വിഷാദം: എല്ലാം ഒരുവന്റെ തലയിലോ?
ഇരുനൂറു വർഷം പഴക്കമുള്ള തന്റെ വീടു പുനഃസ്ഥിതീകരിക്കാൻ തുടങ്ങിയ ഉടനെ ആ മനുഷ്യൻ വിഷാദമഗ്നനായി. അയാൾക്ക് ഉറക്കം പ്രയാസമായി. തുടർച്ചയായ മാനസികാദ്ധ്വാനം അസാധാരണമാം വിധം പ്രയാസമാണെന്ന് അയാൾ കണ്ടെത്തി. ആ വീട്ടിൽ ഭൂതബാധയുണ്ടോയെന്ന് അയാളുടെ കുടുംബം ഭയപ്പെട്ടു! അയാളുടെ ഏറ്റവും ഗുരുതരമായ ലക്ഷണങ്ങൾ—വയറ്റുവേദന ഉൾപ്പെടെയുള്ളവ—അകത്തെ മരപ്പണിയിൽനിന്നു പഴയ പെയിൻറ് നീക്കം ചെയ്യുന്നതിനു ചെലവഴിച്ച സമയങ്ങളെ തുടർന്നാണുണ്ടായതെന്ന് അയാൾ കണ്ടെത്തി. അയാൾ ചുരണ്ടിക്കൊണ്ടിരുന്ന പഴയ പെയിൻറിന്റെ അടുക്കുകളിലെ ഈയത്തിൽനിന്നുള്ള വിഷമാണ് അയാളുടെ വിഷാദത്തിനു കാരണമെന്നു ഒരു ഡോക്ടർ കണ്ടെത്തി.
അതെ, ചില സമയങ്ങളിൽ വിഷമയമായ വസ്തുക്കൾ പോലും വിഷാദത്തിനു കാരണമാണ്. യഥാർത്ഥത്തിൽ നിരവധി ശാരീരിക കാരണങ്ങൾ വിഷാദത്തിനു വഴിമരുന്നിട്ടേക്കാമെന്നു മനസ്സിലാക്കുമ്പോൾ നിങ്ങൾ അതിശയിച്ചുപോയേക്കാം.
പല വർഷങ്ങൾക്കു മുൻപ് വിഷാദമുൾപ്പെടെയുള്ള മാനസികരോഗപ്രശ്നങ്ങൾസഹിതം ഒരു സിറ്റി ആശുപത്രിയിൽ പ്രവേശിപ്പിക്കപ്പെട്ട 100 പേരെ ഗവേഷകൻമാർ സസൂക്ത്മം പരിശോധിച്ചു. ഈ കേസുകളിൽ 46 എണ്ണത്തിലും വൈകാരിക ലക്ഷണങ്ങൾ ശാരീരിക രോഗങ്ങളോടു നേരിട്ടു ബന്ധപ്പെട്ടിരുന്നതായി കണ്ടെത്തപ്പെട്ടു. അമേരിക്കൻ ജേണൽ ഓഫ് സൈക്യാട്രിയിലെ ഒരു റിപ്പോർട്ടനുസരിച്ച് ഈ രോഗങ്ങൾക്കു ചികിൽസിച്ചപ്പോൾ 28 പേർക്ക് “തങ്ങളുടെ മാനസികരോഗലക്ഷണങ്ങൾ നാടകീയമായും പെട്ടെന്നും കുറഞ്ഞതായി തെളിഞ്ഞു, 18 പേർക്ക് “കാര്യമായ മെച്ചമുണ്ടായി.”
വിഷാദരോഗത്തിൽ ശാരീരികരോഗത്തിന്റെ പങ്ക് ഏതായാലും സങ്കീർണ്ണമാണ്. ഒരു വിഷാദരോഗിക്ക് അയാളുടെ വിഷാദത്തിനു കാരണമല്ലാത്ത ഒരു ശാരീരികരോഗവും ഉണ്ടായിരിക്കാമെന്നുള്ളതാണ് അനേകം ഡോക്ടർമാരുടെ അനുഭവം, ആ രോഗം അയാളുടെ മനസ്സിൽ മുഖ്യസംഗതിയായിത്തീരുന്നു. ഏതായാലും അന്തർഭവിച്ചിരിക്കുന്ന വിഷാദരോഗത്തിൽ ശ്രദ്ധിക്കുകയും അതിനു ചികിൽസിക്കുകയും വേണം.
ചില ശാരീരികരോഗങ്ങൾക്ക് വൈകാരിക ക്രമക്കേടുകൾക്കു കാരണമാകാനും അവയെ പെരുപ്പിക്കാനും കഴിയുമെങ്കിലും നേരത്തെയുള്ള ഒരു രോഗത്തോടുള്ള ഒരു പ്രതികരണമെന്നനിലയിൽ മാനസികരോഗലക്ഷണങ്ങളും വികസിച്ചുവരാം. ഉദാഹരണത്തിന്, വിശേഷിച്ച് ഹൃദയത്തിന്റെ മേജർ ശസ്ത്രക്രിയക്കുശേഷം സുഖംപ്രാപിച്ചുകൊണ്ടിരിക്കുന്ന രോഗികൾക്ക് ഒട്ടുമിക്കപ്പോഴും വിഷാദരോഗം പിടിപെടുന്നു. അവർ സുഖം പ്രാപിക്കുമ്പോൾ സാധാരണയായി വിഷാദം മാറുന്നു. ഒരു ഗുരുതരമായ രോഗത്തിനു ശരീരത്തിൻമേലുള്ള സമ്മർദ്ദവും ക്രമക്കേടിനിടയാക്കിയേക്കാം. അതിനു പുറമേ, ചില ആഹാരപദാർത്ഥങ്ങളോടോ മറ്റു വസ്തുക്കളോടോ ഉള്ള അലർജിയും ചില ആളുകളിൽ കഠിനമായ വിഷാദം വരുത്തിക്കൂട്ടിയേക്കാം.
ഒരുവന് ചിലതരം വിഷാദരോഗം പിടിപെടുന്നുവോയെന്നതിൽ പാരമ്പര്യവും ഒരു ഘടകമായിരിക്കാം. ഈ വർഷാരംഭത്തിൽ ചിലയാളുകളെ മാനിക്ക് ഡിപ്രഷന് ചായ്വുള്ളവരാക്കുമെന്നു വിശ്വസിക്കപ്പെടുന്ന ഒരു ജനിതക വൈകല്യത്തിന്റെ കണ്ടുപിടുത്തം ഗവേഷകൻമാർ പ്രഖ്യാപിച്ചു.
കൂടാതെ, നവമാതാക്കളുടെ 10 മുതൽ 20 വരെ ശതമാനത്തിനു ചികിൽസാപരമായ പൂർണ്ണവികസിത വിഷാദം അനുഭവപ്പെടുന്നുവെന്ന് ചില വൈദ്യശാസ്ത്രവിദഗ്ദ്ധർ പറയുന്നു. എന്നിരുന്നാലും പ്രസവത്തോടു ബന്ധപ്പെട്ട ഹോർമോൺ മാറ്റങ്ങളാണോ അതോ മാതൃത്വത്തിന്റെ വൈകാരിക സമ്മർദ്ദങ്ങളാണോ ക്രമക്കേട് വരുത്തിക്കൂട്ടുന്നതെന്നതിൽ ഗവേഷകർ യോജിക്കുന്നില്ല. ആർത്തവപൂർവലക്ഷണങ്ങളും ഗർഭനിരോധനഗുളികകളുടെ ഉപയോഗവും ചില സ്ത്രീകളിൽ വിഷാദരോഗം വരുത്തിക്കൂട്ടുന്നുവെന്നും അടുത്ത കാലത്തെ കണ്ടുപിടുത്തങ്ങൾ സൂചിപ്പിക്കുന്നു.
കാലികക്രമരാഹിത്യബാധ എന്നു പരാമർശിക്കപ്പെടുന്ന കാലികമായ ഭാവമാറ്റചക്രങ്ങൾ ചിലയാളുകൾക്കുള്ളതായും ആധുനിക ഗവേഷണം വെളിപ്പെടുത്തിയിട്ടുണ്ട്. അങ്ങനെയുള്ളവർ ശരൽക്കാലത്തും ശീതകാലത്തും വളരെ വിഷാദമഗ്നരായിത്തീരുന്നു. അവർ മന്ദഗതിയിലാവുകയും സാധാരണയായി കൂടുതലുറങ്ങുകയും സുഹൃത്തുക്കളിൽനിന്നും കുടുംബത്തിൽനിന്നും അകന്നുമാറുകയും വിശപ്പിലും ഭക്ത്യ ഇഷ്ടത്തിലും മാറ്റങ്ങൾക്കു വിധേയരായിത്തീരുകയും ചെയ്യുന്നു. എന്നാൽ വസന്തവും വേനലും വരട്ടെ, അവർ ആവേശഭരിതരും പ്രവർത്തനനിരതരും ഊർജ്ജസ്വലരും ആയിത്തീരുന്നു. സാധാരണയായി അവർ നന്നായി പെരുമാറുന്നു. കൃത്രിമ വെളിച്ചത്തിന്റെ നിയന്ത്രിത ഉപയോഗത്താൽ ചിലരെ വിജയകരമായി ചികിൽസിച്ചിട്ടുണ്ട്.
അതുകൊണ്ട് വിഷാദം എല്ലായ്പ്പോഴും ‘തലയിലല്ല.’ തന്നിമിത്തം ഒരു വിഷാദഭാവം തങ്ങിനിൽക്കുന്നുവെങ്കിൽ ഒരു പൂർണ്ണ വൈദ്യപരിശോധന ജീവൽപ്രധാനമാണ്. എന്നാൽ ശാരീരികകാരണം കണ്ടെത്താൻ കഴിയുന്നില്ലെങ്കിലോ? (g87 10/22)
[14-ാം പേജിലെ ചതുരം]
വിഷാദരോഗത്തിന്റെ ചില ശാരീരിക കാരണങ്ങൾ
മെഡിക്കൽഗവേഷണം ചിലയാളുകളിലെ വിഷാദത്തിന്റെ വളർച്ചയോട് ചുവടെ ചേർക്കുന്നവയെ ബന്ധിപ്പിച്ചിരിക്കുന്നു:
വിഷലോഹങ്ങളും രാസവസ്തുക്കളും: ഈയം, രസം, അലൂമിനിയം, കാർബൺമോണൊക്സൈഡ്, ചില കീടനാശിനികൾ
പോഷകക്കുറവുകൾ: ചില വിറ്റമിനുകളും ചില അവശ്യലവണങ്ങളും
സാംക്രമികരോഗങ്ങൾ: ക്ഷയം, മോണോന്യൂക്ലിയോസിസ്, വൈറൽ ന്യൂമോണിയാ, കരൾവീക്കം, ഇൻഫ്ളുവൻസാ
അന്തഃസ്രവവ്യൂഹരോഗങ്ങൾ: തൈറോയിഡ് രോഗം, കുഷിംഗ്സ്രോഗം, ഗ്ലൂക്കോസ് കുറവ്, പ്രമേഹം
കേന്ദ്രനാഡീവ്യൂഹ രോഗങ്ങൾ: മൾട്ടിപ്പിൾ സ്ക്ലെറോസിസ്, പാർക്കിൻസൺസ് ഡിസീസ്
“വിനോദ”മയക്കുമരുന്നുകൾ: പിസിപി, കഞ്ചാവ്, ആംഫിറ്റാമൈൻസ്,കോക്കേയിൻ, ഹെറോയിൻ, മെതഡോൺ
കുറിച്ചുകൊടുക്കുന്ന മരുന്നുകൾ: ബാർബിറ്റുറ്റേറ്സ്, ആൻറി കൺവൽഷൻറ്സ്, കോർട്ടിക്കോസ്റ്റിറോയിഡ്സ്, ഹോർമോൺസ്, ഉന്നതരക്തസമ്മർദ്ദത്തിനു ചികിൽസിക്കുന്നതിനുള്ള ചില മരുന്നുകൾ, സന്ധിവാതം, ഹൃദയസംവഹനപ്രശ്നങ്ങൾ, ചില മാനസിക ക്രമക്കേടുകൾ,
(തീർച്ചയായും അത്തരം എല്ലാ മരുന്നുകളും വിഷാദരോഗം വരുത്തുകയില്ല. അപകടമുള്ളപ്പോൾപോലും ശരിയായ വൈദ്യമേൽനോട്ടത്തിൽ മരുന്നുപയോഗിക്കുന്നവരുടെ ഒരു ചെറിയ ശതമാനം മാത്രമേ സാധാരണയായി ഉൾപ്പെട്ടിരിക്കുന്നുള്ളു.)