യുവജ​നങ്ങൾ ചോദി​ക്കു​ന്നു . . .

ധൂമര​ഹിത പുകയില ദോഷ​ര​ഹി​ത​മോ?

‘പതിമൂ​ന്നു വയസ്സു​കാ​ര​നായ കോർഡ്‌ മധ്യപ​ശ്ചിമ ഐക്യ​നാ​ടു​ക​ളി​ലേക്കു മാറി​യ​പ്പോൾ, എട്ടാം​ത​ര​ത്തിൽ പഠിക്കുന്ന ആൺകു​ട്ടി​കൾക്കുള്ള ഒന്ന്‌, ഒരുതരം ധൂമര​ഹിത പുകയില അടങ്ങിയ ഡപ്പി, തനിക്കി​ല്ലെന്ന്‌ അവൻ പെട്ടെ​ന്നു​തന്നെ മനസ്സി​ലാ​ക്കി. അവന്റെ പുതിയ സ്‌നേ​ഹി​ത​രിൽ മിക്കവ​രും “പൊടി​യെ​ടു​ക്കു​ന്നവർ” അഥവാ പുകയി​ല​പ്പൊ​ടി ഉപയോ​ഗി​ക്കു​ന്നവർ ആയിരു​ന്നു, അവരു​മാ​യി ചേരാൻ കോർഡ്‌ ആഗ്രഹി​ച്ചു. അങ്ങനെ​യി​രി​ക്കെ, കൂട്ടു​കാ​രിൽ ഒരുവൻ ഒരു പൊതി പുകയി​ല​പ്പൊ​ടി അവനു നൽകി​യ​പ്പോൾ അവനതു സ്വീക​രി​ച്ചു. തഴക്കംവന്ന ഒരുവന്റെ ആക്ഷോ​ഭ്യ​ത​യോ​ടെ അവൻ അൽപ്പം പൊടി​യെ​ടുത്ത്‌ കീഴ്‌ച്ചു​ണ്ടി​നും മോണ​യ്‌ക്കു​മി​ട​യിൽ തിരു​കി​വെച്ചു.’—ലിസ്സൺ മാഗസിൻ.

യുവാ​വാ​യ കോർഡി​ന്റെ കാര്യം പുത്തരി​യൊ​ന്നു​മല്ല. കൗമാ​ര​ദ​ശ​യി​ലുള്ള ആൺകു​ട്ടി​ക​ളു​ടെ വർധി​ച്ചു​വ​രുന്ന ഒരു കൂട്ടം ആദ്യ നുള്ള്‌ ഉപയോ​ഗി​ക്കു​ക​യാ​ണെന്ന്‌ അധര രോഗ​നി​ദാ​ന​ശാ​സ്‌ത്ര പ്രൊ​ഫ​സ​റായ ഡോ. ക്രിസ്റ്റഫർ എ. സ്‌കിയർ പറയുന്നു. ധൂമര​ഹിത പുകയി​ല​യു​ടെ വിൽപ്പന 1980-കളുടെ അവസാനം വർധി​ക്കു​ന്നി​ല്ലാ​യി​രു​ന്നെ​ങ്കി​ലും, “ഈർപ്പ​മുള്ള പുകയി​ല​പ്പൊ​ടി​യു​ടെ ഉപയോ​ഗം വീണ്ടും വർധി​ക്കുന്ന”തായി ഡോ. സ്‌കിയർ പറയുന്നു.a ഉദാഹ​ര​ണ​ത്തിന്‌, ഐക്യ​നാ​ടു​ക​ളിൽ ഹൈസ്‌കൂൾ വിദ്യാർഥി​ക​ളായ ഓരോ 5 ആൺകു​ട്ടി​ക​ളി​ലും ഒരാൾ വീതവും സ്വീഡ​നിൽ ഓരോ 3 ആൺകു​ട്ടി​ക​ളിൽ ഒരാൾ വീതവും, അതായത്‌ ലക്ഷക്കണ​ക്കി​നു ചെറു​പ്പ​ക്കാർ, ഇപ്പോൾ ധൂമര​ഹിത പുകയില ഉപയോ​ഗി​ക്കു​ന്നു​ണ്ടെന്നു ഗവേഷകർ റിപ്പോർട്ടു ചെയ്യുന്നു. എന്തു​കൊ​ണ്ടാണ്‌ ഇതു സംഭവി​ക്കു​ന്നത്‌?

“അതു പുകവ​ലി​ക്കു​ന്ന​തി​നെ​ക്കാൾ സുരക്ഷി​ത​മാണ്‌.” “അതു ഹാനി​ക​ര​മാ​ണെ​ന്നു​ള്ള​തി​നു തെളി​വൊ​ന്നു​മില്ല.” “എന്റെ സ്‌നേ​ഹി​തർ അതുപ​യോ​ഗി​ക്കു​ന്നു. അതവർക്കു കുഴപ്പം വരുത്തു​ന്നില്ല.” “ഇടയ്‌ക്കൊ​ക്കെ ഒരൽപ്പം എടുക്കു​ന്നത്‌ എനിക്കു കുഴപ്പ​മൊ​ന്നും വരുത്തില്ല.” “അതു നിമിത്തം ആരും ഇതുവരെ മരിച്ചി​ട്ടൊ​ന്നു​മില്ല.” ധൂമര​ഹിത പുകയി​ല​യി​ലേക്കു തിരി​യു​ന്ന​തി​ന്റെ കാരണ​മാ​യി യുവജ​നങ്ങൾ മിക്ക​പ്പോ​ഴും നൽകുന്ന ചില കാരണ​ങ്ങ​ളാണ്‌ ഇവയെന്ന്‌ അമേരി​ക്കൻ കാൻസർ സൊ​സൈറ്റി പറയുന്നു.

പൊടി​യെ​ടു​ക്കു​ന്നതു പുകവ​ലി​യെ​ക്കാൾ സുരക്ഷി​ത​മാ​ണെന്നു ചിന്തി​ക്കാൻ യുവാ​ക്കളെ പ്രേരി​പ്പി​ച്ചി​രി​ക്കു​ന്നത്‌ എന്താണ്‌? അതു വാസ്‌ത​വ​ത്തിൽ അങ്ങനെ​ത​ന്നെ​യാ​ണോ?

പരസ്യ​ത്തോട്‌ അനുകൂ​ല​മാ​യി പ്രതി​ക​രി​ക്കൽ

ധൂമര​ഹിത പുകയില ച്യൂയിം​ഗം​പോ​ലെ ഏറെക്കു​റെ ഹാനി​ക​ര​മ​ല്ലാ​ത്ത​താ​ണെ​ന്നും ശരിയാ​യ​തരം ഷൂസു​കൾപോ​ലെ ഒഴിച്ചു​കൂ​ടാ​നാ​വാ​ത്ത​താ​ണെ​ന്നും സൂചി​പ്പി​ക്കുന്ന പരസ്യ​ങ്ങൾകൊ​ണ്ടു വർഷങ്ങ​ളാ​യി ശക്തമായ പുകയില വ്യവസാ​യം യുവാ​ക്കളെ ആക്രമി​ച്ചി​രി​ക്കു​ന്നു. “ഒരു പുക​യെ​ടു​ക്കു​ന്ന​തി​നു​പ​കരം ഒരു നുള്ളെ​ടു​ക്കുക,” “സിഗരറ്റു കത്തിക്കാ​തെ​തന്നെ എനിക്കു പുകയി​ല​യു​ടെ യഥാർഥ അനുഭൂ​തി ലഭിക്കു​ന്നു,” “ഒരു നുള്ളേ എടു​ക്കേ​ണ്ട​തു​ള്ളൂ” എന്നിങ്ങ​നെ​യുള്ള ആകർഷ​ക​മായ പരസ്യ​വാ​ച​കങ്ങൾ അതു ശ്രേഷ്‌ഠ​മാ​ണെന്ന ധ്വനി നൽകുന്നു.

ഐക്യ​നാ​ടു​ക​ളിൽ ടിവി-യിലൂ​ടെ​യും റേഡി​യോ​യി​ലൂ​ടെ​യു​മുള്ള അത്തരം പരസ്യങ്ങൾ വിലക്കി​യ​തി​നു​ശേഷം, പുകയില വ്യവസാ​യം അതിന്റെ സന്ദേശം മാസികാ പരസ്യ​ങ്ങ​ളി​ലൂ​ടെ തുടർന്നും നൽകി​ക്കൊ​ണ്ടി​രു​ന്നു. വേട്ടയാ​ടി​യും പാറ​ക്കെ​ട്ടു​കൾ കയറി​യും നല്ല ഒഴുക്കുള്ള വെള്ളത്തിൽ ചങ്ങാടം തുഴഞ്ഞും രസിക്കുന്ന അരോ​ഗ​ദൃ​ഢ​ഗാ​ത്ര​രു​ടെ—ഒരു പുകയില ഡപ്പി അവരുടെ പിൻപോ​ക്ക​റ്റിൽ തിരു​കി​വെ​ച്ചി​രു​ന്നു—തിളങ്ങുന്ന ചിത്രങ്ങൾ അറിയിച്ച ഉച്ചത്തി​ലു​ള്ള​തും വ്യക്തവു​മായ സന്ദേശം ഇതായി​രു​ന്നു: “ധൂമര​ഹിത പുകയില ഹൃദ്യ​മാണ്‌, പ്രകൃ​തി​ദ​ത്ത​മാണ്‌, പുരു​ഷ​ത്വ​ത്തി​ലേ​ക്കുള്ള കവാട​മാണ്‌!”

“ധൂമര​ഹിത പുകയില ഉത്‌പ​ന്നങ്ങൾ സുരക്ഷി​ത​വും സാമൂ​ഹി​ക​മാ​യി സ്വീകാ​ര്യ​വു”മാണെന്നു ധാരാളം യുവജ​നങ്ങൾ ഇപ്പോൾ വിശ്വ​സി​ക്കു​ന്ന​താ​യി യുവജ​ന​ങ്ങ​ളു​ടെ ഇടയിലെ പുകയില ഉപയോ​ഗം തടയൽ (ഇംഗ്ലീഷ്‌) എന്ന ശീർഷ​ക​ത്തി​ലുള്ള, യു.എസ്‌. സർജൻ ജനറലി​ന്റെ, 1994-ലെ റിപ്പോർട്ടു പറയുന്നു. “ധൂമര​ഹിത പുകയില പതിവാ​യി ഉപയോ​ഗി​ക്കു​ന്ന​തിൽ അപകട​മി​ല്ലെന്ന്‌ അല്ലെങ്കിൽ നിസ്സാ​ര​മായ അപകടമേ ഉള്ളൂ​വെന്ന്‌ അതുപ​യോ​ഗി​ക്കുന്ന ജൂനിയർ ഹൈസ്‌കൂൾ വിദ്യാർഥി​ക​ളിൽ ഏതാണ്ട്‌ 60 ശതമാ​ന​വും സീനിയർ ഹൈസ്‌കൂൾ വിദ്യാർഥി​ക​ളിൽ 40 ശതമാ​ന​വും വിശ്വ​സിച്ച”തായി ഹൈസ്‌കൂൾ വിദ്യാർഥി​ക​ളു​ടെ ഇടയിൽ നടത്തിയ ഒരു പഠനം പ്രകട​മാ​ക്കി. ധൂമര​ഹിത പുകയില ഒരുപക്ഷേ ഹാനി​ക​ര​മാ​യി​രു​ന്നേ​ക്കാ​മെന്നു തിരി​ച്ച​റിഞ്ഞ ഹൈസ്‌കൂൾ വിദ്യാർഥി​ക​ളായ പ്രയോ​ക്താ​ക്കൾ പോലും “അപകടം വലുതാ​യി​രി​ക്കു​മെന്നു തിരി​ച്ച​റി​യു​ന്നില്ല.” കാര്യം സാധി​ക്കു​ന്ന​തിൽ പരസ്യങ്ങൾ വിജയി​ക്കു​ക​യാണ്‌. എന്നാൽ പരസ്യങ്ങൾ സത്യമാ​ണോ?

“അനുഭ​വ​ജ്ഞാ​ന​മി​ല്ലാത്ത ഏവനും ഏതു വാക്കും വിശ്വ​സി​ക്കു​ന്നു, എന്നാൽ സൂക്ഷ്‌മ​ബു​ദ്ധി​യു​ള്ള​വ​നോ തന്റെ കാലടി​ക​ളെ​ക്കു​റി​ച്ചു പരിചി​ന്തി​ക്കു​ന്നു” എന്ന്‌ ഒരു ബൈബിൾ സദൃശ​വാ​ക്യം പറയുന്നു. അല്ലെങ്കിൽ മറ്റൊരു സദൃശ​വാ​ക്യം പറയു​ന്ന​തു​പോ​ലെ, “സൂക്ഷ്‌മ​ബു​ദ്ധി​യുള്ള ഏവനും പരിജ്ഞാ​ന​ത്തോ​ടെ പ്രവർത്തി​ക്കും.” (സദൃശ​വാ​ക്യ​ങ്ങൾ 13:16; 14:15, NW) അങ്ങനെ​യെ​ങ്കിൽ, ധൂമര​ഹിത പുകയി​ല​യെ​ക്കു​റി​ച്ചുള്ള വസ്‌തു​തകൾ എന്തു പ്രകട​മാ​ക്കു​ന്നു?

ദുർവാർത്ത

ധൂമര​ഹിത പുകയി​ല​യു​ടെ ഉപയോ​ഗം നിങ്ങളു​ടെ പ്രതി​ച്ഛായ മെച്ച​പ്പെ​ടു​ത്തു​മെ​ന്നും അതു ശരീര​ത്തി​നു സുരക്ഷി​ത​മാ​ണെ​ന്നും പരസ്യങ്ങൾ സൂചി​പ്പി​ക്കു​മ്പോൾത്തന്നെ, വസ്‌തു​തകൾ മറിച്ചാ​ണു കാണി​ക്കു​ന്നത്‌. ഒരു സംഗതി, ധൂമര​ഹിത പുകയി​ല​യു​ടെ ഉപയോ​ഗം നിങ്ങളു​ടെ പ്രതി​ച്ഛാ​യയെ അൽപ്പം​പോ​ലും മെച്ച​പ്പെ​ടു​ത്തു​ക​യില്ല. നിങ്ങളതു വിശ്വ സിക്കു​ന്നി​ല്ലെ​ങ്കിൽ, നിങ്ങളു​ടെ നാക്ക്‌ കവിളിൽ കുത്തി​യിട്ട്‌ കണ്ണാടി​യി​ലൊ​ന്നു നോക്കൂ. “മെച്ചമാ​ണോ”? തീർച്ച​യാ​യു​മല്ല. അതു നിങ്ങളു​ടെ ബാഹ്യാ​കാ​രത്തെ ബാധി​ക്കു​ന്നതു മാത്ര​മാണ്‌! അതു നിങ്ങളു​ടെ ഉള്ളിൽ വരുത്തി​വെ​ക്കു​ന്നത്‌ അതിലും മോശ​മാണ്‌.

ഉദാഹ​ര​ണ​ത്തിന്‌, പതിവാ​യി ചവയ്‌ക്കു​ക​യോ മോണ​യിൽ വെക്കു​ക​യോ ചെയ്യു​ന്ന​വ​രിൽ ചുണ്ടുകൾ വിണ്ടു​കീ​റു​ക​യും പല്ലുകൾ കറപു​ര​ളു​ക​യും വായിൽ ദുർഗ​ന്ധ​മു​ണ്ടാ​കു​ക​യും മോണകൾ വിങ്ങി​വീർക്കു​ക​യും ചെയ്‌തേ​ക്കാം—ആനന്ദി​ക്കാ​നൊ​ന്നു​മില്ല. മാത്രമല്ല, സ്വാദ​റി​യാ​നും മണമറി​യാ​നു​മുള്ള അവരുടെ കഴിവു കുറഞ്ഞു​വ​രു​ന്ന​തൊ​ടൊ​പ്പം ഹൃദയ​സ്‌പ​ന്ദ​ന​വും രക്തസമ്മർദ​വും കൂടുന്നു—നിശ്ചയ​മാ​യും ദുർവാർത്ത​തന്നെ. എന്നാൽ ധൂമര​ഹിത പുകയില കവിൾ, മോണ, തൊണ്ട എന്നിവി​ട​ങ്ങ​ളിൽ കാൻസർ ഉണ്ടാക്കു​ന്നു​വെന്നു യൂറോപ്പ്‌, ഇന്ത്യ, ഐക്യ​നാ​ടു​കൾ തുടങ്ങിയ സ്ഥലങ്ങളിൽ നടത്തിയ പഠനങ്ങൾ പ്രകട​മാ​ക്കു​ന്നു എന്നതാണു യഥാർഥ ദുർവാർത്ത. ഈ കണ്ടെത്ത​ലു​കൾ വിദഗ്‌ധരെ അമ്പരപ്പി​ക്കു​ന്നില്ല. ഒരു പഠനം ഇങ്ങനെ അഭി​പ്രാ​യ​പ്പെ​ടു​ന്നു: “ശരീര​ത്തി​ലേക്ക്‌ ഉൾക്കൊ​ള്ളുന്ന ഉത്‌പ​ന്ന​ങ്ങ​ളിൽ, കാൻസ​റി​നു കാരണ​മായ ഘടകങ്ങൾ ഏറ്റവും ഉയർന്ന അളവിൽ അടങ്ങി​യി​രി​ക്കു​ന്നത്‌ പുകയി​ല​പ്പൊ​ടി​യി​ലാണ്‌.” “പുകയി​ല​പ്പൊ​ടി ഉപയോ​ഗി​ക്കാ​ത്ത​വരെ അപേക്ഷിച്ച്‌, അതു ദീർഘ​കാ​ല​മാ​യി ഉപയോ​ഗി​ക്കു​ന്ന​വ​രിൽ അധരാർബു​ധം വരാനുള്ള അപകട​സാ​ധ്യത 50% കൂടു​ത​ലാണ്‌” എന്നതിൽ അതിശ​യി​ക്കാ​നില്ല.

അധരാർബു​ദം ഉണ്ടാകു​മ്പോൾ, അനന്തര​ഫ​ലങ്ങൾ മാരക​മാണ്‌. പ്രയോ​ക്താ​വി​ന്റെ ആരോ​ഗ്യം നശിക്കു​ന്നു​വെന്നു മാത്രമല്ല, അയാളു​ടെ ആയുസ്സ്‌ കുറയു​ക​യും ചെയ്യുന്നു. അമേരി​ക്കൻ കാൻസർ സൊ​സൈ​റ്റി​യു​ടെ ഒരു പ്രസി​ദ്ധീ​ക​രണം ദുഃഖ​ക​ര​മായ ഈ കഥ വിവരി​ക്കു​ന്നു: ‘13-ാമത്തെ വയസ്സി​ലാ​ണു ഷോൺ ധൂമര​ഹിത പുകയില ഉപയോ​ഗി​ക്കാൻ തുടങ്ങി​യത്‌. അതു പുകവ​ലി​യെ​ക്കാൾ സുരക്ഷി​ത​മാ​യി​രി​ക്കു​മെന്ന്‌ അവൻ വിചാ​രി​ച്ചു. ദിവസ​വും ഒരു ഡപ്പിയോ അതില​ധി​ക​മോ വീതം അഞ്ചുവർഷ​ക്കാ​ലം പുകയി​ല​പ്പൊ​ടി അവൻ മോണ​യിൽ വെച്ചു, അങ്ങനെ നാവിൽ ഒരു വ്രണമു​ണ്ടാ​യി. അത്‌ അധരാർബു​ദ​മാ​യി​രു​ന്നു. ഡോക്ടർമാർ നാക്കിന്റെ ഒരു ഭാഗം നീക്കം ചെയ്‌തു, എന്നാൽ കാൻസർ അവന്റെ കഴുത്തി​ലേക്കു വ്യാപി​ച്ചു. രൂപഭം​ഗി​ക്കു കൂടുതൽ കോട്ടം​വ​രു​ത്തി​ക്കൊ​ണ്ടു കൂടുതൽ ശസ്‌ത്ര​ക്രി​യകൾ നടത്തി​യെ​ങ്കി​ലും ഫലമു​ണ്ടാ​യില്ല—19-ാമത്തെ വയസ്സിൽ അവൻ മരിച്ചു. മരിക്കു​ന്ന​തി​നു മുമ്പ്‌ ഷോൺ ഒരു തുണ്ടു കടലാ​സിൽ ഈ ലളിത സന്ദേശം എഴുതി​വെച്ചു: “പുകയി​ല​പ്പൊ​ടി എടുക്ക​രുത്‌.”’

കുരു​ക്കി​ലാ​യി!

ഷോണി​നെ​ക്കു​റി​ച്ചുള്ള ഞെട്ടി​ക്കുന്ന വിവരണം വായി​ച്ച​ശേഷം നേരത്തെ പരാമർശിച്ച യുവാ​വായ കോർഡി​നു കാര്യം ബോധ്യ​പ്പെട്ടു. തന്റെ ശീലം ഉപേക്ഷി​ക്കാൻ അവൻ മനസ്സിൽ ഉറച്ചു. എന്നിരു​ന്നാ​ലും, ഉപേക്ഷി​ക്കാൻ ശ്രമി​ക്കു​ന്നതു ദുഷ്‌ക​ര​മാ​യി​രു​ന്നു. “ഞാനത്‌ ഉപയോ​ഗി​ച്ചേ പറ്റൂ എന്നതു​പോ​ലെ എനിക്കു തോന്നു​ന്നു,” ലിസ്സൻ എന്ന മാഗസി​നോ​ടു കോർഡ്‌ പറഞ്ഞു. “ആ ശീലം ഞാൻ ഔദ്യോ​ഗി​ക​മാ​യി നിർത്തി​യിട്ട്‌ ഇപ്പോൾ മാസങ്ങൾ കഴിഞ്ഞി​ട്ടും, പൊതി​ക്കു വേണ്ടി ഞാൻ പോക്ക​റ്റു​കൾ തപ്പി​നോ​ക്കി​പ്പോ​കു​ന്നു. ഞാൻ ധാരാളം ച്യൂയിം​ഗം ചവയ്‌ക്കാ​റുണ്ട്‌. അതു ഫലപ്ര​ദ​മാണ്‌, എന്നാൽ വാഞ്‌ഛയെ അതു ശമിപ്പി​ക്കു​ന്നില്ല.”

സിഎ-ക്ലിനി​ഷ്യൻമാർക്കുള്ള ഒരു കാൻസർ പത്രിക (ഇംഗ്ലീഷ്‌) ഇങ്ങനെ തറപ്പി​ച്ചു​പ​റ​യു​ന്നു: “ധൂമര​ഹിത പുകയി​ല​യു​ടെ ഉപയോ​ഗം നിർത്താൻ ശ്രമിച്ച കൗമാ​ര​പ്രാ​യ​ക്കാ​രെ​ക്കു​റി​ച്ചു നടത്തിയ പഠനങ്ങ​ള​നു​സ​രിച്ച്‌, താഴ്‌ന്ന ഒരു ശതമാനം പേർക്കേ അതിനു കഴിഞ്ഞു​ള്ളൂ.” എന്നിരി​ക്കി​ലും, ധൂമര​ഹിത പുകയി​ല​യു​ടെ ഉപയോ​ഗം നിർത്തു​ന്നത്‌ ഇത്ര ദുഷ്‌ക​ര​മാ​ക്കി​ത്തീർക്കു​ന്നത്‌ എന്താണ്‌? അത്‌, പുകവലി നിർത്തു​ന്നത്‌ വളരെ ബുദ്ധി​മു​ട്ടു​ള്ള​താ​ക്കി​ത്തീർക്കുന്ന അതേ മയക്കു​മ​രു​ന്നു തന്നെയാണ്‌: നിക്കോ​ട്ടിൻ.

സിഗര​റ്റു​ക​ളി​ലും അതു​പോ​ലെ​തന്നെ ധൂമര​ഹിത പുകയി​ല​യി​ലും കാണുന്ന നിക്കോ​ട്ടിൻ എന്ന മയക്കു​മ​രുന്ന്‌, പ്രയോ​ക്താ​വിന്‌ ഒരു ഉന്മാദം നൽകുന്ന ശക്തമായ വിഷമാണ്‌. ഓരോ 30 മിനി​റ്റോ മറ്റോ കൂടു​മ്പോ​ഴും ആ ഉന്മാദം അവസാ​നി​ക്കാ​തെ നിർത്താൻ പ്രയോ​ക്താവ്‌ വീണ്ടും അത്‌ ഉപയോ​ഗി​ക്കേ​ണ്ട​തുണ്ട്‌. നിക്കോ​ട്ടിൻ നിങ്ങളെ കുരു​ക്കി​ലാ​ക്കു​ന്നു. ചിലർക്ക്‌ ഇതി​നോ​ടുള്ള ആസക്തി വളരെ​യ​ധി​ക​മാണ്‌, അതു​കൊണ്ട്‌ അവർ രാവും പകലും—ഉറങ്ങു​മ്പോൾ പോലും—ഒരു നുള്ളു പുകയി​ല​പ്പൊ​ടി വായിൽ വെക്കുന്നു.

ഒരുപക്ഷേ ചെറു​പ്പ​ക്കാർ കരുതു​ന്ന​തി​നു വിരു​ദ്ധ​മാ​യി, പുകയി​ല​പ്പൊ​ടി വായിൽ വെക്കു​ന്നതു നിക്കോ​ട്ടിൻ അളവു കുറയ്‌ക്കു​ന്നില്ല. ദിവസം ഒരു ഡപ്പി ധൂമര​ഹിത പുകയില 60 സിഗര​റ്റു​ക​ളു​ടെ അത്രയും നിക്കോ​ട്ടിൻ പുറന്ത​ള്ളു​ന്നു! ‘ധൂമര​ഹിത പുകയില ഉപയോ​ഗി​ക്കു​ന്നവർ, ചുരു​ങ്ങി​യ​പക്ഷം പുകവ​ലി​ക്കാർ വലി​ച്ചെ​ടു​ക്കുന്ന അത്രയും​തന്നെ—ഒരുപക്ഷേ ആ അളവിന്റെ ഇരട്ടി​പോ​ലും—നിക്കോ​ട്ടിൻ വലി​ച്ചെ​ടു​ക്കു​ന്നു’ എന്നു യുവജ​ന​ങ്ങൾക്കി​ട​യിൽ പുകയില ഉപയോ​ഗം തടയൽ പറയുന്നു. (ചെരി​ച്ചെ​ഴു​ത്തു ഞങ്ങളു​ടേത്‌.) നിക്കോ​ട്ടി​നു പുറമേ, സിഗര​റ്റു​ക​ളിൽ അടങ്ങി​യി​രി​ക്കു​ന്ന​തി​നെ​ക്കാൾ പത്തിരട്ടി നൈ​ട്രോ​സ​മൈ​നു​കൾ (കാൻസ​റി​നി​ട​യാ​ക്കുന്ന ശക്തിയുള്ള പദാർഥങ്ങൾ) ധൂമര​ഹിത പുകയി​ല​യിൽ അടങ്ങി​യി​രി​ക്കു​ന്നു.

ജ്ഞാനി​യാ​യി​രി​ക്കുക

“ഇവ ഹാനി​ക​ര​മായ ഉത്‌പ​ന്ന​ങ്ങ​ളാ​ണെ​ന്ന​തി​നു തെല്ലും സംശയ​മില്ല,” ശിരോ-കണ്‌ഠ ശസ്‌ത്ര​ക്രി​യാ​വി​ദ​ഗ്‌ധ​നായ ഡോ. റോയ്‌ സെഷൻസ്‌ പറഞ്ഞു. “പുകവ​ലി​യെ​ക്കാൾ നിർത്താൻ ദുഷ്‌ക​ര​മാ​ണെന്നു മിക്കയാ​ളു​കൾക്കും തോന്നുന്ന ഒരു അവലം​ബി​താ​വസ്ഥ അവ ഉളവാ​ക്കു​ന്നു.” ദന്ത-കാൻസർ സ്‌പെ​ഷ്യ​ലി​സ്റ്റായ ഡോ. ഓസ്‌കാർ ഗെരാ ഇങ്ങനെ നിഗമനം ചെയ്‌തു: “ഈ സാധനം ശരീര​ത്തി​നു പിടി​ക്കില്ല.” ലോക​മെ​മ്പാ​ടു​മുള്ള വിജ്ഞർ അതി​നോ​ടു യോജി​ക്കു​ന്നു: പൊടി വലിക്കു​ന്നത്‌ കുഴപ്പ​മേ​റിയ ഒന്നാണ്‌. അതിനു നിങ്ങളെ ഒടുക്കാൻ കഴിയും!

പുകയില ഉത്‌പ​ന്ന​ങ്ങ​ളിൽനി​ന്നു വിട്ടു​നിൽക്കു​ന്ന​തി​നു ക്രിസ്‌തീയ യുവാ​ക്കളെ സംബന്ധി​ച്ചി​ട​ത്തോ​ളം ആരോ​ഗ്യാ​പ​ക​ട​ങ്ങ​ളെ​ക്കാൾ കൂടുതൽ നിർബ​ന്ധ​ക​ര​മായ ഒരു കാരണ​മുണ്ട്‌—യഹോ​വ​യാം ദൈവത്തെ പ്രസാ​ദി​പ്പി​ക്കുക എന്ന അവരുടെ ആഗ്രഹം. അവന്റെ വചനം ഇങ്ങനെ കൽപ്പി​ക്കു​ന്നു: “നാം ജഡത്തി​ലെ​യും ആത്മാവി​ലെ​യും സകല കന്മഷവും നീക്കി നമ്മെത്തന്നേ വെടി​പ്പാ​ക്കി ദൈവ​ഭ​യ​ത്തിൽ വിശു​ദ്ധി​യെ തികെ​ച്ചു​കൊൾക.”—2 കൊരി​ന്ത്യർ 7:1.

വ്യോ​മ​യാ​നം, ബഹിരാ​കാ​ശം, പാരി​സ്ഥി​തിക മരുന്ന്‌ (ഇംഗ്ലീഷ്‌) എന്ന മാഗസിൻ കാര്യ​ങ്ങളെ നല്ലവിധം സംഗ്ര​ഹി​ച്ചു​കൊണ്ട്‌ ഇങ്ങനെ പറയുന്നു: “രണ്ടുതരം ജീവികൾ—ഒരു കൊച്ചു പച്ചപ്പു​ഴു​വും മനുഷ്യ​നും—മാത്രം തിന്നുന്ന അറപ്പു​ള​വാ​ക്കുന്ന ഒരു ചെടി​യാ​ണു പുകയില. ആ കൊച്ചു പച്ചപ്പു​ഴു​വി​നു മനുഷ്യ​നുള്ള ജ്ഞാനം ഇല്ലല്ലോ.”

എന്നാൽ നിങ്ങൾക്കുണ്ട്‌. അതു​കൊണ്ട്‌ ജ്ഞാനി​യാ​യി​രി​ക്കുക—പുകയില ഉപയോ​ഗി​ച്ചു​തു​ട​ങ്ങാ​തി​രി​ക്കുക.

[അടിക്കു​റിപ്പ്‌]

[26-ാം പേജിലെ ചിത്രങ്ങൾ]

‘മരിക്കു​ന്ന​തി​നു മുമ്പ്‌ ഷോൺ ഒരു ലളിത സന്ദേശം എഴുതി​വെച്ചു: “പുകയി​ല​പ്പൊ​ടി എടുക്ക​രുത്‌”’

[27-ാം പേജിലെ ആകർഷ​ക​വാ​ക്യം]

പുകയില ചവയ്‌ക്കു​ന്ന​തി​നു യുവാ​ക്ക​ളു​ടെ ഇടയിൽ പ്രിയം കൂടി​യി​രി​ക്കു​ന്നു. നിങ്ങൾ അതു പരീക്ഷി​ച്ചു​നോ​ക്ക​ണ​മോ?