അധ്യായം 6
സംഹരിക്കുന്നതിനുള്ള ശക്തി—“യഹോവ യുദ്ധവീരൻ”
1-3. (എ) ഈജിപ്തുകാരിൽനിന്ന് ഇസ്രായേല്യർ ഏതു ഭീഷണി അഭിമുഖീകരിച്ചു? (ബി) യഹോവ തന്റെ ജനത്തിനുവേണ്ടി എങ്ങനെ യുദ്ധം ചെയ്തു?
ദുർഘടമായ പർവതനിരകൾക്കും സമുദ്രത്തിനും ഇടയിൽ ഇസ്രായേല്യർ കുടുങ്ങിപ്പോയി. നിഷ്ഠുരരായ ഈജിപ്ഷ്യൻ സൈന്യം ഇസ്രായേല്യരെ സംഹരിക്കാനുള്ള ദൃഢനിശ്ചയത്തോടെ പാഞ്ഞടുക്കുകയായിരുന്നു.a എന്നാൽ, പ്രത്യാശ കൈവിടാതിരിക്കാൻ മോശ ദൈവജനത്തെ പ്രോത്സാഹിപ്പിച്ചു. “യഹോവതന്നെ നിങ്ങൾക്കുവേണ്ടി പോരാടും,” മോശ അവർക്ക് ഉറപ്പുകൊടുത്തു.—പുറപ്പാട് 14:14.
2 എന്നിട്ടും, മോശ യഹോവയോട് ഉറക്കെ നിലവിളിച്ചതായി കാണാൻ കഴിയുന്നു. അപ്പോൾ ദൈവം പ്രതിവചിച്ചു: “നീ എന്തിനാണ് എന്നെ വിളിച്ച് ഇങ്ങനെ കരയുന്നത്? . . . നീ നിന്റെ വടി കടലിനു മീതെ നീട്ടി അതിനെ വിഭജിക്കുക.” (പുറപ്പാട് 14:15, 16) സംഭവങ്ങൾ ചുരുളഴിയുന്നതു ഭാവനയിൽ കാണുക. യഹോവ സത്വരം തന്റെ ദൂതനോടു കൽപ്പിക്കുന്നു, മേഘസ്തംഭം ഇസ്രായേല്യരുടെ പിൻഭാഗത്തേക്കു നീങ്ങുന്നു, ഒരുപക്ഷേ ഒരു മതിൽപോലെ വർത്തിച്ചുകൊണ്ടും അങ്ങനെ, ഈജിപ്ഷ്യൻ ആക്രമണനിരയെ തടഞ്ഞുകൊണ്ടും തന്നെ. (പുറപ്പാട് 14:19, 20; സങ്കീർത്തനം 105:39) മോശ തന്റെ കൈ നീട്ടുന്നു. ശക്തമായ ഒരു കാറ്റടിച്ച് കടൽവെള്ളം ഇരുവശങ്ങളിലേക്കു മാറുന്നു. വെള്ളം മതിൽക്കെട്ടുകൾപോലെ നിലകൊള്ളുന്നു, മുഴുജനതയ്ക്കും കടന്നുപോകാവുന്നത്ര വിസ്തൃതിയിൽ ഒരു പാത കാണായ്വരുന്നു!—പുറപ്പാട് 14:21; 15:8.
3 ഈ ശക്തിപ്രദർശനം നേരിൽ കണ്ട ഫറവോൻ തന്റെ സൈന്യങ്ങളോടു പിന്മാറാൻ ആജ്ഞാപിക്കണമായിരുന്നു. എന്നാൽ, അഹങ്കാരിയായ ഫറവോൻ ഒരു ആക്രമണത്തിന് ആജ്ഞ നൽകുകയാണു ചെയ്തത്. (പുറപ്പാട് 14:23) ഈജിപ്തുകാർ അവരുടെ പിന്നാലെ കടൽത്തട്ടിലേക്കു പാഞ്ഞുചെല്ലുന്നു. എന്നാൽ തങ്ങളുടെ രഥചക്രങ്ങൾ ഊരിപ്പോകാൻ തുടങ്ങിയതോടെ അവർ ആകെ പരിഭ്രാന്തരാകുന്നു. ഇസ്രായേല്യർ സുരക്ഷിതരായി മറുകരയിൽ എത്തിയപ്പോൾ യഹോവ മോശയോടു കല്പിക്കുന്നു: “വെള്ളം തിരികെ ഈജിപ്തുകാരുടെയും അവരുടെ യുദ്ധരഥങ്ങളുടെയും അവരുടെ കുതിരപ്പടയാളികളുടെയും മേൽ വരാൻ നിന്റെ കൈ കടലിനു മീതെ നീട്ടുക.” മോശ അപ്രകാരം ചെയ്യവേ ജലമതിലുകൾ തകർന്നുവീഴുന്നു, ഫറവോനെയും അയാളുടെ സൈന്യങ്ങളെയും മുക്കിക്കളയുന്നു!—പുറപ്പാട് 14:24-28; സങ്കീർത്തനം 136:15.
4. (എ) യഹോവ ചെങ്കടലിങ്കൽ ആരാണെന്നു തെളിഞ്ഞു? (ബി) യഹോവയെക്കുറിച്ചുള്ള ഈ വർണനയോട് ചിലർ എങ്ങനെ പ്രതികരിച്ചേക്കാം?
4 ചെങ്കടലിങ്കലെ ഇസ്രായേൽ ജനതയുടെ വിടുതൽ മനുഷ്യവർഗവുമായുള്ള ദൈവത്തിന്റെ ഇടപെടലുകളുടെ ചരിത്രത്തിലെ ഒരു സുപ്രധാന സംഭവമായിരുന്നു. അവിടെ യഹോവ തന്നെത്തന്നെ ഒരു “യുദ്ധവീരൻ” എന്നു തെളിയിച്ചു. (പുറപ്പാട് 15:3) എന്നാൽ യഹോവയെ ഇപ്രകാരം വർണിച്ചിരിക്കുന്നതിനോടു നിങ്ങൾ എങ്ങനെയാണു പ്രതികരിക്കുന്നത്? യുദ്ധം മനുഷ്യവർഗത്തിനു വളരെയധികം വേദനയും ദുരിതവും വരുത്തിയിട്ടുണ്ടെന്നു സമ്മതിക്കുന്നു. അതുകൊണ്ട്, ദൈവത്തിന്റെ സംഹാരശക്തിയുടെ ഉപയോഗം ദൈവത്തോട് അടുത്ത് ചെല്ലാൻ പ്രചോദിപ്പിക്കുന്ന ഒരു ഘടകമായിരിക്കുന്നതിനു പകരം ഏറെയും അതിൽനിന്ന് തടയുന്ന ഒന്നായിട്ടാണോ നിങ്ങൾക്കു തോന്നുന്നത്?
ചെങ്കടലിങ്കൽ, യഹോവ തന്നെത്തന്നെ ഒരു “യുദ്ധവീരൻ” എന്നു തെളിയിച്ചു
ദിവ്യയുദ്ധം മാനുഷ പോരാട്ടങ്ങളിൽനിന്ന് വ്യത്യസ്തം
5, 6. (എ) ദൈവം ഉചിതമായി ‘സൈന്യങ്ങളുടെ അധിപനായ യഹോവ’ എന്നു വിളിക്കപ്പെടുന്നത് എന്തുകൊണ്ട്? (ബി) ദിവ്യയുദ്ധം മാനുഷ യുദ്ധത്തിൽനിന്ന് വ്യത്യസ്തമായിരിക്കുന്നത് എങ്ങനെ?
5 ബൈബിളിന്റെ മൂലപാഠത്തിൽ, എബ്രായ തിരുവെഴുത്തുകളിൽ ഏതാണ്ട് 260 പ്രാവശ്യവും ക്രിസ്തീയ ഗ്രീക്കു തിരുവെഴുത്തുകളിൽ രണ്ടു പ്രാവശ്യവും ദൈവത്തിനു ‘സൈന്യങ്ങളുടെ അധിപനായ യഹോവ’ എന്ന് അർഥമുള്ള സ്ഥാനപ്പേരുകൾ നൽകിയിരിക്കുന്നു. (1 ശമുവേൽ 1:11) പരമാധികാരിയായ ഭരണാധിപൻ എന്ന നിലയിൽ യഹോവ ഒരു വലിയ ദൂതസൈന്യത്തെ നയിക്കുന്നു. (യോശുവ 5:13-15; 1 രാജാക്കന്മാർ 22:19) ഈ സൈന്യത്തിന്റെ സംഹാരശക്തി ഭയാവഹമാണ്. (യശയ്യ 37:36) മനുഷ്യർ നടത്തുന്ന നശീകരണത്തെക്കുറിച്ച് ചിന്തിക്കുന്നത് സുഖപ്രദമായ ഒരു സംഗതിയല്ല. എന്നിരുന്നാലും, അപ്രധാനമായ മാനുഷ പോരാട്ടങ്ങൾ പോലെയല്ല ദൈവത്തിന്റെ യുദ്ധങ്ങൾ എന്നു നാം ഓർക്കണം. സൈനിക നേതാക്കളും രാഷ്ട്രീയ നേതാക്കളും തങ്ങളുടെ ആക്രമണത്തിനു ശ്രേഷ്ഠമായ ഉദ്ദേശ്യങ്ങൾ ഉണ്ടെന്നു വരുത്തിത്തീർക്കാൻ ശ്രമിച്ചേക്കാം. എന്നാൽ മാനുഷ യുദ്ധത്തിൽ എല്ലായ്പോഴും അത്യാഗ്രഹവും സ്വാർഥതയുമാണ് ഉൾപ്പെട്ടിരിക്കുന്നത്.
6 ഇതിനു വിപരീതമായി, യഹോവ അന്ധമായ വികാരത്താൽ നയിക്കപ്പെടുന്നില്ല. ആവർത്തനം 32:4 ഇങ്ങനെ പ്രഖ്യാപിക്കുന്നു: “ദൈവം പാറ! ദൈവത്തിന്റെ പ്രവൃത്തികൾ അത്യുത്തമം, ദൈവത്തിന്റെ വഴികളെല്ലാം നീതിയുള്ളവ. ദൈവം വിശ്വസ്തൻ, അനീതിയില്ലാത്തവൻ; നീതിയും നേരും ഉള്ളവൻതന്നെ.” ദൈവവചനം കടിഞ്ഞാണില്ലാത്ത ക്രോധത്തെയും ക്രൂരതയെയും അക്രമത്തെയും കുറ്റംവിധിക്കുന്നു. (ഉൽപത്തി 49:7; സങ്കീർത്തനം 11:5) അതുകൊണ്ട് യഹോവ ഒരിക്കലും അന്യായമായി പ്രവർത്തിക്കുന്നില്ല. അപൂർവമായി മാത്രമേ യഹോവ തന്റെ സംഹാരശക്തി ഉപയോഗിക്കുന്നുള്ളൂ, അതും അവസാന മാർഗം എന്ന നിലയിൽ. പ്രവാചകനായ യഹസ്കേൽ മുഖാന്തരം യഹോവ പ്രസ്താവിച്ചതിനു ചേർച്ചയിലാണ് അത്: “‘ഒരു ദുഷ്ടൻ മരിക്കുമ്പോൾ ഞാൻ അൽപ്പമെങ്കിലും സന്തോഷിക്കുമെന്നു തോന്നുന്നുണ്ടോ’ എന്നു പരമാധികാരിയായ യഹോവ ചോദിക്കുന്നു. ‘അവൻ തന്റെ വഴികൾ വിട്ടുതിരിഞ്ഞ് ജീവിച്ചിരിക്കാനല്ലേ ഞാൻ ആഗ്രഹിക്കുന്നത്?’”—യഹസ്കേൽ 18:23.
7, 8. (എ) ഇയ്യോബ് തന്റെ ദുരിതങ്ങളെക്കുറിച്ച് തെറ്റായ എന്തു നിഗമനത്തിലെത്തി? (ബി) ഈ കാര്യത്തിലുള്ള ഇയ്യോബിന്റെ ചിന്തയെ എലീഹു തിരുത്തിയത് എങ്ങനെ? (സി) ഇയ്യോബിന്റെ അനുഭവത്തിൽനിന്ന് നമുക്ക് എന്തു പാഠം പഠിക്കാനാകും?
7 അപ്പോൾ, യഹോവ സംഹാരശക്തി ഉപയോഗിക്കുന്നത് എന്തുകൊണ്ട്? അതിന്റെ ഉത്തരത്തിലേക്കു വരുന്നതിനു മുമ്പ്, നമുക്ക് നീതിമാനായ ഇയ്യോബിനെക്കുറിച്ച് ചിന്തിക്കാം. ഇയ്യോബ്—ഫലത്തിൽ മനുഷ്യരിൽ ആരും—പരിശോധനയിൻ കീഴിൽ നിർമലത പാലിക്കില്ല എന്ന് സാത്താൻ വെല്ലുവിളിച്ചു. ഇയ്യോബിന്റെ നിർമലത പരീക്ഷിക്കാൻ സാത്താനെ അനുവദിച്ചുകൊണ്ട് യഹോവ ആ വെല്ലുവിളിക്ക് ഉത്തരം കൊടുത്തു. തത്ഫലമായി, ഇയ്യോബിന് രോഗം പിടിപെട്ടു, അദ്ദേഹത്തിന്റെ സമ്പത്ത് നഷ്ടമായി, മക്കൾ അപമൃത്യുവിന് ഇരകളായി. (ഇയ്യോബ് 1:1–2:8) ഉൾപ്പെട്ടിരുന്ന വിവാദവിഷയങ്ങൾ അറിയാതെ, ഇയ്യോബ് തന്റെ കഷ്ടപ്പാടു ദൈവത്തിൽനിന്നുള്ള അന്യായമായ ശിക്ഷയാണെന്നു തെറ്റായി നിഗമനം ചെയ്തു. ദൈവം തന്നെ ഒരു ‘ലക്ഷ്യമായി’ വെച്ചതും “ശത്രു” ആയി കരുതിയതും എന്തുകൊണ്ടാണെന്ന് ഇയ്യോബ് ദൈവത്തോടു ചോദിച്ചു.—ഇയ്യോബ് 7:20; 13:24.
8 എലീഹു എന്ന ഒരു യുവാവ് ഇയ്യോബിന്റെ ന്യായവാദത്തിലെ അപാകത തുറന്നുകാട്ടി. അദ്ദേഹം പറഞ്ഞു: “‘ഞാൻ ദൈവത്തെക്കാൾ നീതിമാനാണ്’ എന്നു പറയാൻമാത്രം സ്വന്തം ഭാഗം ശരിയാണെന്ന് ഇയ്യോബിന് അത്ര ഉറപ്പാണോ?” (ഇയ്യോബ് 35:2) അതെ, നമുക്കു ദൈവത്തെക്കാൾ മെച്ചമായി അറിയാമെന്നു ചിന്തിക്കുന്നത് അല്ലെങ്കിൽ ദൈവം അന്യായമായി പെരുമാറിയിരിക്കുന്നു എന്നു നിഗമനം ചെയ്യുന്നത് ബുദ്ധിശൂന്യമാണ്. “ദുഷ്ടത പ്രവർത്തിക്കുന്നതിനെക്കുറിച്ച് സത്യദൈവത്തിനു ചിന്തിക്കാനേ കഴിയില്ല; തെറ്റു ചെയ്യുന്നതിനെക്കുറിച്ച് സർവശക്തന് ആലോചിക്കാൻപോലും പറ്റില്ല,” എലീഹു പ്രസ്താവിച്ചു. പിന്നീട് അദ്ദേഹം പറഞ്ഞു: “സർവശക്തനെ മനസ്സിലാക്കാൻ നമുക്കാകില്ല; ദൈവത്തിന്റെ ശക്തി അപാരമാണ്, ദൈവം ഒരിക്കലും തന്റെ ന്യായവും നീതിയും ലംഘിക്കില്ല.” (ഇയ്യോബ് 34:10; 36:22, 23; 37:23) ദൈവം യുദ്ധം ചെയ്യുമ്പോൾ അങ്ങനെ ചെയ്യുന്നതിന് ദൈവത്തിനു നല്ല കാരണമുണ്ടെന്നു നമുക്ക് ഉറപ്പുണ്ടായിരിക്കാൻ കഴിയും. അതു മനസ്സിൽ പിടിച്ചുകൊണ്ട്, സമാധാനത്തിന്റെ ദൈവം ഒരു യോദ്ധാവായി മാറുന്നതിന്റെ ചില കാരണങ്ങൾ നമുക്കു പരിശോധിക്കാം.—1 കൊരിന്ത്യർ 14:33.
സമാധാനത്തിന്റെ ദൈവം യുദ്ധം ചെയ്യേണ്ടിവരുന്നതിന്റെ കാരണം
9. വിശുദ്ധിയുടെ ദൈവം യുദ്ധം ചെയ്യുന്നത് എന്തുകൊണ്ട്?
9 ദൈവത്തെ “യുദ്ധവീരൻ” എന്നു പ്രകീർത്തിച്ചശേഷം മോശ ഇങ്ങനെ പ്രഖ്യാപിച്ചു: “യഹോവേ, ദൈവങ്ങളിൽ അങ്ങയ്ക്കു തുല്യനായി ആരുണ്ട്? വിശുദ്ധിയിൽ അതിശ്രേഷ്ഠനായ അങ്ങയെപ്പോലെ ആരുണ്ട്?” (പുറപ്പാട് 15:11) സമാനമായി, പ്രവാചകനായ ഹബക്കൂക്ക് പറഞ്ഞു: “ദോഷത്തെ നോക്കാൻ അങ്ങയ്ക്കാകില്ല, അത്ര വിശുദ്ധമാണ് അങ്ങയുടെ കണ്ണുകൾ. ദുഷ്ടത അങ്ങയ്ക്ക് അസഹ്യമാണല്ലോ.” (ഹബക്കൂക്ക് 1:13) യഹോവ സ്നേഹത്തിന്റെ മാത്രമല്ല, വിശുദ്ധിയുടെയും നീതിയുടെയും ന്യായത്തിന്റെയും കൂടെ ദൈവമാണ്. ചില സമയങ്ങളിൽ അങ്ങനെയുള്ള ഗുണങ്ങൾ തന്റെ സംഹാരശക്തി ഉപയോഗിക്കാൻ യഹോവയെ നിർബന്ധിതനാക്കുന്നു. (യശയ്യ 59:15-19; ലൂക്കോസ് 18:7) അതുകൊണ്ട് യുദ്ധം ചെയ്യുമ്പോൾ ദൈവം തന്റെ വിശുദ്ധിയെ കളങ്കപ്പെടുത്തുന്നില്ല. പകരം, വിശുദ്ധൻ ആയതുകൊണ്ടാണ് ദൈവം യുദ്ധം ചെയ്യുന്നത്.—ലേവ്യ 19:2.
10. ഉൽപത്തി 3:15-ൽ മുൻകൂട്ടി പറഞ്ഞ ശത്രുത പരിഹരിക്കാനുള്ള ഏക മാർഗം എന്താണ്, അത്തരം നടപടി നീതിയുള്ള മനുഷ്യവർഗത്തിന് എന്തു പ്രയോജനങ്ങൾ കൈവരുത്തും?
10 ആദ്യ മനുഷ്യജോടിയായ ആദാമും ഹവ്വയും ദൈവത്തോടു മത്സരിച്ചശേഷം സംജാതമായ സാഹചര്യം പരിചിന്തിക്കുക. (ഉൽപത്തി 3:1-6) യഹോവ അവരുടെ അനീതിയെ അനുവദിച്ചിരുന്നെങ്കിൽ, അഖിലാണ്ഡ പരമാധികാരി എന്ന തന്റെ സ്വന്തം സ്ഥാനത്തെ യഹോവ ദുർബലപ്പെടുത്തുമായിരുന്നു. നീതിമാനായ ഒരു ദൈവം എന്ന നിലയിൽ അവരെ മരണത്തിനു വിധിക്കാൻ യഹോവ ബാധ്യസ്ഥനായിരുന്നു. (റോമർ 6:23) ബൈബിളിലെ ആദ്യത്തെ പ്രവചനത്തിൽ തന്റെ സ്വന്തം ദാസന്മാരും ‘പാമ്പ്’ എന്നു വിളിച്ചിരിക്കുന്ന സാത്താന്റെ അനുയായികളും തമ്മിൽ ശത്രുത നിലനിൽക്കുമെന്ന് ദൈവം മുൻകൂട്ടിപ്പറഞ്ഞു. (വെളിപാട് 12:9; ഉൽപത്തി 3:15) ആത്യന്തികമായി, സാത്താനെ തകർക്കുന്നതിലൂടെ മാത്രമേ ശത്രുത പരിഹരിക്കാൻ കഴിയുമായിരുന്നുള്ളൂ. (റോമർ 16:20) എന്നാൽ ആ ന്യായവിധി, നീതിയുള്ള മനുഷ്യവർഗത്തിനു വലിയ അനുഗ്രഹങ്ങൾ കൈവരുത്തും—അത് ഭൂമിയിൽനിന്ന് സാത്താന്റെ സ്വാധീനം നീക്കംചെയ്യുകയും ആഗോള പറുദീസയിലേക്കുള്ള വഴിതുറക്കുകയും ചെയ്യും. (മത്തായി 19:28) ആ സമയം വന്നെത്തുന്നതുവരെ, സാത്താന്റെ പക്ഷം ചേരുന്നവർ ദൈവജനത്തിന്റെ ശാരീരികവും ആത്മീയവുമായ ക്ഷേമത്തിന് ഒരു നിരന്തര ഭീഷണിയായിരിക്കും. ചിലപ്പോഴൊക്കെ യഹോവയ്ക്ക് ഇടപെടേണ്ടി വരും.
ദുഷ്ടത നീക്കാൻ ദൈവം പ്രവർത്തിക്കുന്നു
11. ഒരു ആഗോള ജലപ്രളയം വരുത്താൻ ദൈവത്തിനു ബാധ്യത തോന്നിയത് എന്തുകൊണ്ട്?
11 നോഹയുടെ നാളിലെ ജലപ്രളയം അത്തരം ഒരു ഇടപെടലായിരുന്നു. ഉൽപത്തി 6:11, 12 പറയുന്നു: “സത്യദൈവം നോക്കിയപ്പോൾ ഭൂമി ദുഷിച്ചിരിക്കുന്നതായി കണ്ടു; അത് അക്രമംകൊണ്ട് നിറഞ്ഞിരുന്നു. അതെ, ദൈവം ഭൂമിയെ നോക്കി, അത് അധഃപതിച്ചതായി കണ്ടു. ഭൂമിയിലെ ആളുകളുടെയെല്ലാം വഴികൾ ദുഷിച്ചതായിരുന്നു.” ഭൂമിയിൽ അവശേഷിച്ചിരുന്ന ധാർമികതയുടെ അവസാന കണികയും ഇല്ലാതാക്കാൻ ദൈവം ദുഷ്ടന്മാരെ അനുവദിക്കുമായിരുന്നോ? ഇല്ല. അക്രമവാസനയുള്ളവരെയും അസാന്മാർഗികളെയും ഉന്മൂലനം ചെയ്യാൻ താൻ ബാധ്യസ്ഥനാണെന്ന് യഹോവയ്ക്കു തോന്നി, അങ്ങനെ യഹോവ ഒരു ആഗോളപ്രളയം വരുത്തി.
12. (എ) അബ്രാഹാമിന്റെ ‘സന്തതിയെക്കുറിച്ച്’ യഹോവ എന്തു മുൻകൂട്ടിപ്പറഞ്ഞു? (ബി) അമോര്യരെ നീക്കിക്കളയേണ്ടത് ആവശ്യമായിരുന്നത് എന്തുകൊണ്ട്?
12 കനാന്യർക്കെതിരായ ദൈവത്തിന്റെ ന്യായവിധിയുടെ കാര്യത്തിലും അതുതന്നെ സത്യമായിരുന്നു. അബ്രാഹാമിൽനിന്ന് ഒരു “സന്തതി” വരുമെന്നും, ആ സന്തതി മുഖാന്തരം ഭൂമിയിലെ സകല ജനതകളും തങ്ങളെത്തന്നെ അനുഗ്രഹിക്കുമെന്നും യഹോവ വെളിപ്പെടുത്തി. അമോര്യർ എന്നറിയപ്പെട്ടിരുന്ന ഒരു ജനത പാർത്തിരുന്ന കനാൻദേശം അബ്രാഹാമിന്റെ വംശജർക്കു കൊടുക്കുമെന്നു ദൈവം അരുളിച്ചെയ്തു. അമോര്യരെ അവരുടെ ദേശത്തുനിന്ന് ബലമായി ഒഴിപ്പിക്കുന്ന ദൈവിക നടപടി ന്യായമായിരുന്നോ? ‘അമോര്യരുടെ പാപം അതിന്റെ മൂർധന്യത്തിൽ എത്തുന്നതുവരെ’ ഏതാണ്ടു 400 വർഷത്തോളം ഒഴിപ്പിക്കൽ ഉണ്ടാകുകയില്ലെന്നു യഹോവ മുൻകൂട്ടിപ്പറഞ്ഞു.b (ഉൽപത്തി 12:1-3; 13:14, 15; 15:13, 16; 22:18) ആ കാലഘട്ടത്തിൽ അമോര്യർ ധാർമികമായി ഒന്നിനൊന്ന് അധഃപതിച്ചുകൊണ്ടിരിക്കുകയായിരുന്നു. കനാൻ വിഗ്രഹാരാധനയുടെയും രക്തച്ചൊരിച്ചിലിന്റെയും നികൃഷ്ടമായ ലൈംഗിക നടപടികളുടെയും ദേശമായിത്തീർന്നു. (പുറപ്പാട് 23:24; 34:12, 13; സംഖ്യ 33:52) ദേശത്തെ നിവാസികൾ കുഞ്ഞുങ്ങളെ അഗ്നിയിൽ ഹോമിക്കുകപോലും ചെയ്തു. പരിശുദ്ധനായ ഒരു ദൈവത്തിനു തന്റെ ജനത്തെ അത്തരം ദുഷ്ടതയുമായി സമ്പർക്കത്തിൽ വരുത്താൻ കഴിയുമായിരുന്നോ? ഒരിക്കലുമില്ല! ദൈവം ഇങ്ങനെ പ്രഖ്യാപിച്ചു: “ദേശം അശുദ്ധമായിരിക്കുന്നു. അതിന്റെ തെറ്റു കാരണം ഞാൻ അതിനെ ശിക്ഷിക്കും. ദേശം അതിലെ നിവാസികളെ ഛർദിച്ചുകളയുകയും ചെയ്യും.” (ലേവ്യ 18:21-25) എന്നിരുന്നാലും യഹോവ ആ ജനത്തെ വിവേചനാരഹിതമായി കൊന്നൊടുക്കിയില്ല. രാഹാബിനെയും ഗിബെയോന്യരെയും പോലുള്ള നീതിസ്നേഹികൾ ഒഴിവാക്കപ്പെട്ടു.—യോശുവ 6:25; 9:3-27.
തന്റെ നാമത്തിനുവേണ്ടി പോരാടുന്നു
13, 14. (എ) തന്റെ നാമത്തെ വിശുദ്ധീകരിക്കാൻ യഹോവ ബാധ്യസ്ഥനായിരുന്നത് എന്തുകൊണ്ട്? (ബി) യഹോവ തന്റെ നാമത്തിന്മേലുള്ള നിന്ദ നീക്കിയത് എങ്ങനെ?
13 യഹോവ വിശുദ്ധനാകയാൽ, യഹോവയുടെ നാമം വിശുദ്ധമാണ്. (ലേവ്യ 22:32) “അങ്ങയുടെ പേര് പരിശുദ്ധമായിരിക്കേണമേ” എന്നു പ്രാർഥിക്കാൻ യേശു തന്റെ ശിഷ്യന്മാരെ പഠിപ്പിച്ചു. (മത്തായി 6:9) ഏദെനിലെ മത്സരം ദൈവനാമത്തെ അശുദ്ധമാക്കി, ദൈവത്തിന്റെ സത്കീർത്തിയെയും ഭരണരീതിയെയും ചോദ്യം ചെയ്തു. അത്തരം ദൂഷണത്തിനും മത്സരത്തിനും നേരെ കണ്ണടയ്ക്കാൻ യഹോവയ്ക്കു കഴിയുമായിരുന്നില്ല. തന്റെ നാമത്തിന്മേലുള്ള നിന്ദ നീക്കാൻ യഹോവ ബാധ്യസ്ഥനായിരുന്നു.—യശയ്യ 48:11.
14 വീണ്ടും ഇസ്രായേല്യരുടെ കാര്യമെടുക്കുക. അവർ ഈജിപ്തിൽ അടിമകളായിരുന്നിടത്തോളം കാലം, അബ്രാഹാമിന്റെ സന്തതി മുഖാന്തരം ഭൂമിയിലെ സകല കുടുംബങ്ങളും തങ്ങളെത്തന്നെ അനുഗ്രഹിക്കുമെന്ന അബ്രാഹാമിനോടുള്ള വാഗ്ദാനം കഴമ്പില്ലാത്തതായി കാണപ്പെട്ടു. എന്നാൽ അവരെ വിടുവിച്ച് ഒരു ജനതയാക്കിത്തീർക്കുകവഴി യഹോവ തന്റെ നാമത്തിന്മേലുള്ള നിന്ദ നീക്കി. പ്രവാചകനായ ദാനിയേൽ പ്രാർഥിച്ചപ്പോൾ, “ബലമുള്ള കൈകൊണ്ട് ഈജിപ്ത് ദേശത്തുനിന്ന് തന്റെ ജനത്തെ വിടുവിച്ച് കൊണ്ടുവന്ന് തനിക്കുവേണ്ടി . . . ഒരു പേര് നേടിയ ഞങ്ങളുടെ ദൈവമായ യഹോവേ” എന്നാണ് ദൈവത്തെ വിളിച്ചത്.—ദാനിയേൽ 9:15.
15. യഹോവ ജൂതന്മാരെ ബാബിലോണിന്റെ അടിമത്തത്തിൽനിന്നു രക്ഷിച്ചത് എന്തുകൊണ്ട്?
15 തന്റെ നാമത്തിനുവേണ്ടി യഹോവ ഒരിക്കൽക്കൂടി പ്രവർത്തിക്കേണ്ടതുണ്ടെന്ന് ജൂതന്മാർക്കു തോന്നിയ ഒരു സമയത്താണു ദാനിയേൽ ഈ വിധത്തിൽ പ്രാർഥിച്ചത് എന്നതു താത്പര്യജനകമാണ്. അനുസരണംകെട്ട ജൂതന്മാർ പ്രവാസത്തിലായിരുന്നു, ഈ പ്രാവശ്യം ബാബിലോണിൽ. അവരുടെ സ്വന്തം തലസ്ഥാന നഗരമായ യരുശലേം ശൂന്യമായി കിടക്കുകയായിരുന്നു. സ്വദേശത്തേക്കുള്ള ജൂതന്മാരുടെ പുനഃസ്ഥാപനം യഹോവയുടെ നാമത്തെ മഹിമപ്പെടുത്തുമെന്നു ദാനിയേലിന് അറിയാമായിരുന്നു. ദാനിയേൽ ഇങ്ങനെ പ്രാർഥിച്ചു: “യഹോവേ, ക്ഷമിക്കേണമേ. യഹോവേ, ഞങ്ങളെ ശ്രദ്ധിച്ച് ഞങ്ങൾക്കുവേണ്ടി പ്രവർത്തിക്കേണമേ! അങ്ങയുടെ നഗരവും അങ്ങയുടെ ജനവും അങ്ങയുടെ പേരിലാണല്ലോ അറിയപ്പെടുന്നത്. അതുകൊണ്ട് എന്റെ ദൈവമേ, അങ്ങയെ കരുതി താമസിക്കരുതേ!”—ദാനിയേൽ 9:18, 19.
തന്റെ ജനത്തിനുവേണ്ടി പോരാടുന്നു
16. തന്റെ നാമത്തിനുവേണ്ടി പ്രവർത്തിക്കാനുള്ള യഹോവയുടെ താത്പര്യം, യഹോവ വികാരശൂന്യനോ സ്വാർഥനോ ആണെന്ന് അർഥമാക്കുന്നില്ലാത്തത് എന്തുകൊണ്ടെന്നു വിശദമാക്കുക.
16 തന്റെ നാമത്തിനുവേണ്ടി പ്രവർത്തിക്കാനുള്ള യഹോവയുടെ താത്പര്യം, യഹോവ വികാരശൂന്യനും സ്വാർഥനുമാണെന്ന് അർഥമാക്കുന്നുവോ? ഇല്ല, എന്തെന്നാൽ തന്റെ വിശുദ്ധിക്കും നീതിയോടുള്ള സ്നേഹത്തിനും അനുസൃതമായി പ്രവർത്തിക്കുകവഴി യഹോവ തന്റെ ജനത്തെ സംരക്ഷിക്കുന്നു. ഉൽപത്തി 14-ാം അധ്യായം പരിചിന്തിക്കുക. അബ്രാഹാമിന്റെ സഹോദരപുത്രനായ ലോത്തിനെയും കുടുംബത്തെയും തട്ടിക്കൊണ്ടുപോയ ആക്രമണകാരികളായ നാലു രാജാക്കന്മാരെക്കുറിച്ച് അവിടെ നാം വായിക്കുന്നു. ദൈവത്തിന്റെ സഹായത്തോടെ അബ്രാഹാം അതിശക്തരായ സൈന്യങ്ങളെ ദയനീയമായി പരാജയപ്പെടുത്തി! ഈ വിജയത്തെക്കുറിച്ചുള്ള വിവരണം ‘യഹോവയുടെ യുദ്ധപുസ്തകത്തിലെ’ ആദ്യരേഖ ആയിരിക്കാനിടയുണ്ട്. (സംഖ്യ 21:15) സാധ്യതയനുസരിച്ച്, ബൈബിളിൽ രേഖപ്പെടുത്തിയിട്ടില്ലാത്ത ചില സൈനിക സംഘട്ടനങ്ങളെ കുറിച്ചുള്ള വിവരണങ്ങളും ഈ പുസ്തകത്തിൽ ഉണ്ടായിരുന്നിരിക്കാം. കൂടുതൽ വിജയങ്ങൾ വരാനിരിക്കുകയായിരുന്നു.
17. ഇസ്രായേല്യർ കനാൻദേശത്ത് പ്രവേശിച്ചശേഷം യഹോവ അവർക്കുവേണ്ടി യുദ്ധം ചെയ്തെന്ന് എന്തു പ്രകടമാക്കുന്നു? ഉദാഹരണങ്ങൾ നൽകുക.
17 ഇസ്രായേല്യർ കനാൻദേശത്ത് പ്രവേശിക്കുന്നതിന് അൽപ്പകാലം മുമ്പ് മോശ അവർക്ക് ഈ ഉറപ്പുകൊടുത്തു: “ഈജിപ്തിൽ നിങ്ങളുടെ കൺമുന്നിൽവെച്ച് ചെയ്തതുപോലെ നിങ്ങളുടെ ദൈവമായ യഹോവ നിങ്ങൾക്കു മുമ്പായി പോകുകയും നിങ്ങൾക്കുവേണ്ടി പോരാടുകയും ചെയ്യും.” (ആവർത്തനം 1:30; 20:1) മോശയുടെ പിൻഗാമിയായ യോശുവയുടെ കാലം മുതൽ ന്യായാധിപന്മാരുടെ കാലത്തും യഹൂദയിലെ വിശ്വസ്ത രാജാക്കന്മാരുടെ വാഴ്ചക്കാലത്തൊക്കെയും യഹോവ തന്റെ ജനത്തിനുവേണ്ടി യുദ്ധം ചെയ്യുകയും അവരുടെ ശത്രുക്കളുടെമേൽ അവർക്കു ഗംഭീര വിജയങ്ങൾ നേടിക്കൊടുക്കുകയും ചെയ്തു.—യോശുവ 10:1-14; ന്യായാധിപന്മാർ 4:12-17; 2 ശമുവേൽ 5:17-21.
18. (എ) യഹോവയ്ക്കു മാറ്റമുണ്ടായിട്ടില്ല എന്നതിൽ നമുക്കു നന്ദിയുള്ളവർ ആയിരിക്കാൻ കഴിയുന്നത് എന്തുകൊണ്ട്? (ബി) ഉൽപത്തി 3:15-ൽ വർണിച്ചിരിക്കുന്ന ശത്രുത അതിന്റെ പാരമ്യത്തിലെത്തുമ്പോൾ എന്തു സംഭവിക്കും?
18 യഹോവയ്ക്കു മാറ്റമുണ്ടായിട്ടില്ല; ഈ ഗ്രഹത്തെ സമാധാനം കളിയാടുന്ന ഒരു പറുദീസയാക്കാനുള്ള യഹോവയുടെ ഉദ്ദേശ്യത്തിനും മാറ്റമുണ്ടായിട്ടില്ല. (ഉൽപത്തി 1:27, 28) ദൈവം ഇപ്പോഴും ദുഷ്ടതയെ വെറുക്കുന്നു. അതേസമയം ദൈവം തന്റെ ജനത്തെ അങ്ങേയറ്റം സ്നേഹിക്കുന്നു, അവർക്കുവേണ്ടി താമസിയാതെ പ്രവർത്തിക്കുകയും ചെയ്യും. (സങ്കീർത്തനം 11:7) യഥാർഥത്തിൽ, ഉൽപത്തി 3:15-ൽ വിവരിച്ചിരിക്കുന്ന ശത്രുത സമീപ ഭാവിയിൽ വിസ്മയാവഹവും ഭയജനകവുമായ ഒരു വഴിത്തിരിവിൽ എത്തുമെന്നു പ്രതീക്ഷിക്കപ്പെടുന്നു. തന്റെ നാമത്തെ വിശുദ്ധീകരിക്കുന്നതിനും തന്റെ ജനത്തെ സംരക്ഷിക്കുന്നതിനും യഹോവ വീണ്ടും ഒരു “യുദ്ധവീരൻ” ആയിത്തീരും.—സെഖര്യ 14:3; വെളിപാട് 16:14, 16.
19. (എ) ദൈവം തന്റെ സംഹാരശക്തി ഉപയോഗിക്കുന്ന വിധത്തിന് നമ്മെ ദൈവത്തിലേക്ക് അടുപ്പിക്കാനാകും എന്നതിന്റെ കാരണം ദൃഷ്ടാന്തത്താൽ വിശദമാക്കുക. (ബി) യുദ്ധം ചെയ്യാനുള്ള ദൈവത്തിന്റെ സന്നദ്ധതയ്ക്ക് നമ്മുടെമേൽ എന്തു ഫലം ഉണ്ടായിരിക്കണം?
19 ഒരു ദൃഷ്ടാന്തം പരിചിന്തിക്കുക: ഒരു മനുഷ്യന്റെ കുടുംബത്തെ ഒരു ഹിംസ്രമൃഗം ആക്രമിക്കുന്നുവെന്നിരിക്കട്ടെ. ആ മനുഷ്യൻ രംഗത്തേക്കു ചാടിയിറങ്ങി ഘോരമൃഗത്തെ കൊല്ലുന്നു. അങ്ങനെ ചെയ്തതിന്റെ പേരിൽ ഭാര്യയും കുട്ടികളും അദ്ദേഹത്തെ വെറുക്കുമെന്നു നിങ്ങൾക്കു തോന്നുന്നുണ്ടോ? മറിച്ച്, അവരോടുള്ള അദ്ദേഹത്തിന്റെ നിസ്വാർഥ സ്നേഹം അവരുടെ ഹൃദയത്തെ ആഴമായി സ്പർശിക്കാൻ നിങ്ങൾ പ്രതീക്ഷിക്കും. സമാനമായി, ദൈവം തന്റെ സംഹാരശക്തി ഉപയോഗിക്കുന്നത് നമുക്ക് ദൈവത്തോട് വെറുപ്പു തോന്നാൻ ഇടയാക്കരുത്. നമ്മെ സംരക്ഷിക്കുന്നതിനായി പൊരുതുന്നതിനുള്ള ദൈവത്തിന്റെ സന്നദ്ധത ദൈവത്തോടുള്ള നമ്മുടെ സ്നേഹത്തെ വർധിപ്പിക്കേണ്ടതാണ്. ദൈവത്തിന്റെ അപരിമിതമായ ശക്തിയോടുള്ള നമ്മുടെ ആദരവിനും ആഴം കൂടണം. അങ്ങനെ, “ദൈവം അംഗീകരിക്കുന്ന വിധത്തിൽ ഭയഭക്തിയോടെ നമുക്കു ദൈവത്തെ സേവിക്കാം.”—എബ്രായർ 12:28.
‘യുദ്ധവീരനോട്’ അടുത്ത് ചെല്ലുക
20. നമുക്കു പൂർണമായി ഗ്രഹിക്കാൻ കഴിയാത്ത ദിവ്യയുദ്ധങ്ങളെ കുറിച്ചുള്ള ബൈബിൾ വിവരണങ്ങൾ വായിക്കുമ്പോൾ നാം എങ്ങനെ പ്രതികരിക്കണം, എന്തുകൊണ്ട്?
20 തീർച്ചയായും, ബൈബിൾ ഓരോ സന്ദർഭത്തിലും ദിവ്യ യുദ്ധങ്ങൾ സംബന്ധിച്ച യഹോവയുടെ തീരുമാനങ്ങളുടെ എല്ലാ വിശദാംശങ്ങളും നൽകുന്നില്ല. എന്നാൽ നമുക്ക് എല്ലായ്പോഴും ഈ ഉറപ്പുണ്ടായിരിക്കാൻ കഴിയും: യഹോവ ഒരിക്കലും നീതിനിഷ്ഠമല്ലാത്തതോ അനിയന്ത്രിതമോ ക്രൂരമോ ആയ വിധത്തിൽ സംഹാരശക്തി പ്രയോഗിക്കുകയില്ല. മിക്കപ്പോഴും ബൈബിൾവിവരണത്തിന്റെ സന്ദർഭമോ അൽപ്പം പശ്ചാത്തല വിവരങ്ങളോ പരിചിന്തിക്കുന്നത് കാര്യങ്ങളെ ശരിയായി വീക്ഷിക്കാൻ നമ്മെ സഹായിക്കും. (സുഭാഷിതങ്ങൾ 18:13) എല്ലാ വിശദാംശങ്ങളും ലഭ്യമല്ലാത്തപ്പോൾപ്പോലും യഹോവയെക്കുറിച്ച് കൂടുതൽ പഠിക്കുന്നതും യഹോവയുടെ വിലയേറിയ ഗുണങ്ങളെക്കുറിച്ച് ധ്യാനിക്കുന്നതും ഉയർന്നുവരാവുന്ന ഏതു സംശയങ്ങളെയും നിവാരണം ചെയ്യാൻ നമ്മെ സഹായിച്ചേക്കാം. അങ്ങനെ ചെയ്യുമ്പോൾ, നമ്മുടെ ദൈവമായ യഹോവയെ ആശ്രയിക്കുന്നതിനു നമുക്കു മതിയായ കാരണമുണ്ടെന്നു നാം മനസ്സിലാക്കും.—ഇയ്യോബ് 34:12.
21. യഹോവ ചില സമയങ്ങളിൽ ഒരു “യുദ്ധവീരൻ” ആണെങ്കിലും യഹോവ ഹൃദയത്തിൽ എങ്ങനെയുള്ളവൻ ആണ്?
21 സാഹചര്യം ആവശ്യമാക്കിത്തീർക്കുമ്പോൾ യഹോവ ഒരു “യുദ്ധവീരൻ” ആയിത്തീരുമെങ്കിലും യഹോവ ഹൃദയത്തിൽ യുദ്ധപ്രിയനാണെന്ന് അതിന് അർഥമില്ല. സ്വർഗീയരഥത്തെ കുറിച്ചുള്ള യഹസ്കേലിന്റെ ദർശനത്തിൽ യഹോവ തന്റെ ശത്രുക്കൾക്കെതിരെ യുദ്ധം ചെയ്യാൻ ഒരുങ്ങിനിൽക്കുന്നതായി വർണിച്ചിരിക്കുന്നു. എന്നിരുന്നാലും, സമാധാനത്തിന്റെ ഒരു പ്രതീകമായ മഴവില്ല് ദൈവത്തെ വലയം ചെയ്തിരിക്കുന്നതു യഹസ്കേൽ കണ്ടു. (ഉൽപത്തി 9:13; യഹസ്കേൽ 1:28; വെളിപാട് 4:3) യഹോവ ശാന്തനും സമാധാന കാംക്ഷിയുമാണെന്നു വ്യക്തമാണ്. “ദൈവം സ്നേഹമാണ്” എന്ന് അപ്പോസ്തലനായ യോഹന്നാൻ എഴുതി. (1 യോഹന്നാൻ 4:8) യഹോവയുടെ എല്ലാ ഗുണങ്ങളും പൂർണ സമനിലയിലാണ്. അപ്പോൾ, ഇത്ര ശക്തനും സ്നേഹവാനുമായ ഒരു ദൈവത്തോട് അടുത്ത് ചെല്ലാൻ കഴിയുന്നത് നമ്മെ സംബന്ധിച്ചിടത്തോളം എത്ര വലിയ പദവിയാണ്!
a ജൂതചരിത്രകാരനായ ജോസീഫസ് പറയുന്നതനുസരിച്ച്, “600 രഥങ്ങളും 50,000 കുതിരപ്പടയാളികളും 2,00,000-ത്തോളം വരുന്ന ആയുധസജ്ജരായ കാലാൾപ്പടയുമാണ് [എബ്രായരെ] പിന്തുടർന്നത്.”—ജൂതന്മാരുടെ പുരാവൃത്തങ്ങൾ (ഇംഗ്ലീഷ്), II, 324 [xv, 3].
b തെളിവനുസരിച്ച്, ഇവിടെ “അമോര്യർ” എന്ന പദം കനാനിലെ സകല ജനങ്ങളെയും ഉൾപ്പെടുത്തുന്നു.—ആവർത്തനം 1:6-8, 19-21, 27; യോശുവ 24:15, 18.