രാജ്യ​വേ​ല​യിൽ നമ്മുടെ കണ്ണ്‌ “ലഘുവാ​യി” സൂക്ഷിക്കൽ

പൂർവ ജർമനി എന്നറി​യ​പ്പെ​ടുന്ന ജർമൻ ഡമോ​ക്രാ​റ​റിക്ക്‌ റിപ്പബ്ലിക്ക്‌ (ജി.ഡി.ആർ.) കഷ്ടിച്ച്‌ മധ്യവ​യ​സ്സി​ലെ​ത്തി​യ​തേ​യു​ള്ളു. ഏതാണ്ടു ലൈബീ​രി​യ​യു​ടെ വലിപ്പ​മുള്ള അല്ലെങ്കിൽ അമേരി​ക്കൻ ഐക്യ​നാ​ടു​ക​ളി​ലെ ടെന്നസ്സി സ്‌റേ​റ​റ​റി​ന്റെ വലിപ്പ​മുള്ള അതിന്റെ പ്രദേശം 1990 ഒക്‌ടോ​ബർ 3-ാം തീയതി പശ്ചിമ ജർമനി എന്നറി​യ​പ്പെ​ട്ടി​രുന്ന ഫെഡറൽ റിപ്പബ്ലിക്ക്‌ ഓഫ്‌ ജർമനി​യോ​ടു ചേർക്ക​പ്പെ​ട്ട​പ്പോൾ 41 വർഷത്തെ അതിന്റെ അസ്‌തി​ത്വം അവസാ​നി​ച്ചു.

ഈ രണ്ടു ജർമനി​ക​ളു​ടെ പുന​രേ​കീ​ക​രണം വിപു​ല​മായ നവീകരണ പരിപാ​ടി​കൾക്കു വഴിതു​റ​ന്നി​രി​ക്കു​ക​യാണ്‌. ഈ രണ്ടു രാജ്യ​ങ്ങളെ വേർതി​രി​ച്ചു നിർത്തി​യതു വെറു​മൊ​രു അക്ഷരീയ അതിർത്തി​യല്ല, മറിച്ച്‌ ഒരുപി​ടി തത്ത്വസം​ഹി​ത​ക​ളു​ടെ വേലി​ക്കെ​ട്ടാ​യി​രു​ന്നു. ഇതെല്ലാം അവിടത്തെ ആളുകൾക്ക്‌ എന്തർഥ​മാ​ക്കി, യഹോ​വ​യു​ടെ സാക്ഷി​ക​ളു​ടെ ജീവിതം എങ്ങനെ മാറി​യി​രി​ക്കു​ന്നു?

ഈ ഏകീക​ര​ണ​ത്തി​നു വഴി​യൊ​രു​ക്കിയ 1989 നവംബ​റി​ലെ വെണ്ടെ​വി​പ്ലവം പൊട്ടി​പ്പു​റ​പ്പെ​ട്ടതു നാലു പതിറ​റാ​ണ്ടു​കാ​ലം നീണ്ടു​നിന്ന കർക്കശ​മായ സോഷ്യ​ലി​സ​ത്തി​ന്റെ തൊട്ടു​പി​ന്നാ​ലെ​യാ​യി​രു​ന്നു. ആ കാലഘ​ട്ട​ത്തിൽ യഹോ​വ​യു​ടെ സാക്ഷി​ക​ളു​ടെ പ്രവർത്തനം നിരോ​ധി​ച്ചി​രു​ന്നു​വെ​ന്നു​മാ​ത്രമല്ല അവരോ​ടുള്ള പീഡനം ചില​പ്പോ​ഴൊ​ക്കെ അതിക​ഠി​ന​വു​മാ​യി​രു​ന്നു.a ഒടുവിൽ ജി.ഡി.ആർ. സ്വാത​ന്ത്ര്യം നുകർന്ന​പ്പോൾ ജനങ്ങൾക്കി​ട​യി​ലെ​ങ്ങും ഹർഷോൻമാ​ദം തിരതല്ലി. എന്നാൽ ആ തിമിർപ്പങ്ങു കെട്ടട​ങ്ങി​യ​പ്പോൾ അനേക​രും കണക്കു​കൂ​ട്ട​ലു​കൾ തെററി​യ​വ​രും നിരാ​ശ​രും മോഹ​മു​ക്ത​രു​മാ​യി​ത്തീർന്നു. ഇരു ജർമനി​ക​ളെ​യും സാമൂ​ഹി​ക​വും രാഷ്‌ട്രീ​യ​വും സാമ്പത്തി​ക​വു​മാ​യി ഒരവസ്ഥ​യിൽ കൂട്ടി​ച്ചേർക്കുക എന്നതു ദുഷ്‌ക​ര​മായ ഒരു വേലയാ​ണെന്നു തെളി​യു​ക​യാണ്‌.

ഡേർ സ്‌പീ​ഗ​ലി​ലെ “162 ടാജ്‌ ഡൊയി​ഷെ ഗെഷി​ക്‌റെറ” എന്ന പ്രത്യേക റിപ്പോർട്ട്‌ പറയു​ന്ന​പ്ര​കാ​രം ഏകീക​ര​ണത്തെ തുടർന്ന്‌ തൊഴി​ലി​ല്ലായ്‌മ, പണപ്പെ​രു​പ്പം, വർധിച്ച വാടക എന്നിവ​യെ​ക്കു​റി​ച്ചു ഭീതി പരന്നി​രു​ന്നു. “എനിക്കു വേണ്ടത്ര പെൻഷൻ ഉണ്ടായി​രി​ക്കു​മോ” എന്ന്‌ മുൻ ജി.ഡി.ആറിലെ അനേകർ വേവലാ​തി​പ്പെട്ടു. പാർപ്പി​ട​ത്തെ​ക്കു​റി​ച്ചെന്ത്‌? “ജി.ഡി.ആറിലെ പഴയ കെട്ടി​ട​ങ്ങ​ളെ​ല്ലാം ദ്രവി​ച്ചു​കൊ​ണ്ടി​രി​ക്കു​ക​യാണ്‌, ആ തെരു​വു​ക​ളൊ​ന്നും വാസ​യോ​ഗ്യ​മ​ല്ലാ​താ​കു​ക​യാണ്‌.” മലിനീ​ക​രണം ഭയാന​ക​മായ പരിധി​ക​ളി​ലെ​ത്തി​യി​രി​ക്ക​യാണ്‌.

ഇത്തരം സാമൂ​ഹി​ക​വും സാമ്പത്തി​ക​വു​മായ പ്രതി​സ​ന്ധി​യെ അഭിമു​ഖീ​ക​രി​ക്കെ, മുൻ ജി.ഡി.ആറിലെ യഹോ​വ​യു​ടെ സാക്ഷികൾ എങ്ങനെ​യാ​ണു സ്ഥിതി​ഗ​തി​കളെ നേരി​ട്ടി​രി​ക്കു​ന്നത്‌?

കണ്ണു ശരിയാ​യി കേന്ദ്രീ​ക​രി​ക്കൽ

യഹോ​വ​യു​ടെ സാക്ഷി​കൾക്കു തത്ത്വസം​ഹി​ത​ക​ളു​ടെ വേലി​ക്കെ​ട്ടു​ക​ളില്ല. കിഴക്കാ​യാ​ലും പടിഞ്ഞാ​റാ​യാ​ലും അവരുടെ ബൈബി​ള​ധി​ഷ്‌ഠിത വിശ്വാ​സം ഒന്നുത​ന്നെ​യാണ്‌. തങ്ങളുടെ സാമൂ​ഹിക പരിത​സ്ഥി​തി മാററ​ത്തി​നു വിധേ​യ​മാ​യി​രി​ക്കു​ന്ന​തി​നാൽ സാക്ഷി​ക​ളിൽ മിക്കവ​രും യഹോ​വയെ സേവി​ക്കുക എന്ന പ്രഥമ ലക്ഷ്യത്തിൽ കണ്ണു നട്ടു​കൊണ്ട്‌ തങ്ങളുടെ ആത്മീയ സമനില നിലനിർത്തു​ക​യാണ്‌. ഇത്‌ അടിയ​ന്തി​ര​മാ​യി​രി​ക്കു​ന്നത്‌ എന്തു​കൊണ്ട്‌?

“ഈ ലോക​ത്തി​ന്റെ രംഗം മാറി​ക്കൊ​ണ്ടി​രി​ക്കുന്ന”തുകൊണ്ട്‌. (1 കൊരി​ന്ത്യർ 7:31, NW) വെണ്ടെ​യ്‌ക്കു മുമ്പ്‌, നിരോ​ധ​ന​ത്തിൻ കീഴിൽ പ്രസം​ഗി​ക്കാൻ ധൈര്യ​മാ​വ​ശ്യ​മാ​യി​രു​ന്നു; അതു സാക്ഷി​കളെ യഹോ​വ​യിൽ ആശ്രയി​ക്കാൻ പഠിപ്പി​ക്കു​ക​യും ബൈബിൾ കൈകാ​ര്യം ചെയ്യാൻ പരിശീ​ലി​പ്പി​ക്കു​ക​യും ചെയ്‌തു എന്ന്‌ ഒരു ക്രിസ്‌തീയ മൂപ്പൻ അഭി​പ്രാ​യ​പ്പെ​ടു​ന്നു. എന്നാൽ ഇപ്പോൾ, “ഭൗതി​ക​ത്വ​ചി​ന്താ​ഗ​തി​യാ​ലും ജീവി​തോ​ത്‌ക​ണ്‌ഠ​ക​ളാ​ലും വഴി​തെ​റ​റി​ക്ക​പ്പെ​ടാ​തി​രി​ക്കാൻ ഞങ്ങൾ ജാഗ്രത പാലി​ക്കേ​ണ്ട​തുണ്ട്‌.”

സ്വാത​ന്ത്ര്യ​വും പുരോ​ഗ​തി​യും മിക്ക​പ്പോ​ഴും ഭൗതിക മാനങ്ങ​ളാ​ലാണ്‌ അളക്ക​പ്പെ​ടു​ന്നത്‌. മുമ്പു സാധ്യ​മ​ല്ലാ​യി​രുന്ന ഉല്ലാസ​ങ്ങ​ളു​ടെ​യും പ്രവൃ​ത്തി​ക​ളു​ടെ​യും കുറവു നികത്ത​ണ​മെന്നു വിചാ​രി​ക്കുന്ന അനേകർ ഈ രാജ്യ​ത്തുണ്ട്‌. തെക്കു തുറി​ങ്ക്യ​യി​ലും സാക്‌സ​ണി​ലു​മുള്ള പട്ടണങ്ങ​ളി​ലെ​യും ഗ്രാമ​ങ്ങ​ളി​ലെ​യും കല്ലു പാകിയ റോഡു​ക​ളി​ലൂ​ടെ ഓടി​ച്ചു​പോ​കു​മ്പോൾ ഇതു വ്യക്തമാ​കും. റോഡു പൊട്ടി​പ്പൊ​ളി​ഞ്ഞ​തും വീടുകൾ ലളിത​വു​മാ​യി​രി​ക്കാം, എന്നാൽ ഉപഗ്രഹ ടെലി​വി​ഷൻ ഡിഷ്‌ ആൻറീ​നകൾ എത്രയ​ധി​ക​മു​ണ്ടെ​ന്നോ! കണ്ണിനു കാണു​ന്ന​തെ​ല്ലാം ഉണ്ടെങ്കിൽ സുരക്ഷി​ത​ത്വ​വും സന്തോ​ഷ​വും ഉണ്ടാകും എന്ന ചിന്തയാൽ ഒരുവൻ വഞ്ചിക്ക​പ്പെ​ടാൻ വളരെ എളുപ്പ​മാണ്‌. അത്‌ എന്തൊരു അപകടം നിറഞ്ഞ കെണി​യാണ്‌!

ഭൗതിക വസ്‌തു​ക്കൾക്കും ജീവി​തോ​ത്‌ക​ണ്‌ഠ​കൾക്കും അതിരു​കടന്ന ശ്രദ്ധ കൊടു​ക്കു​ന്ന​തി​ന്റെ അപകട​ത്തെ​ക്കു​റിച്ച്‌ യേശു ഗിരി​പ്ര​ഭാ​ഷ​ണ​ത്തിൽ പ്രതി​പാ​ദി​ക്കു​ക​യു​ണ്ടാ​യി. “ഈ ഭൂമി​യിൽ നിങ്ങൾ നിക്ഷേ​പങ്ങൾ സ്വരൂ​പി​ക്ക​രു​തു” എന്ന്‌ അവിടു​ന്നു മുന്നറി​യി​പ്പു നൽകി. എന്നിട്ട്‌ ഇങ്ങനെ​യും കൂട്ടി​ച്ചേർത്തു: “ശരീര​ത്തി​ന്റെ വിളക്കു കണ്ണു ആകുന്നു; കണ്ണു ചൊവ്വു​ള്ള​തെ​ങ്കിൽ [ലഘുവാണെങ്കിൽ, NW] നിന്റെ ശരീരം മുഴു​വ​നും പ്രകാ​ശി​ത​മാ​യി​രി​ക്കും.” (മത്തായി 6:19, 22) അവിടുന്ന്‌ എന്താണ്‌ അർഥമാ​ക്കി​യത്‌? ദൃഷ്ടിയെ ഏകത്ര കേന്ദ്രീ​ക​രി​ച്ചു​നിർത്തു​ന്ന​തും മനസ്സി​ലേക്കു വ്യക്തമായ പ്രതി​ബിം​ബങ്ങൾ അയയ്‌ക്കു​ന്ന​തു​മായ ഒന്നാണു ലഘുവായ കണ്ണ്‌. ലഘുവായ ഒരു ആത്മീയ കണ്ണ്‌ ദൈവ​രാ​ജ്യ​ത്തി​ന്റെ ചിത്രം വ്യക്തമാ​യി സൂക്ഷി​ക്കും. അതു​കൊണ്ട്‌, ദൈവ​രാ​ജ്യ​ത്തിൽ വ്യക്തമാ​യി ദൃഷ്ടി കേന്ദ്രീ​ക​രിച്ച്‌ തന്റെ കണ്ണു ലഘുവാ​യി സൂക്ഷി​ക്കാ​നും ഉത്‌ക​ണ്‌ഠ​കളെ പിന്നി​ലേക്കു തള്ളിക്ക​ള​യാ​നു​മുള്ള ഒരു ക്രിസ്‌ത്യാ​നി​യു​ടെ ദൃഢനി​ശ്ചയം അയാളെ ആത്മീയ​മാ​യി സന്തുലി​താ​വ​സ്ഥ​യി​ലാ​യി​രി​ക്കാൻ സഹായി​ക്കു​ന്നു.

ഇതു സാക്‌സ​ണി​ലെ സിക്കാ​വു​വിൽനി​ന്നുള്ള ഒരു ദമ്പതി​ക​ളു​ടെ അനുഭ​വ​ത്തി​ലൂ​ടെ ദൃഷ്ടാ​ന്തീ​ക​രി​ക്കാ​വു​ന്ന​താണ്‌. അവർ വെണ്ടെ​ക്കാ​ലത്തു ബൈബി​ളിൽ താത്‌പ​ര്യം പ്രകടി​പ്പി​ച്ചു. അവരുടെ ബിസി​നസ്‌ വളരെ സമയം കവർന്നെ​ടു​ക്കു​ന്ന​താ​യി​രു​ന്നു. എങ്കിലും അവർ എല്ലാ യോഗ​ങ്ങ​ളി​ലും പങ്കെടു​ത്തു​കൊണ്ട്‌ ആത്മീയ താത്‌പ​ര്യ​ങ്ങൾ ഒന്നാമതു വെച്ചു. “ഞങ്ങളുടെ ബിസി​ന​സി​ന്റെ വെളി​ച്ച​ത്തിൽ പറയു​ക​യാ​ണെ​ങ്കിൽ, ഞങ്ങൾക്കു വാസ്‌ത​വ​ത്തിൽ സമയമില്ല, എന്നാൽ ആത്മീയ​മാ​യി, സമയമു​ണ്ടാ​ക്കേ​ണ്ടതു ഞങ്ങളുടെ അത്യാ​വ​ശ്യ​മാണ്‌” എന്ന്‌ അവർ സമ്മതിച്ചു. എന്തൊരു ബുദ്ധി​പൂർവ​ക​മായ തീരു​മാ​നം!

സാക്‌സ​ണിൽത്ത​ന്നെ പ്ലോവ​നി​ലുള്ള ഒരു കുടും​ബ​ത്തെ​ക്കു​റി​ച്ചും പരിചി​ന്തി​ക്കുക. സ്വന്തമാ​യി വാച്ച്‌ റിപ്പയ​റിങ്‌ ബിസി​ന​സ്സുള്ള ഒരു വിദഗ്‌ധ​നാ​യി​രു​ന്നു ഭർത്താവ്‌. വെണ്ടെ​യെ​ത്തു​ടർന്ന്‌ തന്റെ കെട്ടി​ട​ത്തി​ന്റെ വാടക കുതി​ച്ചു​യർന്നു. അദ്ദേഹം എന്തു ചെയ്യണം? “അതിനു വളരെ​യ​ധി​കം പണമാ​വ​ശ്യ​മാ​യി​രു​ന്നു, തന്നെയു​മല്ല, സത്യത്തി​നു​വേണ്ടി ജീവി​ക്കുക എന്ന സത്യം ഞാൻ മനസ്സി​ലാ​ക്കു​ക​യും ചെയ്‌തു.” അതു​കൊണ്ട്‌ അദ്ദേഹം താഴ്‌ന്ന വാടക​യുള്ള സൗകര്യം കുറഞ്ഞ ഒരു കെട്ടി​ട​ത്തി​ലേക്കു മാറി. അതേ, തന്റെ കണ്ണു ലഘുവാ​യി സൂക്ഷി​ക്കാൻ ആ വാച്ചു​ന​ന്നാ​ക്കു​കാ​രൻ ശീഘ്രം പഠിച്ചു.

എന്നാൽ ചിലർ വളരെ വൈകി​യാ​ണു പഠിച്ചത്‌. സ്വതന്ത്ര-കമ്പോള സമ്പദ്‌വ്യ​വസ്ഥ (free-market economy) വളരെ ആകർഷ​ക​മാ​യി കണ്ട ഒരു മൂപ്പൻ ബിസി​നസ്‌ തുടങ്ങി. ആത്മീയ​തക്കു മങ്ങലേൽക്കാൻ ബിസി​നസ്‌ കടപ്പാ​ടു​കളെ അനുവ​ദി​ക്ക​രു​തെന്ന്‌ ഒരു സഞ്ചാര​മേൽവി​ചാ​രകൻ അദ്ദേഹ​ത്തോ​ടു ദയാപൂർവം ബുദ്ധ്യു​പ​ദേ​ശി​ച്ചു. എന്നാൽ സങ്കടക​ര​മെന്നു പറയട്ടെ, അതുത​ന്നെ​യാ​ണു സംഭവി​ച്ചത്‌. കുറെ മാസങ്ങൾക്കു​ശേഷം ആ സഹോ​ദരൻ മൂപ്പൻ സ്ഥാനത്തു​നി​ന്നു രാജി​വച്ചു. അദ്ദേഹം പിന്നീട്‌ ഇങ്ങനെ​യെ​ഴു​തി: “സേവന​പ​ദ​വി​ക​ളി​ലേക്ക്‌ എത്തിപ്പി​ടി​ക്കുന്ന ഒരു സഹോ​ദ​ര​നും സ്വന്തമാ​യി ബിസി​നസ്‌ തുടങ്ങ​രു​തേ​യെന്ന്‌ എന്റെ സ്വന്തം അനുഭ​വ​ത്തി​ന്റെ വെളി​ച്ച​ത്തിൽ ഞാൻ ഉപദേ​ശി​ക്കു​ക​യാണ്‌.” സ്വയം-തൊഴിൽ കണ്ടെത്തു​ന്നതു തെററാ​ണെന്നല്ല ഇതിന്റെ അർഥം. നമുക്കു സ്വന്തമായ തൊഴി​ലു​ണ്ടെ​ങ്കി​ലും ഇല്ലെങ്കി​ലും സാമ്പത്തിക ഉത്‌ക​ണ്‌ഠ​കൾക്ക്‌ അമിത​മായ ശ്രദ്ധ കൊടു​ത്താൽ നാമറി​യാ​തെ അതു നമ്മെ പണത്തിന്‌ അടിമ​യാ​ക്കും. പരിണ​ത​ഫലം എന്തായി​രി​ക്കു​മെന്നു യേശു വ്യക്തമാ​ക്കി: “രണ്ടു യജമാ​നൻമാ​രെ സേവി​പ്പാൻ ആർക്കും കഴിക​യില്ല; അങ്ങനെ ചെയ്‌താൽ ഒരുത്തനെ പകെച്ചു മററവനെ സ്‌നേ​ഹി​ക്കും; അല്ലെങ്കിൽ ഒരുത്ത​നോ​ടു പററി​ച്ചേർന്നു മററവനെ നിരസി​ക്കും.” (മത്തായി 6:24) ജർമൻ കവിയായ ഗോത്തെ ഇങ്ങനെ പറഞ്ഞു: “തങ്ങൾ സ്വത​ന്ത്ര​രെന്നു തെററാ​യി വിശ്വ​സി​ക്കു​ന്ന​വ​രോ​ളം വലിയ അടിമകൾ വേറെ​യില്ല.”

അക്ഷരാർഥ​ത്തിൽ നാം ഒരു കാററിൽ പെട്ടു​പോ​യാൽ നമ്മുടെ ലക്ഷ്യം ദൃഷ്ടി​യിൽ സൂക്ഷി​ക്കു​ന്ന​തിന്‌ കണ്ണ്‌ അൽപ്പം മാത്രം തുറന്നോ കൈ​കൊണ്ട്‌ കണ്ണു പൊത്തി​യിട്ട്‌ ഉളിഞ്ഞോ നോ​ക്കേ​ണ്ട​തു​ണ്ടാ​യി​രി​ക്കാം. രാഷ്‌ട്രീ​യ​മോ സാമ്പത്തി​ക​മോ സാമൂ​ഹി​ക​മോ ആയ പ്രതി​സ​ന്ധി​ക​ളാൽ ചുററ​പ്പെ​ടു​മ്പോൾ ആത്മീയ ലക്ഷ്യം ദൃഷ്ടി​യിൽ സൂക്ഷി​ക്കു​ന്ന​തിന്‌ ഏകാഗ്രത ആവശ്യ​മാണ്‌. രാജ്യ​വേ​ല​യിൽ തങ്ങളുടെ കണ്ണു ലഘുവാ​യി സൂക്ഷി​ക്കു​ന്ന​തിന്‌ ചില ക്രിസ്‌ത്യാ​നി​കൾ എന്താണു ചെയ്യു​ന്നത്‌?

വർധിച്ച രാജ്യ​പ്ര​വർത്ത​നം

മുൻ ജി.ഡി.ആറി​ലെ​വി​ടെ​യും പ്രസം​ഗ​വേ​ല​യിൽ സാക്ഷികൾ മുമ്പെ​ന്ന​ത്തെ​ക്കാ​ളേറെ സമയം ചെലവ​ഴി​ക്കു​ന്നുണ്ട്‌. കഴിഞ്ഞ രണ്ടു വർഷങ്ങ​ളിൽ വയൽസേ​വ​ന​ത്തിൽ ചെലവ​ഴിച്ച ശരാശരി സമയം 21 ശതമാനം കണ്ടു വർധിച്ചു. ഫലമോ? ഭവന ബൈബി​ള​ധ്യ​യ​ന​ത്തിൽ ഒരു വമ്പിച്ച 34 ശതമാനം വർധനവ്‌. കൂടാതെ, നിരന്തര പയനി​യർമാ​രു​ടെ എണ്ണം വെറും രണ്ടു വർഷം മുമ്പ​ത്തേ​തി​നെ​ക്കാൾ ഇപ്പോൾ നാലു മടങ്ങായി ഉയർന്നു. മററു​ള്ളവർ ഉത്‌ക​ണ്‌ഠ​പ്പെ​ടു​ക​യും പരാതി​പ്പെ​ടു​ക​യും ചെയ്യു​മ്പോൾ മുൻ ജി.ഡി.ആറിലെ 23,000-ത്തിലധി​കം ക്രിസ്‌ത്യാ​നി​കൾ തങ്ങളുടെ കണ്ണു ലഘുവാ​യി നിലനിർത്തി​ക്കൊണ്ട്‌ സാഹച​ര്യ​ത്തോ​ടു പൊരു​ത്ത​പ്പെ​ടു​ക​യാണ്‌. ഇതു രാജ്യ​പ്ര​വർത്ത​ന​ത്തി​ലെ വിസ്‌മ​യ​ക​ര​മായ വർധന​വി​നു കാരണ​മാ​യി​ട്ടുണ്ട്‌.—യോശുവ 6:15 താരത​മ്യം ചെയ്യുക.

വർധിച്ച രാജ്യ​പ്ര​വർത്ത​ന​മെ​ന്നാൽ സാക്ഷി​ക​ളിൽ ഏറിയ​പ​ങ്കും ജീവി​ക്കുന്ന തെക്കൻഭാ​ഗത്തെ പ്രദേശം നന്നായി പ്രവർത്തി​ക്കു​ന്നു എന്നു സാരം. നിരവധി സ്ഥലപ്പേ​രു​കൾ ചരി​ത്ര​പ​ര​മാ​യി പ്രാധാ​ന്യ​മു​ള്ള​വ​യാണ്‌. നിങ്ങൾ കളിമൺപാ​ത്ര​ത്തിൽ താത്‌പ​ര്യ​മുള്ള ഒരാളാ​ണെ​ങ്കിൽ ഡ്രെസ്‌ഡനു സമീപ​മുള്ള മെയ്‌സൺ ആണു കളിമൺപാ​ത്ര​ങ്ങ​ളിൽ വച്ചേറ​റ​വും കനംകു​റഞ്ഞ ചില ഇനങ്ങളു​ടെ ഉറവി​ട​മെന്നു നിങ്ങൾ കണ്ടെത്തും. മെയ്‌സ​ണിൽ ഇപ്പോൾ 130 രാജ്യ​പ്ര​സാ​ധ​ക​രുണ്ട്‌. ഇനി “ജർമനി​യു​ടെ പൗരാ​ണിക തലസ്ഥാന”മായ വെയ്‌മ​റി​ന്റെ കാര്യ​മെ​ടു​ക്കാം. പട്ടണമ​ധ്യ​ത്തി​ലുള്ള ഗോഥെ-ഷില്ലർ സ്‌മാ​രകം ആ രണ്ട്‌ എഴുത്തു​കാ​രു​മാ​യുള്ള വെയ്‌മ​റി​ന്റെ കുലീ​ന​മായ ബന്ധങ്ങൾക്കു സാക്ഷ്യം വഹിക്കു​ന്ന​തി​നു പുറമേ അത്‌ അവിടത്തെ അനേക​രു​ടെ അഭിമാ​ന​ഭാ​ജനം കൂടി​യാണ്‌. ഇന്നു വെയ്‌മ​റി​നു തന്റെ 150-ലേറെ സുവാർത്താ പ്രസാ​ധ​കരെ ചൊല്ലി അഭിമാ​നി​ക്കാൻ വകയുണ്ട്‌.

എന്നാൽ, പ്രസാ​ധകർ കുറവും സഭകൾ തമ്മിലുള്ള അകലം കൂടു​ത​ലും ആയിരി​ക്കുന്ന വടക്കൻ ഭാഗത്തു സ്ഥിതി​ഗ​തി​കൾ വളരെ വ്യത്യ​സ്‌ത​മാണ്‌. തൊഴിൽ ഇവിടെ വിരള​മാണ്‌. ഉള്ളവരിൽ അനേക​രോ തങ്ങൾക്കതു നഷ്ടപ്പെ​ടാ​തി​രി​ക്കേ​ണ്ട​തിന്‌ അധിക​സ​മയം ജോലി ചെയ്യാ​നുള്ള സമ്മർദ​ത്തി​ലാണ്‌. വടക്കൻ ഭാഗത്തു മുഴു​സമയ പ്രഘോ​ഷ​ക​നാ​യി സേവി​ക്കുന്ന ഒരു സഹോ​ദരൻ ഇങ്ങനെ വിശദീ​ക​രി​ച്ചു: “നിരോ​ധ​ന​ത്തിൻ കീഴിൽ ഓരോ സഹോ​ദ​ര​നും യഹോ​വ​യു​ടെ സംരക്ഷണം ആവശ്യ​മാ​യി​രു​ന്നതു വയൽസേ​വ​ന​ത്തി​ലാ​യി​രു​ന്നു, എന്നാൽ ഒരു തൊഴിൽ കണ്ടെത്തുക ബുദ്ധി​മു​ട്ടാ​യി​രു​ന്നില്ല. ഇന്നു സ്ഥിതി നേരെ മറിച്ചാണ്‌. പ്രസം​ഗി​ക്കാൻ ഞങ്ങൾക്കു സ്വാത​ന്ത്ര്യ​മുണ്ട്‌, എന്നാൽ തൊഴി​ലി​ന്റെ കാര്യ​ത്തിൽ ഞങ്ങൾക്ക്‌ അവിടു​ത്തെ മാർഗ​ദർശനം ആവശ്യ​മാണ്‌. ഇത്തരം മാററം പരിച​യി​ക്കേണ്ട ഒന്നാണ്‌.”

കൂടെ​ക്കൂ​ടെ പ്രസം​ഗി​ക്കാൻ കഴിയു​ന്ന​തിൽ പ്രസാ​ധകർ സന്തുഷ്ട​രാ​ണോ? വുൾഫ്‌ഗാ​ങ്ങി​ന്റെ വീക്ഷണം ഇങ്ങനെ​യാണ്‌: “ഒരേ പ്രസാ​ധകൻ ഒരേ പ്രദേ​ശം​തന്നെ വീണ്ടും​വീ​ണ്ടും പ്രവർത്തി​ക്കു​ന്ന​താണ്‌ ഏറെ മെച്ചം. ആളുകൾ അദ്ദേഹത്തെ കൂടുതൽ വിശ്വ​സി​ക്കു​ക​യും തുറന്നി​ട​പെ​ടു​ക​യും ചെയ്യും.” കൂടാതെ, വീട്ടു​കാർ “മററു​ള്ള​വ​രു​ടെ കേൾക്കെ​പ്പോ​ലും വീട്ടു​വാ​തിൽക്കൽവച്ച്‌ മതത്തെ​ക്കു​റി​ച്ചു ചർച്ച ചെയ്യു​ന്ന​തിൽ വിമുഖത കാട്ടാ​റില്ല. മതം മേലാൽ ആർക്കും നിഷി​ദ്ധ​മായ ഒരു വിഷയമല്ല” എന്നു റാൽഫും മാർട്ടീ​നാ​യും സമ്മതി​ക്കു​ന്നു. “ഞങ്ങളുടെ പ്രദേശം കൂടെ​ക്കൂ​ടെ പ്രവർത്തി​ക്കു​ന്നതു ഞങ്ങൾ ആസ്വദി​ക്കു​ന്നു. വ്യക്തി​പ​ര​മാ​യി ഞങ്ങൾക്ക്‌ ആളുകളെ പരിച​യ​പ്പെ​ടാം, വളരെ വൈവി​ധ്യ​മാർന്ന സാഹി​ത്യ​ങ്ങൾ ലഭ്യമാ​യി​രി​ക്കു​ന്ന​തി​നാൽ ഞങ്ങൾ പുളകി​ത​രു​മാണ്‌.”

നമ്മുടെ സാഹി​ത്യ​ത്തോ​ടുള്ള വിലമ​തിപ്പ്‌

റാൽഫും മാർട്ടീ​ന​യും ജീവൻ—അത്‌ ഇവിടെ വന്നത്‌ എങ്ങനെ? പരിണാ​മ​ത്താ​ലോ സൃഷ്ടി​യാ​ലോ? [ഇംഗ്ലീഷ്‌] എന്ന പുസ്‌തകം പ്രത്യേ​കി​ച്ചും വിലമ​തി​ക്കു​ന്നു. മുൻ ജി.ഡി.ആറിൽ നിരീ​ശ്വ​ര​വാ​ദത്തെ പുണർന്ന അനേകർക്ക്‌ ഇതൊരു അത്ഭുത​ക​ര​മായ ബൈബിൾ പഠനസ​ഹാ​യി​യാ​ണെന്നു തെളി​യു​ക​യാണ്‌. സമാന​മായ വിഷയ​മ​ട​ങ്ങിയ ഒരു ചെറിയ പ്രസി​ദ്ധീ​ക​ര​ണ​വും കൂടി​യു​ണ്ടാ​യി​രു​ന്നെ​ങ്കിൽ എന്ന്‌ അവർ ആശിച്ചി​രു​ന്നു. “ഡ്രെസ്‌ഡ​നിൽ നടന്ന 1992-ലെ ‘പ്രകാ​ശ​വാ​ഹകർ’ ഡിസ്‌ട്രി​ക്‌ററ്‌ കൺ​വെൻ​ഷ​നിൽവച്ച്‌ ദൈവം യഥാർത്ഥ​ത്തിൽ നമ്മെ സംബന്ധി​ച്ചു കരുതു​ന്നു​വോ? എന്ന ലഘുപ​ത്രിക പ്രകാ​ശനം ചെയ്‌ത​പ്പോൾ ഞങ്ങൾ എത്ര ഉത്തേജി​ത​രാ​യെ​ന്നോ. അതു ഞങ്ങളുടെ പ്രാർഥ​ന​കൾക്കുള്ള ഒരു ഉത്തരമാ​യി​രു​ന്നു.”

സാക്ഷി​ക​ള​ല്ലാ​ത്ത അനേകർ വാച്ച്‌ ടവർ പ്രസി​ദ്ധീ​ക​ര​ണ​ങ്ങളെ വിലമ​തി​ക്കാ​നി​ട​യാ​യി​രി​ക്കു​ന്നു. 1992 ജൂ​ലൈ​യിൽ, താൻ ക്ലാസ്സ്‌ ലെക്‌ച​റി​നു തയ്യാറാ​കാൻ ഉപയോ​ഗി​ക്കുന്ന ഈ പ്രസി​ദ്ധീ​ക​ര​ണ​ങ്ങ​ളോ​ടുള്ള തന്റെ “ഏററവും ഉന്നതമായ ബഹുമാ​ന​വും ഊഷ്‌മ​ള​മായ നന്ദിയും” പ്രകട​മാ​ക്കു​ന്ന​തി​നു സാമൂ​ഹിക വിദ്യാ​ഭ്യാ​സ​ത്തിൽ ലെക്‌ചറർ ആയ ഒരു സ്‌ത്രീ കത്തെഴു​തി. 1992 ജനുവ​രി​യിൽ റോസ്‌റേ​റാ​ക്കി​ലെ ഒരു സ്‌ത്രീ നിങ്ങൾക്കു ഭൂമി​യി​ലെ പരദീ​സ​യിൽ എന്നേക്കും ജീവി​ക്കാൻ കഴിയും എന്ന പുസ്‌ത​ക​ത്തി​ന്റെ ഒരു പ്രതി തന്റെ വീട്ടിൽ വന്ന രണ്ടു സാക്ഷി​ക​ളിൽനി​ന്നു വാങ്ങി. അവർ ജർമനി​യി​ലെ ബ്രാഞ്ച്‌ ഓഫീ​സി​ലേ​ക്കെ​ഴു​തി: “ഞാൻ ലൂഥറൻ സഭയിൽ പെട്ടവ​ളാണ്‌. യഹോ​വ​യു​ടെ സാക്ഷി​ക​ളു​ടെ സ്ഥാപന​ത്തി​ന്റെ പ്രവർത്ത​ന​ങ്ങ​ളോട്‌ എനിക്ക്‌ ഏററവും ഉന്നതമായ ബഹുമാ​ന​മാ​ണു​ള്ളത്‌. ദൈവ​ത്തി​ന്റെ മാർഗ​നിർദേ​ശ​മി​ല്ലാ​തെ മനുഷ്യ​നു മേലാൽ ജീവി​ക്കാൻ കഴിയില്ല എന്ന്‌ അവർ തീർത്തു പറയുന്നു.”

ക്രൈ​സ്‌ത​വ​ലോ​ക​ത്തി​ലെ സഭകൾ തങ്ങളുടെ സഭാം​ഗ​ങ്ങൾക്ക്‌ എത്രമാ​ത്രം ആത്മീയ മാർഗ​നിർദേ​ശ​മാ​ണു നൽകി​യി​രി​ക്കു​ന്നത്‌? ലൂഥറൻ സഭ “കുറച്ചു കാല​ത്തേക്കു സമാധാന വിപ്ലവ​ത്തി​ന്റെ മാതാവ്‌ എന്ന കീർത്തി ആസ്വദി​ച്ചി​രു​ന്നെ​ങ്കി​ലും അതിന്റെ ജനസമ്മതി കുത്തനെ താണു​പോ​കു​ന്ന​താ​യി​ട്ടാ​ണു കാണു​ന്നത്‌” എന്ന്‌ 1991 ഡിസം​ബ​റിൽ ഡീ സൈററ്‌ എന്ന പ്രശസ്‌ത പത്രം അഭി​പ്രാ​യ​പ്പെ​ടു​ക​യു​ണ്ടാ​യി. വാസ്‌ത​വ​ത്തിൽ ലൂഥറൻ സഭയുടെ ഒരു പ്രതി​നി​ധി ഇങ്ങനെ വിലപി​ക്കു​ക​യു​ണ്ടാ​യി: “സ്വതന്ത്ര-കമ്പോള വ്യവസ്ഥി​തി​യി​ലെ ജീവി​തത്തെ ആളുകൾ പറുദീ​സ​യാ​ണെന്നു തെററി​ദ്ധ​രി​ച്ചു.” മാഗ്‌ഡി​ബേർഗി​ലുള്ള ഒരു സഭാംഗം ചില വിവരങ്ങൾ അന്വേ​ഷി​ച്ചു​കൊണ്ട്‌ എഴുതി. എന്തിന്‌? “ശങ്കാലു​വാ​യി ഞാൻ വർഷങ്ങൾ ചിരിച്ചു തള്ളിയിട്ട്‌, ഇപ്പോൾ ഈ ലോകം അതിന്റെ അന്ത്യനാ​ളു​ക​ളി​ലാ​ണെ​ന്നും അനതി​വി​ദൂ​ര​ഭാ​വി​യിൽ നാം വൻ പ്രശ്‌ന​ങ്ങളെ അഭിമു​ഖീ​ക​രി​ക്കു​മെ​ന്നും എനിക്കു നല്ല ബോധ്യ​മാ​യി​രി​ക്കു​ന്നു” എന്ന്‌ ആ മാന്യ​ദേഹം എഴുതു​ക​യു​ണ്ടാ​യി.—2 തിമൊ​ഥെ​യൊസ്‌ 3:1-5.

വികസ​ന​ത്തി​നുള്ള നിർമാ​ണം

വെണ്ടെ​യ്‌ക്കു മുമ്പു ജി.ഡി.ആറിൽ രാജ്യ​ഹാ​ളു​കൾ അനുവ​ദി​ച്ചി​രു​ന്നില്ല. ഇപ്പോൾ അവ അടിയ​ന്തി​ര​മാ​യി വേണം; അവ പണിയു​ന്ന​തി​നാണ്‌ ഇപ്പോൾ മുൻഗണന. ഇതാണു സത്യാ​രാ​ധ​ന​യി​ലെ ശ്രദ്ധേ​യ​മായ വ്യതി​യാ​നം സംഭവിച്ച മറെറാ​രു ഘടകം. ഈ വ്യതി​യാ​നം എത്ര ത്വരി​ത​ഗ​തി​യി​ലാ​ണെന്ന്‌ ഒരു സഹോ​ദ​രന്റെ അനുഭവം ചിത്രീ​ക​രി​ക്കു​ന്നു.

1990 മാർച്ചിൽ, ജി.ഡി.ആറിൽ യഹോ​വ​യു​ടെ സാക്ഷി​കൾക്ക്‌ അംഗീ​കാ​രം ലഭിച്ച്‌ വെറും മണിക്കൂ​റു​കൾക്കകം ഒരു കൂട്ടം സാക്ഷി​കളെ അഭിസം​ബോ​ധന ചെയ്യാൻ ഒരു സഹോ​ദ​രനെ ക്ഷണിച്ചു. അദ്ദേഹം ജീവി​ത​ത്തി​ലാ​ദ്യ​മാ​യാണ്‌ അന്നു മൈക്കി​ലൂ​ടെ പ്രസം​ഗി​ച്ചത്‌. രണ്ടര വർഷത്തി​നു​ശേഷം അദ്ദേഹം സഹവസി​ക്കുന്ന സഭ ഒരു പുതു​പു​ത്തൻ രാജ്യ​ഹാ​ളി​ന്റെ സമർപ്പണം നടത്തി. 1992 അവസാ​ന​ത്തോ​ടെ 16 സഭകൾക്കാ​യി ഏഴു രാജ്യ​ഹാ​ളു​കൾ പണിക​ഴി​പ്പി​ക്ക​പ്പെട്ടു. എന്നാലി​പ്പോൾ മറെറാ​രു 30 എണ്ണവും അതോ​ടൊ​പ്പം ഒരു ആകർഷ​ക​മായ സമ്മേള​ന​ഹാ​ളും ആസൂ​ത്ര​ണ​ഘ​ട്ട​ത്തി​ലാണ്‌.

ദൈവ​രാ​ജ്യ​ത്തിൽ കണ്ണുന​ട്ടി​രി​ക്കു​ന്നു

“വെണ്ടെ​യ്‌ക്കു തൊട്ടു​പി​ന്നാ​ലെ അനേകർ ബൈബിൾ തിരസ്‌ക​രി​ച്ചു. അന്തിമ​മാ​യി മെച്ചപ്പെട്ട അവസ്ഥകൾ വാഗ്‌ദാ​നം ചെയ്‌ത പുതിയ ഗവൺമെൻറിൽ അവർ ആശ വെച്ചു” എന്ന്‌ ഒരു ക്രിസ്‌തീയ മൂപ്പൻ പറഞ്ഞു. അവരുടെ ആശ നിറ​വേ​റി​യോ? “രണ്ടു വർഷത്തി​നു​ള്ളിൽ അവർ തങ്ങളുടെ മനസ്സു മാററി. മാനുഷ ഗവൺമെൻറു​കൾക്കു നീതി​യും സമാധാ​ന​വും ഒരിക്ക​ലും കൊണ്ടു​വ​രാൻ കഴിയി​ല്ലെന്ന്‌ അവർ ഇപ്പോൾ ഞങ്ങളോ​ടു സമ്മതി​ക്കു​ന്നു.”

ജി.ഡി.ആറിലെ കർക്കശ​മായ സോഷ്യ​ലി​സം മൺമറ​ഞ്ഞു​പോ​യ​പ്പോൾ പാശ്ചാത്യ തത്ത്വസം​ഹി​ത​യു​ടെ സുവർണ​യു​ഗം എന്നു തങ്ങൾ കരുതി​യ​തി​നു സ്വാഗ​ത​മ​രു​ളി​ക്കൊ​ണ്ടു ജനങ്ങൾ ആഹ്ലാദി​ച്ചു. എന്നാൽ അവർ നിരാ​ശ​രാ​യി. ഏതു ഗവൺമെൻറ്‌ അധികാ​ര​ത്തി​ലി​രു​ന്നാ​ലും യഹോ​വ​യു​ടെ സാക്ഷികൾ തങ്ങളുടെ കണ്ണു ലഘുവാ​ക്കി, സ്വർഗ​ങ്ങ​ളിൽ ഒരു നക്ഷത്രം​പോ​ലെ ശോഭി​ക്കുന്ന ദൈവ​രാ​ജ്യ​ത്തിൽ ഉറപ്പോ​ടെ ദൃഷ്ടി കേന്ദ്രീ​ക​രി​ച്ചു​നിർത്തു​ന്നു. അത്തരം പ്രത്യാശ ഒരിക്ക​ലും നിരാ​ശ​യി​ലേക്കു നയിക്കില്ല.—റോമർ 5:5.

[അടിക്കു​റിപ്പ്‌]

[26-ാം പേജിലെ ചിത്രം]

ജർമനിയിലെ സാക്ഷികൾ രാജ്യ പ്രവർത്ത​ന​ത്തിൽ അധിക​മ​ധി​കം ഉൾപ്പെ​ടാൻ തങ്ങളുടെ സ്വാത​ന്ത്ര്യം ഉപയോ​ഗി​ക്കു​ന്നു