ബീവറു​കൾ—അണക്കെട്ടു നിർമി​ക്കുന്ന എഞ്ചിനീ​യർമാർ

അണക്കെട്ടു നിർമാ​ണ​ത്തിൽ വിദഗ്‌ധ​രാ​ണു ബീവറു​കൾ. അവ ഉണ്ടാക്കിയ 850 മീറ്റർ നീളവും 5.3 മീറ്റർ ഉയരവും ഉള്ള അണക്കെ​ട്ടു​കൾവരെ കണ്ടെത്തി​യി​ട്ടുണ്ട്‌. എങ്ങനെ​യാ​ണു ബീവറു​കൾ ഇത്രയും വലിയ അണക്കെ​ട്ടു​കൾ നിർമി​ക്കു​ന്നത്‌?

ആദ്യം, അവ ഏതാണ്ട്‌ 30 സെന്റി​മീ​റ്റർവരെ ചുറ്റള​വുള്ള മരങ്ങൾ കടിച്ചു​വീ​ഴ്‌ത്തി​യിട്ട്‌ അവയുടെ ചില്ലകൾ മുറി​ച്ചു​മാ​റ്റും. അടുത്ത​താ​യി, നല്ല ബലമുള്ള ആ മരക്കഷ​ണങ്ങൾ തള്ളി​ക്കൊ​ണ്ടു​വന്ന്‌ നദിയു​ടെ​യും മറ്റും അടിത്ത​ട്ടിൽ നിരയാ​യി കുത്തനെ ഉറപ്പി​ച്ചു​നി​റു​ത്തു​ന്നു. എന്നിട്ട്‌ തൂണു​ക​ളാ​യി നാട്ടി​യി​രി​ക്കുന്ന ഈ മരക്കഷ​ണ​ങ്ങൾക്കു കുറുകെ ചെറിയ ചെടി​ക​ളും ഈറ്റത്ത​ണ്ടു​ക​ളും നെയ്‌തു​ചേർക്കും. തുടർന്ന്‌ വലിയ കല്ലുകൾകൊണ്ട്‌ അതു ബലപ്പെ​ടു​ത്തു​ക​യും അറ്റങ്ങൾ രണ്ടും വലിയ മരത്തി​ലോ പാറയി​ലോ ഉറപ്പി​ക്കു​ക​യും ചെയ്യുന്നു. വെള്ളം കുത്തി​യൊ​ഴു​കി വരു​മ്പോൾ അണക്കെട്ടു തകരാ​തി​രി​ക്കാൻവേണ്ടി അതിന്റെ എതിർവ​ശത്ത്‌ മരക്കഷ​ണ​ങ്ങ​ളോ തടിക​ളോ ചേർത്തു​വെച്ച്‌ അണക്കെട്ടു ശക്തമാ​ക്കും. വെള്ളം ഒഴുകി വരുന്ന വശം മരച്ചി​ല്ല​ക​ളും കളകളും ചെളി​യും ഒക്കെ ഉപയോ​ഗിച്ച്‌ അടയ്‌ക്കു​ക​യും ചെയ്യുന്നു. കൂടാതെ, കൂടു​ത​ലാ​യി വരുന്ന വെള്ളം ഒഴുകി​പ്പോ​കാ​നാ​യി ഡാമിന്റെ രണ്ട്‌ അറ്റത്തും വിടവു​ക​ളും ഉണ്ടാക്കും. അതിശ​ക്ത​മായ മഴയു​ണ്ടാ​കു​മ്പോൾ ഈ വിടവു​ക​ളു​ടെ വലുപ്പം കൂട്ടു​ക​യും ചെയ്യും.

അണക്കെ​ട്ടു​കൾ ഉണ്ടാക്കാൻ ബീവറു​കൾ ചെയ്യുന്ന ഈ ശ്രമം പരിസ്ഥി​തിക്ക്‌ ഒരുപാ​ടു ഗുണം ചെയ്യു​ന്ന​താ​യി ഗവേഷകർ കണ്ടെത്തി​യി​ട്ടുണ്ട്‌. ഉദാഹ​ര​ണ​ത്തിന്‌ ഈ അണക്കെ​ട്ടു​കൾ മണ്ണൊ​ലി​പ്പു കുറയ്‌ക്കു​ക​യും വെള്ളത്തി​ന്റെ ഗുണനി​ല​വാ​രം മെച്ച​പ്പെ​ടു​ത്തു​ക​യും ഭൂഗർഭ​ജ​ല​ത്തി​ന്റെ നിരപ്പ്‌ ഉയരാൻ ഇടയാ​ക്കു​ക​യും ചെയ്യുന്നു. കൂടാതെ, വേനൽക്കാ​ലത്ത്‌ വെള്ളം വറ്റി​പ്പോ​യി​രുന്ന അരുവി​ക​ളിൽ ഇപ്പോൾ മിക്ക​പ്പോ​ഴും വർഷം മുഴുവൻ നീരൊ​ഴു​ക്കു കാണാം. ഇനി, ഈ അണക്കെ​ട്ടു​കൾ മൂലമു​ണ്ടാ​കുന്ന ചതുപ്പു​നി​ലങ്ങൾ മഴക്കാ​ലത്ത്‌ വെള്ളം വലി​ച്ചെ​ടു​ത്തു​കൊണ്ട്‌ വെള്ള​പ്പൊ​ക്കം തടയുന്നു. മാത്രമല്ല, അവിടെ ചെടികൾ വളരു​ന്ന​തി​നാൽ കാട്ടുതീ പടരു​ന്നതു പലപ്പോ​ഴും തടയാ​നു​മാ​കു​ന്നു. പച്ചപ്പു നിറഞ്ഞ ഇത്തരം ചതുപ്പു​നി​ലങ്ങൾ പല തരം ജീവി​കൾക്കു താമസി​ക്കാ​നുള്ള ഇടവു​മാണ്‌.

ഒരു പഠനത്തിൽ ഗവേഷകർ പറഞ്ഞത്‌, “ബീവറു​കൾ ഉണ്ടാക്കുന്ന അണക്കെ​ട്ടു​കൾ കണ്ടാൽ വിദഗ്‌ധ​രായ എഞ്ചിനീ​യർമാർ പണിത​താ​ണെന്നു തോന്നും” എന്നാണ്‌. വടക്കേ അമേരി​ക്ക​യി​ലെ ഗവേഷകർ ബീവറു​കൾ നിർമി​ക്കു​ന്ന​തു​പോ​ലുള്ള പല ഡാമുകൾ ഉണ്ടാക്കി​യി​ട്ടു​പോ​ലു​മുണ്ട്‌. ബീവറു​കളെ പലപ്പോ​ഴും പ്രകൃ​തി​യി​ലെ എഞ്ചിനീ​യർമാർ എന്നു വിളി​ക്കു​ന്ന​തിൽ ഒട്ടും അതിശ​യ​മില്ല.

നിങ്ങൾക്ക്‌ എന്തു തോന്നു​ന്നു? ബീവറു​ക​ളു​ടെ നിർമാ​ണ​വൈ​ദ​ഗ്‌ധ്യം പരിണ​മി​ച്ചു​വ​ന്ന​താ​ണോ അതോ ആരെങ്കി​ലും രൂപകല്പന ചെയ്‌ത​താ​ണോ?