ഇടത്: ഇയാൻ ചുഴലിക്കാറ്റ്, ഫ്ളോറിഡ, യു.എസ്.എ., 2022 സെപ്റ്റംബർ (Sean Rayford/Getty Images); നടുക്ക്: യുക്രെയിനിലെ ഡോണെസ്ക് വിട്ടുപോകുന്ന ഒരു അമ്മയും മകനും, 2022 ജൂലൈ (Alex Chan Tsz Yuk/SOPA Images/LightRocket via Getty Images); വലത്: കോവിഡ് ടെസ്റ്റുകൾ ചെയ്യുന്നു, ബെയ്ജിങ്, ചൈന, 2022 ഏപ്രിൽ (Kevin Frayer/Getty Images)
ഉണർന്നിരിക്കുക!
2022: കുഴഞ്ഞുമറിഞ്ഞ ഒരു വർഷം—ബൈബിളിനു പറയാനുള്ളത്
2022-ലെ വാർത്തകളിൽ നിറഞ്ഞുനിന്നത്, യുദ്ധങ്ങളും സാമ്പത്തികതകർച്ചകളും പാരിസ്ഥിതികപ്രശ്നങ്ങളും ആയിരുന്നു. എന്നാൽ ഈ സംഭവങ്ങൾ വിരൽചൂണ്ടുന്നത് എന്തിലേക്കാണെന്ന് ബൈബിൾ മാത്രമേ വിശദീകരിക്കുന്നുള്ളൂ.
2022-ലെ സംഭവങ്ങൾ കാണിക്കുന്നത് . . .
ബൈബിൾ ‘അവസാനകാലം’ എന്നു വിളിക്കുന്ന സമയത്താണ് നമ്മൾ ജീവിക്കുന്നത് എന്നതിനുള്ള കൂടുതലായ തെളിവുകളാണ് ഇക്കഴിഞ്ഞ വർഷം നടന്ന സംഭവങ്ങൾ. (2 തിമൊഥെയൊസ് 3:1) 1914-ലാണ് ആ ‘അവസാനകാലം’ തുടങ്ങിയത്. നമുക്ക് ഈ അടുത്ത് നടന്ന സംഭവങ്ങൾ ഒന്നു നോക്കാം. അവസാനകാലത്തെക്കുറിച്ച് ബൈബിൾ പ്രവചിച്ചത് പോലെതന്നെയാണോ നടക്കുന്നത് എന്ന് ചിന്തിക്കാം:
‘യുദ്ധങ്ങൾ.’—മത്തായി 24:6.
“യുദ്ധത്തിന്റെ കെടുതികൾ യൂറോപ്പിൽ വീണ്ടും വിനാശം വിതച്ച വർഷമായിരുന്നു 2022.”a
“റഷ്യ യുക്രെയിനെ ആക്രമിക്കുന്നു” എന്ന ലേഖനം കാണുക.
‘ഭക്ഷ്യക്ഷാമങ്ങൾ.’—മത്തായി 24:7.
“2022—പട്ടിണിയാൽ ഇത്രത്തോളം വലഞ്ഞ ഒരു വർഷം മുമ്പൊരിക്കലും ഉണ്ടായിട്ടില്ല.”b
“യുക്രെയിനിലെ യുദ്ധം—ലോകം ഭക്ഷ്യക്ഷാമത്തിന്റെ പിടിയിലേക്ക്” എന്ന ലേഖനം കാണുക.
‘പകർച്ചവ്യാധികൾ.’ —ലൂക്കോസ് 21:11.
“പോളിയോയുടെ തിരിച്ചുവരവ്, കുരങ്ങുപനി ബാധിച്ചവരുടെ വർധന, കോവിഡ്-19 ഇപ്പോഴും വിതച്ചുകൊണ്ടിരിക്കുന്ന വിനാശം. ഇതെല്ലാം, പകർച്ചവ്യാധികളുടെ ഭീഷണി എത്ര വലുതാണെന്നും എത്ര പെട്ടെന്നാണ് പകർച്ചവ്യാധികൾ മനുഷ്യകുലത്തെ വിഴുങ്ങിക്കളയുന്നതെന്നും കാണിച്ചുതരുന്നു.”c
“60 ലക്ഷം കോവിഡ് മരണങ്ങൾ“ എന്ന ലേഖനം കാണുക.
‘പേടിപ്പിക്കുന്ന കാഴ്ചകൾ.’ —ലൂക്കോസ് 21:11.
“ഉഷ്ണതരംഗങ്ങൾ, വരൾച്ച, കാട്ടുതീ, പ്രളയം. കാലാവസ്ഥ കാരണമുണ്ടായ ഇത്തരം വിപത്തുകൾക്കു സാക്ഷ്യം വഹിച്ച സമയമായിരുന്നു 2022-ലെ വേനൽക്കാലം. ഉണ്ടായ നാശനഷ്ടങ്ങൾക്കു കൈയും കണക്കുമില്ല. ലക്ഷക്കണക്കിന് ആളുകളുടെ ജീവൻ നഷ്ടമായി. കോടിക്കണക്കിന് ആളുകൾക്കു സ്വന്തം നാടു വിട്ട് പോകേണ്ടിവന്നു.“d
“റെക്കോർഡ് ചൂടിൽ ഭൂമി വെന്തുരുകുന്നു” എന്ന ലേഖനം കാണുക.
‘പ്രക്ഷോഭങ്ങൾ (അഥവാ ‘ക്രമസമാധാനലംഘനം; കലാപങ്ങൾ,’ അടിക്കുറിപ്പ്.)’—ലൂക്കോസ് 21:9.
“പണപ്പെരുപ്പംപോലുള്ള വർധിച്ചുവരുന്ന സാമ്പത്തിക പ്രശ്നങ്ങൾ പൗരന്മാരെ രോഷം കൊള്ളിക്കുകയും അവർ ഗവൺമെന്റിനെതിരെ വൻ പ്രക്ഷോഭങ്ങൾ സംഘടിപ്പിക്കുകയും ചെയ്ത ഒരു വർഷമായിരുന്നു 2022.”e
“ലോകം പണപ്പെരുപ്പത്തിന്റെ ചുഴിയിൽ” എന്ന ലേഖനം കാണുക.
അടുത്ത വർഷത്തെ അവസ്ഥ എന്തായിരിക്കും?
2023-ൽ എന്തു സംഭവിക്കുമെന്ന് നമുക്ക് ആർക്കും കൃത്യമായി പറയാനാകില്ല. എന്നാൽ നമുക്ക് അറിയാവുന്ന ഒരു കാര്യമുണ്ട്: ദൈവത്തിന്റെ രാജ്യം അഥവാ സ്വർഗീയ ഗവൺമെന്റ് പെട്ടെന്നുതന്നെ ഭൂമിയിൽ വലിയ മാറ്റങ്ങൾ വരുത്തും. (ദാനിയേൽ 2:44) മനുഷ്യർ അനുഭവിക്കുന്ന കഷ്ടപ്പാടുകളുടെ കാരണം ആ ഗവൺമെന്റ് ഇല്ലാതാക്കും, ദൈവത്തിന്റെ ഇഷ്ടം ഈ ഭൂമിയിൽ നടക്കുന്നെന്ന് ഉറപ്പുവരുത്തുകയും ചെയ്യും.—മത്തായി 6:9, 10.
യേശു പറഞ്ഞതുപോലെ ‘ഉണർന്നിരിക്കാനുള്ള’ സമയമാണ് ഇപ്പോൾ. ബൈബിൾപ്രവചനങ്ങൾക്കനുസരിച്ച് ഇന്നത്തെ സംഭവങ്ങൾ നടക്കുന്നത് എങ്ങനെയെന്ന് നമുക്ക് അടുത്ത് ശ്രദ്ധിക്കാം. (മർക്കോസ് 13:37) ബൈബിളിന് ഇപ്പോൾ നിങ്ങളെ എങ്ങനെ സഹായിക്കാൻ കഴിയുമെന്നും നിങ്ങൾക്കും കുടുംബത്തിനും ഒരു നല്ല ഭാവിക്കുവേണ്ടിയുള്ള പ്രത്യാശ തരാൻ എങ്ങനെ കഴിയുമെന്നും അറിയാൻ ദയവായി ഞങ്ങളുമായി ബന്ധപ്പെടുക.
a ഏപി ന്യൂസ്, “2022—യൂറോപ്പിലേക്ക് വീണ്ടും യുദ്ധം കടന്നുകയറിയ ഭീകരമായ വർഷം,” ജിൽ ലോലെസ്, 2022 ഡിസംബർ 8.
b ലോക ഭക്ഷ്യപരിപാടി, “ലോകം ഭക്ഷ്യക്ഷാമത്തിന്റെ പിടിയിലേക്ക്.”
c ആരോഗ്യത്തെക്കുറിച്ചുള്ള ജാമാ ചർച്ചാവേദി, “മഹാമാരിയുടെ കാലത്തെ ജീവിതം—കോവിഡ്-19 മുതൽ കുരങ്ങ് പനി, പോളിയോ എന്നിവ വരെ,” ലോറൻസ് ഓ. ഗോസ്റ്റിൻ, 2022 സെപ്റ്റംബർ 22.
d Earth.Org, “2022-ലെ വേനൽക്കാലത്ത് ഉണ്ടായ കാലാവസ്ഥാപ്രതിഭാസങ്ങൾക്കു പിന്നിൽ എന്താണ്?” മാർട്ടിന ഇജീനി, 2022 ഒക്ടോബർ 24.
e അന്താരാഷ്ട്ര സമാധാനത്തിനുള്ള കാർനെഗീ എൻഡോവ്മെന്റ്, “സാമ്പത്തിക പരാജയങ്ങൾ 2022-ലെ ആഗോളപ്രക്ഷോഭങ്ങളുടെ മുഖ്യ കാരണം,” തോമസ് കാരോത്തേഴ്സും ബെഞ്ചമിൻ ഫെൽഡ്മാനും, 2022 ഡിസംബർ 8.