വാഗ്‌ദത്ത ദേശത്തു​നി​ന്നുള്ള രംഗങ്ങൾ

വന്ധ്യ​മെ​ങ്കി​ലും അത്യാ​കർഷ​ക​മായ യഹൂദാ മരുഭൂ​മി

നിങ്ങളു​ടെ സങ്കൽപ്പ​ത്തി​ലുള്ള വാഗ്‌ദത്ത നാട്ടിലെ യഹൂദാ​മ​രു​ഭൂ​മി ഏതു വിധമാ​യി​രി​ക്കും? വിശാ​ല​മായ ഒരു നിബിഡ വനത്തെ​ക്കു​റി​ച്ചു ചിലർ ചിന്തി​ക്കു​ന്നു. സഹാറാ മരുഭൂ​മി​പോ​ലെ അനന്തമായ ഒരു മണൽപ്പ​രപ്പ്‌ മററു ചിലർ ഭാവന​യിൽ കാണുന്നു.

രണ്ടു രൂപകൽപ്പ​ന​ക​ളും മുകളിൽ ചേർത്തി​രി​ക്കുന്ന ചിത്ര​ത്തിൽ നിങ്ങൾ കാണു​ന്ന​തു​പോ​ലെ ഈ മരുഭൂ​മിക്ക്‌ ചേരു​ന്നില്ല. ഈ ദൃശ്യ​ത്തിൽ നിങ്ങൾ കാണു​ന്നത്‌ യേശു​വി​നോട്‌ ബന്ധപ്പെട്ട മരുഭൂ​മി​യു​ടെ ഒരു ഭാഗമാണ്‌. സാത്താൻ യേശു​വി​നെ “ലോക​ത്തി​ലുള്ള സകല രാജ്യ​ങ്ങ​ളും” കാണി​ച്ചത്‌ ഈ മലമു​ക​ളിൽ നിന്നാ​ണെന്നു വിശ്വ​സി​ക്ക​പ്പെ​ടു​ന്നു. മരുഭൂ​മി​യു​ടെ ഒരററത്തു സ്ഥിതി​ചെ​യ്യുന്ന ഈ മല കിഴക്കു യോർദ്ദാൻ താഴ്‌വ​ര​യിൽ ഈന്തപ്പ​ന​ക​ളാൽ നിബി​ഡ​മായ യരീഹോ പട്ടണത്തെ അഭിമു​ഖീ​ക​രി​ച്ചു നില​കൊ​ള്ളു​ന്നു.—മത്തായി 3:1; 4:1-11.

ഈ ഉത്തരപൂർവ്വ ഭാഗത്തു നിന്ന്‌ യഹൂദാ മരുഭൂ​മി ചാവു​ക​ട​ലി​ന്റെ പശ്ചിമ​ഭാ​ഗ​ത്തേക്ക്‌ വ്യാപി​ച്ചു കിടക്കു​ന്നു. യഹോ​വ​യു​ടെ സാക്ഷി​ക​ളു​ടെ 1989ലെ കലണ്ടറി​ന്റെ കവർ മാപ്പ്‌ വീക്ഷി​ച്ചാൽ ഈ പ്രദേ​ശ​ത്തി​ന്റെ ചിത്രം നിങ്ങൾക്കു കാണാം. (മുകളിൽ ചേർത്തി​രി​ക്കുന്ന ചിത്ര​ത്തി​ന്റെ ഒരു വലിയ പതിപ്പും കലണ്ടറി​ലുണ്ട്‌) യഹൂദ്യ മലകളു​ടെ കിഴക്കേ ചരിവിൽ ചാവു​ക​ല​ടി​ന്റെ തീരങ്ങൾ വരെ പത്തു മുതൽ പതിനഞ്ചു മൈൽവരെ വീതി​യിൽ മരുഭൂ​മി സ്ഥിതി​ചെ​യ്യു​ന്നു.

മെഡി​റ​റ​റേ​നി​യൻ കടലിൽ നിന്നു വരുന്ന നീരാ​വി​യിൽ അധിക​വും ഈ മലകൾ തടഞ്ഞു നിർത്തു​ന്നു. അതിനാൽ കടുപ്പ​മി​ല്ലാത്ത ചുണ്ണാമ്പു കല്ലു നിറഞ്ഞ പൂർവ്വ​ഭാ​ഗത്തെ ശൂന്യ​മായ മലകളിൽ നവമ്പർ ഡിസംബർ എന്നീ ശീതകാല മാസങ്ങ​ളി​ലൊ​ഴിച്ച്‌ മഴ ലഭിക്കു​ന്നില്ല. മഴ കിട്ടു​മ്പോൾ പുല്ല്‌ മുളച്ചു വരിക​യും ആട്ടിൻ പററങ്ങൾ ഇവിടെ മേയു​ക​യും ചെയ്യുന്നു. ഇങ്ങനെ 1 ശമുവേൽ 24:3ൽ പരാമർശി​ച്ചി​രി​ക്കുന്ന “പാറക​ളി​ലെ ആട്ടിൻ തൊഴുത്ത്‌” ഈ പ്രദേ​ശ​ത്തി​നു സമുചി​ത​മാ​യി ചേരുന്നു.

ഇവിടെ വളരുന്ന പുല്ല്‌ ഏറെനാൾ നിലനിൽക്കു​ന്നില്ല. മരുഭൂ​മി​യിൽ നിന്നടി​ക്കുന്ന കിഴക്കൻകാ​ററ്‌ ഹരിത​വർണ്ണം പെട്ടെന്നു വരണ്ട തവിട്ടു നിറമാ​ക്കി മാററു​ന്നു. പ്രവാചക പരാമർശം ഇത്‌ എത്ര നന്നായി ചിത്രീ​ക​രി​ക്കു​ന്നു: “പച്ചപ്പുല്ല്‌ ഉണങ്ങുന്നു; പൂ വാടുന്നു; നമ്മുടെ ദൈവ​ത്തി​ന്റെ വചനമോ അത്‌ അനിശ്ചി​ത​കാ​ലം നിലനിൽക്കു​ന്നു.”—യെശയ്യാവ്‌ 40:8; 1 പത്രോസ്‌ 1:24, 25.

നാൽപ്പതു രാവും നാൽപ്പതു പകലും ഈ മരുഭൂ​മി​യി​ലൂ​ടെ അലഞ്ഞു നടന്ന​പ്പോൾ യേശു ഈ തിരു​വെ​ഴുത്ത്‌ അനുസ്‌മ​രി​ച്ചി​രി​ക്കണം. വൃക്ഷ രഹിത​മായ പാറക​ളി​ലും പിളർപ്പു​ക​ളി​ലും ആഞ്ഞടി​ക്കുന്ന ചുട്ടു​പൊ​ള്ളുന്ന വെയി​ലിൽ യേശു​വിന്‌ എങ്ങനെ അനുഭ​വ​പ്പെ​ട്ടി​രി​ക്കു​മെന്ന്‌ പരിചി​ന്തി​ക്കുക. (യെശയ്യാവ്‌ 32:2) പിന്നീട്‌ “ദൂതൻമാർ അടുത്തു വന്നു അവനെ ശുശ്രൂ​ഷി​ക്കാൻ തുടങ്ങി” എന്നത്‌ എത്ര അനു​യോ​ജ്യ​മാ​യി​രു​ന്നു!—മത്തായി 4:1-11.

യഹൂദ്യ മരുഭൂ​മി​യു​ടെ ഊഷരത നിമി​ത്ത​വും നിവാ​സി​ക​ളു​ടെ അഭാവം നിമി​ത്ത​വും ഇത്‌ പലപ്പോ​ഴും ഒരു അഭയസ്ഥാ​ന​മാ​യി ഉപകരി​ച്ചു. ക്രുദ്ധ​നായ ശൗൽ രാജാ​വിൽ നിന്നു പലായനം ചെയ്‌ത​പ്പോൾ ദാവീദ്‌ ഇവിടെ സംരക്ഷണം കണ്ടെത്തി. “വെള്ളമി​ല്ലാ​തെ ഉണങ്ങി​വരണ്ട ദേശ”മായി അവൻ അതിനെ വിവരി​ച്ചു. (സങ്കീർത്തനം 63:1ഉം മേലെ​ഴു​ത്തും; 1 ശമുവേൽ 23:29) കുറേ സമയ​ത്തേക്ക്‌ അവൻ ഒരു ഗുഹയിൽ ഒളിച്ചി​രു​ന്നു. വാദി ഖരേത്തൂ​ണി​ലുള്ള (ബേത്‌ല​ഹേ​മി​നു കിഴക്കു ഭാഗത്തു​നി​ന്നു ചാവു​ക​ട​ലി​ന്റെ ദിശയിൽ നീണ്ടു കിടക്കുന്ന ഒരു താഴ്‌വര) ഉം ക്വത്താഫാ ഗുഹ​പോ​ലെ ഒരു ഗുഹയാ​യി​രി​ക്കാം ഇത്‌. (എബ്രായർ 11:32, 38) ഗുഹയിൽ നിന്നുള്ള ഈ ദൃശ്യ​ത്തിൽ വലതു​വ​ശത്ത്‌ താഴെ​യാ​യി അങ്ങിങ്ങാ​യുള്ള പച്ചിലകൾ തേടി ചില കറുത്ത ആടുകൾ നടക്കു​ന്നത്‌ നിങ്ങൾക്കു കാണാം.

എൻ-ഗെദി എന്ന പ്രദേ​ശത്തെ ഒരു ഗുഹക്കു​ള്ളിൽ ദാവീദ്‌ ഇരിക്കു​മ്പോ​ഴാ​യി​രു​ന്നു ശൗൽ വിസർജ്ജ​ന​ത്തി​നാ​യി അതിനു​ള്ളിൽ കടന്നത്‌. ശൗലിന്റെ അങ്കിയു​ടെ വിളുമ്പ്‌ ദാവീദ്‌ മുറി​ച്ചെ​ടു​ത്തു​വെ​ങ്കി​ലും അവൻ “യഹോ​വ​യു​ടെ അഭിഷി​ക്തനെ” ഉപദ്ര​വി​ച്ചില്ല. പിന്നീട്‌ ദാവീദ്‌ ശൗലിനെ വിളി​ച്ചത്‌ രാജാവ്‌ ഗുഹക്കു​പു​റത്ത്‌ സമൃദ്ധ​മായ ഇലച്ചാർത്തി​നി​ട​യിൽ എത്തിയ​പ്പോ​ഴാ​യി​രു​ന്നി​രി​ക്കാം. (1 ശമുവേൽ 24:1-22) ‘ഇവിടെ സമൃദ്ധ​മായ ഇലച്ചാർത്തോ?’ എന്നു നിങ്ങൾ അതിശ​യി​ച്ചേ​ക്കാം.

ഉവ്വ്‌, ആവശ്യ​ത്തി​നു വെള്ളമു​ള്ള​പ്പോൾ ഈ മരുഭൂ​മി​യും പുഷ്‌പി​ക്കും. എൻ-ഗെദി ഒരു ഉദാഹ​ര​ണ​മാണ്‌. സുഷി​രി​ത​മായ പാറക​ളി​ലൂ​ടെ ഊറി​യി​റ​ങ്ങുന്ന ജലം ചാവു​ക​ട​ലി​ന്റെ പശ്ചിമ തീര​ത്തേക്കു തുറക്കുന്ന ഈ താഴ്‌വ​ര​യിൽ നീരു​റ​വു​ക​ളാ​യും ജലപാ​ത​ങ്ങ​ളാ​യും പ്രത്യ​ക്ഷ​മാ​കു​ന്നു. ഇത്‌ എൻ-ഗെദിയെ സസ്യജാ​ല​നി​ബി​ഡ​മായ ഒരു അസ്സൽ വനമാ​ക്കി​ത്തീർക്കു​ന്നു. ഇവിടം സന്ദർശി​ക്കു​മ്പോൾ അനേക​തരം പുഷ്‌പ​ങ്ങ​ളും പഴങ്ങളും കാണാൻ കഴിയും. കുഴി​മു​യ​ലു​കൾ മുതൽ കാട്ടാ​ടു​കൾ വരെ നാനാ​തരം ജന്തുവർഗ്ഗ​വും നിങ്ങൾക്കു കാണാൻ കഴിയും; പുള്ളി​പ്പു​ലി​കൾ പോലും ഈ പ്രദേ​ശ​ത്തുണ്ട്‌!—1 ശമുവേൽ 24:2; ശലോ​മോ​ന്റെ ഗീതം 1:14.

ഊഷര​മാ​യ യഹൂദാ മരുഭൂ​മിക്ക്‌ ഇത്ര​യേറെ പച്ചയണി​യാൻ കഴിയു​മെ​ന്നു​ള്ളത്‌ യരൂശ​ലേം ദേവാ​ല​യ​ത്തിൽ നിന്നു ജലം നിർഗ്ഗ​മി​ക്കു​ന്ന​താ​യുള്ള യെഹസ്‌ക്കേ​ലി​ന്റെ ദർശനം നന്നായി മനസ്സി​ലാ​ക്കാൻ നമ്മെ സഹായി​ക്കു​ന്നു. യഹൂദാ മരുഭൂ​മി​യി​ലൂ​ടെ കിഴ​ക്കോ​ട്ടൊ​ഴു​കുന്ന ഒരു നദിയാ​യി​ത്തീ​രു​ന്ന​തു​വരെ പ്രവാഹം വർദ്ധിച്ചു. ഫലമെ​ന്താ​യി​രു​ന്നു? യെഹെ​സ്‌ക്കേൽ എഴുതി: “നോക്കൂ! നദീ തീരത്ത്‌ എല്ലാത്തരം വൃക്ഷങ്ങ​ളും വളരുന്നു . . . അവയുടെ ഫലം ഭക്ഷണത്തി​നും ഇലകൾ രോഗ​ശ​മ​ന​ത്തി​നും ഉപകരി​ക്കു​ന്നു.” നിർജ്ജീ​വ​മായ ചാവു​ക​ട​ലി​നെ​പ്പോ​ലും ഭേദ​പ്പെ​ടു​ത്തി​ക്കൊണ്ട്‌ വെള്ളം അതി​ലേക്ക്‌ ഒഴുകി.—യെഹെ​സ്‌ക്കേൽ 47:1-12; യെശയ്യാവ്‌ 35:1, 6, 7.

അതു​കൊണ്ട്‌ യഹൂദാ മരുഭൂ​മി അർദ്ധ ഊഷര​വും ശൂന്യ​വു​മാ​ണെ​ങ്കി​ലും അനേകം ബൈബിൾ വിവര​ണ​ങ്ങ​ളിൽ സ്ഥാനം പിടി​ച്ചി​ട്ടുള്ള അന്തരങ്ങ​ളു​ടെ ഒരു മനോഹര ദേശവും കൂടെ​യാണ്‌ അത്‌.—ലൂക്കോസ്‌ 10:29-37. (w89 11/1)

[10-ാം പേജിലെ ചിത്ര​ത്തിന്‌ കടപ്പാട്‌]

Pictorial Archive (Near Eastern History) Est.

[11-ാം പേജിലെ ചിത്ര​ത്തിന്‌ കടപ്പാട്‌]

Pictorial Archive (Near Eastern History) Est.