്നു. അവയെ​ല്ലാം അസംഖ്യം ദൃക്‌സാ​ക്ഷി​ക​ളു​ടെ മുമ്പിൽവച്ച്‌ പരസ്യ​മാ​യി​ട്ടാ​ണു പ്രവർത്തി​ച്ചത്‌. (മർക്കൊസ്‌ 5:24-29; ലൂക്കൊസ്‌ 7:11-15) രോഗി​യു​ടെ അവിശ്വാ​സം നിമിത്തം രോഗ​ശാ​ന്തി സംഭവി​ച്ചി​ല്ലെന്ന്‌ അവകാ​ശ​വാ​ദം നടത്തുന്ന ആധുനിക വിശ്വാ​സ​രോ​ഗ​ശാ​ന്തി​ക്കാ​രു​ടെ ഉദ്യമ​ങ്ങ​ളിൽനി​ന്നു വ്യത്യ​സ്‌ത​മാ​യി രോഗ​ശാ​ന്തി നൽകു​ന്ന​തി​ലുള്ള അവന്റെ ശ്രമം ഒരിക്ക​ലും പരാജ​യ​മ​ട​ഞ്ഞില്ല. “അവൻ . . . സകലദീ​ന​ക്കാർക്കും സൌഖ്യം വരുത്തി” എന്നു മത്തായി 8:16 പറയുന്നു.

“അനേകം അപ്രമാ​ദി​ത്വ തെളി​വു​കൾ:” ക്രിസ്‌ത്യാ​നി​ത്വ​ത്തി​ന്റെ തെളി​വു​കൾ (ഇംഗ്ലീഷ്‌) എന്ന തന്റെ ഗ്രന്ഥത്തിൽ പണ്ഡിററ്‌ ആർഥർ പീർസൺ ക്രിസ്‌തു​വി​ന്റെ അത്ഭുത​ങ്ങ​ളെ​ക്കു​റിച്ച്‌ ഇങ്ങനെ പറയുന്നു: “അവയുടെ എണ്ണം, അവൻ നടത്തിയ സൗഖ്യ​മാ​ക്ക​ലു​ക​ളു​ടെ ക്ഷണിക​വും പരിപൂർണ​വു​മായ സ്വഭാവം, മരിച്ച​വ​രെ​പ്പോ​ലും ഉയിർപ്പി​ക്കാൻ നടത്തിയ ശ്രമത്തിൽ ഒരിക്കൽപ്പോ​ലും സംഭവി​ക്കാഞ്ഞ പരാജയം എന്നീ സംഗതി​കൾ ഈ അത്ഭുത​ങ്ങ​ളും ഈ യുഗത്തി​ലെ​യോ മറേറ​തെ​ങ്കി​ലും യുഗത്തി​ലെ​യോ അത്ഭുത​ങ്ങ​ളെന്നു പരാമർശി​ക്കു​ന്ന​വ​യും തമ്മിൽ അനന്തമായ അന്തരം സൃഷ്ടി​ക്കു​ന്നു.”

മതേതര സമർഥനം

സുവി​ശേഷ വിവര​ണ​ത്തി​നു പിൻബലം നൽകുന്ന മറെറാ​രു വാദം പീർസൺ നൽകുന്നു. “ശത്രുക്കൾ മൗനം പാലി​ച്ചു​വെന്ന വസ്‌തു​ത​യാണ്‌ തിരു​വെ​ഴു​ത്തു​ക​ളിൽ നൽകി​യി​രി​ക്കുന്ന അത്ഭുത​ങ്ങൾക്ക്‌ ഏററവും ഉറപ്പു​നൽകു​ന്നത്‌.” യഹൂദ്യ നേതാ​ക്കൻമാർക്ക്‌ യേശു​വി​നെ അവമാ​നി​ക്കു​ന്ന​തി​നു ശക്തമായ ഉദ്ദേശ്യ​മു​ണ്ടാ​യി​രു​ന്നു. എന്നാൽ അവന്റെ അത്ഭുതങ്ങൾ അത്രമാ​ത്രം സുവി​ദി​ത​മാ​യി​രു​ന്ന​തി​നാൽ അവയെ തള്ളിപ്പ​റ​യാൻ അവർ ധൈര്യ​പ്പെ​ട്ടില്ല. അവർക്ക്‌ ആകെ ചെയ്യാൻ കഴിഞ്ഞത്‌ അത്തരം പ്രവൃ​ത്തി​കൾ ഭൂതങ്ങ​ളു​ടെ ശക്തിയാ​ലാ​ണു നടന്ന​തെന്നു പറയുക മാത്ര​മാണ്‌. (മത്തായി 12:22-24) യേശു​വി​ന്റെ മരണത്തി​നു നൂററാ​ണ്ടു​കൾക്കു​ശേഷം യഹൂദ തൽമൂ​ദി​ന്റെ ലേഖകർ യേശു​വി​നെ അത്ഭുത ശക്തിക​ളു​ള്ള​വ​നാ​യി ചിത്രീ​ക​രി​ച്ചു. യേശു​വി​നെ സംബന്ധി​ച്ചുള്ള യഹൂദ ആശയ​പ്ര​ക​ട​നങ്ങൾ (ഇംഗ്ലീഷ്‌) എന്ന ഗ്രന്ഥം പറയു​ന്ന​ത​നു​സ​രിച്ച്‌, “ജാലവി​ദ്യ അഭ്യസി​ക്കു​ന്ന​വ​നാ​യി” അവർ അവനെ മുദ്ര​കു​ത്തി. യേശു​വി​ന്റെ അത്ഭുതങ്ങൾ വെറും കെട്ടു​ക​ഥ​യാ​ണെന്നു വരുത്തി​ത്തീർക്കാൻ അൽപ്പ​മെ​ങ്കി​ലും കഴിയു​മാ​യി​രു​ന്നെ​ങ്കിൽ അത്തര​മൊ​രു അഭി​പ്രാ​യ​പ്ര​ക​ടനം നടത്തു​മാ​യി​രു​ന്നോ?

കൂടു​ത​ലാ​യ തെളി​വു​കൾ നാലാം നൂററാ​ണ്ടി​ലെ സഭാ ചരി​ത്ര​കാ​ര​നാ​യി​രുന്ന യൂസേ​ബി​യ​സിൽനി​ന്നു​ള്ള​താണ്‌. ക്രിസ്‌തു​മു​തൽ കോൺസ്‌റ​റ​ന്റൈൻ വരെയുള്ള ചരിത്രം (ഇംഗ്ലീഷ്‌) എന്ന അദ്ദേഹ​ത്തി​ന്റെ ഗ്രന്ഥത്തിൽ ക്രിസ്‌ത്യാ​നി​ത്വ​ത്തി​നു പ്രതി​വാ​ദം പറഞ്ഞു​കൊണ്ട്‌ ക്വാ​ഡ്രാ​റ​റസ്‌ എന്ന ഒരുവൻ ചക്രവർത്തി​ക്കെ​ഴു​തിയ ഒരു കത്തിലെ വാക്കുകൾ ഉദ്ധരി​ക്കു​ന്നു. ക്വാ​ഡ്രാ​റ​റസ്‌ എഴുതി: “ഞങ്ങളുടെ രക്ഷകന്റെ വേലകൾ എല്ലായ്‌പോ​ഴും ദൃശ്യ​മാ​യി​രു​ന്നു കാരണം, അവ സത്യമാ​യി​രു​ന്നു—സൗഖ്യ​മാ​ക്ക​പ്പെ​ട്ട​വ​രെ​യും മരിച്ച​വ​രിൽനിന്ന്‌ ഉയിർപ്പി​ക്ക​പ്പെ​ട്ട​വ​രെ​യും തൽക്കാ​ല​ത്തേക്കു മാത്രമല്ല മറിച്ച്‌, എല്ലായ്‌പോ​ഴും കാണാ​മാ​യി​രു​ന്നു, രക്ഷകൻ ജീവി​ച്ചി​രു​ന്ന​പ്പോൾ മാത്രമല്ല, അവൻ വിടപ​റഞ്ഞ്‌ ഏറെനാ​ളു​കൾക്കു ശേഷവും; വാസ്‌ത​വ​ത്തിൽ, അവരിൽ ചിലർ എന്റെ സമയം​വരെ അതിജീ​വി​ച്ചി​രി​ക്കു​ന്നു.” പണ്ഡിത​നായ വില്യം ബാർക്ലേ ഇപ്രകാ​രം നിരീ​ക്ഷി​ച്ചു: “ആരു​ടെ​മേൽ അത്ഭുതങ്ങൾ പ്രവർത്തി​ച്ചു​വോ അവരെ തന്റെ നാളിൽപ്പോ​ലും തെളി​വി​നാ​യി ഹാജരാ​ക്കാൻ കഴിയു​മാ​യി​രു​ന്നു​വെ​ന്നാ​ണു ക്വാ​ഡ്രാ​റ​റസ്‌ പറയു​ന്നത്‌. അതു വാസ്‌ത​വ​മ​ല്ലാ​യി​രു​ന്നെ​ങ്കിൽ അതു നുണയാ​ണെന്നു മുദ്ര​യ​ടി​ക്കു​ന്ന​തി​നെ​ക്കാൾ ലളിത​മായ വേറൊ​ന്നും റോമാ ഗവൺമെൻറിന്‌ ഉണ്ടാകു​മാ​യി​രു​ന്നില്ല.”

യേശു​വി​ന്റെ അത്ഭുത​ങ്ങ​ളി​ലുള്ള വിശ്വാ​സം ന്യായ​യു​ക്ത​വും ബുദ്ധി​പൂർവ​ക​വും തെളി​വു​മാ​യി പരിപൂർണ ചേർച്ച​യു​മു​ള്ള​താണ്‌. എന്നിരു​ന്നാ​ലും, യേശു​വി​ന്റെ അത്ഭുതങ്ങൾ വെറും മൃതച​രി​ത്രമല്ല. എബ്രായർ 13:8 നമ്മെ ഇങ്ങനെ ഓർമി​പ്പി​ക്കു​ന്നു: “യേശു ഇന്നലെ​യും ഇന്നും എന്നെ​ന്നേ​ക്കും അനന്യൻ തന്നേ.” അതേ, അവൻ ഇന്നു സ്വർഗ​ത്തിൽ ജീവി​ച്ചി​രി​ക്കു​ന്നു. ഒരു മനുഷ്യ​നാ​യി ഭൂമി​യിൽ ജീവി​ച്ചി​രു​ന്ന​പ്പോൾ ചെയ്‌ത​തി​നെ​ക്കാൾ വളരെ​യ​ധി​കം പ്രബല​മായ വിധത്തിൽ തന്റെ അത്ഭുതാ​വ​ഹ​ശക്തി പ്രയോ​ഗി​ക്കാൻ അവൻ ഇപ്പോൾ പ്രാപ്‌ത​നാണ്‌. കൂടാതെ, അവന്റെ അത്ഭുതങ്ങൾ സംബന്ധിച്ച സുവി​ശേഷ വിവരണം (1) ഇന്ന്‌ ക്രിസ്‌ത്യാ​നി​കളെ പ്രാ​യോ​ഗിക പാഠങ്ങൾ പഠിപ്പി​ക്കു​ന്നു, (2) യേശു​വി​ന്റെ വ്യക്തി​ത്വ​ത്തി​ന്റെ മനോ​ജ്ഞ​മായ വശങ്ങൾ വെളി​പ്പെ​ടു​ത്തു​ന്നു, (3) കൂടുതൽ ഗംഭീ​ര​മായ സംഭവങ്ങൾ സമീപ ഭാവി​യിൽ സംഭവി​ക്കാൻ പോകു​ന്നു​വെ​ന്ന​തി​ലേക്കു വിരൽചൂ​ണ്ടു​ന്നു!

ഈ വിശദാം​ശങ്ങൾ വ്യക്തമാ​ക്കു​ന്ന​തിന്‌ അടുത്ത ലേഖനം സുവി​ദി​ത​മായ മൂന്നു ബൈബിൾ വിവര​ണ​ങ്ങ​ളു​ടെ​മേൽ ശ്രദ്ധ കേന്ദ്രീ​ക​രി​ക്കു​ന്ന​താണ്‌.