തന്ത്രശാ​ലി​യായ ഒരു ബിഷപ്പി​നെ പരാജ​യ​പ്പെ​ടു​ത്തിയ വിവേ​ക​മ​തി​യായ രാജ്ഞി

ദക്ഷിണാഫ്രിക്കയിലെ ഉണരുക! ലേഖകൻ

ഇംഗ്ലണ്ടി​ലെ കാതറിൻ പാർ രാജ്ഞി. തന്റെ വിശ്വസ്‌ത തോഴി​മാ​രോ​ടു കൂടെ ആയിരി​ക്കു​മ്പോൾ അവർക്ക്‌ സുരക്ഷി​ത​ത്വം തോന്നു​ന്നു. രോഗ​വും കൊട്ടാ​ര​ത്തി​ലെ ഉപജാ​പ​ങ്ങ​ളും ഹെന്‌റി എട്ടാമൻ രാജാ​വി​ന്റെ ആരോ​ഗ്യ​സ്ഥി​തി വഷളാ​ക്കി​ക്കൊ​ണ്ടി​രി​ക്കു​ക​യാണ്‌. രാജ്ഞി ഒരു കൂട്ടു​കാ​രി​യോട്‌ സംസാ​രി​ച്ചി​രി​ക്കവേ അവരുടെ തോഴി​മാ​രിൽ ഒരുവൾ പെട്ടെന്ന്‌ അകത്തേക്കു കയറി​വ​രു​ന്നു. അവളുടെ കയ്യിൽ ഒരു കടലാ​സുണ്ട്‌. ഓടി​ക്കി​തച്ച്‌ എത്തിയ അവൾ അത്‌ കാതറി​ന്റെ കയ്യിൽ കൊടു​ക്കു​മ്പോൾ ആശങ്ക​യോ​ടെ അവർ അതു വാങ്ങുന്നു. തോഴി​യു​ടെ മുഖത്തെ പ്രയാസം കണ്ട്‌ രാജ്ഞി ആകുല​ചി​ത്ത​യാണ്‌. രാജ്ഞി​യു​ടെ അന്തഃപു​ര​ത്തിന്‌ വെളി​യിൽ കിടന്നു കിട്ടിയ അത്‌, ഏതോ കൊട്ടാര ഉദ്യോ​ഗ​സ്ഥന്റെ കയ്യിൽനിന്ന്‌ അബദ്ധവ​ശാൽ താഴെ വീണു പോയ​താ​യി​രി​ക്കാ​നാ​ണു സാധ്യത.a

അതു വായി​ക്കവേ കാതറി​ന്റെ മുഖം വിവർണ​മാ​കു​ന്നു. ആദ്യം അവർക്ക്‌ അതു വിശ്വ​സി​ക്കാൻ ആകുന്നില്ല. ക്രമേണ കൊടും​ഭീ​തി അവരെ ഗ്രസി​ക്കു​ന്നു. തന്നെ മതവി​രോ​ധി​യാ​യി ആരോ​പിച്ച്‌ നിരത്തി​യി​രി​ക്കുന്ന കുറ്റങ്ങ​ളു​ടെ ഒരു പട്ടിക​യാ​ണത്‌. രാജാ​വി​ന്റെ ഒപ്പും അതിൽ ഉണ്ട്‌. പൊട്ടി​ക്ക​രഞ്ഞു പോയി അവർ. കുഴഞ്ഞു വീഴാൻ തുടങ്ങിയ അവരെ കൂട്ടു​കാ​രി​കൾ താങ്ങി​പ്പി​ടി​ക്കു​ന്നു. ശാന്തത കൈവ​രി​ക്കാ​നും വ്യക്തമാ​യി ചിന്തി​ക്കാ​നും അവർ ശ്രമി​ക്കു​ന്നു. പക്ഷേ അവർക്ക്‌ അതിനു കഴിയു​ന്നില്ല, മനസ്സ്‌ ആകെ കലുഷ​മാണ്‌. തോഴി​മാർ ദയയോ​ടെ അവരെ കിടക്ക​യിൽ എത്തിക്കു​ന്നു.

കിടന്നി​ട്ടും അവർക്ക്‌ ഒരു സ്വസ്ഥത​യും കിട്ടു​ന്നില്ല. ഹെന്‌റി എട്ടാമൻ രാജാ​വും ഒത്തുള്ള തന്റെ വിവാഹ ജീവി​ത​ത്തി​ലെ സംഭവങ്ങൾ ഒന്നൊ​ന്നാ​യി അവരുടെ മനസ്സിന്റെ തിരശ്ശീ​ല​യിൽ തെളി​ഞ്ഞു​വന്നു. രണ്ടു തവണ വിവാഹം കഴിച്ച്‌ വിധവ​യാ​യി തീർന്ന മുപ്പ​ത്തൊ​ന്നു​കാ​രി​യാ​യി​രുന്ന അവർ പരിഷ്‌കാ​രി​യായ തോമസ്‌ സിമോ​റി​നെ തന്റെ വിവാഹ പങ്കാളി ആക്കുന്ന​തി​നെ​ക്കു​റി​ച്ചു ചിന്തിച്ചു വരിക​യാ​യി​രു​ന്നു. ആ സമയത്താണ്‌ രാജാവ്‌ അവരോട്‌ വിവാ​ഹാ​ഭ്യർഥന നടത്തി​യത്‌. അവർക്ക്‌ അത്‌ എങ്ങനെ നിരസി​ക്കാ​നാ​കും? രാജാ​വി​ന്റെ ഭാര്യ ആകുക എന്നത്‌ തീർച്ച​യാ​യും ഒരു പദവി ആയിരു​ന്നു. അങ്ങനെ 1543 ജൂലൈ 12-ന്‌ അവർ രാജാ​വി​ന്റെ ആറാം ഭാര്യ ആയിത്തീർന്നു. എന്നാൽ രാജ്ഞി​സ്ഥാ​നം പൂമെത്ത ആയിരു​ന്നില്ല.

പരിഷ്‌കാ​രി​യും അശ്വ​യോ​ദ്ധാ​വും ആയിരുന്ന കാലത്തെ ബലിഷ്‌ഠ​മായ, വടി​വൊത്ത ശരീര​പ്ര​കൃ​തി​യാ​യി​രു​ന്നില്ല ഹെന്‌റി രാജാ​വിന്‌ അപ്പോൾ ഉണ്ടായി​രു​ന്നത്‌. 52 വയസ്സുള്ള അദ്ദേഹം പൊണ്ണ​ത്ത​ടി​യ​നാ​യി​രു​ന്നു, പെട്ടെന്ന്‌ ഭാവമാ​റ്റം ഉണ്ടാകുന്ന പ്രകൃ​ത​വും. കാലിൽ വ്രണങ്ങൾ ബാധി​ച്ചി​രുന്ന അദ്ദേഹ​ത്തിന്‌ ചില​പ്പോൾ നടക്കാനേ കഴിഞ്ഞി​രു​ന്നില്ല, കസേര​യിൽ എടുത്താണ്‌ എങ്ങോ​ട്ടെ​ങ്കി​ലും കൊണ്ടു​പോ​യി​രു​ന്നത്‌.

എന്നാൽ, തന്റെ ബുദ്ധി​വൈ​ഭ​വ​വും കഴിവു​ക​ളും ഉപയോ​ഗിച്ച്‌ വിവാ​ഹത്തെ ഒരു വിജയ​മാ​ക്കി​ത്തീർക്കാൻ കാതറിൻ ശ്രമിച്ചു. രാജാ​വി​ന്റെ മുൻ വിവാ​ഹ​ങ്ങ​ളി​ലെ മൂന്നു കുട്ടി​കൾക്ക്‌ അവർ ഒരു കൂട്ടു​കാ​രി​യെ പോലെ ആയിരു​ന്നു. ഭർത്താ​വി​നെ സന്തോ​ഷി​പ്പി​ക്കുന്ന ഒരു ഭാര്യ ആയിത്തീ​രാൻ അവർ ആവതു ശ്രമിച്ചു. അദ്ദേഹ​ത്തി​ന്റെ കാലുകൾ വേദനി​ച്ച​പ്പോൾ ജീവസ്സുറ്റ ചർച്ചക​ളാൽ അവർ അദ്ദേഹ​ത്തി​ന്റെ ശ്രദ്ധ മാറ്റി. പലപ്പോ​ഴും മതപര​മായ കാര്യ​ങ്ങ​ളെ​ക്കു​റി​ച്ചാ​യി​രു​ന്നു അവർ ചർച്ച​ചെ​യ്‌തി​രു​ന്നത്‌. രാജാ​വി​ന്റെ അവസാന നാളു​ക​ളിൽ അദ്ദേഹ​ത്തി​ന്റെ ജീവി​ത​ത്തിന്‌ ഒരളവു​വരെ പ്രശാന്തത പകരാൻ അവർക്കു കഴിഞ്ഞു.

രാജാ​വു​മൊ​ത്തുള്ള തന്റെ ജീവി​തത്തെ കുറി​ച്ചുള്ള ഓർമ​ക​ളി​ലേക്ക്‌ ഊളി​യിട്ട്‌ ഇറങ്ങാൻ അവർ ശ്രമിച്ചു. താൻ എന്തു തെറ്റാണു ചെയ്‌തത്‌? അടുത്ത​യി​ടെ അദ്ദേഹ​വും ആയി നടന്ന ഒരു ചർച്ച​യെ​ക്കു​റിച്ച്‌ അവർ ഓർത്തു. ആ വൈകു​ന്നേരം അദ്ദേഹ​ത്തി​ന്റെ ചില കൊട്ടാര ഉദ്യോ​ഗ​സ്ഥ​ന്മാ​രും സന്നിഹി​ത​രാ​യി​രു​ന്നു. അദ്ദേഹം സന്തോ​ഷ​വാ​നാ​യി കാണ​പ്പെട്ടു. പതിവു​പോ​ലെ, മതപര​മായ വിഷയ​ത്തെ​ക്കു​റി​ച്ചുള്ള ഒരു ചോദ്യം രാജ്ഞി ഉന്നയിച്ചു. അത്‌ മുമ്പും ചർച്ച ചെയ്‌തി​ട്ടുള്ള ചോദ്യം ആയിരു​ന്നു. രാജാവ്‌ കുപി​ത​നാ​കു​ക​യും ഉടൻതന്നെ അവരോട്‌ സംസാരം നിർത്താൻ ആവശ്യ​പ്പെ​ടു​ക​യും ചെയ്‌തു. അവർ അമ്പരന്നു​പോ​യി. എങ്കിലും, അദ്ദേഹ​ത്തി​ന്റെ പതിവു ഭാവ മാറ്റങ്ങ​ളിൽ ഒന്ന്‌ എന്നു കണക്കാക്കി അത്‌ അത്ര കാര്യ​മാ​ക്കി​യില്ല. സാധാ​ര​ണ​ഗ​തി​യിൽ അദ്ദേഹം അത്തരം ചർച്ചകൾ ആസ്വദി​ക്കാ​റു​ള്ള​താണ്‌. മതകാ​ര്യ​ങ്ങ​ളി​ലുള്ള അവരുടെ താത്‌പ​ര്യ​ത്തെ അദ്ദേഹം ഒരിക്ക​ലും എതിർത്തി​രു​ന്നില്ല.

ആ അവസര​ത്തിൽ അവിടെ സന്നിഹി​തർ ആയിരു​ന്നവർ ആരെല്ലാം ആണെന്ന്‌ അവർ ഓർമി​ക്കാൻ ശ്രമിച്ചു. രാജ്ഞി​യു​ടെ ചിന്തകൾ ഒരാളിൽത്തന്നെ ഉടക്കി നിന്നു. ശത്രു​വെന്ന നിലയിൽ അറിയ​പ്പെ​ട്ടി​രുന്ന സ്റ്റീവൻ ഗാർഡ്‌ന​റിൽ.

ഗൂഢത​ന്ത്രം മെനയുന്ന ഒരു ബിഷപ്പ്‌

വിൻചെ​സ്റ്റ​റി​ലെ ബിഷപ്പും രാജാ​വി​ന്റെ ഒരു ഉപദേ​ഷ്ടാ​വും ആയ ഗാർഡ്‌നർ വളരെ സ്വാധീ​ന​മുള്ള വ്യക്തി​യും മതനവീ​ക​ര​ണത്തെ എതിർക്കുന്ന ആളും ആയിരു​ന്നു. മതനവീ​ക​ര​ണ​ത്തി​ലുള്ള കാതറി​ന്റെ താത്‌പ​ര്യ​വും രാജാ​വി​ന്മേ​ലുള്ള അവരുടെ സ്വാധീ​ന​വും നിമിത്തം അദ്ദേഹ​ത്തിന്‌ കാതറി​നെ വെറു​പ്പാ​യി​രു​ന്നു.

തന്നെ ഹെന്‌റി രാജാ​വി​ന്റെ മുഖ്യ സെക്ര​ട്ടറി സ്ഥാനത്തു​നിന്ന്‌ മാറ്റാൻ കരുനീ​ക്കിയ രാജാ​വി​ന്റെ പ്രധാന ഉപദേ​ഷ്ടാ​വായ തോമസ്‌ ക്രോം​വെ​ലി​നോ​ടു പകരം വീട്ടാൻ ഒരു അവസരം തേടി നടന്നി​രുന്ന ആളാണ്‌ ഗാർഡ്‌നർ. വാസ്‌ത​വ​ത്തിൽ ക്രോം​വെ​ലി​ന്റെ വീഴ്‌ച​യ്‌ക്കും വധത്തി​നും ഇടയാ​ക്കിയ ഗൂഢാ​ലോ​ച​ന​യിൽ ഗാർഡ്‌നർക്ക്‌ പങ്കുണ്ടാ​യി​രു​ന്നു. കൂടാതെ, തന്റെ അത്രയും പ്രശസ്‌തി​യോ പ്രതാ​പ​മോ ഒന്നും ഇല്ലാഞ്ഞ, പ്രൊ​ട്ട​സ്റ്റന്റ്‌ അനുഭാ​വി ആയിരുന്ന തോമസ്‌ ക്രാൻമെ​റി​നെ ഹെന്‌റി രാജാവ്‌ കാന്റർബെറി ആർച്ചു​ബി​ഷപ്പ്‌ ആക്കിയ​തും ഗാർഡ്‌ന​റി​നെ നിരാ​ശ​നാ​ക്കി. ഗാർഡ്‌ന​റും സംഘവും ക്രാൻമെ​റിന്‌ എതി​രെ​യും ഗൂഢത​ന്ത്രം മെനഞ്ഞു. എന്നാൽ, ഹെന്‌റി അതു തകർത്തു കളഞ്ഞതു​കൊണ്ട്‌ ക്രാൻമെർ കുഴപ്പ​മൊ​ന്നും കൂടാതെ രക്ഷപ്പെട്ടു.

ബിഷപ്പ്‌ ഗാർഡ്‌നർ അടുത്ത​യി​ടെ മെനഞ്ഞ മറ്റൊരു ഗൂഢപ​ദ്ധതി കാതറി​ന്റെ​യും കൊട്ടാ​ര​ത്തി​ലെ കുലീന സ്‌ത്രീ​ക​ളു​ടെ​യും അവസ്ഥ കൂടുതൽ അപകട​ത്തി​ലാ​ക്കി. മതനവീ​ക​ര​ണ​ത്തി​ന്റെ തുറന്ന വക്താവാ​യി​രുന്ന ആൻ ആസ്‌ക്യൂ എന്ന ഒരു യുവതി പാഷണ്ഡ​ത​യ്‌ക്ക്‌ വധശി​ക്ഷ​യും കാത്ത്‌ ജയിലിൽ കഴിയു​ന്നു​ണ്ടാ​യി​രു​ന്നു. എന്നാൽ അതായി​രു​ന്നില്ല ഗാർഡ്‌നർ അവളിൽ തത്‌പ​ര​നാ​കാൻ കാരണം. കൊട്ടാ​ര​ത്തി​ലെ സ്വാധീ​ന​ശ​ക്തി​യുള്ള സ്‌ത്രീ​ജ​ന​ങ്ങ​ളു​മാ​യി അവൾക്കു ബന്ധമു​ണ്ടാ​യി​രു​ന്നു എന്നു കാണി​ക്കുന്ന, രാജ്ഞി​യെ​യും കുറ്റക്കാ​രി​യാ​ക്കുന്ന തരത്തി​ലുള്ള തെളി​വു​കൾ അദ്ദേഹ​ത്തിന്‌ ആവശ്യ​മാ​യി​രു​ന്നു. ഗാർഡ്‌ന​റി​ന്റെ സഹകാ​രി​യും രാജാ​വി​ന്റെ മുഖ്യ ഉപദേ​ഷ്ടാ​ക്ക​ളിൽ ഒരാളു​മായ തോമസ്‌ റൈയ​ത്‌സ്ലി, ആൻ ആസ്‌ക്യൂ​വി​നെ ചോദ്യം ചെയ്യാ​നാ​യി ചെന്നു.

റാക്കിൽ ബന്ധിച്ചു പീഡി​പ്പി​ക്കു​ന്നു

റൈയ​ത്‌സ്ലി ആനിനെ കുറെ നേരം ചോദ്യം ചെയ്‌തു. എന്നാൽ കുറ്റാ​രോ​പ​ണ​ത്തിന്‌ ഉതകുന്ന തെളി​വു​കൾ അദ്ദേഹ​ത്തി​നു ലഭിച്ചില്ല. ഒടുവിൽ, അവളെ റാക്ക്‌b എന്ന പീഡന​യ​ന്ത്ര​ത്തിൽ ബന്ധിക്കാൻ അദ്ദേഹം ആജ്ഞാപി​ച്ചു. സ്‌ത്രീ​കളെ ഈ ഉപകരണം ഉപയോ​ഗി​ച്ചു പീഡി​പ്പി​ക്കു​ന്നത്‌ നിയമ വിരു​ദ്ധ​മാ​യി​രു​ന്നു എങ്കിലും അദ്ദേഹം അതിന്‌ മുതിർന്നു. എന്നിട്ടും അവൾ സംസാ​രി​ക്കാ​താ​യ​പ്പോൾ റൈയ​ത്‌സ്ലി​യും മറ്റൊരു ഉപദേ​ഷ്ടാ​വും ചേർന്ന്‌ അവളുടെ ശരീരം പരമാ​വധി വലിയും വിധം റാക്ക്‌ തിരി​ക്കാൻ തുടങ്ങി. പക്ഷേ, അവർക്ക്‌ ആവശ്യ​മുള്ള വിവരങ്ങൾ ലഭിച്ചില്ല.

ആൻ ആസ്‌ക്യൂ നേരിട്ട പീഡനത്തെ കുറി​ച്ചുള്ള ഓർമകൾ കാതറി​ന്റെ കണ്ണുകളെ ഈറൻ അണിയി​ക്കു​ന്നു. തന്റെ മുറി​യി​ലേക്ക്‌ ആരോ കയറി വന്നതു​പോ​ലെ അവർക്കു തോന്നി. തോഴി​മാ​രിൽ ഒരാളാണ്‌. രാജ്ഞിയെ പരി​ശോ​ധി​ക്കു​ന്ന​തി​നാ​യി രാജാവ്‌ തന്റെ വൈദ്യ​നായ ഡോ. വെൻഡി​യെ അയച്ചി​രി​ക്കു​ന്നു എന്ന്‌ തോഴി അറിയി​ക്കു​ന്നു. ദയാലു​വായ ഡോക്ടർ അവരുടെ സുഖ വിവരം തിരക്കു​ന്നു, രാജാ​വി​ന്റെ ക്ഷേമാ​ന്വേ​ഷ​ണ​വും അറിയി​ക്കു​ന്നു.

രാജ്ഞി​ക്കെ​തി​രെ​യുള്ള ഗൂഢാ​ലോ​ചന സംബന്ധിച്ച സകല രഹസ്യ​ങ്ങ​ളും രാജാവ്‌ തന്നെ അറിയി​ച്ചി​രി​ക്കു​ന്നു​വെ​ന്നും ആരോ​ടും പറയരു​തെന്ന്‌ സത്യം ചെയ്യി​ച്ചി​രി​ക്കു​ന്നു​വെ​ന്നും ഡോക്ടർ പറയുന്നു. എങ്കിലും, ഡോ. വെൻഡി അവരോട്‌ എല്ലാം തുറന്നു പറയുന്നു: അന്നത്തെ ആ രാത്രി​യിൽ, രാജ്ഞി രാജാ​വി​ന്റെ അടുക്കൽ നിന്നു പോന്ന​ശേഷം, ഈ വയസ്സു​കാ​ലത്ത്‌ “[തന്റെ] ഭാര്യ​യാൽ പഠിപ്പി​ക്ക​പ്പെ​ടു​ന്നത്‌” തനിക്ക്‌ വളരെ​യ​ധി​കം ആശ്വാസം കൈവ​രു​ത്തു​ന്നു​വെന്ന്‌ രാജാവ്‌ അവരെ​ക്കു​റിച്ച്‌ പരിഹ​സി​ച്ചു പറഞ്ഞു.

ഗാർഡ്‌നർ കിട്ടിയ അവസരം ഒട്ടും പാഴാ​ക്കി​യില്ല. രാജ്ഞി മതവി​രോ​ധി​കളെ വെച്ചു​പൊ​റു​പ്പി​ക്കു​ന്നു എന്നും അവരുടെ പ്രവർത്ത​നങ്ങൾ രാജ്യ​ദ്രോ​ഹ​പ​ര​മാണ്‌ എന്നും രാജാ​വി​ന്റെ അധികാ​ര​ത്തിന്‌ അവ ഭീഷണി ഉയർത്തു​ന്നു​വെ​ന്നും ഗാർഡ്‌നർ പറഞ്ഞു. സമയം അനുവ​ദി​ക്കു​ക​യാ​ണെ​ങ്കിൽ തനിക്കും കൂട്ടർക്കും ഇതിനുള്ള തെളിവ്‌ രാജാ​വി​ന്റെ മുന്നിൽ ഹാജരാ​ക്കാൻ കഴിയു​മെന്ന്‌ അദ്ദേഹം പറഞ്ഞു. കുപി​ത​നായ രാജാവ്‌ രാജ്ഞിക്ക്‌ എതി​രെ​യുള്ള ഒരു കുറ്റപ​ത്ര​ത്തിൽ ഒപ്പിടാൻ സമ്മതിച്ചു.

ഈ സംഭവ​ങ്ങ​ളെ​ല്ലാം വിവരി​ച്ച​തി​നു ശേഷം ഡോ. വെൻഡി, കഴിയു​ന്ന​തും നേരത്തെ രാജാ​വി​ന്റെ അടുക്കൽ പോയി താഴ്‌മ​യോ​ടെ ക്ഷമാപണം നടത്താൻ രാജ്ഞിയെ നിർബ​ന്ധി​ക്കു​ന്നു. രാജ്ഞിയെ ലണ്ടൻ ടവറിൽ തടവി​ലാ​ക്കു​ക​യും അവർക്ക്‌ വധശിക്ഷ വിധി​ക്കു​ന്ന​തിന്‌ വേണ്ടത്ര തെളി​വു​കൾ സമ്പാദി​ക്കു​ക​യും ചെയ്‌തേ അടങ്ങൂ എന്നു പ്രതി​ജ്ഞ​യെ​ടു​ത്തു നടക്കുന്ന അവരുടെ ശത്രു​ക്കളെ തറ പറ്റിക്കാൻ ഇതേ ഒരു മാർഗ​മു​ള്ളൂ.

ആ ബുദ്ധ്യു​പ​ദേശം അനുസ​രി​ക്കു​ന്നത്‌ ജ്ഞാനമാ​ണെന്ന്‌ കാതറിൻ മനസ്സി​ലാ​ക്കു​ന്നു. ഒരു ദിവസം രാത്രി വൈകി​യ​പ്പോൾ രാജാവ്‌ പള്ളിയ​റ​യിൽ ഉണ്ടെന്നു കേട്ട്‌ അവർ ശ്രദ്ധാ​പൂർവം വസ്‌ത്രം ധരിച്ച്‌ അങ്ങോട്ടു ചെല്ലാ​നാ​യി ഒരുങ്ങു​ന്നു, പറയാ​നു​ള്ള​തെ​ല്ലാം സ്വയം പറഞ്ഞു നോക്കു​ന്നു. അവരുടെ സഹോ​ദ​രി​യും ലേഡി ലെയ്‌ൻ എന്ന കൂട്ടു​കാ​രി​യും അവരെ അനുഗ​മി​ക്കു​ന്നു.

ജ്ഞാനി​യും വിവേ​ക​മ​തി​യും ആയ ഒരു രാജ്ഞി

രാജാവ്‌ തന്റെ ചില അംഗര​ക്ഷ​ക​രു​മാ​യി നേര​മ്പോ​ക്കു പറഞ്ഞ്‌ ഇരിക്കു​ക​യാണ്‌. ഒരു പുഞ്ചി​രി​യോ​ടെ അദ്ദേഹം ഭാര്യയെ സ്വാഗതം ചെയ്യുന്നു. അദ്ദേഹം സംഭാ​ഷണം മത വിഷയ​ങ്ങ​ളി​ലേക്കു തിരി​ച്ചു​വി​ടു​ന്നു. തന്റെ ചില സംശയ​ങ്ങൾക്ക്‌ ഉത്തരം തരാൻ അദ്ദേഹം കാതറി​നോട്‌ അഭ്യർഥി​ക്കു​ന്നു. കാതറിന്‌ പെട്ടെ​ന്നു​തന്നെ അതിൽ ഒളിഞ്ഞി​രി​ക്കുന്ന കെണി പിടി​കി​ട്ടു​ന്നു. ആത്മാർഥ​ത​യും സത്യസ​ന്ധ​ത​യും സ്‌ഫു​രി​ക്കുന്ന വിധത്തിൽ പ്രതി​ക​രി​ക്കാൻ അവർ പരമാ​വധി ശ്രമി​ക്കു​ന്നു.

ദൈവം പുരു​ഷനെ സൃഷ്ടി​ച്ച​തി​നു ശേഷം, അവനെ​ക്കാൾ താണവ​ളാ​യി​ട്ടാണ്‌ സ്‌ത്രീ​യെ സൃഷ്ടി​ച്ച​തെന്ന്‌ അവർ പറയുന്നു. അവർ ഇങ്ങനെ തുടരു​ന്നു: ‘ദൈവം സ്‌ത്രീ​ക്കും പുരു​ഷ​നും പ്രകൃ​ത്യാ അത്തരം ഒരു വ്യത്യാ​സം കൽപ്പി​ച്ചി​രി​ക്കെ, തിരു​മ​നസ്സ്‌ വളരെ ജ്ഞാനി​യും അടിയൻ എല്ലാ അർഥത്തി​ലും തിരു​മ​ന​സ്സി​നെ​ക്കാൾ വളരെ താണവ​ളും ആയിരി​ക്കെ, തിരു​മ​നസ്സ്‌ സങ്കീർണ​മായ അത്തരം മത വിഷയങ്ങൾ സംബന്ധിച്ച്‌ അടിയന്റെ ഉപദേശം ആരായു​ന്നത്‌ എന്തിനാണ്‌?’ ദൈവം കഴിഞ്ഞാൽ പിന്നെ എല്ലാ കാര്യ​ങ്ങ​ളി​ലും അദ്ദേഹം ആണ്‌ തന്റെ തല എന്ന്‌ അവർ തറപ്പിച്ചു പറയുന്നു.

അപ്പോൾ രാജാവ്‌ ഇങ്ങനെ മറുപടി പറയുന്നു: ‘അങ്ങനെ അല്ല, പ്രബോ​ധി​പ്പി​ക്ക​പ്പെ​ടു​ക​യോ ഉപദേ​ശി​ക്ക​പ്പെ​ടു​ക​യോ ചെയ്യാ​വുന്ന സ്ഥാനത്താ​യി​രി​ക്കു​ന്ന​തി​നു പകരം നമ്മെ പ്രബോ​ധി​പ്പി​ക്കാൻ തക്കവണ്ണം നിങ്ങൾ ഒരു പണ്ഡിത ആയിത്തീർന്നി​രി​ക്കു​ന്നു.’

‘അവിടുന്ന്‌ അങ്ങനെ​യാണ്‌ വീക്ഷി​ക്കു​ന്ന​തെ​ങ്കിൽ അടിയനെ വല്ലാതെ തെറ്റി​ദ്ധ​രി​ച്ചി​രി​ക്കു​ന്നു. ഭർത്താ​വിൽനി​ന്നു പഠിക്കു​ക​യും ഭർത്താ​വി​നാൽ പഠിപ്പി​ക്ക​പ്പെ​ടു​ക​യും ചെയ്യു​ന്ന​തി​നു പകരം തന്റെ യജമാ​ന​നും ഭർത്താ​വു​മായ വ്യക്തിയെ പ്രബോ​ധി​പ്പി​ക്കാ​നോ പഠിപ്പി​ക്കാ​നോ ഉള്ള സ്ഥാനത്താണ്‌ താൻ എന്നു സങ്കൽപ്പി​ക്കു​ന്നത്‌ സ്‌ത്രീ​യെ സംബന്ധി​ച്ചി​ട​ത്തോ​ളം തീരെ അനുചി​ത​വും അപഹാ​സ്യ​വും ആണെന്നാണ്‌ അടിയൻ ഇതുവരെ കരുതി​യി​ട്ടു​ള്ളത്‌,’ രാജ്ഞി പറയുന്നു. മത വിഷയ​ങ്ങ​ളെ​ക്കു​റിച്ച്‌ അദ്ദേഹ​ത്തോ​ടു സംസാ​രി​ക്കു​ക​യും ചില​പ്പോ​ഴൊ​ക്കെ അഭി​പ്രായ പ്രകടനം നടത്തു​ക​യും ചെയ്‌തി​ട്ടു​ള്ളത്‌ സ്വന്തം ആശയങ്ങൾ ഉന്നമി​പ്പി​ക്കാൻ ആയിരു​ന്നില്ല എന്ന്‌ അവർ വിശദീ​ക​രി​ക്കു​ന്നു. പകരം, രോഗം നിമി​ത്ത​മുള്ള വേദന​യിൽ നിന്ന്‌ അദ്ദേഹ​ത്തി​ന്റെ ശ്രദ്ധ തിരി​ക്കാ​നാ​യി​രു​ന്നു താൻ സംഭാ​ഷ​ണ​ത്തിൽ ഏർപ്പെ​ട്ടത്‌ എന്ന്‌ അവർ വ്യക്തമാ​ക്കി.

‘പ്രിയേ, അതാണോ വാസ്‌തവം?’ രാജാവു ചോദി​ക്കു​ന്നു. ‘നിങ്ങൾ വാദഗ​തി​കൾ നടത്തി​യത്‌ മോശ​മായ ആന്തര​ത്തോ​ടെ ആയിരു​ന്നി​ല്ലെ​ന്നോ? അങ്ങനെ​യെ​ങ്കിൽ, നാം മുമ്പെ​ന്ന​ത്തെ​യും പോ​ലെ​തന്നെ വീണ്ടും ഉത്തമ സുഹൃ​ത്തു​ക്ക​ളാണ്‌.’ അദ്ദേഹം രാജ്ഞിയെ തന്റെ അടുക്ക​ലേക്കു വിളി​ക്കു​ന്നു. അവരെ ഊഷ്‌മ​ള​മാ​യി ആശ്ലേഷി​ക്കു​ക​യും ചുംബി​ക്കു​ക​യും ചെയ്യുന്നു. ആ അറിവ്‌, അപ്രതീ​ക്ഷി​ത​മാ​യി ലഭിക്കുന്ന ഒരു ലക്ഷം പൗണ്ടു വിലയുള്ള സമ്മാന​ത്തെ​ക്കാൾ മൂല്യ​വ​ത്താ​ണെന്ന്‌ അദ്ദേഹം പറയുന്നു. ഏതാണ്ട്‌ അർധരാ​ത്രി​യോ​ടെ രാജ്ഞിയെ പോകാൻ അനുവ​ദി​ക്കു​ന്ന​തു​വരെ അവർ ഹൃദ്യ​മായ സംഭാ​ഷണം തുടരു​ന്നു.

പിറ്റേന്ന്‌ രാജാവ്‌ അരമന പൂന്തോ​ട്ട​ത്തി​ലൂ​ടെ ഉലാത്തു​ക​യാ​യി​രു​ന്നു. പള്ളിയ​റ​യി​ലെ രണ്ട്‌ അംഗര​ക്ഷ​ക​രും കൂടെ ഉണ്ട്‌. രാജാവ്‌ രാജ്ഞിയെ തന്റെ അടുക്കൽ വരാൻ ആളയയ്‌ക്കു​ന്നു. അവർ തന്റെ മൂന്നു തോഴി​മാ​രോ​ടൊ​പ്പം യഥോ​ചി​തം അവിടെ എത്തി​ച്ചേ​രു​ന്നു. കാതറി​നെ അറസ്റ്റു ചെയ്യാൻ നിശ്ചയി​ച്ചി​രുന്ന സമയം അതായി​രു​ന്നു എങ്കിലും അത്‌ അവരോ​ടു പറയാൻ ഹെന്‌റി മിന​ക്കെ​ട്ടില്ല. താൻ രാജ്ഞി​യു​മാ​യി അനുര​ഞ്‌ജ​ന​ത്തി​ലായ കാര്യം, അറസ്റ്റു നിർവ​ഹി​ക്കാൻ നിയു​ക്ത​നാ​യി​രുന്ന റൈയ​ത്‌സ്ലി​യെ​യും അദ്ദേഹം അറിയി​ച്ചില്ല. അവർ ഇങ്ങനെ ആഹ്ലാദ​ത്തോ​ടെ ഒരുമി​ച്ചു സമയം ചെലവ​ഴി​ക്കവേ, രാജ്ഞി​യെ​യും തോഴി​മാ​രെ​യും അറസ്റ്റു ചെയ്യാ​നാ​യി രാജാ​വി​ന്റെ 40 കാവൽക്കാ​രു​മാ​യി റൈയ​ത്‌സ്ലി എത്തുന്നു.

ഹെന്‌റി കൂട്ടത്തിൽനിന്ന്‌ മാറി​യിട്ട്‌ റൈയ​ത്‌സ്ലി​യോ​ടു തന്റെ അടു​ത്തേക്കു വരാൻ കൽപ്പി​ക്കു​ന്നു. റൈയ​ത്‌സ്ലി രാജാ​വി​ന്റെ മുന്നിൽ മുട്ടു​കു​ത്തു​ന്നു. രാജാവ്‌ എന്താണു പറയു​ന്നത്‌ എന്ന്‌ കൂടി​നിൽക്കുന്ന ആർക്കും കേൾക്കാൻ കഴിയു​ന്നില്ല. എങ്കിലും, രാജാവ്‌ അദ്ദേഹത്തെ രോഷ​ത്തോ​ടെ ‘വഞ്ചകാ! മൃഗമേ! വിഡ്‌ഢീ!’ എന്നൊക്കെ വിളി​ക്കു​ന്നത്‌ അവർ കേൾക്കു​ന്നു. തന്റെ മുന്നിൽനി​ന്നു കടന്നു പോകാൻ രാജാവ്‌ റൈയ​ത്‌സ്ലി​യോട്‌ ആജ്ഞാപി​ക്കു​ന്നു.

രാജാവ്‌ കാതറി​ന്റെ അടുത്ത്‌ മടങ്ങി​ച്ചെ​ന്ന​പ്പോൾ അവർ അദ്ദേഹത്തെ സൗമ്യ വാക്കുകൾ പറഞ്ഞ്‌ സമാധാ​നി​പ്പി​ക്കാൻ ശ്രമി​ക്കു​ന്നു. റൈയ​ത്‌സ്ലിക്ക്‌ അറിയാ​തെ പറ്റിയ തെറ്റാ​യി​രി​ക്കും എന്നു പറഞ്ഞ്‌ അവർ അദ്ദേഹത്തെ അനുകൂ​ലി​ച്ചു പോലും സംസാ​രി​ക്കു​ന്നു.

അപ്പോൾ രാജാവ്‌ ഇങ്ങനെ പ്രതി​ക​രി​ക്കു​ന്നു: ‘പ്രിയേ, അവൻ നിന്നോട്‌ അത്യന്തം വഞ്ചനാ​ത്മ​ക​മാ​യി ഇടപെ​ട്ടി​രി​ക്കു​ന്നു. അവനെ വെറുതെ വിട്ടു​കൂ​ടാ.’

അങ്ങനെ കാതറിൻ ശത്രു​ക്ക​ളു​ടെ കൈയിൽനി​ന്നു രക്ഷപ്പെട്ടു. ബിഷപ്പ്‌ ഗാർഡ്‌ന​റിന്‌ രാജാ​വി​ന്റെ പ്രീതി നഷ്ടമായി. രാജ്ഞി തന്ത്രശാ​ലി​യായ ബിഷപ്പി​നെ പരാജ​യ​പ്പെ​ടു​ത്തി. അങ്ങനെ അദ്ദേഹ​ത്തി​ന്റെ ഗൂഢനീ​ക്ക​ങ്ങൾക്കു തിരശ്ശീല വീണു.c

[അടിക്കു​റി​പ്പു​കൾ]

[21-ാം പേജിലെ ചിത്രങ്ങൾ]

ബിഷപ്പ്‌ സ്റ്റീവൻ ഗാർഡ്‌നർ

കാതറിൻ പാർ രാജ്ഞി

[കടപ്പാട്‌]

കാതറിൻ പാറിന്റെ ചിത്രം: By courtesy of the National Portrait Gallery, London; സ്റ്റീവൻ ഗാർഡ്‌നർ: National Trust Photographic Library/J. Whitaker

[22-ാം പേജിലെ ചിത്രം]

ഹെന്‌റി എട്ടാമൻ, രാജ്ഞി​യു​ടെ മുന്നിൽ വെച്ച്‌ തോമസ്‌ റൈയ​ത്‌സ്ലി​യെ ഭർത്സിച്ചു

[കടപ്പാട്‌]

Portrait by Holbein, from the book The History of Protestantism (Vol. III)

[20-ാം പേജിലെ ചിത്ര​ത്തിന്‌ കടപ്പാട്‌]

Background on pages 20-2: From the book The Library of Historic Characters and Famous Events, Vol. VII, 1895