യുവജനങ്ങൾ ചോദിക്കുന്നു
സോഷ്യൽ മീഡിയ എനിക്കു ദോഷം ചെയ്യുന്നുണ്ടോ?
സോഷ്യൽ മീഡിയ ഉപയോഗിക്കാൻ പപ്പയും മമ്മിയും നിങ്ങളെ അനുവദിച്ചിട്ടുണ്ടോ? അങ്ങനെയെങ്കിൽ മൂന്നു പ്രധാനപ്പെട്ട കാര്യങ്ങളിൽ ഈ ലേഖനം നിങ്ങളെ സഹായിക്കും.
ഈ പേജിൽ
സോഷ്യൽ മീഡിയ എന്റെ സമയം കളയുന്നുണ്ടോ?
സോഷ്യൽ മീഡിയ ഉപയോഗിക്കുന്നത് കുതിച്ചുപായുന്ന ഒരു കുതിരപ്പുറത്ത് സവാരി ചെയ്യുന്നതുപോലെയാണ്. അതിനെ നിയന്ത്രിക്കുക. അല്ലെങ്കിൽ അതു നിങ്ങളെ നിയന്ത്രിക്കും.
“‘കുറച്ച് നേരത്തേക്ക്’ എന്നും പറഞ്ഞാണ് ഞാൻ സോഷ്യൽ മീഡിയ ഉപയോഗിച്ചുതുടങ്ങുന്നത്. പക്ഷേ പിന്നെ അതിൽനിന്ന് കണ്ണെടുക്കുമ്പോൾ മണിക്കൂറുകൾ കഴിഞ്ഞിരിക്കും. സോഷ്യൽ മീഡിയ ഒരു സമയംകൊല്ലിയാണ്. അതു നമ്മളെ അഡിക്റ്റാക്കും.”—ജോവാന.
നിങ്ങൾക്ക് അറിയാമോ? സോഷ്യൽ മീഡിയ നമ്മളെ അഡിക്റ്റാക്കുന്നതിൽ അതിശയിക്കേണ്ട. കാരണം, അത് അങ്ങനെയാണു ഡിസൈൻ ചെയ്തിരിക്കുന്നത്. കൂടുതൽക്കൂടുതൽ ആളുകൾ ഒരു സൈറ്റിൽ കയറുകയും കൂടുതൽ സമയം ആ സൈറ്റ് നോക്കുകയും ചെയ്യുമ്പോൾ പരസ്യക്കമ്പനികൾ കൂടുതൽ പണമിറക്കും.
സ്വയം ചോദിക്കുക: ‘സമയം പറന്നുപോകുന്നത് അറിയാതെ ഞാൻ സോഷ്യൽ മീഡിയയിൽ വെറുതെ സ്ക്രോൾ ചെയ്ത് ഇരിക്കാറുണ്ടോ? കുറച്ചുകൂടെ പ്രയോജനം ചെയ്യുന്ന കാര്യങ്ങൾക്കുവേണ്ടി എനിക്ക് ആ സമയം ഉപയോഗിക്കാൻ കഴിയുമോ?’
നിങ്ങൾക്കു ചെയ്യാനാകുന്നത്. സോഷ്യൽ മീഡിയ എത്ര സമയം ഉപയോഗിക്കുമെന്ന് നേരത്തേതന്നെ തീരുമാനിക്കുക. ആ പരിധി വിട്ടുപോകരുത്.
സോഷ്യൽ മീഡിയ നോക്കുന്ന സമയത്തിനു പരിധി വെക്കുക
“ഞാൻ എന്റെ ഫോണിൽ ഒരു ടൈമർ സെറ്റു ചെയ്തിട്ടുണ്ട്. ആ സമയം കഴിയുമ്പോൾ ചില ആപ്പുകൾ തന്നെ ലോക്കാകും. കുറച്ച് ബുദ്ധിമുട്ടിയാണെങ്കിലും ഞാൻ അങ്ങനെ ശീലിച്ചപ്പോൾ വലിയ കുഴപ്പമില്ല. ഇപ്പോൾ സോഷ്യൽ മീഡിയ ഉപയോഗിക്കുമ്പോൾ എന്റെ സമയം അധികം പോകാറില്ല.”—ടീന.
ബൈബിൾ തത്ത്വം: “സമയം ഏറ്റവും നന്നായി ഉപയോഗിക്കുക.”—എഫെസ്യർ 5:16.
സോഷ്യൽ മീഡിയ എന്റെ ഉറക്കം കളയുന്നുണ്ടോ?
ടീനേജേഴ്സിന് കുറഞ്ഞത് എട്ടു മണിക്കൂറെങ്കിലും ഉറക്കം വേണമെന്നാണ് മിക്ക വിദഗ്ധരും പറയുന്നത്. പക്ഷേ പലർക്കും അത്ര ഉറക്കം കിട്ടാറില്ല. സോഷ്യൽ മീഡിയ ആണ് പലപ്പോഴും വില്ലൻ.
“കിടക്കാൻ പോകുന്നതിനു മുമ്പ് ഞാൻ വെറുതെയൊന്നു ഫോൺ നോക്കുന്നതാണ്. പക്ഷേ പോസ്റ്റുകൾ സ്ക്രോൾ ചെയ്ത് വെറുതെ എന്റെ സമയം പോകും. എന്റെ ഈ മോശം സ്വഭാവം ഒന്നു മാറ്റണമെന്നുണ്ട്.”—മരിയ.
നിങ്ങൾക്ക് അറിയാമോ? വേണ്ടത്ര വിശ്രമം കിട്ടിയില്ലെങ്കിൽ ഡിപ്രഷനും ടെൻഷനും ഒക്കെ ഉണ്ടാകും. മനഃശാസ്ത്ര പ്രൊഫസറായ ജീൻ റ്റ്വങ്ങിന്റെ അഭിപ്രായത്തിൽ മൂഡു പോകാനുള്ള ഒരു പ്രധാനകാരണമാണ് ഉറക്കക്കുറവ്. അവർ പറയുന്നത് “കുറെക്കാലത്തേക്ക്” ഇങ്ങനെ ഉറക്കം കിട്ടാതിരുന്നാൽ അത് “ഗുരുതരമായ മാനസികാരോഗ്യ പ്രശ്നങ്ങൾക്ക് ഇടയാക്കും” എന്നാണ്.a
സ്വയം ചോദിക്കുക: ‘എന്നും രാത്രി ഞാൻ എത്ര സമയം ഉറങ്ങാറുണ്ട്?’ ‘കിടക്കാൻ തുടങ്ങേണ്ട സമയത്ത് ഞാൻ സോഷ്യൽ മീഡിയ നോക്കിയിരിക്കുകയാണോ?’
നിങ്ങൾക്കു ചെയ്യാനാകുന്നത്. നിങ്ങളുടെ ഇലക്ട്രോണിക് ഉപകരണങ്ങളെല്ലാം രാത്രി നിങ്ങളുടെ ബെഡ്റൂമിനു പുറത്ത് മറ്റെവിടെയെങ്കിലും വെക്കുക. സാധിക്കുമ്പോഴെല്ലാം, കിടക്കാൻ പോകുന്നതിനു രണ്ടു മണിക്കൂർ മുമ്പ് ഇലക്ട്രോണിക് ഉപകരണങ്ങൾ നോക്കുന്നതു നിറുത്തുക. ഇനി നിങ്ങൾക്ക് അലാറം വെക്കണമെങ്കിൽ, ഫോണിലോ ടാബിലോ അല്ലാതെ മറ്റെന്തെങ്കിലും ക്രമീകരണം ചെയ്യുക.
കിടക്കുന്നതിനു വളരെ മുമ്പുതന്നെ സോഷ്യൽ മീഡിയ ഉപയോഗിക്കുന്നതു നിറുത്തുക
“ഞാൻ ചിലപ്പോൾ രാത്രിയിൽ ഫോൺ നോക്കിയിരിക്കും. പക്ഷേ അത് അത്ര നല്ല ശീലമല്ല എന്ന് എനിക്കറിയാം. ഞാൻ അതു മാറ്റാൻ ശ്രമിച്ചുകൊണ്ടിരിക്കുകയാണ്. അൽപ്പംകൂടെ പക്വതയും ഉത്തരവാദിത്വവും ഒക്കെ എനിക്കു വേണം. പിറ്റേ ദിവസം കാര്യങ്ങൾ നന്നായി ചെയ്യണമെങ്കിൽ ഞാൻ നേരത്തേ കിടന്നുറങ്ങണം.”—ജെറമി.
ബൈബിൾ തത്ത്വം: ‘കൂടുതൽ പ്രാധാന്യമുള്ള കാര്യങ്ങൾ ഏതെന്ന് ഉറപ്പുവരുത്തുക.’—ഫിലിപ്പിയർ 1:10.
സോഷ്യൽ മീഡിയ എന്റെ മനസ്സിനെ ബാധിക്കുന്നുണ്ടോ?
ഹൈസ്കൂൾ പ്രായത്തിലുള്ള പെൺകുട്ടികളോടു ചോദിച്ചപ്പോൾ അതിൽ പകുതിയോളം പേരും പറഞ്ഞത് അവർക്കു “മിക്കപ്പോഴും വല്ലാത്ത നിരാശയും സങ്കടവും ഒക്കെ തോന്നാറുണ്ട്” എന്നാണ്. സോഷ്യൽ മീഡിയയാണ് പലപ്പോഴും ഇതിനു കാരണം. “മറ്റുള്ളവർ ചെയ്യുന്ന കാര്യങ്ങൾ ഒക്കെ നോക്കി സോഷ്യൽ മീഡിയയിൽ കൂടുതൽ സമയം ചെലവിട്ടാൽ അവരെപ്പോലെയൊന്നും ആകാൻ പറ്റുന്നില്ലല്ലോ എന്ന് ഓർത്ത് നിങ്ങൾക്കു നിരാശ തോന്നും” എന്നാണ് ഡോക്ട്ർ ലിയോണാർഡ് സാക്സ് പറയുന്നത്.b
“മറ്റുള്ളവരുമായി തങ്ങളെ തട്ടിച്ചുനോക്കുന്ന ശീലം പൊതുവെ ചെറുപ്പക്കാർക്കുണ്ട്. സോഷ്യൽ മീഡിയ ആ ശീലം ഒന്നുകൂടെ കൂട്ടും. നിങ്ങളുടെ കൂട്ടുകാരും മറ്റുള്ളവരും ഒക്കെ ഇടുന്ന ചിത്രങ്ങളും പോസ്റ്റുകളും ഒക്കെ നിങ്ങൾ മണിക്കൂറുകളോളം നോക്കിയിരിക്കും. എന്നിട്ട് നിങ്ങളുടെ ജീവിതത്തിൽ ഇങ്ങനെ രസമൊന്നുമില്ലല്ലോ എന്ന് ഓർത്ത് നിങ്ങൾക്കു നിരാശ തോന്നും.”—ഫേബ.
നിങ്ങൾക്ക് അറിയാമോ? സോഷ്യൽ മീഡിയ വഴി കൂട്ടുകാരുമൊക്കെയായി നിങ്ങൾക്കു സംസാരിക്കാൻ പറ്റുമെങ്കിലും നേരിട്ട് കണ്ട് സംസാരിക്കുന്നതുപോലെ ഇതൊന്നും വരില്ല. “നേരിട്ട് കണ്ട് സംസാരിക്കുക, ഇടപെടുക, ഇതൊക്കെ മനുഷ്യന്റെ ഉള്ളിന്റെ ഉള്ളിലെ അടിസ്ഥാന ആവശ്യങ്ങളിൽ ഒന്നാണ്. അതു തൃപ്തിപ്പെടുത്താൻ ഒരിക്കലും ഇലക്ട്രോണിക് ഉപകരണങ്ങൾക്കു കഴിയില്ല” എന്നാണ് ഡോക്ടർ നിക്കോളാസ് കർദാരാസ് പറയുന്നത്.c
സ്വയം ചോദിക്കുക: ‘കൂട്ടുകാർ ചെയ്യുന്ന കാര്യങ്ങളൊക്കെ നോക്കിക്കൊണ്ടിരിക്കുമ്പോൾ എനിക്ക് ഒറ്റപ്പെടൽ തോന്നാറുണ്ടോ?’ ‘സോഷ്യൽ മീഡിയയിൽ എന്റെ കൂട്ടുകാരുടെ അടിപൊളി ജീവിതമൊക്കെ കാണുമ്പോൾ എന്റെ ജീവിതം എന്തു ബോറാണ് എന്നു ഞാൻ ചിന്തിക്കാറുണ്ടോ?’ ‘ഞാൻ ഇടുന്ന പോസ്റ്റുകൾക്കു “ലൈക്ക്” കിട്ടാത്തപ്പോൾ എനിക്കു വിഷമം തോന്നാറുണ്ടോ?’
നിങ്ങൾക്കു ചെയ്യാനാകുന്നത്. കുറച്ച് ദിവസത്തേക്ക് അല്ലെങ്കിൽ ഒരു ആഴ്ചത്തേക്ക്, പറ്റുമെങ്കിൽ ഒരു മാസത്തേക്ക് സോഷ്യൽ മീഡിയയിൽനിന്ന് ഒരു “ബ്രേക്ക്” എടുക്കുക. കൂട്ടുകാരെ നേരിട്ട് കാണാൻ അല്ലെങ്കിൽ ഫോണിലൂടെ സംസാരിക്കാൻ കൂടുതൽ സമയമെടുക്കുക. ഇങ്ങനെ സോഷ്യൽ മീഡിയയിൽനിന്ന് ബ്രേക്ക് എടുക്കുമ്പോൾ നിങ്ങളുടെ ടെൻഷൻ കുറഞ്ഞ്, സന്തോഷം കൂടുന്നുണ്ടോ എന്ന് പരീക്ഷിച്ചുനോക്കുക.
കൂട്ടുകാരുമായി നേരിട്ട് കൂടുതൽ സമയം ചെലവഴിക്കാൻ നിങ്ങൾക്കു കഴിയുമോ?
“ഞാൻ സോഷ്യൽ മീഡിയ ഉപയോഗിച്ചുകൊണ്ടിരുന്നപ്പോൾ മറ്റുള്ളവർ ചെയ്യുന്ന കാര്യങ്ങളാണ് കൂടുതൽ ചിന്തിച്ചുകൊണ്ടിരുന്നത്. എന്റെ അക്കൗണ്ടുകളൊക്കെ ഡിലീറ്റ് ചെയ്തപ്പോൾ ഒരു ഭാരം ഇറങ്ങിപ്പോയതുപോലെയാണ് എനിക്കു തോന്നിയത്. ഇപ്പോൾ പ്രയോജനമുള്ള കാര്യങ്ങളൊക്കെ ചെയ്യാൻ എനിക്കു കൂടുതൽ സമയമുണ്ട്.”—ബ്രയാന.
ബൈബിൾ തത്ത്വം: “ഓരോരുത്തരും സ്വന്തം പ്രവൃത്തി വിലയിരുത്തട്ടെ. അപ്പോൾ, തന്നെ മറ്റാരുമായും താരതമ്യപ്പെടുത്താതെ തന്നിൽത്തന്നെ അഭിമാനിക്കാൻ അയാൾക്കു വകയുണ്ടാകും.”—ഗലാത്യർ 6:4.
a ഐ ജെൻ (ഇംഗ്ലീഷ്) എന്ന പുസ്തകത്തിൽനിന്ന്.
b പുരുഷനോ സ്ത്രീയോ എന്ന് എന്തിനു നോക്കണം? (ഇംഗ്ലീഷ്) എന്ന പുസ്തകത്തിൽനിന്ന്.
c കുട്ടികൾ തിളങ്ങട്ടെ (ഇംഗ്ലീഷ്) എന്ന പുസ്തകത്തിൽനിന്ന്.