പോർച്ചു​ഗ​ലിൽ ബൈബിൾസ​ത്യം പ്രചരി​പ്പി​ക്കൽ

വടക്കു കാമി​ന്യാ മുതൽ തെക്ക്‌ വിലാ റിയൽ ഡെ സാൻറൂ ആന്റോ​ണി​യൂ വരെ 800 കിലോ​മീ​ററർ വരുന്ന പോർച്ചു​ഗ​ലി​ന്റെ അററ്‌ലാൻറിക്ക്‌ സമു​ദ്ര​തീ​രത്തു വർണപ്പ​കി​ട്ടുള്ള ആയിര​ക്ക​ണ​ക്കി​നു മത്സ്യബന്ധന വള്ളങ്ങൾ നിരന്നു​കി​ട​ക്കു​ന്നു. മീൻപി​ടു​ത്ത​ക്കാർ നൂററാ​ണ്ടു​ക​ളിൽ ‘തങ്ങളുടെ കപ്പലു​ക​ളിൽ സമു​ദ്ര​ത്തി​ലേക്കു പോയി’ ഒട്ടനവധി പോർച്ചു​ഗീസ്‌ തീൻമേ​ശ​ക​ളിൽ മത്സ്യത്തെ മുഖ്യ വിഭവ​മാ​ക്കി​യി​ട്ടുണ്ട്‌.—സങ്കീർത്തനം 107:23.

കഴിഞ്ഞ 70 വർഷക്കാ​ലം, പോർച്ചു​ഗ​ലിൽ മറെറാ​രു​തരം മത്സ്യബ​ന്ധനം നടന്നു​കൊ​ണ്ടാ​ണി​രി​ക്കു​ന്നത്‌. യഹോ​വ​യു​ടെ സാക്ഷികൾ പതിനാ​യി​ര​ക്ക​ണ​ക്കി​നു പ്രതീ​കാ​ത്മക മത്സ്യങ്ങ​ളി​ലേക്കു സുവാർത്ത എത്തിക്കു​ന്ന​തിൽ തിരക്കു​ള്ള​വ​രാ​യി​രി​ക്കു​ന്നു. (മത്തായി 4:19) 1995 മേയിൽ 44,650 രാജ്യ​പ്ര​സാ​ധ​ക​രു​ടെ ഒരു അത്യു​ച്ച​മു​ണ്ടാ​യി​രു​ന്നു—ഏതാണ്ട്‌ 210 നിവാ​സി​കൾക്ക്‌ ഒരു പ്രസാ​ധകൻ എന്ന അനുപാ​തം. ചില നഗരങ്ങ​ളിൽ അനുപാ​തം അതിന്റെ പകുതി​യാണ്‌.

ഇത്രയ​ധി​കം പ്രവർത്ത​ക​രു​ള്ള​തി​നാൽ, അനേകം സ്ഥലങ്ങളിൽ സാക്ഷീ​ക​ര​ണ​പ്ര​ദേശം ഓരോ ആഴ്‌ച​യി​ലോ മറേറാ പ്രവർത്തി​ച്ചു​തീർക്കു​ന്നു. അങ്ങനെ പോർച്ചു​ഗീസ്‌ സാക്ഷികൾ തങ്ങളുടെ ബൈബിൾപ്ര​ത്യാ​ശ മററു​ള്ള​വർക്കു പങ്കു​വെ​ക്കു​ന്ന​തി​നു വ്യത്യസ്‌ത സമീപ​നങ്ങൾ ഉപയോ​ഗി​ക്കു​ന്ന​തിൽ വളരെ ശ്രദ്ധാ​ലു​ക്ക​ളാണ്‌. അതേ, അവർ സാധ്യ​മാ​കുന്ന ഏതു വിധത്തി​ലും ബൈബിൾസ​ത്യം അറിയി​ക്കു​ന്ന​തി​ന്റെ പ്രാധാ​ന്യ​ത്തെ വിലമ​തി​ക്കു​ന്നു.—1 കൊരി​ന്ത്യർ 9:20-23.

മതപര​മായ ചായ്‌വു​ള്ള​വരെ സഹായി​ക്കൽ

1991-ലെ കാനേ​ഷു​മാ​രി​പ്ര​കാ​രം, പോർച്ചു​ഗ​ലിൽ 18-ഓ അധിക​മോ വയസ്സു​ള്ള​വ​രു​ടെ 70 ശതമാനം റോമൻക​ത്തോ​ലി​ക്ക​രാ​ണെന്ന്‌ അവകാ​ശ​പ്പെ​ടു​ന്നു. അങ്ങനെ​യാ​യി​രു​ന്നി​ട്ടും, ജനങ്ങളു​ടെ ഇടയിൽ ബൈബിൾപ​രി​ജ്ഞാ​നം തീരെ കുറവാണ്‌. ജോണാൽ ഡെ നോട്ടി​ഷ്യാസ്‌ എന്ന വർത്തമാ​ന​പ​ത്രം ഇങ്ങനെ എഴുതി: “കത്തോ​ലി​ക്കാ​ലോ​ക​ത്തി​ലെ ഏററവും വലിയ വിപത്തു​ക​ളി​ലൊ​ന്നാ​ണിത്‌: ബൈബിൾ അജ്ഞത!” ഇതു വാസ്‌ത​വ​മാ​യി​രി​ക്കു​ന്നത്‌ എന്തു​കൊണ്ട്‌? എക്‌സ്‌പ്ര​സ്സോ എന്ന പോർച്ചു​ഗീസ്‌ വർത്തമാ​ന​പ​ത്രം ഉത്തരത്തി​ലേക്കു വിരൽചൂ​ണ്ടു​ന്നു. ഫാത്തി​മാ​യി​ലെ 500 പുരോ​ഹി​തൻമാ​രു​ടെ ഒരു യോഗ​ത്തെ​ക്കു​റി​ച്ചു റിപ്പോർട്ടു ചെയ്‌തു​കൊണ്ട്‌ ഈ വർത്തമാ​ന​പ​ത്രം ഇങ്ങനെ പറയുന്നു: “മുഖ്യ​പു​രോ​ഹി​തൻ പറയുന്ന പ്രകാരം, ‘ഘോഷകൻ’ എന്നനി​ല​യി​ലുള്ള തന്റെ സ്ഥാനം മറെറ​ല്ലാ​റ​റി​നു​മു​പ​രി​യാ​യി സ്ഥാപി​ക്കാൻ കഴിയ​ത്ത​ക്ക​വണ്ണം പുരോ​ഹി​തൻ അനന്തമായ പ്രവർത്ത​ന​ങ്ങ​ളിൽനി​ന്നു സ്വത​ന്ത്ര​നാ​കേ​ണ്ട​താ​വ​ശ്യ​മാണ്‌. . . . പുരോ​ഹി​തൻ സുവി​ശേ​ഷ​പ്ര​സം​ഗ​ത്തിൽ സർവാ​ത്മനാ ഏർപ്പെ​ടു​ന്നു​വെ​ങ്കിൽ, അയാൾക്കു മററു പ്രവർത്ത​ന​ങ്ങൾക്കൊ​ന്നും സമയമു​ണ്ടാ​യി​രി​ക്ക​യില്ല.”

ഇതിനു വിപരീ​ത​മാ​യി, പോർച്ചു​ഗ​ലി​ലുള്ള യഹോ​വ​യു​ടെ സാക്ഷികൾ സാധ്യ​മാ​കുന്ന ഏതു വിധത്തി​ലും ബൈബിൾസ​ത്യം അറിയി​ക്കു​ന്ന​തിൽ തിരക്കു​ള്ള​വ​രാണ്‌. തത്‌ഫ​ല​മാ​യി, ആത്മാർഥ​ത​യുള്ള അനേകം കത്തോ​ലി​ക്കർ ബൈബിൾ പരിജ്ഞാ​നം നേടി​ക്കൊ​ണ്ടി​രി​ക്കു​ക​യാണ്‌.

കാർലോ​ട്ട ഒരു ഭക്തക​ത്തോ​ലി​ക്ക​യും ഒരു മതാത്മ​ക​സ​ഭ​യു​ടെ യുവജ​ന​വി​ഭാ​ഗ​ത്തി​ലെ അംഗവു​മാ​യി​രു​ന്നു. അവൾ ഒരു യഹോ​വ​യു​ടെ സാക്ഷി​യായ ആന്റോ​ണി​യൂ ജോലി​ചെ​യ്‌തി​രുന്ന കിൻറർഗാർട്ട​നി​ലെ ഒരു അധ്യാ​പി​ക​യു​മാ​യി​രു​ന്നു. ഒരു നിരന്ത​ര​പ​യ​നി​യർ അഥവാ മുഴു​സ​മ​യ​ശു​ശ്രൂ​ഷകൻ എന്നനി​ല​യിൽ ആന്റോ​ണി​യൂ ഉച്ചഭക്ഷണ ഇടവേ​ള​യിൽ കൂട്ടു​ജോ​ലി​ക്കാ​രോ​ടു ബൈബി​ളി​നെ​ക്കു​റി​ച്ചു സംസാ​രി​ക്കാൻ എല്ലായ്‌പോ​ഴും ശ്രമി​ച്ചി​രു​ന്നു. ഒരു ദിവസം കാർലോട്ട നരകാ​ഗ്നി​വി​ശ്വാ​സ​ത്തെ​ക്കു​റി​ച്ചും മറിയാ​രാ​ധ​ന​യെ​ക്കു​റി​ച്ചും അയാ​ളോ​ടു ചോദി​ച്ചു. ഈ വിഷയങ്ങൾ സംബന്ധി​ച്ചു ബൈബിൾ പഠിപ്പി​ക്കു​ന്നത്‌ ആൻറോ​ണി​യൂ അവളെ കാണി​ച്ചു​കൊ​ടു​ത്തു. അത്‌ അനേകം ബൈബിൾചർച്ച​ക​ളു​ടെ തുടക്ക​മാ​യി​രു​ന്നു. കാർലോട്ട രാജ്യ​ഹാ​ളിൽ ആദ്യമാ​യി യോഗ​ത്തിൽ സംബന്ധി​ച്ച​പ്പോൾ അവൾക്കു വളരെ മതിപ്പു​ള​വാ​യി. എന്നിരു​ന്നാ​ലും, യോഗ​സ​മ​യങ്ങൾ അവൾ ഉൾപ്പെ​ട്ടു​നിന്ന മതസഭ​യു​ടെ യോഗ​സ​മ​യ​ങ്ങ​ളു​മാ​യി ചേരാ​തെ​വന്നു. താൻ ഒരു തീരു​മാ​നം ചെയ്യേ​ണ്ട​തു​ണ്ടെന്ന്‌ അവൾ തിരി​ച്ച​റി​ഞ്ഞു. അവൾ എന്തു ചെയ്യും?

കാർലോ​ട്ട മുഴു യുവജ​ന​സ​മൂ​ഹ​ത്തെ​യും കൂട്ടി​വ​രു​ത്തി​യിട്ട്‌ താൻ എന്തു​കൊ​ണ്ടാ​ണു രാജി​വെ​ക്കു​ന്ന​തെന്നു ബൈബി​ളിൽനി​ന്നു വിശദീ​ക​രി​ച്ചു. സ്‌റെറല എന്നു പേരുള്ള ഒരു പെൺകു​ട്ടി ഒഴികെ എല്ലാവ​രും അവളുടെ തീരു​മാ​നത്തെ വിമർശി​ച്ചു, സ്‌റെറല വളരെ ശ്രദ്ധാ​പൂർവം കേട്ടു. കാർലോട്ട സ്‌റെ​റ​ല​യോ​ടു പിന്നീടു സംസാ​രി​ച്ച​പ്പോൾ ജീവന്റെ ഉത്ഭവ​ത്തെ​യും ഉദ്ദേശ്യ​ത്തെ​യും കുറിച്ച്‌ അവൾ അനേകം ചോദ്യ​ങ്ങൾ ചോദി​ച്ചു. കാർലോട്ട ജീവൻ—അത്‌ ഇവിടെ എങ്ങനെ വന്നു? പരിണാ​മ​ത്താ​ലോ സൃഷ്ടി​യാ​ലോ?a എന്ന പുസ്‌തകം അവൾക്കു കൊടു​ക്കു​ക​യും അവളു​മാ​യി ഒരു ബൈബി​ള​ധ്യ​യനം തുടങ്ങു​ക​യും ചെയ്‌തു.

ഇതിനി​ട​യിൽ കാർലോട്ട നല്ല ആത്മീയ പുരോ​ഗതി നേടി 1991 ജൂണിൽ സ്‌നാ​പ​ന​മേൽക്കു​ക​യും ആറുമാ​സം കഴിഞ്ഞ്‌ ഒരു നിരന്ത​ര​പ​യ​നി​യ​റാ​യി സേവി​ച്ചു​തു​ട​ങ്ങു​ക​യും ചെയ്‌തു. 1992 മേയിൽ അവളും ആന്റോ​ണി​യൂ​വും വിവാ​ഹി​ത​രാ​ക​യും ആവശ്യം കൂടു​ത​ലു​ണ്ടാ​യി​രുന്ന അടുത്തുള്ള ഒരു സഭയിൽ ഒരുമി​ച്ചു പയനി​യർസേ​വനം തുടരു​ക​യും ചെയ്‌തു. സ്‌റെ​റ​ലയെ സംബന്ധി​ച്ചോ? അവൾ 1993 മേയിൽ സ്‌നാ​പ​ന​മേ​ററു, ഇപ്പോൾ ഒരു നിരന്ത​ര​പ​യ​നി​യ​റാ​യി സേവി​ക്കു​ന്നു.

യുവാ​വാ​യ ഫ്രാൻസി​സ്‌കൂ വളരെ മതഭക്തൻ ആയിരു​ന്നു. അയാൾ എല്ലാ ഞായറാ​ഴ്‌ച​ക​ളി​ലും രാവിലെ കുറു​ബാ​ന​യ്‌ക്കും ഉച്ചതി​രി​ഞ്ഞു കൊന്ത​ന​മ​സ്‌കാ​ര​ങ്ങൾക്കും സംബന്ധി​ച്ചി​രു​ന്നു. കുറു​ബാ​ന​വേ​ള​യിൽ പുരോ​ഹി​തനെ സഹായി​ച്ചു​കൊണ്ട്‌ അയാൾ ശുശ്രൂ​ഷ​ക​നാ​യും സേവിച്ചു. ഒരുനാൾ തന്നെ ഒരു “വിശുദ്ധൻ” ആക്കേണമേ എന്നു​പോ​ലും അയാൾ പ്രാർഥി​ച്ചു!

ഫ്രാൻസി​സ്‌കൂ യഥാർഥ​ത്തിൽ ഒരു ബൈബിൾ കിട്ടാൻ ആഗ്രഹി​ച്ചു. ഒരു ദിവസം ഒരു സുഹൃത്ത്‌ അയാൾക്കൊ​രു ബൈബിൾ കൊടു​ത്തു. ദൈവ​ത്തി​നു യഹോവ എന്ന ഒരു പേര്‌ ഉണ്ടെന്നു കണ്ടതിൽ അയാൾ അതിശ​യി​ച്ചു​പോ​യി. (പുറപ്പാ​ടു 6:3; സങ്കീർത്തനം 83:18) ആരാധ​ന​യിൽ പ്രതി​മ​ക​ളു​ടെ ഉപയോ​ഗത്തെ ദൈവം വിലക്കു​ന്ന​താ​യി പുറപ്പാ​ടു 20:4, 5-ൽ അയാൾ വായി​ച്ച​പ്പോൾ അയാൾ അതി​ലേറെ അതിശ​യി​ച്ചു! പള്ളിയിൽ പ്രതി​മകൾ നിറഞ്ഞി​രി​ക്കു​ന്നതു കാണു​ക​യാൽ ഈ സമ്മിശ്രതയെല്ലാം മനസ്സി​ലാ​ക്കാൻ സഹായി​ക്കു​ന്ന​തിന്‌ അയാൾ ദൈവ​ത്തോട്‌ ആത്മാർഥ​മാ​യി പ്രാർഥി​ച്ചു. പല ദിവസം കഴിഞ്ഞ്‌ ഒരു മുൻ സഹപാ​ഠി​യെ കണ്ടപ്പോൾ അയാൾ നിശാ​വി​ദ്യാ​ല​യ​ത്തിൽ വരാതി​രി​ക്കു​ന്നത്‌ എന്തു​കൊ​ണ്ടാ​ണെന്നു ചോദി​ച്ചു.

“ഇപ്പോൾ ഞാൻ മെച്ചപ്പെട്ട ഒരു നിശാ​വി​ദ്യാ​ല​യ​ത്തിൽ സംബന്ധി​ക്കു​ക​യാണ്‌,” അയാളു​ടെ സുഹൃത്തു പറഞ്ഞു.

“അത്‌ ഏതു വിദ്യാ​ല​യ​മാണ്‌, നീ എന്താണു പഠിക്കു​ന്നത്‌?” ഫ്രാൻസി​സ്‌കൂ ചോദി​ച്ചു. സുഹൃ​ത്തി​ന്റെ ഉത്തരത്തിൽ അയാൾ തികച്ചും വിസ്‌മ​യാ​ധീ​ന​നാ​യി.

“ഞാൻ യഹോ​വ​യു​ടെ സാക്ഷി​ക​ളു​ടെ രാജ്യ​ഹാ​ളിൽ ബൈബിൾ പഠിക്കു​ക​യാണ്‌,” സുഹൃത്ത്‌ അയാ​ളോ​ടു പറഞ്ഞു. “നിങ്ങൾ വരാൻ ആഗ്രഹി​ക്കു​ന്നു​വോ?”

തന്റെ ആദ്യ​യോ​ഗ​ത്തിൽ ഫ്രാൻസി​സ്‌കൂ കണ്ടത്‌ അയാൾക്കു വിശ്വ​സി​ക്കാൻ കഴിഞ്ഞില്ല—പുഞ്ചി​രി​ക്കുന്ന സന്തുഷ്ട​മു​ഖങ്ങൾ; ആളുകൾ ഊഷ്‌മ​ള​മായ സൗഹൃ​ദ​രീ​തി​യിൽ അന്യോ​ന്യം സംസാ​രി​ക്കു​ന്നു; കുട്ടികൾ തങ്ങളുടെ മാതാ​പി​താ​ക്ക​ളോ​ടു​കൂ​ടെ ഇരിക്ക​യും പറയു​ന്ന​തി​നു ശ്രദ്ധ കൊടു​ക്കു​ക​യും ചെയ്യുന്നു.

“ഇവിടെ ഞാൻ തികച്ചും അപരി​ചി​ത​നാ​യി​രു​ന്നു, എന്നിട്ടും ഞാൻ കുടും​ബ​ത്തി​ന്റെ ഭാഗമാ​യി​രി​ക്കു​ന്ന​തു​പോ​ലെ എനിക്കു തോന്നി!” ഫ്രാൻസി​സ്‌കൂ ഉദ്‌ഘോ​ഷി​ച്ചു. അതിനു​ശേഷം അയാൾ എന്നും ക്രമമാ​യി യോഗ​ങ്ങൾക്കു ഹാജരാ​യി​ക്കൊ​ണ്ടാ​ണി​രി​ക്കു​ന്നത്‌. ഇപ്പോൾ ഫ്രാൻസി​സ്‌കൂ സഭയിലെ ഒരു മൂപ്പനാ​യി സേവി​ക്കു​ന്നു, അദ്ദേഹ​ത്തി​ന്റെ ഭാര്യ​യോ​ടും രണ്ടു മക്കളോ​ടു​മൊ​പ്പം ദൈവ​വ​ച​ന​ത്തി​ലെ മഹത്തായ രാജ്യ​വാ​ഗ്‌ദ​ത്ത​ങ്ങ​ളിൽ സന്തോ​ഷി​ക്ക​യും ചെയ്യുന്നു.

ബന്ധുക്ക​ളു​മാ​യി സത്യം പങ്കു​വെ​ക്കൽ

ലിസ്‌ബൻ പ്രദേ​ശത്തെ ഒരു നിരന്ത​ര​പ​യ​നി​യ​റായ മന്വേ​ല​യ്‌ക്ക്‌ ബന്ധുക്കൾ ഉൾപ്പെടെ എല്ലാവ​രോ​ടും ദയാപൂർവം സാക്ഷീ​ക​രി​ക്കു​ന്ന​തിൽ ഉററി​രു​ന്ന​തു​കൊണ്ട്‌ ധാരാളം ആത്മീയ മത്സ്യം കിട്ടി​യി​രി​ക്കു​ന്നു. അവരിൽ അവളുടെ ജഡിക​സ​ഹോ​ദ​ര​നായ ഴൂസ്‌ ഇത്വാർഡൂ ഉൾപ്പെ​ട്ടി​രു​ന്നു, അയാൾക്ക്‌ ആയോ​ധ​ന​ക​ല​യി​ലും ആയുധ​ങ്ങ​ളു​ടെ ഉപയോ​ഗ​ത്തി​ലും പരിശീ​ലനം ലഭിച്ചി​രു​ന്നു. അയാൾ വളരെ​യേറെ പ്രാവ​ശ്യം നിയമങ്ങൾ ലംഘി​ച്ചി​രു​ന്ന​തു​കൊണ്ട്‌ ഒടുവിൽ 22 കുററാ​രോ​പ​ണങ്ങൾ ചുമത്തി വിചാരണ ചെയ്‌ത്‌ 20 വർഷത്തെ തടവിനു വിധിച്ചു. അയാൾ വളരെ അക്രമാ​സ​ക്ത​നാ​യി​രു​ന്ന​തു​കൊ​ണ്ടു സഹ അന്തേവാ​സി​കൾക്കു​പോ​ലും അയാളെ ഭയമാ​യി​രു​ന്നു. ഉയർന്ന സുരക്ഷി​ത​ത്വ​മുള്ള ഒരു ജയില​റ​യി​ലാ​യി​രു​ന്നു അയാളെ സൂക്ഷി​ച്ചത്‌.

മന്വേല ഏഴുവർഷം ക്ഷമാപൂർവം ഴൂസ്‌ ഇത്വാർഡൂ​വി​നെ സന്ദർശി​ച്ചു, എന്നാൽ അയാൾ എല്ലായ്‌പോ​ഴും അവളുടെ ബൈബിൾസ​ന്ദേശം നിരസി​ച്ചി​രു​ന്നു. ഒടുവിൽ ജീവൻ—അതിവി​ടെ എങ്ങനെ വന്നു? പരിണാ​മ​ത്താ​ലോ സൃഷ്ടി​യാ​ലോ? എന്ന പുസ്‌തകം പ്രസി​ദ്ധീ​ക​രി​ച്ച​പ്പോൾ അയാൾ അതു സ്വീക​രി​ച്ചു, ഒരു ബൈബി​ള​ധ്യ​യനം തുടങ്ങു​ക​യും ചെയ്‌തു. ഉടൻതന്നെ അയാൾ തന്റെ നടത്തയിൽ വലിയ മാററങ്ങൾ വരുത്തി. ഒരാഴ്‌ച​ക്കു​ശേഷം അയാൾ 200 തടവു​പു​ള്ളി​കൾക്കു വ്യക്തി​പ​ര​മായ ഒരു സാക്ഷ്യം കൊടു​ത്തു, അതിന​ടുത്ത ആഴ്‌ച​യിൽ 600 പേർക്കു​കൂ​ടെ. അയാൾ മററു ജയിൽ കെട്ടി​ട​ങ്ങ​ളി​ലെ അന്തേവാ​സി​കളെ സന്ദർശി​ക്കാ​നുള്ള അനുവാ​ദം പോലും വാങ്ങി. അയാളു​ടെ പെരു​മാ​റ​റ​ത്തി​ലെ ശ്രദ്ധേ​യ​മായ മാററം നിമിത്തം ശിക്ഷ 15 വർഷമാ​യി കുറച്ചു. 10 വർഷം ശിക്ഷയ​നു​ഭ​വി​ച്ച​ശേഷം അയാളെ നിരീ​ക്ഷ​ണ​ത്തിൻകീ​ഴിൽ വിട്ടു. അതിനു​ശേഷം അഞ്ചുവർഷം കടന്നു​പോ​യി. ഇപ്പോൾ ഴൂസ്‌ ഇത്വാർഡൂ സ്‌നാ​പ​ന​മേററ യഹോ​വ​യു​ടെ ഒരു സാക്ഷി​യാണ്‌, പ്രാ​ദേ​ശി​ക​സ​ഭ​യിൽ ഒരു ശുശ്രൂ​ഷാ​ദാ​സ​നാ​യി സേവി​ക്ക​യും ചെയ്യുന്നു. സത്യമാ​യി ‘ചെന്നായ്‌ കുഞ്ഞാ​ടി​നോ​ടു​കൂ​ടെ പാർക്കുന്ന’ ഒരു ദൃഷ്ടാന്തം!—യെശയ്യാ​വു 11:6.

തന്റെ കുടും​ബ​ത്തോ​ടു സാക്ഷീ​ക​രി​ക്കു​ന്ന​തി​ലുള്ള തുടർച്ച​യായ ശ്രമം നിമിത്തം തന്റെ ഭർത്താ​വി​നെ​യും വേറെ നാലു കുടും​ബാം​ഗ​ങ്ങ​ളെ​യും യഹോ​വ​യു​ടെ സേവന​ത്തിൽ പ്രവർത്ത​ന​നി​ര​ത​രാ​ക്കു​ന്ന​തി​ന്റെ സന്തോഷം മന്വേ​ല​യ്‌ക്കു ലഭിച്ചു. അവളുടെ ഭർത്താവ്‌ ഇപ്പോൾ ഒരു ശുശ്രൂ​ഷാ​ദാ​സ​നാണ്‌.

“ഞാൻ അവരെ തൊഴി​ച്ചും അടിച്ചും ഓടി​ക്കും”

മറിയാ ഡൂ കാർമോ സാക്ഷികൾ അവളെ സന്ദർശി​ക്കു​മ്പോൾ ലിസ്‌ബ​നി​ന്റെ പ്രാന്ത​പ്ര​ദേ​ശ​ത്താ​യി​രു​ന്നു താമസി​ച്ചി​രു​ന്നത്‌. അവൾക്കു താൻ കേട്ടത്‌ ഇഷ്ടപ്പെട്ടു, വീട്ടിൽ ഒരു ബൈബി​ള​ധ്യ​യനം നടത്തി​ക്കൊ​ള്ള​ട്ടേ​യെന്ന്‌ അവൾ ഭർത്താ​വായ അന്റോ​ണി​യോ​യോ​ടു ചോദി​ച്ചു. “അതി​നെ​ക്കു​റി​ച്ചു ചിന്തി​ക്കു​കയേ വേണ്ട!” അയാൾ മറുപടി പറഞ്ഞു. “നമ്മുടെ വീട്ടിൽ എന്നെങ്കി​ലും യഹോ​വ​യു​ടെ സാക്ഷി​കളെ കണ്ടാൽ ഞാൻ അവരെ തൊഴി​ച്ചും അടിച്ചും ഓടി​ക്കും.” സന്ദർഭ​വ​ശാൽ, അന്റോ​ണി​യോ ഒരു കരാട്ടേ അധ്യാ​പ​ക​നും മൂന്നാം ഡിഗ്രി ബ്ലാക്ക്‌ ബെൽറ​റു​കാ​ര​നും ആയിരു​ന്നു. അതു​കൊ​ണ്ടു മറിയ ഡൂ കാർമോ വേറെ എവി​ടെ​യെ​ങ്കി​ലും​വെച്ച്‌ അധ്യയനം നടത്താൻ തീരു​മാ​നി​ച്ചു.

പിന്നീട്‌, കരാ​ട്ടേ​യി​ലെ ഒരു അഷ്ടദിന പഠനപ​ദ്ധ​തി​ക്കാ​യി അന്റോ​ണി​യോ​യ്‌ക്ക്‌ ഇംഗ്ലണ്ടി​ലേക്കു പോ​കേ​ണ്ടി​വന്നു. മറിയ ഡൂ കാർമോ ശ്രദ്ധാ​പൂർവം അദ്ദേഹ​ത്തി​ന്റെ സ്യൂട്ട്‌കേ​സിൽ എന്റെ ബൈബിൾ കഥാപുസ്‌തകംb എടുത്തു​വെച്ചു. അന്റോ​ണി​യോ​യ്‌ക്കു യാത്രാ​വേ​ള​യിൽ ധാരാളം സമയമു​ണ്ടാ​യി​രു​ന്ന​തു​കൊണ്ട്‌ അദ്ദേഹം അതു വായിച്ചു. മടക്കയാ​ത്ര​യിൽ ഒരു കൊടു​ങ്കാ​ററ്‌ വിമാ​നത്തെ ഉഗ്രമാ​യി കുലുക്കി, അതിന്‌ താഴെ ഇറങ്ങാൻ പ്രയാ​സ​മാ​യി. തന്റെ ജീവി​ത​ത്തിൽ ആദ്യമാ​യി അന്റോ​ണി​യോ യഹോ​വ​യോ​ടു പ്രാർഥി​ച്ചു.

അന്റോ​ണി​യോ വീട്ടി​ലെ​ത്തി​യ​പ്പോൾ, ഭാര്യക്ക്‌ അധ്യയനം നടത്തി​ക്കൊ​ണ്ടി​രുന്ന സാക്ഷി അദ്ദേഹത്തെ ഒരു യോഗ​ത്തി​നു ക്ഷണിച്ചു. അദ്ദേഹം ക്ഷണം സ്വീക​രി​ച്ചു, എല്ലാവ​രും വളരെ സൗഹൃ​ദ​മു​ള്ള​വ​രാ​ണെന്നു കണ്ടെത്തു​ക​യും ചെയ്‌തു. ഒരു ബൈബി​ള​ധ്യ​യ​ന​ത്തി​നു ക്രമീ​ക​രണം ചെയ്‌തു. കുറഞ്ഞ സമയം​കൊണ്ട്‌ താൻ ഒരു തീരു​മാ​നം ചെയ്യേ​ണ്ട​തു​ണ്ടെന്ന്‌ അന്റോ​ണി​യോ​യ്‌ക്കു മനസ്സി​ലാ​യി. അദ്ദേഹം കരാട്ടെ പഠിപ്പി​ക്കൽ നിർത്തു​ക​യും ഇപ്പോ​ഴും എന്നേക്കും എങ്ങനെ സമാധാ​ന​പൂർണ​മായ ജീവിതം നയിക്കാ​മെന്ന്‌ അദ്ദേഹ​ത്തി​ന്റെ വിദ്യാർഥി​കളെ പഠിപ്പി​ച്ചു​തു​ട​ങ്ങു​ക​യും ചെയ്‌തു എന്നതാ​യി​രു​ന്നു ഫലം. ഒരു ബ്ലാക്ക്‌ബെൽറ​റു​കാ​രൻത​ന്നെ​യാ​യി​രുന്ന അവരിൽപ്പെട്ട മറെറാ​രാ​ളും ഇപ്പോൾ സ്‌നാ​പ​ന​മേററ ഒരു ക്രിസ്‌ത്യാ​നി​യാണ്‌.

അന്റോ​ണി​യോ​യെ സംബന്ധി​ച്ചാ​ണെ​ങ്കിൽ, അദ്ദേഹം 1991 ഏപ്രി​ലിൽ സ്‌നാ​പ​ന​മേ​ററു. അദ്ദേഹ​ത്തി​ന്റെ സ്‌നാ​പ​ന​ത്തി​ന്റെ പിറേ​റന്ന്‌ അദ്ദേഹം ഒരു സഹായ​പ​യ​നി​യ​റാ​യി സേവനം തുടങ്ങി. ആറുമാ​സം കഴിഞ്ഞ്‌, അദ്ദേഹം ഒരു നിരന്ത​ര​പ​യ​നി​യ​റാ​യി സേവി​ച്ചു​തു​ടങ്ങി. പെട്ടെ​ന്നു​തന്നെ അദ്ദേഹം 12 ഭവന ബൈബി​ള​ധ്യ​യനം നടത്തി​ക്കൊ​ണ്ടി​രു​ന്നു. 1993 ജൂ​ലൈ​യിൽ അദ്ദേഹം സഭയിൽ ഒരു ശുശ്രൂ​ഷാ​ദാ​സ​നാ​യി നിയമി​ത​നാ​യി.

കൂടെ​ക്കൂ​ടെ പ്രവർത്തി​ക്കുന്ന പ്രദേ​ശത്ത്‌

രാജ്യ​ത്തി​ന്റെ പലഭാ​ഗ​ങ്ങ​ളിൽ, ഓരോ ആഴ്‌ച​യി​ലും മററും പ്രദേശം പ്രവർത്തി​ച്ചു​തീ​രു​ന്നുണ്ട്‌. സാക്ഷികൾ തങ്ങളുടെ “മത്സ്യബന്ധന” പ്രവർത്ത​നങ്ങൾ ഫലകര​മാ​യി നടത്തു​ന്നത്‌ എങ്ങനെ​യാണ്‌?

ജൗ ഓരോ വീട്ടി​ലെ​യും ഓരോ​രു​ത്ത​രു​മാ​യും സമ്പർക്കം പുലർത്താൻ ശ്രമി​ക്കു​ന്നു. ഒരു സ്‌ത്രീ​യെ സന്ദർശി​ച്ച​പ്പോൾ വീട്ടിൽ മററു വല്ലവരും താമസി​ക്കു​ന്നു​ണ്ടോ​യെന്ന്‌ അദ്ദേഹം ചോദി​ച്ചു. ഭർത്താ​വും രണ്ടു പുത്രൻമാ​രും ഉണ്ടെന്നും എന്നാൽ അവർ ജോലി​ക്കു പോയി​ട്ടു വൈകു​ന്നേരം മാത്രം വീട്ടിൽ തിരി​ച്ചെ​ത്തു​ന്ന​തു​കൊണ്ട്‌ അവരെ കണ്ടുമു​ട്ടുക പ്രയാ​സ​മാ​ണെ​ന്നും സ്‌ത്രീ ഉത്തരം പറഞ്ഞു. അതു​കൊണ്ട്‌ ജൗ സാക്ഷീ​ക​രണം തുടരു​ക​യും ആ പ്രദേ​ശത്തെ മററു​ള്ള​വരെ സന്ദർശി​ക്കു​ക​യും ചെയ്‌തു. ഏതാണ്ട്‌ ഒന്നര മണിക്കൂർ കഴിഞ്ഞ്‌ ഒരു മനുഷ്യൻ അദ്ദേഹത്തെ സമീപി​ച്ചു.

“നിങ്ങൾ എന്നോടു സംസാ​രി​ക്കാ​നാ​ഗ്ര​ഹി​ക്കു​ന്നു​വെന്നു പറഞ്ഞല്ലോ” എന്ന്‌ ആ മനുഷ്യൻ ജൗവി​നോ​ടു പറഞ്ഞു. “എന്താ വേണ്ട​തെന്ന്‌ ദയവായി എന്നോടു പറയൂ.”

“ക്ഷമിക്കണം, ഞാൻ നിങ്ങളെ അറിയി​ല്ല​ല്ലോ,” ജൗ അതിശയം പൂണ്ടു മറുപടി പറഞ്ഞു. “നിങ്ങൾ ആരാണ്‌?”

“ഞാൻ അന്റോ​ണി​യോ ആണ്‌, താമസി​ക്കു​ന്നത്‌ ഈ തെരു​വിൽത്ത​ന്നെ​യാണ്‌. കുടും​ബ​ത്തിൽ ശേഷി​ച്ച​വ​രോ​ടു സംസാ​രി​ക്കാൻ നിങ്ങളാ​ഗ്ര​ഹി​ക്കു​ന്നു​വെന്നു നിങ്ങൾ എന്റെ അമ്മയോ​ടു പറഞ്ഞു, അതു​കൊ​ണ്ടാ​ണു ഞാൻ നിങ്ങൾക്കെ​ന്താ​ണു വേണ്ട​തെ​ന്ന​റി​യാൻ വന്നിരി​ക്കു​ന്നത്‌.”

ജൗ അന്റോ​ണി​യോ​യ്‌ക്ക്‌ ഒരു പൂർണ​സാ​ക്ഷ്യം കൊടു​ക്കു​ക​യും അയാളു​മാ​യി ഒരു ബൈബി​ള​ധ്യ​യനം തുടങ്ങു​ക​യും ചെയ്‌തു. രണ്ടാമത്തെ അധ്യയ​ന​ത്തി​നു​ശേഷം, ആഴ്‌ച​യിൽ രണ്ടു പ്രാവ​ശ്യം അധ്യയനം നടത്താ​മോ​യെന്ന്‌ അന്റോ​ണി​യോ ചോദി​ച്ചു. വെറും നാലു മാസം​കൊണ്ട്‌ അദ്ദേഹം ജൗവി​നോ​ടു ചേർന്നു സ്വന്തം തെരു​വിൽ സുവാർത്ത പ്രസം​ഗി​ച്ചു​തു​ടങ്ങി. മൂന്നു മാസം​ക​ഴിഞ്ഞ്‌, അദ്ദേഹം സ്‌നാ​പ​ന​മേ​ററു. അടുത്ത കാലത്ത്‌ അയാളു​ടെ അമ്മയും ബൈബിൾ പഠിക്കാൻ തുടങ്ങി. ശുശ്രൂ​ഷ​യിൽ കുടും​ബ​ത്തി​ലെ എല്ലാവ​രോ​ടും സംസാ​രി​ക്കാൻ ശ്രമി​ക്കു​ന്നത്‌ എത്ര മൂല്യ​വ​ത്താണ്‌!

ആവേശ​ജ​ന​ക​മാ​യ ഇത്തരം അനുഭ​വങ്ങൾ പോർച്ചു​ഗ​ലി​ലെ വെള്ളങ്ങ​ളിൽ ഇനിയും കൂടു​ത​ലാ​യി ആത്മീയ മത്സ്യബ​ന്ധനം നടത്തേ​ണ്ട​തു​ണ്ടെന്നു പ്രകട​മാ​ക്കു​ന്നു. പുരോ​ഗ​മ​നാ​ത്മ​ക​മായ ആയിര​ക്ക​ണ​ക്കി​നു ബൈബി​ള​ധ്യ​യ​നങ്ങൾ കൊണ്ടു യഹോവ അവിടത്തെ കഠിനാ​ധ്വാ​നി​ക​ളായ സാക്ഷി​കളെ അനു​ഗ്ര​ഹി​ച്ചി​രി​ക്കു​ക​യാണ്‌. എല്ലാവ​രോ​ടും ബൈബിൾസ​ത്യം അറിയി​ക്കാൻ കൂടുതൽ കൂടുതൽ മാർഗങ്ങൾ ആരായു​ന്ന​തിൽ തുടരവേ, ഫിലി​പ്പി​യി​ലെ ക്രിസ്‌ത്യാ​നി​ക​ളോ​ടുള്ള അപ്പോ​സ്‌ത​ല​നായ പൗലോ​സി​ന്റെ വാക്കുകൾ വാസ്‌ത​വ​മാ​യി ഇന്ന്‌ പോർച്ചു​ഗ​ലിൽ നിവൃ​ത്തി​യേ​റി​ക്കൊ​ണ്ടി​രി​ക്ക​യാണ്‌: “ഏതുവി​ധ​ത്തി​ലും ക്രിസ്‌തു പ്രസി​ദ്ധ​മാ​ക്ക​പ്പെ​ടു​ന്നു.”—ഫിലി​പ്യർ 1:18, NW.

[അടിക്കു​റി​പ്പു​കൾ]

[23-ാം പേജിലെ ഭൂപടം]

(പൂർണ​രൂ​പ​ത്തിൽ കാണു​ന്ന​തി​നു പ്രസി​ദ്ധീ​ക​രണം നോക്കുക)

സ്‌പെയിൻ

പോർച്ചുഗൽ

[24, 25 പേജു​ക​ളി​ലെ ചിത്രങ്ങൾ]

പോർച്ചുഗലിലെ സാക്ഷികൾ ബൈബിൾസ​ത്യം അറിയി​ക്കാൻ എല്ലാ അവസര​ങ്ങ​ളും ഉപയോ​ഗ​പ്പെ​ടു​ത്തു​ന്നു