യുവജനങ്ങൾ ചോദിക്കുന്നു
ഡേറ്റിങ്ങ്—ഭാഗം 3: ഞങ്ങൾ ഈ ബന്ധം അവസാനിപ്പിക്കണോ?
നിങ്ങൾ കുറച്ച് നാളായി ഡേറ്റിങ്ങ് ചെയ്യുന്ന ഒരാളാണോ? എന്നാൽ ഇപ്പോൾ, ഈ ബന്ധം തുടരണോ അതോ അവസാനിപ്പിക്കണോ എന്ന സംശയത്തിലാണോ? അങ്ങനെയെങ്കിൽ ഇക്കാര്യത്തിൽ ഒരു തീരുമാനമെടുക്കാൻ ഈ ലേഖനം സഹായിക്കും.
ഈ ലേഖനത്തിൽ
പരസ്പരം ചേരുമോ എന്ന സംശയമുണ്ടെങ്കിൽ
കുറച്ച് നാളത്തെ ഡേറ്റിങ്ങിനു ശേഷം ഒരു ചെറുപ്പക്കാരനും ചെറുപ്പക്കാരിയും ആദ്യം ചിന്തിച്ചിരുന്നതുപോലെ തങ്ങൾ അത്ര ചേർച്ചയുള്ളവരല്ലെന്നു തിരിച്ചറിഞ്ഞേക്കാം. ഉദാഹരണത്തിന്:
ഒരാൾക്ക് ബീച്ചിൽ പോകാനാണ് ഇഷ്ടം, മറ്റെയാൾക്ക് കുന്നുകൾ കയറാനാണ് ഇഷ്ടം.
ഒരാൾ വാചാലനാണ്, മറ്റെയാൾ അധികം സംസാരിക്കാത്ത ആളാണ്.
ഒരാൾ കള്ളത്തരമൊക്കെ കാണിക്കുന്നു, മറ്റെയാൾ എപ്പോഴും സത്യസന്ധത പാലിക്കുന്നു.
ഈ മൂന്നു സാഹചര്യങ്ങളും വ്യത്യസ്തമാണെന്ന് ഓർക്കുക. ആദ്യത്തേത് താത്പര്യങ്ങളിലുള്ള വ്യത്യാസം; രണ്ടാമത്തേത് സ്വഭാവത്തിലുള്ള വ്യത്യാസം; മൂന്നാമത്തേത് മൂല്യങ്ങളിലുള്ള വ്യത്യാസം.
ചിന്തിക്കാനായി: നിങ്ങൾ വിവാഹിതരാകുകയാണെങ്കിൽ ഈ മൂന്നു കാര്യങ്ങളിൽ നിങ്ങൾക്ക് ഒത്തുപോകാൻ ഏറ്റവും ബുദ്ധിമുട്ടാക്കിയേക്കാവുന്നത് ഏതായിരിക്കും? എന്നാൽ ഇതിൽ ഏതിലൊക്കെ നിങ്ങൾക്കു വിട്ടുവീഴ്ച ചെയ്യാനാകും?
ഒരു ഭർത്താവിന്റെയും ഭാര്യയുടെയും താത്പര്യങ്ങളും സ്വഭാവങ്ങളും വ്യത്യസ്തമാണെങ്കിലും അവർക്കു സന്തോഷമുള്ള ഒരു വിവാഹജീവിതം ആസ്വദിക്കാനാകും. നല്ല ചേർച്ചയുള്ളവരായിക്കാൻ അവർ എല്ലാ കാര്യങ്ങളിലും ഒരുപോലെ ആയിരിക്കണമെന്നില്ല. ചില സാഹചര്യങ്ങളിൽ ഭർത്താവിനോ ഭാര്യക്കോ ഇണയുടെ താത്പര്യങ്ങൾ ഇഷ്ടപ്പെട്ടുതുടങ്ങാനോ അവരുടെ സ്വഭാവത്തിൽനിന്ന് പ്രയോജനം നേടാനോ കഴിഞ്ഞേക്കും.a
എന്നാൽ നിങ്ങൾ വിവാഹം കഴിക്കാൻപോകുന്ന വ്യക്തിക്ക് നിങ്ങളുടെ അതേ മൂല്യങ്ങളുണ്ടായിരിക്കണം. അതായത്, നിങ്ങളുടെ മതപരമായ വിശ്വാസങ്ങളും ധാർമികതയും ശരിതെറ്റുകളെക്കുറിച്ചുള്ള വീക്ഷണവും എല്ലാം ഒന്നായിരിക്കണം. അങ്ങനെ അല്ലെങ്കിൽ ആ ബന്ധം അവസാനിപ്പിക്കാനുള്ള ഒരു സൂചനയായി നിങ്ങൾ അതിനെ കാണണം.
ഉദാഹരണത്തിന്, വ്യത്യസ്ത മതവിശ്വാസങ്ങളിൽനിന്നുള്ള ഇണകളെക്കുറിച്ച് ചിന്തിക്കുക. വിവാഹത്തെക്കുറിച്ചുള്ള ഒരു പുസ്തകം പറയുന്നത് ഇങ്ങനെയാണ്, “വ്യത്യസ്ത മതങ്ങളിൽനിന്നുള്ള ദമ്പതികൾ വിവാഹമോചനം നേടാനുള്ള സാധ്യത വളരെ കൂടുതലാണെന്ന് ഗവേഷണങ്ങൾ എപ്പോഴും കാണിക്കുന്നു.”
ബൈബിൾതത്ത്വം: “നിങ്ങൾ അവിശ്വാസികളെപ്പോലുള്ളവരല്ല. അതിനാൽ നിങ്ങൾ അവരോടു ചേരാതിരിക്കുക.”—2 കൊരിന്ത്യർ 6:14, ഈസി-റ്റു-റീഡ്.
ഒരു തീരുമാനമെടുക്കാൻ
വിവാഹം കഴിക്കുന്നവർക്ക് “ജീവിതത്തിൽ പ്രയാസങ്ങളുണ്ടാകും” എന്നു ബൈബിൾ പറയുന്നു. (1 കൊരിന്ത്യർ 7:28, ഈസി-റ്റു-റീഡ്) അതുകൊണ്ട് അതിൽ കുറച്ച് ബുദ്ധിമുട്ടുകൾ, ഇപ്പോൾ ഡേറ്റിങ്ങിന്റെ സമയത്ത് ഉണ്ടാകുമ്പോൾ നിങ്ങൾ അതിശയിക്കേണ്ടതില്ല.
ചെറിയചെറിയ അഭിപ്രായവ്യത്യാസങ്ങളുണ്ട് എന്നതിന്റെ അർഥം നിങ്ങളുടെ ബന്ധം ഇരുളടഞ്ഞതാണ് എന്നല്ല. ആ പ്രശ്നങ്ങൾ സമാധാനത്തോടെ പരിഹരിക്കാൻ കഴിയുന്നുണ്ടോ എന്നതാണു ചോദ്യം. കാരണം വിവാഹം കഴിക്കുന്നെങ്കിൽ നിങ്ങൾക്ക് രണ്ടു പേർക്കും ആ കഴിവ് ആവശ്യമാണല്ലോ.
ബൈബിൾതത്ത്വം: ‘തമ്മിൽ ദയയും മനസ്സലിവും ഉള്ളവരായി പരസ്പരം ഉദാരമായി ക്ഷമിക്കുക.’—എഫെസ്യർ 4:32.
എന്നാൽ, കൂടെക്കൂടെ അല്ലെങ്കിൽ ഗൗരവമേറിയ വാക്കുതർക്കങ്ങൾ ഉണ്ടാകുന്നെങ്കിൽ നിങ്ങൾ തമ്മിൽ ഒത്തുപോകില്ല എന്നതിന്റെ സൂചനയായിരിക്കാം അത്. അങ്ങനെയെങ്കിൽ വിവാഹത്തിലേക്ക് പോകുന്നതിനു മുമ്പേ അക്കാര്യം തിരിച്ചറിയുന്നതാണു നല്ലത്.
കൂടെക്കൂടെ അല്ലെങ്കിൽ ഗൗരവമേറിയ വാക്കുതർക്കങ്ങൾ ഉണ്ടാകുന്നെങ്കിൽ നിങ്ങൾ തമ്മിൽ ഒത്തുപോകില്ല എന്നതിന്റെ സൂചനയായിരിക്കാം അത്
ചുരുക്കിപ്പറഞ്ഞാൽ: ഡേറ്റിങ്ങിന്റെ സമയത്ത്, ആ വ്യക്തിയുമായി നിങ്ങൾക്ക് ഒത്തുപോകാനാകുമോ എന്നതിലോ ഇനി, വിവാഹത്തിനു നിങ്ങൾ ശരിക്കും റെഡിയാണോ എന്നതിലോ സംശയമുണ്ടെങ്കിൽ ആ സംശയങ്ങൾക്കു നേരെ കണ്ണടയ്ക്കരുത്!
ബൈബിൾതത്ത്വം: “വിവേകമുള്ളവൻ ആപത്തു കണ്ട് ഒളിക്കുന്നു; എന്നാൽ അനുഭവജ്ഞാനമില്ലാത്തവൻ നേരെ അതിൽ ചെന്ന് ചാടി ഭവിഷ്യത്തുകൾ അനുഭവിക്കുന്നു.”—സുഭാഷിതങ്ങൾ 22:3.
നിങ്ങൾ പിരിയാൻ തീരുമാനിക്കുന്നെങ്കിൽ
പിരിയുന്നത് വിഷമമുള്ള ഒരു കാര്യമായിരിക്കാം. എന്നാൽ നിങ്ങൾക്കു രണ്ടു പേർക്കുമോ അല്ലെങ്കിൽ ഒരാൾക്കോ ഈ ബന്ധം തുടരുന്നതിനെക്കുറിച്ച് കാര്യമായ സംശയം എപ്പോഴും തോന്നുന്നുണ്ടെങ്കിൽ, അത് അവസാനിപ്പിക്കുന്നതായിരിക്കും ബുദ്ധി.
അത് എങ്ങനെ ചെയ്യാം? ന്യായമായ കാരണമില്ലെങ്കിൽ മെസ്സേജ് വഴിയോ ഒരു ഫോൺവിളിയിലൂടെയോ മാത്രം ഈ ബന്ധം അവസാനിപ്പിക്കാൻ ശ്രമിക്കരുത്. പകരം ഉചിതമായ സമയവും സ്ഥലവും കണ്ടെത്തി ഗൗരവമേറിയ ഈ വിഷയം ഒരുമിച്ച് ചർച്ച ചെയ്യുക.
ബൈബിൾതത്ത്വം: “പരസ്പരം സത്യം പറയുക.”—സെഖര്യ 8:16.
ഈ ബന്ധം അവസാനിച്ചു എന്നതുകൊണ്ട് നിങ്ങൾ ഒരു പരാജയമാണെന്നു ചിന്തിക്കേണ്ടതുണ്ടോ? ഒരിക്കലുമില്ല. ഓർക്കുക, ഡേറ്റിങ്ങ് എന്നത് ആ വ്യക്തിയെ നിങ്ങൾ വിവാഹം കഴിക്കണോ വേണ്ടയോ എന്നു തീരുമാനിക്കാനുള്ള ഒരു സഹായം മാത്രമാണ്. ആ ബന്ധം അവസാനിച്ചെങ്കിലും അതിൽനിന്ന് നിങ്ങൾക്കു മൂല്യവത്തായ പല കാര്യങ്ങളും പഠിക്കാനാകും.
സ്വയം ചോദിക്കുക: ‘ഈ ബന്ധത്തിൽനിന്ന് എന്നെക്കുറിച്ച് ഞാൻ എന്താണു മനസ്സിലാക്കിയത്? വിവാഹത്തിന് ഒരുങ്ങുന്നതിനു മുമ്പ് എന്റെ ഭാഗത്ത് എന്തെങ്കിലും മാറ്റങ്ങൾ വരുത്തേണ്ടതുണ്ടെന്ന് ഇതിൽനിന്ന് ഞാൻ തിരിച്ചറിഞ്ഞോ? വീണ്ടും ഡേറ്റിങ്ങ് ചെയ്യുമെങ്കിൽ ഞാൻ എന്തൊക്കെ മാറ്റങ്ങൾ വരുത്തും?’
a ഇത്തരം വ്യത്യാസങ്ങൾ ഭർത്താവിനെയും ഭാര്യയെയും എങ്ങനെ ബാധിച്ചേക്കാം എന്ന് അറിയാൻ, “കുടുംബങ്ങൾക്കുവേണ്ടി—വ്യത്യസ്ത താത്പര്യങ്ങളുമായി പൊരുത്തപ്പെടൽ,” “കുടുംബങ്ങൾക്കുവേണ്ടി—ഇഷ്ടമില്ലാത്ത ഒരു സ്വഭാവത്തെ മറ്റൊരു കണ്ണിലൂടെ കാണാൻ” എന്നീ ലേഖനങ്ങൾ കാണുക.